Амаро сочувствително Првосвештенико о Исус

1-2. а) Соске о Јехова бичхалѓа пле Чхаве ки пхув? б) Со ка дикха ки акаја статија? (Евреија 5:7-9).

Англедер околу 2.000 берша, о Јехова о Девел бичхалѓа пле најскапоцено Чхаве ки пхув. Соске? Јекх причина сине те ослободинел са е манушен таро грево хем таро мерибе хем те цидел са и штета со керѓа о Сатана (Јован 3:16; 1. Јов. 3:8). Исто аѓаар, о Јехова џанља кај адава со о Исус ка доживинел сар мануш ка спреминел ле те овел амаро сочувствително Првосвештенико. О Исус почминѓа те служинел сар Првосвештенико откеда крстинѓа пе ко 29 берш тари а.е.a

² Ки акаја статија ка дикха сар адава со Исус живинѓа сар мануш ки пхув спреминѓа ле те овел сочувствително Првосвештенико. Бут тано важно те хаљова акава соске аѓаар ка овел аменге полокхо те молина амен е Јеховаске хем те ова паше леа, посебно кеда сием обесхрабриме таро амаре гревија или слабостија. (Читин Евреија 5:7-9.)

Е ДЕВЛЕСКОРО МАНГЛО ЧХАВО АВЕЛА КИ ПХУВ

3-4. Саве баре промене сине е Исусе кеда ало ки пхув?

³ Буте џененгере околностија менинѓе пе. На пример, шај мора сине те мукха о тхан коте со барилем хем те мукха амаре фамилија хем амален колен бут мангаја лен. Нане локхо те кера асавке промене. Ама, нијекхе мануше на сине ле добором баре промене сар е Исусе. Ов сине о прво хем о најважно ангели ко небо. Ов сине бут мангло таро Јехова хем сине секогаш радосно адалеске со керела сине бути директно пле Дадеа (Пс. 16:11; Изр. 8:30). Сепак, ко Филипјања 2:7 пишинела кај спремно „откажинѓа пе таро са со сине ле“, јавере лафенцар откажинѓа пе тари пли бари положба ко небо те шај те живинел машкар несовршена мануша ки пхув.

⁴ Исто аѓаар, размислин башо прва берша е Исусескере ки пхув. Ов бијандило ки чороли фамилија. Адава дикхјола тари скромно жртва со денѓе лескере родителија откеда бијандило (3. Мој. 12:8; Лука 2:24). Кеда о лошно цари о Ирод дознајнѓа кај о Исус бијандило, пробинѓа те мударел ле. Те шај те спасинел е Исусескоро живото, лескири фамилија нашља ко Египет хем ачхили атхе некобор време (Мат. 2:13, 15). Чаче, о живото е Исусескоро ки пхув скроз разликујнела пе сине таро лескоро живото ко небо!

5. Со дикхља о Исус џикоте сине ки пхув, хем сар адава спреминѓа ле баши лескири улога сар Првосвештенико? (Дикх хем и слика.)

⁵ Џикоте сине ки пхув, о Исус сегде дикхела сине манушен кола со цидена сине муке. Ов ки пли кожа осетинѓа со значинела те мерел тутар тло пашутно, адалеске со муло лескоро очуво о Јосиф. Освен адава, о Исус дикхља манушен колен со сине лен лепра, кола со сине короле, парализириме хем родителија коленгере чхаве муле хем ов хаљола сине сар и ленге (Мат. 9:2, 6; 15:30; 20:34; Мар. 1:40, 41; Лука 7:13). Точно тано кај о Исус дикхља манушен кола со цидена муке панда џикоте сине ко небо, ама сар мануш ки пхув шај сине пошукар те хаљол сар ола осетинена пе (Иса. 53:4). Адава со доживинѓа ки пхув, поможинѓа леске те хаљол о чувствија хем о дукха са е манушенгере. Коркори ов осетинѓа со значинела те овел пе уморно, вознемиримо хем тажно, нешто сој тано нормално е манушенге.

