Ма бистре те молине тут е јаверенге

1. Котар џанаја кај амаре молитве тане важна е Јеховаске?

И МОЛИТВА тани јекх бут шужо поклон. Размислин башо акава: О Јехова денѓа несаве задаче е ангеленге (Пс. 91:11). Исто аѓаар, пле Чхавеске денѓа бут важна одговорностија (Мат. 28:18). Ама, дали некаске денѓа задача те шунел амаре молитве? На, адава тано нешто со о Јехова одлучинѓа коркори те керел. О Јехова лично шунела о молитве секоле јекхескере амендар (Пс. 65:2).

2. Саво пример мукхља аменге о апостол Павле адалеа со молинела пе сине е јаверенге?

² Амен ваљани отворено те вакера е Јеховаске ки молитва со секиринела амен, ама ваљани те молина амен е јаверенге да. О апостол Павле керела сине адава. На пример, е христијаненге таро собрание ко Ефес пишинѓа: „Ме стално спомнинава тумен ко мле молитве“ (Еф. 1:16). Освен со о Павле молинела пе сине општо е јаверенге, ов исто аѓаар молинела пе сине конкретно да баши некасте. На пример, е Тимотееске вакерѓа: „Благодарно сиум е Девлеске... хем никогаш на бистрава те спомнинав тут џикоте молинава ман е Девлеске таро вило диве хем рат“ (2. Тим. 1:3). Е Павле да сине ле пле секирацие коленге со ваљани сине те молинел пе (2. Кор. 11:23; 12:7, 8). Сепак, одвојнела песке сине време те молинел пе е јаверенге.

3. Соске шај те случинел пе те бистра те молина амен е јаверенге?

³ Понекогаш шај бистраја те молина амен е јаверенге. Соске? Јекх пхен која со викинела пе Сабринаa вакерела соске шај те случинел пе адава. Ој вакерела: „О темпо акале животоскоро тано бут брзо. Шај добором бут те концентририна амен ко амаре проблемија со ка молина амен само башо амаре потребе“. Дали понекогаш туке да случинела пе акава? Ако оја, тегани акаја статија шај те поможинел туке. Ки лате 1) ка дикха соске тано важно те молина амен е јаверенге хем 2) ка дикха предлогија сар шај те кера адава.

СОСКЕ ТЕ МОЛИНА АМЕН Е ЈАВЕРЕНГЕ?

4-5. Сар амари молитва е јаверенге шај те овел ла „бари сила“? (Јаков 5:16).

⁴ И молитва е јаверенге „иси ла бари сила“. (Читин Јаков 5:16.) Дали адава со ка молина амен е јаверенге шај чаче те менинел ленгири ситуација? Оја, шај. Адалеске со о Исус џанља кај о Петар панда хари ка вакерел кај на пенџарела ле, ов вакерѓа леске: „Ме таро вило молинѓум ман туке, те на нашаве тли вера“ (Лука 22:32). О Павле да џанља кај о молитве шај те поможинен те менинел пе некаскири ситуација. Кеда сине неправедно пханло ко Рим, ов пишинѓа е Филемонеске: „Надинава ман кај себепи тумаре молитве ка овав ослободимо хем палем ка авав ки туменде“ (Филем. 22). Хем баш адава уло. Пало несаво време, о Павле сине ослободимо таро затвор хем шај сине палем те проповединел.

⁵ Џанѓола пе, адава на значинела кај о Јехова мора секогаш те керел адава башо со молинѓем ле. Ов приметинела кобор бут аменге важно несави бути хем понекогаш одлучинела те постапинел спрема адава со родинѓем. Адава со џанаја акава шај те поможинел аменге таро вило те молина амен е Јеховаске баши несави ситуација хем пало адава те овел амен доверба ко Јехова хем те мукха о буќа ко лескере васта (Пс. 37:5; дикх 2. Коринќања 1:11).

6. Сар адава со ка молина амен е јаверенге шај те влијајнел упро адава со осетинаја баши ленде? (1. Петарескоро 3:8).

⁶ Кеда молинаја амен е јаверенге адава шај те поможинел аменге те ова „сочувствителна“. (Читин 1. Петарескоро 3:8.) Окова сој сочувствително приметинела кеда некој јавер цидела муке хем мангела те керел нешто те шај те поможинел леске (Мар. 1:40, 41). Јекх старешина кова со викинела пе Мајкл вакерела: „Адава со молинава ман башо е јаверенгере потребе поможинела манге пошукар те хаљовав солеа боринена пе хем аѓаар те бајрарав мло мангипе спрема ленде. Осетинава ман попаше ленцар иако шај ола нане свесна башо адава“. Јекх јавер старешина, кова со викинела пе Ричард, објаснинела панда јекх начин сар користинела аменге и молитва. Ов вакерела: „Кеда молинаја амен некаске, тегани иси амен панда побари желба те поможина леске“. О Ричард вакерела акава да: „Кеда практично поможинаја околеске каске со молинѓем амен, амен ки несави смисла поможинаја те одговоринел пе ки амари молитва баши лесте“.

