Кас ка бирине те овел тло водачи? — Со вакерела и Библија?

О мануша анена важно одлука башо адава кас ка биринен сар водачија.

Со вакерела и Библија?

Е манушикане водачен иси лен ограничувања

И Библија вакерела кола ограничувања иси са е манушикане водачен.

• „Ма те овел тумен доверба ко моќна мануша или ко било саво јавер мануш, кова со нашти те спасинел тумен! О духо лескоро икљола, хем ов иранела пе ки пхув; ко адава диве чхинавѓовена са лескере мисле“ (Псалм 146:3, 4).

Чак о најспособна водачија јекх диве ка мерен. Исто аѓаар, ола нашти те гарантиринен кај о јавера водачија со ка авен пали ленде, ка продолжинен те керен са адала шукар буќа со ола керѓе (Проповедник 2:18, 19).

И Библија вакерела кај о мануша никогаш на сине створиме те владинен коркори пеа.

• „О мануш кова со пхирела нашти те управинел пле чекорија“ (Еремија 10:23).

Дали шај некој те поставинел јекх шукар водачи ко амаро време?

Водачи одобримо таро Девел

И Библија објаснинела кај о Девел чхивѓа те овел владетели о Исус Христос, кова сој тано најспособно хем касте со шај те овел амен доверба (Псалм 2:6). О Исус тано Цари ко е Девлескоро Царство, влада која со владинела таро небо (Матеј 6:10).

Дали ка бирине е Исусе сар водачи? И Библија сикавела соске тано важно акава пучибе:

• „Поштујнен е чхаве [е Исус Христосе] те шај о Девел те на хољанел хем те на мерен, соске лескири холи шај сигате те тхабљол. Бахтале тане са окола со о Девел тано ленге тхан гарајбаске“ (Псалм 2:12).

Акана тано време те одлучине тут. О библиска пророштвија вакерена кај о Исус почминѓа те владинел таро 1914 берш хем кај панда хари е Девлескоро Царство ка заменинел са е манушикане владен (Даниел 2:44).

Те шај повише те дознајне сар шај те поддржине е Исусе сар владетели, читин и статија „Поддржин е Девлескоро Царство панда акана!“