Кој ка заштитинел е обична манушен? Со вакерела и Библија?

Спрема о извештај таро Обединета Нацие:

• Таро 7 џи ко 23 октомври 2023 берш, ко конфликт со иси машкар о израелција хем о палестинција ки Газа сине мударде повише таро 6.400 мануша, а повише таро 15.200 тане повредиме, колендар со повише џене тане обична мануша. Освен адава, бут милје мануша мора сине те нашен таро пумаре кхера.

• Џи ко 24 септември 2023 берш, ки војна машкар и Русија хем Украина, ки Украина тане мударде 9.701 мануша хем 17.748 тане повредиме.

Сави надеж дела и Библија околенге со трпинена о последице таро војне?

Причина баши надеж

И Библија пророкујнела кај о Девел ка „чхинавел о војне ки цели пхув“ (Псалм 46:9). Ов ка менинел са о манушикане владе јекхе небесно владаја, или царствоја (Даниел 2:44). Е Девлескоро Царство ка спасинел е манушен.

Со ка керел о Исус Христос, о Цари ко е Девлескоро Царство? И Библија вакерела акава:

• „Соске ка спасинел е чороле со ровела баши помош, околе со цидела муке хем секас со нане ле кој те поможинел ле. Ка перел леске жал е бедно манушеске хем е чоролеске, хем ка аракхел о живото е чороленгоро. Ка спасинел лен таро малтретирибе хем насилство“ (Псалм 72:12-14).

Преку пло Царство, о Девел јекх пути засекогаш ка чхивел крајо башо неволје хем о муке со авена таро војне хем насилство.

• „Ов ка косел секоја асвин таро ленгере јакхја, хем мерибе нане те овел више, ни жалибе, ни ројбе, ни дукха. Са со сине англе, накхља“ (Откровение 21:4).

Панда хари е Девлескоро Царство ка анел баре промене ки пхув. Ки Библија тане пророкујме о војне со дикхаја лен авдиве (Матеј 24:6). Акала хем јавера настанија тане доказ кај живинаја ко „последна диве“ таро манушикано владибе (2. Тимотеј 3:1).