Ту сиан скапоцено е Јеховаске!

1-2. Со шај те поможинел амен те уверина амен кај сием скапоцена англо е Девлескере јакхја?

О ЈЕХОВА ко пле слуге дикхела сар скапоцена. Ама несаве лендар осетинена пе кај на врединена. Ола шај осетинена пе аѓаар адалеске со некој понашинѓа пе бут лошно ленцар. Дали ту да осетинеа тут аѓаар? Ако оја, со шај те поможинел туте те уверине тут кај тут сиан скапоцено англо е Јеховаскере јакхја?

² Јекх бути која со шај те поможинел туке тани ако размислинеа башо библиска извештаија кола со сикавена сар о Јехова мангела те дикха ко мануша хем сар те понашина амен ленцар. Лескоро Чхаво, о Исус, поштујнела сине е манушенгоро достоинство хем сине љубезно ленцар. Адалеа сикавѓа кај леске хем лескере Дадеске тане бут скапоцена окола со мислинена кај на врединена бут (Јован 5:19; Евр. 1:3). Ки акаја статија ка дикха: 1) сар о Исус поможинѓа е манушенге те хаљон кобор врединена хем 2) сар шај те уверина коркори амен кај чаче сием скапоцена англо е Девлескере јакхја (Агеј 2:7).

САР О ИСУС ПОМОЖИНЃА Е МАНУШЕНГЕ ТЕ ХАЉОВЕН КОБОР ВРЕДИНЕНА

3. Сар о Исус понашинѓа пе е манушенцар тари Галилеја кола со але ки лесте те поможинел лен?

³ Џикоте о Исус о трито пути проповединела сине ки Галилеја, бут мануша але те шунен ле хем ов те сасљарел лен. О Исус дикхља кај ола сине „мучиме хем отфрлиме сар бакхре бизо пастири“ (Мат. 9:36). Ленгере верска водачија дикхена сине ки ленде сар потеле пестар, па чак викинена лен сине народо кова сој „дендо арман“ (Јован 7:47-49). Ама о Исус понашинела пе сине ленцар љубезно хем поштујнела лен сине аѓаар со одвојнела ленге сине време те сикавел лен хем те сасљарел лен таро ленге насвалипа (Мат. 9:35). Освен адава, те шај те поможинел повише манушенге, ов сикавѓа пле апостолен те проповединен хем денѓа лен власт те сасљарен е насвален (Мат. 10:5-8).

4. Со сикљоваја таро адава сар о Исус понашинѓа пе е манушенцар кола со сине отфрлиме таро јавера?

⁴ Адалеа со о Исус понашинела пе сине љубезно е манушенцар хем поштујнела лен сине, сикавѓа кај ов хем лескоро Дад дикхена сар скапоцено околенде кас со обично о јавера отфрлинена. Ако служинеа е Јеховаске, ама боринеа тут е чувствоја кај на врединеа, размислин башо адава кобор внимание сикавѓа о Исус е понизна манушенге кола со мангена сине те сикљон лестар. Адава ка поможинел туке те хаљове кобор сиан скапоцено е Јеховаске ко јакхја.

5. Вакер ко саве околностија аракхљола сине јекх џувли тари Галилеја кола со аракхља ла о Исус.

⁵ О Исус на сикавела сине само е манушен ко групе него хем сикавела сине внимание несаве џененге лично да. На пример, џикоте проповединела сине ки Галилеја, ов дикхља јекхе џувља која со 12 берш крваринела сине (Мар. 5:25). Адалеске со спрема о Закони ој сине нечисто, секој со ка пипинел ла сине овела нечисто. Адалеске, ој на смејнела сине те овел паше узо јавера мануша хем веројатно почесто сине коркори. Освен адава, нашти сине те обожавинел е Јехова заедно е јаверенцар ки синагога или кеда сине празникија (3. Мој. 15:19, 25). Сигурно адаја џувли цидинѓа бут муке хем ко физичко хем ко емоционално поглед (Мар. 5:26).

6. Со керѓа и џувли која со крваринела сине те шај овел сасљарди?

