Соске те рода совет?

1. Сар шај те ана мудра одлуке, хем сар шај амаре планија те успејнен? (Изреки 13:10; 15:22).

СЕКОВА ЈЕКХ амендар мангела те анел мудра одлуке хем сарине мангаја амаре планија те успејнен. Е Девлескоро Лафи вакерела сар шај те исполнина акала дуј целија. (Читин Изреки 13:10; 15:22.)

2. Со ветинѓа аменге о Јехова?

² Џанѓола пе, окова со шај те дел амен најшукар совет тано амаро Дад, о Јехова. Адалеске, мора те молина ле те дел амен мудрост. Ов ветинѓа кај ка поможинел амен. Адава дикхјола пе таро акала лафија: „Ка дав тут совет, мли јакх ка овел упри туте“ (Пс. 32:8). Акава сикавела кај о Јехова на само со дела амен совет него хем интересинела пе секоле јекхеске амендар лично хем поможинела амен те применина лескоро совет.

3. Со ка дикха ки акаја статија?

³ Ки акаја статија преку е Девлескоро Лафи ка добина одговор ко акала штар пучиба: 1) Кола особине мора те овен ман ако мангава те овел ман корист таро несаво шукар совет? 2) Кој шај те дел ман шукар совет? 3) Сар шај те сикавав кај чаче мангава совет? 4) Соске на ваљани те очекујнав о јавера те анен одлуке манге ко тхан?

КОЛА ОСОБИНЕ МОРА ТЕ ОВЕН МАН?

4. Кола особине мора те овен амен те шај те овел амен корист таро несаво шукар совет?

⁴ Те шај те овел амен корист таро несаво шукар совет, мора те ова понизна хем скромна. Ако аракхљоваја ки ситуација колате со на сием сине англедер, мора те признајна кај амен на џанаја са хем кај ваљани аменге помош таро јавера те шај те ана мудро одлука. Ако на сием понизна хем скромна, о Јехова ка нашти те поможинел амен. Освен адава, кеда ка читина лескоро Лафи ка мислина кај амен нане амен потреба те применина било саво совет со дела амен (Мих. 6:8; 1. Пет. 5:5). Ама, ако сием понизна хем скромна, одма ка шуна ле хем ка применина о совет тари Библија.

5. Кола буќа шај сине те керен о цари о Давид те овел гордо?

⁵ Те дикха со шај те сикљова таро цари о Давид. Адалеске со керѓа бут баре буќа, ов шај сине те овел гордо. Бершенцар англедер те овел цари, ов сине пенџардо сар бут шукар музичари. Чак викинѓе ле те башалел англо цари (1. Сам. 16:18, 19). Откеда о Давид сине помазимо те шај те овел о следно цари, о Јехова денѓа ле пли сила хем адалеске шај сине те керел бут моќна буќа (1. Сам. 16:11-13). О мануша бут фалинена ле сине адалеске со побединела сине ленгере душманен, машкар коленде хем со сине о филистејско џини о Голијат (1. Сам. 17:37, 50; 18:7). Јекх гордо мануш, кова со керѓа добором баре буќа, шај те мислинел песке кај нане потреба те шунел совет таро јавера. Ама о Давид на сине асавко. Ов сине понизно.

6. Котар џанаја кај о Давид спремно прифатинѓа совет? (Дикх хем и слика.)

⁶ Откеда уло цари, о Давид биринѓа песке амала кола со шај сине те ден совет (1. Лет. 27:32-34). Акава на изненадинела амен, соске чак англедер те овел цари, о Давид секогаш спремно шунела сине шукар советија таро јавера. Ов на прифатинѓа совет само таро мурша него хем тари јекх џувли која со викинела пе сине Авигеја. Ој сине е Навалескири ромни, јекх мануш кова со сине гордо, на сине благодарно хем на поштујнела сине е јаверен. Тари јавер страна, о Давид сине понизно хем прифатинѓа о шукар совет е Авигејакоро. Адава поможинѓа леске те на керел јекх бари грешка (1. Сам. 25:2, 3, 21-25, 32-34).

7. Кола поуке шај те сикљова таро е Давидескоро пример? (Проповедник 4:13; дикх хем о слике.)

⁷ Таро Давид шај те сикљова некобор поуке. На пример, шај иси амен несаве талентија или џи негде иси амен несаво авторитети. Сепак, никогаш на ваљани те мислина кај џанаја са хем кај аменге на ваљани совет. Хем исто сар о Давид ваљани те ова спремна те шуна шукар совет, бизи разлика кој дела амен. (Читин Проповедник 4:13.) Ако кераја аѓаар, веројатно нане те кера баре грешке коленцар со ка кера проблемија аменге хем е јаверенге.

