O ŠUKAR HABERI SPREMA O MARKO

1 Agjaar počminela o šukar haberi bašo Isus Hristos, e Devleskoro Čhavo: 2 Sar so pišinela ko lil taro proroko Isaija: „(Ka bičhalav angli tute* manuše so anela haberi* hem ov ka spreminel tuke o drumo.) 3 Nekoj vikinela ki pustina: ’Spreminen e Jehovaske* o drumo! Keren leske ramna o drumija‘“. 4 Agjaar o Jovan Krstitel alo ki pustina te propovedinel kaj o manuša valjani te krstinen pe hem agjaar te sikaven kaj kainena pe bašo pumare grevija, te šaj te oven lenge prostime. 5 Adaleske sa o manuša tari Judeja hem sa o žitelija taro Erusalim avena sine ki leste hem ov krstinela len sine ki reka Jordan, a ola javno priznajnena sine pumare grevija. 6 O Jovan uravela sine šeja kerde taro e kamilakere bala, ki polovina sine phanlo kaiši tari koža hem hala sine skakulcija hem divo avgin. 7 Ov propovedinela sine: „Okova so ka avel pali mande tano posilno mandar, me na zaslužinava ni te teljovav hem te phravav leskere sandale. 8 Me krstinava tumen panjea, ama ov ka krstinel tumen e Devleskere silaja“.*

9 Ko adava vreme o Isus taro Nazaret alo ki Galileja hem o Jovan krstingja le ki reka Jordan. 10 Hem odma keda uštilo taro pani dikhlja sar o nebo phravgjola hem sar e Devleskiri sila* hulela upri leste sar gulubi. 11 Tegani o Devel taro nebo vakergja: „Tu sian mo manglo Čhavo! Tu kerea man radosno!“

12 Hem e Devleskiri sila* odma čhivgja le te džal ki pustina. 13 Ačhilo ki pustina 40 dive hem adathe o Satana iskušingja le. Hem sine zaedno e diva životnencar, ama o angelija grižingje pe leske.

14 Otkeda o Jovan sine phanlo, o Isus gelo ki Galileja te propovedinel o šukar haberi taro Devel 15 hem vakerela sine: „Alo o vreme so sine odredimo hem paše tano e Devleskoro Carstvo. Kainen tumen hem verujnen ko šukar haberi“.

16 Džikote phirela sine uzo Galilejsko More, dikhlja e Simone hem leskere phrale e Andree sar frdena pumare mreže ko more, soske sine ribarija. 17 Tegani o Isus vakergja lenge: „Aven pali mande hem me ka kerav tumen ribarija so astarena manušen“. 18 Ola odma mukhle pumare mreže hem gele pali leste. 19 Otkeda gelo hari ponadari, dikhlja e Jakove, e Zevedeeskere čhave, hem leskere phrale e Jovane sar sivena sine pumare mreže ko pumaro čamco, 20 hem ov vikingja len odma. Tegani ola mukhle ple dade e Zevedee zaedno e rabotnikoncar ko čamco hem gele pali leste. 21 Tegani ola gele e Isusea ko Kapernaum.

Ko sabat* ov gelo ki sinagoga* hem počmingja te sikavel e manušen. 22 A o manuša sine vooduševime taro način sar sikavela len sine, soske ov sikavela len sine sar nekoj so isi le avtoriteti taro Devel, a na sar o učitelija e zakoneskere. 23 Tegani ki sinagoga sine jekh manuš so sine le demoni.* Ov vikinela sine: 24 „Isus, tu o Nazarekjanco, so mangea amendar? Aljan li te uništine amen? Me but šukar džanava koj sian tu! Tu sian o Sveto sluga e Devleskoro!“ 25 A o Isus strogo zapovedingja leske: „Čutin, hem ikljov lestar!“ 26 Tegani o demoni kergja o manuš te grčingjovel hem te vikinel celo glasoja, pa palo adava iklilo lestar. 27 A sa o manuša sine doborom vooduševime so počmingje te vakeren maškar peste: „Soj akava? Nevo sikajbe! Isi le vlast čak te zapovedinel e demonenge,* hem ola šunena le“. 28 Tegani baši leste sigate šundilo ko sa o strane tari celo Galileja.

29 Palo adava iklile tari sinagoga hem gele e Jakovea hem e Jovanea ko kher e Simoneske hem e Andreeske. 30 A e Simoneskiri sasuj pašljola sine nasvali soske sine la temperatura hem ola odma vakergje e Isuseske baši late. 31 Ov gelo uzi late, astargja la taro vas hem vazdingja la. Tegani na sine la više temperatura hem počmingja te spreminel lenge hajbaske.

32 A akšameske, keda pelo o kham, o manuša angje ki leste sa okolen so sine nasvale hem so sine len demonija. 33 Hem celi diz khedingja pe anglo udar. 34 Agjaar sasljargja buten so sine nasvale taro razna nasvalipa hem paldingja bute demonen, ama na dozvolingja e demonenge te keren lafi, soske ola džanena sine kaj ov tano o Hristos.*

35 A rano sabajle, džikote panda sine temnica, uštilo hem gelo ko jekh than kote so šaj sine te ovel korkori hem adathe molingja pe. 36 A o Simon hem okola so sine lea, rodena le sine segde 37 hem keda arakhle le, vakergje leske: „Sarine rodena tut“. 38 Ama ov vakergja lenge: „Ajde te dža javerthe, ko thana soj paše, te šaj adari da te propovedinav, soske adaleske aljum“. 39 Agjaar gelo ki celo Galileja hem propovedinela sine ko lengere sinagoge hem paldela sine e demonen.

40 Tegani, ki leste alo jekh manuš so sine le lepra, pelo ko kočaka hem molingja le: „Ako tu mangea, šaj te sasljare man“. 41 E Isuseske pelo žal, adaleske pružingja plo vas, pipingja le hem vakergja leske: „Mangava, sasljov!“ 42 Hem i lepra odma našavdili lestar hem ov sastilo. 43 Angleder o manuš te džal peske, o Isus strogo naredingja leske: 44 „Pazin ma te vakere nekaske, nego dža neka dikhel tut o svešteniko hem de žrtva bašo adava so sian čisto, sprema e Mojseeskoro zakoni, te šaj o sveštenikija te dikhen kaj čače sastiljan“. 45 Ama samo so gelo peske, o manuš počmingja te vakerel sarinenge hem te širinel segde adava so slučingja pe. Adaleske, o Isus našti sine te khuvel ki nijekh diz bizo te privlekujnel vnimanie, nego ačhola sine avrijal ko pusta thana. Sepak o manuša taro sa o strane avena sine ki leste.

2 Palo nesave dive, o Isus palem alo ko Kapernaum hem šundilo kaj tano ko jekh kher.* 2 Adaleske, ale doborom but džene hem khedingje pe ko kher so više na sine than, čak ni anglo udar. Tegani ov počmingja te vakerel lenge bašo e Devleskoro lafi. 3 Nesave manuša angje ki leste jekhe manuše so sine paralizirimo. Štar džene ingarena le sine. 4 Ama ola našti sine te anen le dži ko Isus soske sine but manuša. Adaleske phravgje o krovi hem upraldan mukhle i nosilka kolate so pašljola sine o paralizirimo manuš. 5 Keda o Isus dikhlja lengiri vera, vakergja e manušeske so sine paralizirimo: „Mo čhavo, tle grevija tane prostime“. 6 A adathe sine nesave taro učitelija e zakoneskere kola so bešena sine hem mislinena sine ki peste: 7 „Soske agjaar kerela lafi akava manuš? Ov kerela lafi protiv o Devel. Nikoj našti te prostinel o grevija, samo o Devel šaj“. 8 A o Isus odma halilo kaj ola agjaar razmislinena, adaleske vakergja lenge: „Soske agjaar razmislinena? 9 Soj tano polokho te vakerel pe akale manušeske soj paralizirimo: ’Prostime tane tle grevija‘ ili: ’Ušti, le tli nosilka hem phir‘? 10 Ama mangava te džanen kaj e manušikane Čhave* isi le avtoriteti te prostinel o grevija ki phuv“. Tegani vakergja e manušeske so sine paralizirimo: 11 „Vakerava tuke: ušti, le tli nosilka hem dža tuke khere“. 12 Hem ov uštilo, odma lelja pli nosilka hem angli sarinende iklilo avrijal. A sa o manuša sine vooduševime hem falingje e Devle e lafencar: „Nikogaš na dikhlem asavko nešto“.

13 O Isus palem gelo kaj o Galilejsko More hem sa o manuša avena sine ki leste hem ov sikavela len sine. 14 Džikote nakhela sine adathar, dikhlja e Levi, o čhavo e Alfeeskoro, sar bešela ko than kote so khedela pe danok hem vakergja leske: „Ov mlo učeniko“. Tegani ov uštilo hem gelo pali leste. 15 Palo adava o Isus alo ko Levi hem bešlja te hal maro ko leskoro kher. But manuša so khedena sine danok hem but grešnikija isto agjaar bešle te han maro lea hem leskere učenikoncar. But džene taro adala so sine adathe džana sine palo Isus. 16 Ama keda o učitelija e zakoneskere hem o fariseija* dikhle kaj ov hala e grešnikoncar hem e danočnikoncar, vakergje leskere učenikonge: „Soske ov hala maro e danočnikoncar hem e grešnikoncar?“ 17 Keda o Isus šungja adava, vakergja lenge: „E sastenge na valjani doktori, nego e nasvalenge. Na aljum te vikinav e pravedna manušen, nego e grešnikon“.

18 A e Jovaneskere učenikija hem o fariseija sine len običaj te postinen. Adaleske nesave ale ki leste hem pučle le: „Soske o učenikija e Jovaneskere hem o učenikija e fariseengere postinena, a tle učenikija na postinena?“ 19 O Isus vakergja lenge: „O amala e džamutreskere nane soske te postinen džikote o džamutro tano lencar. Sa džikote o džamutro tano lencar, ola našti te postinen. 20 Ama ka aven dive keda o džamutro nane te ovel lencar* hem tegani ko adala dive ola ka postinen. 21 Nikoj na sivela nevo kotor upro purano šej, soske ako kerela agjaar o nevo kotor ka pharavgjovel taro purano šej hem i dupka ka ovel panda pobari. 22 Isto agjaar, nikoj na čhivela taze mol ko purane šišija kerde tari koža,* soske ako kerela agjaar i mol ka pharavel o kože hem i mol ka džal zijani, a o šišija ka našti više te koristinen pe. Adaleske i taze mol čhivela pe ko neve šišija“.

23 Ko jekh sabat* o Isus nakhela sine taro nive givea hem leskere učenikija ko nakhibe počmingje te čhinen o giv. 24 Tegani o fariseija* vakergje leske: „Dikh, soske ola kerena adava so na smejnena te keren ko sabat?“ 25 Ama ov vakergja lenge: „Nikogaš li na čitingjen so kergja o David keda ačhilo bizo hajbe hem keda ov hem o manuša so sine lea bokhalile? 26 Na čitingjen li ko izveštaj bašo glavno svešteniko o Avijatar, kaj o David khuvgja ko e Devleskoro kher hem halja o mare so sine dende sar žrtva anglo Devel, kola so nikoj na smejnela sine te hal, nego samo o sveštenikija, a isto agjaar dengja e manušenge so sine lea?“ 27 Palo adava vakergja lenge: „O sabat sine kerdo bašo manuš, a na o manuš bašo sabat. 28 Adava značinela kaj o manušikano Čhavo* tano Gospodari so isi le avtoriteti čak upro sabat“.

3 Ov palem khuvgja ki sinagoga,* hem jekh manuš so sine le paralizirimo vas* sine adathe. 2 O fariseija* vnimatelno dikhena sine dali o Isus ka sasljarel e manuše ko sabat,* te šaj te obvininen le. 3 Ov vakergja e manušeske so sine le paralizirimo vas:* „Ušti hem ava ko maškar“. 4 Palo adava ov pučlja e fariseen: „Sprema o Zakoni, so šaj te kerel pe ko sabat? Šaj li te kerel pe šukaripe ili lošnipe, te spasinel pe životo ili te mudarel pe?“ Ama ola samo čutinena sine. 5 Ov holjamo dikhlja len hem sine but razočarimo adaleske so na sine len žal ko lengere vile. Tegani ov vakergja e manušeske: „Pružin tlo vas!“ Hem o manuš pružingja plo vas, hem leskoro vas sastilo. 6 Keda dikhle adava, o fariseija iklile hem odma khedingje pe e Irodeskere sledbenikoncar te dogovorinen pe sar te mudaren le.

