Кобор таро е Јеховаскере сведокија пенџареа? Несаве амендар шај тане тле комшие, колеге ки бути или соученикија. Или палем, шај некогаш керѓем туја лафи баши Библија. Кој сием амен хем соске вакераја јаверенге ко со верујнаја?

Амен сием обична мануша. Иси амен различно потекло хем џивдинаја ко различна условија. Несаве амендар англе сине ки јавер религија, а јавера на верујнена сине ко Девел. Англедер те ова е Јеховаскере сведокија, одвојнѓем аменге време шукар те сикљова со сикавела и Библија (Дела 17:11). Халилем кај адава со сиклилем тано чаче хем коркори одлучинѓем те служина е Јеховаске.

Аменге поможинела адава со сикљоваја тари Библија. Сар са о јавера, амен да мора те икљова ко крајо амаре проблеменцар хем амаре мааненцар. Ама, адалеске со трудинаја амен те икера о библиска начела, амаро џивдипе уло пошукар (Псалм 128:1, 2). Адаја тани јекх причина соске јаверенге вакераја башо адава со сиклилем тари Библија.

Амен џивдинаја сар со родела о Девел. О буќа со сикавела и Библија керена те кера шукарипе е јаверенге хем те почитујна лен, те ова чесна хем љубезна. О библиска начела поможинена е манушенге те овен шукар, примерна хем поможинена о фамилие те овен попаше. Адалеске со сием сигурна кај ‚о Девел на одвојнела е манушен‘, амен сием сар јекх фамилија керди манушендар таро различна нацие со верујнела ко иста буќа хем со на делинела ла и политика. Иако сием обична мануша, амен сием јекх посебно народо (Дела 4:13; 10:34, 35).

• Ко со е Јеховаскере сведокија тане слична сар о јавера мануша?

• Саве корисна буќа сиклиле е Јеховаскере сведокија тари Библија?

Бут мануша мислинена кај е Јеховаскере сведокија тане несави неви религија. Ама, англедер 2.700 берша, башо мануша со служинге е чачутне Девлеске сине вакердо кај тане лескере ‚сведокија‘ (Исаија 43:10-12). Са џи ко 1931 берш, сием сине пенџарде сар Истражувачија е Библијакере. Соске акана амаро анав тано е Јеховаскере сведокија?

Амаро анав сикавела кој тано амаро Девел. Сар со сикавена о пуране препишиме библиска лила, е Девлескоро анав, Јехова, ки Библија аракхљола побутер таро 7.000 пути. Ко бут преводија акава анав тано менимо титуленцар сар со и „Господ“ или „Бог“. Ама, о чачутно Девел сикавѓа е Мојсееске пло анав, Јехова, хем вакерѓа: ‚Акава тано мло анав засекогаш‘ (2. Мојсеева 3:15). Аѓаар ов керѓа разлика машкар песте хем о ховавне девела. Иси амен бари чест те пхирава е Девлескоро свето анав.

Амаро анав сикавела која тани амари задача. Бут праведна мануша ко пурано вакти, почминдор таро Авел, денге сведоштво баши пумари вера ко Јехова. Ко акава ‚баро облако таро сведокија‘ тане о Ное, о Авраам, о Мојсеј, о Давид хем јавера (Евреите 11:4 — 12:1). Исто сар јекх мануш со икљола ко судо те сведочинел ки корист јекхе невино манушеске, аѓаар амен сием спремна те вакера о чачипе башо амаро Девел.

Џаја пало е Исусескоро пример. И Библија башо Исус вакерела кај тано ‚верно хем чачутно сведоко‘ (Откровение 3:14). Коркори о Исус ‚вакерѓа е Девлескоро анав е манушенге‘ хем ‚сведочинѓа о чачипе‘ башо Девел (Јован 17:26; 18:37). Адала со чаче мангена те џан пало Исус, мора те пхиравен е Јеховаскоро анав хем те вакерен ле јаверенге. Е Јеховаскере сведокија трудинена пе те керен адава.

• Соске о Истражувачија е Библијакере леле о анав е Јеховаскере сведокија?

• Од кеда е Јехова иси ле сведокија ки Пхув?

• Кој тано о најбаро сведоко е Јеховаскоро?

