Со значинела те простине?
Со вакерела и Библија:
Ки Библија, о грчко лафи башо „простибе“ значинела „те откажине тут“ таро нешто, сар на пример таро дуго. О Исус користинѓа акаја споредба кеда сикавѓа пле ученикон те молинен пе: „Простин амаре гревија, соске амен да простинаја амаре дужниконге“ (Лука 11:4). Исто аѓаар, ки споредба башо лошно робо, о Исус спорединѓа о простибе поништибаја о дуго (Матеј 18:23-35).
Простинаја е јаверенге аѓаар со на икераја холи хем на мангаја те ирана ленге баши и дукх со анѓе аменге. И Библија сикавела амен кај, те шај чаче те простина, ваљани те овел амен несебично мангипе, соске о мангипе „на памтинела о лошнипе“ (1. Коринќаните 13:4, 5).
О простибе на значинела:
Те оправдине некаскере погрешна постапке. И Библија уствари осудинела околен со вакерена кај о лошна постапке нане опасна хем кај тане прифатлива (Исаија 5:20).
Те кере тут кај на дикхеа о погрешна постапке. О Девел простинѓа е Давидескере сериозна гревија, ама на заштитинѓа ле таро последице. О Девел чак мукхља те овен пишиме е Давидескере грешке те шај те сикљова лендар (2. Самоилова 12:9-13).
Те мукхе о јавера те искористинен тут. На пример, некаске денѓан паре ко заем, а ов трошинѓа лен хем нашти те иранел лен туке ко договоримо време. Бут леске жал хем извининела пе туке. Шај ка одлучине те простине леске, те на хољане леске хем нане стално те спомнине леске о дуго, а чак шај нане ни те роде те иранел туке о паре. Ама, јавер пути нане никогаш те позајмине паре адале манушеске (Псалм 37:21; Изреки 14:15; 22:3; Галатите 6:7).
Те простине кеда нане тут причина башо адава. О Девел на простинела е манушенге кола со грешинена свесно хем иси лен злобно намера, кола со на признајнена пумаре грешке, на менинена пле постапке хем на извининена пе адаленге каске со грешинѓе (Изреки 28:13; Дела 26:20; Евреите 10:26). Адалеске со на каинена пе башо пумаре постапке, ола овена е Девлескере душмања хем ов на очекујнела амендар те простина ленге соске ни ов на простинела ленге (Псалм 139:21, 22).
Со ако некој постапинела туја грубо хем на мангела те извининел пе туке, па чак на мангела те признајнел со керѓа туке? И Библија дела амен акава совет: „Циде тутар о гнев хем мукх и холи“ (Псалм 37:8). Адава на значинела те оправдине лескере грешке, него те на пхерѓове холи. Нека овел тут доверба ко Девел кај ов ка судинел леске (Евреите 10:30, 31). Утешинела амен адава со џанаја кај ка авел време кеда о Девел ка чхинавел са адава со анела аменге бари дукх (Исаија 65:17; Откровение 21:4).
Те простине кеда мислинеа туке кај некој вреџинѓа тут. Понекогаш, наместо те простина некаске со мислинаја аменге кај вреџинѓа амен, шај ка ваљани те признајна кај на сине причина те осетина амен аѓаар. И Библија вакерела: „Ма вреџин тут сигате, соске о глупава тане адала со вреџинена пе“ (Проповедник 7:9).
Со ка поможинел тут те простине некаске
Ма бистре со значинела те простине. Адава значинела те накхе преку и грешка, а на те пханде те јакхја или те оправдине ла.
Ов свесно сави корист иси ако простинеа. Адава со нане те икере холи шај те поможинел туке те ове смиримо, ка овел пошукар то састипе хем ка осетине тут побахтало (Изреки 14:30; Матеј 5:9). А сој најважно, ако простинаја е јаверенге, о Девел ка простинел аменге да (Матеј 6:14, 15).
Ов сочувствително. Сарине сием несовршена (Јаков 3:2). Исто сар со амен осетинаја амен шукар кеда некој простинела аменге, аѓаар е јаверенге да тано шукар кеда амен простинаја ленге (Матеј 7:12).
Ов разумно. Ако керела пе лафи баши јекх тикни грешка, тегани шај те применина о совет тари Библија: „Трпинен тумен јекх јекхеа“ (Колошаните 3:13).
Простин сигате. Трудин тут те простине со шај посигате хем ма дозволин ки туте те икере холи (Ефешаните 4:26, 27).