O ŠUKAR HABERI SPREMA O LUKA

1 But džene trudingje pe te pišinen bašo sa o nastanija so slučingje pe, hem amen siem uverime kaj adala čače slučingje pe. 2 Isto agjaar, bašo akala nastanija vakergje amenge okola so ple jakhencar dikhle len hem okola so objavinena e Devleskoro lafi. 3 Adaleske me da, poštujmea Teofile, otkeda šukar ispitingjum sa taro početok, rešingjum te pišinav tuke sa so slučingja pe redoja, 4 te šaj te ove uverimo kaj sa adava so sikliljan angleder tano čače.

5 Ko vreme keda o Irod* sine cari ki Judeja, sine jekh svešteniko so vikinela pe sine Zaharija, tari e Avijaskiri svešteničko grupa. Leskiri romni sine tari e Aroneskiri familija hem vikinela pe sine Elisaveta. 6 Ola solduj sine pravedna anglo Devel, hem celosno ikerena pe sine ko sa e Jehovaskere* zapovedija hem zakonija. 7 Ama len na sine len čhave, soske i Elisaveta našti sine te ačhovel khamni, a solduj sine više ko berša.

8 Jekh dive o Zaharija kerela sine pli svešteničko služba anglo Devel, adaleske so leskiri svešteničko grupa sine ko redo te služinel. 9 Sprema o svešteničko običaj, alo leskoro redo ov te khuvel ko e Jehovaskoro* svetilište* hem te tharel temjani.* 10 A celo narodo molinela pe sine avrijal džikote ov tharela sine temjani. 11 Tegani pojavingja pe leske e Jehovaskoro* angeli kova so tergjola sine tari desno strana taro žrtveniko bašo temjani. 12 Keda dikhlja le, o Zaharija voznemiringja pe hem darandilo. 13 Ama o angeli vakergja leske: „Ma dara Zaharija, soske o Devel šungja adava so rodingjan taro vilo. Tli romni i Elisaveta ka bijanel tuke čhavo. Čhiv leske o anav Jovan. 14 Ka ove but radosno hem but manuša ka radujnen pe bašo leskoro bijanibe, 15 soske ov ka ovel baro e Jehovaske* ko jakhja. Ama na ka smejnel te piel mol ili bilo so javer so makjarela. O Devel ka del le pli sila* panda džikote tano ple dajake ko vogi. 16 Hem ka pomožinel bute Izraelconge te iranen pe ko pumaro Devel, o Jehova.* 17 Ov ka džal anglo Devel hem ka ovel le i revnost* hem i sila sar so sine e Ilija, te šaj te kerel o vile e dadengere te oven sar čhavengere hem te pomožinel okolenge soj neposlušna te postapinen mudro hem te keren adava soj ispravno, te šaj o narodo te ovel spremno bašo Jehova“.*

18 A o Zaharija vakergja e angeleske: „Sar šaj te verujnav ko akava? Soske, me sium phuro hem mi romni da tani ko berša“. 19 O angeli odgovoringja leske: „Me sium o Gabriel, kova so tergjola anglo Devel. Bičhaldo sium te kerav tuja lafi hem te vakerav tuke akava šukar haberi. 20 Ake, ka ove laloro hem ka našti te kere lafi sa dži ko dive keda ka slučinel pe adava, soske na verujngjan ko mle lafija so ka ispolninen pe ko vreme soj odredimo“. 21 A o narodo adžikerela sine e Zaharija avrijal hem čudinela pe sine soske ačhilo doborom ko svetilište.* 22 Keda iklilo avrijal, našti sine te vakerel e manušenge ništo, hem ola halile kaj ov andre dikhlja vizija.* Trudinela pe sine išaretencar te haljovel pe lencar, soske našti sine te kerel lafi. 23 Keda nakhle o dive tari leskiri svešteničko služba,* ov irangja pe khere.

24 Palo nesave dive, leskiri romni i Elisaveta ačhili khamni. Pandž masek na ikljovela sine taro kher hem vakerela sine: 25 „Akava šukaripe o Jehova* kergja mange akana. Ov dikhlja ki mande hem cidingja mandar i ladž“.

26 Keda sine šov masek khamni, o Devel bičhalgja e angele e Gabriele ki diz Nazaret tari Galileja, 27 ki jekh čhaj so vikinela pe sine Marija, koja so sine verimi e Josifea kova so avela sine tari e Davideskiri familija. 28 Keda o angeli alo ki late, vakergja lake: „Šukar dive, tu so sian but blagoslovimi, o Jehova* tano tuja!“ 29 A oj darandili hem pučela pe sine so značinena akala lafija. 30 Tegani o angeli vakergja lake: „Ma dara Marija, soske o Devel blagoslovingja tut. 31 Ake, ka ačhove khamni hem ka bijane murš. Čhiv leske o anav Isus. 32 Ov ka ovel baro hem ka vikinen le Čhavo e Najbareskoro. O Jehova,* o Devel, ka del le o prestol leskere dadeskoro e Davideskoro, 33 hem ov večno ka vladinel sar Cari ko kher e Jakoveskoro hem leskere Carstvoske nane te avel krajo“.

34 A i Marija pučlja e angele: „Sar šaj adava te ovel, keda panda na sukjum muršea?“ 35 A o angeli odgovoringja lake: „E Devleskiri sila* ka avel upri tute, i sila e Najbareskiri ka učharel tut. Adaleske o čhavo so ka bijane le ka ovel sveto, hem ka vikinel pe e Devleskoro Čhavo. 36 Ti familija i Elisaveta isto agjaar tani akana khamni šov masek hem ko vogi phiravela murš čhavo, iako tani phuri hem o manuša vakerena sine kaj našti te ačhovel khamni, 37 soske e Devleske ništo nane nevozmožno“.* 38 Tegani i Marija vakergja: „Ake me sium e Jehovaskiri* robinka! Neka ovel mancar agjaar sar so vakerea tu“. Hem o angeli gelo peske latar.

39 Palo adava i Marija spremingja pe hem sigate geli ki jekh diz koja so sine ko judejska planine. 40 Keda reslja, khuvgja ko e Zaharijaskoro kher hem pozdravingja e Elisaveta. 41 Keda i Elisaveta šungja e Marijakoro glaso, o čhavo rupingja lake ko vogi. Tegani i Elisaveta, vodimi tari e Devleskiri sila,* 42 glasno vakergja: „Blagoslovimi sian maškar o džuvlja hem blagoslovimo tano o čhavo soj ko tlo vogi! 43 Bari čest mange so mle Gospodareskiri daj ali ki mande! 44 Soske keda šungjum tlo glaso, o čhavo soj ko mo vogi rupingja tari radost. 45 Srekjno sian tu so verujngjan ko akala bukja, soske adava so o Jehova* vetingja tuke, celosno ka ispolninel le“.

46 A i Marija vakergja: „Me falinava e Jehova,* 47 hem mo vilo tano radosno bašo adava so o Devel, mo Spasiteli, kergja mange, 48 soske ov dikhlja ple čorole robinka. Otakana sa o generacie ka vakeren kaj sium srekjno, 49 soske o mokjno Devel kergja bare bukja baši mange, hem sveto tano leskoro anav. 50 Ov sekogaš sikavela milost okolenge so hor poštujnena le.* 51 But mokjna bukja kergja ple vastea, hem rasturingja ko sa o strane okolen soj čalmdžie. 52 Ov peravgja e mokjna manušen taro lengere prestolija, a vazdingja e obična manušen. 53 E bokhalen čaljargja len šukar bukjencar, a e barvalen mukhlja len čuče vastencar. 54 Ov alo te pomožinel ple slugaske e Izraeleske adaleske soj tano milostivo, 55 sar so vetingja amare parapaponge kaj sekogaš ka ovel milostivo e Avraamea hem leskere potomstvoja“. 56 I Marija ačhili ki Elisaveta okolu trin masek, a palo adava irangja pe khere.

57 Alo o vreme i Elisaveta te bijanel, hem bijangja murš. 58 A o komšie hem lakiri familija šungje kaj o Jehova* sikavgja lake bari milost hem zaedno laja but radujngje pe. 59 Ko oftoto dive ale te keren e čhave suneti hem e čhaveske mangle te čhiven e dadeskoro anav, Zaharija. 60 Ama i daj vakergja: „Na, ov ka vikinel pe Jovan“. 61 Tegani ola vakergje lake: „Nikoj tari tli familija na vikinela pe agjaar“. 62 Palo adava išaretencar pučle e dade sar ov mangela te vikinel pe o čhavo. 63 Ov rodingja te den le tabla hem ki late pišingja: „Leskoro anav tano Jovan“. Tegani sarine čudingje pe. 64 Hem odma phravdili i čhib leskiri, počmingja palem te kerel lafi hem te falinel e Devle. 65 Sa lengere komšie počmingje te daran, hem bašo akava počmingja te kerel pe lafi ki celo Judeja. 66 Sa adala so šungje, razmislinena sine bašo adava hem pučena pe sine: „So ka ovel akava čhavo keda ka bajrol?“ Soske, sine jasno kaj o Jehova* sine lea.*

67 Tegani leskoro dad o Zaharija, vodimo tari e Devleskiri sila,* počmingja te prorokujnel: 68 „Neka ovel falimo o Jehova,* o Devel e Izraeleskoro, soske sikavgja milost ple narodoske hem oslobodingja le. 69 Taro kher ple slugaskoro e Davideskoro dengja amen mokjno spasiteli,* 70 sar so vakergja preku ple sveta prorokija taro purano vreme. 71 Ov vetingja kaj ka spasinel amen taro amare dušmanja hem taro sa okola so mrzinena amen. 72 Ov ka ispolninel adava so vetingja amare parapaponge kaj ka sikavel amenge milost hem ka setinel pe ko plo sveto sojuz,* 73 ki sovli so dengja e Avraameske, amaro parapapo. 74 Otkeda o Devel ka oslobodinel amen taro amare dušmanja, ka mukhel amen te služina leske bizi dar. 75 Te šaj te ova leske verna hem te kera adava soj ispravno celo amaro životo. 76 A tu, mo čhavo, ka ove proroko e Najbareskoro, soske ka dža anglo Jehova* te spremine leskere drumija, 77 te šaj te sikave leskere narodo kaj ov ka spasinel le agjaar so ka prostinel leskere grevija. 78 Amaro Devel ka kerel sa adava adaleske so isi le baro sočuvstvo. Adava sočuvstvo taro nebo ka svetinel upri amende sar keda ikljola o kham, 79 te šaj te anel svetlina okolenge so živinena ki temnica hem teli senka e meribaskiri. Adaja svetlina ka anel amen ko drumo bašo mir“.

80 A o čhavo bajrola sine hem ulo zrelo manuš.* Ov živinela sine ki pustina sa džikote na alo o vreme te propovedinel e manušenge ko Izrael.

2 Ko adava vreme o cezar* Avgust naredingja te kerel pe popis sa e manušenge.* 2 Akava sine o prvo popis so kergja pe keda o Kvirinij sine upraviteli ki Sirija. 3 Hem sarine gele ko popis, sekoj ki pli diz. 4 Agjaar, o Josif da gelo tari galilejsko diz Nazaret ki Judeja, ki e Davideskiri diz koja so vikinela pe sine Vitleem, soske ov avela sine tari e Davideskiri familija. 5 Ov gelo ko popis e Marijaja, soske ko adava vreme oj sine više leskiri romni, a sine khamni, paše ko bijanibe. 6 Džikote sine adathe, alo o vreme te bijanel. 7 Hem oj bijangja murš, ple prvobijame, pakjargja le ko pherne hem čhivgja le ko than kote so e stokake čhivena hajbaske, soske na sine than kote te rakjaren.

8 Ko adava than isto agjaar sine ovčarija kola so živinena sine avrijal hem rakjate arakhena sine pumare bakhren. 9 Taro jekh puti, e Jehovaskoro* angeli pojavingja pe angli lende, jekh bari svetlina koja so avela sine taro Jehova* sine okolu lende hem ola but darandile. 10 A o angeli vakergja lenge: „Ma daran. Ake, anava tumenge šukar haberi kova so ka kerel sa o manuša but te radujnen pe. 11 Soske, avdive ki e Davideskiri diz, bijandilo tumenge Spasiteli, o Hristos* o Gospodari. 12 Ake sar ka pendžaren le: ka arakhen čhavo pakjardo ko pherne sar pašljola ko than kote so čhivela pe e stokake hajbaske“. 13 Taro jekh puti, uzo adava angeli pojavingje pe panda but javera angelija.* Falinena sine e Devle hem vakerena sine: 14 „Falinen e Devle soj ko nebo, a ki phuv neka ovel mir e manušen kas so o Devel odobrinela“.

15 Keda o angelija mukhle len hem irangje pe ko nebo, o ovčarija vakergje jekh jekheske: „Ajde te dža ko Vitleem hem te dikha soj adava so o Jehova* vakergja amenge kaj slučingja pe“. 16 Tegani sigate gele hem arakhle e Marija, e Josife hem e bebe sar pašljola ko than kote so čhivena e stokake hajbaske. 17 Keda dikhle adava, raskažingje lenge bašo sa adava so sine lenge vakerdo bašo čhavo. 18 Hem sarine so šungje adava sine vooduševime taro adava so vakergje lenge o ovčarija. 19 A i Marija počmingja te ikerel sa akala lafija ko plo vilo hem razmislinela sine bašo adava so ola značinena. 20 Palo adava o ovčarija irangje pe hem počmingje te falinen e Devle bašo sa adava so šungje hem so dikhle, soske slučingja pe baš agjaar sar so sine lenge vakerdo.

21 Ko oftoto dive keda alo vreme te keren le suneti, čhivgje leske o anav Isus, sar so o angeli vakergja kaj ka vikinel pe, panda angleder i Marija te ačhol khamni.

22 Palo o dive so valjani sine te nakhen te šaj palem te oven čista sprema e Mojseeskoro zakoni, ola angje e čhave ko Erusalim anglo Jehova,* 23 sar so pišinela ko e Jehovaskoro* zakoni: „Sekova prvobijamo murš čhavo, mora te pripadinel e Jehovaske“.* 24 Hem dengje žrtva sar so vakerela e Jehovaskoro* zakoni: „Duj bare gulubija ili duj tikne gulubija“.