О ИСУС СИКАВЕЛА СОЧУВСТВО Е МАНУШЕНГЕ

6. Со сикљоваја таро адава со пророкујнѓа о Исаија башо е Исусескоро сочувство? (Исаија 42:3).

⁶ Џикоте керела сине пли служба, о Исус сикавѓа баро сочувство околенге со сине слаба хем спрема окола со постапинела пе сине ленцар лошно. Адалеа, ов исполнинѓа јекх пророштво. Ко Хебрејска списија, о успешна хем о силна мануша понекогаш тане споредиме јекхе градинаја која сој шукар вадими или баре зорале каштенцар (Пс. 92:12; Иса. 61:3; Ерем. 31:12). Ама окола со сине чороле, на сине кој те заштитинел лен хем коленцар со постапинела пе сине неправедно, тане споредиме газиме трскаја хем фитилеа со иси ле бут хари јаг (Читин Исаија 42:3; Мат. 12:20). Водимо тари е Девлескири сила, о пророко о Исаија користинѓа акала примерија те шај те пророкујнел саво мангипе хем сочувство ка сикавел о Исус е манушенге таро обично народо коленде со о јавера дикхена сине сар некој со на врединела.

7-8. Сар о Исус исполнинѓа адава со пророкујнѓа о Исаија?

⁷ Ко пло евангелие, о Матеј вакерѓа кај о Исус исполнинѓа акала лафија таро Исаија: „И газими трска нане те пхагел ла хем о фитили со иси ле бут хари јаг нане те ачхавел ле“. О Исус керѓа бут чудија башо окола со сине малтретириме таро јавера хем осетинена пе сине сар газими трска хем башо окола со сине бизи надеж хем осетинена пе сине сар фитили со иси ле бут хари јаг. На пример, о Исус аракхља јекхе мануше кова со сине пхердо лепраја. Адале мануше сигурно на сине ле нисави надеж кај некогаш ка сасљол или кај некогаш ка шај палем те овел заедно пле фамилијаја хем амаленцар (Лука 5:12, 13). Ки јавер прилика, о Исус аракхља јекхе мануше кова со сине кашуко хем кова со на керела сине шукар лафи. Замислин туке сар осетинела пе сине адава мануш кеда дикхела сине сар о јавера керена лафи, а ов нашти сине ништо те хаљол (Мар. 7:32, 33). Ама, адава нане са.

⁸ Ко време е Исусескоро, бут Евреија верујнена сине кај околен со иси лен несаво насвалипе или хендикеп тане казниме башо пле или башо пумаре родителенгере гревија (Јован 9:2). Адалеске со сине лен асавко погрешно верување, о јавера бут пути на дикхена сине шукар ки ленде хем ола сигурно осетинена пе сине кај на врединена. О Исус исполнинѓа адава со пишинела ко Исаија аѓаар со сасљарѓа лен хем уверинѓа лен кај о Девел грижинела пе ленге. Ко со уверинела амен акава?

9. Сар о лафија таро Евреија 4:15, 16 сикавена кај амаро Првосвештенико чаче иси ле сочувство спрема о несовршена мануша?

