О најшукар начин сар те реагирина ко неправде

1-2. Сар реагиринена бут мануша ки неправда, хем со шај пучаја амен?

ЖИВИНАЈА ко јекх неправедно свето. О мануша доживинена неправде таро различна причине, сар сој о чоролипе, о пол, и раса хем котар авена. Бут џене цидена муке адалеске со несаве барвале бизнисмененге или несаве манушенге сој ки власт тано важно само те заработинен паре. Асавке или јавера неправде влијајнена упри сариненде аменде — бизи разлика дали директно или индиректно.

² На изненадинела амен адава со бут мануша тане хољаме адалеске со дикхена неправде ко свето авдиве. Сарине мангаја те живина ко свето коте со ка осетина амен безбедна хем коте со о јавера ка постапинен аменцар праведно. Несаве мануша пробинена те решинен о проблемија ко свето или ки пумари пхув аѓаар со протестиринена против и влада хем о законија, или поддржинена е политичка водачен кола со ветинена кај ка боринен пе против о неправде. Ама сар христијања, амен сием сикавде те на ова „дело таро свето“ хем те аџикера е Девлескоро Царство те цидел са о неправде (Јован 17:16). Сепак, кеда дикхаја кај некаске керела пе неправда, адава разочаринела амен, а понекогаш хем хољанкерела амен. Шај пучаја амен: „Сар ваљани те реагиринав? Дали шај акана те керав нешто башо неправде?“ Те шај те одговорина ко акала пучиба, најангле те дикха сар осетинена пе о Јехова хем о Исус кеда дикхена кај е манушенцар постапинела пе неправедно.

О ЈЕХОВА ХЕМ О ИСУС МРЗИНЕНА О НЕПРАВДЕ

3. Соске тано нормално адава со хољанаја кеда дикхаја неправда? (Исаија 5:7).

³ И Библија објаснинела соске тано нормално адава со нервиринена амен о неправде. Адава тано аѓаар соске о Јехова керѓа амен спрема пло лико, а „ов мангела и праведност хем и правда“ (Пс. 33:5; 1. Мој. 1:26). Ов никогаш на постапинела неправедно хем на мангела никој јавер те постапинел ко асавко начин! (5. Мој. 32:3, 4; Мих. 6:8; Зах. 7:9). На пример, ко време е пророкоскоро е Исаијаскоро, о Јехова шунѓа о „офкибе“ буте Израелцонгоро кола со трпинена сине неправде таро јавера Израелција. (Читин Исаија 5:7.) О Јехова казнинѓа околен со секова пути пхагена сине лескоро Закони хем постапинена сине неправедно е јаверенцар (Иса. 5:5, 13).

4. Сар осетинела пе о Исус кеда некасаја постапинела пе неправедно? (Дикх хем и слика.)

⁴ Исто сар о Јехова, о Исус да мангела и правда а мрзинела и неправда. Џикоте сине ки пхув, ов ки јекх прилика дикхља јекхе мануше коле со сине парализиримо вас. Е Исусеске сине жал башо мануш хем сасљарѓа ле. Ама кеда о верска водачија колен со на сине жал дикхле адава, бут хољанѓе. Ленге сине бут поважно те на пхаген о строга правилија кола со коркори чхивѓе лен башо сабат, наместо те поможинен е манушеске со мучинела пе сине. Сар осетинѓа пе о Исус башо адава? Ов „сине бут разочаримо адалеске со на сине лен жал ко ленгере виле“ (Мар. 3:1-6).

5. Со на ваљани те бистра баши холи со шај иси амен кеда дикхаја неправда?

⁵ Адалеске со о Јехова хем о Исус тане хољаме кеда дикхена неправде, нане погрешно ако амен да осетинаја амен аѓаар (Еф. 4:26). Ама, на ваљани те бистра кај чак ако иси амен право те хољана адалеа нане те испрајна и неправда. Уствари ако повише време осетинаја холи хем ако на контролиринаја ла, адава шај лошно те влијајнел аменге ко емоционално хем физичко поглед (Пс. 37:1, 8; Јак. 1:20). Тегани сар ваљани те реагирина кеда амен или о јавера доживинена неправде? Шај те сикљова таро е Исусескоро пример.

