Таро Јехова авела амари радост

1-2. а) Сар осетинена пе бут мануша авдиве? б) Со ка дикха ки акаја статија?

О МАНУША авдиве пробинена само те шај те овен среќна. Ама кобор хем те пробинен, палем нане среќна. Бут џене тане разочариме хем мислинена кај ленгоро живото никогаш нане те овел пошукар. Е Јеховаскере слуге шај исто те осетинен пе аѓаар. Адалеске со живинаја „ко последна диве“ амен очекујнаја те овен амен проблемија хем те овел аменге „пхаро“ (2. Тим. 3:1).

² Ки акаја статија ка дикха кола буќа шај те чорен амари радост хем сар шај те ирана ла ако нашавѓем ла. Ама, најангле те дикха котар авела и чачутни радост.

КОТАР АВЕЛА И ЧАЧУТНИ РАДОСТ

3. Со сикљоваја башо Јехова таро буќа со створинѓа лен? (Дикх хем о слике.)

³ О Јехова отсекогаш сине среќно. А мангела хем амен да те ова среќна. Адалеске ов керѓа бут буќа со керена амен среќна, сар на пример, сием среќна кеда дикхаја амари шужи планета пхерди буте различна боенцар, уживинаја кеда дикхаја сар о животне кхелена песке хем сием радосна џикоте хаја разно врста вкусно хајбе. О Девел чаче мангела амен хем мангела те уживина ко живото!

Тикно слони: Image © Romi Gamit/Shutterstock; тикне пингвиња: Vladimir Seliverstov/500px via Getty Images; тикне бузња: Rita Kochmarjova/stock.adobe.com; дуј делфинија: georgeclerk/E+ via Getty Images

4. а) Соске о Јехова ачхола радосно иако дикхела о муке ко свето? б) Со дела амен о Јехова? (Псалм 16:11).

⁴ Иако тано „среќно Девел“, о Јехова тано свесно баши дукх хем башо муке со иси ко акава свето (1. Тим. 1:11). Ама ов на мукхела адава те лел лескири радост. Ов џанела кај о муке тане привремена — коркори ов чхивѓа роко кобор ка трајнен. Хем стрпливо истрајнела са џи ко диве кеда засекогаш ка цидел са и дукх хем о муке. Џи тегани о Јехова хаљола таро со накхаја хем мангела те поможинел аменге. Сар керела адава? Јекх начин тано аѓаар со дела амен и радост. (Читин Псалм 16:11.) Те дикха сар денѓа радост пле Чхавеске, е Исусеске.

5-6. Соске о Исус тано радосно?

⁵ Таро са о буќа со створинѓа о Јехова, о Исус тано и најсреќно личност. Соске? Аке некобор причине: 1) Ов тано исто сар по Дад, и Библија вакерела кај ов „сикавела аменге саво тано о Девел коле со нашти дикхаја ле“, јавере лафенцар, ов совршено сикавела пле Дадескири личност (Кол. 1:15; 1. Тим. 6:15). 2) О Исус накхавѓа највише време пе Дадеа, колестар со авела и среќа.

⁶ Освен адава, о Исус секогаш тано радосно соске керела адава со родела лестар лескоро Дад (Изр. 8:30, 31; Јован 8:29). Адалеске сој тано верно, о Јехова дичинела пе леа (Мат. 3:17).

7. Сар шај те аракха чачутни радост?

⁷ Амен да шај те аракха чачутни радост ако оваја са попаше е Јеховаја, колестар со авела и среќа. Кобор повише запознајнаја е Јехова хем џаја пало лескоро пример, добором посреќна ка ова. А ка ова радосна хем кеда кераја адава со о Девел родела хем кеда џанаја кај ов тано задоволно амендарa (Пс. 33:12). Ама, со ако понекогаш, или чак цело време на осетинаја радост? Дали адава значинела кај о Девел нане задоволно амендар? На! Амен сиен несовршена хем понекогаш осетинаја дукх, сием тажна или иси амен депресија. О Јехова хаљола адава (Пс. 103:14). Те дикха кола буќа шај те чорен амари радост хем сар шај те ирана ла.

МА МУКХ НИШТО ТЕ ЧОРЕЛ ТЛИ РАДОСТ

8. Сар о проблемија ко живото шај те влијајнен упри аменде?

⁸ Прво чор: О проблемија ко живото. Дали туке пхаро адалеске со иси тут прогонство, доживинѓан природно катастрофа, или боринеа тут чоролипаја, насвалипаја или пхурипаја? Кеда иси амен асавке проблемија, локхесте шај те нашава и радост, посебно кеда нашти кераја ништо те шај те менина и ситуација. И Библија јасно вакерела кај „и дукх ко вило перавела мануше“ (Изр. 15:13). О Бабис, јекх старешина колестар со штаре бершенге муле хем о пхрал хем о родителија, вакерела: „Осетинава ман сине коркори хем кај никој нашти те поможинел манге. Понекогаш осетинава ман сине оптоваримо соске сине ман бут обврске хем нашти сине те накхавав добором време кобор со би мангава сине ме родителенцар хем ме пхралеа џикоте сине џивде“. О проблемија ко живото шај чаче те перавен амен хем ко физичко хем ко емоционално поглед.

