Luka

1 But džene trudingje pe te pišinen bašo sa o nastanija so slučingje pe, hem amen siem uverime kaj adala čače slučingje pe. 2 Isto agjaar, bašo akala nastanija vakergje amenge okola so ple jakhencar dikhle len hem okola so objavinena e Devleskoro lafi. 3 Adaleske me da, poštujmea Teofile, otkeda šukar ispitingjum sa taro početok, rešingjum te pišinav tuke sa so slučingja pe redoja, 4 te šaj te ove uverimo kaj sa adava so sikliljan angleder tano čače.

5 Ko vreme keda o Irod* sine cari ki Judeja, sine jekh svešteniko so vikinela pe sine Zaharija, tari e Avijaskiri svešteničko grupa. Leskiri romni sine tari e Aroneskiri familija hem vikinela pe sine Elisaveta. 6 Ola solduj sine pravedna anglo Devel, hem celosno ikerena pe sine ko sa e Jehovaskere* zapovedija hem zakonija. 7 Ama len na sine len čhave, soske i Elisaveta našti sine te ačhovel khamni, a solduj sine više ko berša.

8 Jekh dive o Zaharija kerela sine pli svešteničko služba anglo Devel, adaleske so leskiri svešteničko grupa sine ko redo te služinel. 9 Sprema o svešteničko običaj, alo leskoro redo ov te khuvel ko e Jehovaskoro* svetilište* hem te tharel temjani.* 10 A celo narodo molinela pe sine avrijal džikote ov tharela sine temjani. 11 Tegani pojavingja pe leske e Jehovaskoro* angeli kova so tergjola sine tari desno strana taro žrtveniko bašo temjani. 12 Keda dikhlja le, o Zaharija voznemiringja pe hem darandilo. 13 Ama o angeli vakergja leske: „Ma dara Zaharija, soske o Devel šungja adava so rodingjan taro vilo. Tli romni i Elisaveta ka bijanel tuke čhavo. Čhiv leske o anav Jovan. 14 Ka ove but radosno hem but manuša ka radujnen pe bašo leskoro bijanibe, 15 soske ov ka ovel baro e Jehovaske* ko jakhja. Ama na ka smejnel te piel mol ili bilo so javer so makjarela. O Devel ka del le pli sila* panda džikote tano ple dajake ko vogi. 16 Hem ka pomožinel bute Izraelconge te iranen pe ko pumaro Devel, o Jehova.* 17 Ov ka džal anglo Devel hem ka ovel le i revnost* hem i sila sar so sine e Ilija, te šaj te kerel o vile e dadengere te oven sar čhavengere hem te pomožinel okolenge soj neposlušna te postapinen mudro hem te keren adava soj ispravno, te šaj o narodo te ovel spremno bašo Jehova“.*

18 A o Zaharija vakergja e angeleske: „Sar šaj te verujnav ko akava? Soske, me sium phuro hem mi romni da tani ko berša“. 19 O angeli odgovoringja leske: „Me sium o Gabriel, kova so tergjola anglo Devel. Bičhaldo sium te kerav tuja lafi hem te vakerav tuke akava šukar haberi. 20 Ake, ka ove laloro hem ka našti te kere lafi sa dži ko dive keda ka slučinel pe adava, soske na verujngjan ko mle lafija so ka ispolninen pe ko vreme soj odredimo“. 21 A o narodo adžikerela sine e Zaharija avrijal hem čudinela pe sine soske ačhilo doborom ko svetilište.* 22 Keda iklilo avrijal, našti sine te vakerel e manušenge ništo, hem ola halile kaj ov andre dikhlja vizija.* Trudinela pe sine išaretencar te haljovel pe lencar, soske našti sine te kerel lafi. 23 Keda nakhle o dive tari leskiri svešteničko služba,* ov irangja pe khere.

24 Palo nesave dive, leskiri romni i Elisaveta ačhili khamni. Pandž masek na ikljovela sine taro kher hem vakerela sine: 25 „Akava šukaripe o Jehova* kergja mange akana. Ov dikhlja ki mande hem cidingja mandar i ladž“.

26 Keda sine šov masek khamni, o Devel bičhalgja e angele e Gabriele ki diz Nazaret tari Galileja, 27 ki jekh čhaj so vikinela pe sine Marija, koja so sine verimi e Josifea kova so avela sine tari e Davideskiri familija. 28 Keda o angeli alo ki late, vakergja lake: „Šukar dive, tu so sian but blagoslovimi, o Jehova* tano tuja!“ 29 A oj darandili hem pučela pe sine so značinena akala lafija. 30 Tegani o angeli vakergja lake: „Ma dara Marija, soske o Devel blagoslovingja tut. 31 Ake, ka ačhove khamni hem ka bijane murš. Čhiv leske o anav Isus. 32 Ov ka ovel baro hem ka vikinen le Čhavo e Najbareskoro. O Jehova,* o Devel, ka del le o prestol leskere dadeskoro e Davideskoro, 33 hem ov večno ka vladinel sar Cari ko kher e Jakoveskoro hem leskere Carstvoske nane te avel krajo“.

