Сар о мангипе поможинела аменге те победина и дар?

1. Кола тане несаве вообичаена буќа таро кола со дараја?

РАЗМИСЛИН башо следна ситуацие таро кола со несаве Сведокија накхена. О Нестор хем лескири ромни и Марија, мангле те служинен ко тхан коте со иси побари потреба.b Ама те шај те керен адава ваљани сине те сикљовен те живинен похари паренцар. Ола дарана сине кај шај нане те овен чаче бахтале ако керена адава. О Бинием живинела ки пхув коте со амаре активностија тане забраниме хем сине свесно кај шај те овел прогонимо соске тано е Јеховаскоро сведоко. Адава бут даравѓа ле. Ама, панда повише дарала сине таро адава сар ка реагиринел лескири фамилија кеда ка дознајнел кај уло е Јеховаскоро сведоко. Кеда и Валери дознајнѓа кај иси ла рако кова со сигате напредујнела ој бут мучинела пе сине те аракхел доктори кова со ка поштујнел лакоро стави башо рат, нормално тано кај дарала сине те на мерел.

2. Соске ваљани те трудина амен те контролирина амари дар?

² Дали ту да дарандиљан таро нешто слично? Бут џене амендар дарандиле. Ако на сикљоваја те контролирина амари дар, најверојатно ка ана лошна одлуке кола со негативно ка влијајнен упро амаро амалипе е Јеховаја. Баш адава мангела о Сатана. Ов исто аѓаар пробинела те користинел амари дар те шај те на шуна о заповедија е Јеховаскере машкар кова сој те проповедина о шукар хабери (Отк. 12:17). О Сатана тано злобно, бизи милост хем моќно. Ама ту шај те заштитине тут лестар. Сар?

3. Со ка поможинел аменге те победина амари дар?

³ Кеда сием увериме кај о Јехова мангела амен хем поддржинела амен, о Сатана нашти те даравкерел амен (Пс. 118:6). На пример, о писатели таро 118-то Псалм накхља таро бут пхаре ситуацие. Ле сине ле бут душмања, а несаве лендар сине бут важна мануша (стихија 9 хем 10). Понекогаш сине ле баро притисок таро јавера (стихо 13). Хем добинѓа строго укор таро Јехова (стихо 18). Сепак, адава псалмисти сине поттикнимо те вакерел: „Нане те дарав“. Соске осетинѓа пе добором сигурно? Ов џанља кај иако о Јехова укоринѓа ле, сепак ов бут мангела ле сине. О псалмисти сине уверимо кај бизи разлика тари која ситуација накхела, лескоро Девел со бут мангела ле секогаш тано спремно те поможинел леске (Пс. 118:29).

4. Ако сием увериме кај о Девел мангела амен, таро со нане те дара?

⁴ Ваљани те уверина амен кај о Јехова мангела секоле јекхе амендар. Акава ка поможинел аменге те победина и дар ко трин ситуацие: 1) кеда дараја кај нашти те грижина амен амаре фамилијаке, 2) кеда дараја таро мануша хем 3) кеда дараја таро мерибе. О пхраља хем о пхења со сине спомниме ко прво пасус тари акаја статија, успејнѓе те побединен пли дар соске сине увериме кај о Девел мангела лен.

КЕДА ДАРАЈА КАЈ НАШТИ ТЕ ГРИЖИНА АМЕН АМАРЕ ФАМИЛИЈАКЕ

5. Башо кола буќа шај бут те секиринел пе јекх поглавари? (Дикх и слика ки насловно страна.)

⁵ Јекх поглавари дикхела сериозно ки пли одговорност те грижинел пе материјално пле фамилијаке (1. Тим. 5:8). Адалеске, шај баши пандемија секиринеа тут сине дали ка ачхове ки бути или на. Шај дарандиљан кај нашти те обезбедине хајбаске те фамилијаке хем тхан живибаске. Шај исто аѓаар секиринеа тут сине кај ако нашавѓан тли бути, нане те аракхе јавер. Или сар о Нестор хем и Марија, ту шај мислинеа туке сине кај нашти те живинен похари паренцар. О Сатана успејнѓа те чхинавел буте манушен те служинен е Јеховаске само адалеске со мислинѓе аѓаар.

6. Со мангела о Сатана те верујна?

