Околен со иси лен исправно стави башо вечно живото ка прифатинен о чачипе

1. Ко саве различна начинија реагиринена о мануша ко шукар хабери? (Апо. 13:47, 48; 16:14, 15).

БУТ мануша ко прво веко одма прифатинѓе о чачипе само со шунѓе о хабери башо Царство. (Читин Апостолија 13:47, 48; 16:14, 15.) Слично авдиве да несаве мануша радујнена пе кеда прво пути ка шунен о шукар хабери. А несаве иако ко почеток на сикавѓе интерес баши порака башо Царство, покасно мангле те сикљовен баши лесте хем прифатинѓе ле. Со ваљани те кера кеда ки служба ка аракха манушен колен со иси лен исправно стави башо вечно живото?

2. Ки која смисла амаро проповедибе тано слично е буќаја со керела ла јекх земјоделцо?

² Амаро проповедибе шај те споредина ле е буќаја со керела ла јекх земјоделцо. Ако несаве плодија тане зрела о земјоделцо веројатно ка кхедел лен, ама ка продолжинел те чхивел пани хем те грижинел пе околенге со панда нане зрела. Слично кеда аракхаја некас сој спремно те прифатинел амаро хабери, мангаја те поможина леске те овел е Христосескоро ученико со шај посигате. А ко исто време на чхинаваја те поможина околенге коленге со ваљани повише време те шај те хаљовен кобор врединела о хабери (Јован 4:35, 36). Кеда ка проценина дали о мануша тане спремна те прифатинен о хабери или на, тегани ка џана сар најшукар те поможина ленге. Те дикха со шај те кера ко прво разговор те шај те поможина околенге сој спремна те прифатинен о хабери. А исто аѓаар, ка дикха сар шај те поможина асавкенге понадари да те напредујнен.

КЕДА О МАНУША ТАНЕ СПРЕМНА ТЕ ПРИФАТИНЕН О ШУКАР ХАБЕРИ

3. Со шај те кера кеда ки служба ка аракха манушен со интересинена пе? (1. Коринќања 9:26).

³ Кеда ки служба ка аракха манушен со интересинена пе, мангаја те поможина ленге те почминен одма те џан ко друмо со ингарела ко живото. Ко асавке ситуацие шај панда ко прво разговор те нудина ленге библиско курси хем те канина лен ко амаре состанокија. (Читин 1. Коринќања 9:26.)

4. Вакер пример некастар со сине спремно одма те проучинел и Библија.

⁴ Нудин библиско курси. Несаве коленге со сведочинаја тане спремна одма те проучинен и Библија. На пример, јекх четврток јекх терни џувли ки Канада али ки количка сведочибаске хем леља и брошура Ов бахтало засекогаш. И пхен која со терѓола сине ки количка објаснинѓа лаке кај е брошураја шај те овел ла хем бесплатно курси. И џувли сикавѓа интерес хем денѓе песке машкар песте пумаре телефонска броја. Покасно ко исто диве, ој пишинѓа е пхењаке хем пучља ла кеда шај те почминен те проучинен. Кеда и пхен нудинѓа лаке те посетинел ла ко викенд и џувли пучља ла: „А шај ли тајса? Ме сиум слободно“. Аѓаар адава петок проучинѓе. О исто викенд али ко состанок хем продолжинѓа сигате те напредујнел.

5. Со ваљани те кера кеда дикхаја кај некој нане панда спремно те проучинел и Библија? (Дикх хем о слике.)

⁵ Џанѓола пе, на очекујнаја кај сариненге со проповединаја ка реагиринен исто сар адаја терни џувли. Несавенге шај ка ваљани повише време. Асавкенцар шај најангле те кера лафи башо нешто со лен интересинела лен. Хем ако иси амен позитивно стави хем сикаваја кај интересинаја амен ленге, башо кратко време шај те почмина библиско курси. Со шај те вакера кеда нудинаја библиско курси? Те дикха со одговоринена несаве пхраља хем пхења ко акава пучибе кола со успешно почминена библиска курсија.

