Поштујн е јаверен

1. Соске аменге шукар кеда о јавера поштујнена амен? (Изреки 22:1).

ДАЛИ осетинеа тут шукар кеда о јавера поштујнена тут? Сигурно кај оја. Секоле мануше иси ле потреба те овел поштујмо. Кеда о јавера поштујнена амен адава керела амен среќна. Баш адалеске и Библија вакерела кај „те ове поштујмо тано пошукар таро сребро хем таро злато“. (Читин Изреки 22:1.)

2-3. Соске нане секогаш локхо те поштујна е јаверен, хем кас ваљани те поштујна?

² Нане аменге секогаш локхо те поштујна е јаверен. Јекх бути соске тано адава аѓаар адалеске со дикхаја ленгере слабостија. Исто аѓаар, живинаја ко време кеда тано нормално о мануша те на сикавен поштовање. Ама амен мора те разликујна амен. Соске? Адалеске со о Јехова вакерела: „Поштујнен саринен“ (1. Пет. 2:17).

³ Ки акаја статија ка дикха со значинела те поштујна е јаверен хем сар шај те сикава поштовање 1) амаре фамилијаке, 2) амаре пхраленге хем пхењенге хем 3) адаленге со нане е Јеховаскере сведокија. Посебно ка концентририна амен ко адава сар шај те сикава поштовање чак кеда адава нане локхо.

СО ЗНАЧИНЕЛА ТЕ ПОШТУЈНА Е ЈАВЕРЕН?

4. Со значинела те поштујна е јаверен?

⁴ Сар би објаснинеа со значинела о лафи поштовање? Ко несаве чхибја, машкар коленде сој хем амари, о лафија „поштовање“ хем „чест“ тане поврзиме. Акале лафенцар мислинела пе ко адава сар дикхаја некасте хем сар постапинаја леа. Кеда ка приметина кај некас иси шуже особине, кај керѓа нешто важно хем кај иси ле несаво авторитети упри аменде, асавке мануше поштујнаја ле хем кераја са те шај те осетинел пе кај врединела хем ценинаја ле. Нормално, важно тано те поштујна е јаверен искрено, јавере лафенцар таро вило (Мат. 15:8).

5. Со шај те поттикнинел амен те поштујна е јаверен?

⁵ О Јехова мангела те поштујна е јаверен. На пример, ов вакерела аменге: „Секова мануш нека овел подложно е властенге со иси лен авторитети“ (Рим. 13:1, 7). Ама, несаве шај мислинена: „Ка поштујнав е јаверен само ако ола заслужинена адава“. Дали асавко размислибе тано исправно? На. Сар слуге е Јеховаскере хаљоваја кај о поштовање со иси амен спрема о мануша на ваљани те зависинел само таро ленгере постапке. Адава ваљани те темелинел пе ко амаро мангипе спрема о Јехова хем амари желба те радујна ле (1. Пет. 3:15).

6. Дали шај те поштујне некас со на поштујнела тут? Објаснин. (Дикх хем и слика.)

⁶ Несаве шај пучена пе: „Дали чаче шај те поштујне некас со на поштујнела тут?“ Шај. Те дикха некобор примерија. О цари о Саул понижинѓа пле чхаве е Јонатане англо јавера (1. Сам. 20:30-34). Сепак, о Јонатан сикавѓа кај поштујнела пле даде кова со сине цари хем понадари да боринела пе сине заедно леа ко војне са џикоте сине џивде (2. Мој. 20:12; 2. Сам. 1:23). О првосвештенико о Илиј кривинѓа е Ана кај тани мати (1. Сам. 1:12-14). Сепак, и Ана поштујнѓа ле џикоте керѓа леа лафи, иако сарине ко Израел џанена сине кај на укоринѓа пле лошна чхавен со би ваљани сине те керел сар дад хем сар првосвештенико (1. Сам. 1:15-18; 2:22-24). Несаве филозофија ки Атина вреџинѓе е апостол Павле аѓаар со вакерѓе леске кај бут „брборинела“ (Апо. 17:18). Ама сепак о Павле поштујнѓа лен џикоте керѓа ленцар лафи (Апо. 17:22). Акала примерија сикавена кај о баро мангипе спрема о Јехова хем и желба те на разочарина ле шај те поттикнинен амен те поштујна е јаверен на само кеда адава тано локхо, него хем кеда тано пхаро. Те дикха кас ваљани те поштујна, хем соске?