25 A ko Erusalim živinela sine jekh manuš so vikinela pe sine Simeon. Ov sine pravedno hem darala sine taro Devel. Adžikerela sine o vreme keda o Devel ka pomožinel e Izraeleske, hem e Devleskiri sila* sine upri leste. 26 O Devel o Jehova* preku pli sila* otkringja leske kaj ov nane te merel džikote na dikhela leskere Hristose.* 27 Vodimo tari e Devleskiri sila,* ov alo ko hrami. Keda o roditelija angje e čhave, e Isuse, te keren leske adava so rodela o Zakoni, 28 ov lelja le ki angali, falingja e Devle hem vakergja: 29 „Devla so sian Najbaro Gospodari, dikhljum e čhave sar so vakergjan mange, adaleske akana šaj rahati te merav. 30 Soske mle jakhja dikhle okole preku kaste so ka spasine e narodo, 31 okole kas so tu bičhalgjan te šaj sa o manuša te dikhen le. 32 Ov tano i svetlina so ka cidel i temnica so učharela e narodo hem ka anel slava tle narodoske e Izraeleske“. 33 A o dad hem i daj e čhaveskere sine but vooduševime bašo adava so vakergja o Simeon baši leske. 34 Isto agjaar o Simeon blagoslovingja len. A e Marijake, e čhaveskere dajake, vakergja: „Leskoro sebepi nesave taro Izrael ka peren, a nesave ka ušten, hem but džene ka keren lafi protiv leste, iako o Devel ka sikavel e manušenge znakija kaj tano lea. 35 Ov tano birimo te šaj te dikhel pe so isi ko vilo bute manušen. A tut, akava ka posavel tut ko vilo sar jekh baro mači“.

36 Tegani živinela sine i proročica i Ana, i čhaj e Fanueleskiri taro e Asereskoro pleme. Oj sine but phuri. Sar terni, otkeda ženingja pe, efta berš živingja ple romea, 37 a palo adava živingja sar udovica. La sine la 84 berš hem sekogaš sine ko hrami te šaj te služinel e Devleske dive hem rat, agjaar so postinela sine hem molinela pe sine taro vilo. 38 Oj ali ko adava momenti hem počmingja te zablagodarinel pe e Devleske hem te vakerel bašo čhavo sa okolenge so adžikerena sine o Erusalim te ovel oslobodimo.

39 Keda o Josif hem i Marija kergje sa sprema e Jehovaskoro* zakoni, irangje pe ki Galileja, ki pumari diz Nazaret. 40 A o čhavo bajrola sine, ovela sine sa posilno hem pomudro, hem o Devel sine lea.

41 Leskere roditelija sekova berš džana sine ko Erusalim bašo prazniko Pasha.* 42 Keda sine le 12 berš, ola ale ko Erusalim sar so kerena sine adava sekogaš praznikoske. 43 Keda završingja o prazniko ola cidingje te iranen pe khere hem na primetingje kaj o Isus ačhilo ko Erusalim. 44 Adaleske so mislingje kaj tano maškar o manuša kasaja so patujnena sine, ola patujngje jekh dive, a palo adava počmingje te roden le maškar i familija hem maškar okola kolen so pendžarena sine. 45 Ama adaleske so na arakhle le, ola irangje pe ko Erusalim te šaj te roden le. 46 Palo trin dive arakhle le ko hrami sar bešela maškar o učitelija, šunela len hem pučela len sine pučiba. 47 Sa adala so šungje le, sine vooduševime taro adava sar haljola o bukja hem sar odgovorinela. 48 Keda leskere roditelija dikhle le, čudingje pe. Tegani i daj leskiri vakergja leske: „Mo čhavo, soske kergjan amenge akava? To dad hem me siem sine but sekirime hem rodingjem tut“. 49 A ov vakergja lenge: „Soske rodingjen man? Na džanljen li kaj me mora te ovav me Dadeske ko kher?“ 50 Ama ola na halile so značinena adala lafija.

51 Tegani gelo lencar hem irangja pe ko Nazaret hem ponadari da sine lenge poslušno. A leskiri daj, sa akala lafija garavgja ko plo vilo. 52 O Isus bajrola sine hem ovela sine pomudro, hem ponadari da sine manglo taro Devel hem taro manuša.

3 Ko 15-to berš taro vladibe e cezareskoro Tiberij, keda o Pontij Pilat sine upraviteli ki Judeja, hem o Irod* vladeteli* ki Galileja, a leskoro phral o Filip vladeteli ki Itureja hem Trahonitida, hem o Lisanij vladeteli ki Avilinija, 2 ko vreme keda o Kajafa hem o Ana sine glavna sveštenikija, o Jovan o čhavo e Zaharijaskoro, dobingja haberi taro Devel džikote sine ki pustina.

3 Adaleske o Jovan nakhlja taro sa o thana so sine okolu o Jordan, te propovedinel kaj o manuša valjani te krstinen pe hem agjaar te sikaven kaj kainena pe bašo pumare grevija, te šaj te oven lenge prostime, 4 hem adava slučingja pe baš sar so pišinela ko lil taro proroko o Isaija: „Nekoj vikinela ki pustina: ’Spreminen e Jehovaske* o drumo! Keren leske ramna o drumija. 5 Sekoja dolina valjani te pherel pe, hem sekoja planina hem učo than valjani te keren pe ramna. O drumija so isi len krivine mora te oven prava hem o drumija so nane ramna mora te keren pe ramna. 6 Hem sa o manuša ka dikhen okole preku kaste so o Devel ka anel spasenie‘“.

7 Tegani keda o manuša avena sine ko Jovan te krstinel len, ov vakerela lenge sine: „Tumen sien čhave e sapengere! Koj vakergja tumenge kaj šaj te našen tari e Devleskiri holi so avela? 8 Adaleske sikaven tumare postapkencar kaj kainena tumen. Hem ma vakeren korkori tumenge: ’O Avraam tano amaro dad‘. Soske, vakerava tumenge kaj o Devel šaj taro akala bara te kerel čhave e Avraameske. 9 O tover više tano spremno te čhinel o kašta taro koreno. Sekova kaš kova so na dela šukar plodi ka čhinel pe hem ka frdel pe ki jag“.

10 A o manuša pučena le sine: „Tegani so valjani te kera?“ 11 Ov odgovoringja lenge: „Kas isi duj nametke, neka del jekh okoleske so nane le ni jekh, hem kas isi hajbaske, neka del okoleske so nane le“. 12 Čak o danočnikija avena sine ki leste te krstinel len hem pučena le sine: „Učitele, so valjani te kera?“ 13 Ov vakergja lenge: „Ma roden taro manuša te platinen poviše taro adava so rodela o zakoni“. 14 Isto agjaar, o vojnikija da pučena le sine: „So valjani amen te kera?“ A ov odgovoringja lenge: „Nikastar ma len pare silaja hem nikas ma obvininen nepravedno, nego oven zadovolna tumare plataja“.

15 Adaleske so o manuša adžikerena sine te avel o Hristos,* ki peste pučena pe sine bašo Jovan: „Te nane ov o Hristos?“ 16 Adaleske o Jovan sarinenge vakergja: „Me krstinava tumen panjea, ama okova so avela pali mande tano posilno mandar, hem me na zaslužinava ni leskere sandale te phravav. Ov ka krstinel tumen e Devleskere silaja* hem jagaja. 17 Ko vas isi le lopata kolaja so ka čistinel o giv tari leskiri lušpa. O giv ka čhivel ko ambarija,* a o lušpe ka tharel len jagaja so našti te ačhavel pe“.

18 Ov isto agjaar ohrabrinela sine e manušen ko but javera da načinija hem ponadari da vakerela sine lenge o šukar haberi. 19 Ama, e vladetele e Irode o Jovan ukorinela le sine bašo adava so lelja ple phraleskere romnja e Irodijada hem bašo sa o lošna bukja so kergja. 20 Adaleske o Irod kergja panda jekh lošno buti: čhivgja e Jovane ko zatvor.

21 O Jovan krstingja bute dženen, hem isto agjaar ov krstingja e Isuse da. Džikote o Isus molinela pe sine, phravdilo o nebo, 22 hem e Devleskiri sila* pojavingja pe sar gulubi, hulili upri leste hem šundilo glaso taro nebo: „Tu sian mlo manglo Čhavo, tu kerea man radosno!“

4 Otkeda o Isus krstingja pe ki reka Jordan, e Devleskiri sila* ali upri leste hem adaja sila vodinela le sine ki pustina 2 kote so ačhilo 40 dive. Adaleske so na halja ništo, keda završingje adala dive ov bokhalilo hem o Beng alo te iskušinel le. 3 Tegani o Beng vakergja leske: „Ako sian e Devleskoro čhavo vaker akale bareske te ovel maro!“ 4 Ama o Isus vakergja leske: „Pišimo tano: ’O manuš na smejnela te živinel samo taro maro‘“.

5 Palo adava, ingargja le ko jekh učo than hem taro jekh puti sikavgja leske sa o carstvija ki phuv. 6 Tegani o Beng vakergja leske: „Ka dav tut i vlast upro sa akala carstvija hem lengiri slava, adaleske so adaja vlast tani mange dendi hem me dava la kaske so me mangava. 7 Adaleske, ako pokloninea tut mange,* sa akava ka ovel tlo“. 8 Tegani o Isus vakergja leske: „Pišimo tano: ’E Jehova,* tle Devle, mora te obožavine hem samo leske te služine!‘“

9 Tegani ingargja le ko Erusalim, čhivgja le ko najučo than taro hramsko zido hem vakergja leske: „Ako sian e Devleskoro čhavo, frde tut tele! 10 Soske tano pišimo: ’Ov ka zapovedinel ple angelenge te arakhen tut‘ 11 hem ’Ola ka ingaren tut ko ple vasta te šaj te na khuve tlo pro ko bar‘“. 12 O Isus vakergja leske: „Pišimo tano: ’Ma iskušin e Jehova,* tle Devle!‘“ 13 Tegani o Beng čhinavgja te iskušinel le hem cidingja pe lestar, ama ov ponadari da rodela sine javer prilika te iskušinel le.

14 A o Isus pherdo e Devleskere silaja* irangja pe ki Galileja hem o manuša so živinena sine ko adava than kerena sine šukar lestar lafi. 15 Isto agjaar počmingja te sikavel ko lengere sinagoge* hem sarine poštujnena le sine.

16 Hem alo ko Nazaret, kote so barilo. Sprema plo običaj, ko sabat* khuvgja ki sinagoga hem uštilo te čitinel. 17 Tegani dengje le o lil* taro proroko Isaija, a ov phravgja le hem arakhlja o than kote so pišinela sine: 18 „E Jehovaskiri* sila tani upri mande, soske ov biringja man* te vakerav o šukar haberi e čorolenge, bičhalgja man te vakerav okolenge soj phanle kaj ka oven oslobodime, te vakerav e korolenge kaj palem ka dikhen, te oslobodinav okolen so cidena muke, 19 te propovedinav bašo vreme keda o manuša ka šaj palem te oven blagoslovime taro Jehova“.* 20 Tegani pakjargja o lil,* dengja le e manušeske so služinela sine ki sinagoga hem bešlja. Sarine so sine ki sinagoga dikhena sine ki leste. 21 Tegani vakergja lenge: „Avdive, akala lafija taro Spisija kola so čitingjum len, ispolningje pe“.

22 Sarine ola počmingje te keren lestar šukar lafi hem sine vooduševime taro leskere prijatna lafija hem pučena pe sine: „Nane li akava e Josifeskoro čhavo?“ 23 Tegani o Isus vakergja lenge: „O manuša vakerena: ’Ako sian doktori, sasljar korkori tut!‘ Sigurno akala lafija ka vakeren len mange da. Hem ka vakeren: ’Šungjem kaj kergjan but bukja ko Kapernaum, ker nesave taro adala bukja ko tlo than da!‘“ 24 Isto agjaar vakergja lenge: „Čače vakerava tumenge, nijekh proroko nane prifatimo ko plo than. 25 Oven sigurna kaj e Ilijaske ko vreme sine but udovice ko Izrael keda trin berš hem šov masek na dengja bršim hem ki celi phuv sine baro bokhalipa. 26 Ama o Ilija na sine bičhaldo ki nijekh taro adala udovice, nego samo ki udovica tari Sarepta, ki phuv Sidon. 27 Isto agjaar, ko vreme e prorokoskoro o Elisej, sine but leprozna ko Izrael, ama nijekh lendar na sine sasljardo, osven o Naaman tari Sirija“. 28 Keda šungje akava, sarine so sine ki sinagoga but holjangje, 29 pa uštile, brkingje le tari diz hem ingargje le ko učo than tari planina kote so sine gradimi lengiri diz, te šaj adathar te frden le. 30 Ama ov nakhlja maškar lende hem gelo peske.

31 Palo adava, hulilo ko Kapernaum, i diz ki Galileja. Hem adathe sekova sabat sikavela sine e manušen, 32 a o manuša sine vooduševime taro način sar sikavela len sine, soske kerela sine lafi sar nekoj so isi le avtoriteti taro Devel. 33 A ki sinagoga sine jekh manuš kova so sine le demoni, hem ov glasno vikingja: 34 „Isus, tu o Nazarekjanco, so mangea amendar? Aljan li te uništine amen? Me but šukar džanava koj sian tu, tu sian o Sveto sluga e Devleskoro“. 35 A o Isus strogo zapovedingja leske: „Čutin hem ikljov lestar!“ Tegani o demoni frdingja e manuše tele maškar o manuša so sine adathe hem iklilo lestar bizo te povredinel le. 36 Tegani sarine čudingje pe hem jekh jekheske vakerena sine: „Save lafija tane akala? Le isi le vlast hem sila te zapovedinel e demonenge hem ola šunena le!“ 37 Hem baši leste šundilo ko sa o okolna thana.