7 Ama o Isus zaedno ple učenikoncar cidingja te džal ko more, hem but manuša tari Galileja hem tari Judeja džana sine pali leste. 8 Keda šungje sa so kerela, but manuša ale ki leste. Čak taro Erusalim, tari Idumeja, tari okoja strana taro Jordan hem taro okolna thana taro Tir hem Sidon. 9 Tegani ov vakergja ple učenikonge te spreminen leske jekh čamco te šaj o manuša te na gurinen pe ki leste. 10 Adaleske so sasljargja buten, sa okola so sine but nasvale gurinena pe sine ki leste te šaj te pipinen le. 11 Čak okola so sine len demonija, keda dikhena le sine, perena sine angli leste hem vikinena sine: „Tu sian e Devleskoro Čhavo!“ 12 Ama but puti ov strogo zapovedinela lenge sine nikaske te na vakeren koj tano ov.

13 Palo adava ov uklilo ki planina, vikingja nesaven taro ple učenikija hem ola ale ki leste. 14 Tegani ov kergja jekh grupa taro 12 manuša kolen so vikingja apostolija, te šaj sekogaš te oven lea, te bičhalel len te propovedinen, 15 hem te del len sila te palden e demonen.

16 Hem ki grupa so kergja la taro 12 manuša sine: o Simon, kaske so isto agjaar dengja o anav Petar, 17 e Zevedeeskoro čhavo o Jakov hem leskoro phral o Jovan (ov isto agjaar dengja len o anav Voanerges so značinela „o čhave e gromoskere“), 18 o Andrej, o Filip, o Vartolomej, o Matej, o Toma, o Jakov o čhavo e Alfeeskoro, o Tadej, o Simon o Revno* 19 hem o Juda Iskariot, kova so pokasno predajngja le.

Palo adava khuvgja ko jekh kher. 20 Palem khedingje pe doborom but manuša so čak o Isus hem leskere učenikija našti sine te han maro. 21 Ama keda leskiri familija šungja so slučinela pe, ale te len le hem vakerena sine: „Ov delindilo“. 22 Isto agjaar o učitelija e zakoneskere, so ale taro Erusalim, vakerena sine: „Lea tano o Velzevul,* hem ov paldela e demonen adaleske so pomožinela le o vladeteli e demonengoro“. 23 Tegani o Isus vikingja len hem kergja lencar lafi agjaar so koristingja primerija: „Sar šaj o Satana te paldel e Satana? 24 Ako ko jekh carstvo nane sloga, adava carstvo ka propadinel. 25 Hem ako ko jekh kher nane sloga, adava kher ka propadinel. 26 Isto agjaar, ako o Satana tano protiv peste hem ko leskoro carstvo nane sloga, adava carstvo nane te ačhol hem ka propadinel. 27 Ustvari nikoj našti te khuvel ko kher jekhe zorale manušeskoro hem te čorel lestar, sa džikote prvo na phandela adale zorale manuše. Samo tegani šaj te čorel lestar sa so isi le ko kher. 28 Čače vakerava tumenge, kaj sa o bukja ka oven prostime e manušenge, bizi razlika save grevija kerena hem save navredliva hem hovavne lafija vakerena. 29 Ama okova so vakerela navredliva hem hovavne lafija protiv e Devleskiri sila,* nikogaš nane te ovel leske prostimo, nego ka ovel krivo bašo plo grevo zasekogaš“. 30 Ov vakergja akava soske o manuša vakerena sine: „Le isi le demoni“.*

31 Palo adava ali leskiri daj hem leskere phralja hem džikote tergjona sine avrijal, bičhalgje nekas te vikinel le. 32 A okolu leste bešena sine but manuša hem vakergje leske: „Dikh, ti daj hem te phralja tane avri hem vikinena tut“. 33 Ama ov vakergja lenge: „Koj tani mi daj hem kola tane me phralja?“ 34 Tegani dikhlja ko manuša so bešena sine okolu leste hem vakergja: „Ake mi daj hem me phralja! 35 Sekoj so kerela e Devleskiri volja, ov tano mo phral, mi phen hem mi daj“.

4 Ov palem počmingja te sikavel e manušen uzo more, hem but manuša khedingje pe okolu leste. Adaleske ov uklilo, bešlja ko jekh čamco hem cidingja pe taro brego, a o manuša sine ko brego uzo more. 2 Počmingja te sikavel len but bukja, agjaar so koristingja sporedbe, hem vakergja: 3 „Šunen! Jekh manuš iklilo te frdel seme ki niva. 4 Džikote frdela sine, nesavo seme pelo uzo drumo, ale o čirikle hem hale le. 5 A nesavo seme pelo ko than kote so sine but bara, a na sine dovolno phuv. Hem adaleske so i phuv na sine hor, ov odma počmingja te bajrol. 6 Ama keda iklilo o kham, ov thargja le hem adaleske so na sine le koreno, šukilo. 7 A javer seme pelo maškar o kare, hem o kare barile hem zagušingje le, adaleske na dengja plodi. 8 A javer seme pelo ki šukar phuv. Barilo, hem počmingja te del plodi, but puti poviše taro adava so sine sejmo. Hem dengja plodi 30, 60 hem 100 puti poviše“. 9 Hem vakergja: „Kas isi kana, neka šunel“.

10 A keda sine korkori, okola so sine okolu leste, zaedno e 12 apostolencar, pučle le so značinena o sporedbe. 11 Ov vakergja lenge: „Tumenge tano dendo te haljoven e Devleskere tajne* bašo leskoro Carstvo, a okola soj avrijal, sa so ka šunen ka ačhol lenge samo sar sporedba, 12 soske iako ple jakhencar ka dikhen, sar te phene nane te dikhen, iako ple kanencar ka šunen, ama nane te haljon, ni nane te iranen pe ko Devel te šaj te prostinel lenge“. 13 Isto agjaar vakergja lenge: „Ako na haljovena akaja sporedba, sar tegani ka haljoven sa o javera sporedbe?

14 O seme so frdela o manuš tano o haberi bašo Carstvo. 15 O seme so pelo uzo drumo, tane okola kola so, samo so šungje o haberi, o Satana avela hem lela o haberi so sine sejmo ki lende. 16 A o seme so pelo ko than kote so sine but bara, tane okola so, samo so šunena o haberi, radosno prifatinena le. 17 Ama, adaleske so o haberi na mukhlja koreno ki lende, ola ikerena pe nesavo vreme, ama keda avena o nevolje ili o progonstvo bašo haberi, ola odma perena. 18 A o seme so pelo maškar o kare, tane okola so šungje o haberi, 19 ama o sekiracie bašo životo ko akava sveto,* o barvalipe so hovavela hem o želbe bašo bilo so javer, khuvena andre ko vilo hem zagušinena o haberi, hem ov na dela plodi. 20 Ko krajo, o seme so perela ki šukar phuv, tane okola so šunena o haberi hem spremno prifatinena le, pa dena plodi 30, 60 hem 100 puti poviše“.

21 Ov isto agjaar vakergja lenge: „Tharela pe li i lampa te čhivel pe teli korpa* ili telo kreveti? Na tharela pe li i lampa te čhivel pe ko astali? 22 Soske sa soj tajno, ka otkrinel pe, hem sa soj šukar garavdo, ka ikljol ko megdani. 23 Kas isi kana neka šunel“.

24 Isto agjaar vakergja lenge: „Šunen šukar adava so ka vakerav tumenge akana. Save merkaja merinena, asavke merkaja ka merinel pe tumenge, hem ka del pe tumenge poviše. 25 Soske okole so isi le, ka del pe leske panda, a okole so nane le, ka lel pe lestar adava da so isi le“.

26 Palo adava vakergja lenge: „E Devleskoro Carstvo tano sar jekh manuš so frdela seme ki phuv. 27 Rakjate sovela, diveste uštela, a o seme niknonela hem bajrola, a ov ni na džanela sar. 28 I phuv korkori pestar hari po hari anela plodi: prvo steblo, palo adava klasi* hem ko krajo, celo zrno ko klasi. 29 Hem keda o plodi ka resljol, ov čhinela le soske alo o vreme baši žetva“.

30 Isto agjaar vakergja lenge: „Solea šaj te sporedina e Devleskoro Carstvo? Save sporedbaja šaj te objasnina le? 31 Ov tano sar jekh seme taro sinap,* kova so keda sadinela pe ki phuv, tano o najtikno taro sa o semija ki phuv. 32 Ama keda sadinela pe, ov bajrola hem ovela pobaro taro sa o javera rastenija ki gradina hem isi le but granke, kote so o čiriklja kerena peske gnezdija teli leskiri senka“.

33 Bute asavke sporedbencar vakerela lenge sine bašo haberi,* doborom kobor so šaj sine te haljoven. 34 Ustvari, bizo sporedbe na sikavela len sine, a keda sine korkori ple učenikoncar, objasninela lenge sine sa.

35 Adava dive keda počmingja te rakjol, vakergja lenge: „Te dža tari okoja strana taro more“. 36 Otkeda mukhlja e narodo te džal peske, o učenikija uklile ko čamco kote so više sine o Isus, hem gele tari okoja strana taro more. A pali lende džana sine javera da čamcija. 37 Taro jekh puti počmingja bari bura hem o branija khuvena sine ko čamco, a o čamco haričkaske ka batinel sine ko pani. 38 A ov sine ko paluno delo taro čamco hem sovela sine ko jastuko. Tegani o učenikija vazdingje le hem vakergje leske: „Učitele, na dikhea li kaj ka mera?“ 39 Tegani ov uštilo, naredingja e bavlalake hem vakergja e moreske: „Čhinav! Smirin tut!“ Tegani i bavlal ačhili hem uli bari tišina. 40 Hem vakergja lenge: „Soske doborom darana? Panda li nane tumen vera?“ 41 A len uklingja len bari dar, hem vakergje jekh jekheske: „Koj tano akava manuš so čak i bavlal hem o more šunena le?“

5 Tegani ola ale ki javer strana taro more ko gerasinsko podračje. 2 Hem odma otkeda o Isus iklilo taro čamco, jekh manuš so sine le demoni* iklilo taro than kote so sine o grobija hem alo ki leste. 3 Ov živinela sine maškar o grobija hem dži tegani nikoj našti sine te ikerel le phanlo, čak ni sindžirencar. 4 But puti phandena sine leskere vasta hem o pre sindžirencar, ama ov čhinela sine hem phagela sine o sindžirija, hem nikas na sine le sila te smirinel le. 5 Dive hem rat pištinela sine ko grobija hem ko planine hem khuvela pe sine barencar. 6 Ama keda duraldan dikhlja e Isuse, prastandilo ki leste hem pokloningja pe leske. 7 Tegani ov glasno vikingja: „So mangea mandar Isus, tu o Čhavo e Najbare Devleskoro? Dava tut sovli upro Devel te na mučine man“. 8 O demoni vakergja akava soske o Isus angleder vakergja leske sine: „Ikljov taro akava manuš!“ 9 Hem o Isus pučlja le: „Sar i tlo anav?“ Hem ov odgovoringja leske: „Mlo anav tano Legija,* soske siem but“. 10 Hem uporno molinela sine e Isuse te na brkinel len taro adava than.

11 A but bale hana sine peske adathe ki planina. 12 Adaleske o demonija molinena le sine: „Bičhal amen ko bale, te šaj te khuva ki lende“. 13 Hem ov dozvolingja lenge. Tegani o demonija* iklile taro manuš hem khuvgje ko bale, hem o bale frdingje pe tari karpa ko more. Sine okolu 2.000 hem sa taslile ko pani. 14 A o manuša so arakhena sine e balen našle hem vakergje e manušenge tari diz hem taro okolna thana, hem o manuša ale te dikhen so slučingja pe. 15 Tegani ola ale ko Isus hem keda dikhle e manuše so sine le demonija, okole so sine le jekh legija demonija, sar bešela uravdo hem kaj alo upri peste, ola darandile. 16 Okola so dikhle adava, raskažingje lenge so slučingja pe e manušea so sine le demonija hem e balencar. 17 Adaleske počmingje te molinen e Isuse te džal peske taro lengoro than.

18 Džikote o Isus khuvela sine ko čamco, o manuš so sine le demonija molinela le sine te džal lea. 19 Ama ov na dozvolingja leske, nego vakergja leske: „Dža tuke khere ki tli familija, hem vaker lenge sa o bukja so kergja tuke o Jehova* hem sar sikavgja tuke milost“. 20 Akava manuš gelo peske hem počmingja te vakerel ko Dekapolis* bašo sa o bukja so o Isus kergja baši leste, hem sa o manuša sine vooduševime.

