О Јехова тано спремно те простинел

1. Спрема Проповедник 7:20, со вакерѓа о цари о Соломон?

О цари о Соломон пишинѓа: „На постојнела праведно мануш ки пхув кова со секогаш керела шукарипе хем никогаш на грешинела“ (Проп. 7:20). Чаче, сарине амен грешинаја (1. Јов. 1:8). Адалеске ваљани сариненге простување таро Девел хем таро јавера.

2. Сар осетинеа тут кеда јекх амал простинела туке?

² Сигурно сетинеа тут ки јекх ситуација кеда вреџинѓан несаве амале. Адалеске со на мангљан те нашаве тле амале искрено извининѓан тут леске. Сар осетинѓан тут кеда простинѓа туке? Дали сине туке полокхе? Оја, сигурно! Хем исто аѓаар сиан сине бахтало.

3. Башо кола буќа ка кера лафи ки акаја статија?

³ Амен мангаја о Јехова те овел амаро најпаше амал, ама понекогаш ка кера или ка вакера нешто колеа со ка повредина ле. Соске шај те ова сигурна кај о Јехова тано спремно те простинел? Сави разлика иси кеда о Јехова простинела хем кеда амен простинаја? Хем каске простинела о Девел?

О ЈЕХОВА ЕДВАЈ АЏИКЕРЕЛА ТЕ ПРОСТИНЕЛ

4. Соске шај те ова сигурна кај о Јехова тано спремно те простинел?

⁴ Е Девлескоро Лафи уверинела амен кај о Јехова мангела те простинел. Кеда о Мојсеј сине ки планина Синај, о Јехова преку јекх ангели опишинѓа пе леске е лафенцар: „Јехова! Јехова! Девел сој милостиво хем сочувствително, на хољанела сигате, пхердо тано верно мангипе хем чачипе, сикавела верно мангипе буте милја манушенге, простинела грешке, погрешна постапке хем грево“ (2. Мој. 34:6, 7). О Јехова тано љубезно хем милостиво Девел кова со секогаш тано спремно те простинел околенге со каинена пе (Неем. 9:17; Пс. 86:15).

5. Спрема Псалм 103:13, 14, со керела о Јехова адалеске со џанела бут шукар е манушен?

⁵ Адалеске со о Јехова створинѓа амен, џанела са баши аменде. Размислин само, ов џанела секова детали башо секова мануш ки пхув (Пс. 139:15-17). Значи, ов шај те дикхел са о слабостија со наслединѓем лен таро амаре родителија. Ов чак тано свесно башо са со случинѓа пе аменге ко живото, хем сар са адава влијајнѓа упри аменде. Со керела о Јехова адалеске со џанела амен бут шукар? Адава поттикнинела ле те овел аменцар милостиво. (Пс. 78:39; читин Псалм 103:13, 14.)

6. Сар сикавѓа о Јехова кај мангела те простинел?

⁶ О Јехова сикавѓа кај мангела те простинел. Ов хаљола кај адалеске со о прво мануш о Адам грешинѓа, сарине амен сием грешникија хем мераја (Рим. 5:12). Нијекх амендар нашти те керел нешто те шај те на грешина хем те на мера (Пс. 49:7-9). Ама амаро Девел со мангела амен сикавѓа сочувство хем керѓа нешто те шај те ослободинел амен таро грево. Со керѓа? Ко Јован 3:16 пишинела кај о Јехова денѓа пле единствено бијаме Чхаве те мерел баши аменге (Мат. 20:28; Рим. 5:19). О Исус муло аменге ко тхан те шај те ослободинел секоле јекхе со сикавела вера ки лесте (Евр. 2:9). Сигурно е Јеховаске сине бут пхаро те дикхел сар мучинена хем понижинена лескере мангле Чхаве, хем ко крајо мударена ле. Јасно тано кај о Јехова нане сине те дозволинел лескоро мангло Чхаво те мерел ако на би мангела сине те простинел аменге.

7. Кола тане несаве библиска примерија таро мануша коленге со о Јехова спремно простинѓа?

⁷ И Библија тани пхерди примеренцар таро мануша коленге со о Јехова спремно простинѓа (Еф. 4:32). Кој авела туке ки годи? Шај сетинеа тут ко цари Манасија. Адава лошно мануш бут грешинѓа против о Јехова. Ов обожавинела сине ховавне девлен хем теринела сине е јаверен те керен о исто. Ов дела сине пле чхавен сар жртва е ховавне девленге. А сој најлошно, чхивѓа чак идоли таро ховавно девел ко е Јеховаскоро свето храми. Баши лесте и Библија вакерела: „Ов керела сине бут лошна буќа англо е Јеховаскере јакхја хем аѓаар вреџинела ле сине“ (2. Лет. 33:2-7). Ама кеда о Манасија сикавѓа кај чаче каинела пе, о Јехова спремно простинѓа леске. Ов чак дозволинѓа леске те овел палем цари (2. Лет. 33:12, 13). Или шај исто аѓаар сетинеа ту ко цари о Давид кова со керѓа сериозна гревија против о Јехова сар сој и прељуба хем мударибе. Сепак, кеда о Давид чаче каинѓа пе хем признајнѓа пло грево, о Јехова леске да простинѓа (2. Сам. 12:9, 10, 13, 14). Оја, шај те ова сигурна кај о Јехова тано спремно те простинел. Хем сар со ка дикха, иси разлика машкар адава сар простинела о Јехова хем сар простинена о мануша.

