Matej
1 Akava tano o lil bašo životo* e Isus Hristoseskoro,* o čhavo e Davideskoro, o čhavo e Avraameskoro:
2 e Avraameske bijandilo o Isak,
e Isakoske bijandilo o Jakov,
e Jakoveske bijandile o Juda hem leskere phralja,
3 e Judaske i Tamara bijangja e Farese hem e Zara,
e Fareseske bijandilo o Esron,
e Esroneske bijandilo o Aram,
4 e Arameske bijandilo o Aminadav,
e Aminadaveske bijandilo o Nason,
e Nasoneske bijandilo o Salmon,
5 e Salmoneske i Raav bijangja e Vooze,
e Voozeske i Rut bijangja e Ovide,
e Ovideske bijandilo o Jesej,
6 e Jeseeske bijandilo o cari o David.
E Davideske i romni koja so angleder sine e Urijaskiri bijangja e Solomone,
7 e Solomoneske bijandilo o Rovoam,
e Rovoameske bijandilo o Avija,
e Avijaske bijandilo o Asa,
8 e Asaske bijandilo o Josafat,
e Josafateske bijandilo o Joram,
e Jorameske bijandilo o Ozija,
9 e Ozijaske bijandilo o Jotam,
e Jotameske bijandilo o Ahaz,
e Ahazeske bijandilo o Ezekija,
10 e Ezekijaske bijandilo o Manasija,
e Manasijaske bijandilo o Amon,
e Amoneske bijandilo o Josija,
11 e Josijaske bijandile o Jehonija hem leskere phralja ko vreme keda o Izraelcija sine ingarde ko Vavilon.
12 Otkeda ingargje len ko Vavilon, e Jehonijaske bijandilo o Salatiel,
e Salatieleske bijandilo o Zorovavel,
13 e Zorovaveleske bijandilo o Aviud, e Aviudeske bijandilo o Elijakim,
e Elijakimeske bijandilo o Azor,
14 e Azoreske bijandilo o Sadok,
e Sadokeske bijandilo o Ahim,
e Ahimeske bijandilo o Eliud,
15 e Eliudeske bijandilo o Eleazar,
e Eleazareske bijandilo o Matan,
e Mataneske bijandilo o Jakov,
16 e Jakoveske bijandilo o Josif, o rom e Marijakoro, koja so bijangja e Isuse, kole so vikinena le Hristos.
17 Agjaar, sa zaedno sine, taro Avraam dži ko David 14 generacie, taro David dži keda sine ingarde ko Vavilon 14 generacie hem otkeda sine ingarde ko Vavilon dži ko Hristos 14 generacie.
18 Ake sar bijandilo o Isus Hristos. Džikote leskiri daj i Marija sine verimi e Josifea, angleder te len pe, oj ačhili khamni tari e Devleskiri sila.* 19 Ama o Josif, lakoro vereniko,* adaleske so sine pravedno manuš hem na manglja javno te ladžakerel la, sine le namera tajno te phagjel i veridba.* 20 Ama otkeda razmislingja bašo adava, e Jehovaskoro* angeli pojavingja pe leske ko suno hem vakergja leske: „Josif, tu o čhavo e Davideskoro, ma dara te ane e Marija khere sar tli romni,* soske oj ačhili khamni tari e Devleskiri sila.* 21 Oj ka bijanel čhavo, hem tu čhiv leske anav Isus,* soske ov ka spasinel ple narodo taro lengere grevija“. 22 Sa akava slučingja pe te šaj te ispolninel pe adava so vakergja o Jehova* preku plo proroko: 23 „Ake, čhaj ka ačhovel khamni hem ka bijanel čhavo, hem ka čhiven leske anav Emanuel“, so značinela: „O Devel tano amencar“.
24 Tegani o Josif uštilo taro sojbe hem kergja agjaar sar so vakergja leske e Jehovaskoro* angeli, hem lelja e Marija romnjake.* 25 Ama na sukja laja sa džikote na bijangja e čhave, hem čhivgja e čhaveske o anav Isus.