Соске е Девле иси ле организација?

1. Соске о Девел организиринѓа е Израелцон?

Таро Авраам о Јехова керѓа јекх народо хем денѓа ле о анав ‚Израел‘. Денѓа лен законија, сикавѓа лен сар те служинен леске хем ваљани сине те икерен хем те аракхен лескоро лафи (Псалм 147:19, 20). Преку ленде о Девел ка анел сине берекетија са е јавере народонге ки Пхув. Читин 1. Мојсеева 22:18.

О Девел биринѓа е Израелцон те овен лескере сведокија. Таро ленгоро џивдипе ко пурано време шај те дикхел пе кобор тано шукар е манушенге кеда шунена е Девлескере законија (5. Мојсеева 4:6). Аѓаар, преку о Израелција о јавера шај сине те пенџарен е чачутне Девле. Читин Исаија 43:10, 12.

2. Соске о чачутне христијанија тане организириме?

Адалеске со на сине верна е Девлеске, о Израелција побутер нане лескоро народо хем ко ленгоро тхан о Девел биринѓа о христијанско собрание (Матеј 21:43; 23:37, 38). Акана, ко тхан е Израелцонге, о чачутне христијанија служинена сар сведокија е Јеховаскере. Читин Дела 15:14, 17.

О Исус организиринѓа пле ученикон те проповединен о шукар хабери хем те поможинен е манушенге таро са о нацие те овен лескере ученикија (Матеј 10:7, 11; 24:14; 28:19, 20). Никед на проповединела пе сине добором бут сар авдиве, ко последна диве акале сумналескере. Прво пути ки е манушенгири историја, о Јехова кхединѓа милионија мануша таро са о нацие те служинен леске сар Ов со родела (Откровение 7:9, 10). О чачутне христијанија тане организириме те шај те охрабринен пе хем те поможинен пе јекх јекхеа. Ко цело сумнал, ола сикљовена о иста буќа тари Библија ко ленгере состанокија. Читин Евреите 10:24, 25.

3. Сар почминге те организиринен пе е Јеховаскере сведокија ко амаро време?

Ко 1870-та берша јекх тикни група Истражувачија е Библијакере почминге те хаљовен о чачипе тари Библија, кова со сине бистердо бут берша. Ола џанге кај о Исус организиринѓа о христијанско собрание таро прво веко те проповединел. Адалеске, ола почминге ко цело сумнал те проповединен башо Царство. Ко 1931 берш ола леле о анав е Јеховаскере сведокија. Читин Дела 1:8; 2:1, 4; 5:42.

4. Сар тане организириме е Јеховаскере сведокија?

Ко прво веко, о христијанска собранија ко бут пхувја, добинена сине упатствија таро Водечко тело кова со признајнела е Исусе сар Поглавари ко собрание (Дела 16:4, 5). Авдиве да е Јеховаскере сведокија ко цело сумнал добинена упатствија таро Водечко тело. О Водечко тело тано кердо таро искусна старешине. Ов тано одговорно башо подружнице коленде со е Јеховаскере сведокија превединена, печатинена хем бичхалена публикацие коленцар со проучинела пе и Библија ко побутер таро 600 чхибја. Аѓаар о Водечко тело шај те охрабринел хем те дел библиска упатствија ко побутер таро 100.000 собранија ко цело сумнал. Ко секова собрание иси мурша со пхерена о условија те служинен сар старешине. Ола мангипаја грижинена пе е Девлескере слугенге. Читин 1. Петрово 5:2, 3.

Е Јеховаскере сведокија тане организириме те проповединен о шукар хабери хем те поможинен е манушенге те овен е Исусескере ученикија. Сар о апостолија, амен да проповединаја таро кхер ко кхер (Дела 20:20). Ама, е Јеховаскере сведокија нане само несави организација. Амен сием јекх фамилија хем амаро Дад бут мангела амен. Амен сием пхраља хем пхења со грижинена пе јекх јекхеске (2. Солуњаните 1:3). Адалеске со е Јеховаскере сведокија мангена те керен адава со о Девел мангела хем поможинена е јаверенге, ола тане и најбахтали фамилија ко сумнал. Читин Псалм 33:12; Дела 20:35.