Ов уверимо кај о Јехова простинѓа туке

1-2. Со керела о Јехова кеда каинаја амен башо амаре гревија? (Дикх хем и слика.)

О ЦАРИ о Давид, џанља сар и те осетине тут криво башо гревија со керѓан лен англедер (Пс. 40:12; 51:3, натпис). Ов керѓа несаве баре грешке ко пло живото. Сепак искрено каинѓа пе хем о Јехова простинѓа леске (2. Сам. 12:13). Адалеске, о Давид џанља кобор шај те локхјарел туке адава со простинела о Јехова (Пс. 32:1).

² Исто сар о Давид, аменге да шај те локхјол кеда џанаја кај о Јехова сикавѓа аменге милост хем простинѓа аменге. Бут утешинела амен со џанаја кај о Јехова тано спремно те простинел амаре гревија — чак хем окола сој бут баре — ако искрено каинаја амен, ако признајнаја лен хем ако бут трудинаја амен те на кера лен палем (Изр. 28:13; Апо. 26:20; 1. Јов. 1:9). Хем, бут сием радосна со џанаја кај кеда ов простинела адава тано сар те пхене никогаш на керѓем адава грево! (Езек. 33:16).

3-4. Сар осетинѓа пе јекх пхен откеда крстинѓа пе, хем со ка дикха ки акаја статија?

³ Сепак, несавенге понекогаш тано пхаро те уверинен пе кај о Јехова простинѓа ленге. Баш аѓаар осетинела пе сине и Џенифер, која со барили ко чачипе. Кеда сине тинејџерка почминѓа те керел погрешна буќа хем те живинел дволично. Ама некобор берша покасно, ој керѓа промене хем денѓа лафи кај ка служинел е Јеховаске цело живото хем крстинѓа пе. И Џенифер вакерела: „Англедер бут бути керава сине сексуално неморал, маќовава сине, сиум сине бут хољами хем о паре сине манге нешто најважно ко живото. Тари Библија џанава сине кај адалеске со сине денди е Христосескири жртва, о Јехова шај те простинел амаре гревија. Ама, нашти сине те уверинав мло вило кај о Јехова простинѓа манге“.

⁴ Дали понекогаш туке пхаро те уверине тло вило кај о Јехова простинѓа о гревија со керѓан лен англедер? Ов мангела те ова сигурна кај тано милостиво, исто сар со сине сигурно о Давид. Ки акаја статија ка дикха соске ваљани те уверина амен кај о Јехова простинѓа аменге хем со шај те поможинел амен ко адава.

СОСКЕ ТАНО ВАЖНО ТЕ УВЕРИНА АМЕН КАЈ О ЈЕХОВА ПРОСТИНЃА АМЕНГЕ?

5. Ко со мангела о Сатана те верујна? Вакер пример.

⁵ Ако верујнаја кај о Јехова мангела амен хем кај простинѓа аменге, нане те пера ки јекх таро стапице е Сатанаскере. Ма бистре кај о Сатана ка керел са со шај те чхинавел амен те служина е Јеховаске. Те шај те успејнел ки пли цел, о Сатана шај те пробинел те чхивел амен те верујна кај амаре гревија тане добором баре со о Јехова никогаш нане те простинел лен. Те дикха о пример е манушескоро таро Коринт, кова со сине цидимо таро собрание адалеске со керѓа сексуално неморал (1. Кор. 5:1, 5, 13). Ов покасно каинѓа пе. Ама, о Сатана мангља о пхраља хем о пхења таро собрание те на простинен леске хем аѓаар те авел џи ко адава те на манген палем те иранен ле ко собрание. Ко исто време, о Сатана мангља о мануш со каинѓа пе те мислинел кај о Јехова никогаш ка нашти те простинел леске хем „и бут бари жал“ те перавел ле со чак ка чхинавел те служинел е Јеховаске. Е Сатана понадари да иси ле исто цел хем користинела иста тактике. Ама, „амен бут шукар џанаја лескере намере“ (2. Кор. 2:5-11).

6. Со ка поможинел амен те на осетина амен крива башо гревија со керѓем лен англедер?