⁶ Адаја мучими џувли мангља о Исус те сасљарела ла. Ама, на родинѓа лестар директно адава. Соске? Шај лаџала сине тари пли ситуација. Или шај дарала сине кај о Исус ка кривинел ла адалеске со сине нечисто хем на ваљани сине те мешинел пе е манушенцар. Адалеске само пипинѓа лескири наметка соске сине уверими кај адава ка сасљарел ла (Мар. 5:27, 28). Адалеске со сикавѓа вера, ој састили. Пало адава, о Исус пучља кој пипинѓа ле, хем и џувли признајнѓа кај ој керѓа адава. Сар понашинѓа пе лаја о Исус?

7. Сар понашинѓа пе о Исус е џувљаја кола со сине ла баре муке? (Марко 5:34).

⁷ О Исус понашинѓа пе љубезно е џувљаја хем сикавѓа кај поштујнела ла. Ов дикхља кај ој „тресинела сине тари дар“ (Мар. 5:33). Адалеске со џанела сине сар ој осетинела пе, ов утешинѓа ла пле лафенцар, чак вакерѓа лаке „ми чхај“. Адалеа на само со сикавѓа лаке поштовање него сине лаја обѕирно хем сикавѓа лаке мангипе. (Читин Марко 5:34.) Акава тано о единствено тхан ки Библија коте со о Исус вакерѓа несаве џувљаке „ми чхај“. О Исус веројатно користинѓа акава љубезно лафи ки адаја ситуација адалеске со дикхља кај и џувли бут дарала сине. Замислин кобор локхило лаке. Те на утешинел ла сине о Исус пле лафенцар ој шај сине ка џал песке сасљарди ко физичко поглед, ама ко емоционално поглед ка овел лаке сине бут пхаро адалеске со ка мучинел ла сине о чувство кај керѓа грешка адалеске со пипинѓа е Исусескири наметка хем со сине машкар ко мануша. Наместо адава, о Исус поможинѓа лаке те дикхел ки песте аѓаар сар со чаче тани — скапоцено чхај пле небесно Дадеске кова сој пхердо мангипе.

8. Саве пхарипа сине јекхе пхења таро Бразил?

⁸ Авдиве да несавен таро е Девлескере слуген иси лен проблемија састипаја хем адалеске шај те обесхрабринен пе хем те мислинен кај на врединена. И Марија,a јекх пхен таро Бразил, која со служинела сар општо пионери, бијандили бизо дуј пре хем бизо лево вас. Ој вакерела: „Ки школа лена ман сине ки хајгара адалеске со сиум сакати. Чхивена манге сине анава кола со вреџинена ман. Па чак хем тари мли фамилија сиум сине понижими“.

9. Со поможинѓа е Маријаке те хаљол кај ој тани скапоцено е Јеховаске?

⁹ Со поможинѓа е Маријаке? Кеда ули е Јеховаскоро сведоко, о пхраља хем о пхења утешинѓе ла хем поможинѓе лаке те дикхел ки песте аѓаар сар со дикхела о Јехова ки лате. Ој вакерела: „Ко мло тефтери нане ман добором стране те шај те пишинав сариненгере анава кола со поможинѓе ман. Благодарно сиум е Јеховаске хор таро мло вило адалеске со денѓа ман добором шукар духовно фамилија“. О пхраља хем о пхења поможинѓе е Маријаке те хаљол кај ој тани бут скапоцено е Јеховаске ко јакхја.

10. Саво проблеми сине е Марија Магдалена? (Дикх хем о слике.)

¹⁰ Те дикха сар о Исус поможинѓа јекхе јавере џувљаке — и Марија Магдалена, кола со сине ла ефта демонија (Лука 8:2). Ој веројатно понашинела пе сине чудно адалеске со сине демонизирими хем башо адава шај о јавера избегинена ла сине. Ко адава пхаро периоди таро лакоро живото, ој сигурно бут дарала сине хем мислинела сине кај никој на мангела ла хем никој нашти те поможинел лаке. Најверојатно, о Исус цидинѓа латар е демонен со мучинена ла сине хем ој ули лескоро верно следбенико. Ко саво јавер начин о Исус поможинѓа е Марија Магдаленаке те хаљовел кај тани скапоцено е Девлеске?

11. Сар о Исус сикавѓа е Марија Магдаленаке кај тани скапоцено е Девлеске? (Дикх хем о слике.)

