Сар шај те кере тле молитве те овен панда пошукар

1-2. а) Со шај те чхинавел амен те вакера амаре најхор чувствија е Јеховаске? б) Котар џанаја кај о Јехова шукар шунела амаре молитве?

ДАЛИ понекогаш мислинеа кај тле молитве тане механичка, кај на молинеа тут таро вило или кај повторинеа иста лафија? Акава шај те случинел пе секаске амендар. Адалеске со сием бут зафатиме, амаре молитве шај те овен ки сиг хем кратка. Или шај аменге пхаро те вакера амаре најхор чувствија е Јеховаске соске мислинаја кај на сием достојна те кера леа лафи ки молитва.

² И Библија уверинела амен кај е Јеховаске нане најважно кобор шуже лафија користинаја џикоте молинаја амен, него леске тано важно те молина амен искрено хем понизно. Ов шунела „о молитве околенгере сој кротка“ (Пс. 10:17). О Јехова шунела секова амаро лафи соске чаче интересинела пе аменге (Пс. 139:1-3).

3. Кола пучиба ка дикха ки акаја статија?

³ Ки акаја статија ка дикха акала пучиба: Соске на ваљани те дара те вакера амаре најхор чувствија е Јеховаске? Со шај те поможинел аменге амаре молитве те овен похор? Сар адава со ко размислина башо молитве вакерде таро вило сој тане пишиме ки Библија шај те поможинел аменге амаре молитве те овен пошукар? Хем со шај те кера ако сием добором бут вознемириме или пхерде секирациенцар со чак нашти те објаснина сар осетинаја амен лафенцар? Те дикха о одговорија ко акала пучиба.

МА ДАРА ТЕ ВАКЕРЕ ТЛЕ ЧУВСТВИЈА Е ЈЕХОВАСКЕ

4. Со шај те поможинел амен те на дара те вакера амаре чувствија е Јеховаске? (Псалм 119:145).

⁴ Кеда ка хаљова кај о Јехова аменге верно амал кова со мислинела аменге о најшукар, ка осетина амен слободна те молина амен леске хем те вакера со мислинаја хем сар осетинаја амен. О писатели таро 119 Псалм трудинѓа пе аѓаар те дикхел ко Јехова кеда молинела пе сине леске. Лескоро живото на сине бизо проблемија. Несаве мануша вакерѓе ховајба баши лесте (Пс. 119:23, 69, 78). Освен адава, понекогаш сине обесхрабримо таро пле грешке (Пс. 119:5). Сепак, ов на дарандило те вакерел е Јеховаске сар чаче осетинела пе. (Читин Псалм 119:145.)

5. Соске на ваљани те мукха о погрешно мислење баши аменге те чхинавел амен те молина амен? Вакер пример.

⁵ О Јехова поттикнинела чак околен со керѓе пхаре гревија те молинен пе леске (Иса. 55:6, 7). Адалеске, на ваљани те мукха о погрешно мислење со иси амен баши аменге те чхинавел амен те молина амен леске. Те вакера јекх пример: Замислин кај јекх мануш нашавдило ки шума хем тегани дикхела некас со шај те спасинел ле. Дали тари лаџ кај нашавдило нане те родел помош? Нормално кај на! Слично, чак ако понекогаш осетинаја амен сар те пхене нашавдилем или керѓем несаво грево, шај слободно те молина амен е Јеховаске (Пс. 119:25, 176).

САР ШАЈ АМАРЕ МОЛИТВЕ ТЕ ОВЕН ПОХОР

6-7. Сар адава со размислинаја башо е Јеховаскере особине поможинела амен те вакера амаре најхор мисле хем чувствија? Вакер пример. (Дикх хем и фуснота.)

⁶ Кеда кераја отворено лафи е Јеховаја аѓаар со вакераја амаре најхор мисле хем чувствија, амаре молитве овена похор. Тегани, со шај те поможинел амен те молина амен аѓаар?

