1925 — англедер шел берш

Е ДЕВЛЕСКОРО НАРОДО ПАНДА ВАЉАНИ СИНЕ ТЕ АЏИКЕРЕЛ

Бут Истражувачија е Библијакере очекујнѓе те овел рај ки пхув ко 1925 берш. Соске? О пхрал Алберт Шредер, кова со покасно уло члени ко Водечко тело, објаснинѓа: „Мислинѓем кај ко 1925 берш о помазаникија ка џан ко небо, а о верна мурша таро пурано време, сар сој о Авраам хем о Давид, ка воскреснинен ки пхув хем ка служинен сар принција“. Ама, адалеске со адава на уло несаве пхраља хем пхења разочаринѓе пе (Изр. 13:12).

Иако сине разочариме, повише џене таро Истражувачија е Библијакере ачхиле зафатиме ко проповедибе хем уле са посвесна кај најважно нешто со ваљани те керен тано те сведочинен башо Јехова. Те дикха сар користинѓе о радио те шај те проповединен повише манушенге.

ПХРАВЃОНА НЕВЕ РАДИОСТАНИЦЕ

Адалеске со сине бут баро успех е радиостаницаја WBBR ко берш со накхља, о Истражувачија е Библијакере градинѓе јавер радиостаница, акава пути паше узо Чикаго (Илиноис). Адале радиостаницаке чхивѓе о анав WORD. О Ралф Лефлер, о радиоинженери кова со поможинѓа те градинел пе и радиостаница, вакерѓа акава: „Ко шудре евендаскере раќа, о WORD шунѓола сине ко бут дур тхана“. На пример, јекх фамилија која со сине дур повише таро 5.000 километрија ки тикни диз Пајлт Стејшн (Алјаска), шунѓа јекх таро прва радиоемисие. Пали емисија акаја фамилија пишинѓа писмо околенге со керена сине бути ки радиостаница те шај те заблагодаринел пе ленге баши охрабрувачко духовно програма.

Ки Стражарско кула таро 1 декември 1925 берш, сине објаснимо соске шај сине те шунел пе и радиостаница ко бут тхана. Атхе пишинела сине: „И WORD тани јекх таро супер радиостанице ки Америка која со иси ла сила таро 5.000 ватија. О сигнали тари акаја радиостаница шукар шунѓола таро источно џи ко западно брего ки Америка хем тари Куба па са џи ко крајо таро север ки Алјаска. Бут џене кола со англедер никогаш на шунѓе башо чачипе мангена те дознајнен повише адалеске со шунена акаја радиостаница“.

Ко исто време, о Истражувачија е Библијакере мангле те почминен те користинен радиостаница ки Канада да те шај те проповединен о шукар хабери. Ко 1924 берш и радиостаница CHUC сине градими ко Саскатун (Саскачивен). Ој сине јекх таро прва радиостанице ки Канада колате со шај сине те шунен пе емисие баши религија. Ко 1925 берш, адаја тикни станица ваљани сине те преселинел пе адалеске о Watch Tower Society уло сопственико е радиостаницакоро хем селинѓа о студија ко јекх пурано театар ко Саскатун, пенџардо сар Риџент Билдинг, баш баши адаја цел сине киндо адава театар хем реновиримо.

Адаја радиостаница поможинѓа бут мануша кола со живинена сине ко тхана коте со на сине бут мануша ко Саскачивен, те шунен о шукар хабери прво пути. На пример, јекх џувли, и госпоѓа Греам, која со живинела сине ки јекх диз со сине дур, пишинѓа писмо ко кова со родинѓа библиско литература откеда шунѓа јекх таро емисие. О пхрал Џорџ Неш, вакерѓа: „Лакири молба ’Сикавен амен‘ сине добором јасно хем гласно со бичхалѓем лаке цело комплети Студие таро Свето писмо“. Кратко пало адава, и госпоѓа Греам, почминѓа те ширинел о хабери башо Царство панда ко подур тхана.

АМАРЕ ВЕРУВАЊА ОВЕНА СА ПОЈАСНА

Ки Стражарско кула таро 1 март 1925 берш, иклили јекх бут важно статија е насловеа „О бијанибе е народоскоро“. Соске акаја статија сине добором важно? Више несаво време, о Истражувачија е Библијакере џанена сине кај е Сатана иси ле организација хем кај тани составими таро демонија ко небо, таро ховавне религие, таро владе хем таро економско систем акате ки пхув. Ама акале статијаја „о верно хем о мудро робо“ поможинѓа е пхраленге хем е пхењенге те хаљон кај е Јехова да иси ле организација која со целосно разликујнела пе тари организација е Сатанаскири хем ој тани против о Сатана хем адала со поддржинена ле (Мат. 24:45). Освен адава, о верно хем о мудро робо објаснинѓа кај е Девлескоро Царство сине воспоставимо ко 1914 берш хем кај адава берш, адалеске со ули војна ко небо, о Сатана хем лескере демонија сине фрдиме таро небо хем оттегани иси лен влијание само ки пхув (Отк. 12:7-9).

Несавенге сине пхаро те прифатинен акава нево хаљојбе. Адалеске ки статија пишинела сине: „Ако несаве таро адала со читинена и Стражарско кула на сложинена пе акале неве хаљојбаја охрабринаја лен те овен стрплива хем те овел лен доверба ко Господари џикоте понадари да служинена леске чисто вилеа“.

