Кеда ка чхинавѓовен о конфликтија? — Со вакерела и Библија?

„Акана тано време кеда и ситуација ваљани те овел посмирими хем те на овел бут опасно. Акана тано време те сикавел пе самоконтрола“, вакерѓа о генерално секретари таро Обединета нацие о Антонио Гутереш, поврзимо е директно нападеа со керѓа о Иран ко Израел сабота, 13 април 2024 берш.

О војне ко Блиски Исток тане јекх пример башо адава со случинела пе ко цело свето.

„Авдиве иси бут повише воена конфликтија тари Дујто светско војна наакари хем адава влијајнела упро дуј милијарде мануша — упро секова штарто мануш“ (Совет баши безбедност ко Обединета нацие, 26 јануари 2023 берш).

Тхана коте со иси воена конфликтија тане ко Израел, Газа, Сирија, Азербејџан, Украина, Судан, Етиопија, Нигер, Мјанмар хем Хаити.a

Кеда ка чхинавѓовен о конфликтија? Шај ли о светска водачија те анен мир? Со вакерела и Библија?

О свето ки војна

Адава со иси баро број конфликтија ко цело свето сикавела кај панда хари са е војненге ка авел крајо. Акала војне тане библиска пророштвија со исполнинена пе ко амаро време. И Библија башо акава време вакерела кај тано „крајо акале светоскоро“ (Матеј 24:3).

• „Ка шунен башо војне ко разна тхана... ка боринел пе народо против народо, хем царство против царство“ (Матеј 24:6, 7).

Читин и статија „Од каде знаеме дека живееме во ’последните денови‘?“ те шај те дознајне сар о авдисутне војне исполнинена о библиска пророштвија.

Војна со ка чхивел крајо са е војненге

И Библија пророкујнѓа кај ка авел крајо башо манушикане конфликтија. Сар ка овел адава? Адаја нане те овел манушикани војна, него адава ка овел преку Армагедон, „војна со ка овел ко баро диве е Семоќно Девлескоро“ (Откровение 16:14, 16). Акаја војна ка керел о Девел те исполнинел пло ветување те шај о мануша те уживинен ко вечно мир (Псалм 37:10, 11, 29).

Те шај те дознајне повише баши е Девлескири војна која со ка чхивел крајо башо са о војне, читин и статија „Што е Армагедон?“