О Јехова мангела сарине те каинен пе

1. Со значинела некој те каинел пе?

КЕДА ка кера нешто погрешно, бут тано важно те каина амен. Спрема и Библија, јекх мануш каинела пе кеда леске жал баши грешка со керѓа ла, чхинавела те керел ла хем одлучно тано никогаш више те на повторинел ла (Мат. 3:8; Апо. 3:19; 2. Пет. 3:9).

2. Соске сарине ваљани те сикљова башо каибе? (Неемија 8:9-11).

² Секова мануш ваљани те сикљол башо каибе. Соске? Адалеске со сарине амен грешинаја секова диве. Сар чхаве е Адамескере хем е Евакере, сарине амен наслединѓем грево хем мерибе (Рим. 3:23; 5:12). Никој амендар нашти те нашел таро адава. Чак о мануша со сине лен бари вера, сар со сине о апостол Павле, боринена пе сине против о грево (Рим. 7:21-24). Дали акава значинела кај цело време ваљани те ова разочариме башо амаре гревија? На. О Јехова тано милостиво хем мангела те ова среќна. Размислин башо Евреија со живинена сине ко време е Неемијаскоро. (Читин Неемија 8:9-11.) О Јехова на мангља те овен пхаге тари дукх башо гревија со керѓе лен англедер, него мангља радосно те обожавинен ле. О Јехова џанела кај кеда каинаја амен адава поможинела амен те ова радосна. Адалеске, ов сикавела амен башо каибе. Ако каинаја амен башо амаре гревија, шај те ова увериме кај амаро милостиво Дад ка простинел аменге.

3. Со ка дикха ки акаја статија?

³ Ки акаја статија ка сикљова нешто повише башо каибе. Ка дикха трин буќа. Прво, ка дознајна со сикавѓа о Јехова е Израелцон башо каибе. Пало адава, ка дикха сар о Јехова поможинѓа околенге со грешинѓе те авен џи ко адава те каинен пе. Ко крајо, ка дикха со сиклиле е Исусескере следбеникија башо каибе.

СО СИКАВЃА О ЈЕХОВА Е ИЗРАЕЛЦОН БАШО КАИБЕ

4. Со сикавѓа о Јехова е Израелцон башо каибе?

⁴ Кеда о Јехова организиринѓа е Израелцон сар народо, ов керѓа ленцар сојуз, јавере лафенцар јекх договор. О Јехова ветинѓа ленге кај ако икерена лескере заповедија, ов ка заштитинел лен хем ка благословинел лен. Башо пле законија ов вакерѓа ленге: „Соске, акаја заповед со дава ла туке авдиве нане туке бут пхари хем нане тутар бут дур“ (5. Мој. 30:11, 16). Ама ако ола чхинавена сине те икерен лескере заповедија или биринена сине те служинен јавере девленге, ов нане сине више те заштитинел лен хем ола ка трпинен сине последице. Ама, адава на значинела сине кај нашти палем те овел лен е Девлескири милост. Ола шај сине те иранен пе ко Јехова пумаро Девел хем те шунен лескоро гласо (5. Мој. 30:1-3, 17-20). Јавере лафенцар, ола шај сине те каинен пе. Ако керена сине адава, о Јехова палем ка овел сине ленцар паше хем ка благословинел лен.

5. Сар о Јехова сикавѓа кај на откажинѓа пе таро пло народо? (2. Царевите 17:13, 14).

⁵ Е Девлескоро биримо народо бут пути бунинела пе сине против о Јехова. Освен со обожавинена сине јавере девлен, ола керена сине хем јавера страшна буќа. Адалеске трпинена сине последице. Ама о Јехова на откажинѓа пе таро пло тврдоглаво народо. Ов секова пути бичхалела сине пророкија те шај те поттикнинел пле народо те каинел пе хем те иранел пе ки лесте. (Читин 2. Царевите 17:13, 14.)

6. Сар о Јехова користинѓа пле пророкон те шај те сикавел пле народо кобор тано важно те каинел пе? (Дикх хем и слика.)

