„О Судија упри цело пхув“ секогаш керела адава сој праведно

1. Сар о Авраам сикавѓа кај иси ле доверба ки е Јеховаскири праведност? (Дикх и слика ко почеток тари статија.)

„ЗАРЕМ о Судија упри цело пхув нане те керел адава сој праведно?“ (1. Мој. 18:25). О верно мануш о Авраам на пучља акава пучибе соске сумнинела пе сине ки е Јеховаскири праведност. Акава пучибе сикавела лескири доверба кај о Јехова праведно ка судинел о дизја Содом хем Гомор. Ов сине сигурно кај о Јехова никогаш „нане те мударел е праведно мануше заедно е лошноја“. О Авраам џанља кај о Јехова никогаш нане те керел адава. Пало адава, о Мојсеј башо Јехова пишинѓа: „Ов тано Карпа, са со керела тано совршено, соске са лескере друмија тане праведна. Ов тано верно Девел, бизи неправда, праведно хем мангела о чачипе“ (5. Мој. 31:19; 32:4).

2. Соске о Јехова никогаш нашти те овел неправедно?

² Соске о Авраам сине уверимо кај о Јехова секогаш керела адава сој исправно? Адалеске со о Јехова тано најбаро пример баши правда. Лескере мерилија тане секогаш праведна хем ов секогаш ка судинел о буќа исправно. Ки Библија пишинела: „Ов мангела и праведност хем и правда“ (Пс. 33:5).

3. Вакер јекх пример баши неправда со иси ко свето.

³ Утешно тано адава со џанаја кај о Јехова тано секогаш праведно. Ама, о свето авдиве тано пхердо неправде. На пример, несаве мануша тане осудиме хем пханле ко затвор башо буќа со на керѓе лен. Несаве сине мукхле таро затвор кеда е неве технологијаја аракхле пе неве доказија хем дикхља пе кај нане крива, само жалосно тано со адава уло пало бут берша. Асавке неправде керена некој те овел бут хољамо хем разочаримо. Ама, иси јавер неправда која со шај те овел панда попхари те издржинел пе. Сави тани адаја неправда?

НЕПРАВДА КО СОБРАНИЕ

4. Сар шај те овел испитими амари вера?

⁴ Е Девлескере слуге џанена кај ка доживинен несави неправда таро мануша ко свето. Ама, амари вера шај те овел испитими ако дикхаја или доживинаја нешто со аменге дикхјола сар неправда ко собрание. Тегани сар ка реагирина? Дали ка дозволина акава те обесхрабринел амен?

5. Соске на ваљани те изненадина амен ако дикхаја или доживинаја неправда ко собрание?

⁵ Сарине амен сием несовршена хем грешинаја, адалеске шај те случинел пе некој те овел неправедно аменцар или амен те ова некасаја неправедна ко собрание (1. Јов. 1:8). Иако акава случинела пе ретко, о верна слуге е Девлескере нане изненадиме хем на дозволинена те перен духовно кеда ка овел несави неправда. О Јехова денѓа амен корисна советија ки Библија со шај те поможинен амен те ачхова верна ако доживинаја неправда таро амаре пхраља или пхења (Пс. 55:12-14).

6, 7. Сави неправда доживинѓа јекх пхрал хем кола особине поможинѓе ле?

⁶ Те дикха о пример е пхралескоро со викинела пе Вил Диел. Таро 1931 берш, ов верно служинѓа ко Бетел ко Берн (Швајцарија). Ко 1946 берш, сине ко офтото класи ки школа Гилеад ко Њујорк (Америка). Несаво време пали школа, ов почминѓа те служинел сар покраинско надгледнико ки Швајцарија. Ко пло искуство, о пхрал Диел вакерѓа кај ко мај 1949 берш пишинѓа џи ки подружница ки Швајцарија кај планиринела те женинел пе. Со вакерѓе леске о одговорна пхраља? Ола вакерѓе леске кај ка лен лестар са о одговорностија. Дозволинѓе леске те овел само пионери. Ов вакерѓа: „На сине манге дозволимо те икерав говорија. Бут џене на керена сине аменцар лафи хем понашинена пе сине аменцар сар те пхене сием исклучиме“.

⁷ Сар реагиринѓа акава пхрал? Ов вакерѓа: „Џанаја сине кај о женибе нане нешто со на дозволинела и Библија, адалеске молинаја амен сине е Јеховаске хем мукхлем о буќа леске ко васта“. Иако несаве пхраља на халиле исправно сар дикхела о Јехова ко брако, пало несаво време сине ленге поможимо те менинен пло стави, хем сине ираме о одговорностија е пхралеске. О Јехова наградинѓа лескири верност.a (Дикх и фуснота.) Шај те пуча амен: „Те доживинав сине асавки неправда, дали ка овав сине ме да стрпливо хем ка аџикерав таро Јехова те испрајнел и ситуација? Или ка лав сине о буќа ко мле васта хем ка трудинав ман ме те испрајнав и неправда?“ (Изр. 11:2; читин Михеј 7:7.)

