Сар те да совет

1. Кој ваљани те дел совет, хем соске?

ДАЛИ мангеа те де советија е јаверенге? Некаске тано локхо те керел адава. Јавера дарана те ден совет или осетинена пе незгодно кеда ваљани те керен адава. Сар хем те овел, понекогаш секас амендар иси ле одговорност те дел совет некаске. Соске? Адалеске со о Исус вакерѓа кај лескере чачутне следбеникија ка пенџарѓовен пало мангипе кова со ка сикавен песке јекх јекхеске (Јован 13:35). А јекх начин сар сикаваја амаро мангипе тано аѓаар со даја совет амаре пхраленге хем пхењенге кеда адава ваљани. Освен адава, и Библија вакерела кај кеда даја „искрено совет“ некаске, амен оваја леа попаше (Изр. 27:9).

2. Со мора те џанен те керен о старешине, хем соске? (Дикх хем и рамка „Совет ко состанок Амаро живото хем служба“.)

² О старешине посебно ваљани те џанен сар те ден шукар советија е јаверенге. О Јехова хем о Исус чхивѓе акале пхрален те грижинен пе башо собрание сар пастирија (1. Пет. 5:2, 3). Јекх начин сар керена адава тано аѓаар со англо собрание икерена говорија коленде сој вклучиме советија сој темелиме ки Библија. Исто аѓаар, ола мора те ден совет некаске лично кеда адава ваљани. Освен адава, ола поможинена околенге со мукхле е Јехова те иранен пе ко собрание. Сар шај о старешине, а хем сарине амен те да шукар советија?

3. а) Сар шај те сикљова те да шукар советија е јаверенге? (Исаија 9:6; дикх хем и рамка „Џа пало е Исусескоро пример кеда деа совет“) б) Со ка дикха ки акаја статија?

³ Шај бут те сикљова башо адава сар те да шукар советија аѓаар со ка проучина о примерија несаве манушенгере тари Библија, посебно о пример е Исусескоро. Јекх таро титуле сој денди е Исусеске тани „Шукар Советнико“. (Читин Исаија 9:6.) Ки акаја статија ка дикха со шај те кера кеда некој ка родел амендар совет хем со шај те кера кеда ка ваљани те да некаске совет иако ов на родинѓа амендар адава. Исто аѓаар ка дикха кобор тано важно те да совет ко право време хем ко исправно начин.

КЕДА НЕКОЈ КА РОДЕЛ АМЕНДАР СОВЕТ

4-5. Со ваљани најангле те пуча амен кеда некој ка родел амендар совет?

⁴ Кеда некој ка родел амендар совет со ваљани те кера? Шај ка радујна амен со иси ле доверба ки аменде хем ка манга одма те поможина ле. Ама, најангле ваљани те пуча амен: „Дали ме сиум адава со ваљани те дел совет баши адава бути?“ Понекогаш о најшукар начин сар шај те поможина тано аѓаар со нане те да совет, него ка вакера леске те керел лафи некасаја со шукар џанела хем иси ле искуство баши адаја бути.

⁵ Размислин башо акава пример. Те пхена кај тло паше амал иси ле сериозно проблеми састипаја. Ов вакерела туке кај почминѓа те испитинел о методе лечибаске кола сој леске достапна хем пало адава пучела тут со мислинеа ту која метода тани најшукар лечибаске. Иако шај иси тут тло мислење баши адаја бути, сепак ту на сиан доктори хем на добинѓан и обука со ваљани башо адава сар те лечинел пе адава насвалипе. Ки адаја ситуација о најшукар начин сар те поможине тле амалеске тано аѓаар со ка поможине леске те аракхел некас кова со шукар џанела хем иси ле искуство сар те лечинел пе адава насвалипе.

6. Соске тано пошукар те аџикера англедер те да совет?

⁶ Иако шај мислинаја кај шај те да некаске совет баши несави тема, сепак најшукар тано те на да одма совет. Соске? Ко Изреки 15:28 пишинела кај „о праведнико размислинела со ка одговоринел“. Адалеске, иако шај мислинаја кај џанаја о одговор, пошукар тано најангле те истражина, те молина амен хем шукар те размислина саво совет ка да. Аѓаар ка ова посигурна кај амаро совет тано ко склад адалеа со о Јехова мангела те вакерел. Акана те дикха о пример е Натанескоро.

