Сар о војне хем о насилна конфликтија влијајнена упри сариненде аменде
„Тари Дујто светско војна на сине добором насилна конфликтија сар со иси авдиве хем 2 милијарде мануша — четвртина таро мануша — живинена ко тхана сој погодиме таро асавке конфликтија.“
(Амина Мохамед, заменик генерално секретарка ко Обединета нацие, 26 јануари 2023).
О војне хем о насилна конфликтија шај таро јекх пути те почминен ко тхана коте со моментално иси мир. Чак о мануша со на живинена ко тхан коте со иси војна, тане погодиме таро адава адалеске со ко интернет шунена хем дикхена со случинела пе. А и штета со сине керди шај те трајнел панда бут чак откеда ка завршинел и војна. Аке несаве примерија:
И војна керела те на овел доволно хајбаске. Спрема и Светско програма баши храна, „о конфликтија тане панда и најбари причина башо бокхалипе хем 70 посто таро са о мануша ко свето колен со нане лен со те хан живинена ко тхана коте со иси војне хем насилство“.
И војна анела физичка хем психичка проблемија. И опасност тари војна хем и дар шај те керел о мануша те осетинен баро стрес хем анксиозност. Окола со живинена ко тхана коте со иси војна нане ки опасност само те овен физички повредиме него хем шај те овен лен психичка проблемија. Ама жално тано со бут пути нашти те добинен и медицинско помош со ваљани ленге.
И војна керела о мануша те нашен таро пумаре кхера. Спрема о Баро комесари башо избеглице ко Обединета нацие, џи ко септември 2023 берш, повише таро 114 милиоња мануша ко цело свето мора сине те мукхен пумаре кхера. И главно причина башо акава тане о војне хем о насилна конфликтија.
И војна керела те овен економска проблемија. О војне бут пути керена те овен економска проблемија, сар на пример са те скупонел. О мануша мучинена пе адалеске со баро дело таро паре, кола со обично би трошинена пе башо састипе хем образование, о владе трошинена лен те шај те финансиринен о војне. А ваљани хем бут паре те шај палем те градинел пе адава со сине уништимо ки војна.
И војна уништинела и пхув. О мануша мучинена пе кеда и пхув коте со живинена тани намерно уништими. О загадимо пани, о воздух хем и пхув шај те керен те овен амен проблемија састипаја кола со ка трајнен бершенцар, а и опасност таро гаравде мине ки пхув ачхола панда бут време пало војне.
Јасно тано кај и војна анела страшна последице ко секова поглед.