⁹ Читин Евреија 4:15, 16. Шај те ова сигурна кај о Исус секогаш ка овел сочувствително спрема аменде. Окова сој сочувствително дукхала ле кеда дикхела кај о јавера цидена муке хем иси лен дукха. О грчко лафи сој преведимо сар „сикавела сочувство“ значинела чаче те осетине и туга хем и дукх е јаверенгири. (Дикх хем Евреија 10:34, коте со о Павле користинела о исто грчко глагол.) О извештаија башо чудија со керѓа о Исус сикавена кобор баро сочувство сине ле спрема о јавера. Ов на сасљарела сине е манушен само адалеске со мислинела сине кај тано дужно те керел адава. Чаче грижинела пе сине ленге хем мангела сине те поможинел лен. На пример, о Исус шај сине те сасљарел е лепрозно мануше дуралдан. Ама, наместо адава, о сочувство керѓа те пипинел адале мануше хем веројатно о Исус сине о прво мануш со пипинѓа акале лепрозно мануше пало бут берша. О Исус сикавѓа обѕирност е кашуке манушеске адалеа со цидинѓа ле ки страна хем сасљарѓа ле ко тхан коте со на сине јавера мануша. Исто аѓаар, размислин со уло кеда јекх џувли со каинѓа пе башо пле гревија тховѓа е Исусескере пре пле асвенцар. Јекх фарисеи на понашинѓа пе шукар акале џувљаја, ама о Исус заштитинѓа ла хем строго укоринѓа акале фарисее (Мат. 8:3; Мар. 7:33; Лука 7:44). О Исус никогаш на избегинела сине околен со сине насвале или керѓе сериозна гревија. Ов викинела лен сине ки песте хем сикавела ленге сине кај мангела лен. Шај те ова сигурна кај о Исус тано исто добором сочувствително спрема аменде да.

ТЕ ЏА ПАЛО ПРИМЕР АМАРЕ ПРВОСВЕШТЕНИКОСКОРО

10. Со шај те користина авдиве те шај те поможина околенге со кашуке хем короле? (Дикх хем о слике.)

¹⁰ Адалеске со мангаја те џа пало е Исусескоро пример, амен бут трудинаја амен те сикава мангипе хем сочувство спрема о јавера (1. Пет. 2:21; 3:8). Амен нашти чудоја те сасљара е кашукен хем е королен, ама шај те поможина ленге ко духовно поглед. На пример, о библиска публикацие акана тане достапна ко повише таро 100 знаковна чхибја. А башо окола сој короле или слабо дикхена, достапна тане публикацие ко Брајово писмо ко повише таро 60 чхибја. Исто аѓаар, ко повише таро 100 чхибја тане достапна видеоклипија коте со иси гласо со објаснинела со случинела пе ко адава видеоклипи. Са акава керела пе те шај те поможинел пе е кашукенге хем е короленге те овен попаше е Јеховаја хем лескере Чхавеа.

11. Сар е Јеховаскири организација џала пало е Исусескоро пример хем сикавела сочувство спрема различна мануша? (Апостолија 2:5-7, 33; дикх хем о слике.)

¹¹ Е Јеховаскири организација бут трудинела пе те шај те поможинел различна манушенге. Сетин тут кај откеда воскреснинѓа, о Исус денѓа тари е Девлескири сила те шај сарине окола со сине ко празнико Педесетница те шунен о шукар хабери ки пли чхиб. (Читин Апостолија 2:5-7, 33). Водими таро Исус, и организација авдиве керела библиска публикацие ко повише таро 1.000 чхибја, а несаве лендар тане чхибја со керена лен лафи похари мануша. На пример, хари мануша со живинена ки Северно хем ки Јужно Америка керена лафи ко несаве индијанска чхибја. Сепак, и организација керела публикацие ко повише таро 160 асавке чхибја те шај со повише мануша те шунен о шукар хабери. Исто аѓаар, амаре публикацие тане достапна ко повише таро 20 романе чхибја со керена пе лафи ко различна пхувја. Некобор милја мануша кола со керена лафи ко адала чхибја почминѓе те служинен е Јеховаске.

12. Сави јавер практично помош дела е Јеховаскири организација?

¹² Освен со поможинела е манушенге те дознајнен о шукар хабери, е Јеховаскири организација поможинела околенге со доживинѓе природна катастрофе. Адалеске, милје доброволција тане спремна те поможинен пумаре пхраленге хем пхењенге каске со ваљани помош. Исто аѓаар, и организација поможинела те градинен пе скромна објектија коте со о мануша ка шај те кхеден пе хем те сикљовен башо е Девлескоро мангипе спрема ленде.