7. Сар адава со ка молина амен е јаверенге шај те поможинел аменге урамнотежено те дикха ко амаре проблемија? (Филипјања 2:3, 4; дикх хем о слике).

⁷ Адава со молинаја амен е јаверенге поможинела амен исправно те дикха ко амаре проблемија. (Читин Филипјања 2:3, 4.) Секој јекх амендар иси ле несаво пхарипе адалеске со живинаја ко свето коте со владинела о Бенг (1. Јов. 5:19; Отк. 12:12). Кеда иси амен навика те молина амен е јаверенге адава сетинкерела амен „кај о иста муке трпинена лен [амаре] пхраља да ко цело свето“ (1. Пет. 5:9). Јекх пионерка со викинела пе Кетрин вакерела: „Адава со молинава ман е јаверенге сетинкерела ман кај е јаверенге да нане локхо. Акава поможинела манге те на размислинав бут башо мле проблемија“.

АМАРЕ МОЛИТВЕ ВАЉАНЕНА Е ЈАВЕРЕНГЕ

8. Вакер примерија каске шај те молина амен.

⁸ Каске шај те молина амен? Различна манушенге — на пример, околенге со иси лен проблемија састипаја, е терненге со асана ки школа хем колен со иси лен притисок таро врсникија, или околенге со боринена пе проблеменцар кова со анела лен о пхурипе. Бут амаре пхраља хем пхења иси лен противибе или тари фамилија или таро властија (Мат. 10:18, 36; Апо. 12:5). Несаве амаре пхраља мора сине те мукхен пумаре кхера адалеске со сине политичка немирија. Јавера доживинѓе природна катастрофе. Шај на пенџараја акале пхрален хем пхењен лично, ама кеда молинаја амен ленге амен сикаваја кај сием послушна ки е Исусескири заповед: „Манген тумен јекх јекхеа“ (Јован 13:34).

9. Соске ваљани те молина амен околенге со предводинена ки е Јеховаскири организација, хем исто ленгере ромњенге да?

⁹ Шај исто те молина амен околенге да со предводинена ки е Јеховаскири организација, сар сој о Водечко тело хем лескере помошникија, о членија ко одборија е подружниценгере, о надгледникија ко одделенија ко Бетел, о покраинска надгледникија, о старешине ко собранија хем о слуга-помошникија. Иако бут таро акала пхраља иси лен пумаре лична проблемија, ола дена пестар са те поможинен амен (2. Кор. 12:15). На пример, јекх покраинско надгледнико кова со викинел пе Марк, вакерела: „Бут манге пхаро со сиум дур таро мле родителија. О солдуј тане насвале. Ми пхен хем мо џамутро грижинена пе те овел лен са со ваљани ленге, ама пхаро манге со на сиум адари те шај те керав нешто повише ленге“. Иако шај на сием свесна со са секиринела акале буќарне пхрален, шукар тано те на бистра те молина амен ленге (1. Сол. 5:12, 13). Исто аѓаар, шај те молина амен ленгере ромњенге да адалеске со верно поддржинена лен хем поможинена пумаре роменге те продолжинен те керен пумаре задаче.

10-11. Дали о Јехова радујнела пе кеда молинаја амен општо башо амаре пхраља хем пхења? Објаснин.

¹⁰ Сар со дикхлем, бут пути молинаја амен башо амаре пхраља хем пхења. На пример, бизо те овел амен некој конкретно ки годи, шај те молина е Јехова те поможинел околенге кола сој ко затвор или те утешинел околен кастар со муло некој паше. Јекх старешина со викинела пе Доналд, вакерела: „Иси добором бут пхраља хем пхења со накхена таро пхарипа со понекогаш вакераја јекх општо молитва те шај те вклучина са околен со цидена муке“.

¹¹ Дали асавке молитве радујнена е Јехова? Џанѓола пе кај оја! Амен на џанаја со точно ваљанела секоле пхралеске или пхењаке. Адалеске, шај те вакера општа молитве башо амаре пхраља хем пхења (Јован 17:20; Еф. 6:18). Акала молитве сикавена кај мангаја „са е пхрален“ (1. Пет. 2:17).

КЕДА МОЛИНАЈА АМЕН НЕКАСКЕ КОНКРЕТНО

12. Сар адава со шукар ка приметина ка поможинел аменге те ова поконкретна ко амаре молитве?

¹² Приметин шукар. Освен со ка молина амен општо башо амаре пхраља хем пхења, ваљани те молина амен хем конкретно некаске коле со ка спомнина ле ко анав. Дали некас таро тло собрание иси ле сериозно насвалипе? Дали некој таро терне тано обесхрабримо адалеске со иси ле притисок ки школа? Дали несаво родители кова со коркори бајрарела пле чхаве бут трудинела пе те воспитинел ле шукар хем те поможинел леске те сикљол те размислинел сар о Јехова? (Еф 6:4). Адава со шукар ка приметине, ка поможинел туке те бајраре тло мангипе хем сочувство спрема о јавера, а адава ка поттикнинел тут те молине тут ленгеb (Рим. 12:15).