⁷ Размислин башо е Јеховаскере особине.a Кобор повише размислинаја башо е Јеховаскере особине, добором полокхо ка овел аменге те вакера леске амаре најхор мисле хем чувствија (Пс. 145:8, 9, 18). Те дикха о пример јекхе пхењакоро со викинела пе Кристин колакоро со дад сине насилно. Ој вакерела: „Сине манге пхаро те верујнав кај о Јехова тано грижливо Дад хем те керав леа лафи“. Ој мислинела сине кај нане доволно шукар хем кај о Јехова ка чхинавел те мангел ла башо лакере грешке. Која особина е Јеховаскири поможинѓа ла? Ој вакерела: „Е Јеховаскоро верно мангипе поможинѓа манге те осетинав ман сигурно. Џанава кај ов секогаш ка овел узи манде. Чак хем те грешинав, ов панда ка мангел ман хем ка поможинел ман. Акава керела те овел манге полокхо те вакерав мле најхор чувствија кеда сиум радосно или тажно“.

8-9. Сар ка користинел туке адава со англедер ка размислине со ка вакере ки молитва? Вакер пример.

⁸ Размислин со ка вакере. Англедер те молине тут, шај те пуче тут некобор пучиба. На пример: „Саве конкретна проблеменцар боринава ман ко моменти? Дали ваљани некаске те простинав? Дали ваљани манге помош таро Јехова баши несави промена ко живото со случинѓа пе манге сигенде?“ (2. Цар. 19:15-19). Исто аѓаар, шај те сетина амен ко адава сар о Исус сикавѓа амен те молина амен аѓаар со ка размислина со би шај те вакера е Јеховаске поврзимо лескере анавеа, лескере Царствоја хем лескере волјаја (Мат. 6:9, 10).

⁹ Кеда јекх пхен со викинела пе Алиска дознајнѓа кај лакере роме иси ле рако ки годи хем кај панда хари ка мерел, сине лаке пхаро те молинел пе. Ој вакерела: „Сиум сине добором вознемирими со кеда ка почминав сине те молинав ман, нашти сине те сетинав ман со мангава те вакерав“. Со поможинѓа лаке? Ој објаснинела: „Англедер те молинав ман одвојнава манге хари време те шај те организиринав мле мисле хем адава поможинела ман те на молинав ман само баши манге хем башо насвалипе мле ромескоро. Кеда керава адава, осетинава побаро мир хем полокхо манге те молинав ман башо јавера буќа“.

10. Соске ваљани те трудина амен те одвојна аменге време те шај амаре молитве те овен побаре? (Дикх хем о слике.)

¹⁰ Одвојн туке доволно време баши молитва. Иако о кратка да молитве шај те овен хор молитве, сепак ако одвојнаја аменге време те шај амаре молитве те овен побаре, поверојатно тано кај ка вакера е Јеховаске амаре најхор мисле хем чувствија.b О Илајџа, о ром е Алискакоро, вакерела: „Трудинава ман те молинав ман повише пути ко диве, ама осетинава ман попаше е Јеховаја кеда одвојнава манге време те вакерав хем побаре молитве. Џанава кај не мора те сиѓарав џикоте молинава ман соске о Јехова тано стрпливо, на аџикерела едвај те завршинав е молитваја“. Пробин те аракхе време хем тхан кола со ка поможинен тут тле молитве те овен побаре. Шај чак те молине тут ко гласо, бизо нешто те лел тло внимание, а пало адава трудин тут редовно те молине тут ко асавко начин.

РАЗМИСЛИН БАШО МОЛИТВЕ ТАРО ВИЛО СОЈ ПИШИМЕ КИ БИБЛИЈА

11. Сар ка поможинел туке адава со ка размислине башо молитве таро вило сој пишиме ки Библија? (Дикх хем и рамка „Дали осетинеа тут исто сар ленде?“)

¹¹ Шај ка поможинел тут адава со ка размислине башо молитве таро вило хем гиља баши фалба, јавере лафенцар башо псалмија, кола сој пишиме ки Библија. Џикоте читинеа сар е Девлескере слуге вакерѓе пумаре најхор мисле хем чувствија, шај ка ове охрабримо ту да те молине тут ко асавко начин. Исто аѓаар, шај ка сикљове лендар неве лафија коленцар со ола фалинѓе е Јехова, а кола со шај те користине лен ко тле молитве. Хем шај ка аракхе молитве таро е Девлескере слуге кола со сине ки слично ситуација сар тли.

12. Кола пучиба шај те пуча амен џикоте размислинаја баши несави молитва?