АМАРО ПРВОСВЕШТЕНИКО ШАЈ ТЕ ПОМОЖИНЕЛ ТУКЕ

13. Кола тане несаве начинија сар поможинела амен о Исус?

¹³ Сар амаро шукар пастири, о Исус грижинела пе башо духовна потребе секоле јекхеске посебно (Јован 10:14; Еф. 4:7). Понекогаш, амаре околностија ко живото шај те керен те осетина амен сар фитили со иси ле бут хари јаг или сар газими трска. Шај бут те обесхрабринел амен несаво пхаро насвалипе, несави грешка со керѓем или несаво проблеми со иси амен несаве пхралеа или пхењаја. Шај аменге пхаро те концентририна амен ки амари надеж баши иднина адалеске со цело време мислинаја ки дукх со иси амен ко моменти. Ама ма бистре кај о Исус дикхела таро со накхеа хем хаљола тле најхор чувствија. О сочувство чхивела ле те керел нешто те шај те поможинел туке. На пример, ов шај те користинел е Девлескири сила те шај те поможинел туке те ове силно кеда сиан слабо (Јован 16:7; Тит 3:6). Освен адава, о Исус шај те користинел е старешинен кола сој мануша „сар поклон“ хем исто аѓаар јавере пхрален хем пхењен те шај те охрабринел тут хем те поможинел тут (Еф. 4:8).

14. Со шај те кера кеда сием обесхрабриме?

¹⁴ Ако сиан обесхрабримо, размислин баши е Исусескири улога сар амаро Првосвештенико. Ма бистре кај о Јехова бичхалѓа ле ки пхув на само те дел пло живото сар откупнина, него хем те поможинел ле пошукар те хаљовел о проблемија кола со иси е несовршена манушен. Кеда сием обесхрабриме таро амаре гревија или слабостија, о Исус тано спремно хем мангела те поможинела аменге (Евр. 4:15, 16).

15. Со поможинѓа јекхе пхралеске палем те иранел пе ко собрание?

¹⁵ Исто аѓаар, о Исус водинела пле народо те шај те поможинел околенге со мукхле е Јехова те иранен пе ки лесте (Мат. 18:12, 13). Размислин башо адава со доживинѓа о Стефано.b Откеда 12 берш сине цидимо таро собрание, одлучинѓа те џал ко состанок. Ов вакерела: „На сине манге локхо, ама мангава сине палем те овав дело тари е Јеховаскири фамилија која сој пхерди мангипе. О старешине кола со кхединѓе пе манцар, шукар доџакерѓе ман. Понекогаш, палем иранена пе манге сине о чувствија кај на врединава хем мангава сине те откажинав ман. Ама, о старешине сетинкерена ман сине кај о Јехова хем о Исус мангена те истрајнав. Кеда палем сиум сине ирамо ко собрание, са о пхраља хем о пхења сикавѓе бут мангипе манге хем мле фамилијаке. Покасно, ми ромни почминѓа те проучинел и Библија хем авдиве служинаја е Јеховаске сар фамилија“. Амаро Првосвештенико кова сој пхердо мангипаја сигурно бут радујнела пе кеда дикхела сар окола со каинена пе добинена и помош со ваљани ленге те шај те иранен пе ко собрание!

16. Соске сиан благодарно со иси амен јекх добором сочувствително Првосвештенико?

¹⁶ Кеда сине ки пхув, о Исус поможинѓа буте манушенге кеда ваљани сине ленге помош. Авдиве шај те ова сигурна кај ов ка поможинел аменге секогаш кеда ка ваљани аменге помош. А ко нево свето кова со ка авел панда хари ов ка поможинел е послушна манушенге целосно те ослободинен пе таро грево со влијајнела упри ленде хем тари несовршеност. Бут сием благодарна амаре Девлеске е Јеховаске кова со добором бут мангела амен со денѓа пле Чхаве те овел амаро сочувствително Првосвештенико!