21 Otkeda o Isus čamcoja gelo ki javer strana taro more, but manuša khedingje pe okolu leste, a ov ačhilo uzo more. 22 Jekh taro glavna manuša so sine ki sinagoga,* so vikinela pe sine Jair, alo hem keda dikhlja le, pelo ko kočaka angli leste. 23 Hem uporno molinela le sine hem vakerela sine: „Mi tikni čhaj tani but nasvali. Molinava tut ava hem sasljar la,* te šaj te živinel“. 24 Tegani o Isus gelo lea hem but manuša džana sine pali leste hem gurinena pe sine ki leste.

25 A adathe sine jekh džuvli koja so 12 berš krvarinela sine. 26 Oj cidingja but muke taro različna doktorija, hem trošingja sa so sine la, ama ništo na pomožingja lake, nego uli sa pološno. 27 Keda šungja bašo Isus, oj palaldan guringja pe maškar o manuša hem pipingja leskiri nametka, 28 soske mislingja peske: „Ako pipinava samo leskiri nametka, ka sasljovav“. 29 Hem odma čhinavgja te krvarinel, hem osetingja ko telo kaj sastili taro adava mučno nasvalipe.

30 O Isus odma osetingja kaj iklili lestar sila, irangja pe ko narodo hem pučlja: „Koj pipingja mli nametka?“ 31 A leskere učenikija odgovoringje leske: „Dikhea kaj isi but manuša so gurinena pe ki tute, a tu pučea: ’Koj pipingja man?‘“ 32 Sepak ov dikhela sine okolu peste te šaj te doznajnel koj pipingja le. 33 A i džuvli džanlja so slučingja pe lake, hem adaleske počmingja te tresinel tari dar, pa ali, peli ko kočaka angli leste hem vakergja leske sa. 34 A ov vakergja lake: „Mi čhaj, tli vera sasljargja tut, dža tuke ko mir hem sasljov taro tlo pharo nasvalipe“.

35 Džikote panda kerela sine lafi, nesave manuša taro e Jaireskoro kher ale hem vakergje e Jaireske: „Ti čhaj muli! Ma mučin više e Učitele“. 36 Keda o Isus šungja len so kerena lafi, vakergja e Jaireske: „Ma dara, samo sikav vera!“ 37 Hem na dozvolingja nikaske te avel lea, osven e Petareske, e Jakoveske hem e Jovaneske, o phral e Jakoveskoro.

38 Keda ale e Jaireske ko kher, o Isus dikhlja e manušen sar kerena bari galama, sar rovena hem sar vikinena. 39 Otkeda khuvgja andre, ov vakergja lenge: „Soske rovena hem kerena galama? I čhaj na muli, nego sovela“. 40 Tegani o manuša počmingje te asan leske. Ama ov brkingja sarinen avrijal, lelja e čhajakere dade hem daja hem okolen so sine lea, hem khuvgja adathe kote so sine i čhaj. 41 Tegani astargja e čhajakoro vas, hem vakergja lake: „Talita kumi“, so značinela: „Čhaje, tuke vakerava, ušti!“ 42 Hem i čhaj odma uštili hem počmingja te phirel, a sine la 12 berš. Hem keda dikhle adava ola na džanle so te keren tari radost. 43 Ama ov nekobor puti zapovedingja lenge te na vakeren nikaske bašo adava. Hem vakergja te den nešto e čhajake te hal.

6 Otkeda gelo peske adathar, o Isus alo ki pli diz hem leskere učenikija ale lea. 2 Ko sabat* počmingja te sikavel e manušen ki sinagoga* hem but taro adala so šunena le sine, vooduševingje pe hem vakergje: „Kote siklilo akava manuš sa akala bukja? Kotar leske asavki mudrost hem koj dengja le sila te kerel asavke čudija? 3 Nane li akava o stolari, o čhavo e Marijakoro, o phral e Jakoveskoro, e Josifeskoro, e Judaskoro hem e Simoneskoro? Nane li o phenja leskere akate amencar?“ Hem ola na mangena sine te verujnen ki leste. 4 A o Isus vakergja lenge: „O proroko tano poštujmo segde, samo na ki pli diz, tari pli familija hem ko plo kher“. 5 Adaleske adathe na kergja nisavo čudo, osven so sasljargja nesave manušen.* 6 Sine iznenadimo so e manušen na sine len vera, adaleske gelo ko gava so sine paše hem sikavela sine e manušen.

7 Palo adava vikingja e 12 apostolen hem počmingja te bičhalel len duj po duj te džan te propovedinen hem dengja len vlast upro demonija. 8 Isto agjaar zapovedingja lenge te na len pea ništo ko drumo, ni maro, ni torba, ni pare* ko pojas, osven kaš, 9 te uraven sandale hem te na phiraven duj nametke. 10 Palo adava vakergja lenge: „Ko kova kher ka khuven, ačhoven adathe sa džikote na džana tumenge taro adava than. 11 A ako ko nesavo than na priminena tumen hem na šunena tumen, ko ikljojbe taro adava than tresinen o pravo taro tumare pre, agjaar ka sikaven lenge kaj sine predupredime“. 12 Tegani ola gele hem propovedinena sine kaj o manuša valjani te kainen pe, 13 paldena sine bute demonen, makhena sine masloja bute nasvalen hem sasljarena len sine.

14 Bašo akava šungja o cari o Irod,* soske o manuša segde kerena sine lafi bašo Isus hem vakerena sine: „O Jovan Krstitel voskresningja taro mule hem adaleske kerela čudija“. 15 A nesave vakerena sine: „Adava tano o Ilija“. A javera vakerena sine: „Ov tano proroko sar o prorokija taro purano vreme“. 16 Ama keda o Irod šungja bašo Isus vakergja: „Ov tano o Jovan, so čhingjum o šero leskoro, ov voskresningja“. 17 Soske, o Irod sine adava so astargja e Jovane hem frdingja le ko zatvor baši Irodijada, i romni leskere phraleskiri e Filipeskiri, kola so o Irod lelja romnjake. 18 Soske, o Jovan vakerela sine e Irodeske: „O Zakoni na dozvolinela tuke te le tle phraleskere romnja“. 19 A i Irodijada mrzinela sine e Jovane hem mangela sine te mudarel le, ama našti sine, 20 soske o Irod darala sine taro Jovan. Ov džanela sine kaj o Jovan tano pravedno manuš hem kaj služinela e Devleske, hem adaleske zaštitinela le sine. Sekova puti keda šunela sine e Jovane, sine bunimo hem na džanela sine so te kerel lea, ama sepak mangela sine te šunel le.

21 Ama i Irodijada arakhlja šukar prilika te kerel adava so manglja, keda o Irod ko plo bijando dive kergja bari gozba hem vikingja ple manušen so sine ki bari položba, e komandanten* hem e najvažna manušen tari Galileja. 22 E Irodijadakiri čhaj ali hem počmingja te khelel. Adava svidžingja pe but e Irodeske hem leskere gostonge, adaleske o cari vakergja e čhajake: „Rode mandar sa so mangea hem me ka dav tut“. 23 Hem halja sovli: „Sa so ka mange ka dav tut, čak ekvaš taro mlo carstvo“. 24 A oj iklili hem pučlja ple daja: „So te rodav?“ I daj vakergja lake: „E Jovan Krstiteleskoro šero“. 25 Hem oj odma prastandili ko cari hem vakergja: „Mangava odma te de man ko poslužavniko o šero e Jovan Krstiteleskoro“. 26 Iako o cari but razočaringja pe, ama baši sovli so dengja hem bašo gostija, na manglja te odbinel la. 27 Tegani o cari odma bičhalgja ple vojniko hem zapovedingja leske te anel e Jovaneskoro šero. Adaleske ov gelo, čhingja o šero leskoro ko zatvor 28 hem angja le ko poslužavniko. Dengja le e čhajake, a i čhaj ingargja le ple dajake. 29 Keda e Jovaneskere učenikija šungje bašo adava, ale, lele leskoro telo hem parungje le.

30 O apostolija khedingje pe ko Isus hem vakergje leske sa so kergje hem sar sikavgje e manušen. 31 Tegani ov vakergja lenge: „Aven mancar ko jekh than kote so nane nikoj hem odmorinen tumen hari“. Soske, but džene avena hem džana sine, so čak na sine len vreme ni maro te han. 32 Adaleske gele e čamcoja ko jekh than te oven korkori. 33 Ama o manuša dikhle len sar džana hem but džene šungje bašo adava. Adaleske o manuša taro sa o dizja sigate phirgje peški hem resle angli lende. 34 A keda iklilo taro čamco, dikhlja bute manušen hem pelo leske žal baši lende, soske sine sar bakhre bizo pastiri. Hem počmingja te sikavel len bašo but bukja.

35 Angleder o akšami, leskere učenikija ale ki leste hem vakergje leske: „Akava than tano pusto hem akana tano više kasno. 36 Mukh e manušen te džan ko gava hem ko okolna thana te šaj te kinen peske nešto hajbaske“. 37 Tegani ov vakergja lenge: „Tumen den len nešto te han“. A ola pučle le: „Te dža li te kina maro bašo 200 denarija,* pa te da len te han?“ 38 Ov pučlja len: „Kobor mare isi tumen? Džan hem dikhen“. Keda dikhle, vakergje: „Pandž, hem duj mačhe“. 39 Hem vakergja sarinenge te bešen tele ki zeleno čar ko grupe. 40 Adaleske kergje grupe taro 100 hem 50 džene, hem bešle. 41 Ov lelja o pandž mare hem o duj mačhe, dikhlja upre ko nebo hem molingja pe. Palo adava, phaglja o mare hem dengja ple učenikonge te den e manušenge. Isto agjaar, o duj mačhe delingja sarinenge. 42 Agjaar sarine hale hem čalile. 43 Hem khedingje sa adava so ačhilo taro mare, sine 12 pherde korpe, hem adava so ačhilo taro mačhe. 44 A okola so hale taro mare sine 5.000 murša.

45 Odma palo adava vakergja ple učenikonge te uklen ko čamco hem te džan ki javer strana taro more, nakaj i Vitsaida, a ov ačhilo te mukhel e narodo te džal peske khere. 46 Keda o manuša gele peske, ov gelo ki planina te molinel pe. 47 Akšameske o čamco sine maškar o more, a o Isus sine korkori ki planina. 48 Keda dikhlja ple učenikon sar mučinena pe te upravinen e čamcoja adaleske so sine bari bavlal, angleder te ikljol o kham,* ov alo ki lende agjaar so phirgja upro more. Ama dikhjola sine sar te phene ka nakhel uzi lende. 49 Keda o učenikija dikhle le sar phirela upro more, mislingje peske: „Soj akava so avela?“* Hem počmingje te vikinen. 50 Soske, sarine dikhle le hem darandile. Ama o Isus odma vakergja lenge: „Oven hrabra! Me sium, ma daran!“ 51 Tegani khuvgja lencar ko čamco hem i bavlal smiringja pe. A keda dikhle akava o učenikija but čudingje pe, 52 soske na halile so značinela o čudo so kergja e marencar. Lengere vile ponadari da našti sine te haljon adava.

53 Keda nakhle tari okoja strana taro more, ola ale ko Genisaret hem ačhile adathe e čamcoja uzo brego. 54 Ama samo so iklile taro čamco, o manuša pendžargje le. 55 Adaleske počmingje te prastan hem te vakeren e javerenge so živinena sine ko adava than hem počmingje te anen e nasvalen ko nosilke ko than kote so šungje kaj tano o Isus. 56 Hem keda avela sine ko bilo kova gav, diz ili naselba, o manuša anena sine e nasvalen ko ploštadija hem molinena le sine barem te pipinen o reske taro leskere šeja. Hem sarine so kergje adava sastile.

7 O fariseija* hem nesave učitelija e zakoneskere so ale taro Erusalim khedingje pe okolu o Isus. 2 Tegani ola dikhle kaj leskere učenikija hana maro bithovde vastencar, ustvari kaj na thovgje pumare vasta sprema lengoro običaj. 3 (Soske, o fariseija hem o Evreija na hana sine maro sa džikote na thovena sine pumare vasta dži ko lakto, agjaar ikerena pe sine ki tradicija taro lengere parapapija. 4 Keda iranena pe taro pazari, na hana maro sa džikote na thovena pe pajnea. Hem ikerena javera da tradicie, sar soj te čhiven telo pani* o čaše, o bukalija hem o bakarna čare.) 5 Adaleske o fariseija hem o učitelija e zakoneskere pučle le: „Soske tle učenikija na ikerena pe ki tradicija so ačhili taro amare parapapija, nego hana maro bizo te thoven pumare vasta sprema o običaj?“ 6 A ov vakergja lenge: „O Isaija šukar prorokujngja baši tumende, licemerna, keda pišingja: ’Akava narodo poštujnela man mujea, ama leskoro vilo tano dur mandar. 7 Džabe so obožavinena man, soske adava so sikavena tane samo manušikane zapovedija‘. 8 Tumen mukhena e Devleskere zapovedija, a ikerena tumen ko manušikane tradicie“.