⁶ О Сатана мангела те верујна кај о Јехова на грижинела пе аменге хем кај ов нане те поможинел амен те грижина амен амаре фамилијаке. Адалеске, шај ка мислина аменге кај мора те кера са со ваљани те шај те задржина амари бути, шај чак ка ова спремна те кера нешто колеа со ка румина амаро амалипе е Јеховаја.

7. Ко со уверинела амен о Исус?

⁷ О Исус џанела пе Даде најшукар таро било кој јавер. Ов адалеске уверинела амен кај амаро Девел џанела со ваљани аменге панда англедер те рода лестар адава (Мат. 6:8). О Исус исто аѓаар џанела кај о Јехова тано спремно те грижинел пе башо амаре потребе. Сар христијања амен сием дело тари е Девлескири фамилија. Шај те ова сигурна кај сар поглавари, о Јехова ка икерел пе ко начело со денѓа ле ко 1. Тимотеј 5:8.

8. а) Со ка поможинел аменге те победина и дар кај нашти те грижина амен амаре фамилијаке? (Матеј 6:31-33). б) Сар сој сикавдо ки слика, со шај те сикљова таро акава брачно пари кова со делинела пло хајбе јекхе пхењаја?

⁸ Кеда сием увериме кај о Јехова мангела амен хем амаре фамилија, тегани нане аменге пхаро те верујна кај ка овен амен о буќа со ваљани аменге. (Читин Матеј 6:31-33.) О Јехова мангела те грижинел пе аменге хем ов дарежливо керела адава. Кеда створинѓа и пхув ов керѓа бут повише него само о основна буќа со ваљани аменге те преживина. Ов створинѓа бут буќа те шај те уживина ки ленде (1. Мој. 2:9). Чак ако понекогаш иси амен само о основна буќа хем ништо повише, ма те бистра кај адала основна буќа иси амен само адалеске со о Јехова грижинѓа пе те овел амен (Мат. 6:11). На ваљани те бистра кај адава со о Јехова ка дел амен тано бут повредно тари било сави материјално жртва со кераја ла авдиве, а ки иднина ка дел амен вечно живото. Баш адава халиле о Нестор хем и Марија (Иса. 65:21, 22).

9. Со шај те сикљове таро Нестор хем тари Марија?

⁹ Е Несторе хем е Марија сине лен бут шужо кхер хем шукар платими бути ки Колумбија. Ола вакерена: „Размислинаја сине те поедноставина амаро живото те шај те кера повише ки служба. Ама дараја сине кај нашти те ова бахтале ако живинаја похари паренцар“. Со поможинѓа ленге те побединен и дар? Ола размислинѓе башо адава кобор пути више о Јехова сикавѓа кај мангела лен. Адалеске со сине увериме кај о Јехова секогаш ка грижинел пе ленге ола мукхле пли шукар платими бути, бикинѓе пумаро кхер хем селинѓе пе ко јавер дело тари пхув коте со сине побари потреба башо проповедибе. Со мислинена ола баши пумари одлука со анѓе ла? О Нестор вакерела: „Уверинѓем амен кобор тано чаче адава со пишинела ко Матеј 6:33. Никогаш на фалинѓа аменге нешто ко материјално поглед хем акана сием бут побахтале“.

И ДАР ТАРО МАНУША

10. Соске о мануша дарана јекх јекхестар?

¹⁰ Панда таро време кеда о Адам хем и Ева бунинѓе пе против о Јехова о мануша понашинена пе лошно јекх јекхеа (Проп. 8:9). На пример, околен со иси лен авторитети користинена ле те шај те понашинен пе лошно е јаверенцар. О криминалција постапинена насилно, несаве чхаве ки школа малтретиринена пле соученикон хем несаве мануша чак понашинена пе грубо пле фамилијаја. Адалеске ни хари на изненадинела амен кај о мануша дарана јекх јекхестар! Сар користинела о Сатана акаја дар те шај те перавел амен?

11-12. Сар о Сатана користинела и дар таро мануш против аменде?

¹¹ О Сатана користинела и дар таро мануш те шај те чхинавел амен те проповедина хем те кера адава со родела амендар о Јехова. Ов влијајнѓа упро бут владе те шај те забранинен амаре активностија хем те прогонинен амен (Лука 21:12; Отк. 2:10). Ко е Сатанаскоро свето бут мануша намерно ширинена погрешна информацие хем ховајба башо е Јеховаскере сведокија. Окола со верујнена ко асавке ховајба шај те асан аменге или чак физички те нападинен амен (Мат. 10:36). Дали ваљани те ова изненадиме таро е Сатанаскере тактике? Ни хари. Ов керела сине више о иста буќа ко прво веко (Дела 5:27, 28, 40).