7. Со сикљовеа таро пример е пророкоскоро е Натанескоро?

⁷ О цари о Давид вакерѓа е пророкоске е Натанеске кај мангела те градинел храми е Јеховаске. О Натан одма денѓа совет е Давидеске кај ваљани те керел адава. Ама ов најангле ваљанѓа те пучел е Јехова со мислинела баши адаја бути. Соске? Адалеске со о Јехова на мангља о Давид те градинел о храми (1. Лет. 17:1-4). Акава пример сикавела аменге кај кеда некој ка родел амендар совет, мудро тано „похари [те кера] лафи“ (Јак. 1:19).

8. Која тани панда јекх причина соске ваљани те пазина кеда даја совет?

⁸ Иси панда јекх причина соске ваљани те пазина кеда даја совет некаске. Башо амаро совет шај џи негде те ова крива ако случинела пе нешто лошно некаске. Адалеске, бут тано важно шукар те размислина англедер те да некаске совет.

САР ТЕ ДА СОВЕТ КЕДА НЕКОЈ НА РОДЕЛА АМЕНДАР АДАВА

9. Ко со мора те овен сигурна о старешине англедер те ден совет? (Галатјања 6:1).

⁹ Понекогаш о старешине мора те ден совет некаске со грешинѓа. (Читин Галатјања 6:1.) Несаво пхрал или пхен шај те грешинел ки адаја смисла со почминѓа те анел одлуке со нане мудра кола со покасно шај те чхивен ле те керел сериозно грево. И цел е старешиненгири тани те поможинен ле те ачхол ко друмо со ингарела џи ко вечно живото (Јак. 5:19, 20). Ама, те шај те ден ле шукар совет ола најангле ваљани те овен чаче сигурна кај ов анѓа несави погрешно одлука. Ола хаљовена кај ако некој анѓа поразлично одлука лендар, адава на значинела кај керела нешто погрешно (Рим. 14:1-4). Ама со ако несаво пхрал чаче почминѓа те џал ко погрешно друмо хем о старешине одлучинена кај мора те ден ле совет?

10-12. Со ваљани те керен о старешине кеда дена совет некаске со на родинѓа лендар адава? Вакер пример. (Дикх хем о слике.)

¹⁰ Е старешиненге нане локхо те ден совет некаске со на родинѓа лендар адава. Соске? О апостол Павле вакерѓа кај некој шај те керел погрешно чекори бизо те овел свесно башо адава. Адалеске, англедер те ден некаске совет, о старешине ваљани најангле те спреминен ле те шај те поможинен леске полокхесте те шунел о совет.

¹¹ Размислин башо акава пример: Јекх земјоделцо пробинела те садинел нешто ки зорали пхув. Англедер те садинел о семе ов рандела и пхув. Аѓаар и пхув ковљола хем тани спремно башо семе. Пало адава, о земјоделцо садинела о семе. Ко крајо, ов чхивела леске пани те шај те поможинел ле те бајрол. Слично, англедер те дел совет некаске, шукар ка овел ако јекх старешина ки несави смисла спреминела и пхув. На пример, ов биринела шукар моменти те шај те керел лафи адале пхралеа хем уверинела ле кај грижинела пе леске хем кај мислинела леске о најшукар. Ако јекх старешина тано пенџардо пало адава кај грижинела пе хем тано љубезно, е јаверенге ка овел полокхо те прифатинен лескоро совет.

¹² Џикоте керена лафи о старешина шај понадари да те ковљарел и пхув аѓаар со ка сетинкерел е пхрале кај секој керела грешке хем кај понекогаш секаске ваљани совет (Рим. 3:23). Смириме гласоја хем аѓаар со ка сикавел хор поштовање, о старешина користиндор и Библија, јасно ка вакерел леске соске и одлука со анѓа ла тани погрешно. Откеда о пхрал ка хаљол кај керѓа грешка о старешина „садинела о семе“ аѓаар со ко едноставно начин објаснинела леске со ваљани те керел те шај те поправинел и ситуација. Ко крајо, о старешина „чхивела пани“ аѓаар со искрено фалинела е пхрале хем молинела пе заедно леа (Јак. 5:15).