38 Otkeda gelo peske tari sinagoga, alo e Simoneske ko kher. A e Simoneskere sasa sine la bari temperatura, hem zamolingje le te pomožinel lake. 39 O Isus gelo uzi late hem sasljargja la, tegani na sine la više temperatura. Hem oj odma uštili hem počmingja te spreminel lenge hajbaske.

40 A akšameskoro, sarinen so sine len nasvale ko kher taro bilo save nasvalipa, anena len sine ki leste. Ov čhivela sine ple vasta upro sekole jekheste hem sasljarela len sine. 41 O Isus isto agjaar paldela sine e demonen taro but manuša, a ola glasno vikinena sine: „Tu sian e Devleskoro Čhavo!“ A ov strogo zapovedinela lenge sine hem na dozvolinela sine lenge te keren lafi, soske ola džanena sine kaj ov tano o Hristos.*

42 Keda phravdilo o dive, iklilo hem gelo ko jekh than te šaj te ovel korkori, a o narodo rodela le sine. Keda arakhle le, mangle ov te ačhol adathe hem te na džal peske lendar. 43 A ov vakergja lenge: „Ko javera da dizja mora te vakerav o šukar haberi bašo e Devleskoro Carstvo, soske bašo adava sium bičhaldo“. 44 Hem prodolžingja te propovedinel ko sinagoge ki Judeja.

5 Jekh dive, džikote o Isus tergjola sine uzo Genisaretsko Ezero,* o narodo gurinela pe sine okolu leste te šaj te šunel e Devleskoro lafi. 2 Ov dikhlja duj čamcija so sine ko brego taro ezero, a o ribarija iklile taro pumare čamcija hem thovena sine o mreže. 3 Ov uklilo ko e Simoneskoro čamco hem zamolingja le te džal hari podur taro kopno. Tegani bešlja hem počmingja te sikavel e narodo taro čamco. 4 Keda čhinavgja te kerel lafi, vakergja e Simoneske: „Dža e čamcoja kote soj pohor hem frden tumare mreže te astaren mačhe!“ 5 A o Simon vakergja leske: „Učitele, celo rat mučingjem amen hem ništo na astargjem, ama adaleske so tu vakerea adava, ka mukhav o mreže“. 6 Keda kergje adava, astargje doborom but mačhe so o mreže počmingje te čhingjon. 7 Adaleske, kergje vastea e javere ribarenge, kasaja so kerena sine buti, te aven hem te pomožinen lenge. Ola ale, hem phergje o solduj čamcija doborom but mačhe so počmingje te batinen. 8 Keda dikhlja adava, o Simon Petar pelo ko kočaka anglo Isus hem vakergja leske: „Dža tuke mandar Gospodare, soske sium grešno manuš!“ 9 Adava vakergja le soske ov hem o manuša so sine lea čudingje pe keda dikhle kobor mačhe astargje, 10 a isto agjaar čudingje pe o Jakov hem o Jovan, o čhave e Zevedeeskere, kola so kerena sine zaedno buti e Simonea. A o Isus vakergja e Simoneske: „Ma dara! Otakana ka astare manušen“. 11 Tegani angje o čamcija ko kopno, mukhle sa hem gele pali leste.

12 Džikote sine ki jekh diz, alo jekh manuš pherdo lepraja. Keda dikhlja e Isuse, pelo tele ple mujea dži ki phuv hem zamolingja le: „Gospodare, ako tu mangea, šaj te sasljare man“. 13 A ov pružingja plo vas, pipingja le hem vakergja leske: „Mangava, sasljov!“ Hem i lepra odma našavdili lestar. 14 Hem zapovedingja e manušeske: „Ma vaker nikaske, nego dža neka dikhel tut o svešteniko hem de žrtva bašo adava so sian čisto, sar so pišinela ko e Mojseeskoro zakoni, te šaj o sveštenikija te dikhen kaj čače sastiljan“. 15 A bašo Isus šunena sine sa poviše hem poviše manuša, hem but manuša khedena pe sine te šunen le hem te oven sasljarde taro pumare nasvalipa. 16 A ov but puti džala sine ko thana kote so šaj sine te ovel korkori te šaj te molinel pe.

17 Jekh dive džikote sikavela sine e manušen ko jekh kher, adathe bešena sine o fariseija* hem o učitelija e zakoneskere, kola so ale taro sa o gava tari Galileja, Judeja hem taro Erusalim. A o Jehova* dela le sine sila te sasljarel e nasvalen. 18 Nesave manuša angje ki nosilka jekhe manuše so sine paralizirimo, hem dikhena sine sar te čhiven le andre anglo Isus. 19 Ama sine but manuša hem našti sine te anen le andre, adaleske uklile ko krovi ikalgje o kjeramidke hem upraldan mukhle i nosilka anglo Isus. 20 Keda o Isus dikhlja lengiri vera, vakergja e paralizirime manušeske: „Tle grevija tane prostime!“ 21 Tegani o učitelija e zakoneskere hem o fariseija počmingje te razmislinen hem te vakeren jekh jekheske: „Koj tano akava so kerela lafi protiv o Devel? Koj šaj te prostinel o grevija osven o Devel?“ 22 Adaleske so o Isus džanela sine bašo so razmislinena, vakergja lenge: „Soske razmislinena agjaar? 23 Soj tano polokho te vakerel pe: ’Prostime tane tle grevija‘, ili: ’Ušti hem phir‘? 24 Ama mangava te džanen kaj e manušikane Čhave* isi le avtoriteti te prostinel o grevija ki phuv!“ Tegani vakergja e paralizirime manušeske: „Vakerava tuke: ušti, le tli nosilka hem dža tuke khere!“ 25 Ov odma uštilo angli lende, lelja pli nosilka kolate so pašljola sine, gelo peske khere hem falinela sine e Devle. 26 Tegani sa o manuša sine vooduševime, darandile hem počmingje te falinen e Devle hem vakerena sine: „Nikogaš na dikhlem asavko nešto!“

27 Palo akava ov iklilo avri hem dikhlja jekhe danočniko, so vikinela pe sine Levi, sar bešela ko than kote so khedela pe sine o danok. Hem vakergja leske: „Ov mlo učeniko!“ 28 Ov mukhlja sa, uštilo hem gelo pali leste. 29 Hem o Levi spremingja leske baro hajbe hem pijbe ko plo kher. A lencar ki sofra sine but danočnikija hem javera manuša. 30 Keda o fariseija hem o učitelija e zakoneskere dikhle akava, počmingje te buninen pe hem vakergje leskere učenikonge: „Soske hana hem piena e danočnikoncar hem e grešnikoncar?“ 31 O Isus odgovoringja lenge: „E saste manušenge na valjani doktori, nego e nasvalenge. 32 Me na aljum te vikinav e pravedna manušen, nego e grešnikon, te kainen pe“.

33 A ola vakergje leske: „E Jovaneskere učenikija često postinena hem molinena pe taro vilo, hem adava kerena e fariseengere da učenikija, a tle hana hem piena“. 34 A o Isus vakergja lenge: „Šaj li te čhiven e džamutreskere amalen te postinen džikote o džamutro tano lencar? 35 Ama ka aven dive keda o džamutro nane te ovel lencar.* Hem tegani, ko adala dive, ola ka postinen“.

36 Palo adava raskažingja lenge jekh sporedba: „Nikoj na čhinela kotor taro nevo šej te šaj te sivel le ko purano šej. Soske, ako kerela agjaar, o nevo kotor ka pharavgjovel taro purano šej, hem o kotor taro nevo šej nane te odgovorinel e purane šeeja. 37 Isto agjaar, nikoj na čhivela taze mol ko purane šišija kerde tari koža.* Soske, ako kerela agjaar, i taze mol ka pharavel o kože hem i mol ka čhorgjol, a o kože ka rumingjoven. 38 Adaleske i taze mol čhivela pe ko neve šišija. 39 Nikoj so pilja i purani mol na mangela i taze mol, soske vakerela: ’I purani mol tani šuži‘“.

6 Ko jekh sabat* o Isus nakhela sine taro nive givea hem leskere učenikija čhinena sine o giv, ljušpinena le sine ple vastencar hem hana le sine. 2 Tegani nesave taro fariseija* vakergje: „Soske kerena adava so nane dozvolimo te kerel pe ko sabat?“ 3 Ama o Isus odgovoringja lenge: „Na čitingjen li nikogaš so kergja o David hem leskere manuša keda sine bokhale? 4 Ov khuvgja e Devleske ko kher, pa lelja, halja hem dengja ple manušenge taro mare so sine dende sar žrtva anglo Devel, kola so nikoj na smejnela sine te hal, osven o sveštenikija.“ 5 Hem vakergja lenge: „O manušikano Čhavo* tano Gospodari so isi le avtoriteti upro sabat“.

6 Jekh javer sabat khuvgja ki sinagoga* hem počmingja te sikavel len. Adathe sine jekh manuš kova so leskoro desno vas sine paralizirimo.* 7 O učitelija e zakoneskere hem o fariseija vnimatelno dikhena sine dali o Isus ka sasljarel e manuše ko sabat, te šaj te arakhen nešto kolea so ka šaj te obvininen le. 8 Ama ov džanela sine bašo so razmislinena. Adaleske vakergja e manušeske so sine le paralizirimo vas:* „Ušti hem tergjov ko maškar“. O manuš uštilo hem terdilo adathe. 9 Tegani o Isus vakergja lenge: „Pučava tumen: sprema o Zakoni, so šaj te kerel pe ko sabat, te kerel pe šukaripe ili lošnipe, te spasinel pe životo ili te mudarel pe?“ 10 Otkeda o Isus dikhlja sarinen so sine okolu leste, vakergja e manušeske: „Pružin tlo vas“. O manuš kergja adava hem leskoro vas sastilo. 11 A ola but holjangje hem počmingje maškar peste te dogovorinen pe so te keren e Isuseske.

12 Jekh dive o Isus uklilo ki planina te molinel pe, hem celo rat molingja pe e Devleske. 13 Keda phravdilo o dive, ov vikingja ple učenikon hem lendar biringja 12, kolen so vikingja apostolija. 14 A ola sine: o Simon, so vikinena le sine Petar, hem leskoro phral o Andrej, o Jakov, o Jovan, o Filip, o Vartolomej, 15 o Matej, o Toma, o Jakov, o čhavo e Alfeeskoro, o Simon, so vikinena le sine o Revno, 16 o Juda, o čhavo e Jakoveskoro hem o Juda Iskariot, kova so pokasno predajngja le.

17 Palo adava, hulilo zaedno lencar tele tari planina hem ačhilo ko jekh ramno than. Adathe sine but taro leskere učenikija hem but manuša kola so ale tari celo Judeja, taro Erusalim hem o manuša taro Tir hem Sidon kola so bešena sine uzo more. Ola ale te šunen e Isuse hem te sasljarel len taro lengere nasvalipa. 18 O Isus sasljargja čak okolen so sine mučime taro demonija. 19 Hem sa o manuša mangena sine te pipinen le, soske lestar ikljola sine sila so sasljarela sine sarinen.

20 A ov dikhlja ple učenikon hem vakergja lenge:

„Srekjna sien tumen o čorole, soske tumaro tano e Devleskoro Carstvo.

21 Srekjna sien tumen so akana sien bokhale, soske ka oven čale.

Srekjna sien tumen so akana rovena, soske ka asan.

22 Srekjna sien keda o manuša mrzinena tumen, keda paldena tumen taro pumaro than, keda vredžinena tumen hem kaljarena tumaro anav bašo manušikano Čhavo. 23 Oven srekjna adava dive hem rupinen tari radost, soske bari tani tumari nagrada ko nebo. Soske, isto agjaar lengere parapapija kerena sine e prorokonge.

24 Ama teško tumenge e barvalenge, soske samo adaja uteha isi tumen.

25 Teško tumenge kola so sien akana čale, soske ka oven bokhale.

Teško tumenge kola so akana asana, soske ka tugujnen hem ka roven.

26 Teško tumenge keda sa o manuša kerena šukar lafi tumendar, soske isto agjaar lengere parapapija kergje e hovavne prorokonge.

27 Ama tumen so šunena, vakerava tumenge: ponadari da mangen tumare dušmanen, keren šukaripe okolenge so mrzinena tumen, 28 blagoslovinen okolen* so dena tumen armanja hem molinen tumen okolenge so vredžinena tumen. 29 Okoleske so ka khuvel tut ki jekh čham, iran leske okoja da čham hem okova so ka lel tutar i upruni nametka, de le i teluni da nametka so isi tut. 30 Sekaske de adava so rodela tutar, hem ako nekoj lelja tutar nešto ma rode te iranel le tuke.

31 Sar so tumen mangena o manuša te keren tumenge, agjaar tumen da keren lenge.

32 Ako mangena samo okolen so mangena tumen, savi pofalba zaslužinena? Soske, o grešnikija da mangena samo okolen kola so mangena len. 33 Hem ako kerena šukaripe samo okolenge so kerena šukaripe tumenge, savi pofalba zaslužinena? O grešnikija da kerena o isto. 34 Isto agjaar, ako dena zaem samo okolenge kolendar so nadinena tumen kaj ka iranen tumenge, savi pofalba zaslužinena? O grešnikija da dena zaem e grešnikonge hem očekujnena sa te iranen lenge. 35 Nego, ponadari da mangen tumare dušmanen, keren šukaripe hem den zaem bizo te nadinen tumen kaj ka iranen tumenge nešto. Tegani tumari nagrada ka ovel bari hem ka oven čhave e Najbareskere, soske ov tano šukar čak okolencar so nane blagodarna hem okolencar soj lošna. 36 Ponadari da oven milostiva sar soj milostivo tumaro Dad.

37 Isto agjaar, čhinaven te sudinen, hem nane te sudinel pe tumenge. Čhinaven te kritikujnen, hem nane te oven kritikujme. Ponadari da prostinen, hem ka ovel tumenge prostimo. 38 Den, hem o manuša ka den tumen. Ola ka pheren ki tumari angali šukar merka, nabimi, tresimi hem prepherdi. Soske, save merkaja merinena, asavke merkaja ka merinel pe tumenge“.