9 Isto agjaar, vakergja lenge: „Džanle sien soske šukar džanena sar te otfrlinen e Devleskiri zapoved te šaj te ikeren tumen ko tumare tradicie. 10 Na primer, o Mojsej vakergja: ’Poštujn tle dade hem tle daja‘, hem ’Koj ka vakerel navredliva lafija ple dadeske ili ple dajake, te ovel mudardo‘. 11 A tumen vakerena: ’Jekh manuš šaj te vakerel ple dadeske ili ple dajake: „Adava so isi man, a so šaj te pomožinel tumenge, tano kurbani (adava tano poklon dendo e Devleske).“‘ 12 Agjaar na mukhena adale manuše te kerel nešto ple dadeske ili ple dajake. 13 Agjaar tumare tradicijaja so prenesinena la e javerenge, kergjen e Devleskoro lafi te na važinel, hem kerena panda but asavke bukja“. 14 Tegani palem vikingja e narodo ki peste hem vakergja: „Šunen man sarine hem haljoven akava! 15 Ništo taro adava so khuvela ko manuš avrijaldan na meljarela le, nego adava so ikljola taro manuš, adava meljarela le“. 16* --

17 A keda gelo peske taro manuša, o Isus khuvgja ko jekh kher, hem leskere učenikija pučle le so značinela adava so vakergja. 18 A ov vakergja lenge: „Tumen da li sar lende na haljovena? Na džanena li kaj sa adava so khuvela avrijaldan ko manuš na meljarela le? 19 Soske na khuvela andre ko vilo, nego ko vogi, hem taro vogi ikljola avri“. Adalea vakergja kaj sekova hajbe tano čisto. 20 Isto agjaar vakergja: „Sa so ikljola taro manuš, adava kerela le melalo. 21 Soske andral, taro e manušeskoro vilo, ikljona lošna misle kola so anena dži ko nemoral,* čoribe, mudaribe, 22 preljuba, alčnost, lošnipa, prevara, bezobrazno ponašibe, zavidlivo jakh, te kerel pe lafi protiv o Devel, te ovel pe čalmdžija hem nerazumno. 23 Sa akala lošna bukja ikljovena andral hem meljarena e manuše“.

24 Tegani uštilo hem gelo adathar ko okolna thana taro Tir hem Sidon. Khuvgja ko jekh kher hem na mangela sine nikoj te džanel kaj ov tano adathe, ama sepak o manuša doznajngje kote tano. 25 Hem samo so reslja, jekh romni so lakere čhaja sine la demoni, šungja baši leste, ali hem peli anglo leskere pre. 26 A i romni sine Grkinka so živinela sine ki Fenikija soj ki Sirija. Hem molinela sine e Isuse te paldel e demone so sine lake ki čhaj. 27 Ama, ov vakergja lake: „Mukh te čaljoven prvo o čhave, soske nane šukar te lel pe o maro taro čhave hem te frdel pe e tikne džukelenge“. 28 Ama oj vakergja leske: „Oja gospodine, ama o tikne džukela da hana o troške taro tikne čhave so perena telo astali“. 29 Tegani ov vakergja lake: „Adaleske so vakergjan akava, dža! O demoni iklilo tari tli čhaj“. 30 Hem oj keda geli peske khere, arakhlja ple čhaja sar pašljola ko kreveti, hem o demoni iklilo latar.

31 A keda irangja pe taro podračje taro Tir, gelo taro Sidon dži ko Galilejsko more, agjaar so nakhlja taro podračje taro Dekapolis. 32 Adathe angje leske jekhe kašuke manuše kova so na kerela sine šukar lafi, hem molinela le sine te sasljarel le. 33 Ov cidingja e manuše ki strana taro narodo, hem čhivgja ple vasta leske ko kana, palo adava čhungargja, hem pipingja leskiri čhib. 34 Dikhlja ko nebo, hor dišingja hem vakergja: „Efata“, so značinela: „Phravgjov“. 35 Tegani phravdile leskere kana hem šaj sine te koristinel pli čhib, hem počmingja šukar te kerel lafi. 36 A o Isus zabraningja lenge te vakeren bašo adava so ulo, ama kobor poviše zabraninela lenge sine te na vakeren, ola doborom poviše vakerena sine bašo adava. 37 Sine vooduševime hem vakerena sine: „Sa so kerela tano šukar, čak kerela o kašuke te šunen, a o lalore te keren lafi“.

8 Ko adala dive, palem khedingje pe but manuša ki leste, hem na sine len so te han. Adaleske ov vikingja ple učenikon hem vakergja lenge: 2 „Žal mange bašo narodo, soske trin dive tane mancar hem nane len više so te han. 3 Ako mukhava len te džan peske khere bokhale, ka peren ko drumo, a but lendar ale duraldan“. 4 A o učenikija vakergje leske: „Kotar šaj ko akava pusto than nekoj te arakhel dovolno maro te šaj te čaljoven sa akala manuša?“ 5 Tegani ov pučlja len: „Kobor mare isi tumen?“ Ola vakergje: „Efta“. 6 Hem vakergja e manušenge te bešen ki phuv. Lelja o efta mare, zablagodaringja pe e Devleske ki molitva, phaglja len hem dengja e učenikonge te den o mare, a o učenikija dengje e manušenge. 7 Sine len hem nekobor tikne mačhe. Zablagodaringja pe e Devleske ki molitva* hem vakergja lenge te den o mačhe da e manušenge. 8 Tegani hale hem čalile. Palo adava khedingje o mare so ačhile ko efta bare korpe. 9 A adathe sine okolu 4.000 murša. Palo adava mukhlja len te džan peske.

10 Hem odma khuvgja ko čamco ple učenikoncar hem alo ko podračje tari Dalmanuta. 11 Tegani ale o fariseija* hem počmingje te rasprajnen pe lea, agjaar so rodingje znako* taro nebo te šaj te iskušinen le. 12 Adaleske e Isuseske pelo but pharo hem vakergja: „Soske akaja generacija rodela znako? Čače vakerava tumenge, nisavo znako nane te del pe akale generacijake“. 13 Palo adava mukhlja len, uklilo ko čamco hem gelo tari okoja strana taro more.

14 Ama o učenikija bistergje te len pea maro. Ko čamco sine len samo jekh maro hem ništo javer. 15 A o Isus predupredingja len: „Phraven tumare jakhja, pazinen tumen taro kvasaco e fariseengoro hem taro kvasaco e Irodeskoro“. 16 Adaleske ola počmingje te rasprajnen pe maškar peste bašo adava so na lele pea maro. 17 Keda o Isus primetingja adava, vakergja lenge: „Soske rasprajnena tumen bašo adava so nane tumen maro? Panda li nane tumenge jasno so vakerava tumenge? Panda li na haljovena? Panda li tumare vile našti te haljoven adava? 18 ’Iako isi tumen jakhja zarem na dikhena? Iako isi tumen kana zarem na šunena?‘ Na setinena tumen li 19 keda phagljum pandž mare 5.000 muršenge, kobor pherde korpe khedingjen taro adava so ačhilo?“ Ola vakergje leske: „12“. 20 Hem keda phagljum efta mare 4.000 muršenge, kobor bare korpe phergjen keda khedingjen adava so ačhilo? Ola vakergje: „Efta“. 21 Tegani vakergja lenge: „Panda li na haljovena?“

22 Keda resle ki Vitsaida, o manuša angje leske jekhe korole manuše hem molingje le te sasljarel le. 23 Ov lelja e manuše taro vas, hem ingargja le avrijal taro gav. Otkeda čhivgja leske čhungar ko jakhja, čhivgja ple vasta upri leste hem pučlja le: „Dikhea li nešto?“ 24 O manuš phravgja ple jakhja hem vakergja: „Dikhava manuša, ama dikhjona mange sar kašta so phirena“. 25 Palo adava, o Isus palem čhivgja ple vasta upro leskere jakhja, hem o manuš počmingja šukar te dikhel. Sastilo hem dikhela sine čisto sa. 26 Tegani mukhlja e manuše te džal peske khere hem vakergja leske: „Ma khuv ko akava gav“.

27 Keda o Isus hem leskere učenikija cidingje te džan ko gava tari Filipeskiri Cezareja, ko drumo pučlja ple učenikon: „So vakerena o manuša, koj sium me?“ 28 Ola vakergje leske: „O Jovan Krstitel, javera vakerena o Ilija, a nesave vakerena kaj sian jekh taro prorokija“. 29 A ov pučlja len: „A so vakerena tumen, koj sium me?“ O Petar odgovoringja: „Tu sian o Hristos“.* 30 Tegani strogo zapovedingja lenge te na vakeren nikaske bašo adava koj tano ov. 31 Isto agjaar počmingja te vakerel lenge kaj o manušikano Čhavo* mora te cidel but muke hem te ovel otfrlimo taro starešine, taro glavna sveštenikija hem taro učitelija e zakoneskere hem te ovel mudardo, a palo trin dive te voskresninel. 32 Ov otvoreno vakerela sine lenge bašo adava. A o Petar cidingja le ki strana hem počmingja strogo te sovetinel le. 33 Tegani o Isus irangja pe, dikhlja ple učenikon hem strogo vakergja e Petareske: „Naš mandar Satano! Soske tle misle nane e Devleskere, nego manušikane“.

34 Palo adava vikingja e narodo hem ple učenikon ki peste, hem vakergja lenge: „Ako nekoj mangela te džal pali mande, neka otkažinel pe pestar, neka lel plo stubo mučibaske* hem neka avel pali mande. 35 Soske, koj mangela te spasinel plo životo, ka našavel le, a koj ka našavel plo životo baši mande hem bašo šukar haberi, ka spasinel le. 36 Čače, savi korist isi e manuše ako dobinela celo sveto, a našavela plo životo? 37 Soske, so šaj te del o manuš bašo plo životo? 38 Sekoj so ka ladžal mandar hem taro mle lafija ki akaja lošno generacija so nane verno e Devleske,* o manušikano Čhavo da ka ladžal lestar keda ka avel ple Dadeskere silaja* hem leskere angelencar“.

9 Isto agjaar, vakergja lenge: „Čače vakerava tumenge kaj nesave taro adala soj akate, nane te meren sa džikote na dikhena kaj e Devleskoro Carstvo vladinela“. 2 Palo šov dive, o Isus lelja pea e Petare, e Jakove hem e Jovane ki jekh uči planina hem adathe ola sine korkori. Tegani meningja plo izgled angli lende. 3 Leskere šeja počmingje te svetinen hem ule doborom parne so nijekh manuš so thovela šeja ki phuv na bi šaj sine te parnarel len. 4 Hem pojavingje pe lenge o Ilija hem o Mojsej, kola so kerena sine lafi e Isusea. 5 Tegani o Petar vakergja e Isuseske: „Rabi,* but amenge šukar akate. Adaleske te čhiva akate trin šatorija, jekh tuke, jekh e Mojseeske hem jekh e Ilijaske“. 6 Ustvari, na džanela sine so te vakerel, soske but darandile. 7 Tegani pojavingja pe jekh oblako kova so učhargja len hem šundilo glaso taro oblako: „Akava tano mlo manglo Čhavo, kova so kerela man radosno. Leste šunen le“. 8 Tegani taro jekh puti, keda dikhle okolu peste, na sine više nikoj lencar, nego samo o Isus.

9 Džikote hulena sine tari planina, o Isus strogo zapovedingja lenge te na vakeren nikaske adava so dikhle, sa džikote o manušikano Čhavo* na voskresninela. 10 Ola ikergje pe ki akaja zapoved,* ama kerena sine lafi maškar peste bašo adava so značinela adava so vakergja kaj ka voskresninel. 11 Adaleske pučle le: „Soske o učitelija e zakoneskere vakerena kaj prvo valjani te avel o Ilija?“ 12 A ov vakergja lenge: „Oja, prvo mora te avel o Ilija hem palem te anel ko redo sa o bukja. Soske tegani sine pišimo kaj o manušikano Čhavo mora te trpinel but muke hem te ovel otfrlimo? 13 Ama vakerava tumenge kaj o Ilija više alo hem ola postapingje lea sar so mangle, agjaar sar so sine pišimo baši leste“.