¹² И дар таро противибе е властенгоро нане и единствено бути со користинела ла о Сатана. Несаве бут повише дарана таро адава сар ка реагиринел ленгири фамилија башо чачипе него те овен малтретириме. Бут мангена пумаре фамилија хем мангена ола да те запознајнен е Јехова хем те заманген ле. Нане ленге са јекх кеда ленгири фамилија керела лошно лафи башо Јехова хем башо лескере слуге. Ама ко несаве случаија несаве тари фамилија со ко почеток противинена пе сине покасно прифатинѓе о чачипе. Ама со ако амари фамилија на мангела те овел ла контакт аменцар адалеске со улем Сведокија? Сар ка реагирина?

13. Сар адава со ка ова увериме ко е Девлескоро мангипе ка поможинел амен ако амари фамилија отфрлинела амен? (Псалм 27:10).

¹³ О лафија таро Псалм 27:10 шај бут те утешинен амен. (Читин.) Ако на бистраја кобор бут о Јехова мангела амен нане те дара таро прогонство. Хем увериме сием кај ов ка наградинел амен баши амари истрајност. О Јехова бут пошукар таро било кој јавер ка грижинел пе башо амаре физичка, емоционална хем духовна потребе. О Биниам коле со спомнинѓем ле англедер баш адава доживинѓа.

14. Со шај те сикљове таро Биниам?

¹⁴ О Биниам уло Сведоко иако џанља кај ки лескири пхув е Јеховаскере сведокија тане прогониме. Те дикха сар адава со џанља кај о Јехова мангела ле поможинѓа леске те побединел и дар таро мануш. Ов вакерела: „О прогонство сине бут полошно таро адава со мислинѓум манге, ама бут повише дарандиљум таро мле фамилијакоро противибе. Дарава сине кај мо дад бут ка разочаринел пе кеда ка шунел кај анѓум одлука те овав Сведоко, хем исто аѓаар дарава сине кај мли фамилија нане те поштујнел ман више“. Ама о Биниам сине уверимо кај о Јехова секогаш грижинела пе околенге со мангела лен. Ов понадари вакерела: „Размислинава сине башо адава сар о Јехова поможинѓа е јаверенге те истрајнен кеда сине лен финансиска проблемија, кеда доживинѓе предрасуде хем насилство. Џанљум кај ако ачховава верно е Јеховаске ов ка наградинел ман. Кеда сиум сине пханло повише пути хем чак мучимо, ки ми кожа осетинѓум сар о Јехова секогаш поможинела аменге ако ачховаја леске верна“. О Јехова уло Дад е Биниамеске, а о пхраља хем о пхења уле леске хас фамилија.

И ДАР ТАРО МЕРИБЕ

15. Соске тано нормално те дара таро мерибе?

¹⁵ И Библија вакерела кај о мерибе тано душмани (1. Кор. 15:25, 26). Шај дараја кеда размислинаја башо мерибе, посебно кеда амен или некој таро амаре мангле тано бут насвало. Соске дараја таро мерибе? Адалеске со о Јехова створинѓа амен желбаја те живина вечно (Проп. 3:11). Ама и урамнотежено дар таро мерибе шај те поможинел аменге те аракха амаро састипе. На пример, ој поттикнинела амен те пазина со хаја, те вежбина хем кеда тано потребно те џа ко доктори хем те ла иљачија хем исто аѓаар те на чхива амаро живото бизо потреба ки опасност.

16. Сар пробинела о Сатана те искористинел амари дар таро мерибе?