39 Tegani vakergja lenge jekh sporedba: „Šaj li o korolo te vodinel korole? Nane li solduj te peren ki dupka? 40 O učeniko nane pobaro taro plo učiteli, ama sekoj so ka ovel šukar sikavdo* ka ovel sar plo učiteli. 41 Soske dikhea o karo tle phraleske ki jakh, a na dikhea o direko ki tli jakh? 42 Sar šaj te vakere tle phraleske: ’Mo phral, ana te ikalav o karo so isi ki tli jakh‘, a na dikhea o direko ki tli jakh? Licemerno manušea! Prvo ikal o direko tari tli jakh, a palo adava ka šaj šukar te dikhe sar te ikale o karo so isi tle phraleske ki jakh.

43 Soske, nane šukar kaš kova so dela rumimo plodi, a nane ni kirno kaš kova so dela šukar plodi. 44 Soske, sekova kaš pendžargjola taro leskere plodija. Na khedena pe smokve taro kare, ni palem khedena pe drakha tari grmuška so isi la kare. 45 O šukar manuš vakerela šukar bukja, adaleske so ko vilo isi le šukar bukja. A o lošno manuš vakerela lošna bukja, adaleske so ko vilo isi le lošna bukja. Soske, o muj vakerela adava solea tano pherdo o vilo.

46 Tegani, soske vikinena man ’Gospodare! Gospodare!‘ a na kerena o bukja kola so vakerava tumenge? 47 Sekoj so avela ki mande hem šunela mle lafija hem kerela adava so vakerava, 48 ov tano sar jekh manuš kova so keda gradingja kher ranlja hor te šaj te čhivel o temelija ki karpa. Keda uli poplava, o panja khuvena sine upro kher ama našti sine te mrdinen o kher, soske sine šukar gradimo. 49 A okova so šunela, ama na kerela adava, ov tano sar manuš kova so gradingja kher ki phuv, bizo temeli. Keda ali i poplava, o panja khuvgje upro kher, o kher odma pelo hem celosno rušingja pe“.

7 Otkeda vakergja sa akala bukja e manušenge, gelo ko Kapernaum. 2 A jekhe komandire* sine le jekh robo kole so but mangela sine, ama sine doborom but nasvalo so sine meribaja jekh. 3 Keda šungja bašo Isus, bičhalgja te džan ki leste nesave taro evrejska starešine, te molinen le te avel hem te sasljarel leskere robo. 4 Ola ale ko Isus, but molingje le hem vakergje leske: „Akava zapovedniko e vojskakoro zaslužinela te pomožine leske, 5 soske ov mangela amare narodo hem gradingja amari sinagoga“. 6 Tegani o Isus gelo lencar. Ama keda reslja paše ko kher, o komandiri više bičhalgja ple amalen te vakeren leske: „Gospodine, ma mučin tut soske na sium dostojno te ave ko mlo kher. 7 Adaleske da me na aljum ki tute. Ama samo vaker jekh lafi te šaj mlo sluga te sasljol. 8 Soske, mange da o javera zapovedinena hem mande da isi man vojnikija kolenge so zapovedinava. Keda vakerava jekhe vojnikoske: ’Dža adari!‘, ov džala, hem keda vakerava e javereske: ’Ava!‘, ov avela, hem keda zapovedinava mle slugaske: ’Ker akava!‘, ov kerela adava“. 9 Keda o Isus šungja akala lafija sine vooduševimo lestar, hem irangja pe okolenge so džana sine pali leste hem vakergja: „Vakerava tumenge, čak ni ko Izrael na arakhljum doborom bari vera“. 10 Hem keda irangje pe khere okola so sine bičhalde lestar, arakhle e robo sasto.

11 Kratko palo adava gelo ki jekh diz so vikinela pe sine Nain, a leskere učenikija hem but manuša džana sine lea. 12 Keda alo paše uzi e dizjakiri porta, dikhlja sar ingarena jekhe mule manuše te parunen le. Ov sine o edinstveno čhavo ple dajake, koja so sine udovica. A laja sine but manuša tari diz. 13 Keda dikhlja la, e Gospodareske pelo but žal baši late hem vakergja lake: „Ma rov!“ 14 Palo adava alo paše hem pipingja i nosilka. A o manuša so phiravena sine i nosilka ačhile, tegani ov vakergja: „Ternea, tuke vakerava, ušti!“ 15 Hem o terno manuš so sine mulo uštilo hem počmingja te kerel lafi, a o Isus dengja le leskere dajake. 16 A sarine darandile, počmingje te falinen e Devle hem vakerena sine: „Baro proroko pojavingja pe maškar amende“ hem „O Devel žalingja ple narodo“. 17 Bašo adava so kergja, šundilo ki celo Judeja hem ko sa o okolna thana.

18 A e Jovaneskere učenikija vakergje e Jovaneske bašo sa akava. 19 Adaleske o Jovan vikingja dujen taro ple učenikija hem bičhalgja len ko Gospodari te pučen le: „Tu li sian adava so valjani te avel, ili te adžikera nekas javere?“ 20 Keda ale ki leste, ola vakergje leske: „O Jovan Krstitel bičhalgja amen ki tute te puča tut: ’Tu li sian adava so valjani te avel, ili te adžikera nekas javere?‘“ 21 Ko adava momenti o Isus sasljargja bute nasvalen, čak okolen so sine len phare nasvalipa, sasljargja bute korolen te šaj te dikhen hem paldingja e manušendar e demonen. 22 O Isus odgovoringja lenge: „Džan hem vakeren e Jovaneske adava so dikhlen hem adava so šungjen: o korole dikhena, o sakatija phirena, o leprozna sasljovena, o kašuke šunena, o mule uštena hem e čorolenge vakerela pe o šukar haberi. 23 Srekjno tano okova kova so nane te arakhel pričina te sumninel pe ki mande“.

24 Keda e Jovaneskere učenikija gele peske, o Isus počmingja te vakerel e manušenge bašo Jovan: „So gelen te dikhen ki pustina? Trska koja so nišinela la i bavlal? 25 Znači, so gelen te dikhen? Manuš uravdo ko šuže šeja? Okola so phiravena šuže šeja* hem živinena raskošno tane ko carska palate. 26 Tegani so iklilen te dikhen? Te dikhen proroko? Oja, vakerava tumenge, o Jovan tano proroko hem čak pobaro taro prorokija. 27 Ov tano adava kaske soj pišimo: ’Ka bičhalav angli tute* mle manuše so anela haberi* hem ov ka spreminel tuke o drumo‘. 28 Vakerava tumenge, maškar o manuša nane nikoj soj tano pobaro taro Jovan, ama o najtikno ko e Devleskoro Carstvo tano pobaro lestar“. 29 (Keda sa o manuša hem o danočnikija šungje akava, priznajngje kaj o Devel tano pravedno. Adala sine o manuša so sine krstime taro Jovan. 30 A o fariseija* hem o učitelija e zakoneskere na mangle te keren e Devleskiri volja, adaleske so na mangle o Jovan te krstinel len.)

31 „Kasaja te sporedinav e manušen tari akaja generacija? Sar kaste tane? 32 Ola tane sar tikne čhave kola so bešena ko pazari hem jekh jekheske vakerena: ’Bašalgjem tumenge, ama tumen na khelgjen. Giljavgjem tumenge tažna gilja, ama tumen na rungjen‘. 33 Agjaar, alo o Jovan Krstitel kova so ni hala sine maro, a ni piela sine mol, a tumen vakerena: ’Isi le demoni‘. 34 Hem alo o manušikano Čhavo,* kova so hala hem piela, a tumen palem vakerena: ’Dikh, bičalo manuš hem pijanica, amal okolengoro so khedena danok hem e grešnikongoro!‘ 35 Ama o pravedna bukja so kerela len o manuš sikavena kaj tano mudro“.

36 A jekh farisei molinela sine e Isuse te avel ki leste te hal. Adaleske o Isus khuvgja e fariseeske ko kher hem bešlja ki sofra. 37 A jekh džuvli, koja so ki celo diz sine pendžardi sar grešno džuvli, šungja kaj o Isus hala sine e fariseeske ko kher. Adaleske ali hem angja tikno šiši taro parno bar kole so sine le mirislivo maslo. 38 Tegani bešlja pali leste, uzo leskere pre hem rovindor počmingja te sapankerel leskere pre ple asvencar hem te kosel len ple balencar. Isto agjaar, čuminela sine leskere pre hem makhela len sine e mirislivo masloja. 39 Keda dikhlja akava, o farisei so vikingja le ki peste mislingja peske: „Akava manuš te ovel sine proroko, ka džanel sine koj tani hem savi tani akaja džuvli koja so pipinela le, ka džanel sine kaj oj tani grešno džuvli“. 40 Ama o Isus vakergja leske: „Simon, isi man nešto te vakerav tuke“. Ov odgovoringja leske: „Vaker, Učitele!“

41 „Duj manuša dužinena sine pare jekhe manušeske. Jekh dužinela sine 500 denarija,* a o javer 50. 42 Ama adaleske so našti sine te iranen leske o bordži, ov spremno prostingja e soldujenge. Tegani so mislinea, koj taro akala duj poviše ka mangel le?“ 43 O Simon odgovoringja leske: „Mislinava okova kas so sine le pobaro dugo“. O Isus vakergja leske: „Točno vakergjan“. 44 Palo adava irangja pe ki džuvli, hem vakergja e Simoneske: „Dikhea li akale džuvlja? Me khuvgjum ko tlo kher, a tu na dengjan man pani te thovav me pre. A akaja džuvli sapankergja me pre ple asvencar hem koslja len ple balencar. 45 Keda aljum tu na čumingjan man ki čham, a akaja džuvli, otkeda khuvgjum, na čhinavgja te čuminel me pre. 46 Tu na makhljan mo šero masloja, a akaja džuvli makhlja me pre mirislivo masloja. 47 Adaleske, vakerava tuke, lakere grevija tane prostime, iako tane but, soske sikavgja baro mangipe. A kaske hari prostinela pe, sikavela hari mangipe“. 48 Palo adava vakergja lake: „Prostime tane tle grevija“. 49 Tegani okola so sine lea ki sofra pučena pe sine jekh jekhea: „Koj tano akava manuš so čak prostinela o grevija?“ 50 A ov vakergja e džuvljake: „Tli vera spasingja tut. Dža tuke ko mir!“

8 Kratko palo adava, počmingja te džal tari diz ki diz hem taro gav ko gav, te propovedinel hem te vakerel o šukar haberi bašo e Devleskoro Carstvo. A o 12 apostolija sine lea 2 hem nesave džuvlja kolen so o Isus oslobodingja taro demonija hem nesave kolen so sasljargja taro lengere nasvalipa: i Marija so vikinena la sine Magdalena, kolatar so iklile efta demonija, 3 i Joana i romni e Huzaskiri, kole so o Irod čhivgja te ovel odgovorno ko leskoro kher, i Susana hem but javera džuvlja kola so pomožinena sine lenge pumare materijalna bukjencar.

4 Keda khedingja pe baro narodo, zaedno e manušencar so ale ki leste taro razna dizja, ov vakergja lenge jekh sporedba: 5 „Jekh manuš iklilo te frdel seme ki niva. Džikote frdela sine, nesavo seme pelo uzo drumo hem o manuša gazingje le, a o čiriklja so ujrana hale le. 6 A nesavo seme pelo ko than kote so sine but bara. Ov niknongja, ama adaleske so i phuv na sine vlažno, šukilo. 7 A javer seme pelo maškar o kare, hem o kare so barile lea, zagušingje le. 8 A javer seme pelo ki šukar phuv, hem keda niknongja, dengja 100 puti poviše plodi“. Palo adava glasno vakergja: „Kas isi kana, neka šunel!“

9 A leskere učenikija pučle le so značinela akaja sporedba. 10 Ov odgovoringja lenge: „Tumenge tano dendo te haljoven e Devleskere tajne* bašo leskoro Carstvo, a e javerenge ka vakerel pe samo ko sporedbe, te šaj iako dikhena, te na dikhen hem iako šunena, te na haljoven. 11 A i sporedba značinela akava: o seme tano e Devleskoro lafi. 12 O seme so pelo uzo drumo tane okola so šunena e Devleskoro lafi, ama palo adava avela o Beng hem lela lendar o lafi taro lengere vile, te šaj te na verujnen hem te na oven spasime. 13 A o seme so pelo ko than kote so sine but bara tane okola so keda šunena o lafi e Devleskoro, radosno prifatinena le, ama nane len koreno. Ola verujnena nesavo vreme, ama keda avela o iskušenie, ola perena. 14 A o seme so pelo maškar o kare, tane okola so šunena e Devleskoro lafi, ama o sekiracie bašo životo, o barvalipe hem o zadovolstvija lena lengoro vnimanie, pa zadušinena pe hem na anena šukar plodi. 15 A o seme so pelo ki šukar phuv, tane okola so šunena e Devleskoro lafi šukar hem čisto vilea, ola cvrsto ikerena o lafi hem anena plodi džikote istrajnena ko problemija.

16 Nijekh keda tharela i lampa na učharela la ili na čhivela la telo kreveti, nego čhivela la ko astali te šaj adala so khuvena te dikhen o svetlo. 17 Soske, sa soj tajno ka otkrinel pe, hem sa soj šukar garavdo ka doznajnel pe hem ka ikljol ko megdani. 18 Adaleske šukar pazinen sar šunena, soske kas isi le, ka del pe leske panda, ama kas nane le, adava da so mislinela peske kaj isi le, ka lel pe lestar.

19 Tegani ale leskiri daj hem leskere phralja, ama našti sine te aven paše uzi leste taro but narodo. 20 Tegani nekoj vakergja leske: „Ti daj hem te phralja tane avri hem adžikerena te dikhen tut“. 21 Ov odgovoringja: „Mi daj hem me phralja tane okola so šunena e Devleskoro lafi hem ikerena le“.