14 Keda ale kaj so sine o javera učenikija, dikhle kaj baro narodo khedingja pe okolu lende hem kaj o učitelija e zakoneskere rasprajnena pe lencar. 15 Keda dikhle le, o manuša sine iznenadime hem prastandile ki leste te pozdravinen le. 16 Tegani ov pučlja len: „Bašo so rasprajnena tumen lencar?“ 17 Jekh taro narodo vakergja: „Učitele, angjum ki tute me čhave soske isi le demoni kova so na mukhela le te kerel lafi. 18 Keda astarela le, frdela le ki phuv hem ikljola pena taro leskoro muj, krcinela ple dandencar hem našavela pli sila. Rodingjum tle učenikondar te palden e demone, ama ola našti sine te keren adava“. 19 A ov vakergja lenge: „Tumen sien generacija so nane la vera ko Devel. Dži keda mora te ovav tumencar? Dži keda mora te trpinav tumen? Anen le ki mande“. 20 Hem ola angje e čhave ki leste. Keda o demoni dikhlja e Isuse, odma kergja o čhavo te grčingjovel. O čhavo pelo tele, počmingja te valkajnel pe hem te mukhel pena taro muj. 21 Tegani o Isus pučlja leskere dade: „Otkeda slučinela pe leske akava?“ O dad vakergja: „Taro tiknipe. 22 But puti frdela le ki jag hem ko pani te šaj te mudarel le. Adaleske ako šaj te kere nešto, žalin amen hem pomožin amenge“. 23 A o Isus vakergja leske: „Vakerea mange: ’Ako šaj‘. Sa šaj te ovel okoleske so isi le vera“. 24 Tegani o dad odma vikingja: „Isi man vera! Ama pomožin mange te ovel man panda pobari vera!“

25 Keda dikhlja kaj o narodo sigjarela te avel ki lende, o Isus naredingja e demoneske:* „Tu so kergjan e čhave laloro hem kašuko, zapovedinava tuke te ikljove lestar hem više te na khuve ki leste!“ 26 O demoni kergja o čhavo te vikinel hem te grčingjovel, a palo adava iklilo lestar. Hem o čhavo ačhilo pružimo sar mulo, adaleske but džene vakerena sine: „Ov mulo!“ 27 Ama o Isus astargja le taro vas, vazdingja le hem ov uštilo ko pre. 28 Palo adava, o Isus khuvgja ko jekh kher hem keda o učenikija sine lea korkori, pučle le: „Soske amen našti sine te palda e demone?“ 29 Ov vakergja lenge: „Asavke demone šaj te paldel pe samo molitvaja“.

30 Tegani ola gele peske adathar preku i Galileja, ama ov manglja nikoj te na džanel bašo adava, 31 soske mangela sine te sikavel ple učenikon. Ov vakergja lenge: „O manušikano Čhavo ka ovel predajmo e dušmanenge ko vasta, hem ola ka mudaren le. Iako ka ovel mudardo, palo trin dive ka voskresninel“. 32 Ama ola na halile adava so vakergja, hem darana sine te pučen le.

33 Palo adava ale ko Kapernaum. Keda sine andre ko kher, ov pučlja len: „Bašo so rasprajnena tumen sine ko drumo?“ 34 A ola čutinena sine, soske ko drumo rasprajnena pe sine bašo adava koj lendar tano pobaro. 35 Tegani bešlja, vikingja e 12 apostolen hem vakergja lenge: „Ako nekoj mangela te ovel prvo, mora te ovel posledno sarinendar hem sluga sarinenge“. 36 Tegani lelja jekhe tikne čhave, čhivgja le maškar lende, gušingja le hem vakergja lenge: 37 „Koj priminela asavke tikne čhave baši mande,* ov priminela mande da. Hem koj priminela man, priminela okole da so bičhalgja man“.

38 O Jovan vakergja leske: „Učitele, dikhlem sar jekh manuš paldela demonen ko tlo anav. Ama adaleske so ov nane jekh amendar, amen čhinavgjem le hem vakergjem leske te na kerel adava“. 39 Ama o Isus vakergja: „Ma čhinaven le, soske koj ka kerel čudo ko mlo anav, ka našti odma palo adava te vakerel nešto lošno baši mande. 40 Soske koj nane protiv amende, ov tano amencar. 41 Hem koj ka del tumen čaša pani adaleske so sien e Hristoseskere učenikija, čače vakerava tumenge, ov sigurno ka dobinel pli nagrada. 42 Ama koj ka kerel te perel tari vera jekh taro akala tikne so isi len vera, leske ka ovel pošukar te čhiven leske ki men jekh baro bar so vrtinela le o her* hem lea te frden le ko more.

43 Ako tlo vas čhivela tut te kere grevo, čhin le. Soske pošukar ka ovel tuke te dobine životo sakati, nego duje vastencar te dža ki geena,* ki jag so večno thabljola. 44* -- 45 Hem ako tlo pro čhivela tut te kere grevo, čhin le. Soske pošukar ka ovel tuke te dobine životo sakati, nego duje prencar te ove frdimo ki geena. 46* -- 47 Hem ako tli jakh čhivela tut te grešine, frde la tutar. Soske pošukar ka ovel te khuve ko e Devleskoro Carstvo jekhe jakhaja, nego duje jakhencar te ove frdimo ki geena, 48 kote so o kirme na merena, hem i jag na ačhola.

49 O Devel mora te čhivel jag upri sarinende, sar so o manuš čhivela lon ko hajbe. 50 O lon tano šukar, ama ako o lon nane londalo, solea ka keren le londalo? Neka ovel tumen lon ki tumende, hem oven ko mir jekh jekhea“.

10 Otkeda gelo peske adathar, nakhlja tari reka Jordan hem alo ko thana soj ki granica tari Judeja. Tegani okolu leste khedingje pe but manuša, hem sar so kerela sine angleder, o Isus počmingja palem te sikavel len. 2 Tegani ale ki leste o fariseija,* hem te šaj te iskušinen le, pučle le dali smejnela o rom te razvedinel pe ple romnjatar. 3 Ov pučlja len: „So zapovedingja tumenge o Mojsej?“ 4 Ola odgovoringje leske: „O Mojsej dozvolingja o rom te pišinel potvrda bašo razvod hem te mukhel la“. 5 Ama o Isus vakergja lenge: „Adaleske so sien tvrdoglava ov pišingja tumenge akaja zapoved. 6 Ama o Devel panda taro početok keda počmingja te stvorinel, ’Ov kergja len murš hem džuvli. 7 Adaleske o manuš ka mukhel ple dade hem ple daja, 8 hem ola o duj ka oven jekh telo‘, agjaar ola više nane duj, nego jekh telo. 9 Adaleske, o Devel so spojngja te ovel jekh,* o manuš ma te odvojnel“. 10 Keda irangje pe ko kher, o učenikija pučle e Isuse bašo adava. 11 Hem ov vakergja lenge: „Sekoj so ka razvedinel pe tari pli romni hem ka lel javere romnja, kerela preljuba sprema i prvo. 12 Hem ako i romni razvedinela pe taro plo rom hem palo adava lela javere rome, kerela preljuba“.

13 A o manuša počmingje te anen leske tikne čhaven te šaj te blagoslovinel len, ama o učenikija holjangje hem vakergje lenge te ciden pe. 14 Keda dikhlja adava, o Isus holjangja hem vakergja lenge: „Mukhen e čhaven te aven ki mande, ma čhinaven len, soske asavkenge tano dendo e Devleskoro Carstvo. 15 Čače vakerava tumenge, koj nane te prifatinel e Devleskere Carstvo sar tikno čhavo, nane te khuvel ki leste“. 16 Tegani lelja e čhaven ki pli angali, hem blagoslovingja len agjaar so čhivgja ple vasta upri lende.

17 Keda o Isus cidingja te džal ko drumo, jekh manuš prastandor alo, pelo ko kočaka angli leste hem pučlja le: „Učitele, tu kova so sian šukar, so mora te kerav te šaj te dobinav večno životo?“ 18 O Isus vakergja leske: „Soske vakerea mange kaj sium šukar? Nikoj nane šukar, osven jekh Devel. 19 Džanea o zapovedija: ’Ma mudar, ma ker preljuba, ma čor, ma de hovavni izjava sar svedoko, nikas ma prevarin, poštujn tle dade hem tle daja‘“. 20 Tegani o manuš vakergja leske: „Učitele, me kerava sa akava taro mlo ternipe“. 21 Tegani o Isus dikhlja le, hem adaleske so zamanglja e manuše vakergja leske: „Jekh falinela tuke: dža, bikin sa so isi tut hem o pare de e čorolenge, pa ka ovel tut barvalipe ko nebo. Tegani ava hem ov mlo sledbeniko“. 22 Keda šungja akala lafija taro Isus, ov razočaringja pe hem gelo peske tažno, soske sine le baro barvalipe.

23 Tegani o Isus dikhlja okolu peste hem vakergja ple učenikonge: „Kobor ka ovel pharo e barvalenge te khuven ko e Devleskoro Carstvo!“ 24 A o učenikija sine iznenadime taro leskere lafija. Tegani o Isus panda jekh puti vakergja lenge: „Čhavalen, pharo tano te khuvel pe ko e Devleskoro Carstvo. 25 Polokho ka ovel te nakhavel pe kamila tari suv, nego o barvalo manuš te khuvel ko e Devleskoro Carstvo“. 26 Ola panda poviše čudingje pe hem pučle le: „Tegani koj šaj te spasinel pe?“ 27 O Isus dikhlja len hem vakergja: „O manuša našti te keren adava, ama o Devel šaj te kerel sa“. 28 Tegani o Petar vakergja leske: „Ake, amen mukhlem sa hem džaja pali tute“. 29 O Isus vakergja: „Čače vakerava tumenge, ni jekh na mukhlja kher, ili phralja, ili phenja, ili daja, ili dade, ili čhaven, ili nive baši mande hem bašo šukar haberi, 30 a te na del pe leske akana ko akava vreme 100 puti poviše: khera hem phralja hem phenja hem daja hem čhave hem nive, ama zaedno akalea hem progonstvo, a ko vreme so avela* hem večno životo. 31 A but džene soj tane prva, ka oven posledna, a o posledna ka oven prva“.

32 Džikote džana sine ko Erusalim o Isus phirela sine angli lende, o učenikija sine vooduševime, a okola so džana sine palo lende počmingje te daran. Tegani o Isus palem cidingja e 12 apostolen ki strana hem počmingja te vakerel lenge bašo adava so ka ovel lea: 33 „Ake, džaja ko Erusalim. E manušikane Čhave* ka predajnen le e glavna sveštenikonge hem e učitelenge e zakoneskere, hem ola ka osudinen le te ovel mudardo hem ka predajnen le e manušenge taro javera nacie, 34 a ola ka asan leske hem ka čhungaren le, ka maren le kamšikoja, ka mudaren le, a palo trin dive ov ka voskresninel“.

35 A o Jakov hem o Jovan, o čhave e Zevedeeskere, ale ko Isus hem vakergje leske: „Učitele, mangaja te de amen adava so ka roda tutar“. 36 A o Isus vakergja lenge: „So mangena te dav tumen?“ 37 Ola vakergje: „De amen te beša jekh tari tli desno, a jekh tari tli levo strana ko tlo Carstvo“. 38 A o Isus vakergja: „Na džanena so rodena. Šaj li te pien tari čaša kolatar so ka pijav me ili te krstinen tumen e krstibaja kolea so me krstinava man?“ 39 Ola vakergje leske: „Oja, šaj“. A ov vakergja lenge: „Ka pien tari čaša kolatar so pijava me, hem ka krstinen tumen e krstibaja kolea so krstinava man me. 40 Ama te bešen tari mli desno ili levo strana, adava našti me te odlučinav, adala thana ka den pe okolenge kaske so mo Dad odlučingja te del len“.

41 Keda o javera 10 učenikija šungje bašo adava, holjangje e Jakoveske hem e Jovaneske. 42 Ama o Isus vikingja e učenikon ki peste hem vakergja lenge: „Džanena kaj o carija taro akava sveto vladinena upro narodo, hem e važna manušen isi len avtoriteti upro manuša. 43 Ama, maškar tumende ma te ovel agjaar! Nego, koj mangela te ovel baro maškar tumende, neka ovel tumenge sluga, 44 hem koj mangela te ovel prvo maškar tumende, neka ovel robo sarinenge. 45 Soske ni o manušikano Čhavo na alo te služinen leske, nego alo te služinel hem te del plo životo sar otkupnina* bute dženenge“.