13. Сар шај о старешине те овен сигурно кај некој халило о совет?

¹³ Понекогаш, адава со дела о совет вакерела јекх, а окова со шунела о совет хаљола нешто јавер. Со шај те керен о старешине те шај те овен сигурна кај о јавер нане те хаљол лен погрешно? Ко јекх љубезно начин, о старешине шај те пучен пучиба те шај те дикхен дали ов халило о совет хем дали џанела сар те применинел ле (Проп. 12:11).

САР ТЕ ДА СОВЕТ КО ПРАВО ВРЕМЕ ХЕМ КО ИСПРАВНО НАЧИН

14. Соске на ваљани те да совет кеда сием хољаме? Објаснин.

¹⁴ Сарине амен сием несовршена хем адалеске понекогаш ка кера или ка вакера нешто колеа со ка нервирина е јаверен (Кол. 3:13). И Библија вакерела кај некаскере лафија или постапке понекогаш шај те хољанкерен амен (Еф. 4:26). Ама, мора те контролирина амен те шај те на да совет ки холи. Соске? Адалеске, со „е манушескири холи на анела и праведност која со родела о Девел“ (Јак. 1:20). Ако даја совет кеда сием хољаме веројатно ка кера и ситуација те овел полошно. Ама, акава на значинела кај никогаш на ваљани те вакера со мислинаја хем сар осетинаја амен околеске со хољанкерѓа амен. Сепак, ако аџикераја те смирина амен англедер те вакера нешто ка овен амен шукар резултатија. Башо акава шај бут те сикљова таро Елиу кова со денѓа шукар совет е Јовеске.

15. Со сикљоваја таро Елиу? (Дикх хем и слика.)

¹⁵ О Елиу дивенцар шунела сине сар о Јов бранинела пе таро погрешна буќа со вакерѓе лен лескере ховавне утешителија. Ов жалинѓа е Јове. Ама исто аѓаар, о Елиу хољанѓа соске о Јов вакерѓа погрешна буќа башо Јехова хем бут концентриринѓа ки песте. Сепак, о Елиу аџикерѓа о јавера те завршинен, а пало адава керѓа лафи смирено хем сикавѓа хор поштовање џикоте денѓа совет е Јовеске (Јов 32:2; 33:1-7). Таро Елиу сикљоваја јекх важно чачипе: О најшукар совет тано адава сој вакердо ко право време хем ко исправно начин — кеда сикаваја поштовање хем мангипе (Проп. 3:1, 7).

МА ЧХИНАВ ТЕ ДЕ ХЕМ ТЕ ПРИФАТИНЕ СОВЕТИЈА

16. Со сикљовеа таро Псалм 32:8?

¹⁶ О главно стихо тари акаја статија вакерела кај о Јехова ка советинел амен хем кај лескири јакх ка овел упри аменде. (Читин Псалм 32:8.) Акава значинела кај ов понадари да ка поможинел амен. Ов на само со дела амен советија него хем поможинела амен те применина лен. О Јехова тано бут шукар пример аменге! Кеда ваљани те да совет е јаверенге амен да сар о Јехова шај понадари да те охрабрина лен хем те поможина ленге те анен мудра одлуке.

17. Сар осетинаја амен кеда о старешине ка ден амен несаво совет сој темелимо ки Библија? (Исаија 32:1, 2).

¹⁷ Акана повише таро било кеда англедер ваљани те да хем те прифатина шукар советија (2. Тим. 3:1). О старешине кола со дена конкретна советија сој темелиме ки Библија тане „сар тикне реке ки шуки пхув“. (Читин Исаија 32:1, 2.) О амала кола со џанена со мангаја те шуна ама вакерена аменге адава со ваљани те шуна, дена амен јекх бут вредно поклон. Ленгере лафија тане сар „златна пхабаја ко сребрена чаре“ (Изр. 25:11). Адалеске, понадари да те развина и мудрост со ваљани аменге те шај те да хем те прифатина шукар советија.