22 Jekh dive ov hem leskere učenikija khuvgje ko čamco, hem ov vakergja lenge: „Te dža ki okoja strana taro ezero“.* Hem agjaar cidingje e čamcoja. 23 Džikote džana sine, o Isus zasukja. Tegani phudingja jekh silno bavlal hem o čamco počmingja te phergjol panjea hem ka batinel sine. 24 O učenikija ale ki leste, vazdingje le hem vakergje leske: „Učitele, učitele, ka mera!“ Ov uštilo hem zapovedingja e bavlalake hem e bare branenge te ačhon, pa ola smiringje pe hem uli tišina. 25 Tegani vakergja lenge: „Kaj tani tumari vera?“ A ola darandile hem čudingje pe, hem pučena sine jekh jekhe: „Koj tano akava manuš? Ov zapovedinela e bavlalake hem e panjeske hem ola šunena le“.

26 Hem e čamcoja gele ko gerasinsko podračje, kova so sine sprotivno tari Galileja. 27 Keda o Isus iklilo taro čamco, alo ki leste jekh manuš tari diz, kole so sine le demonija. Akava manuš više but vreme na uravela sine šeja hem na živinela sine ko kher, nego ko grobija. 28 Keda dikhlja e Isuse ov vikingja, pelo ko kočaka angli leste hem glasno vakergja: „So mangea mandar Isuse, o Čhavo e Najbare Devleskoro? Molinava tut ma mučin man!“ 29 (O manuš vakergja adava soske o Isus zapovedingja e demoneske te ikljol taro manuš. Ustvari o demoni više but vreme sine le kontrola upri leste. O manuša phandena sine leskere vasta hem o pre sindžirencar hem čhivena sine nekoj te pazinel le, ama ov čhinela sine o sindžirija hem o demoni terinela le sine te džal ko pusta thana.) 30 O Isus pučlja le: „Sar vikinea tut?“ ov odgovoringja leske: „Legija“,* soske ki leste khuvgje but demonija. 31 Hem molinena le sine ma te zapovedinel lenge te džan ki bezdna.* 32 A adathe ki planina sine but bale so hana peske sine, hem o demonija molinena le sine te dozvolinel lenge te khuven ko bale. Hem ov dozvolingja lenge. 33 Tegani o demonija iklile taro manuš hem khuvgje ko bale, a o bale frdingje pe tari karpa tele ko pani hem taslile. 34 Keda o manuša so arakhena sine e balen dikhle adava, našle hem vakergje e manušenge tari diz hem taro okolna thana adava so ulo.

35 Tegani o manuša iklile avri te dikhen so slučingja pe. Ola ale ko Isus hem arakhle e manuše kolestar so iklile o demonija sar bešela uzo e Isuseskere pre uravdo hem kaj alo upri peste, hem tegani darandile. 36 A okola so dikhle adava raskažingje e javere manušenge sar o Isus sasljargja e manuše so sine le demoni. 37 Tegani but manuša taro okolna thana taro gerasinsko podračje molingje e Isuse te džal peske lendar, soske but darandile. Adaleske o Isus uklilo ko čamco te džal peske. 38 A o manuš kolestar so iklile o demonija molinela le sine te dozvolinel leske te džal lea, ama o Isus na dozvolingja leske hem vakergja leske: 39 „Iran tut khere, hem vaker sarinenge so kergja o Devel tuke“. O manuš gelo peske hem vakergja sarinenge ki diz so kergja o Isus.

40 Keda o Isus irangja pe ki Galileja, o narodo šukar dodžakergja le, soske sarine očekujnena le sine te avel. 41 Tegani alo jekh manuš so vikinela pe sine Jair, kova so sine glavno ki sinagoga.* Ov pelo anglo e Isuseskere pre hem počmingja te molinel le te avel ko leskoro kher, 42 soske leskiri edinstveno čhaj, so sine la 12 berš, sine meribaja jekh.

Džikote o Isus džala sine adari, but manuša gurinena pe sine okolu leste. 43 Adathe sine jekh džuvli koja so 12 berš krvarinela sine hem nikoj našti sine te sasljarel la. 44 Oj ali paše pali leste hem pipingja o reske tari leskiri nametka, hem tegani odma čhinavgja te krvarinel. 45 A o Isus pučlja: „Koj pipingja man?“ Adaleske so sarine vakergje kaj na pipingje le, o Petar vakergja: „Učitele, but manuša gurinena pe hem bucinena pe ki tute“. 46 Ama o Isus vakergja: „Nekoj pipingja man, soske osetingjum kaj iklili mandar sila“. 47 I džuvli keda dikhlja kaj našti te garavel pe, počmingja te tresinel tari dar, pa ali hem peli ko kočaka angli leste hem anglo sa o manuša vakergja soske pipingja le hem sar odma sastili. 48 A ov vakergja lake: „Mi čhaj, tli vera sasljargja tut. Dža tuke ko mir!“

49 Džikote panda kerela sine lafi, nesavo manuš taro e Jaireskoro kher alo hem vakergja e Jaireske: „Ti čhaj muli. Ma mučin više e Učitele“. 50 Keda o Isus šungja adava, vakergja e Jaireske: „Ma dara, samo sikav vera, hem oj ka živinel“. 51 Keda reslja ko kher, na mukhlja nikoj te khuvel andre lea, osven o Petar, o Jovan, o Jakov hem e čhajakoro dad hem i daj. 52 A sa o manuša rovena sine hem khuvena pe sine ko kolin tari žal baši lake. Tegani o Isus vakergja: „Ma roven, soske oj na muli, nego sovela“. 53 O manuša počmingje te asan leske soske džanena sine kaj oj muli. 54 A ov astargja e čhaja taro vas hem glasno vakergja: „Čhaje, ušti!“ 55 Oj voskresningja* hem odma uštili, a o Isus vakergja lenge te den la nešto te hal. 56 Lakere roditelija sine doborom radosna so našti sine te verujnen ko adava so slučingja pe, a o Isus zapovedingja lenge nikaske te na vakeren bašo akava.

9 Palo adava vikingja e 12 apostolen hem dengja len mokj hem vlast upro sa o demonija hem dengja len mokj te sasljaren e manušen taro nasvalipa. 2 Hem bičhalgja len te propovedinen bašo e Devleskoro Carstvo hem te sasljaren e nasvalen, 3 hem vakergja lenge: „Tumencar ma len ništo ko drumo, ni kaš, ni torba, ni maro, ni pare.* Hem ma len tumencar duj nametke. 4 Ama ko kova kher ka khuven, ačhoven adathe sa džikote na džana tumenge taro adava than. 5 Hem adathe kote so nane te priminen tumen, ko ikljojbe tari adaja diz tresinen o pravo taro tumare pre. Agjaar ka sikaven lenge kaj sine predupredime“. 6 Hem o učenikija gele. Džana sine taro gav ko gav, vakerena sine o šukar haberi hem segde sasljarena sine.

7 Keda o vladeteli* o Irod* šungja bašo sa adava so slučinela pe, sine but bunimo, soske nesave džene vakerena sine kaj o Jovan voskresningja taro mule, 8 javera vakerena sine kaj pojavingja pe o Ilija, a nesave javera vakerena sine kaj voskresningja nekoj taro purane prorokija. 9 O Irod vakergja: „Me čhingjum e Jovaneskoro šero. Tegani koj tano akava kaske so šunava sa akala bukja?“ Adaleske mangela sine te dikhel le.

10 Keda o apostolija irangje pe, raskažingje e Isuseske sa so kergje. Tegani ov ingargja len ki jekh diz, koja so vikinela pe Vitsaida, te šaj te oven korkori. 11 Ama o manuša doznajngje bašo adava hem gele pali leste. Ov šukar dodžakergja len hem vakerela lenge sine bašo e Devleskoro Carstvo hem sasljarela sine okolen so sine nasvale. 12 Keda počmingja te rakjol, o 12 apostolija ale ko Isus hem vakergje leske: „Mukh e manušen te džan ko gava soj paše hem ko okolna thana te šaj te arakhen than sojbaske hem nešto hajbaske, soske akava than tano pusto“. 13 A ov vakergja lenge: „Tumen den len nešto te han!“ Ola vakergje: „Isi amen samo pandž mare hem duj mačhe. Dali amen te dža hem te kina hajbaske sa akale manušenge?“ 14 A adathe sine okolu 5.000 murša. Tegani ov vakergja ple učenikonge: „Vakeren lenge te bešen ko grupe po 50 džene“. 15 Ola kergje agjaar sar so vakergja lenge o Isus hem sarine bešle. 16 Ov lelja o pandž mare hem o duj mačhe, dikhlja ko nebo, zablagodaringja pe e Devleske ki molitva,* palo adava phaglja o mare hem dengja ple učenikonge, a o učenikija dengje e manušenge. 17 Agjaar sarine hale hem čalile. Palo adava, ola khedingje 12 korpe taro adava so ačhilo.

18 Jekh dive džikote o Isus molinela pe sine korkori, o učenikija ale ki leste hem ov pučlja len: „So vakerena o manuša, koj sium me?“ 19 Ola odgovoringje leske: „Nesave vakerena kaj sian o Jovan Krstitel, javera vakerena o Ilija, a nesave vakerena kaj voskresningja jekh taro purane prorokija“. 20 Tegani pučlja len: „A tumen so vakerena, koj sium me?“ O Petar odgovoringja: „Tu sian o Hristos* kova soj bičhaldo taro Devel“. 21 Tegani strogo zapovedingja lenge nikaske ma te vakeren bašo akava. 22 Hem vakergja lenge: „O manušikano Čhavo* mora te cidel but muke hem te ovel otfrlimo taro starešine, taro glavna sveštenikija hem taro učitelija e zakoneskere hem te ovel mudardo, a ko trito dive te voskresninel“.

23 Tegani vakergja sa e manušenge so sine adathe: „Ako nekoj mangela te džal pali mande, neka otkažinel pe pestar, neka lel sekova dive plo stubo mučibaske* hem neka avel pali mande. 24 Soske, koj mangela te spasinel plo životo, ka našavel le, a koj ka našavel plo životo baši mande, ov ka spasinel le. 25 Čače, savi korist isi e manuše ako dobinela celo sveto, a kerela šteta peske ili našavela plo životo? 26 Soske, sekoj so ka ladžal mandar hem taro mle lafija, o manušikano Čhavo da ka ladžal lestar keda ka avel ple slavaja, ple Dadeskere slavaja hem e angelengere slavaja. 27 Čače, čače vakerava tumenge kaj nesave taro adala soj tane akate nane te meren, sa džikote prvo na dikhena e Devleskoro Carstvo“.

28 Okolu ofto dive otkeda vakergja akala lafija, lelja pea e Petare, e Jovane hem e Jakove, hem uklilo ki planina te molinel pe. 29 Džikote molingja pe, meningja plo izgled angli lende, a leskere šeja ule doborom parne so svetinena sine. 30 Hem taro jekh puti duj manuša kerena sine lea lafi, adava sine o Mojsej hem o Ilija. 31 Keda pojavingje pe, ola svetinena sine hem počmingje te keren lea lafi bašo leskoro džajbe, kova so valjani sine te ovel ko Erusalim. 32 A o Petar hem okola so sine lea zasukje. Keda džangavdile, dikhle kaj ov svetinela hem dikhle e duje manušen sar tergjona sine lea. 33 Džikote akala duj manuša džana peske sine taro Isus, o Petar vakergja leske: „Učitele, but amenge šukar akate. Adaleske, te čhiva akate trin šatorija, jekh tuke, jekh e Mojseeske hem jekh e Ilijaske!“ Ama o Petar na sine svesno so kerela lafi. 34 Džikote o Petar vakerela sine adava, pojavingja pe oblako hem počmingja te učharel len. Keda celosno učhargja len, ola darandile. 35 A taro oblako šundilo glaso: „Akava tano mlo Čhavo, kole so me biringjum le. Leste šunen le!“ 36 Keda šundilo o glaso, o učenikija dikhle kaj o Isus tano korkori. A ola čutingje hem nesavo vreme nikaske na vakergje adava so dikhle.

37 Tajsutno dive, keda hulilo tari planina, baro narodo alo ki leste. 38 Jekh manuš taro narodo vikingja: „Učitele, molinava tut pomožin* me čhaveske, soske nane man javera čhave osven leste. 39 Keda o demoni khuvela ki leste, taro jekh puti počminela te vikinel, te grčingjovel hem taro muj ikljola leske pena, hem na mukhela le sa džikote na povredinela le. 40 Molingjum tle učenikon te palden e demone, ama ola našti sine te keren adava“. 41 Tegani o Isus vakergja: „Tumen sien lošno generacija* so nane la vera ko Devel! Dži keda mora te ovav tumencar, dži keda mora te trpinav tumen? Ana te čhave ki mande!“ 42 Džikote o čhavo avela sine uzo Isus, o demoni frdingja le ki phuv hem kergja but te grčingjovel. Ama o Isus strogo zapovedingja e demoneske te ikljol taro čhavo, sasljargja e čhave, a palo adava dengja le leskere dadeske. 43 Hem sarine čudingje pe keda dikhle e Devleskiri bari mokj.

Džikote o manuša čudinena pe sine bašo sa o bukja so kergja, ov vakergja ple učenikonge: 44 „Šunen šukar hem pamtinen akala lafija: o manušikano Čhavo ka ovel predajmo e dušmanenge ko vasta“. 45 Ama ola na halile akala lafija. Soske, garavdo sine lendar te haljoven so značinena akala lafija, ama darana sine te pučen.

46 Tegani o učenikija počmingje te rasprajnen pe maškar peste bašo adava koj lendar tano najbaro. 47 Ama o Isus džanela sine lengere najhor misle, adaleske lelja jekhe tikne čhave uzi peste 48 hem vakergja lenge: „Koj priminela akale tikne čhave baši mande,* ov priminela man da, a koj priminela man, ov priminela okole da so bičhalgja man. Soske, okova so maškar tumende ponašinela pe sar potikno, ov tano baro“.

