Икер „о јекхипе кова со добинела пе преку е Девлескири сила“
О АПОСТОЛ Павле поттикнинѓа е христијанен ко Ефес акале лафенцар: „Мангипаја трпинен тумен јекх јекхеа хем искрено трудинен тумен те икерен о јекхипе кова со добинела пе преку е Девлескири сила“ (Еф. 4:2, 3).
О јекхипе со постојнела машкар аменде тано плоди со авела тари „е Девлескири сила“. Акава значинела кај иси јекхипе адалеске со о Девел дела пли сила. Сепак, сар со вакерѓа о Павле амаро јекхипе ваљани те икерел пе. Кој ваљани те икерел ле? Уствари секова христијани мора те дел пло дела те шај те икерел пе „о јекхипе кова со добинела пе преку е Девлескири сила“.
Те вакера јекх пример. Замислин туке кај некој поклонинела туке нево врда. Кој тано одговорно башо врда те ачхол ки шукар состојба? О одговор тано јасно. Нашти те вакере кај тано криво окова со денѓа тут о врда ако ов руминѓола адалеске со ту на одржинѓан ле.
Слично, иако амаро христијанско јекхипе тано поклон таро Девел, секоле јекхе амендар иси ле одговорност те аракхел адава јекхипе. Ако на сием ко шукар односија несаве пхралеа или пхењаја, тегани ваљани те пуча амен: „Дали дава мло дело те шај те икерел пе о јекхипе ко собрание?“
„ИСКРЕНО ТРУДИНЕН ТУМЕН ТЕ ИКЕРЕН О ЈЕКХИПЕ“
Сар со спомнинѓа о апостол Павле, понекогаш шај ка ваљани те трудина амен бут те шај те икера о јекхипе кова со добинела пе преку е Девлескири сила. Акава посебно шај те случинел пе ако несаво пхрал или пхен поврединела амен. Те шај те икера о јекхипе дали ка ваљани секова пути те кера лафи башо проблеми адалеа со поврединѓа амен? На! Пуч тут: „Ако керава адава дали и ситуација ка овел пошукар или само ка керав те овел полошно?“ Понекогаш шај ка овел пошукар те простина хем те бистра адава (Изр. 19:11; Мар. 11:25).
Пуч тут: „Ако керава адава дали и ситуација ка овел пошукар или само ка керав те овел полошно?“
Сар со вакерѓа о апостол Павле, ваљани мангипаја те трпина амен јекх јекхеа (Еф. 4:2). Ко јекх лил пишинела кај акава шај те превединел пе хем сар „те прифатина е јаверен аѓаар сар сој тане“. Адава значинела кај ваљани те прифатина кај амаре пхраља хем пхења керена грешке исто сар амен. Џанѓола пе, амен трудинаја амен те урава „и неви личност“ (Еф. 4:23, 24). Ама, никој нашти адава те керел совршено (Рим. 3:23). Ако прифатинаја акава ка овел аменге полокхо те трпина амен јекх јекхеа, те простина аменге хем адалеа те икера „о јекхипе кова со добинела пе преку е Девлескири сила“.
Ако простинаја хем бистраја о буќа коленцар со некој поврединѓа амен, ка икера о мир кова со поврзинела амен ко собрание. О грчко лафи сој преведимо сар „овен ко мир јекх јекхеа“ ко Ефешања 4:3 дословно значинела „лигаментија“. О исто грчко лафи ко Колошања 2:19 ки фуснота тано преведимо сар „лигаментија“. О лигаментија тане зорале жиле ко тело кола со поврзинена о кокала машкар песте. Слично, о мир ама хем о мангипе спрема амаре пхраља, поможинена аменге те ачхова паше ленцар иако иси разлике машкар аменде.
Спрема адава, ако несаво пхрал поврединела тут, вознемиринела тут или нервиринела тут, трудин тут те хаљове ле, а на те критикујне ле (Кол. 3:12). Адалеске со са о мануша тане несовршена, веројатно ту да поврединѓан некас. Ако на бистреа акава, ка овел туке полокхо те де тло дело те шај те икерел пе „о јекхипе кова со добинела пе преку е Девлескири сила“.