Dži ko Filemon
1 Me o Pavle, kova so sium phanlo bašo Hristos Isus, a akate mancar tano hem amaro phral o Timotej, pišinava akava pismo dži tute Filemon, kova so sian amaro manglo phral hem sorabotniko, 2 dži ki Apfija, amari phen, hem dži ko Arhip, kova so služinela verno sar vojniko zaedno amencar, hem dži ko sobranie kova so khedela pe ko tlo kher:
3 Neka ovel tumen o šukaripe so na zaslužinaja le hem o mir taro Devel kova soj amaro Dad hem taro Gospodari o Isus Hristos.
4 Sekogaš blagodarinava man mle Devleske keda spomninava tut ko mle molitve, 5 soske šunava baši tli vera ko Gospodari o Isus hem bašo tlo mangipe sprema leste hem sprema sa o sveta manuša.* 6 Molinava man i vera so isi tut, koja so isi amen da, te kerel te ove svesno baši sekoja šukar buti so isi amen preku o Hristos. 7 But radujngjum man hem ohrabringjum man keda šungjum bašo tlo mangipe mo phral, soske tu ohrabringjan* o vile adalengere soj sveta.*
8 Adaleske, iako isi man bari sloboda e Hristoseske ko anav te zapovedinav tuke te kere adava soj ispravno, 9 me poviše bi mangava te zamolinav tut te kere adava taro mangipe, soske me, o Pavle, kova so sium phuro manuš hem akana sium phanlo bašo Hristos Isus, 10 molinava tut bašo mlo čhavo o Onisim, koleske so uljum sar dad ko zatvor. 11 Ov angle na sine tuke korisno, ama akana tano korisno hem tuke hem mange. 12 Le, kole so but mangava, bičhalava le te iranel pe ki tute.
13 Bi mangava ov te ačhovel akate mancar, te šaj tuke ko than te služinel mange džikote sium phanlo bašo šukar haberi. 14 Ama na mangljum te kerav nešto bizo angleder te pučav tut dali tu ka soglasine tut adalea, soske na mangava te kere nesavo šukaripe adaleske so mora te kere, nego adaleske so mangea. 15 Šaj adaleske da odvojngja pe tutar kratko vreme, te šaj te iranel pe tuke zasekogaš, 16 ama na više sar robo, nego poviše taro robo, sar manglo phral. Me but mangava le, a tu ka mange le panda poviše, soske tano tuke hem robo hem phral ko Gospodari. 17 Adaleske, ako dikhea man sar amal, primin le ko šukar način sar so bi priminea man. 18 Ako grešingja tuke nešto ili ako dužinela tuke nešto, pišin le adava mange ki smetka. 19 Me, o Pavle, pišinava tuke mle vastea: me ka platinav tuke adava. A ni na valjani te spomninav tuke kaj tu dužinea mange čak tlo životo da. 20 Molinava tut phrala, sebepi o Gospodari, pomožin mange. Ohrabrin mlo vilo sebepi o Hristos.
21 Pišinava tuke, soske sium uverimo kaj ka šune man, a džanava kaj ka kere čak poviše taro adava so zamolingjum tut te kere. 22 Osven adava, spremin mange than kote so ka šaj te ačhovav, soske nadinava man kaj sebepi tumare molitve ka ovav oslobodimo hem palem ka avav ki tumende.
23 Pozdravinela tut o Epafras, kova so isto sar mande tano phanlo ko zatvor bašo Hristos Isus. 24 Isto agjaar, pozdravinena tut mle sorabotnikija o Marko, o Aristarh, o Dimas hem o Luka.
25 Amaro Gospodari o Isus Hristos neka sikavel tumenge o šukaripe so na zaslužinaja le adaleske so isi tumen ispravno stavi.