И Библија вакерѓа кај пало е Исусескоро мерибе ка икљовен ховавне учителија машкар о прва христијанија хем ка сикавен ховавне буќа (Дела 20:29, 30). Сар со накхела сине о време, уло баш аѓаар. Ола мешинге адава со сикавела сине о Исус е ховавне религиозно идеенцар хем аѓаар уло о ховавно христијанство (2. Тимотеј 4:3, 4). Сар шај авдиве те ова сигурна кај точно хаљоваја со сикавела чаче и Библија?

Ало о време о Јехова те сикавел о чачипе. Ов англедер вакерѓа кај ‚ко последна диве о чачипе сегде ка ширинел пе‘ (Даниел 12:4). Ко 1870 берш, јекх тикни група мануша со родена сине о чачипе, дикхле кај бут буќа со сикавела сине и црква на сине тари Библија. Адалеске, ола трудинге пе те хаљовен со чаче сикавела и Библија, а о Јехова поможинѓа лен ко адава.

О искрена мануша темелно проучинге и Библија. Акала искрена Истражувачија е Библијакере, сар со англе викинаја амен сине, користинге јекх начин те сикљовен и Библија кова со амен панда користинаја ле. Ола керена сине лафи баши Библија, тема по тема. Кеда ресена сине џи ко дело тари Библија со сине ленге пхаро те хаљовен, ола родена сине јавера стихија со објаснинена адава дело. Кеда сине сигурна кај адава со халиле сине ко склад цело Библијаја, тегани пишинена ле сине. Аѓаар со мукхле и Библија коркори те тумачинел пес, ола аракхле о чачипе баши е Девлескоро анав хем лескоро Царство, баши лескири намера е манушенцар хем е Пхувјаја, башо адава со овела е муленцар хем и надеж башо воскресение. Аѓаар ола ослободинге пе таро бут ховавне сикљојба хем адетија (Јован 8:31, 32).

Џи ко 1879 берш о Истражувачија е Библијакере халиле кај ало о време сегде те вакерен о чачипе. Адалеске адава берш, почминге те керен о списание со авдиве панда кераја ле, и Стражарска кула. Акана вакераја о чачипе тари Библија е манушенге ко 240 пхувја хем ко побутер таро 750 чхибја. Никед џи акана о чачипе на сине добором бут ширимо!

• Со уло е чачипаја тари Библија, пало е Исусескоро мерибе?

• Со поможинѓа палем те аракха о чачипе тари Библија?

Бершенцар, е Јеховаскере сведокија користинге, печатинге хем денге различна преводија тари Библија. Ама, тегани дикхлем кај ваљани те кера нево превод со ка поможинел е манушенге ‚шукар те пенџарен о чачипе‘, сар со мангела о Девел (1. Тимотеј 2:3, 4). Адалеске, ко 1950 берш почминѓем те печатина превод тари Библија, ки англиско чхиб, со викинела пе сине Превод Нов свет. Авдиве асавко точно превод иси ко побутер таро 130 чхибја.a

Ваљани сине Библија со локхе ка хаљовел пе. Сар со накхела о време, о чхибја менинена пе, адалеске ко бут преводија иси пуране или нејасна лафија со пхаре хаљовена пе. Исто аѓаар, сине аракхле побутер попуране препишиме библиска лила со поможинге пошукар те хаљовен пе о чхибја коленде со сине пишими и Библија — и хебрејско, и арамејско хем и грчко чхиб.

Ваљани сине превод ко кова со точно ка овел преведимо е Девлескоро лафи. Наместо те превединен е Девлескоро лафи сар ола со мангена, о преведувачија е библијакере ваљани точно те превединен адава со пишинела ки лате. Ама, ко побутер преводија тари Библија на бешела е Девлескоро анав, Јехова.

Ваљани сине Библија со ка славинел е Девле (2. Самоилова 23:2). Ко Превод Нов свет, е Јеховаскоро анав аракхљола ко 7.000 тхана коте со бешела сине ко најпуране препишиме библиска лила, сар со дикхаја теле ки слика (Псалм 83:18). Акаја Библија, која со сине бут берша керди, кеда ка читине ла ка уживине соске ки лате тане јасно пишиме е Девлескере мисле. Сајекх дали иси Превод Нов свет ки тли чхиб или на, шукар тано те овел тут навика те читине е Јеховаскоро лафи секова диве (Исус Навин 1:8; Псалм 1:2, 3).

• Соске ваљани сине нево превод е Библијаке?

• Со ваљани секова диве те кера ако мангаја те џана која тани е Девлескири волја?