САР РЕАГИРИНЕЛА СИНЕ О ИСУС КО НЕПРАВДЕ

6. Саве неправде сине џикоте о Исус сине ки пхув? (Дикх хем и слика.)

⁶ Џикоте сине ки пхув о Исус дикхља бут неправде. Ов пле јакхенцар дикхља сар о верска водачија малтретиринена е обично народо (Мат. 23:2-4). Исто аѓаар, ов сине свесно кај о римска владетелија постапинена сине бут лошно е народоја. Бут Евреија мангена сине те овен независна тари римско власт. Несаве, сар на пример о Зелотија чак боринена пе сине против о Римјања. Ама, о Исус на сине дело тари нијекх група која со боринела пе сине башо промене ко општество. Кеда дознајнѓа кај о мануша мангена те керен ле цари, о Исус цидинѓа пе лендар (Јован 6:15).

7-8. Соске о Исус на пробинѓа те цидел о неправде џикоте сине ки пхув? (Јован 18:36).

⁷ Џикоте сине ки Пхув, о Исус на мешинѓа пе ки политика те шај те цидел о неправде. Соске? Ов џанља кај е манушен нане лен право те владинен упро јавера мануша, а ни палем нане способна башо адава (Пс. 146:3; Ерем. 10:23). Исто аѓаар, о мануша нашти те циден о главна причине баши неправда, а адала тане о Сатана хем и несовршеност. Акале светоја владинела о Сатана о Бенг — духовно личност која со мангела те мударел е јаверен хем користинела пли власт те шај те поттикнинел е јаверен те постапинен неправедно (Јован 8:44; Еф. 2:2). А и несовршеност керела чак о мануша со иси лен шукар намере те на постапинен секогаш праведно (Проп. 7:20).

⁸ О Исус џанља кај само е Девлескоро Царство целосно ка цидел о главна причине баши неправда. Баш адалеске, ов на штединела сине пло време хем сила те шај „те проповединел хем те вакерел о шукар хабери башо е Девлескоро Царство“ (Лука 8:1). О Исус уверинѓа околен „сој бокхале хем жедна баши праведност“, кај ка авел крајо башо са о муке хем о неправде (Мат. 5:6; Лука 18:7, 8). Ама, нијекх манушикани влада нашти те керел акала промене, акава ка керел само е Девлескоро Царство, кова со „нане дело таро акава свето“. (Читин Јован 18:36.)

ЏА ПАЛО Е ИСУСЕСКОРО ПРИМЕР КЕДА ДИКХЕА НЕПРАВДЕ

9. Со уверинела тут кај само е Девлескоро Царство ка цидел са о неправде?

⁹ Амен живинаја ко последна диве таро акава свето хем адалеске иси бут повише неправде него кеда о Исус сине ки пхув. Ама, исто сар ко време е Исусескоро, авдиве да о неправде авена таро Сатана хем таро несовршена мануша упро коленде со влијајнела (2. Тим. 3:1-5, 13; Отк. 12:12). Исто сар о Исус, амен џанаја кај само е Девлескоро Царство ка цидел о главна причине башо неправде. Адалеске со амен целосно поддржинаја е Девлескере Царство, на учествујнаја ко протестија хем ко јавера активностија кола со керена пе те шај те испрајнен о неправде ко акава свето. Те дикха о искуство јекхе пхењакоро со викинела пе Стејси.a Англедер те дознајнел о чачипе, и Стејси редовно протестиринела сине против о неправде. Ама пало несаво време, ој на сине више сигурно кај адава чаче шај те поможинел е манушенге хем те решинел о проблемија. И Стејси вакерела: „Кеда џава сине ко протестија пучава ман сине дали сиум тари исправно страна. Акана, кеда поддржинава е Девлескере Царство џанава кај сиум тари исправно страна. Џанава кај о Јехова ка боринел пе секоле јекхеске сој жртва баши неправда пошукар него ме со би керава адава“ (Пс. 72:1, 4).

