Е Девлескоро мангипе ачхола вечно

1-2. Солеа боринена пе бут христијања?

ЗАМИСЛИН ТУКЕ јекх броди кова со аракхљола ки силно бура. О баре бранија ингарена ле акари-окори. Ако нане мукхли лескири котва, о броди ка џал адари коте со ка ингарен ле о бранија. И котва керела о броди те овел стабилно хем на мукхела о морска струе те влечинен ле џикоте иси бари бура.

² Кеда накхеа тари несави пхари ситуација шај осетинеа тут сар акава броди. Шај тле чувствија сигате менинена пе. Јекх диве шај сиан сигурно кај о Јехова мангела тут хем поддржинела тут, а о тајсутното диве шај пучеа тут дали о Јехова воопшто дикхела таро со накхеа (Пс. 10:1; 13:1). Шај несаво амал вакерела туке утешна лафија хем несаво време осетинеа тут пошукар (Изр. 17:17; 25:11). Ама, пало адава о сумње палем иранена пе туке. Шај чак мислинеа кај о Јехова ваздинѓа пле васта тутар. Со шај те поможинел туке, аѓаар те вакера, те мукхе и котва џикоте сиан ки асавки ситуација? Јавере лафенцар, со шај те поможинел туке те ове уверимо хем те ачхове уверимо кај о Јехова мангела тут хем поможинела туке?

3. Спрема Псалм 31:7 хем 136:1, со значинела кеда некас иси „верно мангипе“, хем соске шај те вакера кај о Јехова тано о најшукар пример башо адава? (Дикх хем и слика.)

³ Јекх бути со шај те поможинел туке те ачхове стабилно ко пхаре ситуацие тани адаја со нане те бистре е Јеховаскоро верно мангипе. (Читин Псалм 31:7, фус.; 136:1.) Кеда некас иси „верно мангипе“ адава значинела кај ов осетинела хор хем трајно поврзаност спрема некасте. О Јехова тано о најшукар пример башо верно мангипе. Баши лесте и Библија вакерела кај „пхердо тано верно мангипе“ (2. Мој. 34:6, 7). Исто аѓаар, башо Јехова и Библија вакерела: „Баро тано тло верно мангипе спрема са околенде со родена тут“ (Пс. 86:5). Размислин со значинела акава: О Јехова никогаш на мукхела пле верна слуген. Адава со нане те бистре кај о Јехова тано верно, ка поможинел туке те ачхове стабилно џикоте накхеа таро несаво пхаро периоди (Пс. 23:4).

ДИКХ КО Е ЈЕХОВАСКОРО МАНГИПЕ САР ОСНОВНО БИБЛИСКО СИКЉОЈБЕ

4. Вакер примерија таро основна библиска сикљојба хем објаснин соске нане локхо некој те теринел амен те чхинава те верујна ки ленде.

⁴ Јавер нешто со шај те поможинел туке те ачхове стабилно ко пхаре ситуацие, тано адава со ко е Јеховаскоро мангипе ка дикхе сар основно библиско сикљојбе. Ко со мислинеа кеда шунеа о лафија „основно библиско сикљојбе“? Шај мислинеа ко чачипа со сиклиљан лен таро е Девлескоро Лафи. На пример, сиклиљан кај е Девлескоро анав тано Јехова, кај о Исус тано е Девлескоро единствено бијамо Чхаво, кај о муле нане свесна башо ништо хем кај ки пхув ка овел рај коте со о мануша ка живинен засекогаш (Пс. 83:18; Проп. 9:5; Јован 3:16; Отк. 21:3, 4). Откеда прифатинѓан акала сикљојба нане локхо некој те керел те чхинаве те верујне ки ленде. Соске? Адалеске со халиљан кај акала сикљојба темелинена пе ко фактија. Сар адава со ко е Јеховаскоро мангипе ка дикхе сар основно библиско сикљојбе шај те поможинел туке те на сумнине тут дали о Јехова грижинела пе туке хем дали дикхела таро со накхеа? Ајде те дикха.