49 Tegani o Jovan vakergja leske: „Učitele, dikhlem sar jekh manuš paldela demonen ko tlo anav, ama adaleske so ov nane jekh amendar, amen čhinavgjem le hem vakergjem leske te na kerel adava“. 50 Ama o Isus vakergja leske: „Ma čhinaven le, soske, koj nane protiv tumende, ov tano tumencar!“

51 Keda avela sine sa popaše o vreme te džal peske ko nebo, o Isus sine odlučno te džal ko Erusalim. 52 Ama, angleder ov te džal, bičhalgja nekas taro ple učenikija. Ola gele hem khuvgje ko jekh gav ki Samarija te spreminen sa, te šaj keda ov ka resel, sa te ovel gotovo. 53 Ama keda o manuša taro adava gav doznajngje kaj o Isus džala ko Erusalim, na primingje le adathe. 54 Keda dikhle adava o učenikija o Jakov hem o Jovan vakergje: „Gospodare, mangea li te vakera te hulel jag taro nebo hem te uništinel len?“ 55 Ama o Isus dikhlja len hem ukoringja len. 56 Hem gele ko javer gav.

57 Džikote džana sine ko drumo, nekoj vakergja: „Bilo kote te dža, me ka avav pali tute“. 58 Ama o Isus vakergja leske: „E lisicen isi len pumare thana kote so živinena hem e čiriklen isi len gnezdija, ama e manušikane Čhave nane le plo than kote te sovel“. 59 Tegani jekhe javere manušeske vakergja: „Ov mlo učeniko“. O manuš vakergja leske: „Gospodare, mukh man prvo te džav hem te parunav me dade“. 60 O Isus vakergja leske: „Mukh o mule te parunen e mulen, a tu dža hem segde vaker bašo e Devleskoro Carstvo!“ 61 A jekh javer vakergja leske: „Me ka avav pali tute, Gospodare, ama dozvolin mange prvo te džav hem te pozdravinav man mle kherutnencar“. 62 O Isus vakergja leske: „Nijekh manuš so orinela i niva hem dikhela palal, ov na odgovorinela bašo e Devleskoro Carstvo“.

10 Palo adava o Gospodari biringja javere 70 dženen hem bičhalgja len duj po duj te džan ki sekoja diz hem ko sekova than kote so ov da manglja te džal. 2 Tegani vakergja lenge: „I žetva ki niva tani bari, a rabotnikija isi hari. Adaleske molinen e Gospodare e žetvakoro te bičhalel rabotnikija te khedel pe i žetva. 3 Džan! Ake, bičhalava tumen sar tikne bakhre maškar o ruva. 4 Ma len tumencar pare,* ni torba, ni sandale, hem keda ka arakhen nekas ko drumo, ma ačhoven but te pozdravinen tumen lencar.* 5 Keda ka khuven ko jekh kher, prvo vakeren: ’Neka ovel mir ko akava kher!‘ 6 Hem ako adathe isi jekh manuš so mangela o mir, tumaro mir ka ačhovel ki leste. A ako nane, tumaro mir ka iranel pe ki tumende. 7 Tegani ačhoven ko adava kher, han hem pien adava so ka den tumen, soske o rabotniko zaslužinela pli plata. Ma džan taro jekh kher ko javer te šaj te roden pošukar than kote so ka ačhoven.

8 Isto agjaar, keda ka khuven ki bilo savi diz, hem o manuša priminena tumen, han adava so ka ikalen angli tumende 9 hem sasljaren e nasvalen ki adaja diz. Hem vakeren lenge: ’E Devleskoro Carstvo tano paše!‘ 10 A ako khuvena ki bilo savi diz kote so nane te priminen tumen, džan ko lengere glavna ulice hem vakeren: 11 ’Amen tresinaja čak o pravo so ačhilo ko amare pre tari tumari diz, te sikava tumenge kaj sien sine predupredime. Ama džanen akava: e Devleskoro Carstvo tano paše!‘ 12 Vakerava tumenge kaj ko dive keda o Devel ka sudinel e manušenge, polokho ka ovel e dizjake Sodom, nego akale dizjake.

13 Teško tuke, Horazin! Teško tuke, Vitsaido! Soske, te slučinen pe sine akala čudija ko Tir hem ko Sidon, ola odma ka kainen pe sine agjaar so ka uraven sine šeja žalibaske* hem ka bešen sine ko pravo. 14 Adaleske, e dizjengje Tir hem Sidon ka ovel polokho ko dive keda o Devel ka sudinel e manušenge, nego tumenge. 15 A tu, Kapernaum, ka vazde tut li upre dži ko nebo? Ka pere tele dži ko grobo!*

16 Koj šunela tumen, šunela mande da. Koj otfrlinela tumen, otfrlinela mande da. A koj otfrlinela ma man, otfrlinela okole da so bičhalgja man“.

17 Palo adava o 70 učenikija radosno irangje pe hem vakergje: „Gospodare, čak o demonija šunena amen keda koristinaja tlo anav“. 18 Tegani ov vakergja lenge: „Dikhava kaj o Satana više pelo sar gromi taro nebo. 19 Ake, dengjum tumenge vlast te gazinen e sapen hem e škorpien, hem te pobedinen mokjno dušmane, hem ništo nane te kerel tumenge šteta. 20 Ma radujnen tumen adaleske so o demonija šunena tumen, nego radujnen tumen adaleske so tumare anava tane pišime ko nebo“. 21 Ko adava momenti e Devleskiri sila* kergja o Isus te ovel but radosno hem ov vakergja: „Falinava tut anglo sarine mo Dad, tu so sian Gospodari ko nebo hem ki phuv, soske šukar garavgjan akala bukja taro mudra hem učime manuša, a dengjan te haljoven len o tikne čhave. Oja mo Dad, soske tu mangljan agjaar te ovel. 22 Mo Dad dengja man sa. Nikoj na džanela koj tano o Čhavo, osven o Dad, hem nikoj na džanela koj tano o Dad, osven o Čhavo hem o javera našti te džanen savo tano o Dad sa džikote o Čhavo na sikavela lenge savo čače tano o Dad“.

23 Palo adava, keda o Isus sine korkori ple učenikoncar, vakergja lenge: „Srekjna tane okola so dikhena adava so tumen akana dikhena. 24 Soske, vakerava tumenge, but prorokija hem carija mangle te dikhen adava so tumen dikhena, ama na dikhle, hem te šunen adava so tumen šunena, ama na šungje“.

25 Palo adava, jekh manuš kova so šukar pendžarela sine o Zakoni, te šaj te iskušinel e Isuse, pučlja le: „Učitele, so valjani te kerav te šaj te dobinav večno životo?“ 26 A ov vakergja leske: „So pišinela ko Zakoni? So čitingjan adathe?“ 27 O manuš odgovoringja leske: „’Mang e Jehova,* tle Devle, sa tle vilea, sa tle dušaja,* sa tle silaja hem sa tle gogjaja‘, hem ’mang tle pašutne sar korkori tut!‘“ 28 Tegani o Isus vakergja leske: „Točno vakergjan. Ker akava hem ka dobine večno životo!“

29 A o manuš manglja te sikavel pe kaj tano pravedno, hem adaleske vakergja e Isuseske: „Koj tano mlo pašutno?“ 30 Tegani o Isus vakergja leske: „Jekh manuš hulela sine taro Erusalim te džal ko Erihon hem ko drumo napadingje le čora, kola so lele lestar o šeja hem sa so sine le, but margje le hem gele peske, a le mukhle le meribaja jekh. 31 A taro adava drumo slučajno hulela sine jekh svešteniko, ama keda dikhlja le, nakhlja tari javer strana. 32 Isto agjaar jekh Leviti, džikote hulela sine taro adava drumo, dikhlja le ama nakhlja tari javer strana. 33 A jekh Samarjani, kova so patujnela sine taro adava drumo, keda reslja ko adava than ov dikhlja le hem žalingja le. 34 Hem alo paše uzi leste, makhlja leskere rane maslo hem mol hem phanlja len. Palo adava čhivgja le upro her hem ingargja le ki jekh gostilnica* hem grižingja pe leske. 35 O tajsutno dive ikalgja duj denarija,* dengja len e gazdaske tari gostilnica hem vakergja leske: ’Grižin tut leske, hem so ka trošine poviše taro akava, ka platinav tuke keda ka iranav man‘. 36 So mislinea, koj taro akala trin sikavgja pe sar pašutno e manušeske so sine napadimo taro čora?“ 37 Ov odgovoringja leske: „Okova so sikavgja leske milost“. Tegani o Isus vakergja leske: „Dža, hem tu da ker o isto!“

38 Džikote patujnena sine, khuvgje ko jekh gav. Adathe jekh džuvli so vikinela pe sine Marta primingja len sar gostija ko plo kher. 39 La sine la jekh phen koja so vikinela pe sine Marija. Oj bešlja uzo e Gospodareskere pre hem šunela sine adava so ov vakerela. 40 A i Marta sine zafatimi, soske spreminela sine but bukja. Adaleske ali ko Isus hem vakergja leske: „Gospodare, ništo li nane te vakere? Mi phen mukhlja man te kerav sa korkori. Vaker lake te pomožinel man!“ 41 A o Gospodari vakergja lake: „Marta, Marta, sekirinea tut hem voznemirinea tut bašo but bukja. 42 Na valjani amenge but bukja, dovolno tani samo jekh buti. I Marija biringja o najšukar delo, kova so nane te lel pe latar“.

11 Jekh dive otkeda o Isus molingja pe, jekh taro leskere učenikija vakergja leske: „Gospodare, sikav amen sar te molina amen, sar o Jovan so sikavgja ple učenikon“.

2 Tegani ov vakergja lenge: „Keda molinena tumen, vakeren: ’Amaro Dad, te falinel pe tlo sveto anav‘.* Te avel tlo Carstvo. 3 Sekova dive de amen o maro soj amenge potrebno adale diveske. 4 Hem prostin amenge amare grevija, soske amen da prostinaja sarinenge so grešinena amenge.* Hem ma mukh te pera ko iskušenie‘“.

5 Palo adava vakergja lenge: „Zamislinen kaj ki ekvaš i rat džana ko jekh amal hem vakerena leske: ’Amala de man ko zaem trin mare, 6 soske, samo so alo ki mande jekh amal taro dur than, a nane man so te dav le‘. 7 A ov andral vakerela: ’Ma dosadin man! O udar tano više phanlo, a me čhave tane mancar ko kreveti. Našti te uštav hem te dav tut‘. 8 Vakerava tumenge, čak ako na uštela te del tumen adaleske so sien amala, ama sigurno ka uštel adaleske so sien uporna hem ka del tumen adava so valjani tumenge. 9 Adaleske vakerava tumenge: Molinen, hem ka del pe tumenge. Roden, hem ka arakhen. Khuven, hem ka phravel pe tumenge. 10 Soske, sekoj so molinela, ka dobinel. Sekoj so rodela, ka arakhel. Hem sekoj so khuvela, ka phravel pe leske. 11 Kova dad pe čhaveske ka del sap, ako o čhavo rodingja mačho? 12 Ili, ako rodela lestar jaro, ka del le li škorpija? 13 Adaleske, ako tumen, iako sien grešna, džanena sar te den šukar poklonija tumare čhavenge, tegani kobor poviše tumaro Dad soj ko nebo ka del pli sila* okolenge so rodena lestar!“

14 Palo adava, paldingja jekhe demone kova so kerela sine e manušen te oven lalore. Keda o demoni iklilo, o laloro manuš počmingja te kerel lafi. Hem o narodo sine vooduševimo. 15 A nesave lendar vakergje: „Ov paldela e demonen adaleske so pomožinela le o Velzevul,* o vladeteli e demonengoro“. 16 A javera mangle te iskušinen le hem adaleske rodingje lestar znako taro nebo. 17 Ama o Isus džanlja so mislinena hem vakergja lenge: „Sekova carstvo kote so nane sloga, propadinela, hem sekova kher kote so nane sloga ka perel. 18 Isto agjaar, ako o Satana tano protiv peste, sar ka ačhol leskoro carstvo? A tumen vakerena kaj me paldava e demonen adaleske so pomožinela man o Velzevul. 19 Ako me paldava e demonen adaleske so pomožinela man o Velzevul, tegani koj pomožinela tumare učenikon keda paldena e demonen? Adaleske tumare učenikija ka sikaven kaj na sien ko pravo. 20 Ama, ako me paldava e demonen e Devleskere silaja* tegani e Devleskoro Carstvo više alo, a tumen na sien svesna bašo adava. 21 Keda nesavo silno manuš, kova so isi le šukar oružje arakhela plo kher, tegani nikoj našti te čorel taro leskoro imot. 22 Ama keda ka avel nesavo soj pozoralo lestar hem pobedinela le, tegani lela lestar sa o oružje kote so sine le doverba hem delinela e javerencar sa adava so lelja lestar. 23 Koj nane mancar, ov tano protiv mande hem koj na khedela e manušen mancar, ov rasturinela len.

24 Keda jekh demoni ka ikljol taro manuš, nakhela tari pustina hem rodela than kote te odmorinel, ama na arakhela hem tegani vakerela: ’Ka iranav man ko mlo kher kotar so ikliljum‘. 25 Hem keda iranela pe, arakhela o kher čisto hem sredimo. 26 Palo adava džala hem anela javere efta demonen soj panda pološna lestar hem keda khuvena ko kher, ačhona te živinen adathe. Tegani, akale manušeske ovela panda pološno nego so sine ko početok“.

27 Džikote panda vakerela sine akava, jekh džuvli so sine maškar o narodo vikingja: „Srekjno tani i daj so bijangja tut hem so dengja tut thud!“ 28 A ov vakergja: „Na, nego srekjna tane okola so šunena e Devleskoro lafi hem ikerena le!“

29 Hem adaleske so sa poviše hem poviše manuša khedena pe sine, o Isus počmingja te vakerel: „Akaja generacija tani lošno generacija. Oj rodela znako, ama nane te del pe lake javer znako, osven o znako e Jonaskoro. 30 Isto sar o Jona so sine znako e manušenge tari Ninevija, agjaar o manušikano Čhavo* da ka ovel znako akale generacijake. 31 I carica taro jug ka voskresninel zaedno e manušencar tari akaja generacija ko dive keda o Devel ka sudinel e manušenge hem oj ka osudinel len, soske ali taro dur than te šaj te šunel i mudrost e Solomoneskiri. Ama ake, akate tano nekoj soj pobaro taro Solomon. 32 O manuša tari Ninevija ka voskresninen zaedno akale generacijaja ko dive keda o Devel ka sudinel e manušenge, hem ola ka osudinen akale generacija, soske keda o Jona propovedingja lenge, ola kaingje pe. Ama ake, akate tano nekoj soj pobaro taro Jona. 33 Otkeda nekoj ka tharel i lampa, na čhivela la ko garavdo than ili teli korpa,* nego čhivela la ko astali, te šaj adala so khuvena te dikhen o svetlo. 34 O svetlo e teloskoro tano tli jakh. Znači ako tli jakh tani koncentririmi samo ki jekh buti,* tegani celo tlo telo da ka ovel svetlo, ama ako tani bičali,* tegani celo tlo telo da ka ovel temno. 35 Adaleske, pazin, soske o svetlo soj ki tute šaj tano ustvari temnica. 36 Znači, ako celo tlo telo tano svetlo hem ki leste nane nijekh delo soj temno, tegani celo tlo telo ka svetinel sar jekh lampa so dela tut svetlo“.

