Помош е џувленге сој тане малтретириме

Аѓаар почминела и статија ки jw.org е насловеа „И безбедност е џувленгири — со вакерела и Библија“. Ко крајо тари статија иси јекх линк преку кова со шај те пераве ла ко PDF формати хем пало адава шај те принтине ла хем те паќарела ла сар трактати таро штар стране. Јекх пхен тари Америка, со викинела пе Стејси, вакерела: „Принтинѓум некобор примерокија, а пало адава заедно јекхе пхењаја ингарѓем лен ко јекх центар баши грижа џувленге со сине малтретириме, кова со аракхљола ко амаро подрачје“.

Јекх таро адала со керела сине бути атхе, пучља дали шај те добинел панда примерокија те шај те дел околенге со живинена адатхе. Саво сине о резултати? Сине денде панда 40 асавке трактатија хем 30 визит-картичке баши jw.org. Ки јекх прилика, и управителка таро адава центар мангља о Сведокија те сикавен е џувленге кола со живинена атхе сар шај те проучинен и Библија.

И Стејси хем дуј јавера пхења доживинѓе нешто слично ко јекх јавер центар, коте со о работникија леле панџ примерокија таро трактати хем родинѓе панда. Јекх таро работникија вакерѓа: „Акава трактати ка поможинел е џувленге акате“. Исто аѓаар вакерѓа: „Акава ваљанела аменге“. Кеда о пхења палем геле ко адава центар баши грижа, несаве таро адала џувља мангле те дикхен сар изглединела јекх библиско курси, а дуј лендар вакерѓе кај о јавер викенд мангена те џан ко состанок ки дворана е Јеховаскере сведоконгири.

И Стејси вакерела: „Воодушевиме сием таро адава кобор шукар реагиринѓе о мануша кеда добинѓе акаја бут шужи статија. Кеда ка принтинел пе хем ка паќарел пе, адалеа ко јекх шукар начин шај те вакерел пе о шукар хабери башо Царство е џувленге со сине малтретириме. Бут погодинѓа амен адава со бут шукар реагиринѓе кеда читинѓе акаја статија. Едвај аџикераја те дикха сар о Јехова ка благословинел амаро трудо џикоте понадари да вакераја о шукар хабери акале џувленге“.