10. Спрема Матеј 5:43-48, соске на мангаја те ова дело таро групе со мангена те керен промене ко општество? (Дикх хем и слика.)

¹⁰ Бут мануша авдиве овена дело таро групе кола со пробинена те менинен о владе. Ама, бут џене лендар овена добором бут хољаме со чак пхагена о законија хем керена штета е јаверенге. Адава тано спротивно таро пример хем о сикљојба е Исусескере (Еф. 4:31). Јекх пхрал со викинела пе Џефри вакерела: „Џанава кај о протестија кола со изглединена мирна шај башо некобор секундија те претворинен пе ко насилство хем ко чорибе“. Сепак, о Исус сикавела амен те манга са е манушен, чак хем околен со нане лен исто мислење сар аменде или со прогонинена амен. (Читин Матеј 5:43-48.) Сар христијања, даја амендар са те шај те џа пало е Исусескоро пример.

11. Соске понекогаш шај те овел пхаро те џа пало е Исусескоро пример?

¹¹ Иако џанаја кај е Девлескоро Царство ка цидел са о неправде, шај те овел аменге пхаро те џа пало е Исусескоро пример кеда некој постапинела аменцар неправедно. Размислин башо адава со случинѓа пе е Џанајаке која со доживинѓа дискриминација. Ој признајнела: „Сиум сине бут хољами. Исто аѓаар, осетинава ман сине повредими хем мангава сине те овен казниме о мануша со керѓе манге и неправда. Пало адава, размислинава сине те почминав те поддржинав јекхе група со протестиринела сине против о расизам хем дискриминација. Мислинѓум кај акава тано најшукар начин сар шај те сикавав мли холи“. Ама сар накхела сине о време, и Џанаја халили кај ваљани те менинел пло начин сар размислинела. Ој вакерела: „Мукхљум о јавера те влијајнен упро мло размислибе хем наместо те овел ман доверба ко Јехова, почминѓум те овел ман доверба ко адава со вакерена манге сине о јавера. Адалеске, одлучинѓум те чхинавав са о контактија е манушенцар тари адаја група“. Иако иси амен право те хољана кеда о јавера постапинена аменцар лошно или кеда дикхаја кај некој јавер доживинела неправда, мора те контролирина амари холи хем те ачхова неутрална, јавере лафенцар те на мешина амен ко политичка хем општествена буќа ко акава свето (Јован 15:19).

12. Соске тано мудро те пазина со читинаја, со дикхаја хем со шунаја?

¹² Со шај те поможинел аменге те контролирина амари холи кеда ка доживина или ка дикха неправда? Буте џененге поможинѓа адава со пазинена со читинена, со шунена хем со дикхена. Несаве социјална мреже тане пхерде објавенцар или хаберенцар коте со бајрарела пе и неправда те шај те поттикнинен е манушен те бунинен пе против и влада. Бут пути, о новинарија вакерена пумаро мислење, а на сар чаче тане о буќа. Чак ако несави информација тани точно, нане те решина о проблемија ако понадари да читинаја башо адава со случинѓа пе. Уствари, ако повише време шунаја хем читинаја асавке хаберија, адава шај те вознемиринел амен или те обесхрабринел амен (Изр. 24:10). А сој панда полошно, шај те бистра кај само е Девлескоро Царство ка анел решение башо са о неправде.

13. Сар адава со ка читина и Библија секова диве шај те поможинел аменге те ове амен исправно стави башо неправде?

¹³ Ако секова диве читинаја и Библија хем хор размислинаја башо адава со читинѓем, адава ка поможинел аменге те икљова ко крајо е неправденцар. Јекх пхен со викинела пе Алија сине бут вознемирими кеда дикхља кај лошно постапинела пе е манушенцар ко тхан коте со живинела. Ој сине хољами соске на сине казниме окола со постапинена сине неправедно. И Алија вакерела: „Мора сине те бешав хем те пучав ман дали чаче верујнава кај о Јехова ка решинел акала проблемија. Баш ко адава време читинѓум о стихија таро Јов 34:22-29. Адала стихија сетинкерѓе ман кај никој нашти те гаравел пе таро Јехова. Само ле иси ле совршено чувство баши правда хем само ов шај те решинел са о проблемија“. Ама, џикоте аџикераја е Девлескоро Царство те анел чачутни правда, со шај те кера акана башо неправде?