⁶ О Јехова бут пути користинѓа пле пророкон те шај те предупрединел пле народо хем те поможинел леске те на грешинел више. На пример, преку о Еремија о Девел вакерѓа: „Иран тут Израел, ту која со сиан бунтовно!... Нане те хољанав туке, соске ме сиум верно... Нане засекогаш те овав хољамо. Хаљов о пхарипе тле гревоскоро, соске грешинѓан против о Јехова“ (Ерем. 3:12, 13). Преку о Јоил, о Јехова вакерѓа: „Иранен тумен ки манде цело тумаре вилеа“ (Јоил 2:12, 13). Ов пхенѓа е Исаијаске те вакерел: „Чистинен тумен, чхинавен англо мле јакхја те керен лошна буќа. Ма керен више лошнипе“ (Иса. 1:16-19). А преку о Езекиел, о Јехова пучља: „Зарем манге мило те мерел окова со керела лошнипе... а на те иранел пе таро пле друмија хем те ачховел џивдо? Нане манге ни хари мило некој те мерел... Адалеске, чхинавен те грешинен хем живинен!“ (Езек. 18:23, 32). Е Јеховаске тано бут мило кеда дикхела кај о мануша каинена пе башо пумаре гревија соске ов мангела о мануша те живинен засекогаш! Адалеске о Јехова на аџикерела некој те менинел пе, па чак тегани те поможинел леске. Те дикха несаве јавера примерија башо акава.

7. Сави поука денѓа о Јехова пле народоске преку о извештај башо пророко о Осија хем баши лескири ромни?

⁷ Приметин сави поука денѓа о Јехова пле народоске преку о пророко о Осија хем преку лескири ромни и Гомера. Откеда керѓа прељуба ој мукхља е Осија башо јавер мануш. Дали на сине шансе ој те каинел пе? О Јехова кова со шај те читинел о виле вакерѓа е Осијаске: „Џа хем палем манг е ромња кола со јавер мангела ла хем која со керела прељуба“, сар со о Јехова мангела е Израелескере чхавен, џикоте ола иранена пе ко јавера девела“ (Оси. 3:1; Изр. 16:2). Приметин кај е Осијаскири ромни понадари да керела сине пхаро грево. Сепак, о Јехова вакерѓа е Осијаске те џал ки лате, те дел ла прилика те смиринен пе хем те простинел лаке.a Слично, о Јехова на откажинѓа пе таро пло тврдоглаво народо. Иако ола понадари да керена сине пхаре гревија, ов панда мангела лен сине. Ов продолжинѓа те бичхалел пле пророкон те шај те поможинел ленге те каинен пе хем те променинен пе. Дали акава пример сикавела кај о Јехова кова со „испитинела о виле“ ка пробинел те поможинел некаске со понадари керела пхаро грево те каинел пе? (Изр. 17:3). Ајде те дикха.

САР О ЈЕХОВА ПОМОЖИНЕЛА Е МАНУШЕНГЕ ТЕ АВЕН ЏИ КО АДАВА ТЕ КАИНЕН ПЕ

8. Со керѓа о Јехова те шај те поможинел е Каинеске те каинел пе? (1. Мојсеева 4:3-7; дикх хем и слика.)

⁸ О Каин сине о прво чхаво е Адамескоро хем е Евакоро. Ов наслединѓа о грево таро пле родителија. Освен адава, баши леске и Библија вакерела: „Ов керела сине лошна буќа“ (1. Јов. 3:12). Шај адалеске о Јехова на дикхља шукар ко Каин хем на прифатинѓа лескири жртва. Наместо те променинел пле постапке, о Каин бут хољанѓа хем сине разочаримо. Со керѓа о Јехова пало адава? Ов керѓа лафи е Каинеа. (Читин 1. Мојсеева 4:3-7.) Приметин кај о Јехова керѓа љубезно лафи е Каинеа, вакерѓа леске кај ка благословинел ле ако каинела пе хем предупрединѓа ле кај тано ки опасност те керел грево. Жално тано адава со о Каин на шунѓа е Јехова. Ов на мукхља о Јехова те поможинел леске те каинел пе. Откеда о Каин одбинѓа и помош таро Јехова, дали о Девел чхинавѓа те поможинел е манушенге те каинен пе башо пумаре гревија? Ни најхари!

