Otkrovenie e Jovaneske
7 Palo adava dikhljum štar angelija sar tergjona ko štar strane tari phuv hem cvrsto ikerena e phuvjakere štar bavlala, te šaj nijekh bavlal te na phudel ni ki phuv, ni ko more, ni ko bilo kova kaš. 2 Hem dikhljum jekh javer angeli sar avela adathar kotar so ikljola o kham* hem anela o pečati e dživde Devleskoro. Ov ko celo glaso vikingja e angelenge kolenge so sine dendi i vlast te keren šteta e phuvjake hem e moreske, 3 hem vakergja lenge: „Ma keren šteta ni e phuvjake, ni e moreske, ni e kaštenge džikote amare Devleskere robon na obeležinaja pečatea ko čekat“.
4 Hem šungjum o broj okolengoro so sine obeležime pečatea - 144.000. Ola avena taro sekova pleme ko Izrael:
5 Taro e Judaskoro pleme 12.000 obeležime pečatea,
taro e Ruvimeskoro pleme 12.000,
taro e Gadeskoro pleme 12.000,
6 taro e Asereskoro pleme 12.000,
taro e Neftalimeskoro pleme 12.000,
taro e Manasijaskoro pleme 12.000,
7 taro e Simeoneskoro pleme 12.000,
taro e Leviskoro pleme 12.000,
taro e Isahareskoro pleme 12.000,
8 taro e Zavuloneskoro pleme 12.000,
taro e Josifeskoro pleme 12.000,
taro e Benjamineskoro pleme 12.000 obeležime pečatea.
9 Palo adava dikhljum baro mnoštvo manuša kolen so nijekh našti sine te gejnel len, taro sa o nacie, plemija, narodija hem čhibja, sar tergjona anglo prestol hem anglo Bakhro,* uravde ko parne šeja, a ko vasta sine len granke tari palma. 10 Hem vikinena sine ko celo glaso: „O spasenie avela taro amaro Devel, kova so bešela ko prestol, hem taro Bakhro!“*
11 Sa o angelija tergjona sine okolu o prestol hem okolu o starešine hem o štar suštestvija, pa pele tele hem obožavingje e Devle 12 vakerindor: „Amin! I falba, i slava, i mudrost, i blagodarnost, i čest, i mokj hem i sila tane amare Devleskere zasekogaš. Amin“.
13 Tegani jekh taro starešine pučlja man: „Koj tane akala soj uravde ko parne šeja hem kotar ale?“ 14 Me odma odgovoringjum leske: „Gospodare, tu džanea adava“. Hem ov vakergja mange: „Ola tane adala so avena tari bari nevolja, kola so thovgje pumare šeja hem parnargje len ko e Bakhreskoro* rat. 15 Adaleske ola tane anglo e Devleskoro prestol hem služinena leske dive hem rat ko leskoro hrami. Okova so bešela ko prestol ka phravel plo šatori upri lende. 16 Ola nane više te oven bokhale, a ni žedna, ni o kham nane te tharel len, ni nesavo baro tatipe, 17 soske o Bakhro,* kova soj uzo prestol,* ka ovel lengoro pastiri hem ka ingarel len ko izvorija kotar so thavdela o pani e životoskoro. Hem o Devel ka kosel sekoja asvin taro lengere jakhja“.