¹¹ О Исус викинѓа е Марија Магдалена те џал леа хем лескере апостоленцар џикоте проповединена сине таро гав ко гав.b Аѓаар ка шај сине те шунел џикоте ов сикавела е јаверен. Исто аѓаар о Исус појавинѓа пе лаке о исто диве откеда воскреснинѓа. Ој сине јекх таро прва ученикија коленцар со о Исус керѓа лафи адава диве. Чак денѓа ла задача те вакерел лескере апостоленге кај ов воскреснинѓа. Адалеа о Исус поможинѓа ла те хаљовел кај ој чаче тани скапоцено е Јеховаске! (Јован 20:11-18).

12. Објаснин соске и Лидија осетинела пе сине отфрлими.

¹² Исто сар и Марија Магдалена, бут џене авдиве да осетинена пе отфрлиме таро јавера. Јекх пхен, тари Шпанија со викинела пе Лидија, вакерела кај англедер те бијанѓовел лакири дај размислинела сине те керел абортус. Ој сетинела пе кај панда џикоте сине бут тикни, и дај лакири на грижинела пе сине лаке хем вакерела сине лаке бут пхаре лафија. И Лидија вакерела: „Адалеске со ми дај на сикавела сине манге мангипе, бут мангава сине о јавера те прифатинен ман хем те манген ман. Дарава сине кај никогаш нане те заслужинав асавко мангипе соске ми дај керѓа те мислинав кај сиум лошно мануш“.

13. Со поможинѓа е Лидијаке те хаљол кај тани скапоцено е Јеховаске?

¹³ Кеда и Лидија почминѓа те проучинел и Библија, о буќа менисалиле. Адава со молинела пе сине е Јеховаске, читинела сине и Библија ама хем о љубезна лафија хем постапке е пхраленгере хем е пхењенгере поможинѓе ла те хаљол кај ој тани скапоцено ко е Девлескере јакхја. И Лидија вакерела: „Мо ром често вакерела манге кобор бут мангела ман. Ов секогаш сетинкерела ман ко мле шукар особине. Ама јавера да паше амала керена о исто“. Шај ли те сетине тут некасте со ваљани леске помош те шај те хаљовел кобор тано скапоцено ко е Јеховаскере јакхја?

СО КА ПОМОЖИНЕЛ АМЕН ТЕ ДИКХА КИ АМЕНДЕ САР СО ДИКХЕЛА О ЈЕХОВА

14. Сар и 1. Самоилова 16:7 поможинела амен те дикха ки аменде сар со дикхела о Јехова? (Дикх хем и рамка „Соске е Јеховаске тано скапоцено лескоро народо?“)

¹⁴ Ма бистре кај о Јехова на дикхела ки туте сар со дикхена о мануша ко свето. (Читин 1. Самоилова 16:7.) Ов на дикхела кобор ту врединеа спрема адава сар изглединеа, кобор паре иси тут или кобор бари школа иси тут (Иса. 55:8, 9). Адалеске, ма мерин тли вредност спрема о мерилија е светоскере, него спрема е Јеховаскере мерилија. Шај те читине библиска извештаија колендар со дикхјола кај о Јехова ценинела околен со понекогаш осетинена пе кај на врединена, сар на пример о Илија, и Ноемина хем и Ана. Исто аѓаар, шај те пишине несаве ситуацие таро тло живото кола со сикавена кај о Јехова чаче мангела тут хем ценинела тут. Освен адава, шај те истражине ко амаре публикацие башо теме сар на пример сар те поштујне повише коркори тут хем башо чувство кај на врединеа.c

15. Соске о Даниел сине скапоцено е Јеховаске? (Даниел 9:23).