9. Сар о Јехова поможинѓа е Давидеске те каинел пе?

⁹ О Јехова бут мангља е царе е Давиде. Ов чак баши лесте вакерѓа кај „тано мануш спрема [лескоро] вило“ (Апо. 13:22). Ама, о Давид керѓа пхаре гревија, машкар коленде со сине прељуба хем мударибе. Спрема е Мојсеескоро закони, о Давид заслужинѓа те мерел (3. Мој. 20:10; 4. Мој. 35:31). Ама, о Јехова мангља те поможинел е Давидеске те каинел пе.b Ов бичхалѓа пле пророко е Натане ко Давид иако ов панда на сикавѓа нисаво знако кај каинела пе. О Натан користинѓа јекх споредба те шај те ресел џи ко е Давидескоро вило. Ов халило кај бут поврединѓа е Јехова хем адалеске каинѓа пе (2. Сам. 12:1-14). Ов хор таро вило пишинѓа јекх псалм кова со сикавела кобор сине леске жал башо адава со керѓа (Пс. 51, натпис). Акава псалм утешинѓа буте манушен кола со керѓе несаво грево хем поттикнинѓа лен те каинен пе. Бут сием благодарна со о Јехова поможинѓа пле мангле слугаске е Давидеске те каинел пе.

10. Сар осетинеа тут башо адава со џанеа кај о Јехова тано стрпливо аменцар хем простинела аменге?

¹⁰ О Јехова мрзинела секова грево (Пс. 5:4, 5). Ама, ов џанела кај сарине амен сием грешникија хем адалеске со мангела амен ов одлучинела те поможинел аменге те борина амен против о грево. Ов секогаш пробинела те поможинел чак е најбаре грешниконге те каинен пе хем те овен леа паше. Акава тано бут утешно! Кеда размислинаја баши е Јеховаскири стрпливост хем спремност те простинел, амен сием одлучна те ачхова леске верна хем сигате те каина амен кеда ка грешина. Акана те дикха со сикавѓа о Исус пле ученикон башо каибе.

СО СИКЛИЛЕ Е ИСУСЕСКЕРЕ СЛЕДБЕНИКИЈА БАШО КАИБЕ

11-12. Со сикавѓа о Исус пле ученикон башо пло Дад преку јекх споредба? (Дикх и слика тари страна.)

¹¹ Ко прво веко тари а.е., ало о време те појавинел пе о Месија. Сар со сине спомнимо ки англуни статија, преку о Јован Крстител хем о Исус Христос, о Јехова сикавѓа е манушен кобор тано важно те каинен пе (Мат. 3:1, 2; 4:17).

¹² Џикоте керела сине пли служба ки пхув, о Исус сикавѓа е манушен кобор бут лескоро Дад тано спремно те простинел кеда грешинаја. О Исус керѓа адава аѓаар со вакерѓа јекх бут шужи споредба башо јекх чхаво со нашавдило. Адава терно мануш одлучинѓа те џал песке кхералдан хем керела сине бут лошна буќа. Ама, пало несаво време ов халило пли грешка хем иранѓа пе кхере. Сар реагиринѓа лескоро дад? О Исус вакерѓа кај џикоте панда сине дур, лескоро дад дикхља ле хем прастандило, гушинѓа ле хем чуминѓа ле. О чхаво на очекујнѓа о дад те простинел леске хем адалеске пучља ле дали шај те керел бути ки лесте сар јекх таро лескере слуге. Ама о дад спремно простинѓа леске хем викинѓа ле „мо чхаво“ хем приминѓа ле палем те овел дело тари фамилија. О дад вакерѓа: „Мо чхаво... нашавдило хем акана иранѓа пе“ (Лука 15:11-32). Кеда о Исус живинела сине ко небо ов сигурно дикхља сар лескоро Дад сикавѓа асавко сочувство буте грешниконге кола со каинѓе пе. Акаја споредба која со о Исус вакерѓа ла бут утешинела амен хем сикавела кобор милостиво тано амаро Дад о Јехова.