КОЈ ШАЈ ТЕ ДЕЛ МАН ШУКАР СОВЕТ?

8. Соске о Јонатан шај сине те дел шукар совет е Давидеске?

⁸ Те дикха панда јекх поука со шај те сикљова ла таро е Давидескоро пример. Ов шунѓа советија таро мануша кола со сине амала е Јеховаја, ама кола со исто аѓаар шукар хаљовена сине и ситуација колате со аракхљола сине ов. На пример, кеда мангља те дознајнел дали шај палем те овел ко мир е цареа е Саулеа, о Давид шунѓа о совет е Јонатанескоро, е Саулескоро чхаво. Соске о Јонатан шај сине те дел ле шукар совет? Адалеске со освен со сине паше е Јеховаја, ов бут шукар пенџарела сине е Сауле (1. Сам. 20:9-13). Со шај те сикљова таро акава пример?

9. Кас ваљани те пуча башо совет? Објаснин (Изреки 13:20).

⁹ Кеда ваљани аменге совет, мудро ка овел те кера лафи некасаја сој паше е Јеховаја хем кас со иси искуство баши адаја бути колаке со ваљани аменге помош.a (Читин Изреки 13:20.) На пример, те пхена кај јекх терно пхрал мангела те аракхел песке шукар брачно партнери. Кој шај те дел ле шукар совет? Јекх амал кова сој беќари шај те поможинел леске ако лескоро совет темелинела пе ко библиска начелија. Ама, о терно пхрал веројатно ка добинел покорисно совет ако пучела несаве брачно паре кова со шукар пенџарела ле хем кова со служинела е Јеховаске повише време. Освен со шај те вакерел леске сар те применинел несаво библиско совет, адава брачно пари шај исто аѓаар те вакерел леске нешто таро пло лично искуство.

10. Со ка дикха акана?

¹⁰ Џи акана дикхлем кола дуј особине мора те овен амен хем кој шај те дел амен шукар совет. Акана те дикха соске мора те сикава кај чаче мангаја совет хем дали ваљани те очекујна о јавера те анен одлуке ко амаро тхан.

САР ШАЈ ТЕ СИКАВАВ КАЈ ЧАЧЕ МАНГАВА СОВЕТ?

11-12. а) Со керена несаве кеда ваљани те анен одлука? б) Со керѓа о цари Ровоам кеда ваљанѓа те анел важно одлука?

¹¹ Понекогаш, шај ка дикхјол кај некој родела совет, ама уствари, ов само родела те шунел адава со мангела баши одлука со више анѓа ла. Асавко мануш, уствари, на мангела чаче совет. Ов ваљани те сикљол таро адава со случинѓа пе е цареске е Ровоамеске.

¹² Откеда муло о Соломон, лескоро чхаво о Ровоам уло цари ко Израел. Кеда о Ровоам почминѓа те владинел, е народо сине ле бут шукар живото, ама о мануша мислинена сине кај о Соломон превише родела лендар сине. Ола але ко Ровоам хем замолинѓе ле те локхјарел ленгоро пхарипе. О Ровоам вакерѓа ленге те мукхен леске време те размислинел англедер те анел одлука. Ко почеток постапинѓа шукар соске родинѓа совет таро попхуре мурша кола со поможинѓе е Соломонеске (1. Цар. 12:2-7). Ама ов отфрлинѓа ленгоро совет. Соске шај керѓа адава? Шај адалеске со ов више одлучинѓа со ка керел хем надинела пе сине кај о попхуре мурша ка сложинен пе леа. Ако сине аѓаар, тегани о совет со денѓе ле лескере потерне амала сине баш адава со мангља те шунел (1. Цар. 12:8-14). О Ровоам вакерѓа е народоске адава со советинѓе ле лескере амала. Акава анѓа џи ко адава о народо те делинел пе хем оттегани е Ровоаме цело време сине ле проблемија (1. Цар. 12:16-19).

13. Со шај те поможинел аменге те хаљова дали чаче мангаја совет?

¹³ Со шај те сикљова таро е Ровоамескоро пример? Кеда родаја совет, мора те сикава кај чаче мангаја адава. Со ка поможинел аменге те хаљова дали амен кераја аѓаар? Шај те пуча амен: „Дали родава совет а пало адава одма отфрлинава ле адалеске со нане адава со мангава те шунав?“ Те дикха јекх пример.

14. Со на ваљани те бистра кеда добинаја совет? Вакер пример. (Дикх хем и слика.)

