Otkrovenie e Jovaneske
3 E angeleske taro sobranie ko Sard, pišin akava: Akala bukja vakerela len okova so isi le e Devleskere efta sile* hem o efta zvezde: ’Džanava tle postapke, dikhjovea kaj sian dživdo, ama mulo sian. 2 Ov džangavdo hem zajaknin adava so ačhilo hem samo so na mulo, soske na dikhava kaj kerea sa adava so mlo Devel očekujnela tutar. 3 Adaleske, ma bistre adava so primingjan hem adava so šungjan. Ponadari da iker tut ko adava, hem kain tut. Soske, ako na džangavgjovea, ka avav sar čor, hem nane te džane o saati keda ka avav.
4 Ama isi tut ko Sard nekobor džene* kola so na meljargje pumare šeja. Ola ka džan mancar uravde ko parne šeja, soske ola tane dostojna bašo adava. 5 Okova so ka pobedinel, ka ovel uravdo ko parne šeja. Leskoro anav nane te brišinav taro lil e životoskoro, nego ka priznajnav le anglo mlo Dad hem anglo leskere angelija. 6 Kas isi kana neka šunel adava so vakerela o Devel preku pli sila* e sobranienge‘.
7 E angeleske taro sobranie ki Filadelfija pišin akava: Akala lafija vakerela len okova kova soj sveto, čačutno, kole so isi le e Davideskoro klučo, hem keda ov phravela, adava nikoj našti te phandel hem keda ov phandela, adava nikoj našti te phravel: 8 ’Džanava tle postapke. Ake, angli tute phravgjum udar kova so nikoj našti te phandel. Džanava kaj isi tut hari sila, ama sepak ikergjan mle lafija hem dokažingjan kaj sian verno mle anaveske. 9 A okolen tari grupa* so pripadinela e Satanaske, so vakerena kaj tane Evreija, a nane Evreija nego hovavena, ka kerav len te aven hem te pokloninen pe anglo tle pre hem ka kerav te džanen kaj me mangava tut. 10 Adaleske so ikergjan tut ko adava so šungjan baši mli istrajnost,* me da ka arakhav tut ko saati e ispitibaskoro, kova so ka avel upri celi phuv, te šaj te oven ispitime okola so živinena ki phuv. 11 Avava sigate. Cvrsto iker tu ko adava so isi tut, te šaj nikoj te na lel tli kruna.
12 Okole so ka pobedinel, ka kerav le stubo ko mle Devleskoro hrami, hem ov više nane te ikljol lestar. Hem leste ka pišinav o anav mle Devleskoro hem o anav mle Devleskere dizjakoro, o nevo Erusalim, kova so hulela taro nebo, taro mlo Devel. Hem ki leste ka pišinav mlo nevo anav. 13 Kas isi kana neka šunel adava so vakerela o Devel preku pli sila* e sobranienge‘.
14 E angeleske taro sobranie ki Laodikija pišin akava: Akala bukja vakerela len o Amin, o verno hem o čačutno svedoko, o prvo taro sa so stvoringja o Devel: 15 ’Džanava tle postapke, na sian ni šudro ni tato. Te ove sine barem šudro ili tato. 16 Adaleske so sian mlako, ni tato ni šudro, ka čhungarav tut mle mujestar. 17 Soske, tu vakerea: „Barvalo sium, barvaliljum hem ništo na valjani mange“, a na džanea kaj sian žalibaske, kaj sian čorolo, korolo hem nango. 18 Adaleske, sovetinava tut te kine mandar zlato kova soj čistimo ki jag te šaj te ove barvalo. Kin mandar parne šeja te šaj te urave tut hem te na dikhjol tli ladž kaj sian nango. Kin mandar hem mast jakhenge te makhe tle jakhja te šaj te dikhe.
19 Me ukorinava hem vospitinava* sa okolen so mangava. Adaleske ov revno hem kain tut. 20 Ake, tergjovava anglo udar hem khuvava. Ako nekoj šunela mlo glaso hem phravela o udar, ka khuvav ko leskoro kher, ka hav zaedno lea večera hem ov ka hal mancar. 21 Okoleske so ka pobedinel, ka dav le te bešel mancar ko mlo prestol, isto sar me so pobedingjum hem bešljum mle Dadea ko leskoro prestol. 22 Kas isi kana neka šunel so vakerela o Devel preku pli sila* e sobranienge‘“.