⁶ Ако верујнаја кај о Јехова простинѓа аменге, ка чхинава те осетина амен крива. Кеда грешинаја нормално тано те осетина амен крива (Пс. 51:17). Адава тано шукар, адалеске со ако хаљоваја кај керѓем нешто погрешно, адава шај те поттикнинел амен те кера промене хем те почмина те кера адава сој исправно (2. Кор. 7:10, 11). Ама, ако понадари да осетинаја амен крива бут време откеда каинѓем амен, шај добором те обесхрабрина амен со ка чхинава те служина е Јеховаске. Ама, ако верујнаја кај о Јехова простинѓа аменге ка шај те овел амен чисто совест хем бари радост џикоте служинаја леске (Кол. 1:10, 11; 2. Тим. 1:3). Ама, сар шај те уверина амаро вило кај о Девел простинѓа аменге?

СО ШАЈ ТЕ ПОМОЖИНЕЛ АМЕН ТЕ УВЕРИНА АМЕН КАЈ О ЈЕХОВА ПРОСТИНЃА АМЕНГЕ?

7-8. Со вакерѓа о Јехова баши песте хем ко со шај те ова увериме? (2. Мојсеева 34:6, 7).

⁷ Размислин башо адава со о Јехова вакерѓа баши песте. На пример, приметин со вакерѓа о Јехова е Мојсееске ки планина Синај.a (Читин 2. Мојсеева 34:6, 7.) Иако е Јехова иси ле бут шуже особине, ов одлучинѓа те вакерел е Мојсееске кај тано „Девел сој милостиво хем... пхердо тано верно мангипе“. Дали асавко Девел би одлучинела те на простинел несаве слугаске кова со чаче каинела пе башо пло грево? Адава ни нашти те замислина аменге! О Јехова никогаш на би постапинела добором лошно хем бизо милост.

⁸ Шај те ова сигурна кај кеда вакерела кај тано милостиво, о Јехова вакерела о чачипе. Ов никогаш на ховавела (Пс. 31:5). Адалеске шај те верујна ко адава со вакерела. Ако туке пхаро те на осетине тут више криво башо гревија со керѓан лен англедер, пуч тут: „Дали верујнава кај о Јехова чаче тано милостиво хем сочувствително хем кај ка простинел секоле јекхеске со ка каинел пе башо пле гревија? Тегани, зарем на ваљани те верујнав кај о Јехова простинѓа манге да?“

9. Со сикљоваја таро Псалм 32:5 башо начин сар о Јехова простинела амаре гревија?

⁹ Размислин со сикавела амен о Јехова ки Библија башо адава сар простинела. На пример, те дикха сар о библиско писатели о Давид опишинѓа о начин сар о Јехова простинела. (Читин Псалм 32:5.) Ов вакерѓа: „Ту простинѓан мли грешка хем мле гревија“. О хебрејско лафи кова со ко акава стихо тано преведимо е лафеа „простинѓан“ исто аѓаар шај те значинел „ваздела“ или „ингарела“. Кеда простинѓа е Давидеске о Јехова сар те пхене ваздинѓа лескере гревија хем ингарѓа лен. Пало адава, е Давидеске локхило таро пхарипе со осетинела ле сине башо грево со керѓа (Пс. 32:2-4). Амен да шај те осетина асавко локхипе. Кеда искрено каинаја амен башо амаре гревија, на ваљани те осетина амен више крива, јавере лафенцар те пхирава о пхарипе соске о Јехова ваздинѓа ле хем ингарѓа ле.

10-11. Со сикљоваја таро лафија: „Ту Јехова... спремно сиан те простине“? (Псалм 86:5).