¹⁴ Замислин кај јекхе пхрале иси ле понуда баши јекх шукар платими бути. Англедер те прифатинел адаја бути, ов родела совет таро јекх старешина. О пхрал вакерела кај баши бути ка ваљани повише време те овел дур тари пли фамилија. О старешина сетинкерела ле ко библиско начело кај најангле лескири одговорност тани те грижинел пе башо духовна потребе пле фамилијакере (Еф. 6:4; 1. Тим. 5:8). Те вакера кај о пхрал одма аракхела маана башо е старешинаскоро совет хем адалеске пучела јавере пхрален со мислинена са џикоте некој на вакерела леске адава со мангела те шунел. Дали о пхрал чаче родела совет или више одлучинѓа со ка керел хем само родела некој те сложинел пе леа? Мора те овел амен ки годи кај амаро вило тано ховавно (Ерем. 17:9). Понекогаш, о совет со највише ваљани аменге тано о совет со најхари мангаја те шуна ле.

ДАЛИ О ЈАВЕРА ВАЉАНИ ТЕ АНЕН ОДЛУКЕ АМЕНГЕ КО ТХАН?

15. Со на ваљани те кера, хем соске?

¹⁵ Секова јекх амендар тано одговорно коркори те анел одлуке (Гал. 6:4, 5). Сар со дикхлем, англедер те анел несави одлука јекх мудро мануш ка родел совет таро е Девлескоро Лафи хем таро зрела христијања. Ама, на смејнаја те очекујна о јавера те анен одлуке аменге ко тхан. Несаве шај директно ка пучен некас касте со иси лен доверба: „Со би кереа ту те ове ко мло тхан?“ А јавера, шај ка анен и исто одлука сар со анѓа некој јавер бизо коркори похор те размислинен башо адава.

16. Со ваљани сине те одлучинен о христијања ко Коринт башо мас со сине жртвујмо идоленге? (1. Коринќања 8:7; 10:25, 26).

¹⁶ Размислин баши одлука со о христијања таро собрание ко Коринт ваљани сине те анен ла башо адава дали те хан мас со сине жртвујмо идоленге. Адале христијаненге о Павле пишинѓа: „Џанаја кај јекх идоли нане чаче девел хем џанаја кај иси само јекх Девел“ (1. Кор. 8:4). Адалеске со леле ко предвид акала лафија, несаве таро собрание одлучинѓе кај шај те хан мас со шај сине жртвујмо несаве идолеске, а кова со покасно бикинела пе сине ко пазари. Јавера палем, одлучинѓе кај нашти те хан асавко мас соске ка мучинел лен сине ленгири совест. (Читин 1. Коринќања 8:7; 10:25, 26.) Адаја сине лично одлука. О Павле никогаш на советинѓа е Коринќанен те анен одлуке е јаверенге ко тхан, а ни палем те керен адава со керена о јавера, него „секова јекх [лендар] мора песке те одговоринел англо Девел“ (Рим. 14:10-12).

17. Со шај те случинел пе ако анаја о иста одлуке сар о јавера со анѓе? Вакер пример. (Дикх хем о слике.)

¹⁷ Ки сави слично ситуација шај те аракхљова амен авдиве? Размислин баши одлука со ваљани те анел пе башо е ратескере фракцие. Секова христијани мора коркори те одлучинел дали ка прифатинел лен или ка одбинел акала фракцие.b Шај нане аменге локхо целосно те хаљова о буќа сој поврзиме акале темаја, ама асавке одлуке тане дело таро пхарипе со секова јекх амендар мора те пхиравел ле (Рим. 14:4). Ако анаја исто сар е јаверенгере одлуке, адава шај те слабонкерел амари совест. Амари совест шај те обликујна ла хем те кера ла позорали, само ако користинаја ла (Евр. 5:14). Тегани, кеда ваљани те рода совет таро несаво зрело христијани? Откеда коркори истражинѓем, ама понадари да ваљани аменге помош те шај те хаљова сар о библиска начелија тане поврзиме амаре ситуацијаја.

ПОНАДАРИ ДА РОДЕ СОВЕТИЈА

18. Со керѓа аменге о Јехова?

¹⁸ Адалеа со мукхела амен коркори те ана одлуке, о Јехова сикавела бари доверба ки аменде. Ов денѓа амен пло Лафи и Библија. Исто аѓаар, денѓа амен мудра амала кола со шај те поможинен аменге те хаљова сар те применина о библиска начелија. Ко акала начинија, о Јехова исполнинена пли одговорност сар амаро Дад (Изр. 3:21-23). Сар шај те сикава леске кај сием благодарна баши лескири помош?

19. Сар шај понадари да те радујна е Јехова?

¹⁹ Размислин башо акава: О родителија радујнена пе џикоте дикхена сар ленгере чхаве бајровена хем овена мудра слуге е Јеховаскере кола со поможинена е јаверенге. Слично, о Јехова тано среќно џикоте дикхела сар амен понадари да бајроваја ко духовно поглед, аѓаар со родаја советија хем анаја одлуке коленцар со сикаваја кај мангаја ле.