34 A i Marija pučlja e angele: „Sar šaj adava te ovel, keda panda na sukjum muršea?“ 35 A o angeli odgovoringja lake: „E Devleskiri sila* ka avel upri tute, i sila e Najbareskiri ka učharel tut. Adaleske o čhavo so ka bijane le ka ovel sveto, hem ka vikinel pe e Devleskoro Čhavo. 36 Ti familija i Elisaveta isto agjaar tani akana khamni šov masek hem ko vogi phiravela murš čhavo, iako tani phuri hem o manuša vakerena sine kaj našti te ačhovel khamni, 37 soske e Devleske ništo nane nevozmožno“.* 38 Tegani i Marija vakergja: „Ake me sium e Jehovaskiri* robinka! Neka ovel mancar agjaar sar so vakerea tu“. Hem o angeli gelo peske latar.

39 Palo adava i Marija spremingja pe hem sigate geli ki jekh diz koja so sine ko judejska planine. 40 Keda reslja, khuvgja ko e Zaharijaskoro kher hem pozdravingja e Elisaveta. 41 Keda i Elisaveta šungja e Marijakoro glaso, o čhavo rupingja lake ko vogi. Tegani i Elisaveta, vodimi tari e Devleskiri sila,* 42 glasno vakergja: „Blagoslovimi sian maškar o džuvlja hem blagoslovimo tano o čhavo soj ko tlo vogi! 43 Bari čest mange so mle Gospodareskiri daj ali ki mande! 44 Soske keda šungjum tlo glaso, o čhavo soj ko mo vogi rupingja tari radost. 45 Srekjno sian tu so verujngjan ko akala bukja, soske adava so o Jehova* vetingja tuke, celosno ka ispolninel le“.

46 A i Marija vakergja: „Me falinava e Jehova,* 47 hem mo vilo tano radosno bašo adava so o Devel, mo Spasiteli, kergja mange, 48 soske ov dikhlja ple čorole robinka. Otakana sa o generacie ka vakeren kaj sium srekjno, 49 soske o mokjno Devel kergja bare bukja baši mange, hem sveto tano leskoro anav. 50 Ov sekogaš sikavela milost okolenge so hor poštujnena le.* 51 But mokjna bukja kergja ple vastea, hem rasturingja ko sa o strane okolen soj čalmdžie. 52 Ov peravgja e mokjna manušen taro lengere prestolija, a vazdingja e obična manušen. 53 E bokhalen čaljargja len šukar bukjencar, a e barvalen mukhlja len čuče vastencar. 54 Ov alo te pomožinel ple slugaske e Izraeleske adaleske soj tano milostivo, 55 sar so vetingja amare parapaponge kaj sekogaš ka ovel milostivo e Avraamea hem leskere potomstvoja“. 56 I Marija ačhili ki Elisaveta okolu trin masek, a palo adava irangja pe khere.

57 Alo o vreme i Elisaveta te bijanel, hem bijangja murš. 58 A o komšie hem lakiri familija šungje kaj o Jehova* sikavgja lake bari milost hem zaedno laja but radujngje pe. 59 Ko oftoto dive ale te keren e čhave suneti hem e čhaveske mangle te čhiven e dadeskoro anav, Zaharija. 60 Ama i daj vakergja: „Na, ov ka vikinel pe Jovan“. 61 Tegani ola vakergje lake: „Nikoj tari tli familija na vikinela pe agjaar“. 62 Palo adava išaretencar pučle e dade sar ov mangela te vikinel pe o čhavo. 63 Ov rodingja te den le tabla hem ki late pišingja: „Leskoro anav tano Jovan“. Tegani sarine čudingje pe. 64 Hem odma phravdili i čhib leskiri, počmingja palem te kerel lafi hem te falinel e Devle. 65 Sa lengere komšie počmingje te daran, hem bašo akava počmingja te kerel pe lafi ki celo Judeja. 66 Sa adala so šungje, razmislinena sine bašo adava hem pučena pe sine: „So ka ovel akava čhavo keda ka bajrol?“ Soske, sine jasno kaj o Jehova* sine lea.*

67 Tegani leskoro dad o Zaharija, vodimo tari e Devleskiri sila,* počmingja te prorokujnel: 68 „Neka ovel falimo o Jehova,* o Devel e Izraeleskoro, soske sikavgja milost ple narodoske hem oslobodingja le. 69 Taro kher ple slugaskoro e Davideskoro dengja amen mokjno spasiteli,* 70 sar so vakergja preku ple sveta prorokija taro purano vreme. 71 Ov vetingja kaj ka spasinel amen taro amare dušmanja hem taro sa okola so mrzinena amen. 72 Ov ka ispolninel adava so vetingja amare parapaponge kaj ka sikavel amenge milost hem ka setinel pe ko plo sveto sojuz,* 73 ki sovli so dengja e Avraameske, amaro parapapo. 74 Otkeda o Devel ka oslobodinel amen taro amare dušmanja, ka mukhel amen te služina leske bizi dar. 75 Te šaj te ova leske verna hem te kera adava soj ispravno celo amaro životo. 76 A tu, mo čhavo, ka ove proroko e Najbareskoro, soske ka dža anglo Jehova* te spremine leskere drumija, 77 te šaj te sikave leskere narodo kaj ov ka spasinel le agjaar so ka prostinel leskere grevija. 78 Amaro Devel ka kerel sa adava adaleske so isi le baro sočuvstvo. Adava sočuvstvo taro nebo ka svetinel upri amende sar keda ikljola o kham, 79 te šaj te anel svetlina okolenge so živinena ki temnica hem teli senka e meribaskiri. Adaja svetlina ka anel amen ko drumo bašo mir“.

80 A o čhavo bajrola sine hem ulo zrelo manuš.* Ov živinela sine ki pustina sa džikote na alo o vreme te propovedinel e manušenge ko Izrael.