¹⁰ Читин Псалм 86:5. Акате о Давид вакерела: „Ту Јехова... спремно сиан те простине“. Акава значинела ка о Јехова на хољанела одма кеда кераја грешке хем кај ов мангела секогаш те простинел околенге со каинена пе. Соске тано асавко? О јавер дело таро стихо објаснинела: „Баро тано тло верно мангипе спрема са околенде со родена ту“. Тари англуни статија сиклилем кај о Јехова ветинѓа кај ка сикавел верно мангипе околенге со мангена ле хем кај никогаш нане те мукхел лен. Асавко мангипе поттикнинела ле спремно те простинел секоле грешникоске со каинела пе (Иса. 55:7). Ако туке пхаро те верујне кај о Јехова простинѓа туке, шај те пуче тут: „Дали верујнава кај о Јехова спремно простинела сариненге со каинена пе хем молинена ле баши милост? Тегани на ваљани ли те верујнав кај простинѓа манге да кеда молинѓум ле баши милост?“

¹¹ Ки Библија исто аѓаар пишинела кај о Јехова бут шукар џанела состар сием керде хем кај сием несовршена. Акава бут шај те утешинел амен (Пс. 139:1, 2). Адава бут шукар дикхјола таро јекх јавер псалм со пишинѓа ле о Давид, кова со исто аѓаар шај те поможинел амен те уверина амен кај о Јехова спремно простинела.

МА БИСТРЕ АДАВА СО О ЈЕХОВА НА БИСТРЕЛА

12-13. Спрема Псалм 103:14, со на бистрела о Јехова хем ко со поттикнинела ле адава?

¹² Читин Псалм 103:14. Башо Јехова, о Давид вакерѓа „ов... на бистрела кај сием таро право“. Акале лафенцар, о Давид објаснинѓа која тани јекх причина соске о Јехова тано спремно те простинел пле слугенге со каинена пе: Ов никогаш на бистрела кај сием несовршена. Те шај пошукар те хаљова акава, те дикха подетално е Давидескере лафија.

¹³ О Давид вакерѓа кај о Јехова „шукар џанела состар сием керде“. Ов керѓа е Адаме „таро право е пхувјакоро“. Адава значинела кај о Јехова бут шукар џанела кај е совршена манушен иси лен ограничувања — на пример, ола мора те хан, те совен хем те дишинен (1. Мој. 2:7). Ама кеда о Адам хем и Ева грешинѓе, о мануша уле право ко јавер да начин. Адалеске со аваја лендар, амен сием право хем ки адаја смисла кај бијанѓоваја сар несовршена хем мора те борина амен против адава те на кера погрешна буќа. О Јехова на само сој свесно баши амари несовршеност, него о Давид баши лесте вакерѓа кај ни „на бистрела“ адава. О хебрејско лафи сој користимо акате шај хем те значинел кај на само со на бистреа нешто, него хем кереа нешто башо адава. Значи, со мангља те вакерел о Давид акале лафенцар? О Јехова џанела кај адалеске со наслединѓем о грево, понекогаш ка кера грешке. Ама кеда дикхела кај чаче каинаја амен, ов тано поттикнимо те сикавел аменге милост хем те простинел аменге (Пс. 78:38, 39).

14. а) Со јавер вакерѓа о Давид башо начин сар о Јехова простинела? (Пс. 103:12). б) Со шај те сикљова таро начин сар о Јехова простинѓа е Давидеске? (Дикх хем и рамка „Сар о Јехова простинела хем бистрела“.)

¹⁴ Со јавер шај те сикљова таро 103 Псалм башо начин сар о Јехова простинела? (Читин Псалм 103:12.) О Давид вакерела кај кеда о Јехова простинела, ов цидела амендар амаре грешке „кобор сој дур о исток таро запад“. О исток тано најдур со шај таро запад. Ола о дуј никогаш нашти те авен паше. Со вакерела аменге акава башо гревија со простинела лен о Јехова? Поврзимо акале стихоја, јекх лил објаснинела кај о Девел добором бут дујрарела амаре гревија амендар, со лендар ни на ачхола белего. Значи, шај те ова сигурна кај ов никогаш више нане те мислинел ки ленде, а ни палем нане те сетинел амен ки ленде. Понекогаш, чак хем само несаво мирис шај те сетинел амен ко нешто со случинѓа пе англедер. Ама, откеда о Јехова ка простинел аменге несаво грево, ништо нашти те чхивел ле палем те сетинел пе ки лесте, хем адалеске те кривинел амен или те казнинел амен (Езек. 18:21, 22; Апо. 3:19).