5. Објаснин сар некој шај те отфрлинел о ховавне сикљојба.

⁵ Со поможинѓа туке те отфрлине о ховавне сикљојба кеда почминѓан те проучине и Библија? Веројатно адава со спорединеа сине адава со сикавела сине тут тли религија адалеа со сикавела и Библија. Размислин башо јекх пример. Те вакера кај некогаш верујнеа сине кај о Исус тано Семоќно Девел. Ама, џикоте проучинеа сине и Библија пучљан тут: „Дали акава сикљојбе чаче тано точно?“ Откеда истражинѓан со вакерела и Библија башо адава, халиљан кај о Исус нане Девел. Тегани чхинавѓан те верујне ко акава ховавно сикљојбе хем почминѓан те верујне ко акава чачипе тари Библија, кај о Исус тано „о првобијамо таро са сој створимо“, „е Девлескоро единствено бијамо Чхаво“ (Кол. 1:15; Јован 3:18). Џанѓола пе, шај те овел пхаро те отфрлинел пе јекх ховавно сикљојбе соске тано „цврсто сар јекх кула“ (2. Кор. 10:4, 5). Ама откеда дознајнѓан о чачипе, више на иранѓан тут ко ховавне сикљојба кола со мукхљан лен пали туте (Фил. 3:13).

6. Соске шај те ове уверимо кај е Јеховаскоро „верно мангипе ачхола вечно“?

⁶ Нешто слично шај те кере кеда керела пе лафи башо е Девлескоро мангипе баши кова со сикавела и Библија. Ако почминеа те сумнине тут дали о Јехова мангела тут џикоте накхеа тари несави пхари ситуација, пуч тут: „Дали размислинава разумно?“ Тле сумње башо е Јеховаскоро мангипе, споредин лен е лафенцар таро Псалм 136:1 — о главно стихо акале статијакоро. Соске о Јехова вакерела кај лескоро мангипе тано „верно“? Соске и мисла кај „лескоро верно мангипе ачхола вечно“ повторинела пе 26 пути ко акава псалм? Сар со дикхлем, е Јеховаскоро верно мангипе спрема лескоро верно народо тано основно библиско сикљојбе сар сој хем о јавера сикљојба кола со локхе прифатинѓан лен таро е Девлескоро Лафи. И идеја кај на врединеа англо Јехова хем кај на заслужинеа те мангел тут тани чисто ховајбе. Отфрлин адава ховајбе добором одлучно исто сар со би отфрлинеа било кова јавер ховавно сикљојбе!

7. Вакер несаве стихија кола со шај те уверинен тут кај о Јехова мангела тут.

⁷ Ки Библија иси хем бут јавера да стихија кола со уверинена амен кај о Јехова мангела амен. На пример, о Исус вакерѓа пле следбениконге: „Тумен врединена повише таро бут чирикља“ (Мат. 10:31). А лично о Јехова вакерѓа пле народоске: „Ме ка керав тут зорало хем ка поможинав туке. Ка икерав тут мле десно хем праведно вастеа“ (Иса. 41:10). Приметин кобор тане јасна акала лафија. О Исус на вакерѓа: „Тумен шај врединена повише таро бут чирикља“, хем о Јехова на вакерѓа: „Шај ка поможинав туке“. Наместо адава, ола вакерена: „Тумен врединена повише таро бут чирикља“ хем „Ме... ка поможинав туке“. Ако некогаш сумнинеа тут дали о Јехова мангела тут џикоте накхеа тари несави пхари ситуација, асавке стихија шај на само со ка поможинен туке те осетине тут пошукар него хем те уверине тут кај о Јехова мангела тут. Акала стихија темелинена пе ко фактија. Ако молинеа тут е Јеховаске башо тле сумње хем хор размислинеа башо акала стихија, тегани ка шај те вакере о лафија таро 1. Јованескоро 4:16: „Амен пенџарѓем о мангипе кова со иси е Девле спрема аменде хем увериме сием ко адава мангипе“.a

8. Со шај те кере ако понекогаш сумнинеа тут дали о Јехова мангела тут?

