Сар те ачхове радосно џикоте грижинеа тут тле пашутнеске

1-2. Сар дикхела о Јехова ко окола со грижинена пе пле пашутнеске? (Изреки 19:17; дикх хем о слике.)

ЈЕКХ ПХРАЛ тари Кореја, кова со викинела пе Џин Јол, вакерела: „Ме хем ми ромни сием ко брако повише таро 32 берш. Ко последна панџ берш цело време грижинава ман лаке. Ла иси ла Паркинсоново насвалипе хем бут лаке пхаро те движинел пе. Мангава хем ценинава ме ромња хем нане манге пхаро те грижинав ман лаке. Секоја рат, ој совела ко болничко кревети кхере. Ме пашљовава узи лате хем астараја амен таро вас џикоте соваја“.

² Дали грижинеа тут некаске кас со мангеа, на пример тле родителеске, брачно партнереске, чхавеске или амалеске? Ако оја, веројатно ценинеа акаја посебно прилика со иси тут те шај те поможине леске ко асавко начин. Адалеа со грижинеа тут тле пашутнеске, сикавеа кај мангеа е Јехова (1. Тим. 5:4, 8; Јак. 1:27). Сепак, тут иси тут пхарипа кола со о јавера бут пути на дикхена лен. Понекогаш, шај чак мислинеа кај само ту сиан адава со цидеа муке. Шај трудинеа тут те аса англо јавера, ама кеда сиан коркори нашти те на рове (Пс. 6:6). Иако шај о јавера нане свесна таро со накхеа, о Јехова секогаш џанела хем хаљовела сар осетинеа тут. (Споредин 2. Мојсеева 3:7.) Тле асва хем жртве тане скапоцена леске (Пс. 56:8; 126:5). Ов дикхела са адава со кереа те шај те поможине тле пашутнеске. Е Јеховаске адава тано сар те пхене дужинела туке нешто хем ветинела кај ка иранел туке. (Читин Изреки 19:17.)

3. Саве пхарипа шај сине е Аврааме хем е Сара џикоте грижинена пе сине башо Тара?

³ Ки Библија иси бут извештаија башо мурша хем џувља кола со грижинѓе пе пле пашутнеске. Те дикха о пример е Авраамескоро хем е Саракоро. Кеда геле песке таро Ур, ленгере даде е Тара сине ле околу 200 берш. Ама, ов да гело ленцар. Ола патујнѓе околу 960 километрија џи ко Харан (1. Мој. 11:31, 32). Џанѓола пе кај о Авраам хем и Сара мангена сине е Тара, ама сигурно на сине ленге локхо те грижинен пе баши лесте, посебно џикоте патујнена сине. Ола, веројатно, патујнена сине камиленцар или херенцар хем адава шај керела сине попхаро е Тараске кова со сине пхуро. Веројатно, понекогаш о Авраам хем и Сара осетинена пе сине бут уморна, а чак шај на сине лен сила. Бизи разлика сар сине, о Јехова сигурно денѓа лен и сила со ваљанѓа ленге. Исто сар со поддржинѓа е Аврааме хем е Сара, о Јехова туте да ка поддржинел тут хем ка дел тут сила (Пс. 55:22).

4. Со ка дикха ки акаја статија?

⁴ И радост шај те поможинел туке те истрајне џикоте грижинеа тут некаске (Изр. 15:13). Јекх радосно мануш шај те ачхол среќно иако лескере околностија нане баш најшукар (Јак. 1:2, 3). Сар шај те овел тут асавки радост? Јекх начин тано аѓаар со ка молине тут е Јеховаске хем ка роде лестар те поможинел тут те на нашаве тло позитивно стави. Ки акаја статија ка дикха панда некобор буќа кола со шај те поможинен околенге со грижинена пе пле пашутнеске те ачховен радосна. А ка дикха хем сар шај о јавера те поможинен лен. Прво, те дикха соске ваљани окола со грижинена пе е јаверенге те аракхен пли радост хем кола буќа шај те лен ленгири радост.

САР АДАВА СО ГРИЖИНЕА ТУТ ТЛЕ ПАШУТНЕСКЕ ШАЈ ТЛЕ ВЛИЈАЈНЕЛ УПРИ ТЛИ РАДОСТ

5. Соске ваљани окола со грижинена пе пле пашутнеске те аракхен пумари радост?

⁵ Ако окова со грижинела пе некаске нашавела пли радост, локхесте шај те уморинел пе (Изр. 24:10). А ако уморинела пе, шај те на овел баш љубезно хем ка нашти те поможинел кобор со би мангела. Со шај те лел и радост околенгири со грижинена пе пле пашутнеске?

