Pismo taro Juda
1 Me o Juda, robo e Isus Hristoseskoro, a phral e Jakoveskoro, pišinava dži ko sa okola soj vikime, kolen so o Devel, o Dad, mangela hem arakhela len bašo Isus Hristos:
2 O Devel neka sikavel tumenge panda poviše milost hem mangipe hem neka del tumen panda pobaro mir.
3 Mangle phraljalen, angleder čače mangljum te pišinav tumenge bašo amaro zaedničko spasenie, ama akana dikhljum kaj isi potreba te pišinav tumenge te šaj te pottikninav tumen hrabro te borinen tumen baši vera koja so jekh puti zasekogaš sine dendi okolenge soj sveta. 4 Akava kerava adaleske so maškar tumende khuvgje počorane nesave manuša kola so više odamna tane osudime sprema o Spisija. Ola tane lošna manuša kola so e Devleskoro šukaripe so na zaslužinaja le koristinena sar izgovor bašo pumaro bezobrazno ponašibe* hem kola so nane verna amare edinstveno sopstvenikoske hem Gospodareske, e Isus Hristoseske.
5 Iako sa akava više šukar džanena, mangava te setinkerav tumen kaj o Jehova,* iako spasingja jekhe narodo taro Egipet, palo adava ov uništingja okolen so na verujngje. 6 E angelen da, kola so na ačhile ki pli položba so sine len, nego mukhle plo čačutno than živibaske, ov ikerela len phanle e večna sindžirencar ki bari temnica te oven sudime ko baro dive. 7 Isto agjaar, o Sodom hem Gomor, hem o dizja okolu lende, mukhle pe ko gadno nemoral* hem zadovolingje pumare telesna želbe kola so nane prirodna. Ola tane osudime ki jag so večno thabljola, a adava so ulo lencar predupreduvanje tano amenge.
8 Osven adava, akala da manuša, kola so počorane khuvgje maškar tumende, stalno hovavena pumari godi, meljarena pumaro hem e javerengoro telo, dikhena sar potele pestar okolen so isi len avtoriteti hem kerena lošno lafi okolendar kolenge so o Devel sikavgja čest. 9 A keda o arhangel Mihael sine le problemi e Bengea bašo e Mojseeskoro telo, ni na mislingja kaj ov tano adava so valjani te osudinel le lafencar so vredžinena, nego vakergja leske: „O Jehova* neka ukorinel tut“. 10 Ama akala manuša, kerena lošno lafi bašo sa o bukja kola so ustvari na haljovena len. A sa adava so haljovena le vodime taro instinkt sar nerazumna životne, kerela panda poviše te oven rumime.
11 Teško lenge, soske gele palo e Kaineskoro drumo, hem baši nagrada sigjargje te grešinen sar o Valaam, hem mule adaleske so buntovno kergje lafi sar o Korej. 12 Ola tane opasna sar garavde karpe telo pani džikote hana hem piena tumencar keda khedena tumen sar phralja, pastirija kola so bizi dar grižinena pe samo peske, oblakija so na anena bršim kolen so ingarela i bavlal, kašta kolen so ni ko krajo tari esen nane len plodi, kola soj celosno šuke hem ikalde taro koreno, 13 diva morska branija kola so kerena pena hem agjaar ikalena te dikhjol adava kolestar so valjani te ladžan, zvezde kola so dvižinena pe bizo pravco, kolen so zasekogaš adžikerela len i najkali temnica.
14 Baši lende prorokujngja hem o Enoh, kova soj o eftato ko redo palo Adam, keda vakergja: „Ake, o Jehova* alo ple sveta angelencar kola soj doborom but so nikoj našti te gejnel len,* 15 te sudinel sarinenge hem te osudinel sa e lošna manušen bašo sa o lošna bukja so kergje len hem te osudinel o drska lafija kola so adala grešnikija vakergje len protiv leste“.
16 Adala tane manuša kola so žalinena pe hem nane zadovolna adalea so isi len ko životo, živinena sprema pumare želbe hem frdena baro čalmi pumare lafencar, a ko isto vreme falinena e javeren te šaj te ovel len nesavi korist lendar.
17 A tumen, mle mangle, setinen tumen ko lafija kola so vakergje len* o apostolija amare Gospodareskere e Isus Hristoseskere. 18 Ola vakergje tumenge: „Ko posledna dive ka pojavinen pe manuša kola so ka asan bašo adava soj šukar hem ka džan palo pumare lošna želbe“. 19 Akala manuša tane adala so kerena podelbe, ola tane telesna manuša* kolen so nane len e Devleskiri sila.* 20 A tumen, mangle phraljalen, koristinen tumari vera koja soj but sveto te zojrakeren korkori tumen hem mukhen e Devleskiri sila* te vodinel tumare molitve, 21 te šaj te ačhoven ko e Devleskoro mangipe džikote adžikerena i milost amare Gospodareskiri, e Isus Hristoseskiri koja so ingarela ko večno životo. 22 Isto agjaar, ponadari da sikaven milost okolenge so isi len sumnje, 23 spasinen len agjaar so ka ciden len tari jag. A ponadari da sikaven milost e javerenge, ama džikote kerena adava, pazinen tumen hem mrzinen čak o šej kova so meljardilo taro telo.*
24 O Devel šaj te zaštitinel tumen te na sopkinen tumen hem šaj te kerel te tergjoven angli leskiri slava* bizi fleka hem te del tumen bari radost. 25 E edinstveno Devleske, amare Spasiteleske preku o Isus Hristos amaro Gospodari, pripadinena i slava, o baripe, i mokj hem o avtoriteti otsekogaš, akana hem zasekogaš. Amin.