Dujto pismo e Jovaneskoro

1 Me o phuro manuš,* pišinava dži ki birimi phen* hem dži ko lakere čhave, kolen so čače mangava, a na samo me, nego hem sa okola so zapoznajngje o čačipe. 2 Mangaja tumen sebepi o čačipe kova soj ko amare vile hem kova so ka ačhol adathe zasekogaš. 3 O Devel, o Dad, hem leskoro Čhavo, o Isus Hristos ka sikaven amenge o šukaripe so na zaslužinaja le hem pumari milost, ka den amen mir, ka den amen o čačipe hem ka sikaven amenge mangipe.

4 But radujnava man soske doznajngjum kaj nesave taro tle čhave živinena sprema o čačipe, sar so zapovedingja amenge o Dad. 5 Adaleske, akana phene, rodava tutar te sikaven mangipe jekh jekheske. (Na pišinava tuke nevi zapoved, nego zapoved so dobingjem la panda taro početok.) 6 Hem o mangipe značinela akava: ponadari da te živina sprema leskere zapovedija. Sar so šungjen ko početok, leskiri zapoved tani sekogaš te sikaven mangipe. 7 Soske, ko sveto pojavingje pe but manuša so hovavena e javeren. Ola na priznajnena kaj o Isus Hristos alo ki phuv sar manuš. Ola tane adala so hovavena hem soj protiv o Hristos.*

8 Pazinen te na našaven o bukja kolenge so amen but trudingjem amen, te šaj te dobinen i celosno nagrada. 9 Sekova jekh so na ačhola ko adava so sikavgja o Hristos hem sikavela nešto so nane točno, o Devel nane lea. Sekova jekh so ačhola ko e Hristoseskoro sikljojbe, o Dad hem o Čhavo tane lea. 10 Ako nekoj avela ki tumende hem na sikavela sprema adava so o Hristos sikavgja, ma priminen le ko tumaro kher, ni ma pozdravinen le. 11 Soske, okova so pozdravinela le, učestvujnela ko leskere lošna postapke.

12 Iako isi man but so te vakerav tumenge, na mangava te pišinav tumenge bašo adava ko pismo, soske nadinava man kaj ka šaj te avav ki tumende, te dikha amen hem te kera lafi, te šaj tumari radost te ovel celosno.

13 Pozdravinena tut o čhave tle phenjakere, koja soj birimi.