46 Palo adava ale ko Erihon. Džikote ov, o učenikija hem o but manuša ikljona sine taro Erihon, o Vartimej o čhavo e Timeeskoro, kova so sine korolo hem mangela peske sine, bešela sine kaj o drumo. 47 Keda šungja kaj o Isus o Nazarekjanco nakhela adathar, počmingja te vikinel: „Isus, tu so sian o Čhavo e Davideskoro, žalin man!“ 48 Tegani but džene vakergje leske te čutinel, a ov vikinela sine panda poglasno: „Tu so sian o Čhavo e Davideskoro, žalin man!“ 49 Tegani o Isus ačhilo hem vakergja: „Vikinen le!“ Vikingje e korole manuše hem vakergje leske: „Ma dara! Ušti, vikinela tut“. 50 Ov frdingja pli nametka, uštilo sigate hem gelo ko Isus. 51 Tegani o Isus pučlja le: „So mangea te kerav tuke?“ O korolo manuš vakergja leske: „Rabuni,* ker palem te dikhav!“ 52 O Isus vakergja leske: „Dža, tli vera sasljargja tut!“ Hem o manuš odma počmingja te dikhel hem te džal pali leste.

11 Keda ale paše ko Erusalim, ola resle ki Maslinkengiri Gora kote so sine o gava Vitfaga hem Vitanija. Tegani o Isus bičhalgja dujen taro ple učenikija 2 hem vakergja lenge: „Džan ko gav soj angli amende hem samo so ka khuven ka arakhen phanlo her koleste so nikoj panda na bešlja. Phraven le hem anen le. 3 Ako nekoj vakerela tumenge: ’Soske phravena e here?‘ vakeren leske: ’Valjanela e Gospodareske, ama ka iranel le odma‘“. 4 Hem keda gele, ola arakhle e here phanlo uzo udar avrijal ki ulica, hem phravgje le. 5 A nekoj taro adala so tergjona sine adathe pučle len: „Soske phravena e here?“ 6 O učenikija vakergje lenge adava so vakergja lenge o Isus. Hem ola mukhle len te džan.

7 Ola angje e here ko Isus, palo adava čhivgje pumare šeja upro her hem ov bešlja ki leste. 8 A but manuša ikalgje pumare nametke hem čhivgje len ko drumo, a o javera čhingje granke taro nive. 9 A o manuša so džana sine angli leste hem pali leste vikinena sine: „Devla, molinaja tut spasin le! Blagoslovimo tano okova so avela e Jehovaske* ko anav! 10 Neka ovel blagoslovimo o čhavo amare dadeskoro e Davideskoro kova so avela te vladinel! Spasin le molinaja tut, o Devla so sian ko najučo than ko nebo!“ 11 Keda reslja ko Erusalim gelo ko hrami, hem dikhlja sa o bukja so sine adathe, ama adaleske so sine više kasno, ov gelo e 12 apostolencar ki Vitanija.

12 O tajsutno dive, keda džana peske sine tari Vitanija, ov bokhalilo. 13 Hem duraldan dikhlja jekh kaš taro smokve kova so sine le listija, hem gelo te dikhel dali ka arakhel plodija. Ama keda alo, na arakhlja ništo, nego sine samo listija, soske na sine o vreme keda o kaš dela smokve. 14 Tegani vakergja: „Nikoj više ma te hal tutar plodija!“ A leskere učenikija šunena sine.

15 Keda resle ko Erusalim, o Isus khuvgja ko hrami hem počmingja te brkinel okolen so bikinena hem so kinena sine ko hrami, hem irangja o astalija okolengere so meninena sine pare hem o klupe okolengere so bikinena sine gulubija, 16 hem nikaske na dozvolinela sine te nakhaven bilo save bukja taro hrami. 17 Sikavela sine e manušen hem vakerela sine: „Pišimo tano: ’Mlo kher ka vikinel pe kher molitvake bašo sa o narodija‘. A tumen kergjen le kher e čorengoro“. 18 Keda o glavna sveštenikija hem o učitelija e zakoneskere šungje le, rodena sine prilika te mudaren le, adaleske so darana sine lestar, soske sa o manuša sine vooduševime taro adava sar sikavela len sine o Isus.

19 Angleder te rakjol ola gele peske taro Erusalim. 20 Hem rano sabajle džikote nakhena sine tari smokva, dikhle kaj šukili dži ko koreno. 21 O Petar setingja pe e Isuseske ko lafija hem vakergja: „Rabi,* dikh, i smokva so dengjan la arman, šukili!“ 22 O Isus vakergja lenge: „Neka ovel tumen vera ko Devel. 23 Čače vakerava tumenge, sekoj so ka vakerel akale planinake: ’Ušti hem frde tut ko more‘, hem na sumninela pe, nego verujnela kaj ka ovel adava so vakergja, tegani adava ka ovel agjaar. 24 Adaleske vakerava tumenge: sa o bukja so rodena taro Devel ki molitva, verujnen kaj više dobingjen len, hem sigurno ka dobinen len. 25 Hem keda molinena tumen, sa so isi tumen protiv nekaste prostinen lenge, te šaj tumaro Dad soj ko nebo te prostinel tumenge tumare greške“. 26* --

27 Hem palem ale ko Erusalim. Džikote o Isus phirela sine ko hrami, ale ki leste o glavna sveštenikija, o učitelija e zakoneskere hem o starešine, 28 hem pučle le: „Koj dengja tut pravo te kere akala bukja? Hem koj vakergja tuke te kere akava?“ 29 O Isus vakergja lenge: „Te pučav tumen nešto. Odgovorinen mange hem me da ka vakerav tumenge koj dengja man pravo te kerav akala bukja. 30 Koj dengja e Jovaneske pravo te krstinel, o Devel soj ko nebo, ili o manuš? Odgovorinen“. 31 Hem ola počmingje te keren lafi maškar peste: „Ako vakeraja: ’O Devel soj ko nebo‘, ka vakerel amenge: ’Soske tegani na verujngjen ki leste?‘ 32 A te vakera: ’O manuš‘?“ Ama darana sine taro narodo, soske ola verujnena sine kaj o Jovan služingja sar proroko. 33 Adaleske odgovoringje e Isuseske: „Na džanaja“. Hem ov vakergja lenge: „Ni me na vakerava tumenge koj dengja man pravo te kerav akava“.

12 Palo adava počmingja te sikavel len agjaar so koristingja sporedbe: „Jekh manuš sadingja drakha, čhivgja ograda okolu i niva, kergja than kote so ka gazinen pe o drakha hem gradingja uči kula kote so ka oven o stražarija hem dengja la nesave manušenge te keren buti ki late, a ov gelo ko dur than. 2 Keda alo vreme te kheden pe o drakha, ov bičhalgja ple robo ko manuša so kerena sine buti ki niva, te lel delo taro drakha. 3 Ama ola astargje le, margje le hem bičhalgje le te iranel pe čuče vastencar. 4 Ov bičhalgja lenge javere da robo, a ola khuvgje le ko šero hem ponižingje le. 5 Ov bičhalgja panda jekhe robo, a le mudargje le. Bičhalgja hem bute javere robon, ama ola nekas margje, a nekas mudargje. 6 Ko krajo bičhalgja ple mangle čhave, soske mislingja peske: ’Ola ka poštujnen me čhave‘. 7 Ama o manuša vakergje peske: ’Ov tano o nasledniko. Ajde te mudara le hem i niva* ka ovel amari‘. 8 Tegani astargje le, mudargje le hem frdingje le avrijal tari niva. 9 So ka kerel o gazda e nivakoro? Ka avel, ka mudarel len hem i niva ka del la javerenge. 10 Na čitingjen li nikogaš akala lafija taro sveta spisija: ’O bar so frdingje le o graditelija ulo o glavno bar* ki kjuša. 11 Adava bar tano taro Jehova* hem amenge ko jakhja tano but šužo‘?“

12 Ottegani ola rodena sine prilika te astaren le, soske halile kaj i sporedba so vakergja la sine, vakergja la lenge. Ama darana sine taro narodo, adaleske mukhle le hem gele peske.

13 Palo adava bičhalgje ki leste nesave fariseen* hem e Irodeskere sledbenikon te šaj te keren o Isus te vakerel nešto pogrešno. 14 Keda ale vakergje leske: „Učitele, džanaja kaj tu sekogaš vakerea o čačipe hem na rodea o javera te prifatinen tut, soske tu na dikhea koj tano hem soj tano jekh manuš, hem adava so sikavea bašo Devel tano čače. Dali tano ispravno te platinel pe danok e cezareske ili na? 15 Dali valjani te platina ili na?“ Ama o Isus džanlja lengiri lošno namera, adaleske vakergja lenge: „Soske iskušinena man? Sikaven mange jekh denarij“.* 16 Ola angje leske hem ov pučlja len: „Kaskoro liko hem anav isi akate?“ Ola odgovoringje leske: „E cezareskoro“. 17 Tegani o Isus vakergja: „Iranen e cezareskoro e cezareske, a e Devleskoro e Devleske“. Hem ola sine vooduševime taro leskere lafija.

18 Palo adava o sadukeija,* kola so vakerena kaj nane voskresenie, ale ki leste hem pučle le: 19 „Učitele, o Mojsej pišingja kaj ako nekoj merela hem mukhela ple romnja bizo čhave, tegani leskoro phral mora te lel leskere romnja te šaj te del potomstvo ple phraleske. 20 Sine peske efta phralja. O prvo ženingja pe, ama mulo bizo te oven le čhave. 21 Hem o dujto phral lelja la, ama ov da mulo bizo te oven le čhave laja. O trito da phral isto agjaar. 22 Ni jekhe taro efta phralja na ulo le čhave laja. Ko krajo muli i romni da. 23 Keda ka voskresninen, kaskiri romni ka ovel? Soske oj sine romni e soeftangiri“. 24 Tegani o Isus vakergja lenge: „Tumen na pendžarena ni o sveta spisija, ni e Devleskiri sila. Adaleske sien ki greška. 25 Soske, keda ka voskresninen, o manuša nane te ženinen pe, nego ka oven sar o angelija ko nebo. 26 A bašo adava kaj o mule ka voskresninen, na čitingjen li ko e Mojseeskoro lil, so vakergja leske o Devel ki grmuška: ’Me sium o Devel e Avraameskoro, o Devel e Isakoskoro hem o Devel e Jakoveskoro‘? 27 Ov nane o Devel e mulengoro, nego e dživdengoro. Tumen sien but ki greška“.

28 A jekh taro učitelija e zakoneskere alo uzi lende hem šungja bašo so kerena lafi, dikhlja kaj o Isus šukar odgovoringja lenge hem pučlja le: „Koja tani i najvažno* zapoved taro sa o zapovedija?“ 29 O Isus vakergja leske: „I najvažno tani: ’Šun Izrael, o Jehova,* amaro Devel, tano jekh Jehova,* 30 hem mang e Jehova,* tle Devle, sa tle vilea, hem sa tle dušaja,* hem sa tle gogjaja, hem sa tle silaja‘. 31 Pali late tani akaja: ’Mang tle pašutne sar korkori tut‘. Nane pobare zapovedija akalendar“. 32 O učiteli e zakoneskoro vakergja leske: „Učitele, adava so vakerea tano šukar hem čače: ’Ov tano jekh, nane javer osven leste‘. 33 Hem te mange le celo vilea, celo gogjaja* hem celo silaja, hem te mange tle pašutne sar korkori tut, vredinela but poviše taro sa o žrtve so tharena pe hem taro javera žrtve“. 34 Keda o Isus dikhlja kaj o manuš mudro odgovoringja, vakergja leske: „Paše sian te khuve ko e Devleskoro Carstvo“. Palo adava više nikas na sine le hrabrost te pučel nešto e Isuse .

35 Džikote panda sikavela sine e manušen ko hrami, o Isus vakergja: „Sar šaj o učitelija e zakoneskere te vakeren kaj o Hristos* tano e Davideskoro čhavo? 36 Korkori o David, vodimo tari e Devleskiri sila,* vakergja: „O Jehova* vakergja mle Gospodareske: ’Beš tari mli desno strana sa džikote na čhivava tle dušmanen telo tle pre‘. 37 Korkori o David vikinela le Gospodari, sar šaj tegani te ovel leskoro čhavo?“

Celo narodo uživinela sine džikote šunela le. 38 Džikote sikavela len sine vakergja: „Pazinen tumen taro učitelija e zakoneskere kola so mangena te phiren dugačka šeencar hem o manuša te pozdravinen len ko ploštadija, 39 hem te bešen ko prva thana ko sinagoge hem ko najšukar thana ko proslave. 40 Ola tane adala so lena adava so isi e udovicen* hem vakerena but dugačka molitve te šaj o javera te dikhen len. Ola ka dobinen pobari kazna“.

41 Hem bešlja karši o kase bašo dobrovolna prilogija hem dikhela sine sar o manuša mukhena pare ko kase, hem but barvale manuša mukhena sine but pare. 42 Tegani ali jekh čoroli udovica hem mukhlja duj tikne paričke* so vredinena sine but hari. 43 Ov vikingja ple učenikon hem vakergja lenge: „Čače vakerava tumenge, akaja čoroli udovica mukhlja but poviše taro sa o javera so mukhle pare ko kase bašo dobrovolna prilogija. 44 Soske, sarine mukhle taro pumaro višako, a oj taro plo čorolipe mukhlja sa adava so sine la živibaske“.