37 Keda vakergja akava, jekh farisei* vikingja le peste ko hajbe. Tegani o Isus khuvgja leste ko kher hem bešlja ki sofra. 38 A o farisei čudingja pe keda dikhlja kaj o Isus na thovgja ple vasta sprema o običaj angleder te hal maro. 39 Ama o Gospodari vakergja leske: „Tumen o fariseija thovena i čaša hem i činija avrijaldan, a andre ko vilo sien pherde alčnost hem lošnipe. 40 Na sien razumna! Okova so kergja o telo, na kergja li o vilo da? 41 Adaleske, adava so isi tumen andre ko vilo neka pottikninel tumen te den šukar bukja e čorolenge. Ako kerena agjaar tegani ka oven celosno čista. 42 Ama teško tumenge e fariseenge, soske dena desetok taro nane, taro sedefče* hem tari sekoja bilka tari gradina, a nane tumenge važna i pravda hem o mangipe sprema o Devel! Točno, tumen sien sine dolžna te den desetok taro akala bukja, ama na valjangjen te zanemarinen i pravda hem o mangipe sprema o Devel. 43 Teško tumenge fariseija, soske mangena o prva thana ko sinagoge* hem o manuša te pozdravinen tumen ko ploštadija! 44 Teško tumenge, soske sien sar grobija so na dikhjona hem o manuša bizo te džanen phirena upri lende!“

45 Tegani, jekh manuš kova so šukar pendžarela sine o Zakoni, vakergja leske: „Učitele, adale lafencar vredžinea amen da“. 46 A o Isus vakergja: „Teško tumenge da, kola so pendžarena šukar o Zakoni, soske tumen čhivena upro manuša te phiraven bare pharipa, a korkori tumen nijekhe najea na mrdinena adava pharipa te šaj te pomožinen lenge!

47 Teško tumenge, soske gradinena grobija e prorokonge, a tumare parapapija mudargje len! 48 Čače, tumen šukar džanena so kergje tumare parapapija, hem palem odobrinena adava. Ola mudarena sine e prorokon, a tumen gradinena grobija adale prorokonge. 49 Adaleske o Devel kova soj mudro, vakergja: ’Ka bičhalav ki lende prorokija hem apostolija, a ola ka mudaren hem ka progoninen nesaven lendar, 50 te šaj akaja generacija te ovel krivo bašo rat sa e prorokongoro kova so sine čhordo taro početok e svetoskoro, 51 taro rat e Abeleskoro, dži ko rat e Zaharijaskoro kova so sine mudardo anglo hrami, uzo žrtveniko‘. Oja, vakerava tumenge, akaja generacija ka ovel krivo bašo lengoro rat.

52 Teško tumenge, kola so šukar pendžarena o Zakoni, soske lelen o klučo so phravela o udar te šaj šukar te pendžarel pe e Devle, ama ni tumen khuvena taro adava udar, a ni mukhena o javera te khuven!“

53 Keda iklilo taro kher e fariseeskoro, o učitelija e zakoneskere hem o fariseija navalingje upri leste hem počmingje te pučen le but pučiba bašo javera bukja, 54 hem adžikerena sine te vakerel nešto te šaj te obvininen le.

12 Tegani khedingje pe doborom but milja manuša so čak počmingje te gazinen jekh jekhe. A o Isus prvo ple učenikonge vakergja: „Pazinen tumen taro kvasaco e fariseengoro,* ustvari taro lengoro licemerstvo. 2 Ama sa soj šukar garavdo, ka otkrinel pe, hem sa soj tajno, ka doznajnel pe. 3 Adaleske, adava so tumen vakerena le ki temnica, ka šungjol ki svetlina, hem adava so vakerena le pohari ko kan keda sien korkori ki soba, ka propovedinel pe taro krovija. 4 Vakerava tumenge, amalalen, ma daran taro okola so mudarena o telo, a palo adava našti više ništo te keren. 5 Ama, taro Devel mora te daran, soske ov šaj te mudarel tumen hem te frdel tumen ki geena.* Znači, ov tano adava kastar so mora te daran. 6 Na bikinena pe li pandž tikne čiriklja bašo duj tikne paričke?* Sepak, ni jekha lendar o Devel na bistrela. 7 A tumenge čak sekoja bal taro šero tani gejmi. Ma daran, tumen vredinena poviše taro but čiriklja.

8 Vakerava tumenge, sekoj so ka priznajnel anglo manuša kaj verujnela ki mande, o manušikano Čhavo* da ka priznajnel anglo e Devleskere angelija kaj ov tano leskoro učeniko. 9 Ama sekoj so na priznajnela anglo manuša kaj verujnela ki mande, me da anglo e Devleskere angelija nane te priznajnav kaj tano mlo učeniko. 10 Hem sekoj so ka vakerel jekh lafi protiv o manušikano Čhavo, ka ovel leske prostimo, ama koj ka vakerel navredliva lafija protiv e Devleskiri sila,* nane te ovel leske prostimo. 11 Keda ka ikalen tumen anglo khedime manuša* hem anglo poglavarija hem vlastija, ma sekirinen tumen bašo adava sar ka braninen tumen ili so ka vakeren, 12 soske e Devleskiri sila* ka sikavel tumen ko adava momenti so valjani te vakeren“.

13 Tegani jekh manuš taro narodo vakergja: „Učitele, vaker me phraleske te delinel mancar sa adava so mukhlja amenge amaro dad“. 14 A o Isus vakergja leske: „Koj čhivgja man te sudinav ili te delinav maškar tumende?“ 15 Palo adava vakergja lenge: „Pazinen tumen ko sa ma te oven bičale jakhjakere,* soske čak keda nekas isi le but, leskoro životo na avela taro adava so isi le“. 16 Tegani vakergja lenge jekh sporedba: „I phuv jekhe barvale manušeskiri bijangja but, 17 hem ov počmingja te pučel pe: ’So te kerav? Nane man kote te khedav sa adava so i phuv bijangja‘. 18 Hem vakergja: ’Agjaar ka kerav: ka rušinav akala ambarija* hem ka kerav pobare, hem adathe ka khedav sa o giv hem sa o javera šukar bukja so isi man. 19 Hem ka vakerav mange: „Khedingjan tuke but šukar bukja kolende so ka šaj te uživine but berša. Adaleske odmorin, ha, pi hem uživin“‘. 20 Ama o Devel vakergja leske: ’Tu sian glupavo manuš, akaja rat ka mere. Tegani kaske ka ačhol sa akava so khedingjan?‘ 21 Znači, agjaar ovela e manušea kova so khedela barvalipe peske, a nane barvalo anglo e Devleskere jakhja“.

22 Tegani vakergja ple učenikonge: „Adaleske vakerava tumenge: ma sekirinen tumen* bašo tumaro životo, bašo adava so ka han, ili tumare teloske so ka uraven. 23 Soske, o životo vredinela poviše taro hajbe hem o telo vredinela poviše taro šeja. 24 Dikhen šukar e gavranen. Ola ni sejnena ni žnejnena, ni ko ambarija* khedena, a palem o Devel dela len hajbaske. Kobor poviše vredinena tumen taro akala čirikle! 25 Koj tumendar, adalea so ka sekirinel pe, šaj barem hari* te prodolžinel plo životo? 26 Znači ako našti te keren ni akaja tikni buti, tegani soske sekirinena tumen bašo sa o javera bukja? 27 Dikhen sar bajrona o lulugja ko pole. Ola ni mučinena pe, ni sivena peske šeja, ama vakerava tumenge, ni o Solomon, o najbarvalo manuš, na sine uravdo sar akala lulugja. 28 Ako o Devel agjaar uravela o rastenija ko pole, kola so avdive bajrona, a tajsa frdena pe ki pečka, kobor poviše ka uravel tumen. Kobor tani tikni tumari vera! 29 Adaleske ma sekirinen tumen bašo adava so ka han hem so ka pien, hem čhinaven te oven preterano sekirime! 30 Soske sa akale bukjencar tane preokupirime o manuša taro sveto so na pendžarena e Devle, a tumaro Dad džanela kaj valjanena tumenge akala bukja. 31 Namesto adava, roden leskoro Carstvo, a akala bukja ka oven tumenge dende.

32 Ma daran, tumen so sien tikno stado, soske tumaro Dad mangela te del tumen o Carstvo. 33 Bikinen adava so isi tumen hem o pare den len okolenge so nane len. Keren tumenge torbe bašo pare* kola so na pharavgjovena, barvalipe so na trošingjovela ko nebo, kote so o čor našti te avel paše hem te čorel le hem ni o insektija* našti te han le. 34 Soske, kote tano tumaro barvalipe, adari ka ovel hem tumaro vilo.

35 Uraven tumen o šeja služibaske hem oven spremna, hem tumare lampe neka oven thare. 36 Oven sar o robija kola so adžikerena lengoro gospodari te iranel pe taro bijav, te šaj keda ov ka khuvel ko udar, ola odma te phraven leske. 37 Srekjna tane okola robija kola soj tane spremna hem džangavde keda resela o gospodari! Čače vakerava tumenge, ov tegani ka uravel o šeja služibaske, ka čhivel e robon te bešen ki sofra hem ka del len hajbaske. 38 Hem ako avela ki dujto straža,* ili čak ki trito straža,* srekjna tane ako arakhela len spremna! 39 Ama džanen akava: keda bi džanela o domakjini ko kova saati ka khuvel o čor, ov na bi mukhela sine o čor te khuvel leske ko kher. 40 Agjaar tumen da oven spremna, soske o manušikano Čhavo avela ko saati kova so na očekujnena le“.

41 Tegani o Petar pučlja le: „Gospodare, samo amenge li vakerea akaja sporedba, ili sarinenge?“ 42 A o Gospodari odgovoringja leske: „Koj tano o verno hem o mudro upraviteli* kaste so leskoro gospodari ka čhivel le upro ple sluge, te šaj te del len hrana so valjani lenge ko pravo vreme? 43 Srekjno tano adava robo ako leskoro gospodari, keda avela, arakhela le sar kerela pli buti! 44 Čače vakerava tumenge, ov ka čhivel le te ovel odgovorno upro sa so isi le. 45 Ama, ako adava robo mislinela peske: ’Mo gospodari kasninela‘, hem počminela te marel e slugen hem e sluginken, te hal, te piel hem te makjol, 46 o gospodari adale roboskoro ka avel ko dive keda ov na očekujnela hem ko saati kova so ov na džanela, pa ka del le i najbari kazna hem ka čhivel le e manušencar so nane verna. 47 Tegani adava robo kova so halilo so mangela o gospodari, ama na sine spremno hem na kergja adava so rodingja lestar o gospodari, adale robo o gospodari but ka marel. 48 A okova robo, kova so na halilo so mangela o gospodari, a kergja lošna bukja, ov ka ovel pohari mardo. Kaske soj but dendo, lestar but ka rodel pe da, hem kaske soj dendi odgovornost upro but bukja, lestar but ka rodel pe da.

49 Me aljum te tharav i jag ki phuv, hem so javer te mangav keda više thargjum la? 50 Ama, valjani te krstinav man jekhe javere krstibaja, hem but i mange pharo džikote na završinela adava! 51 Mislinena li kaj aljum te anav mir ki phuv? Na, nego vakerava tumenge, aljum te odvojnav e manušen. 52 Soske, otakana pandž džene so ka oven ko jekh kher, ka oven odvojme: trin džene protiv duj hem duj protiv trin. 53 Ka oven odvojme: o dad protiv o čhavo hem o čhavo protiv o dad, i daj protiv i čhaj hem i čhaj protiv i daj, i sasuj protiv i bori hem i bori protiv i sasuj“.

54 Palo adava vakergja e manušenge: „Keda dikhena kaj taro zapad avena oblakija, odma vakerena: ’Ka ovel bura‘. Hem čače ovela. 55 A keda dikhena kaj taro jug phudela bavlal, vakerena: ’Ka ovel but tato‘. Hem agjaar ovela. 56 Licemerna, keda dikhena i phuv hem o nebo džanena dali ka ovel kham ili bršim. Tegani soske na haljovena so ovela ko akava vreme? 57 Hem soske tumen korkori na haljovena so valjani te keren? 58 Na primer, džikote džaja ko poglavari okolea so tužinela tut, trudin tut te rešine lea o problemi džikote panda sian ko drumo, te šaj te na predajnel tut ko sudija, a o sudija te predajnel tut ko stražari hem o stražari te frdel tut ko zatvor. 59 Vakerava tuke, nane te ikljove adathar sa džikote na platinea sa“.*

13 Tegani nesave manuša kola so sine adathe vakergje e Isuseske bašo Galilejcija, kolen so o Pilat mudargja džikote dena sine žrtve. 2 A o Isus vakergja lenge: „Mislinena kaj adala Galilejcija mule adaleske so sine pobare grešnikija taro sa o javera Galilejcija? 3 Sigurno kaj na. Ama vakerava tumenge, ako na kainena tumen, sarine tumen ka meren isto sar lende. 4 Ili okola 18 džene upri kolende so peli i kula ko Siloam hem mudargja len, mislinena li kaj ola sine pobare grešnikija taro sa o javera manuša so živinena ko Erusalim? 5 Sigurno kaj na. Ama vakerava tumenge, ako na kainena tumen, sarine tumen ka meren isto sar lende“.