8. Соске шај погрешно те мислина кај амен или некој јавер доживинѓа неправда?

⁸ Ако мислинаја кај иси несави неправда ко собрание, ма те бистра, шај на сием ко право. Соске? Амен сием несовршена хем шај погрешно халилем и ситуација. Исто аѓаар, шај на џанаја са о буќа баши адаја ситуација. Ама, бизи разлика дали сием ко право или на, мора те молина амен е Јеховаске баши адаја ситуација, те овел амен доверба ки лесте хем те ачхова верна. Адава ка заштитинел амен те на хољана е Јеховаске. (Читин Изреки 19:3.)

9. Кола примерија ка дикха ки акаја хем ки јавер статија?

⁹ Те дикха трин примерија таро пурано време сар е Јеховаскере слуге доживинѓе неправда. Ки акаја статија, ка дикха со доживинѓа е Авраамескоро параунуко о Јосиф таро пле пхраља. Ки јавер статија, ка дикха сар о Јехова постапинѓа е цареа о Ахав хем со случинѓа пе е Петареа ки сириско Антиохија. Џикоте дикхаја акала примерија, размислин сар шај те поможинен туке те дикхе ко буќа сар со дикхела о Јехова хем те аракхе тло амалипе леа, посебно кеда мислинеа кај доживинѓан неправда.

О ЈОСИФ ДОЖИВИНЃА НЕПРАВДА

10, 11. а) Саве неправде доживинѓа о Јосиф? б) Сави прилика сине е Јосифе џикоте сине ко затвор?

¹⁰ О Јосиф сине верно слуга е Јеховаске кова со доживинѓа неправда таро јавера. Ама адава со највише дукхандило ле сине и неправда со доживинѓа ла таро пле пхраља. Кеда е Јосифе сине ле 17 берш, лескере пхраља бикинѓе ле сар робо манушенге со ингарѓе ле ко Египет (1. Мој. 37:23-28; 42:21). Пало несаво време, ов сине обвинимо башо нешто со на керѓа ле, кај мангља те силујнел јекхе ромња, хем сине пханло ко затвор бизо те судинел пе леске (1. Мој. 39:17-20). О Јосиф сине робо хем затворенико отприлика 13 берш. Ако доживинаја несави неправда таро амаре пхраља, сар шај те поможинел амен е Јосифескоро пример?

¹¹ Џикоте о Јосиф сине ко затвор, е фараонескоро главно пехарнико исто аѓаар сине ко затвор. Јекх рат, акава пехарнико дикхља суно хем о Јехова поможинѓа е Јосифеске те објаснинел е пехарникоске со значинела акава суно. О Јосиф вакерѓа леске кај ка овел мукхло таро затвор хем палем ка служинел е фараонеске. Тегани ов користинѓа и прилика те вакерел е пехарникоске пли ситуација. Шај бут те сикљова таро адава со вакерѓа о Јосиф, ама исто аѓаар таро адава со на вакерѓа (1. Мој. 40:5-13).

12, 13. а) Дали о Јосиф прифатинѓа пли ситуација бизо те керел нешто? б) Со на вакерѓа о Јосиф е пехарникоске?

¹² Читин 1. Мојсеева 40:14, 15. О Јосиф вакерѓа кај сине „чордо тари пхув е Евреенгири“. Леа постапинѓа пе неправедно. Ов исто аѓаар вакерѓа кај обвининѓе ле башо нешто со на керѓа хем чхивѓе ле ко затвор. Адалеске, таро пехарнико родинѓа те вакерел е фараонеске баши лесте те шај те икалел ле таро затвор.

¹³ Дали о Јосиф само прифатинѓа пли ситуација бизо те трудинел пе те керел нешто? На! Ов џанља кај сине леске керде повише неправде. Адалеске, вакерѓа пли ситуација е пехарникоске хем надинела пе сине кај ов шај те поможинел ле. Ама, ки Библија на пишинела кај о Јосиф вакерѓа некаске, чак ни е фараонеске, кај лескере пхраља сине адала со бикинѓе ле. Адава џанаја, соске кеда е Јосифескере пхраља але ко Египет хем смиринѓе пе леа, о фараони канинѓа лен те живинен ко Египет хем те уживинен ко са о шукарипе тари адаја пхув (1. Мој. 45:16-20).

14. Со ка поможинел амен те на вакера нешто лошно ако доживинаја неправда ко собрание?