6. Соске несаве со грижинена пе некаске шај те на овел лен сила башо ништо јавер?

⁶ Окола со грижинена пе некаске, шај те на овел лен сила башо ништо јавер. Јекх пхен која со викинела пе Лија, вакерела: „Те грижине тут некаске, нане ич локхо. Чак кеда иси ман бут сила ко почеток таро диве, сепак ко крајо таро диве сиум бут уморно хем бут пути осетинава кај повише нане ман сила башо ништо. Понекогаш, чак нане ман ни сила те одговорина ки порака“. Јавера палем, нашти доволно те совен или те одморинен пе, нешто со бут ваљани ленге. Јекх пхен која со викинела пе Инес, вакерела: „На совава доволно. Бут пути, уштава раќате ко секола дуј саатија те шај те грижинав ман ме сасаке. Ни ме, ни мо ром бершенцар на сием сине ко одмор“. Несаве со грижинена пе некаске мора те одбинен кеда некој викинела лен те дружинен пе, па чак о теократска задаче адалеске со ленгере пашутнеске цело време ваљани некој те грижинел пе леске. Адалеске, ола шај те осетинен пе коркори хем те овен разочариме адалеске со нашти те керен о буќа со би мангена те керен.

7. Соске несаве со грижинена пле пашутнеске осетинена пе крива или тажна?

⁷ Окола со грижинена пе некаске шај те осетинен пе крива или тажна. Јекх пхен која со викинела пе Џесика, вакерела: „Бут пути мислинава кај ваљани те керав нешто повише те шај те поможинав ме дадеске. Ама кеда одвојнава време манге, осетинава ман криво хем мислинава кај сиум себично“. Несаве мануша со грижинена пе пле пашутнеске, осетинена пе крива адалеске со понекогаш бут вознемиринела лен и ситуација колате со аракхљовена. Јаверен, мучинела лен и мисла кај на керена доволно те шај те поможинен пле пашутненге. Јавера палем, осетинена пе крива адалеске со ки холи вакерѓе нешто колеа со поврединѓе околе каске со поможинена (Јак. 3:2). Несаве тане тажна кеда дикхена кај и ситуација околескири каске со грижинена пе овела са полошно. Јекх пхен која со викинела пе Барбара, вакерела: „Јекх таро најпхаре буќа манге кеда дикхава сар мло пашутно таро диве ко диве са повише преперела“.

8. Сар несаве осетинѓе пе кеда о јавера сикавѓе ленге ценење баши ленгири помош?

⁸ Несаве со грижинена пе некаске шај мислинена кај нане цениме. Соске? Адалеске со ретко некој вакерела ленге „фала“ или фалинела лен адалеске со бут трудинена пе хем башо жртве со керена. Адава со ка вакера само некобор лафија коленцар со ка сикава благодарност, шај бут те значинел некаске (1. Сол. 5:18). Јекх пхен која со викинела пе Мелиса, вакерела: „Понекогаш, ровава адалеске со сиум бут уморно хем обесхрабрими. Ама, кеда окола каске со грижинава ман ка вакерен манге: ’Фала башо са со кереа манге‘, осетинава ман бут пошукар. Асавке лафија поможинена манге о тајсутното диве те уштав неве силенцар хем те мангав палем те грижинав ман ленге“. Јекх пхрал со викинела пе Амаду објаснинела сар влијајнена упри лесте асавке лафија. Ов хем лескири ромни грижинена пе пумаре тикне унукаке која со живинела ленцар хем кола со иси ла епилепсија. Ов вакерела: „Иако ој шај на хаљовела целосно кобор бут жртве кераја те шај те грижина амен лаке, мло вило тано радосно кеда ој сикавела аменге ценење или пробинела те пишинел о лафија ’Мангава тут‘”.

САР ТЕ АЧХОВЕ РАДОСНО

9. Сар шај некој со грижинела пе пле пашутнеске те овел скромно?

⁹ Ов скромно (Изр. 11:2). Саринен амен иси амен ограничимо време хем сила. Адалеске, ка ваљани те чхиве туке границе башо адава со шај хем со нашти те кере хем понекогаш ка ваљани те вакере „на“. Хем адава нане погрешно. Адава сикавела кај сиан скромно. Ако о јавера нудинена пе те поможинен туке, ма одбин лен. Јекх пхрал кова со викинела пе Џеј, вакерела: „Нашти са те кера таро јекх пути. Адава со ка хаљове кола тане тле границе хем нане те џа преку ленде, ка поможинел туке те на нашаве тли радост“.