СИКАВ ПОШТОВАЊЕ ТЛЕ ФАМИЛИЈАКЕ

7. Соске нане аменге секогаш локхо те поштујна амаре фамилија?

⁷ Соске тано пхаро? Амен накхаваја бут време заедно амаре фамилијаја адалеске шукар џанаја кола тане ленгере шукар особине, а кола тане ленгере слаба стране. Несавен шај иси лен насвалипе кова со керела аменге пхаро те грижина амен ленге или шај иси лен претерано стрес хем тане бут секириме. Јавера палем, шај дукхавена амен пле лафенцар или адалеа со керена. Амен ваљани те осетина амен шукар кеда сием амаре фамилијаја. Ама, ако несаве лендар на сикавена поштовање тегани нане те овел мир ки фамилија хем слога. И фамилија шај те спорединел пе јекхе телоја. Несаво насвалипе шај те керел о тело те на функциониринел шукар. Слично, ако ки фамилија на поштујнена пе јекх јекхеа адава шај те керел те на накхен шукар. Ама, исто сар со бут таро насвалипа шај те сасљон, секова јекх тари фамилија шај те сикљол те овел ле хем те сикавел поштовање јекх јекхеске.

8. Соске тано важно те поштујна секоле јекхе ки фамилија? (1. Тимотеј 5:4, 8).

⁸ Соске те сикава поштовање? (Читин 1. Тимотеј 5:4, 8.) Ко пло прво писмо џи ко Тимотеј о Павле керѓа лафи башо адава сар секова јекх тари фамилија ваљани те грижинел пе јекх јекхеске. Ов објаснинѓа кај ваљани те поштујна секоле јекхе тари фамилија на адалеске со мора него адалеске со служинаја „е Девлеске цело вилеа“. Акава значинела кај адава кераја таро мангипе спрема о Јехова хем адалеске со ко адава дикхаја сар дело таро амаро обожавибе е Девле. О Јехова керѓа и фамилија (Еф. 3:14, 15). Адалеске, кеда поштујнаја амен јекх јекхеа ки фамилија, уствари поштујнаја е Јехова, кова со керѓа и фамилија (1. Тим. 5:4). Акаја тани бари причина соске те сикава поштовање ки фамилија!

9. Сар шај јекх ром хем јекх ромни те сикавен песке поштовање? (Дикх хем о слике.)

⁹ Сар те сикава поштовање. Јекх ром кова со поштујнела пле ромња сикавела кај тани леске скапоцено хем кеда тане коркори хем англо јавера (Изр. 31:28; 1. Пет. 3:7). Ов никогаш на кхувела ла, на понижинела ла, а ни палем на керела ој те осетинел пе кај на врединела. О Ариел,a јекх пхрал со живинела ки Аргентина, вакерела: „Адалеске сој тани насвали, ми ромни понекогаш вакерела буќа коленцар со дукхавела ман. Кеда случинела пе адава трудинава ман те на бистрав кај на мислинела чаче адава со вакерела. А кеда више нашти те издржинав сетинава ман ко лафија таро 1. Коринќања 13:5 хем адава поможинела ман кеда керава лаја лафи те сикавав поштовање наместо холи“ (Изр. 19:11). Јекх ромни сикавела кај поштујнела пле роме аѓаар со керела шукар лафи баши лесте англо јавера (Еф. 5:33). Ој нане леа саркастично, на лела ле ки хајгара хем на викинела ле груба анавенцар, соске тани свесно кај асавко понашибе тано сар ’рѓа со уништинела о брако (Изр. 14:1). Јекх пхен тари Италија, колакере роме иси ле анксиозност, вакерела: „Понекогаш мислинава кај мо ром претерано грижинела пе. Англедер таро мле лафија хем фаце ко муј дикхјола пе сине кај на поштујнава ле. Ама халиљум кај кобор повише време накхавава манушенцар кола со поштујнена е јаверен џикоте керена лафи добором повише сиум поттикними те сикавав поштовање ме ромеске“.

10. Сар шај о терне те сикавен кај поштујнена пле родителен?