¹⁶ О Сатана џанела кај ценинаја амаро живото. Адалеске ов вакерела кај ка жртвујна са со иси амен па чак амаро амалипе е Јеховаја само те шај те ачхова џивде (Јов 2:4, 5). Ама нане ле право! Сепак адалеске со ов тано адава со „иси ле и моќ те анел џи ко мерибе“, о Сатана користинела амари природно дар таро мерибе те шај те цида амен таро Јехова (Евр. 2:14, 15). Ко несаве случаија користинела манушен те заканинен пе кај ка мударен е Јеховаскере слуген ако на откажинена пе тари пумари вера. Или, понекогаш шај те искористинел несави итно медицинско ситуација те шај те чхивел амен те ана несави погрешно одлука. Шај несаве докторија или некој тари фамилија со нане ко чачипе ка керен аменге притисок те пхага е Девлескоро закони адалеа со ка примина рат. Или некој шај ка мангел те убединел амен те прифатина несаве терапие кола сој тане против о Библиска начелија.

17. Спрема Римјаните 8:37-39, соске на ваљани те дара таро мерибе?

¹⁷ Иако на мангаја те мера амен џанаја кај о Јехова понадари да ка мангел амен, чак хем те случинел пе адава. (Читин Римјаните 8:37-39.) Кеда е Јеховаскере амала мерена ов на бистрела лен соске леске сар те пхене панда тане џивде (Лука 20:37, 38). Ов едвај аџикерела те иранел лен палем ко живото (Јов 14:15). О Јехова платинѓа бари цена те шај те овел амен вечно живото (Јован 3:16). Амен џанаја кај о Јехова бут мангела амен хем кај грижинела пе аменге. Адалеске, наместо те цида амен таро Јехова кеда сием насвале или шај чак ка мера, амен ваљани те рода лестар утеха, мудрост хем сила. Баш адава керѓа и Валери хем лакоро ром (Пс. 41:3).

18. Со шај те сикљове тари Валери?

¹⁸ Кеда сине ла 35 берш, и Валери откринѓа кај тани насвали тари ретко врста рако кова со сигате напредујнела. Те дикха сар о мангипе таро Јехова поможинѓа лаке те побединел и дар таро мерибе. Ој вакерела: „Кеда дознајнѓем кај иси ман рако, амаро живото менинѓа пе таро јекх пути. Ваљани сине те керен ман бари операција те шај те ачховав ко живото. Керѓум лафи буте докторенцар ама сарине одбинѓе те керен ман операција бизо рат. Ама башо е Девлескоро закони на мангљум те прифатинав рат! Цело мло живото о Јехова сикавѓа манге кобор мангела ман, а акана ман иси ман прилика те сикавав леске кобор мангава ле. Секова пути кеда ка шунав сине нешто лошно таро докторија сиум сине панда поодлучно те керав е Јехова бахтало хем те на мукхав о Сатана те побединел. Ко крајо керѓе ман операција бизо рат хем адава успешно! Иако ме понадари да сиум насвали, о Јехова секогаш денѓа ман адава со ваљани манге. На пример ко јекх таро амаре состанокија, о викенд англедер те дознајнав кај иси ман рако, проучинѓем и статија ’Храбро да се соочиме со денешните проблеми‘.c Акаја статија бут утешинѓа амен, хем често читинаја ла. Асавке статие хем и шукар духовно рутина поможинѓе те овел ман хем мле роме андруно мир, те ачхова урамнотежена хем те ана шукар одлуке“.

ТЕ ПОБЕДИНА АМАРИ ДАР

19. Со ка случинел пе панда хари?

¹⁹ Адалеске со о Јехова поможинѓа ленге, бут пхраља таро цело свето издржинѓе ко пхаре ситуацие хем успешно противинѓе пе е Сатанаске (1. Пет. 5:8, 9). Ту да шај те кере адава! Панда хари о Јехова ка вакерел е Исусеске хем околенге со владинена леа „те уништинен о буќа со керѓа о Бенг“ (1. Јов. 3:8). Панда хари е Девлескере слуге ки пхув нане „никастар те даран“ хем нане те овел лен причина состар те даран (Иса. 54:14; Мих. 4:4). Ама џи тегани ваљани бут те трудина амен те шај те победина и дар.

20. Со ка поможинел аменге те победина амари дар?

²⁰ Мора понадари да те уверина амен кај о Јехова мангела хем заштитинела пле слуген. Ко адава бут ка поможинел аменге ако хор размислинаја хем кераја лафи башо адава сар о Јехова заштитинѓа пле слуген англедер. Хем на ваљани те бистра сар о Јехова поможинѓа аменге лично кеда сием сине ко пхаре ситуацие. Кеда о Јехова поможинела амен тегани шај те победина амари дар! (Пс. 34:4).