⁸ Ама, со ако понекогаш палем сумнинеа тут дали о Јехова мангела тут? Споредин адава со осетинеа адалеа со више џанеа башо лесте. Ко чувствија нашти те овел амен доверба сар со шај те овел аменде доверба ко фактија. А факти тано кај о Јехова мангела амен, сар со пишинела ки Библија. Ако на верујнаја кај о Јехова мангела амен, адава и сар те пхене вакераја кај адава со вакерела и Библија кај о „Девел тано мангипе“, нане чаче (1. Јов. 4:8).

РАЗМИСЛИН БАШО АДАВА СО ВАКЕРЃА О ИСУС БАШО Е ЈЕХОВАСКОРО МАНГИПЕ

9-10. Со сикавела аменге о контекст башо е Исусескере лафија кола сој пишиме ко Јован 16:26, 27: „О Дад да мангела тумен“? (Дикх хем и слика.)

⁹ Шај бут те сикљова башо е Јеховаскоро мангипе ако размислинаја башо адава со вакерѓа о Исус пле следбениконге: „О Дад да мангела тумен“. (Читин Јован 16:26, 27.) О Исус на вакерѓа акала лафија кобор само те керел лескере ученикија те осетинел пе шукар. Уствари о контекст сикавела аменге кај ко адава моменти о Исус главно на керѓа лафи башо ленгере чувствија, него керѓа лафи баши молитва.

¹⁰ О Исус само со вакерѓа пле учениконге кај ваљани те молинен пе преку лесте, а на те молинен пе леске (Јован 16:23, 24). Важно сине ола те џанен адава. Откеда воскреснинѓа, шај о ученикија ка овен сине ко искушение те молинен пе е Исусеске, ола шај сине те мислинен песке адава со о Исус бут мангела лен ка поттикнинел ле те шунел ленгере молитве вакерде таро хем те родел таро пло Дад те поможинел ленге. Ама, о Исус вакерѓа кај на ваљани те размислинен ко асавко начин. Соске? Адалеске со ов вакерѓа ленге: „О Дад да мангела тумен“. Акава факти тано дело таро основно библиско сикљојбе баши молитва. Размислин со значинела акава туке: Адалеа со проучинѓан и Библија, ту запознајнѓан хем замангљан е Исусе (Јован 14:21). Ама исто сар о ученикија таро прво веко, тут да шај те овел тут доверба џикоте молинеа тут е Девлеске адалеске со џанеа кај ов да мангела тут. Секогаш кеда молинеа тут е Јеховаске сикавеа кај верујнеа ко адала лафија (1. Јов. 5:14).

МА БИСТРЕ КОТАР АВЕНА О СУМЊЕ

11. Соске о Сатана ка радујнел пе ако сумнинаја амен дали о Јехова мангела амен?

¹¹ Со шај те чхивел амен те сумнина мен дали о Јехова мангела амен? Шај ка одговорине кај о Сатана чхивела амен те размислина ко асавко начин, хем џи негде адава тано точно. О Бенг „родела некас амендар те хал“, хем ов ка радујнел пе ако сумнинаја амен дали о Јехова мангела амен (1. Пет. 5:8). Уствари, о мангипе поттикнинѓа е Јехова те дел амен и откупнина, а о Сатана мангела те мислина аменге кај нашти те овел амен корист латар (Евр. 2:9). Ама, кој ка радујнел пе ако сумнинаја амен кај о Јехова мангела амен? О Сатана. Хем кој ка радујнел пе ако добором бут обесхрабринаја амен со ка чхинава те служина е Јеховаске? О Сатана. Замислин о Сатана пробинела те чхивел амен те сумнина амен ко е Јеховаскоро мангипе, а уствари ов тано адава кова со нашавѓа лескоро мангипе. Сепак, јекх таро лескере најопасна замке тани те чхивел амен те мислина кај амен сием адала колен со на мангела хем отфрлинела (Еф. 6:11). Адава со ка хаљова со пробинела те керел амаро душмани, ка поможинел аменге те ова панда поодлучна те противина амен е Бенгеске (Јак. 4:7).