6. Со шај те кера те шај некој со интересинела пе те мангел палем те керел аменцар лафи?

⁶ О објавителија хем о пионерија кола со успешно почминена библиска курсија, објаснинена кај ко несаве пхувја кеда нудинена пе библиска курсија најшукар тано те избегинен пе о лафија сар сој „библиско курси“ или „проучибе“. Ола приметинѓе кај тано пошукар кеда користинена пе о лафија сар сој „те кера лафи“ или „те дознајне нешто повише баши Библија“. Те шај те поможина некаске те мангел палем те кере аменцар лафи, шај те вакера: „Шај ка изненадине тут кај ки Библија иси одговорија башо бут важна пучиба“ или „И Библија нане само јекх религиозно лил, ој поможинела амен ко практична начинија“. А исто шај те вакере: „На ваљани бут време, доволно тане 10 џи ко 15 минутија те шај те дознајне нешто со ка поможинел туке ко живото“. Адава шај те вакере ле бизо те користине лафија сар сој „редовно“ или „секова курко“, лафија со шај те сикавен кај ка овел лен несави обврска.

7. Кеда несаве прво пути халиле кај аракхле о чачипе? (1. Коринќања 14:23-25).

⁷ Канин лен ко состанок. Изгледа кај ко време е апостол Павлескоро, несаве халиле кај аракхле о чачипе чак откеда прво пути сине ко јекх состанок. (Читин 1. Коринќања 14:23-25.) Исто тано бут пути авдиве да. Бут неве посигате напредујнена откеда почминена те авен ко амаре состанокија. Кеда ваљани те канине лен? Башо адава керела пе лафи ки лекција 10 таро лил Ов бахтало засекогаш, ама не мора те аџикерен те ресен џи ки адаја тема таро лил. Панда ко прво разговор шај те канине ле ко состанок кова со икерела пе ко викенд, шај аѓаар со ка спомнине леске о наслов таро јавно говор или несави мисла тари статија тари Стражарско кула башо адава курко.

8. Со шај те вакера некаске кеда канинаја ле ко амаре состанокија? (Исаија 54:13).

⁸ Кеда канинеа некас со интересинела пе, објаснин леске кај амаре состанокија тане поразлична таро адава сар ов тано навикнимо те кхеден пе о мануша ки јавер религија. Кеда јекх интересентка прво пути присуствујнѓа ко проучибе и Стражарско кула пучља е пхења колаја со проучинела сине, дали адава со водинела џанела сариненгере анава. И пхен објаснинѓа лаке кај сарине трудинаја амен те џана о анава околенгере ко амаро собрание, исто сар со џанаја о анава секоле јекхескере тари амари фамилија. Е интересенткаке адава сине бут поразлично тари црква колате со џала сине. Шај исто аѓаар те објаснина леске панда јекх бути ко со разликујнена пе амаре состанокија. (Читин Исаија 54:13.) Амен кхедаја амен те шај те обожавина е Јехова, те сикљова баши лесте хем те охрабрина амен јекх јекхеа (Евр. 2:12; 10:24, 25). Адалеске, амаре состанокија тане шукар организириме хем практична, а ки ленде нане нисаве церемоние (1. Кор. 14:40). Исто аѓаар о тхана коте со икераја амаре состанокија тане едноставна хем тане керде ко начин те шај амен полокхе те сикљова. Адалеске со сием неутрална амен никогаш на ширинаја политичка идее, а ни палем на кхуваја ко дебате или расправие. Е интересентеске исто аѓаар ка користинел ако англедер дикхела о видеоклипи Со керела пе ки е Јеховаскере сведоконгири дворана? Адава ка поможинел леске те џанел со аџикерела ле.

9-10. Кеда канинаја некас ко состанок, со шај те вакера леске те шај те на дарал? (Дикх хем и слика.)

