Ваљани ли те чхинавав те возинав?

Дали ту да аракхљовеа ки слично ситуација? Ако оја, со шај те поможинел туке те одлучине дали ваљани понадари да те возине?

Ко несаве пхувја кеда јекх возачи авела џи ки одредено возраст хем мангела те обновинел пли возачка, тегани мора о доктори те одобринел леске те шај понадари да те возинел. О христијања кола со живинена ко акала пхувја, ола шунена о законија хем околен колен со иси лен власт тари држава те анен одлуке (Рим. 13:1). Ама чак ако нане асавке законија ки пхув коте со живинеа, иси несаве предлогија кола со ка поможинен туке те проценине дали тано безбедно те возине.

ПРОЦЕНИН САР ВОЗИНЕА

Според о Национално институти башо пхурипе ки Америка, о прво нешто со шај те кере тано те пуче тут акала пучиба:

• Дали манге пхаро те дикхав о знакија ко друмо или дали раќате на дикхава баш шукар?

• Дали панда шај шукар те иранав мло шеро хем те дикхав ко ретровизорија хем ко мртва аглија?

• Дали манге пхаро сигате те реагиринав, на пример, таро гаси те газинав ки кочница?

• Дали возинава добором бавно со сметинава ко сообраќај?

• Дали ко последно време повише пути случинѓа пе манге харичкаске те керав судар, или мло врда тано кхувдо или грбимо адалеске со кхувѓум ко нешто?

• Дали ачхавкерѓа ман полиција башо адава сар возинава?

• Дали случинѓа пе манге те дреминав џикоте возинава?

• Дали пијава хапија кола со шај те влијајнен упро адава сар возинава?

• Дали мли фамилија или мле амала тане секириме башо адава сар возинава?

Ако о одговор тано „оја“ ко јекх или ко дуј таро акала пучиба шај ка ваљани те размислине дали ка ваљани те кере несаве промене. На пример, шај ка одлучине те на возине бут често, посебно раќате. Редовно проценин сар возинеа. Шај те пуче некас тари тли фамилија или несаве амале те шај те вакерел туке со мислинела башо адава сар возинеа. Исто аѓаар, размислин дали ка шај те ле часија башо адава побезбедно те возине. Ама, ако о одговор сине „оја“ ко некобор таро акала пучиба кола со сине упре, шај најшукар ка овел те чхинаве те возине.a

МУКХ ТЕ ВОДИНЕН ТУТ О БИБЛИСКА НАЧЕЛИЈА

Шај нане аменге локхо те хаљова кај на возинаја добором шукар сар со возинаја сине англе. И мисла те чхинава те возина шај тани нешто баши која со на мангаја ни те размислина, а ни палем те кера лафи. Ама, сар шај о библиска начелија те поможинен туке те дикхе о буќа аѓаар сар сој тане хем те ане мудро одлука? Те дикха дуј асавке начелија.

Ачхов скромно (Изр. 11:2). Сар со пхујроваја, на дикхаја добором шукар, на шунаја добором шукар, амаре мускулија хем амаре рефлексија слабонена. На пример, сар со авена ко берша, повише мануша чхинавена несаве спортеа адалеске со хаљовена кај локхесте шај те поврединен пе. Слично тано е возибаја да. Ка авел време кеда јекх мануш шај ка сикавел скромност хем ка одлучинел те чхинавел те возинел баши пли безбедност (Изр. 22:3). Хем ако о јавера вакерена леске кај тане секириме башо адава сар возинела, јекх скромно мануш ка овел спремно те размислинел башо адава хем те шунел. (Споредин 2. Самоилова 21:15-17.)

Пазин те на ове криво башо рат (5. Мој. 22:8). Јекх врда шај те овел опасно оружје кеда на користинела пе ко безбедно начин. Окова со на чхинавела те возинел иако нане више шукар возачи чхивела ко ризик пло хем е јаверенгоро живото. Хем ако керела судар хем авела џи адава некој те мерел ов шај те овел криво башо рат.

Шај туке пхаро те ане одлука дали те чхинаве те возине. Ма мислин кај ако чхинавеа те возине о јавера похари ка поштујнен тут. О Јехова мангела тут башо тле шуже особине, сар сој тане и скромност и понизност хем адава со грижинеа тут башо о шукарипе е јаверенгоро. Хем ов ветинела кај ка поддржинел тут хем кај ка утешинел тут (Иса. 46:4). О Јехова никогаш нане те мукхел тут. Адалеске молин ле те поможинел туке те користине о библиска начелија хем те постапине мудро кеда одлучинеа дали ка ваљани те чхинаве те возине.