Сар ка авел крајо е војненге хем е конфликтенге

О ДЕВЕЛ КА ЦИДЕЛ Е МАНУШИКАНЕ ВЛАДЕН

О Девел ка чхивел крајо е манушикане владенге преку и војна кола со и Библија викинела ла Армагедонa (Откровение 16:16). Ко адава време „о царија таро цело свето“ ка овен кхедиме заедно баши војна со ка овел ко баро диве е Семоќно Девлескоро (Откровение 16:14). О Армагедон тани е Девлескири војна колаја со ка чхивел крајо башо са о војне.

О Девел ко тхан е манушикане владенгоро ка чхивел пло Царство, јавере лафенцар влада која со ка владинел таро небо хем никогаш нане те овел уништими (Даниел 2:44). О Девел биринѓа пле Чхаве, е Исус Христосе, те овел Цари ко адава Царство (Исаија 9:6, 7; Матеј 28:18). Акаја влада тани о Царствоb баши колеске со о Исус вакерѓа пле следбениконге те молинен пе (Матеј 6:9, 10). Са о мануша ка овен ко јекхипе хем ка овел јекх влада колаја со ка владинел о Исус.

Различно таро манушикане владетелија о Исус нане те користинел пло авторитети башо пло интерес. Ов тано праведно хем нане пристрасно хем адалеске упри никасте нане те керел пе несави неправда баши лескири раса, националност или потекло (Исаија 11:3, 4). Хем о мануша нане те ваљани те боринен пе башо пумаре правија. Соске? Адалеске со о Исус ка грижинел пе башо шукарипе секоле јекхескоро. „Ка спасинел е чороле со ровела баши помош, околе со цидела муке хем секас со нане ле кој те поможинел ле... Ка спасинел лен таро малтретирибе хем насилство“ (Псалм 72:12-14).

Е Девлескоро Царство ка чистинел и пхув таро са о оружје (Михеј 4:3). А ка цидел хем е лошна манушен кола со на чхинавена те боринен пе хем кола со анена штета е јаверенге (Псалм 37:9, 10). Секова мурш, џувли хем чхаво ка осетинел пе безбедно коте хем те овел ки пхув (Езекиел 34:28).

Кеда ка владинел е Девлескири влада, са е манушен ка овел лен о најшукар живото. Ој ка цидел о проблемија кола со мучинена е манушен, сар на пример о чоролипе, о бокхалипе хем адава со нане лен шукар условија живибаске. Секас ка овел ле доволно здраво храна хем ка овел ле шужо кхер (Псалм 72:16; Исаија 65:21-23).

Кеда ка владинел е Девлескоро Царство ка овен цидиме са о страшна последице таро војне. Адава значинела кај нане те овен цидиме само о физичка белегија него хем и психичко хем и емоционално дукх која со о мануша осетинена башо адава со доживинѓе страшна буќа ки војна. Чак окола со муле ка овен воскресниме хем палем ка живинен ки пхув (Исаија 25:8; 26:19; 35:5, 6). О фамилие палем ка овен заедно хем о мануша ни нане те сетинен пе ко страшна буќа со случинѓе пе англедер (Откровение 21:4).

О ДЕВЕЛ КА ЦИДЕЛ О ГРЕВО

Џикоте ка владинел е Девлескоро Царство ки пхув, са о мануша ка обожавинен е јекхе чачутне Девле, е Јеховаc‚ „о Девел е мангипаскоро кова со дела мир“ (2. Коринќања 13:11). О мануша ка сикљовен те живинен заедно ко мир (Исаија 2:3, 4; 11:9). Сарине со применинена адава со сикљона ка овен ослободиме таро последице е гревоскере (Римјања 8:20, 21).

О ДЕВЕЛ КА ЦИДЕЛ Е САТАНА ХЕМ ЛЕСКЕРЕ ДЕМОНЕН

Е Девлескоро Царство ка уништинел околен со влијајнена упро мануша те керен војне, е Сатана хем лескере демонен (Откровение 20:1-3, 10). Бизо ленгоро лошно влијание, „ка овел баро мир“ (Псалм 72:7).

Шај те ове уверимо кај е Девлескоро ветување кај ка чхивел крајо е војненге хем е насилно конфликтенге ка исполнинел пе. Ов мангела ама хем шај те цидел о војне.

• Е Девле иси ле мудрост хем моќ те шај те чхивел крајо башо војне хем о насилство (Јов 9:4). На постојнела нешто со нашти те керел (Јов 42:2).

• О Девел мрзинела кеда о мануша цидена муке (Исаија 63:9). Исто аѓаар, ов „мрзинела околен со мангена о насилство“ (Псалм 11:5).

• О Девел секогаш ачхола ко пло лафи; ов нашти те ховавел (Исаија 55:10, 11; Тит 1:2).