ЛЕКЦИЈА 10
Сар шај те поможинен туке о состанокија е Јеховаскере сведоконгере?
Дали сиан сине некогаш ко јекх состанок таро е Јеховаскере сведокија? Ако панда на, шај туке незгодно те аве прво пути. Шај пучеа тут: „Со случинела пе ко адала состанокија? Соске тане важна? Соске ваљани те овав присутно ки ленде?“ Ки акаја лекција ка сикљове сар адава со ка кхеде тут е јаверенцар ко состанокија ка керел тут попаше е Девлеа хем ка поможинел туке лично.
1. Која тани и најважно причина соске кхедаја амен?
Дикх сар јекх библиско писатели сикавѓа која тани и најважно причина соске кхедаја амен е јаверенцар. Ов вакерѓа: „Машкар о кхедимо народо ка фалинав е Јехова“ (Псалм 26:12). Адалеске е Јеховаскере сведокија тане бахтале со кхедена пе заедно. Ко цело свето ола кхедена пе секова курко ко групе кола со викинена пе собранија, те фалинен е Девле, те гиљавен хем те молинен пе. Исто аѓаар, некобор пути ко берш, ола кхедена пе ко побаре групе те обожавинен е Јехова.
2. Со ка сикљове ко амаре состанокија?
О состанокија поможинена аменге те хаљова е Девлескоро Лафи. (Читин Неемија 8:8.) Ако сиан присутно ко амаре состанокија ту ка сикљове башо Јехова хем башо лескере бут шуже особине. Хем кобор повише ка сикљове башо лескоро мангипе спрема туте, добором попаше ка ове леа. Исто аѓаар, ка сикљове сар шај ов те поможинел туке те овел тут бахтало живото (Исаија 48:17, 18).
3. Сар шај те поможинен туке о мануша колен со ка запознајне ко амаре состанокија?
О Јехова вакерела аменге „те размислина јекх јекхеске те шај те поттикнина амен те сикава мангипе хем те кера шукарипе, хем ма те мукха амаре состанокија“ (Евреите 10:24, 25). Ко амаре состанокија ка запознајне манушен кола со чаче грижинена пе јекх јекхеске хем кола со, исто сар туте, мангена те сикљовен повише башо Девел. Ка шуне лендар охрабрувачка мисле тари Библија. (Читин Римјаните 1:11, 12.) Исто аѓаар, ка шај те запознајне е јаверен кола сој тане бахтале иако шај иси лен проблемија. Акала тане само некобор причине соске о Јехова мангела редовно те кхеда амен.
ДОЗНАЈН ПОВИШЕ
Дикх со керела пе ко состанокија е Јеховаскере сведоконгере хем соске врединела те трудине тут те ове присутно ки ленде.
4. Е Јеховаскере сведоконгере состанокија
Ко прво веко, о христијања редовно кхедена пе сине те обожавинен е Јехова (Римјаните 16:3-5). Читин Колошаните 3:16, а пало адава керен лафи башо акава пучибе:
Сар о прва христијања обожавинена сине е Јехова?
Авдиве да, е Јеховаскере сведокија редовно кхедена пе ко пумаре дворане. Те шај те дикхе со керела пе ко ленгере состанокија, дикх о ВИДЕОКЛИПИ. Пало адава, дикх и слика таро јекх состанок ки дворана хем керен лафи башо акала пучиба:
Кола слична буќа приметинеа, ко адава со керела пе ки дворана хем ко адава со читинеа ко Колошаните 3:16?
Со јавер свиџинела пе туке ко видеоклипи или ки слика башо состанокија?
Читин 2. Коринќаните 9:7, а пало адава керен лафи башо акава пучибе:
Соске ко е Јеховаскере сведоконгере состанокија на родела пе паре?
Дикх заедно адалеа со проучинела туја и Библија башо со ка керел пе лафи ко јекх таро состанокија акава курко.
Кова дело таро состанок мислинеа ка овел туке најинтересно или најкорисно?
Дали џанљан?
Ки интернет-страница jw.org, шај те аракхе коте хем кеда икерена пе состанокија ко цело свето.
(1) Ко амаре состанокија шунаја говорија, дикхаја видеоклипија хем сикљоваја сар те проповедина хем сар те сикава е јаверен. О состанокија почминена хем завршинена гиљаја хем молитваја
(2) Ко несаве делија тари програма о присутна шај те коментиринен
(3) Сарине шај те авен — мурша, џувља, пхуре, терне
(4) О влези тано бесплатно хем ки ленде на родела пе паре
5. Ваљани те трудина амен те ова ко состанокија
Те дикха о пример тари е Исусескири фамилија. Секова берш, те шај те џан ко храми ко Ерусалим, ола ваљани сине те пхирен околу 100 километре хем те накхен таро бут планине. Читин Лука 2:39-42, а пало адава керен лафи башо акала пучиба:
Со мислинеа, дали сине ленге локхо те патујнен џи ко Ерусалим?
Дали иси нешто со шај те керел туке пхаро те џа ко состанокија?
Со мислинеа, соске врединела те трудине тут те џа ко состанокија?
И Библија сикавела кај тано бут важно те кхеда амен заедно е јаверенцар те обожавина е Јехова. Читин Евреите 10:24, 25, а пало адава керен лафи башо акава пучибе:
Соске ваљани редовно те ова присутна ко состанокија?
НЕСАВЕ ШАЈ ВАКЕРЕНА: „На ваљани те џа ко секова состанок“.
Кова библиско стихо или библиско пример сикавела со мангела о Јехова?
СО СИКЛИЛЕМ
Ако сиан присутно ко состанокија ка сикљове повише башо Јехова, ка кере тло амалипе позорало леа хем ка обожавине ле заедно е јаверенцар.
Сар ка одговорине?
Соске о Јехова поттикнинела амен те кхеда амен заедно?
Со ка сикљове ко е Јеховаскере сведоконгере состанокија?
Ко кола јавера начинија шај те поможинен туке о состанокија?
ИСТРАЖИН
Со ако шај лаџаја те аве ко состанокија? Дикх сар јекх мануш, кова со осетинела пе сине исто аѓаар, сиклило те мангел о состанокија.
Дикх сар јекх терно мануш уживинела сине ко состанокија хем со керѓа те шај понадари да те овел присутно ленде.
Дикх со мислинена о јавера башо состанокија.
„Соске те џав ко состанокија ки дворана е Јеховаскере сведоконгири?“ (интернет статија)
Дикх сар јекх насилно мануш, кова со сине члени ки јекх банда, менинѓа пло живото одкеда сине присутно ко јекх состанок таро е Јеховаскере сведокија.
„Никаде не одев без пиштол“ (Стражарска кула таро 1 јули 2014)