ЛЕКЦИЈА 06
Сар уло о живото?
Башо Девел, и Библија вакерела: „Ту керѓан са о буќа“ (Откровение 4:11). Дали верујнеа ко адава? Несаве мануша вакерена кај на постојнела Створители, јавере лафенцар кај о живото на сине створимо. Ако адава тано точно, тегани амен улем случајно. Ама, ако о Јехова о Девел створинѓа о живото, тегани ле сине ле несави цел.a Дикх со вакерела и Библија башо адава сар уло о живото хем соске иси амен шукар причине те верујна кај адава тано чаче.
1. Сар уло о универзум?
Ки Библија пишинела: „Ко почеток о Девел керѓа о небо хем и пхув“ (1. Мојсеева 1:1). Бут научникија сложинена пе кај о универзум иси ле почеток. Сар створинѓа ле о Девел? Ов користинѓа пло свети дух те шај те створинел са сој ко универзум, коте сој вклучиме о галаксие, о черења хем о планете (1. Мојсеева 1:2).
2. Соске о Девел створинѓа и Пхув?
О Јехова и Пхув на створинѓа ла џабе, него керѓа ла те живинел пе ки лате (Исаија 45:18). Ов керѓа амари планета те овел шукар тхан живибаске хем те овел ки лате са со ваљани те шај о мануша те живинен вечно. (Читин Исаија 40:28; 42:5.) О научникија вакерена кај и Пхув разликујнела пе таро са о јавера планете. Ола на аракхле нијекх јавер планета колате со иси са о условија со ваљанена живибаске.
3. Ко со разликујнена пе о мануша таро животне?
Откеда створинѓа и Пхув, о Јехова створинѓа хем о живото ки лате. Прво, и Пхув пхерѓа ла растениенцар хем животненцар. Пало адава, „о Девел керѓа е мануше спрема пло лико“. (Читин 1. Мојсеева 1:27.) Со керела е манушен те овен различна таро животне? Адалеске со сием створиме спрема е Девлескоро лико, амен шај те сикава лескере особине сар сој о мангипе хем и правда. Исто аѓаар, о Девел денѓа амен способност те сикљова чхибја, те ценина и уметност хем те уживина ки музика. Освен адава, амен шај те обожавина амаре Створителе, нешто со о животне нашти те керен.
ДОЗНАЈН ПОВИШЕ
Дикх некобор доказија башо адава кај о живото сине створимо хем кај адава со вакерела и Библија башо створибе тано логично. Исто аѓаар, дикх со шај те сикљова башо Девел таро шукар особине со иси е манушен.
4. О живото сине створимо
О мануша добинена пофалбе башо буќа со копиринена тари природа. Тегани, кој ваљани те добинел пофалба башо оргиналија? Дикх о ВИДЕОКЛИПИ, а пало адава керен лафи башо акава пучибе:
Кола буќа о мануша копиринѓе тари природа?
Секова кхер тано планиримо хем кердо некастар. Ама, кој планиринѓа хем керѓа о буќа со иси ки природа? Читин Евреите 3:4, а пало адава керен лафи башо акала пучиба:
Кола буќа со иси ки природа воодушевинена тут?
Дали тано логично те верујна кај са со постојнела ко универзум сине створимо, хем соске?
Дали џанљан?
Повише статие хем видеоклипија баши акаја тема шај те аракхе ки jw.org ко рубрике „Случајно или создадено?“ хем „Потеклото на животот“.
„Секова кхер некој керѓа ле, а окова со керѓа са тано о Девел“
5. Иси шукар причине те верујна ко библиско извештај башо створибе
Ки Библија, ки 1. Мојсеева ко прво поглавје, пишинела сар сине створими и Пхув хем о живото ки лате. Шај ли те верујне ко адава извештај, или мислинеа кај адава тано само јекх парамис? Дикх о ВИДЕОКЛИПИ, а пало адава керен лафи башо акала пучиба:
Дали и Библија вакерела кај и Пхув хем о живото ки лате сине створиме башо шов диве таро 24 саатија?
Дали тано логично хем разумно те верујна ко библиско извештај башо створибе, хем соске мислинеа аѓаар?
Читин 1. Мојсеева 1:1, а пало адава керен лафи башо акава пучибе:
О научникија вакерена кај о универзум иси ле почеток. Дали ленгоро заклучок тано ко склад е стихоја со акана читинѓем тари Библија?
Несаве мануша пучена пе дали о Девел користинѓа еволуција те шај те створинел о живото. Читин 1. Мојсеева 1:21, 25, 27, а пало адава керен лафи башо акала пучиба:
Дали ки Библија пишинела кај о Девел створинѓа јекх едноставно животно облик, а пало адава дозволинѓа ов те еволуиринел ко мачхе, животне хем мануша? Или палем, о Девел створинѓа са о основна животна „врсте“?
6. О Девел створинѓа е манушен те овен посебна
Амен разликујнаја амен таро животне со створинѓа лен о Јехова. Читин 1. Мојсеева 1:26, а пало адава керен лафи башо акава пучибе:
Адалеске со сием створиме спрема е Девлескоро лико, со сикљоваја башо Девел таро адава со шај те сикава мангипе хем сочувство?
НЕСАВЕ ШАЈ ВАКЕРЕНА: „О библиско извештај башо створибе тано само парамис“.
Со мислинеа ту башо адава, хем соске?
СО СИКЛИЛЕМ
О Јехова створинѓа о универзум хем цело живото ки лесте.
Сар ка одговорине?
Со сикавела и Библија башо адава сар уло о универзум?
Дали о Девел створинѓа о разна животна врсте или мукхља ола те еволуиринен таро едноставно животно облик?
Ко со разликујнена пе о мануша таро јавера створиме буќа?
ИСТРАЖИН
Дикх несаве примерија тари природа со сикавена кај постојнела Створители.
„Што учиме од природата?“ (Разбудете се! таро септември 2006)
Дикх сар јекх дад објаснинела о библиско извештај башо створибе пле тикне чхавеске.
Читин дали и еволуција тани ко склад е Библијаја.
a Ки лекција 25 ка дикха која тани е Девлескири намера е манушенцар.