13. Сар шај те молина амен околенге со на џанаја лен лично?

¹³ Молин тут е јаверенге хем спомнин лен ко анав. Адава шај те кера ле чак околенге со никогаш на дикхлем лен. На пример, размислин башо амаре пхраља хем пхења кола сој ко затвор ко пхувја сар сој Крим, Еритреја, Русија хем Сингапур. Ки jw.org, шај те аракхе о анава околенгере сој ко затвор.c Јекх покраинско надгледнико, кова со викинела пе Брајан, вакерела: „Халиљум кај кеда ка пишинав о анав несаве пхралескоро кова сој ко затвор хем пало адава ка вакерав ле, адава поможинела манге те на бистрав те спомнинав ле ко мле лична молитве“.

14-15. Со ка поможинел аменге те ова конкретна ко амаре молитве?

¹⁴ Молин тут конкретно. О Мајкл, коле со спомнинѓем ле англедер, дела акава предлог: „Џикоте ки jw.org читинава извештаија башо пхраља хем пхења сој тане ко затвор, трудинава ман те замислинав манге сар би осетинава ман ме те овав ко ленгоро тхан. Џанава кај ка секиринав ман ме ромњаке хем кај ка мангав те овав сигурно кај ла иси ла адава со ваљани лаке. Адава поможинела манге те џанав со конкретно те спомнинав кеда молинава ман е пхраленге сој ко затвор хем тане ко брако“ (Евр. 13:3, фус.).

¹⁵ Ако трудинаја амен те замислина аменге саво тано о живото амаре пхраленгоро сој ко затвор, адава шај те поможинел аменге те сетина амен башо кола јавера конкретна буќа шај те молина амен. На пример, шај те молина амен о чуварија ко затвор те овен љубезна амаре пхраленцар, а окола сој ки власт те дозволинен амаре пхраленге те обожавинен е Јехова (1. Тим. 2:1, 2). Шај те молина амен о јавера таро собрание адале пхралескоро сој ко затвор те овен охрабриме тари лескири вера, или палем окола со на служинена е Јеховаске те приметинен лескоро шукар понашибе хем те овен поспремна те шунен о шукар хабери (1. Пет. 2:12). О исто шај те кера хем кеда молинаја амен амаре пхраленге хем пхењенге кола со иси лен јавера неволје. Адалеа со шукар ка приметина, ка спомнина е јаверен ко анав ко амаре молитве хем ка молина амен башо конкретна буќа, шај те сикава кај бут мангаја амаре пхрален хем пхењен (1. Сол. 3:12).

УРАМНОТЕЖЕНО СТАВИ БАШО АМАРЕ МОЛИТВЕ

16. Сар шај те овел амен урамнотежено стави башо амаре молитве? (Матеј 6:8).

¹⁶ Сар со дикхлем, кеда молинаја амен е јаверенге адава шај те керел те менинел пе ленгири ситуација. Ама, ваљани те овел амен урамнотежено стави. Кеда молинаја амен, амен на информиринаја е Јехова башо нешто со ов на џанела, а ни палем на советинаја ле сар те решинел несави ситуација. О Јехова џанела со ваљани лескере слугенге панда англедер ола, или амен, те ова свесна башо адава. (Читин Матеј 6:8.) Тегани соске ваљани те молина амен е јаверенге? Освен о причине со више спомнинѓем лен ки акаја статија, ако молинаја амен е јаверенге шај те сикава кај грижинаја амен ленге. О мангипе поттикнинела амен те молина амен јекх јекхеске. О Јехова радујнела пе кеда дикхела кај лескере слуге сикавена мангипе сар лескоро.

17-18. Солеа шај те споредина амаре молитве башо амаре пхраља хем пхења?

¹⁷ Чак ако аменге дикхјола кај амаре молитве на влијајнена упри некаскири ситуација, лендар шај те дикхел пе кај мангаја амаре пхрален хем пхењен, а о Јехова приметинела адава. Акава шај те споредина ле јекхе примереа: Замислин туке јекх фамилија дује тикне чхавенцар — јекх мурш хем јекх чхај. О чхаво пашљола насвало ко кревети. И чхај молинела пле даде: „Молимте кер нешто ме пхралеске. Бут тано насвало!“ О дад више керѓа нешто те шај те поможинел пле чхавеске. Ов мангела пле чхаве хем шукар грижинела пе леске. Сепак, ов сигурно бут радујнела пе кеда дикхела кај лескири тикни чхај добором бут грижинела пе пле пхралеске со молинела ле те поможинел леске.

¹⁸ Баш ко адава поттикнинела амен о Јехова — те грижина амен хем те молина амен јекх јекхеске. Кеда кераја адава сикаваја кај на грижинаја амен само аменге хем кај чаче мангаја амаре пхрален хем пхењен, а о Јехова приметинела адава (2. Сол. 1:3; Евр. 6:10). Исто аѓаар, сар со дикхлем, ко несаве случаија амаре молитве шај те керен те менинел пе некаскири ситуација. Адалеске, те размислина башо са акала буќа хем те на бистра те молина амен јекх јекхеске.