СО ШАЈ АКАНА ТЕ КЕРА БАШО НЕПРАВДЕ

14. Со шај амен те кера те шај те на овен повише неправде ко свето? (Колошања 3:10, 11).

¹⁴ Нашти те менина о начин сар о мануша постапинена е јаверенцар, ама шај амен те постапина шукар е манушенцар. Сар со више дикхлем, амен џаја пало е Исусескоро пример аѓаар со сикаваја мангипе. Асавко мангипе шај те поттикнинел амен те сикава поштовање е јаверенге, па чак околенге со керена неправда (Мат. 7:12; Рим. 12:17). О Јехова радујнела пе кеда постапинаја праведно хем љубезно сариненцар. (Читин Колошања 3:10, 11.)

15. Сар адава со сикаваја е манушен башо библиско чачипе поможинела те овен похари неправде?

¹⁵ Најшукар начин сар шај те реагирина ко неправде тано те сикава е манушен башо библиска чачипа. Соске вакераја акава? Адалеске со кеда о мануша ка дознајнен башо Јехова хем ка манген те керен лескири волја, адава шај те поттикнинел лен те керен промене хем таро агресивна хем насилна мануша те овен љубезна хем те сикавен мангипе (Иса. 11:6, 7, 9). Англедер те дознајнел о чачипе, јекх мануш со викинела пе Џамал уло дело тари јекх бунтовно група која со боринела пе сине против и влада соске мислинела сине кај мучинела е народо. Ов вакерела: „Нашти силаја те менине е манушен. Ама, кеда ка дознајнен о библиско чачипе, ола шај те менинен пе. О чачипе ман да поможинѓа ман те менинав ман“. Адава со о Џамал дознајнѓа, поттикнинѓа ле те чхинавел те боринел пе против и влада. Адалеске, кеда сикаваја е манушен башо библиско чачипе, шај те поможина похари мануша те керен неправда.

16. Со поттикнинела тут те вакере е јаверенге башо адава со ка керел е Девлескоро Царство?

¹⁶ Исто сар о Исус, амен да едвај аџикераја те вакера е манушенге кај само е Девлескоро Царство ка решинел и неправда. Асавки надеж шај те охрабринел околен сој малтретириме (Ерем. 29:11). И Стејси, кола со спомнинѓем ла англедер, објаснинела: „Адава со дознајнѓум о чачипе поможинела манге те ачховав смирими кеда дикхава или доживинава несави неправда. О Јехова користинела о библиско хабери те шај те утешинел амен“. Ваљани шукар те спремина амен те шај те утешина е јаверен е хабереа тари Библија кај о Девел ка решинел о неправде. Кобор поувериме ка ова ко библиска чачипа со дикхлем лен ки акаја статија, добором пошукар ка ова спремиме те кера лафи ко тактично начин баши акаја тема е јаверенцар ки школа или ки бути.b

17. Сар поможинела аменге о Јехова те икљова ко крајо е неправденцар авдиве?

¹⁷ Џанаја кај са џикоте о Сатана владинела акале светоја, ка доживина неправде. Ама, амен на сием бизи помош, а ни бизи надеж џикоте аџикераја о Јехова те „палдел“ ле (Јован 12:31). Преку и Библија, о Јехова на само со откринела соске иси добором бут неправде, него хем сар осетинела пе кеда дикхела кај мучинаја амен (Пс. 34:17-19). Преку пло Чхаво, о Јехова сикавела амен сар ваљани те реагирина ко неправде кола со доживинаја лен авдиве хем сар лескоро Царство панда хари ка цидел са о неправде јекх пути засекогаш (2. Пет. 3:13). Адалеске, понадари да ревно те проповедина о шукар хабери башо адава Царство хем вилеа те аџикера о време кеда ки цели пхув ка овел правда хем праведност (Иса. 9:7).