13-14. Со сиклило о апостол Петар башо каибе, хем со сикавѓа е јаверен башо адава? (Дикх хем и слика.)

¹³ О апостол Петар сиклило важна поуке таро Исус башо адава сар о Јехова простинела околенге со каинена пе. О Петар бут пути грешинѓа, а о Исус дарежливо простинѓа леске. На пример, откеда трин пути вакерѓа кај на пенџарела пле Господаре, о Петар сине пхаго тари дукх соске осетинела пе сине бут криво (Мат. 26:34, 35, 69-75). Ама, откеда о Исус воскреснинѓа, појавинѓа пе е Петареске кеда ов сине коркори те шај те керел леа лафи (Лука 24:33, 34; 1. Кор. 15:3-5). Сигурно, о Исус џанља кај о Петар каинела пе хем мангља те уверинел ле кај простинѓа леске.

¹⁴ Акана о Петар таро лично искуство шај сине те сикавел е јаверен башо каибе хем башо простибе. Несаво време пало празнико Педесетница, о Петар икерѓа говор англо бут Евреија колесте со објаснинѓа кај ола мударѓе е Месија. Сепак, љубезно поттикнинѓа лен: „Каинен тумен хем иранен тумен ко Девел те шај те косен пе тумаре гревија, хем о Јехова те иранел тумари сила“ (Апо. 3:14, 15, 17, 19). Значи акалеа о Петар сикавѓа кај о каибе поттикнинела јекхе грешнико те иранел пе, јавере лафенцар те променинел пло погрешно начин сар размислинела хем сар постапинела хем те почминел те керел адава со радујнкерела е Девле. Исто аѓаар, о апостоли вакерѓа адале Евреенге кај о Јехова ка косел ленгере гревија, јавере лафенцар целосно ка простинел ленге сар ка пхене никогаш на сине керде. Бут берша покасно, о Петар уверинѓа е христијанен: „О Јехова... тано стрпливо туменцар хем на мангела никој те овел уништимо него саринен те овел лен прилика те каинен пе“ (2. Пет. 3:9). Бут утешинела амен адава со џанаја кај о Јехова целосно ка простинел аменге ако каинаја амен башо амаре гревија, чак ако ола тане бут баре!

15-16. а) Сар о апостол Павле сиклило кобор о Јехова простинела? (1 Тимотеј 1:12-15). б) Со ка дикха ки следно статија?

¹⁵ О Савле таро Тарс сине мануш кова со керѓа бут лошна буќа. Ов насилно прогонинела сине е Христосескере следбеникон. Повише христијања веројатно мислинена сине кај ов никогаш нане те променинел пе хем те каинел пе. Ама, о Исус размислинела сине бут појавер таро јекх несовршено мануш. О Исус хем лескоро Дад дикхле о шукар особине ко Савле. О Исус вакерѓа: „Ме биринѓум акале мануше“ (Апо. 9:15). О Исус чак користинѓа чудо те шај те поможинел е Савлеске те каинел пе (Апо. 7:58 — 8:3; 9:1-9, 17-20). Откеда уло христијани, о Савле — кова со покасно уло пенџардо сар апостол Павле — бут пути вакерела сине кобор тано благодарно башо адава сар о Јехова хем о Исус сикавѓе леске милост хем шукарипе. (Читин 1. Тимотеј 1:12-15.) О Павле вакерѓа е пхраленге хем е пхењенге кај „о Девел љубезно трудинела пе те поможинел“ лен те каинен пе (Рим. 2:4).

¹⁶ Ки јекх прилика, о Павле шунѓа кај о собрание ко Коринт дозволинела јекх мануш кова со керела сине сексуално неморал те ачхол ко собрание. Со вакерѓа о Павле адале христијаненге те керен? Таро адава со вакерѓа шај те сикљова кај о Јехова сикавела мангипе кеда укоринела пле слуген хем кај сикавела милост кеда ола ка каинен пе. Исто аѓаар, ка сикљова сар те џа пало лескоро пример. Ки следно статија подетално ка дикха со случинѓа пе ко собрание ко Коринт.