10. Соске тано важно окова со грижинела пе некаске те сикавел кај хаљовела ле? (Изреки 19:11).

¹⁰ Сикав кај хаљовеа е јаверен. (Читин Изреки 19:11.) Ако хаљовеа е јаверен, поверојатно тано кај ка ачхове смиримо кеда некој ка провоциринел тут. Окова со хаљовела е јаверен, трудинела пе те хаљовел соске некој постапинела ко несаво начин. Џанѓола пе, несаве хронична насвалипа шај те анен џи ко адава јекх мануш те керел нешто бизо те размислинел (Проп. 7:7). На пример, некој сој обично љубезно хем размислинела англедер те вакерел нешто, шај те почминел те распрајнел пе. Или, шај те очекујнел превише таро јавера, те жалинел пе или те керел те мислинен о јавера кај тано пхаро те угодинел пе леске. Ако поможинеа некаске со иси ле сериозно насвалипе, шај те поможинел туке адава со ка дознајне нешто повише башо лескоро насвалипе. Кобор повише хаљовеа о насвалипе, поверојатно тано кај ка хаљове кај упро лескоро понашибе влијајнела лескоро насвалипе, ама адава на сикавела саво мануш тано (Изр. 14:29).

11. Башо кола важна буќа ваљани те одвојнен песке време секова диве окола со грижинена пе некаске? (Псалм 132:4, 5).

¹¹ Одвојн туке време те кере позорало тло амалипе е Јеховаја. Понекогаш, ка ваљани те чхиве несаве буќа ко дујто тхан те шај те овел тут време башо адава „сој тано најважно“ (Фил. 1:10). Јекх таро најважна буќа тано те кере позорало тло амалипе е Јеховаја. Е цареске е Давидеске најважно сине те обожавинел е Јехова. (Читин Псалм 132:4, 5.) Слично сар лесте, важно тано секова диве те одвојне туке време те читине и Библија хем те молине тут. Јекх пхен која со викинела пе Илајша, вакерела: „Успејнава те на нашавав мли радост аѓаар со молинава ман хем хор размислинава башо утешна псалмија. И молитва манге сар шело спасибаске. Ко диве бут пути молинава ман е Јеховаске те ачховав смирими“.

12. Соске окола со грижинена пе некаске ваљани те одвојнен песке време те грижинен пе башо пумаро састипе?

¹² Одвојн туке време те шај те грижине тут башо тло физичко састипе. Е манушенге сој зафатиме, машкар коленде сој хем окола со грижинена пе некаске, шај те овел пхаро те хранинен пе здраво соске нане лен бут време те пазаринен свежо хајбе хем те готвинен здраво. О здраво хајбе хем о редовно вежбибе тане важна башо тло физичко хем емоционално састипе. Адалеске, трудин тут шукар те користине тло ограничимо време со иси тут аѓаар со ка ха здраво хем редовно ка вежбине (Еф. 5:15, 16). Исто аѓаар, трудин тут те сове доволно (Проп. 4:6). О истражувања сикавена кај о сојба поможинела те обновинел пе и годи. Ки јекх медицинско статија пишинела кај ако соваја доволно шај те намалинел пе и анксиозност хем те поможинел аменге полокхесте те икљова ко крајо е стресеа. Освен адава, ваљани те одвојне туке време хем баши рекреација (Проп. 8:15). Јекх пхен која со грижинела пе некаске вакерела со поможинела лаке те ачховел радосно. Ој вакерела: „Кеда шужо о време, мангава те икљовав авријал хем те уживинав ко кхам. Исто аѓаар, барем јекх пути ко масек, планиринава те керав нешто интересно несаве амалинкаја“.

13. Соске о асајбе тано шукар? (Изреки 17:22).

¹³ Ма бистре те аса. (Читин Изреки 17:22; Проп. 3:1, 4.) О асајбе тано шукар башо тло физичко хем емоционално састипе. Кеда грижинеа тут некаске, ретко тано о буќа те икљон аѓаар сар со планиринѓан. Ама, ако шај ма нашав тли смисла башо хумор ко пхаре ситуацие соске аѓаар веројатно ка овел туке полокхо те икљове ко крајо ленцар. Хем адава со ка асан заедно адалеа каске со грижинеа тут, ка керел тумен панда попаше.

14. Сар шај те поможинел туке адава со ка кере лафи несаве амалеа касте со иси тут доверба?