13 Džikote ikljola sine taro hrami, jekh taro leskere učenikija vakergja leske: „Učitele, dikh kobor bare hem šuže tane o bara hem o zidija!“ 2 Ama o Isus vakergja leske: „Dikhea li akala bare zidija? Akate nane te ačhol ni jekh bar upro bar, sa ka ovel rušimo“.

3 Džikote bešela sine ki Maslinkengiri Gora, karši o hrami, o Petar, o Jakov, o Jovan hem o Andrej keda sine lea korkori pučle le: 4 „Vaker amenge keda ka oven akala bukja hem kova ka ovel o znako kaj paše tano o krajo bašo sa akava?“ 5 Tegani o Isus počmingja te vakerel lenge: „Pazinen nekoj te na hovavel tumen. 6 But džene ka aven ko mlo anav hem ka vakeren: ’Me sium o Hristos‘. Hem ka hovaven buten. 7 A keda ka šunen bašo vojne ko razna thana, ma daran. Adava mora te slučinel pe, ama tegani panda nane o krajo.

8 Soske, ka borinel pe narodo protiv narodo hem carstvo protiv carstvo, ka oven zemjotresija ko razna thana hem ka ovel bokhalipe. Adava tano o početok taro bare dukha.*

9 A tumen, pazinen tumen. O manuša ka ingaren tumen ko sudo hem ka maren tumen ko lengere sinagoge, hem ka ikalen tumen anglo upravitelija hem carija baši mande, te šaj te den svedoštvo lenge. 10 Hem o šukar haberi najangle mora te propovedinel pe sa e narodonge. 11 Keda ka ikalen tumen anglo sudo, ma sekirinen tumen angleder bašo adava so ka vakeren. Vakeren adava so ka del tumen e Devleskiri sila* ko adava momenti, soske tumen nane te oven adala so kerena lafi, nego e Devleskiri sila.* 12 Isto agjaar, o phral ka predajnel ple phrale te ovel mudardo, hem o dad ple čhave, hem o čhave ka oven protiv ple roditelija hem ka predajnen len te oven mudarde. 13 Hem sarine ka mrzinen tumen bašo mlo anav. Ama koj ka istrajnel dži ko krajo, ov ka ovel spasimo.

14 A keda ka dikhen i gadno buti so uništinela sa o bukja, sar tergjola ko than kote so na valjani te ovel (te šaj te haljovel akava, okova so čitinela šukar neka razmislinel), tegani okola so ka oven ki Judeja neka našen ko planine. 15 Koj ka ovel ko krovi ma te hulel hem ma te khuvel te lel nešto taro kher. 16 Hem koj ka ovel ki niva, ma te iranel pe palal te lel pli nametka. 17 Ko adala dive, teško e khamne džuvlenge hem e dajenge so dena thud pumare bebenge! 18 Molinen tumen te na ovel adava evendaske. 19 Soske ko adala dive ka ovel nevolja savi so na sine taro početok keda o Devel stvoringja o sveto, pa sa dži akana, a ni nane te ovel više. 20 Hem ako o Jehova* na kratinela adala dive, ni jekh nane te spasinel pe. Ama bašo okola soj birime lestar, ov ka kratinel adala dive.

21 Ako nekoj vakerela tumenge: ’Ake, akate tano o Hristos‘, ili: ’Ake, okote tano‘, ma verujnen. 22 Soske ka pojavinen pe hovavne Hristosija hem hovavne prorokija, hem ka keren znakija hem čudija te hovaven, ako šaj e birimen da. 23 Adaleske pazinen tumen. Sa vakergjum tumenge angleder.

24 A ko adala dive, pali nevolja, o kham ka kaljol, i mesečina nane te svetinel, 25 o zvezde ka peren taro nebo hem o bukja soj ko nebo ka tresinen. 26 Tegani ka dikhen e manušikane Čhave* sar avela ko oblakija hem isi le bari mokj hem slava. 27 Tegani ka bičhalel e angelen hem ka khedel okolen so biringja taro štar strane e svetoskere, taro jekh krajo dži ko javer krajo tari phuv hem taro nebo.

28 Akana sikljoven tari sporedba baši smokva. Keda latar ka bajrol nevi granka hem ka mukhel listija, džanena kaj o nilaj tano paše. 29 Agjaar tumen da, keda ka dikhen kaj ovena akala bukja, džanen kaj o manušikano Čhavo tano paše, anglo udar. 30 Čače vakerava tumenge kaj akaja generacija nane te nakhel sa džikote na ovena sa akala bukja. 31 O nebo hem i phuv ka našavgjoven, ama me lafija ka ačhon sekogaš.

32 Nikoj na džanela keda ka avel adava dive ili adava saati, ni o angelija ko nebo, ni o Čhavo, nego samo o Dad. 33 Pazinen hem oven džangavde, soske na džanena keda tano o vreme te ovel adava. 34 Adava tano sar jekh manuš kova so patujnela ko dur than, hem mukhela plo kher ple robonge te šaj te vodinen računi bašo kherutne bukja agjaar so sekole roboske dengja te kerel pli buti hem zapovedingja e stražareske ponadari da te pazinel. 35 Adaleske, ačhoven džangavde, soske na džanena keda ka avel o gospodari e khereskoro, dali akšameskoro, ki ekvaš i rat, angleder te phravgjol o dive,* ili rano sabajle, 36 te šaj keda ka avel iznenadeno, te na arakhel tumen sar sovena. 37 Adava so vakerava tumenge, vakerava sarinenge: Ačhoven džangavde!“

14 Palo duj dive sine i Pasha hem o Prazniko bašo mare bizo kvasaco. A o glavna sveštenikija hem o učitelija e zakoneskere rodena sine prilika te astaren hem te mudaren e Isuse, ama adava te keren le ko način agjaar so o narodo ka mislinel kaj o Isus tano krivo, 2 ama vakergje: „Ma te astara le praznikoske, soske o narodo šaj te buninel pe“.

3 Keda sine o Isus ki Vitanija, džikote hala sine maro e Simoneske ko kher, kova so angleder sine leprozno, ali ki leste jekh džuvli koja so sine la tikno šiši taro parno bar kova so sine le mirislivo maslo, čačutno nard,* kova so sine but skupo. Oj phaglja o šiši taro parno bar* hem o maslo čhorgja le upro e Isuseskoro šero. 4 Bašo adava nesave holjangje hem vakergje maškar peste: „Soske akava mirislivo maslo te džal zijani? 5 Adava mirislivo maslo šaj sine te bikina le bašo poviše taro 300 denarija* hem adala pare te da e čorolenge!“ Hem but holjangje lake. 6 Ama o Isus vakergja: „Ma zadinen la. Soske ponašinena tumen agjaar sprema late? Oj kergja mange šukaripe. 7 Soske, o čorole sekogaš ka oven uzi tumende, hem šaj te keren lenge šukaripe keda ka mangen, a me nane te ovav sekogaš tumencar. 8 Oj kergja sa so šaj hem angleder čhorgja o mirislivo maslo upro mlo telo, te šaj te spreminel le parujbaske. 9 Čače vakerava tumenge, segde kote so ka propovedinel pe o šukar haberi ko celo sveto, ka vakerel pe hem bašo adava so kergja akaja džuvli, te šaj te setinen pe ki late“.

10 A o Juda Iskariot, jekh taro o 12 apostolija, gelo ko glavna sveštenikija te šaj te predajnel lenge e Isuse. 11 Keda šungje adava, ola radujngje pe hem vetingje leske kaj ka den le srebrena pare. Ottegani ov počmingja te rodel šukar momenti te šaj te predajnel le.

12 Ko prvo dive taro Prazniko bašo mare bizo kvasaco, keda obično dela pe sine i pashalno žrtva, o učenikija pučle e Isuse: „Kote mangea te spremina tuke i Pasha?“ 13 Tegani bičhalgja dujen taro ple učenikija hem vakergja lenge: „Džan ki diz, hem adathe ka arakhen jekhe manuše kova so ka phiravel khoro* panjea. Džan pali leste, 14 hem kote so ka khuvel ov, vakeren e domakineske taro adava kher: ’O Učiteli pučela: „Kote tani mli gostinsko soba kote so ka šaj te slavinav i Pasha mle učenikoncar?“‘ 15 Hem ov ka sikavel tumenge ko upruno sprati jekh bari soba, sredimi hem namestimi. Adathe spreminen amenge!“ 16 O učenikija gele, khuvgje ki diz hem arakhle sa agjaar sar so vakergja lenge, hem spremingje baši Pasha.

17 A akšameskoro o Isus alo ple 12 apostolencar. 18 Džikote bešena sine ko astali hem hana sine, o Isus vakergja: „Čače vakerava tumenge, jekh tumendar, kova so hala mancar, ka predajnel man“. 19 A ola razočaringje pe hem jekh po jekh počmingje te pučen le: „Te na sium me?“ 20 Ov vakergja lenge: „Jekh tumendar e dešudujendar,* kova so bolela mancar taro čaro. 21 Soske, o manušikano Čhavo* džala peske sar soj pišimo baši leste, ama teško ka ovel okole manušeske kova so ka predajnel e manušikane Čhave. Adale manušeske pošukar ka ovel sine te na bijangjovel“.

22 Džikote panda hana sine, o Isus lelja maro, molingja pe, phaglja le, dengja ple učenikonge hem vakergja: „Len, akava pretstavinela mlo telo“. 23 Palo adava, lelja čaša moljaja, zablagodaringja pe e Devleske ki molitva, dengja len hem sarine pile latar. 24 Hem vakergja lenge: „Akava pretstavinela mlo rat, preku mlo rat ka počminel te važinel jekh sojuz,* akava rat ka čhorgjol butenge. 25 Čače vakerava tumenge, nane više te pijav tari akaja mol, sa dži ko dive keda ka pijav nevi mol ko e Devleskoro Carstvo“. 26 Ko krajo, otkeda giljavgje gilja kola so falinena e Devle, gele ki e Maslinkengiri Gora.

27 Hem o Isus vakergja lenge: „Tumari vera ka slabonel, soske pišimo tano: ’Ka khuvav e pastire, hem o bakhre ka našen‘. 28 Ama keda ka voskresninav, ka džav angleder tumende ki Galileja“. 29 A o Petar vakergja leske: „Čak ako sarinengiri vera slabonela, mli vera nane nikogaš te slabonel“. 30 Tegani o Isus vakergja leske: „Čače vakerava tuke kaj avdive, ki akaja rat, angleder te giljavel o bašno o dujto puti, tu trin puti ka vakere kaj na pendžarea man“. 31 Ama ov uporno vakerela sine: „Ako mora hem te merav tuja, nikogaš nane te vakerav kaj na pendžarava tut“. Tegani o javera da vakergje o isto.

32 Hem ale ko jekh than kova so vikinela pe sine Getsimanija, hem vakergja ple učenikonge: „Bešen akate džikote me molinava man“. 33 Lelja pea e Petare, e Jakove hem e Jovane. Hem sine but tažno hem voznemirimo. 34 Tegani vakergja lenge: „But mange pharo, ka merav taro akava pharipe so osetinava. Ačhoven akate hem oven džangavde!“ 35 Hem gelo hari ponadari, pelo ko kočaka hem počmingja te molinel pe, ako šaj, akava pharo momenti te na avel. 36 Hem vakergja: „Abba,* mo Dad, tu sa šaj te kere, cide akaja čaša mandar. Ama, ma te ovel sar me so mangava, nego sar tu so mangea“. 37 Keda irangja pe, arakhlja len sar sovena hem vakergja e Petareske: „Simon, sovea li? Nane li tut sila te ačhove džangavdo barem jekh saati? 38 Ačhoven džangavde hem ma čhinaven te molinen tumen, te šaj te na peren ko iskušenie. Čače, o vilo tano spremno, ama o telo tano slabo“. 39 Gelo palem te molinel pe hem vakergja o ista lafija. 40 Alo palem ki lende hem arakhlja len sar sovena, soske but sovela pe sine lenge, hem ola na džanena sine so te vakeren leske. 41 O trito puti irangja pe hem vakergja lenge: „Soske sovena hem odmorinena tumen ko asavko važno momenti? Dosta sukjen! Alo o vreme keda o manušikano Čhavo* ka ovel predajmo hem dendo ko vasta e grešnikonge. 42 Ušten te dža! Ake okova so predajngja man avela“.