Јекх таро колпортерија (акана викинена пе пионерија) тари Британија, со викинела пе Том Ејр, вакерѓа со сепак мислинена сине повише таро Истражувачија е Библијакере поврзимо акале статијаја: „О пхраља сине бут среќна башо акава објаснување таро Откровение поглавје 12. Кеда дознајнѓем кај о Царство више владинела ко небо, едвај аџикерѓем те вакера акава шукар хабери е јаверенге. Адава поттикнинѓа амен те проповедина панда ки побари мера хем поможинѓа амен те дикха сар о Јехова преку пло народо ка керел панда побаре буќа ки иднина“.

ТЕ СВЕДОЧИНЕЛ ПЕ БАШО ЈЕХОВА

Авдиве, е Јеховаскере сведокија бут шукар џанена о лафија таро Исаија 43:10: „’Тумен сиен мле сведокија‘, вакерела о Јехова, ’хем мло слуга со биринѓум ле‘“. Ама, џи ко 1925 берш, акава стихо сине бут ретко сине обработимо ко амаре публикацие. Ама башо кратко време адава менинѓа пе. Ко 1925 берш ко 11 изданија тари Стражарско кула дискутиринѓа пе башо стихија таро Исаија 43:10, 12!

Ко крајо таро август 1925 берш, о Истражувачија е Библијакере кхединѓе пе ко јекх конгрес ки Индијанаполис (Индијана). О пхрал Ратерфорд пишинѓа јекх порака, колаја со шукар доџакерѓа адален со але ко конгрес. Адаја порака сине печатими ки програма башо конгрес. Ки лате пишинела сине: „Алем ко акава конгрес те шај те ова... охрабриме таро Господари те шај те кхеда неве силе хем те ирана амен ко подрачје хем те ова лескере сведокија“. Ко адала офто диве ко конгрес, о присутна сине охрабриме те сведочинен башо Јехова ки секоја прилика.

Сабота ко 29 август о пхрал Ратерфорд икерѓа говор е темаја „Повик баши акција“. Ко говор истакнинѓа кобор тано важно те сведочинел пе, ов вакерѓа: „О Јехова вакерела пле народоске: ’Тумен сиен мле сведокија а ме сиум о Девел‘. Пало адава дела јасно заповед акале силно лафенцар: ’Вазден знако те шај о мануша те дикхен ле!‘ Нане никој јавер ки пхув кова со ка ваздел знако е манушенге освен [лескоро народо], окола со иси лен о духо е Господарескоро адалеске сој лескере сведокија“ (Иса. 43:12; 62:10).

Пало говор е пхралескоро Ратерфорд, о присутна сложно гласинѓе и резолуција е насловеа „Порака баши надеж“. Ки лате сине истакнимо кај е Девлескоро Царство тани и единствено надеж башо „мир, удобно живото, састипе, вечно живото, слобода хем вечно среќа“. Покасно акаја резолуција сине преведими ко повише чхибја хем сине печатими сар трактати. Сине делиме околу 40 милиоња примерокија таро трактатија.

Иако о Истражувачија е Библијакере чак пало некобор берш официјално прифатинѓе о анав Јеховаскере сведокија, сепак овена сине са посвесна баши ленгири одговорност те сведочинен башо Јехова.

ПАЛЕМ ТЕ ПОСЕТИНЕН ПЕ АДАЛА СО СИКАВЃЕ ИНТЕРЕС

Сар со о број таро Истражувачија е Библијакере ко свето бајрола сине, и организација поттикнинела сине е пхрален палем те посетинен околен кола со англедер сикавѓе интерес башо шукар хабери. Пали акција ки која со делинѓа пе о трактати Порака баши надеж, ко Билтениa сине дендо акава упатство: „Палем иранен тумен ко окола кхера коте со сине мукхло о трактати Порака баши надеж, иако адари на сине мукхли јавер литература“.

Ко Билтени таро јануари 1925 сине пишими акаја изјава таро јекх Истражувачи е Библијакоро, таро Плано (Тексас): „Амен бут изненадинѓа амен адава со ко подрачја кола со сине обработиме повише пути сине пошукар резултатија него ко неве подрачја. Јекх тикни диз ко амаро подрачје сине обработими панџ пути ко последна деш берш. Сигенде и пхен Хендрикс хем ми дај палем проповединѓе адари хем денѓе повише лила таро било кеда англедер“.

Јекх колпортери тари Панама пишинѓа: „Бут џене кола со прво пути бркинѓе ман таро ленгоро удар сине лен скроз јавер стави кеда посетинѓум лен о дујто или о трито пути. Побаро дело таро време акава берш, посетинѓум околен коленге со више проповединѓум хем несавенцар сине ман бут шужо искуство“.

КОНЦЕТРИРИМЕ КИ ИДНИНА

Ко крајо таро 1925 берш, о пхрал Ратерфорд пишинѓа писмо џи ко са о колпортерија хем објаснинѓа со са керѓа пе ки служба адава берш хем со ваљани сине те керен понадари. Ов вакерѓа: „Ко берш со накхља сине тумен прилика те утешинен адален сој разочариме. Акава дело анѓа туменге бари радост... О јавер берш ка овел тумен бут прилике те сведочинен башо Девел хем башо лескоро Царство хем те сикавен кој тане лескере чачутне слуге. Сарине заедно понадари да цело гласоја те славина амаре Девле хем амаре Царе“.

Ко крајо таро 1925 берш, о пхраља почминѓе те керен планија те шај те ширинен о објектија ко Бруклин. О јавер берш, ко 1926, почминѓа те градинел пе о најбаро градежно проекти ки амари организација со сине џи тегани.