О ЈЕХОВА ПРОСТИНЕЛА КО ПОСЕБНО НАЧИН

8. Сар адава со о Јехова тано најшукар Судија поможинела леске те простинел?

⁸ О Јехова тано „о Судија е цело пхувјакоро“ (1. Мој. 18:25). Јекх шукар судија ваљани шукар те пенџарел о закони. Баш асавко тано о Јехова соске на само сој амаро Судија, него исто аѓаар лестар авела о закони (Иса. 33:22). Само ов џанела сој тано исправно а сој погрешно. Со јавер ваљани те шај некој те овел шукар судија? Ов ваљани те џанел са о информацие башо несаво случај англедер те анел одлука. Спрема акава, о Јехова тано најшукар Судија соске ов секогаш џанела са о информацие.

9. Кола информацие џанела о Јехова англедер те одлучинел дали те простинел некаске?

⁹ Различно таро о манушикане судие, о Јехова џанела секогаш са о информацие башо секова случај (1. Мој. 18:20, 21; Пс. 90:8). Ов на зависинела таро адава со дикхена или со шунена о мануша. О Јехова бут шукар хаљола кај о особине со наслединаја лен таро амаре родителија, о образование со иси амен, котар аваја хем амари емоционално хем психичко состојба влијајнена упро амаре постапке. О Јехова исто аѓаар џанела со иси амен ко вило. Ов дикхела саве мотивија, намере хем желбе иси секоле јекхе. Ништо нашти те гарава таро Јехова (Евр. 4:13). Значи, кеда о Јехова простинела некаске ов керела адава соске џанела са о информацие баши адаја ситуација.

10. Соске шај те вакера кај о Јехова секогаш судинела праведно? (5. Мојсеева 32:4).

¹⁰ О Јехова секогаш судинела ко праведно начин. Ов ни хари нане пристрасно. О Јехова никогаш на простинела некаске адалеске сој леске симпатично, сој тано барвало, важно или иси ле несаве способностија (1. Сам. 16:7; Јак. 2:1-4). Никој нашти те чхивел е Јехова силаја те керел нешто или те дел ле мито (2. Лет. 19:7). Упро лескере одлуке на влијајнена и холи или и жал (2. Мој. 34:7). О Јехова тано о најшукар судија соске ов шукар хаљовела амен хем амари ситуација. (Читин 5. Мојсеева 32:4.)

11. Соске тано е Јеховаскоро простибе посебно?

¹¹ О писателија таро Хебрејска списија сикавѓе кај о Јехова простинела ко посебно начин. Спрема јекх прирачнико, ко несаве случаија ола користинѓе јекх хебрејско лафи башо простибе кова со опишинела о начин сар о Девел простинела е грешниконге. Акава лафи никогаш на користинела пе сине те шај те опишинел пе сар јекх мануш простинела јавере манушеске, соске о манушикано простибе тано ограничимо. Само е Јехова иси ле право целосно те простинел јекхе грешникоске со каинела пе. Сави корист иси амен кеда о Јехова простинела аменге?

12-13. а) Сар осетинаја амен кеда о Јехова простинела аменге? б) Кобор трајнела е Јеховаскоро простибе?

¹² Кеда прифатинаја кај о Јехова простинѓа аменге, ка иранел пе амари сила, ка овел амен андруно мир хем чисто совест. Само кеда о Јехова простинела аменге осетинаја амен аѓаар (Дела 3:19). Кеда простинела, ов овела аменге палем амал, сар те пхене никогаш на грешинѓем.

¹³ Откеда о Јехова простинела аменге, никогаш више на спомнинела адава или на казнинела амен палем башо адава грево (Иса. 43:25; Ерем. 31:34). О Јехова цидела амаре гревија „кобор сој дур о исток таро запад“b (Пс. 103:12). Кеда размислинаја башо адава кобор баро тано е Јеховаскоро простибе, тегани ка ова бут благодарна хем хор ка поштујна е Девле (Пс. 130:4). Ама каске ка простинел о Јехова?

КАСКЕ КА ПРОСТИНЕЛ О ЈЕХОВА?

14. Со сиклилем џи акана башо адава сар одлучинела о Јехова дали те простинел или на?

¹⁴ Сар со дикхлем, дали о Јехова ка простинел аменге или на, на зависинела таро адава кобор баро или тикно грево керѓем. Исто аѓаар дознајнѓем кај адава со о Јехова тано амаро Створители, Судија хем со лестар авела о закони, поможинела леске те одлучинел дали те простинел некаске или на. Кола буќа лела ко предвид о Јехова англедер те анел и одлука дали те простинел?