⁹ Несаве мислинена пе дали те авен ко состанок соске дарана кај ка родел пе лендар те овен е Јеховаскере сведокија. Уверин е мануше кај аменге тано мило кеда иси амен гостија ко состанокија хем кај на кераја ленге притисок те овен е Јеховаскере сведокија или те керен хем те вакерен нешто ки ленде. Амен исто аѓаар мангаја кеда авена фамилие, па чак фамилие пумаре тикне чхавенцар. Ко амаре состанокија е чхавен на одвинена ко посебна групе. Него ола бешена пумаре родителенцар хем сикљовена заедно. Аѓаар, о родителија џанена коте тане ленгере чхаве хем башо со тане сикавде (5. Мој. 31:12). Никастар на родела пе те дел прилог. Наместо адава, икераја амен ки е Исусескири заповед: „Добинѓен бизо паре, бизо паре ден“ (Мат. 10:8). Шај исто те вакере леске кај те шај те авел ко состанок на родела пе лестар те уравел скупо шеја. О Девел дикхела е манушескоро вило, а на адава сар изглединела (1. Сам. 16:7).

¹⁰ Ако мануш авела ко состанок кер са со шај те шај те осетинел пе шукар. Запознајн ле е старешиненцар хем е јавере објавителенцар. Ако осетинела пе шукар поверојатно тано кај ка мангел те авел палем. Џикоте трајнела о состанок, ако нане ле Библија, сикав леске о стихија тари тли џикоте шунена о говор или о проучибе и Стражарско кула.

САР ШАЈ ТЕ ПОМОЖИНЕ НЕКАСКЕ ОТКЕДА ПОЧМИНЃЕН БИБЛИСКО КУРСИ

11. Сар шај те сикаве кај поштујнеа о време хем о плани тле интересентескоро?

¹¹ Со на ваљани те бистра кеда проучинаја некасаја? Поштујн о време хем о плани е интересентескоро. На пример, ако договоринѓен тумен ко кова време ка проучинен, ов точно бизи разлика дали о мануша таро тло тхан тане точна ко време или на. Исто аѓаар, шај тано најшукар о прво пути кеда ка проучинен адава те овел кратко. Несаве искусна објавителија вакерена кај тано шукар те на ачхове бут, чак ако о мануш пучела пучиба. Хем ма кер бут лафи. Мукх о интересенти те вакерел сар осетинела пе хем со мислинела (Изр. 10:19).

12. Сави цел ваљани те овел амен панда таро почеток ко јекх библиско курси?

¹² Панда таро почеток тли цел ваљани те овел те поможине тле интересентеске те запознајнел е Јехова хем е Исусе хем те замангел лен. Адава шај те кере аѓаар со секогаш ка сикаве леске со вакерела и Библија, а на адава со ту џанеа (Апо. 10:25, 26). О апостол Павле сине шукар пример башо акава. Кеда сикавела сине е манушен, ов фокусиринела пе сине ко Исус Христос — околе кас со о Јехова бичхалѓа те шај те поможинел аменге те запознајна ле хем те заманга ле (1. Кор. 2:1, 2). О Павле исто аѓаар истакнинѓа кобор тано важно те поможина е невенге те стекнинен шуже особине кола со шај те спорединен пе златоја, среброја хем скапоцена баренцар (1. Кор. 3:11-15). Несаве таро адала важна особине тане и вера, и мудрост, и разборитост хем и дар таро Јехова (Пс. 19:9, 10; Изр. 3:13-15; 1. Пет. 1:7). Џа пало е Павлескоро пример аѓаар со ка поможине тле интересентенге те овел лен зорали вера хем паше амалипе ленгере небесно Дадеа кова сој бут шукар (2. Кор. 1:24).

13. Сар шај џикоте поможинаја е интересентенге те сикава кај сием стрплива хем кај хаљоваја лен (2. Коринќања 10:4, 5; дикх хем и слика.)