9. Со шај те поможинел аменге те ирана амари радост? (Еремија 29:4-7, 10).

⁹ Со шај те поможинел аменге те ирана амари радост? Шај те ова палем радосна ако дикхаја реално ко буќа хем ако сием благодарна. О свето ширинела и идеја кај ваљани те овел амен идеално живото те шај те ова среќна. Ама адава нане точно. На пример, о Јехова денѓа упатствија е Евреенге со сине ингарде ко Вавилон те прифатинен и неви реалност кај тане заробиме ки туѓо пхув хем те ден пумаро најшукар ко адала пхаре околностија. (Читин Еремија 29:4-7, 10.) Со сикљоваја таро акава? Трудин тут те прифатине тле околностија хем ов благодарно башо шукар буќа ко живото. Ма бистре кај о Јехова цело време ка поможинел туке (Пс. 63:7; 146:5). И Ефи, која со доживинѓа пхари повреда хем ачхили парализирими, вакерела: „О Јехова, мли фамилија хем о собрание бут поможинѓе ман. Адалеске, нане те овел шукар спрема ленде ако откажинава ман. Мангава те сикавав кај сиум благодарно е Јеховаске хем е пхраленге хем е пхењенге адалеске со бут поможинена ман“.

10. Соске шај те ова радосна чак кеда иси амен проблемија?

¹⁰ Чак ако амаро живото нане аѓаар сар амен со би мангаја те овел, или кеда аменге или амаре фамилијаке случинена пе страшна буќа, сепак шај те ова радоснаb (Пс. 126:5). Соске? Адалеске со амари радост на зависинела таро амаре околностија. Јекх пионерка, со викинела пе Марија, вакерела: „Кеда ачховеа радосно иако иси тут проблемија, адава на значинела кај ич нане туке пхаро или кај на мангеа те сикаве сар осетинеа тут. Него адава значинела кај на бистерѓан е Јеховаскере ветувања. Амаро Дад ка поможинел аменге те ачхова радосна“. Ма бистре, кобор хем те овел пхаро акана, са амаре проблемија тане моментална — сар стапке ки плажа песокоја. Панда хари целосно ка нашавѓовен.

11. Сар охрабринела тут е Павлескоро пример?

¹¹ Со ако почминаја те мислина кај амаре проблемија сикавена кај о Јехова нане више задоволно амендар? Шај те поможинел аменге ако размислинаја башо јавера верна слуге е Јеховаскере колен со сине лен пхаре ситуацие. Размислин башо е апостол Павлескоро пример. О Исус сине адава со биринѓа ле те проповединел о шукар хабери „е манушенге таро јавера нацие, е царенге хем е Израелцонге“ (Апо. 9:15). Кобор бари чест сине ле! Ама, е Павлескоро живото на сине бизо проблемија (2. Кор. 11:23-27). Иако е Павлескоро живото на сине локхо, сине јасно кај о Јехова сине лестар задоволно. Уствари, о Павле шај сине те издржинел ко проблемија само адалеске со о Јехова сине леа (Рим. 5:3-5). Акана размислин баши тли ситуација. Иако иси тут неволје, ту верно истрајнеа. Адалеске шај те ове уверимо кај о Јехова тано задоволно тутар.

12. Со шај те случинел пе кеда нашти те кера о буќа со би мангаја те кера лен?

¹² Дујто чор: Ако нашти кераја адава со би мангаја те кера (Изр. 13:12). О мангипе хем и благодарност спрема о Јехова поттикнинена амен те чхива аменге целија ки служба баши лесте. Ама, ако чхиваја аменге целија со нане реална, шај те разочарина амен (Изр. 17:22). Јекх пионерка, со викинела пе Холи, вакерела: „Мангљум те џав ки Школа башо полновремена објавителија, те служинав ки јавер пхув или те керав бути ко градежно проекти ко Рамапо. Ама мле околностија менинѓе пе хем нашти сине те исполнинав адала целија. Бут разочаринѓум ман. Сиум сине бут обесхрабрими соске пхаро тано кеда нашти те кере о буќа со би мангеа те кере лен“. Бут џене осетинена пе аѓаар.

13. Ако о околностија на дозволинена аменге те кера адава со би мангаја, кола реална целија шај те чхива аменге?