¹⁵ Редовно сетинкер тут ко адава кај ту сиан скапоцено е Јеховаске адалеске со сиан верно. Ки јекх прилика, кеда е Даниеле најверојатно сине ле скоро шел берш, осетинѓа пе бут уморно хем обесхрабримо (Дан. 9:20, 21). Сар о Јехова охрабринѓа ле? Ов бичхалѓа е ангеле е Габриеле те сетинкерел е Даниеле кај ов тано „бут мангло е Девлеске“, јавере лафенцар кај ов тано скапоцено е Девлеске хем кај о Девел шунѓа лескере молитве. (Читин Даниел 9:23.) Соске о Даниел сине бут скапоцено е Девлеске? Адалеске со е Даниеле сине ле шуже особине, сар на пример ов сине праведно хем верно (Езек. 14:14). О Јехова мукхља те овел пишимо акава извештај ко пло Лафи те шај те утешинел амен (Рим. 15:4). О Јехова шунела тле да молитве хем адалеске со кереа адава сој тано исправно хем сиан верно, ту сиан леске скапоцено (Мих. 6:8; Евр. 6:10).

16. Со шај те поможинел туке те дикхе ко Јехова сар Дад кова со бут мангела тут?

¹⁶ Дикх ко Јехова сар Дад кова со мангела тут. Ов мангела те поможинел туке, а на те аракхел туке грешке (Пс. 130:3; Мат. 7:11; Лука 12:6, 7). Адава со размислинѓе башо акава поможинѓа бутенге кола со боринена пе мисленцар кај на врединена. На пример, размислин баши јекх пхен тари Шпанија која со викинела пе Мишел. Ој осетинела пе сине отфрлими хем кај нане корисно адалеске со бершенцар лакоро ром вакерела лаке сине пхаре лафија кола со дукхавена ла. Ој вакерела: „Секогаш кеда осетинава ман сине кај на сиум корисно, трудинава ман сине те замислинав манге е Јехова сар лела ман ки пли ангали, сикавела манге мангипе хем заштитинела ман“ (Пс. 28:9). И Лорен, јекх пхен тари Јужноафриканско Република, сетинела пе: „Штом о Јехова љубезно анѓа ман ки песте хем поможинѓа манге те ачховав паше леа са акала берша, чак користинела ман те сикавав е јаверен, тегани ов сигурно дикхела ки манде кај сиум скапоцено хем корисно“ (Јован 6:44).

17. Со шај те поможинел туке те уверине тут кај о Јехова одобринела тут? (Псалм 5:12; дикх хем и слика.)

¹⁷ Ов уверимо кај о Јехова одобринела тут. (Читин Псалм 5:12.) О Давид спорединѓа е Јеховаскоро одобрување јекхе „баре штитеа“ кова со заштитинела е праведна манушен. Адава со џанеа кај иси тут е Јеховаскоро одобрување хем ов поддржинела тут шај те овел туке сар штити кеда ка почмине те нападине коркори тут негативна мисленцар кај ту на врединеа. Сар шај те џане кај о Јехова одобринела тут? Сар со више дикхлем о Јехова денѓа амен и Библија те шај те вакерел аменге сар ов дикхела ки аменде. Освен адава ов користинела е старешинен, амаре паше амален хем е јавере манушен те шај те сетинкерел амен кај амен сием скапоцена леске ко јакхја. Сар ваљани те реагирине кеда некој охрабринела тут?

18. Соске ваљани те прифатина о пофалбе таро јавера?

¹⁸ Ма отфрлин о искрена пофалбе таро окола со пенџарена тут хем мангена тут. Ма бистре кај шај о Јехова користинела лен те шај те поможинел туке те уверине тут кај иси тут лескоро одобрување. И Мишел, која со спомнинѓем ла англедер, вакерела: „Хари по хари, сикљовава те прифатинав о шуже лафија со вакерена лен манге о јавера. Пхаро манге те верујнав кај о шукар буќа со вакерена лен баши манге тане чаче, ама џанава кај о Јехова мангела те верујнав ко адава“. Исто аѓаар, о старешине љубезно поможинѓе лаке те дикхел кај о Јехова мангела ла. Акана ој служинела сар пионери хем поможинела ко Бетел.

19. Соске шај те ове уверимо кај ту сиан скапоцено е Девлеске ко јакхја?

¹⁹ О Исус љубезно сетинкерела амен кај сием бут важна амаре небесно Дадеске (Лука 12:24). Адалеске шај те ова увериме кај амен сием скапоцена е Јеховаске. Никогаш на ваљани те бистра акава. Хем те да са амендар те шај те поможина е јаверенге те дикхен кобор ола тане скапоцена е Девлеске ко јакхја.