¹⁰ Тернален, овен послушна башо правилија со чхивена лен тумаре родителија (Еф. 6:1-3). Адалеа сар керена ленцар лафи сикавен кај поштујнена лен (2. Мој. 21:17). Сар со пхујрона, тле родителенге шај ка ваљанел повише тли помош. Грижин тут ленге најшукар со шај. Те дикха о пример е Маријакоро, колакоро дад нане е Јеховаскоро сведоко. Кеда насвалило ов керѓа те овел попхаро е Маријаке те грижинел пе леске адалеске со дукхавела ла сине бут груба лафенцар. Ој вакерела: „Молинѓум ман на само те поштујнав ме даде него хем те сикавав адава. Размислинѓум башо адава кај ако о Јехова родела мандар те поштујнав мле родителен тегани тано логично кај ов шај те дел ман хем сила те керав адава. Сар со накхела сине о време халиљум кај мо дад на ваљани те менинел о начин сар понашинела пе манцар те шај те поштујнав ле“. Ако поштујнаја секоле јекхе тари амари фамилија иако иси ле слабостија, сикаваја кај поштујнаја е Јехова кова со керѓа и фамилија.

СИКАВ ПОШТОВАЊЕ ТЛЕ ПХРАЛЕНГЕ ХЕМ ТЛЕ ПХЕЊЕНГЕ

11. Соске шај те овел аменге пхаро те поштујна несаве пхрале или пхења?

¹¹ Соске тано пхаро? Амаре пхраља хем пхења живинена спрема о библиска мерилија, ама понекогаш шај несаве лендар нане те овен аменцар љубезна, ка овел лен погрешно мислење баши аменде или ка нервиринен амен. Ако иси амен причина те жалина амен несаве пхралестар или пхењатар, шај ка овел аменге пхаро понадари те поштујна лен (Кол. 3:13). Ама, со шај те поможинел амен те на чхинава те поштујна лен?

12. Соске тано важно те поштујна амаре пхрален хем пхењен? (2. Петарескоро 2:9-12).

¹² Соске те сикава поштовање? (Читин 2. Петарескоро 2:9-12.) Ко пло дујто писмо, о Петар спомнинѓа кај несаве христијања таро собрание ко прво веко на сикавѓе поштовање пле лафенцар околенге „со иси лен авторитети“, јавере лафенцар е старешиненге. Сар реагиринѓе ко адава о верна ангелија кола со дикхена сине со случинела пе? Замислин, таро поштовање спрема о Јехова ола на вакерѓе нијекх лошно лафи адале манушенге! О ангелија, кола сој совршена, на вреџинѓе лафенцар адале арогантна манушен. Наместо адава, ола мукхле о Јехова те судинел лен хем те укоринел лен (Рим. 14:10-12; споредин Јуда 9). Шај те сикљова таро ангелија. Ола на понашинѓе пе лошно чак е противниконцар. Адалеске, кобор повише амен ваљани те поштујна амаре пхрален хем пхењен кола со мангена е Јехова. Уствари, и Библија поттикнинела амен: „Овен прва ко адава те сикавен кај поштујнена јекх јекхе“ (Рим. 12:10). Аѓаар ка сикава кај поштујнаја е Јехова.

13-14. Сар шај те сикава поштовање амаре пхраленге хем пхењенге? Вакер примерија. (Дикх хем о слике.)

¹³ Сар те сикава поштовање. Сар старешине, кеда сикавена е јаверен секогаш керен адава мангипаја (Филем. 8, 9). Ако ваљани те ден некаске совет керен ле адава ко љубезно начин, а на кеда сиен нервозна. Пхењален, тумен шај бут те поможинен е јаверенге ко собрание те поштујнен пе јекх јекхеа, аѓаар со нане те керен негативно лафи е јаверендар ни палем нане те клеветинен (Тит 2:3-5). Сарине амен шај те сикава кај поштујнаја е старешинен ко собрание аѓаар со ка соработина ленцар, ка сикава ленге благодарност башо трудо со дена те шај те икерен о состанокија, те предводинен ки служба хем те поможинен околенге со геле ко лошно друмо (Гал. 6:1; 1. Тим. 5:17).

¹⁴ Јекхе пхењаке со викинела пе Росио, сине пхаро те поштујнел јекхе старешина кова со денѓа ла совет. Ој вакерела: „Сиум сине вознемирими соске мислинѓум кај на керѓа манцар љубезно лафи. Кхере керава сине лестар негативно лафи. Иако пробинава сине те на сикавав адава, хор ки манде осетинава сине кај на денѓа ман о совет таро исправно мотиви хем адалеске на шунѓум ле“. Со поможинѓа акале пхењаке? Ој објаснинела: „Џикоте читинава сине и Библија, читинѓум о стихија таро 1. Солунјања 5:12, 13. Кеда халиљум кај на сикавава поштовање адале пхралеске мли совест почминѓа те мучинел ман. Молинѓум ман е Јеховаске хем истражинѓум ко амаре публикацие те шај те аракхав конкретна информацие кола со ка поможинен манге те променинав мло стави. Акава поможинѓа ман те хаљовав кај о проблеми на сине ко пхрал него ки мли гордост. Акана халиљум кај ако на сиум понизно ка овел манге пхаро те поштујнав е јаверен. Панда трудинава ман те сикавав повише поштовање е јаверенге хем џанава кај о Јехова радујнела пе башо адава“.