12-13. Сар о грево со наслединѓем ле керела те сумнина амен дали о Јехова мангела амен?

¹² Јекх јавер причина соске шај те сумнина амен дали о Јехова мангела амен тано о грево со наслединѓем ле (Пс. 51:5; Рим. 5:12). О грево дурјарела амен таро амаро Створители. Исто аѓаар, ов штетно влијајнела упри амари годи, упро амаро вило хем тело.

¹³ О грево влијајнела негативно упро амаре емоцие аѓаар со керела те осетина амен крива, секириме, несигурна хем те осетина лаџ. Асавке чувствија шај те овен амен кеда кераја грево. Ама, ола исто аѓаар шај те икљон ки површина адалеске со цело време сием свесна кај сием несовршена, сој спротивно таро адава сар о Девел створинѓа амен соске о прва мануша сине совршена (Рим. 8:20, 21). Исто сар јекх врда со нашти најшукар те функциониринел ако и гума тани мукхли, аѓаар амен да адалеске со сием несовршена нашти целосно те користина о потенцијал колеа со сием створиме. Адалеске на изненадинела амен адава со понекогаш сумнинаја амен дали о Јехова мангела амен. Ако случинела пе адава, ваљани те сетина амен кај о Јехова сикавела верно мангипе спрема окола со мангена ле хем икерена лескере заповедија (Неем. 1:5).

14. Сар адава со ка размислина баши откупнина шај те поможинел аменге те чхинава те сумнина амен дали о Јехова мангела амен? (Римјања 5:8; дикх хем и рамка „Аракх тут таро грево коле со ’иси ле моќ те ховавел‘“.)

¹⁴ Понекогаш шај осетинаја амен лошно адалеске со мислинаја кај на заслужинаја е Јеховаскоро мангипе. Уствари, факти тано кај амен чаче на заслужинаја лескоро мангипе, ама баш адава со на заслужинаја лескоро мангипе, керела адава мангипе те овел нешто посебно. Амен ништолеа нашти те заслужина е Јеховаскоро мангипе. Сепак, адалеске со мангела амен, о Јехова денѓа и откупнина те шај те простинел амаре гревија (1. Јов. 4:10). Исто аѓаар, ма бистре кај о Исус ало те спасинел грешникон, а на совршена манушен. (Читин Римјања 5:8.) Никој амендар нашти совршено те керел о буќа хем о Јехова на очекујнела амендар адава. Ако хаљоваја кај о грево шај те керел те сумнина амен дали о Јехова мангела амен, ка ова панда поодлучна те на дозволина адава те случинел пе (Рим. 7:24, 25).

БИРИН ТЕ АЧХОВЕ ВЕРНО

15-16. Ако ачховаја верна е Јеховаске ко со шај те ова сигурна, хем соске? (2. Самоилова 22:26).

¹⁵ О Јехова мангела те ана исправно одлука аѓаар со „ка ачхова узи лесте“ (5. Мој. 30:19, 20). Ако кераја адава, шај те ова сигурна кај ов ка ачхол аменге верно. (Читин 2. Самоилова 22:26.) Са џикоте сием верна е Јеховаске, шај те ова увериме кај со хем те случинел пе ко амаро живото ов ка поможинел амен.

¹⁶ Сар со дикхлем, иси амен бут причине те ачхова стабилна кеда накхаја таро пхаре ситуацие. Амен џанаја кај о Јехова мангела амен хем кај ка поможинел аменге. Баш адава вакерела аменге и Библија. Ако некогаш сумнинаја амен дали ов мангела амен, шај те размислина башо адава со џанаја кај тано чаче, наместо те концентририна амен ко адава сар осетинаја амен ко моменти. Понадари да те ова увериме кај е Јеховаскоро верно мангипе ачхола вечно, баш сар со вакерела и Библија.