¹² Џикоте читинеа несави молитва сој пишими ки Библија, пуч тут: „Кој вакерѓа акала лафија хем ко саве околностија? Дали ме да осетинава ман аѓаар? Со шај те сикљовав тари акаја молитва?“ Ама шај ка ваљани повише те истражине те шај те одговорине ко акала пучиба, ама ка врединел адава со ка трудине тут. Те дикха некобор примерија.

13. Со шај те сикљова тари Ана баши молитва? (1. Самоилова 1:10, 11; дикх хем и слика).

¹³ Читин 1. Самоилова 1:10, 11. Кеда и Ана вакерѓа акаја молитва, сине ла дуј баре проблемија — нашти сине те овен ла чхаве хем и дујто ромни лакере ромескири керела сине те овел лаке пхаро ко живото (1. Сам. 1:4-7). Ако иси тут проблеми кова со бут време мучинела тут, со шај те сикљове тари е Анакири молитва? Ој одвојнѓа време те вакерел е Јеховаске са со мучинела ла хем пало адава ој осетинѓа пе бут пошукар, сар те пхене пело латар баро пхарипе таро пиќе (1. Сам. 1:12, 18). Амен да шај те осетина амен пошукар ако фрдаја амаро пхарипе е Јеховаске аѓаар со ка вакера со мучинела амен хем сар осетинаја амен башо адава (Пс. 55:22).

14. а) Со јавер сикљоваја тари Ана? б) Сар адава со ка размислина башо адава со читинаја тари Библија шај те керел амаре молитве те овен пошукар? (Дикх и фуснота.)

¹⁴ Пало некобор берш откеда бијанѓа пле чхаве е Самоиле, и Ана ингарѓа ле ко првосвештенико ко Илиј (1. Сам. 1:24-28). Ки јекх молитва со вакерѓа ла таро вило, ој вакерѓа кај тани уверими кај о Јехова заштитинела пле верна слуген хем грижинела пе баши лендеc (1. Сам. 2:1, 8, 9). Ла понадари да сине ла проблемија кхере, ама и Ана концентриринѓа пе ко благословија со денѓа ла о Јехова. Со шај те сикљова? Ка шај пошукар те накхава о пхаре ситуацие ко живото ако концентриринаја амен ко адава сар о Јехова поможинѓа амен џи авдиве.

15. Со шај те сикљова тари е Еремијаскири молитва? (Еремија 12:1).

¹⁵ Читин Еремија 12:1. О пророко о Еремија осетинѓа пе обесхрабримо адалеске со дикхља кај о лошна мануша тане успешна ко живото. Исто аѓаар, сине бут разочаримо адалеске со о јавера Израелција асана сине леске (Ерем. 20:7, 8). Амен хаљоваја сар осетинѓа пе адалеске со аменге да некој асандило хем дикхлем сар несаве мануша керена лошна буќа, а сепак дикхјола кај шукар џала ленге ко живото. Иако вакерѓа е Јеховаске кобор тано вознемиримо башо са адава, о Еремија никогаш на кривинѓа е Девле кај тано неправедно. Лескири доверба ки е Јеховаскири правда сигурно барили кеда дикхља сар о Девел казнинѓа пле бунтовно народо (Ерем. 32:19). Амен да шај отворено те вакера е Јеховаске кобор бут дукхана амен о неправде со доживинаја лен хем те овел амен доверба кај ко време со одрединѓа ле ов ка поправинел адава.

16. Со шај те сикљова тари јекхе левитескири молитва? (Псалм 42:1-4; дикх хем о слике).

¹⁶ Читин Псалм 42:1-4. Акаја гили пишинѓа јекх левити кова со нашти сине те обожавинел е Девле ко храми заедно е јавере Израелцонцар. Таро псалм со пишинѓа ле дикхјола сар осетинѓа пе. Шај те осетина амен сар лесте ако сием ко затвор баши амари вера или ако нашти те икљова таро амаро кхер адалеске со сием насвале. Понекогаш шај ка осетина амен шукар, а некогаш шај ка ова бут тажна. Ама бизи разлика сар ка осетина амен, шукар тано те вакера адава е Јеховаске ки молитва. Адава шај те поможинел амен пошукар те хаљова амаре чувствија хем исправно те дикха ки амари ситуација. На пример, о левити халило кај ка овен ле јавера прилике те фалинел е Јехова (Пс. 42:5). Исто аѓаар, ов размислинѓа сар о Јехова грижинѓа пе баши лесте (Пс. 42:8). Адава со ка молина амен таро вило е Девлеске, шај те поможинел амен пошукар те хаљова соске иси амен асавке чувствија, палем те овел амен мир хем те кхеда силе те шај те истрајна.