15. Со шај те кера ако цело време осетинаја амен крива башо гревија со керѓем лен англедер?

¹⁵ Сар шај о лафија е Давидескере таро 103 Псалм те уверинен амен кај о Јехова простинѓа аменге? Ако цело време осетинаја амен крива башо гревија со керѓем лен англедер, шај те пуча амен: „Дали бистрава адава со о Јехова на бистрела, јавере лафенцар, дали бистрава кај ов бут шукар џанела кај сиум несовршено хем кај ка простинел јекхе грешникоске со каинела пе сар ме? Исто аѓаар, дали памтинава адава со о Јехова одлучинѓа те бистрел, јавере лафенцар дали памтинава о гревија кола со о Јехова простинѓа лен манге хем коленге со никогаш више нане те кривинел ман или те казнинел ман?“ О Јехова на концентриринела пе ко амаре гревија со керѓем лен англедер, адалеске на ваљани амен да (Пс. 130:3). Ако чаче верујнаја кај о Јехова простинѓа аменге, нане више те осетина амен крива хем понадари да ка служина леске радосно.

16. Вакер пример со сикавела кај тано опасно цело време те мислина ко гревија кола со простинѓа лен аменге о Јехова. (Дикх хем и слика.)

¹⁶ Те вакера јекх пример. Ако цело време осетинаја амен крива башо гревија со керѓем лен англедер, адава тано сар те пхене мангаја те возина врда џикоте цело време дикхаја ко ретровизор. Шукар тано понекогаш те дикха ко ретровизор соске аѓаар ка шај те реагирина ако појавинела пе несави опасност пали аменде. Ама те шај те возина безбедно, мора те концентририна амен ко друмо сој англи аменде. Слично, шај те користинел аменге ако понекогаш сетинаја амен ко грешке со керѓем лен англедер. Шај те сикљова лендар хем те ова панда поодлучна те на кереа лен палем. Ама ако цело време мислинаја ко грешке со о Јехова простинѓа лен аменге, ка нашава амари радост хем ка нашти те да леске амаро најшукар. Наместо адава, понадари да те концентририна амен ко друмо сој англи аменде. Амен сием ко друмо со ингарела ко живото со ветинѓа ле о Девел, коте со о лошна буќа со случинѓе пе англедер „нане ни те сетина амен“ (Иса. 65:17; Изр. 4:25).

ПОНАДАРИ ДА УВЕРИН ТЛО ВИЛО

17. Соске ваљани понадари да те уверина амаро вило кај о Јехова мангела амен хем кај простинѓа аменге?

¹⁷ Ваљани понадари да те уверина амаро вило кај о Јехова мангела амен хем кај простинѓа аменге (1. Јов. 3:19). Соске? Адалеске со о Сатана понадари да ка пробинел те чхивел амен те верујна кај о Јехова на мангела амен хем кај никогаш нане те простинел аменге. Бизи разлика сар хем те овел, лескири цел тани исто — те керел те чхинава те служина е Јеховаске. Сар со аваја попаше ко крајо, шај те очекујна кај о Сатана ка пробинел панда повише те керел адава соске џанела кај ачхило ле панда бут хари време (Отк. 12:12). На смејнаја те дозволина леске те побединел!

18. Со шај те кере те шај панда повише те уверине тло вило кај о Јехова мангела тут хем кај простинѓа туке?

¹⁸ Те шај панда повише те уверине тут кај о Јехова мангела тут, применин о предлогија тари англуни статија. Те шај те уверине тло вило кај о Јехова простинѓа туке, размислин башо адава со ов вакерѓа баши песте. Одвојн време хор те размислине со сикавела амен о Јехова ки Библија башо адава сар простинела. Ма бистре кај ов шукар џанела кај сиан несовршено хем кај ка сикавел туке милост. Исто аѓаар, ма бистре кај кеда ов простинела адава керела ле целосно. Тегани ка ове радосно соске ка ове сигурно кај о Јехова сикавѓа туке милост хем исто сар о Давид, ка шај те вакере: „Благодарно сиум туке Јехова ‘со простинѓан мли грешка мле гревија’“! (Пс. 32:5).