43 Hem odma, džikote panda kerela sine lafi alo o Juda, jekh taro o 12 apostolija, hem lea but manuša mačencar hem kaštencar, bičhalde taro glavna sveštenikija, taro učitelija e zakoneskere hem taro starešine. 44 A okova so predajngja le dogovoringja pe lencar kaj ka del len znako: „Kas ka čuminav, ov tano! Le astaren le hem ingaren le e stražarencar!“ 45 Gelo pravo ko Isus hem vakergja: „Rabi!“* Hem čumingja le. 46 Tegani ola astargje le hem phanle le. 47 Hem jekh taro adala so tergjona sine adathe, ikalgja mači hem napadingja e prvosveštenikoskere robo hem čhingja o kan leskoro. 48 Tegani o Isus vakergja lenge: „Zarem sium čor,* pa adaleske alen mačencar hem kaštencar te astaren man? 49 Sekova dive sium sine tumencar ko hrami hem sikavava sine e manušen, a tumen na astargjen man. Ama, akava ovela te šaj te ispolninel pe adava so pišinela ko sveta spisija“.

50 Tegani sa o učenikija mukhle le hem našle. 51 A pali leste džala sine jekh terno čhavo kova so sine uravdo samo ki leneno nametka. Ola mangle te astaren le, 52 ama ov mukhlja pli nametka hem našlja skoro nango.

53 Palo adava, ingargje e Isuse ko prvosvešteniko. Adari khedingje pe sa o glavna sveštenikija hem o učitelija e zakoneskere. 54 A o Petar, sledinela le sine duraldan sa dži ko dvoro e prvosveštenikoskoro. Bešlja e slugencar hem takjola sine uzi jag. 55 Tegani o glavna sveštenikija hem celo Sudsko sovet* rodena sine svedokija kola so ka vakeren hovajbe bašo Isus te šaj te mudaren le, ama na arakhle ništo solea šaj te osudinen le. 56 Iako ale but hovavne svedokija, ama sa adava so vakergje na odgovorinela sine jekh jekhea. 57 A nesave uštile hem vakergje akava hovajbe protiv leste: 58 „Šungjem le sar vakergja: ’Ka rušinav akava hrami, kova so kergje le manušikane vasta, hem trine divenge ka gradinav javer hrami, kova so nane te ovel kerdo taro manušikane vasta‘“. 59 Ama adava da so vakergje na odgovorinela sine adalea so vakergje o javera.

60 Tegani o prvosvešteniko uštilo, alo maškaral hem pučlja e Isuse: „Nane li tut so te vakere? So ka vakere bašo akala bukja so vakerena len protiv tute?“ 61 Ama o Isus čutinela sine hem na vakerela sine ništo. O prvosvešteniko palem pučlja le: „Dali tu sian o Hristos, o Čhavo e Sveto Devleskoro?“ 62 Tegani o Isus vakergja: „Oja, me sium. Hem ka dikhen e manušikane Čhave sar bešela tari desno strana e mokjno Devleskiri hem sar avela ko oblakija soj ko nebo“. 63 Tegani o prvosvešteniko pharavgja pli upruni nametka hem vakergja: „Zarem valjanena amenge javera svedokija? 64 Šungjen sar kerela lafi protiv o Devel. So ka odlučinen?“ Ola sarine osudingje le kaj zaslužinela te merel. 65 Hem nesave lendar počmingje te čhungaren le, te učharen leskoro muj hem te khuven le boksencar hem te vakeren: „Sikav kaj sian proroko hem vaker amenge koj khuvgja tut!“ A o stražarija džikote ingarena le sine adathar, khuvena le sine šamarke.

66 Džikote o Petar sine ko dvoro, ali jekh taro sluginke e prvosveštenikoskere. 67 Keda dikhlja sar o Petar takjola uzi jag vakergja: „Tu da sian sine akale Isusea, e Nazarekjancoja“. 68 Ama ov na priznajngja hem vakergja: „Ni na pendžarava le, ni na haljovava so kerea lafi!“ Hem gelo kaj i porta. 69 Keda dikhlja le i sluginka palem vakergja okolenge so tergjona sine adathe: „Ov tano jekh lendar“. 70 A ov palem na priznajngja. Kratko palo adava, okola so tergjona sine adathe palem vakergje e Petareske: „Sigurno tu sian jekh lendar, soske tu sian Galilejco“. 71 Ama ov počmingja te del pe armanja hem te hal sovli: „Na pendžarava akale manuše baši kaske so kerena lafi!“ 72 Tegani odma o bašno giljavgja o dujto puti, hem o Petar setingja pe ko lafija so vakergja len o Isus: „Angleder te giljavel o bašno dujto puti, tu trin puti ka vakere kaj na pendžarea man“. Tegani phage vilea but rungja.

15 Odma keda phravdilo o dive, o glavna sveštenikija, o starešine hem o učitelija e zakoneskere, ustvari celo Sudsko sovet,* dogovoringje pe hem phanle e Isuse, ingargje le hem predajngje le ko Pilat. 2 A o Pilat pučlja le: „Tu li sian o cari e Evreengoro?“ A ov odgovoringja leske: „Tu korkori vakerea adava“. 3 A o glavna sveštenikija krivinena le sine bašo but bukja. 4 A o Pilat palem pučlja le: „Nane tut li ništo so te vakere? Dikh bašo kobor bukja krivinena tut“. 5 A o Isus više na odgovoringja leske hem adaleske o Pilat sine iznenadimo.

6 A ko sekova prazniko ov mukhela sine jekhe zatvoreniko kole so o narodo ka birinel. 7 Tegani sine phanlo jekh manuš so vikinela pe sine Varava, zaedno e manušencar kola so mudargje nekas keda buningje pe protiv i vlada. 8 Tegani o narodo khedingja pe hem rodingja taro Pilat te mukhel lenge jekhe zatvoreniko sar so kerela sine adava ko sekova prazniko. 9 Tegani o Pilat pučlja len: „Mangena li te oslobodinav tumenge e care e Evreengoro?“ 10 Soske, o Pilat džanela sine kaj o glavna sveštenikija predajngje le soske sine zavidliva. 11 Ama o glavna sveštenikija vakerena sine e narodoske te rodel te oslobodinel e Varava. 12 A o Pilat palem pučlja len: „Tegani, so te kerav akalea kole so vikinena le cari e Evreengoro?“ 13 A ola palem glasno vikingje: „Neka ovel kovimo ko stubo!“ 14 Ama o Pilat pučlja len: „Soske? Savo lošnipe kergja?“ A ola panda poglasno vikingje: „Neka ovel kovimo ko stubo!“ 15 A o Pilat, adaleske so manglja te ugodinel e narodoske, oslobodingja lenge e Varava hem otkeda kamšikujngje e Isuse zapovedingja te kovinen le ko stubo.

16 Tegani o vojnikija ingargje le ko dvoro, ki e upraviteleskiri palata hem vikingje sa e javere vojnikon. 17 Uravgje le liljakovo nametka, pletingje leske kruna taro kare hem čhivgje leske ko šero. 18 Hem počmingje te vakeren leske: „Ov pozdravimo cari e Evreengoro!“ 19 Isto agjaar, khuvena le sine ko šero pračkaja, čhungarena le sine hem perena sine ko kočaka hem pokloninena pe sine leske. 20 Otkeda asandile leske, lele lestar i liljakovo nametka hem uravgje le leskere šeja. Palo adava, ingargje le te kovinen le ko stubo. 21 Jekhe manuše so vikinela pe sine Simon, tari Kirinija, o dad e Aleksandareskoro hem e Rufeskoro kova so iranela pe sine taro pole hem nakhela sine adathar, silaja čhivgje le te phiravel e Isuseskoro stubo* kote so valjani sine te ovel kovimo.

22 Hem angje le ko than so vikinela pe Golgota, so značinela „than kote so isi kokala taro šero“.* 23 Adathe nudingje leske te piel mešimi mol smirnaja kola so sine la dejstvo sar droga, ama ov na pilja adava. 24 Kovingje le ko stubo hem delingje maškar peste leskere šeja, agjaar so frdingje ždrepka,* te šaj te dikhen koj savo delo ka lel. 25 A keda kovingje le ko stubo sine okolu enja o saati* sabajle. 26 Hem ko stubo pišingje soske sine osudimo: „O cari e Evreengoro“. 27 Isto agjaar, uzi leste ko stubija sine kovime duj čora, jekh tari leskiri desno, a jekh tari leskiri levo strana. 28* -- 29 A okola so nakhena sine adathar vredžinena le sine, mrdinena sine pumare šerencar hem vakerena sine: „Tu so vakerea sine kaj ka rušine o hrami hem ka gradine le trine divenge, 30 spasin tut hem huli taro akava stubo mučibaske“.* 31 O glavna sveštenikija hem o učitelija e zakoneskere isto agjaar asana sine leske hem vakerena sine maškar peste: „E javeren spasingja ama pes našti te spasinel! 32 Neka hulel akana taro stubo mučibaske o Hristos, o cari taro Izrael, te šaj te dikha hem te verujna leske“. Čak okola so sine kovime uzi leste ko stubija isto agjaar asana sine leske.

33 A okolu ko 12 o saati* diveskoro, ki celo adaja phuv uli temnica koja so trajngja sa dži ko okolu trin o saati* diveskoro. 34 Hem okolu ko trin o saati diveskoro o Isus glasno vikingja: „Eli, Eli, lama savahtani?“ so značinela: „Devla, Devla, soske mukhljan man?“ 35 Keda šungje akava nesave taro manuša so tergjona sine adathe, vakergje: „Ov vikinela e Ilija“. 36 Hem nekoj lendar prastandilo, lelja sungjeri, topingja le ki šutali mol, čhivgja le ki jekh pračka hem dengja le te piel, hem vakergja: „Mukh le! Te dikha dali o Ilija ka avel te huljarel le taro stubo“. 37 A o Isus glasno vikingja hem mulo.* 38 Tegani i zavesa ko hrami pharavdili ko duj, upraldan dži tele. 39 O komandiri* kova so tergjola sine karši o Isus, keda dikhlja so slučingja pe keda mulo, vakergja: „Akava čače sine e Devleskoro Čhavo“.

40 Isto agjaar athe sine džuvlja kola so dikhena le sine duraldan. Maškar lende sine i Marija Magdalena, i Marija i daj e Potikne Jakoveskiri hem e Josijeskiri, hem i Saloma. 41 Ola sine zaedno e Isusea hem pomožinena sine leske keda ov sine ki Galileja, hem sine but javera da džuvlja kola so ale lea ko Erusalim.

42 Hem adaleske so sine više kasno angleder te rakjol, hem isto agjaar sine o dive keda spreminena pe sine bašo sabat, 43 adathe alo o Josif tari Arimateja, jekh ugledno členi taro Sovet, kova so isto agjaar adžikerela sine e Devleskoro Carstvo. Ov khedingja hrabrost, gelo anglo Pilat hem rodingja dozvola te parunel e Isuse. 44 A o Pilat keda šungja kaj o Isus više mulo, iznenadingja pe hem vikingja e komandire hem pučlja le dali o Isus mulo. 45 Otkeda o komandiri vakergja leske kaj o Isus više mulo, ov dozvolingja e Josifeske te lel e Isuseskoro telo. 46 Ov kingja leneno čaršafi, huljargja leskoro telo, pakjargja le ko adava čaršafi hem čhivgja le ko grobo kova so sine kerdo ki karpa hem čhivgja baro bar anglal ko grobo. 47 A i Marija Magdalena hem i Marija, i daj e Josijeskiri, ačhile te dikhen kote ka čhiven e Isuse.

16 Keda završingja o sabat,* i Marija Magdalena, i Marija i daj e Jakoveskiri hem i Saloma, kingje mirislivo maslo mešimo bilkencar te šaj te džan hem te makhen e Isuseskoro telo. 2 Rano sabajle keda iklilo o kham, ko prvo dive taro kurko, ola ale ko grobo. 3 Hem vakerena sine jekh jekhake: „Koj ka cidel amenge o baro bar soj anglo grobo?“ 4 Ama keda resle, dikhle kaj o bar sine cidimo ki strana, iako sine but baro. 5 Keda khuvgje ko grobo, dikhle jekhe terne manuše sar bešela tari desno strana uravdo ko parne šeja, hem sine but iznenadime. 6 A ov vakergja lenge: „Ma oven iznenadime. Tumen rodena e Isuse o Nazarekjanco, kova so sine kovimo ko stubo. Ov voskresningja. Nane akate. Ake, akava tano o than kote so sine čhivdo. 7 Ama džan hem vakeren leskere učenikonge hem e Petareske: ’Ov džala angleder tumende ki Galileja. Adari ka dikhen le, baš sar so vakergja tumenge‘“. 8 Tegani iklile avrijal hem našle taro grobo, sine but vozbudime hem tresinena sine tari dar. Ama na vakergje nikaske ništo soske darana sine.*