СИКАВ ПОШТОВАЊЕ ОКОЛЕНГЕ СО НАНЕ Е ЈЕХОВАСКЕРЕ СВЕДОКИЈА

15. Соске шај те овел аменге пхаро те поштујна околен со нане е Јеховаскере сведокија?

¹⁵ Соске тано пхаро? Џикоте проповединаја бут пути аракхаја манушен кола со на мангена о библиско чачипе (Еф. 4:18). Несаве одбинена те шунен амаро хабери соске таро тикнипе тане сикавде те верујнен ко нешто јавер. Несаве колеге или соученикија шај понашинена пе грубо аменцар, шај амаро шефи или наставнико никогаш нане задоволно таро адава со кераја. Сар со накхела о време, шај те на поштујна асавке манушен хем те чхинава те постапина ленцар аѓаар сар со би мангаја о јавера те постапинен аменцар.

16. Соске тано важно те сикава поштовање околенге со панда на служинена е Јеховаске? (1. Петарескоро 2:12; 3:15).

¹⁶ Соске те сикава поштовање? Ма бистре кај о Јехова дикхела сар постапинаја околенцар со панда на служинена леске. О апостол Петар сетинкерѓа е христијанен кај адалеа со ка понашинен пе шукар шај те поттикнинен несавен „те славинен е Девле“. Адалеске, ов вакерѓа ленге те објаснинен пле верувања ко кротко начин хем те сикавен хор поштовање. (Читин 1. Петарескоро 2:12; 3:15.) Бизи разлика дали ваљани те објаснинен пумаре верувања англо несаво судија или англо некој јавер, о христијања ваљани секогаш те поштујнен е јаверен, исто сар со би керена адава ако о Девел тано узи ленде. Ко крајо, о Јехова дикхела хем шунела со вакераја хем сар вакераја адава. Акава сикавела аменге кобор ваљани те поштујна адален со нане е Јеховаскере сведокија!

17. Сар шај те поштујна околен со нане е Јеховаскере сведокија?

¹⁷ Сар те сикава поштовање. Џикоте проповединаја, никогаш на мангаја о јавера те мислинен кај пераваја адален со на џанена бут баши Библија. Наместо адава, на бистраја кај ола тане скапоцена е Девлеске хем кај тане побаре амендар (Агеј 2:7; Фил. 2:3). Ако некој вреџинела тут башо тле верувања, ма иран ко исто начин аѓаар со ки шала ка фрде леске лафија (1. Пет. 2:23). Ама, ако вакереа нешто башо кова со покасно ка пере пишмани, одма извинин тут леске. Сар шај те поштујна е манушен ки бути? Ов буќарно работнико хем трудин тут те приметине о шукар буќа ко колеге хем ко шефија (Тит 2:9, 10). Кеда сиан поштено хем буќарно работнико шај нане секогаш те угодине е манушенге, ама сигурно ка угодине е Девлеске (Кол. 3:22, 23).

18. Соске тано важно те поштујна е јаверен?

¹⁸ Иси амен бут причине те сикава поштовање е јаверенге. Дикхлем кај, кеда поштујнаја секоле јекхе тари фамилија уствари поштујнаја е Јехова, о Поглавари ки амари фамилија. Слично, кеда поштујнаја амаре духовно пхрален хем пхенен, поштујнаја амаре Даде сој ко небо. А кеда поштујнаја околен со нане е Јеховаскере сведокија, кераја те овел ленге полокхо јекх диве ола да те почминен те славинен ле, јавере лафенцар те ден чест амаре баре Девлеске. Чак ако несаве мануша никогаш на поштујнена амен, важно тано секогаш амен те поштујна лен. Соске? Адалеске со о Јехова ка благословинел амен. Ов ветинела аменге: „Ме сикавава чест адаленге со сикавена манге чест“ (1. Сам. 2:30).