Trito pismo e Jovaneskoro

1 Me o phuro manuš,* pišinava dži ko manglo Gaj, kaste so čače mangava.

2 Manglea phrala, molinava man te ovel tut šukar sastipe hem sa o bukja ko tlo životo te džan šukar, sar dži akana. 3 Soske, but radujngjum man keda o phralja ale hem vakergje kaj ikerea tut ko čačipe hem kaj živinea sprema o čačipe. 4 Ništo na kerela man poradosno* taro adava te šunav kaj mle čhave živinena sprema o čačipe.

5 Manglea phrala, sa adava so kerea te šaj te pomožine e phralenge, iako na pendžarea len, sikavela kaj sian verno. 6 Ola vakergje e sobranieske bašo tlo mangipe. Molinava tut keda ka džan peske, ispratin len ko način sar so ličinela e Devleskere slugenge. 7 Soske, ola gele te propovedinen sebepi e Devleskoro anav, bizo te očekujnen nešto e manušendar taro sveto. 8 Adaleske, amen siem dužna asavke phralenge te sikava gostoprimstvo, te šaj te ova lencar sorabotnikija ko čačipe.

9 Pišingjum nešto e sobranieske, ama o Diotref, kova so mangela te ovel prvo maškar lende, na prifatinela hem na poštujnela ništo taro adava so vakeraja. 10 Adaleske, ako avava, ka kerav lafi bašo bukja so kerela len, sar soj o lošna lafija so širinela len baši amende. Ama adava da nane leske dovolno, ov na mangela te priminel e phralen hem na sikavela lenge poštovanje. Hem ov trudinela pe te čhinavel hem te ikalel taro sobranie okolen so mangena te priminen e phralen.

11 Manglea phrala, ma dža palo primer okolengoro so kerena lošna bukja, nego dža palo primer okolengoro so kerena adava soj šukar. Koj kerela šukaripe, avela taro Devel. Koj kerela lošnipe, na pendžargja e Devle. 12 Bašo Dimitrij, sarine vakerena šukar bukja, hem adava so ov živinela sprema o čačipe, sikavela kaj adava tano čače agjaar. Ustvari, amen da vakeraja šukar bukja baši leste hem tu džanea kaj adava so amen vakeraja tano čače.

13 Sine man but bukja so mangava te vakerav tuke, ama na mangava te pišinav tuke više ko pismo. 14 Nego nadinava man kaj panda hari ka dikhav tut, hem ka šaj te kera lafi.

Neka ovel tut mir.

O amala pozdravinena tut. Pozdravin mandar e amalen, sekas posebno.