3 | Сар шај те поможинен амен о примерија тари Библија
КИ БИБЛИЈА ПИШИНЕЛА БАШО... Верна мурша хем џувља кола со сине лен „иста чувствија сар амен“ (ЈАКОВ 5:17, фуснота.)
Со значинела акава
Ки Библија тане пишиме чачутне искуствија таро мурша хем џувља кола со боринена пе сине различна чувствонцар. Џикоте читинаја акала искуствија, шај ка дикха кај некој лендар сине ле иста чувствија сар аменде.
Сар шај акава те поможинел аменге
Сарине иси амен потреба о јавера те хаљовен сар осетинаја амен. Ама, акава тано посебно важно кеда иси амен проблемија амаре емоционално састипаја. Џикоте читинаја и Библија дознајнаја кај јавера да размислинена сине хем осетинена пе сине исто сар аменде. Хаљоваја кај ола да боринена пе сине иста проблеменцар, а адава керела те на осетина амен коркори кеда боринаја амен негативно чувствонцар кола со вознемиринена амен.
Ки Библија тане пишиме бут изјаве таро мануша кола со осетинѓе пе коркори хем разочариме. Дали некогаш вакерѓан туке: „Нашти више те издржинав?“ О Мојсеј, о Илија хем о Давид аѓаар осетинѓе пе (4. Мојсеева 11:14; 1. Царевите 19:4; Псалм 55:4).
Ки Библија пишинела баши јекх џувли која со викинела пе сине Ана. Ој сине бут разочарими адалеске со нашти сине те овен ла чхаве. А исто аѓаар, мора сине те трпинел пле ромескере дујто ромња која со вреџинела ла сине хем асала лаке сине башо лакоро проблеми (1. Самоилова 1:6, 10).
И Библија керела лафи башо јекх мануш кова со викинела пе сине Јов. Иако сине ле силно вера ко Девел, ле сине ле бари емоционално дукх со чак вакерѓа: „Бктинѓум таро мло живото, на мангава више те живинав“ (Јов 7:16).
Адалеа со ка дознајна сар акала личностија успешно боринѓе пе акале негативно мисленцар, ка дел амен и потребно сила амен да те борина амен амаре проблеменцар.