¹³ Сикав е јаверен аѓаар сар со сикавела сине о Исус, адалеа со ка ове стрпливо хем ка хаљове е јаверен. Избегин те пуче пучиба колендар со о мануш ка осетинел пе незгодно. Ако несаво сикљојбе тано леске пхаро те хаљовел ле хем те прифатинел ле, ма ачхов бут, него иран тут ки адаја тема покасно. Наместо те кере леске притисок те прифатинел несаво сикљојбе англедер те овел спремно башо адава, мукх време те шај о чачипе те мукхел коренија ко лескоро вило (Јован 16:12; Кол. 2:6, 7). И Библија спорединела о ховавне сикљојба јекхе цврсто кулаја, која со ваљани те рушина ла. (Читин 2. Коринќања 10:4, 5.) Наместо те рушине е интересентескири кула упри лесте поможин леске те градинел неви кула, јавере лафенцар те овел ле доверба ко Јехова (Пс. 91:9).

САР ШАЈ ТЕ ПОМОЖИНЕ Е НЕВЕНГЕ СО АВЕНА КО СОСТАНОКИЈА

14. Сар ваљани те понашина амен е невенцар со авена ко амаре состанокија?

¹⁴ О Јехова очекујнела те постапина љубезно сариненцар, бизи разлика котар авена, тари сави култура тане или дали тане барвале или чороле (Јак. 2:1-4, 9). Сар шај те сикава мангипе е невенге со авена ко амаре состанокија?

15-16. Сар шај те поможина е невенге те осетинен пе шукар ко амаре состанокија?

¹⁵ Несаве шај авена ко амаре состанокија адалеске со мангена те дикхен со случинела пе ки ленде или адалеске со некој таро јавер тхан поттикнинѓа лен те авен. Адалеске, кеда дикхеа несаве невен ко собрание кер ленцар лафи. Шукар доџакер лен ама пазин те на ове нападно. Викин лен те бешен узи туте. Сикав ленге тари тли Библија или таро материјали со разглединела пе или де лен те овел лен пло примерок. Освен адава, ле ко обѕир ленгере чувствија. Јекх мануш со ало ко состанок вакерѓа е пхралеске со поздравинѓа ле, кај осетинела пе незгодно адалеске со на сине уравдо сар о јавера. О пхрал вакерѓа леске ма те секиринел пе хем објаснинѓа леске кај е Јеховаскере сведокија тане сар са о јавера мануша. Акава мануш покасно крстинѓа пе ама никогаш на бистерѓа о лафија адале пхралескере. Сепак, те пазина ко акава: Кеда кераја лафи е гостонцар англедер хем пало состанок те сикава кај интересинаја амен ленге, ама те на пуча бут лична пучиба (1. Пет. 4:15).

¹⁶ Исто аѓаар, шај те кера о неве те осетинен пе шукар аѓаар со ко амаре разговорија, коментарија хем задача ко состанок ка сикава поштовање околенге со нане Сведокија хем башо ленгере верувања. Те на користина лафија кола со шај те вреџинен лен или те керен те на манген палем те авен ко состанок (Тит 2:8; 3:2). На пример, никогаш на би критикујнаја о верувања околенгере со нане Сведокија (2. Кор. 6:3). Поврзимо акалеа о пхраља со икерена јавна говорија пазинена бут ко акава. Исто аѓаар, ола на бистрена кај ки публика иси несаве со нане Сведокија адалеске објаснинена о лафија хем о идее кола со ола на хаљовена лен.

17. Која тани амари цел кеда ки служба ка аракха манушен колен со иси лен исправно стави спрема о вечно живото?

¹⁷ Амаро проповедибе секова диве овела са поитно, хем понадари да аракхаја манушен колен со иси лен „исправно стави спрема о вечно живото“ (Апо. 13:48). Кеда ка аракха асавке манушен на мислинаја амен дали те нудина ленге библиско курси или те канина лен ко амаре состанокија. Аѓаар шај те поможина ленге те џан ко „друмо со ингарела ко живото“ (Мат. 7:14).