¹⁴ Ако мислинаја кај доживинѓем неправда ко собрание, ваљани те пазина те на ширина е јаверенге башо адава. Џанѓола пе кај ваљани те рода помош таро старешине хем те пхена ленге ако несаво пхрал керѓа сериозно грево (3. Мој. 5:1). Ама, ко бут ситуацие на керела пе лафи башо сериозно грево, адалеске шај те смирина амен е пхралеа бизо те вакера некаске, чак ни е старешиненге. (Читин Матеј 5:23, 24; 18:15.) Ко асавке ситуацие ваљани те ова верна хем те икера амен ко библиска мерилија. Некогаш шај ка дикха кај погрешно халилем и ситуација хем кај на доживинѓем неправда. Тегани ка ова благодарна со на вакерѓем лошна буќа башо пхрал или пхен хем адалеа на керѓем те овел полошно и ситуација. Те на бистра, бизи разлика дали сием ко право или на, ако вакераја нешто со ка дукхавел е јаверен нане те кера пошукар и ситуација. Ако сием верна е Јеховаске хем амаре пхраленге нане те кера асавки грешка. О псалмисти вакерѓа кај о мануш со шунела секогаш е Девле „на вакерела ифтире пле чхибјаја. На керела нисаво лошнипе пле паше амалеске“ (Пс. 15:2, 3; Јак. 3:5).

МА БИСТРЕ СОЈ НАЈВАЖНО

15. Со шај сине те дикхел о Јосиф адалеске со ачхило паше е Јеховаја?

¹⁵ Таро пример е Јосифескоро сикљоваја панда јекх бути. Ов 13 берш доживинѓа неправде, ама сикавѓа кај дикхела ко буќа сар о Јехова (1. Мој. 45:5-8). Никогаш на керѓа криво е Јехова баши пли ситуација. Иако о Јосиф на бистерѓа о неправде со доживинѓа лен, на икерѓа холи ки песте. Ов на дозволинѓа и несовршеност хем о погрешно постапибе е јаверенгоро те циден ле таро Јехова. Адалеске со ачхило верно, шај сине те дикхел сар о Јехова испрајнела о неправде хем сар дела берекети ле хем лескере фамилија.

16. Соске ваљани те ова панда попаше е Јеховаја ако доживинаја неправда ко собрание?

¹⁶ Амен да ваљани те ценина хем те аракха амаро амалипе е Јеховаја. Никогаш на ваљани те дозволина и несовршеност амаре пхраленгири те цидел амен таро Девел коле со мангаја ле хем обожавинаја ле (Рим. 8:38, 39). Ако доживинаја неправда ко собрание, те постапина сар о Јосиф хем те ова панда попаше е Јеховаја. Те трудина амен те дикха о буќа сар со дикхела о Јехова. Ако керѓем са со шај те решина о проблеми адалеа со применинѓем о библиска начелија, тегани ваљани те мукха о буќа е Јеховаске ко васта. Шај те ова сигурна кај ов ка испрајнел и неправда ко начин хем време кова сој најшукар.

НЕКА ОВЕЛ ТУТ ДОВЕРБА КО „СУДИЈА УПРИ ЦЕЛО ПХУВ“

17. Сар шај те сикава кај иси амен доверба ко „Судија упри цело Пхув?“

¹⁷ Са џикоте живинаја ко акава лошно свето, шај те доживина неправде. Несаво пути, шај те изглединел туке кај ту или некој со џанеа ле доживинела неправда ко собрание. Ма мукх адава те перавел тут (Пс. 119:165). Ачхов верно е Девлеске, молин тут те поможинел тут хем нека овел тут доверба ки лесте. Ма бистре, адалеске со сием несовршена шај погрешно те хаљова и ситуација хем шај на џанаја са о буќа баши адаја ситуација. Ов сар о Јосиф, ма кер негативно лафи башо јавера соске адава шај те керел и ситуација те овел полошно. Наместо те ле о буќа ко тле васта, ов одлучно те ачхове верно хем аџикер стрпливо о Јехова те испрајнел и неправда. Тегани о Јехова ка овел тутар задоволно хем ка дел тут берекети сар со денѓа е Јосифе. Шај те ове сигурно кај о Јехова, о „Судија упри цело Пхув“, секогаш керела адава сој праведно соске „са лескере друмија тане праведна“ (1. Мој. 18:25; 5. Мој. 32:4).

18. Со ка дикха ки јавер статија?

¹⁸ Ки јавер статија ка дикха панда дуј примерија таро пурано време сар е Јеховаскере слуге доживинѓе неправда. Таро акала примерија ка дикха сар адава со ка ова понизна хем ка простина ка поможинел амен те дикха ки правда сар со дикхела о Јехова.