¹³ Со шај те поможинел аменге те ирана амари радост? Ма бистре кај о Јехова на очекујнела амендар повише таро адава со шај те кера, а ни палем на одрединела амари вредност спрема адава со шај те кера ки служба баши лесте. Ов мангела скромно хем верно те служина леске (Мих. 6:8; 1. Кор. 4:2). Е Јеховаске тано важно саве сием андрал, чак хем кеда нашти те кера ки служба баши лесте адава со амен би мангаја те кера. Тегани, дали ка овел разумно те очекујна амендар повише таро адава со о Јехова очекујнела?c Џанѓола пе кај на! Адалеске, ако тле околностија на дозволинена туке те кере адава со мангеа ки служба башо Јехова, трудин тут те концентририне тут ко адава со шај те кере. На пример, шај ли те обучине е потернен или те охрабрине е попхурен? Шај ли те чхиве туке цел те охрабрине некас аѓаар со ка џа лесте, ка јавине тут леске ко телефони или ка пишине леске порака? О Јехова радујнела пе кеда чхивеа туке целија сој реална хем адалеске ка наградинел тут аѓаар со ка поможинел туке те ове радосно. Хем ма бистре кај панда хари, ко нево свето, ка овен амен бут прилике те служина е Јеховаске ко начинија кола со ни нашти замислинаја лен аменге! И Холи која со спомнинѓем ла англедер, вакерѓа: „Понекогаш бешава хем размислинава: ’Англи манде тани и вечност. Адалеске со о Јехова ка поможинел ман, ко нево свето ка шај те исполнинав несаве таро мле целија‘“.

14. Со јавер шај те чорел амари радост?

¹⁴ Трито чор: Ако о задоволствија аменге ко прво тхан ко живото. Несаве користинена о социјална мреже те шај те ширинен о стави кај ка ова чаче среќна ако угодинаја коркори аменге. Ола поттикнинена е манушен те концентриринен пе ко буќа сар сој о хоби, о шопинг хем о патујбе. Нане погрешно те уживина ко акала буќа. О Јехова мангела те уживина ко шуже буќа кола со створинѓа лен. Ама, бут џене халиле кај о буќа со мислинѓе кај ка керен лен радосна, уствари леле ленгири радост. И Ева, која со служинела сар пионери, вакерела: „Ако ко прво тхан ко живото тано туке те задоволине тле желбе, ништо нане те овел туке доволно“. Ако прастаја пало задоволствија, ки крајка нане те ова радосна хем шај те ова разочариме.

15. Со шај те сикљова таро цари о Соломон?

¹⁵ О пример е царескоро е Соломонескоро сикавела кај о прастајбе пало задоволствија шај те чорел амари радост. Ов пробинѓа те аракхел радост адалеа со задоволинела сине пле желбе. На пример, уживинела сине ко шукар хајбе, ки шужи музика хем ко са о шуже буќа со ко лескоро време шај сине те кинен пе паренцар. Ама, адава на керѓа ле радосно. Ов вакерѓа: „И јакх никогаш нане чали таро дикхибе, а ни о кан нане пхердо таро шунибе“ (Проп. 1:8; 2:1-11). О идее со ширинела акава свето башо адава со чаче шај те керел амен среќна тане сар фалц паре. Иако дикхјона сар те пхене иси лен несави вредност, ленцар нашти те кинел пе ништо.

16. Сар адава со ка кера шукарипе е јаверенге ка поможинел амен палем те ова радосна? (Дикх хем о слике.)

¹⁶ Со ка поможинел аменге те ирана амари радост? О Исус сикавѓа амен кај „повише радост иси кеда дела пе, него кеда лела пе“ (Апо. 20:35). Јекх старешина со викинела пе Алекос, вакерела: „Трудинава ман те керав тикне буќа те шај те поможинав е јаверенге. Со повише дава е јаверенге, добором похари концентриринава ман ки манде, а адава керела ман радосно“. Со шај те кере ту е јаверенге? Ако приметинеа кај тано пхаро некаске, пробин те охрабрине ле. Шај нане те успејне те решине лескере проблемија, ама шај те утешине ле аѓаар со шукар ка шуне ле, ка сикаве сочувство хем ка сетинкере ле те фрдел пло пхарипе е Јеховаске (Пс. 55:22; 68:19). Исто аѓаар, шај те уверине ле кај о Јехова на мукхља ле (Пс. 37:28; Иса. 59:1). Шај чак те поможине леске практично, на пример аѓаар со ка спремине леске несаво хајбе или ка икљовен заедно те пхирен. Викин ле те џан заедно ки служба, адава ка поможинел леске те осетинел пе пошукар. Дозволин о Јехова преку туте те охрабринел е јаверен. Адава со ка концентририне тут ко јавера наместо ки туте, ка анел туке чачутни радост (Изр. 11:25).

17. Сар амари радост тани поврзими е Јеховаја? (Псалм 43:4).

¹⁷ Шај те ова чаче среќна ако понадари да оваја са попаше амаре небесно Дадеа. И Библија уверинела амен кај о Јехова тано амари најбари радост. (Читин Псалм 43:4.) Чак кеда иси амен проблемија на ваљани те ова секириме или те дара. Адалеске, понадари да те концентририна амен ко Јехова колестар со авела амари радост! (Пс. 144:15).