15. Спрема Лука 12:47, 48, која тани јекх бути со лела о Јехова ко предвид?

¹⁵ Јекх бути со лела ко предвид о Јехова тано дали о грешнико џанља кај адава со керѓа сине погрешно. О Исус објаснинѓа акава ко Лука 12:47, 48. (Читин.) Кеда некој намерно планиринела те керел нешто лошно, иако џанела кај о Девел на мангела адава, керела сериозно грево. Асавке манушеске шај о Јехова ка одлучинел те на простинел (Мар. 3:29; Јован 9:41). Ама мора те признајна кај понекогаш сием свесна кај адава со керѓем сине погрешно. Дали тегани шај те овел аменге простимо? Оја, адалеске со о Јехова лела панда нешто ко предвид.

16. Со значинела те каина амен, хем соске ваљани те каина амен ако мангаја те простинел аменге о Јехова?

¹⁶ Јекх јавер бути со лела о Јехова ко предвид тани адаја дали о грешнико искрено каинела пе. Со значинела те каине тут? Те каине тут значинела те менине то размислување, тло стави или намера. Ваљани те пере пишмани хем чаче те овел туке жал башо лошна буќа со керѓан или адалеске со на постапинѓан ко исправно начин. Некој со чаче каинела пе нане само тажно адалеске со керѓа лошна буќа, него исто аѓаар со дозволинѓа лескири духовно состојба те овел добором лошно со ко крајо анѓа ле ко адава те грешинел. Сетин тут ко Манасија хем ко Давид. Иако о солдуј керѓе баре гревија, сепак о Јехова сине спремно те простинел ленге соске чаче каинѓе пе (1. Цар. 14:8). Оја, о Јехова простинела аменге само ако дикхела кај чаче каинаја амен. Ама нане доволно само те осетина амен крива башо гревија со керѓем, него мора те ова спремна те кера нешто.c Хем акаја тани панда јекх бути со лела ко предвид о Јехова.

17. Со мора те керел некој те шај те живинел ко начин сар со мангела о Јехова, хем соске тано важно те на повторина о иста грешке? (Исаија 55:7).

¹⁷ Јавер важно бути со лела ко предвид о Јехова тани дали некој чхинавѓа те керел лошна буќа хем почминѓа те живинел ко начин сар со мангела о Јехова. (Читин Исаија 55:7.) Ов мора те менинел о начин сар размислинела те шај е Јеховаскоро размислување те влијајнел упри лесте (Рим. 12:2; Еф. 4:23). Мора одлучно те чхинавел те размислинел хем те постапинел ко лошно начин (Кол. 3:7-10). Џанѓола пе, главно причина соске о Јехова простинела аменге хем цидела амендар о грево тано адава со иси амен вера ки откупнина. Кеда о Јехова дикхела кај искрено трудинаја амен те кера промене, тегани преку и откупнина простинела аменге (1. Јов. 1:7).

НЕК ОВЕЛ ТУТ ДОВЕРБА КАЈ О ЈЕХОВА КА ПРОСТИНЕЛ ТУКЕ

18. Со дикхлем башо е Јеховаскоро простибе?

¹⁸ Те дикха кратко о најважна буќа башо со керѓем лафи. Чаче, на постојнела никој со шај те простинел сар о Јехова. Соске шај те вакера адава? Прво, ов тано секогаш спремно те простинел. Дујто, ов џанела амен најшукар. О Јехова џанела са баши аменде хем најшукар шај те дикхел дали чаче каинаја амен. Трито, кеда о Јехова простинела аменге ов целосно керела адава, сар те пхене никогаш на грешинѓем. Адалеске шај те овел амен чисто совест хем те кера ле бахтало.

19. Соске шај те ова бахтале иако сием несовршена хем грешинаја?

¹⁹ Џанѓола пе, са џикоте сием несовршена амен ка грешина. Ама о лафија таро лил Увид ко света лила, 2 том, страна 771 утешинена амен: „О Јехова тано милостиво хем хаљола кај лескере слуге тане слаба, адалеске на ваљани цело време те осетинен пе крива башо грешке со керена лен тари пли несовршеност (Пс. 103:8-14; 130:3). Ако дена пестар са те шај те живинен спрема е Девлескоро друмо, ола шај те овен бахтале (Фил. 4:4-6; 1. Јов. 3:19-22)“. Акава тано бут охрабрувачко.

20. Со ка дикха ки следно статија?

²⁰ Амен сием бут благодарна со о Јехова тано спремно те простинел аменге кеда чаче каинаја амен башо гревија со керѓем. Ама сар шај амен да те простина сар о Јехова? Ко кола начинија простинаја слично сар о Јехова, а ко кола на? Соске тано важно те хаљова акаја разлика? Ки следно статија ка одговорина ко акала пучиба.