17. а) Со шај те сикљова тари е Јонаскири молитва? (Јона 2:1, 2). б) Сар шај несаве лафија таро Псалмија те поможинен аменге кеда аменге пхаро? (Дикх и фуснота).

¹⁷ Читин Јона 2:1, 2. О пророко о Јона вакерѓа акаја молитва џикоте сине андре ко јекх баро мачхо. Иако на сине послушно е Јеховаске, о Јона сине уверимо кај о Девел ка шунел лескири молитва. Џикоте молинѓа пе, о Јона користинѓа бут лафија таро Псалмија.d Ов сигурно бут шукар џанела сине адала стихија. Адава со размислинѓа баши ленде, уверинѓа ле кај о Јехова ка поможинел ле. Слично, ако трудинаја амен те памтина несаве библиска стихија, ка шај те сетина амен ки ленде хем те добина утеха кеда молинаја амен е Јеховаске ко пхаре ситуацие.

ПРЕКУ И МОЛИТВА ПОНАДАРИ ДА ОВ ПОПАШЕ Е ЈЕХОВАЈА

18-19. Ако понекогаш аменге пхаро ки молитва те вакера амаре чувствија лафенцар, сар шај те утешинен амен о лафија таро Римјања 8:26, 27? Вакер пример.

¹⁸ Читин Римјања 8:26, 27. Понекогаш шај осетинаја амен добором секириме со нашти лафенцар те вакера сар осетинаја амен. Ама, на сием бизи помош. Ко асавке моментија, „е Девлескири сила [керела] адава аменге ко тхан“. Сар? Преку пли сила о Јехова грижинѓа пе ко лескоро Лафи те овен пишиме бут молитве. Кеда нашти јасно те вакера амаре мисле, о Јехова шај те дикхел ко лафија таро молитве сој пишиме ки Библија сар ка пхене тане амаре лафија хем шај те одговоринел ки ленде.

¹⁹ Акаја мисла поможинѓа јекхе пхењаке тари Русија со викинела пе Јелена. Ој сине пханли адалеске со молинела пе сине хем читинела сине и Библија. Е Јелена сине ла бут баро стрес хем адалеске сине лаке пхаро те молинел пе. Ој вакерела: „Тегани сетинѓум ман кај кеда манге пхаро хем на џанава башо со те молинав ман, о Јехова ка прифатинел о молитве е верна слугенгере таро пурано време сар те пхене тане мле... Адава денѓа ман бари утеха посебно ко адава бут пхаро периоди“.

20. Сар шај те спремина амаре мисле баши молитва кеда иси амен стрес?

²⁰ Кеда иси амен стрес шај те овел аменге пхаро те концентририна амен џикоте молинаја амен. Те шај те спремина амаре мисле, шај те читина ко гласо несаве стихија таро Псалмија. Исто аѓаар шај те пишина сар осетинаја амен, сар со керѓа о цари о Давид. (Дикх ко Псалмија 18, 34 хем 142, исто хем ленгере натписија.) Џанѓола пе, нане правилија башо адава сар ваљани те спремина амен баши молитва (Пс. 141:2). Кер аѓаар сар сој најшукар туке.

21. Соске шај те молина амен цело амаре вилеа?

²¹ Бут утешинела амен адава со џанаја кај о Јехова хаљола сар осетинаја амен панда англедер те вакера леске адава (Пс. 139:4). Сепак, ов радујнела пе кеда вакераја леске сар осетинаја амен хем кобор бари доверба иси амен ки лесте. Адалеске, ма мислин тут дали те молине тут тле небесно Дадеске. Сикљов таро молитве сој пишиме ко лескоро Лафи. Молин тут цело тле вилеа. Вакер леске кеда сиан радосно, а кеда сиан тажно. Сар тло чачутно амал, о Јехова секогаш ка овел узи туте!