¹⁴ Кер лафи несаве амалеа касте со иси тут доверба. Иако кереа са со шај те ачхове радосно, сепак, понекогаш ка осетине тут преоптоваримо. Ко адала моментија, шај те поможинел тут адава со ка вакере сар осетинеа тут несаве шукар амалеске — некој со нане те осудинел тут или нане те керел те осетине тут лошно башо адава со вакерѓан (Изр. 17:17). Адава со ка шунел тут хем ка вакерел туке нешто охрабрувачко, шај те овел баш адава со ваљани туке те шај те ачхове радосно (Изр. 12:25).

15. Сар адава со ка размислине баши тли надеж ка анел туке радост?

¹⁵ Замислин туке тло живото адалеа каске со грижинеа тут, ко рај. Ма бистре кај адава со грижинеа тут некаске тано само моментално хем адава нане нешто со е Јехова сине ле намера о мануша те керен (2. Кор. 4:16-18). О „чачутно живото“ хенес авела (1. Тим. 6:19). Веројатно ка осетине бари радост ако кереа лафи тле пашутнеа башо адава со ка керен заедно ко рај (Иса. 33:24; 65:21). Јекх пхен која со викинела пе Хедер, вакерела: „Бут пути вакерава околенге каске со грижинава ман кај панда хари ка сива заедно, ка праста хем ка возина точако. Ка пека маро хем ка кера хајбаске амаре мангленге кола со ка воскреснинен. Заедно благодаринаја е Јеховаске баши амари надеж“.

САР ШАЈ О ЈАВЕРА ТЕ ПОМОЖИНЕН

16. Сар шај те поможина несаве пхралеске или пхењаке таро собрание кова со грижинела пе некаске? (Дикх хем и слика.)

¹⁶ Поможин околенге со грижинена пе некаске те овел лен време песке. О пхраља хем о пхења шај те нудинен помош. Аѓаар, окова со грижинела пе некаске ка шај хари те цидел пле мисле тари пли ситуација хем те завршинел јавера буќа (Гал. 6:2). Несаве објавителија керѓе распоред кој те поможинел секова курко. Јекх пхен, која со викинела пе Наталија, која со грижинела пе пле ромеске кова сој парализиримо, вакерела: „Јекх пхрал таро собрание авела јекх пути или дуј пути ко курко те шај те овел ме ромеа. Ола керена служба заедно, керена песке лафи, па чак хем дикхена филмија. Мо ром бут ценинела адала моментија, а ман иси ман време те грижинав ман башо несаве мле потребе, сар на пример те икљовав те пхирав“. Ко несаве ситуацие шај ка нудине тут те ачхове раќате околеа каске со ваљани грижа те шај окова со грижинела пе леске шукар те одморинел пе.

17. Сар шај те поможина околенге кола со грижинена пе некаске џикоте трајнена о состанокија?

¹⁷ Џикоте трајнена о состанокија поможин околенге со грижинена пе некаске. Асавке пхраља хем пхења шај нане лен бут бари корист таро состанокија хем конгресија адалеске со грижинена пе пле пашутнеске. О јавера таро собрание шај те нудинен пе те бешен околеа каске со ваљани грижа џикоте трајнела о состанок или само дело лестар. Ако окова каске со ваљани грижа нашти те икљол кхералдан, шај те нудине тут те џа лесте кхере хем заедно те вклучинен тумен ко состанок те шај окова со грижинела пе леске те џал ко состанок.

18. Со јавер шај те кера околенге кола со грижинена пе пле пашутнеске?

¹⁸ Пофалин околен кола со грижинена пе пле пашутнеске хем молин тут ленге. О старешине ваљани редовно те охрабринен околен кола со грижинена пе некаске (Изр. 27:23). Хем бизи разлика саве тане амаре околностија, сарине шај редовно хем таро вило те пофалина асавкен. Исто аѓаар, шај те молина амен е Јеховаске понадари да те дел лен сила хем те поможинел ленге те на нашавен пли радост (2. Кор. 1:11).

19. Кола буќа едвај аџикераја те исполнинен пе?

¹⁹ Панда хари, о Јехова ка косел са о асва кола со анела лен и дукх. Нане више те овен ни о насвалипа ни о мерибе (Отк. 21:3, 4). „О сакати ка рупинел сар елени“ (Иса. 35:5, 6). О пхарипа со анела о пхурипе хем и дукх со анела и грижа башо несаво пашутно сој насвало ка овен дело таро адава колесте со нане ни те сетина амен (Иса. 65:17). Чак хем авдиве, џикоте аџикераја те исполнинен пе о бут шуже ветувања коленде со надинаја амен, о Јехова нане те мукхел амен. Ако понадари да иси амен доверба ки лесте кај ка дел амен сила, ов ка поможинел аменге целосно те истрајна аѓаар со нане те нашава амари стрпливост хем радост (Кол. 1:11).