6 Tegani vakergja lenge akaja sporedba: „Jekh manuš ki pli niva drakhencar sine le sadimo kaš taro smokve, hem alo te dikhel dali isi smokve ko kaš, ama na arakhlja ništo. 7 Hem vakergja e manušeske so kerela buti ki leskiri niva drakhencar: ’Više trin berša sar avava te dikhav dali isi smokve ko akava kaš, ama na arakhljum ništo. Čhin le! Samo džabe astarela than ki niva‘. 8 Tegani ov vakergja leske: ’Gospodare, mukh le panda akava berš, te šaj te randav okolu leste hem te čhivav gjubrivo. 9 Šaj ponadari ka del plodi. A ako na, tegani čhin le‘“.

10 Ko sabat* o Isus sikavela sine e manušen ki jekh sinagoga.* 11 Adathe sine jekh džuvli koja so 18 berš sine nasvali adaleske so sine la demoni. Oj sine grbavimi hem našti sine nisar te isprajnel pe. 12 Keda dikhlja la, o Isus vikingja la hem vakergja lake: „Oslobodimi sian taro tlo nasvalipe“. 13 Tegani čhivgja ple vasta upri late, a oj odma isprajngja pe hem počmingja te falinel e Devle. 14 Tegani o glavno manuš tari sinagoga holjangja adaleske so o Isus ko sabat sasljargja akale džuvlja hem vakergja e narodoske: „Isi šov dive kolende so kerela pe buti! Adaleske aven hem sasljoven ko adala dive, a na ko sabat!“ 15 Ama o Gospodari vakergja leske: „Licemerna, na phravela li sekova jekh tumendar ple guruve ili ple here ko sabat te ingarel le te piel pani? 16 Zarem na valjani sine akaja čhaj e Avraameskiri, kola so o Satana ikergja la phanli 18 berš, te ovel oslobodimi taro akala sindžirija ko sabat?“ 17 Keda vakergja adava, sa adala so sine protiv leste ladžandile, a celo narodo radujngja pe bašo sa o šuže bukja so kergja len.

18 Palo adava vakergja: „Solea šaj te sporedinav e Devleskoro Carstvo? Save sporedbaja šaj te objasninav le? 19 Ov tano sar jekh zrno taro sinap,* kova so jekh manuš lelja hem sadingja le ki pli gradina. Ov barilo hem ulo kaš, a sa o ptice so letinena ko nebo kergje peske gnezdo ko leskere granke“.

20 Hem palem vakergja: „Solea te sporedinav e Devleskoro Carstvo? 21 Ov tano sar kvasaco kole so jekh džuvli lelja hem mešingja le ko 10 kile varo, hem agjaar celo humer ušlilo“.

22 Džikote džala sine ko Erusalim, nakhela sine taro dizja hem taro gava hem sikavela sine e manušen. 23 Tegani jekh manuš pučlja le: „Gospodare, čače li kaj samo hari džene ka oven spasime?“ Ov vakergja lenge: 24 „Den tumendar sa te šaj te khuven taro tesno udar, soske vakerava tumenge, but džene ka roden te khuven, ama ka našti. 25 Soske, keda o domakjini ka uštel hem ka phandel o udar, tumen ka ačhoven avrijal, ka khuven ko udar hem ka vakeren: ’Gospodare, phrav amenge!‘ A ov ka vakerel tumenge: ’Na pendžarava tumen!‘ 26 Tegani tumen ka vakeren: ’Halem hem pilem tuja, a tu sikavea sine e manušen ko amare glavna ulice‘. 27 A ov ka vakerel tumenge: ’Na pendžarava tumen. Našen mandar, tumen sarine so kerena lošna bukja!‘ 28 Keda ka dikhen e Avraame, e Isako, e Jakove hem sa e prorokon ko e Devleskoro Carstvo, tumen ka oven avrijal, adathe ka roven hem ka krcinen tumare dandencar. 29 Hem ka aven manuša taro istok hem taro zapad, taro sever hem taro jug, hem ka bešen ko astali ko e Devleskoro Carstvo. 30 Soske, nesave soj posledna, ka oven prva, hem nesave soj prva, ka oven posledna“.

31 Ko adava momenti ale nesave fariseija* hem vakergje leske: „Ikljov hem dža tuke akatar, soske o Irod* mangela te mudarel tut!“ 32 A ov vakergja lenge: „Džan hem vakeren adale lisicake: ’Avdive hem tajsa paldava e demonen hem sasljarava e manušen, a ko trito dive ka završinav mle bukjaja‘. 33 Ama avdive, tajsa hem o dive palo adava mora te prodolžinav ko mlo drumo, soske o proroko na valjani te ovel mudardo avrijal taro Erusalim. 34 Erusalim, Erusalim, tu kova so mudarea e prorokon hem mudarea barencar okolen soj bičhalde ki tute! Kobor puti mangljum te khedav tle čhaven, sar i khani so khedela ple piličken telo paka, ama tumen na manglen! 35 Ake, o Devel ka mukhel tumaro kher.* Vakerava tumenge, tumen nane te dikhen man sa džikote na vakerena: ’Blagoslovimo tano okova so avela e Jehovaske* ko anav!‘“

14 Ki jekh prilika o Isus ko sabat* gelo ko jekh poglavari e fariseengoro* te hal maro hem sarine so sine adathe vnimatelno dikhena le sine. 2 Adathe sine jekh manuš kova so sine nasvalo hem leskoro telo šuvljola sine adaleske so phergjola sine pani. 3 Tegani o Isus pučlja okolen kola so šukar pendžarena sine o Zakoni hem e fariseen: „Smejnela pe li te sasljarel pe nekas ko sabat, ili na?“ 4 A ola čutinena sine. Tegani o Isus pipingja e manuše, sasljargja le hem mukhlja le te džal. 5 Palo adava vakergja lenge: „Ako ko sabat tumaro čhavo ili guruv perela ko bunari, nane li te džan hem odma te ikalen le?“ 6 Ola našti sine te odgovorinen leske ko akava.

7 Keda primetingja kaj o gostija birinena peske o najšukar thana, vakergja:* 8 „Keda nekoj vikinela tut ko bijav, ma astar o najšukar than. Soske, nekoj soj tano tutar považno šaj isto agjaar tano kanimo, 9 pa okova so kaningja tut hem le, ka avel hem ka vakerel tuke: ’Mukh akale manuše te bešel ko tlo than!‘ Tegani tu ka ove ladžake hem ka mora te dža hem te beše ko najpaluno than. 10 Namesto adava, keda nekoj ka kaninel tut, dža hem beš ko najpaluno than, tegani okova so kaningja tut, ka avel hem ka vakerel tuke: ’Amala, ava hem beš poanglal!‘ Agjaar anglo sa o gostija ka sikavel tuke poštovanje. 11 Soske, sekoj so vazdela pe, ka ovel ponižimo, a koj tano ponizno, ka ovel vazdimo“.

12 Palo adava, e manušeske so kaningja le vakergja: „Keda spreminea ručko ili večera, ma vikin te amalen, ni te phralen, ni te familija, ni te barvale komšien. Soske šaj ola da ka vikinen tut hem agjaar ka iranen tuke o šukaripe so kergjan lenge. 13 Namesto adava, keda spreminea baro hajbe hem pijbe, kanin e čorolen, e sakaten hem e korolen. 14 Hem ka ove srekjno, soske olen nane len solea te iranen tuke. A tu ka dobine nešto šukar bašo adava šukaripe so kergjan keda o Devel ka voskresninel e pravedna manušen“.

15 Keda šungja adava, jekh taro gostija vakergja leske: „Srekjno tano okova so ka hal maro ko e Devleskoro Carstvo!“

16 A o Isus vakergja leske: „Jekh manuš spremingja bari večera hem vikingja bute manušen. 17 Keda alo vreme baši večera, bičhalgja ple robo te vakerel okolenge so sine kanime: ’Aven, soske sa tano više spremimo!‘ 18 Ama sarine ola počmingje te arakhen peske izgovorija. O prvo vakergja leske: ’Kingjum niva hem mora te džav te dikhav la. Me but izvininava man, ama ka našti te avav!‘ 19 O dujto vakergja: ’Kingjum pandž čiftija guruva hem džava te dikhav dali ka orinen šukar. Me but izvininava man, ama ka našti te avav!‘ 20 A o javer vakergja: ’Samo so ženingjum man hem adaleske našti te avav‘. 21 O robo irangja pe hem vakergja adava ple gospodareske. Tegani o domakjini but holjangja hem vakergja e roboske: ’Dža odma ko glavna ulice hem ko tikne ulice tari diz, hem ana e čorolen, e sakaten hem e korolen!‘ 22 Keda o robo irangja pe, vakergja: ’Gospodare, kergjum agjaar sar so zapovedingjan tu, ama isi panda than‘. 23 A o gospodari vakergja e roboske: ’Dža akana ko javera ulice soj avrijal tari diz hem ubedin e manušen te aven te šaj te phergjol mlo kher! 24 Soske, vakerava tumenge, nijekh taro okola kola so sine prvo kanime nane ni te probinen taro mlo hajbe‘“.

25 A lea patujnela sine baro narodo, ov irangja pe hem vakergja lenge: 26 „Ako nekoj avela ki mande, a poviše mangela* ple dade hem ple daja, ple romnja hem ple čhaven, ple phralen hem ple phenjen, pa čak plo životo da poviše mandar, našti te ovel mlo učeniko. 27 Koj na phiravela plo stubo mučibaske* hem na avela pali mande, ov našti te ovel mlo učeniko. 28 Koj tumendar, keda mangela te kerel kher,* nane prvo te bešel hem te računinel o trošako te šaj te dikhel dali isi le sa soj leske potrebno te šaj te završinel le? 29 Soske, šaj te čhivel o temeli, ama te našti te završinel o kher, pa sarine so ka dikhen adava ka počminen te asan leske 30 hem ka vakeren: ’Akava manuš počmingja te gradinel, ama našti sine te završinel‘. 31 Ili kova cari ka džal ki vojna protiv javer cari, ako angleder na bešela hem na rodela sovet te šaj te dikhel dali ka šaj 10.000 vojnikoncar te sprotivstavinel pe okole careske kova so avela protiv leste 20.000 vojnikoncar? 32 Keda haljola kaj našti, tegani, džikote okova cari tano dur, ov bičhalela ple pretstavnikon hem molinela bašo mir. 33 Agjaar, bilo koj tumendar so nane te otkažinel pe taro sa so isi le, našti te ovel mlo učeniko.

34 O lon tano šukar, ama ako o lon nane više londalo, solea palem ka kerel pe londalo? 35 Tegani ov nane više korisno ni baši phuv ni bašo gjubrivo, nego samo ka frdel pe avrijal. Kas isi kana, neka šunel!“

15 Sa o danočnikija hem o grešnikija khedingje pe okolu o Isus te šaj te šunen le. 2 Adaleske o fariseija* hem o učitelija e zakoneskere počmingje te keren lafi protiv leste hem te vakeren: „Akava manuš nakhela šukar e grešnikoncar hem hala lencar“. 3 Tegani vakergja lenge akaja sporedba: 4 „Ako jekh tumendar isi le 100 bakhre hem našavela jekhe lendar, nane li te mukhel e 99 bakhren ki pustina hem te džal te rodel okole so našavdilo džikote na arakhela le? 5 Hem keda ka arakhel e bakhre, ka čhivel le ko pikje hem ka radujnel pe. 6 A keda ka iranel pe khere, ka vikinel ple amalen hem ple komšien hem ka vakerel lenge: ’Radujnen tumen mancar, soske arakhljum me bakhre so našavdilo!‘ 7 Vakerava tumenge kaj agjaar ko nebo ka ovel pobari radost bašo jekh grešniko so ka kainel pe, nego bašo 99 pravedna kola so na valjani te kainen pe.

8 Ili ako jekhe džuvlja isi la 10 drahme,* a našavela jekh drahma, nane li te tharel lampa, te šulavel o kher hem šukar te rodel džikote na arakhela la? 9 Hem keda ka arakhel la, ka vikinel ple amalinken, ple komšiken hem ka vakerel lenge: ’Radujnen tumen mancar, soske arakhljum i drahma so našavgjum la!‘ 10 Vakerava tumenge, agjaar radujnena pe e Devleskere angelija bašo jekh grešniko so kainela pe“.

11 Palo adava vakergja: „Jekhe manuše sine le duj čhave. 12 O potikno vakergja ple dadeske: ’Mo dad, de man o delo taro nasledstvo so pripadinela mange!‘ Tegani o dad delingja plo nasledstvo e solduje čhavenge. 13 Palo nesave dive, o potikno čhavo khedingja sa ple bukja, patujngja ki jekh dur phuv hem adari trošingja sa plo nasledstvo agjaar so živingja raspušteno životo. 14 Keda trošingja sa, ki celo adaja phuv ulo baro bokhalipe hem ov ačhilo bizo ništo. 15 Čak gelo te kerel buti jekhe manušeske tari adaja phuv, a ov bičhalgja le ko ple nive te arakhel e balen. 16 Doborom sine bokhalo so mangela sine te hal o hajbe so hana sine o bale, ama nikoj na mangela sine te del le ni adava.

17 Keda halilo kobor sine glupavo, vakergja: ’Kobor rabotnikija so kerena buti me dadeske isi len but hajbaske, a me akate merava bokhatar! 18 Ka uštav, ka džav ko mo dad hem ka vakerav leske: „Mo dad, grešingjum e Devleske* hem tuke. 19 Više na zaslužinava te ovav tlo čhavo. Primin man sar jekh taro tle rabotnikija“‘. 20 Tegani uštilo hem gelo ko plo dad. Džikote panda sine dur, leskoro dad dikhlja le, žalingja le, prastandilo ki leste, gušingja le hem čumingja le. 21 A o čhavo vakergja leske: ’Mo dad, grešingjum e Devleske* hem tuke. Na zaslužinava više te ovav tlo čhavo. Primin man sar jekh taro tle rabotnikija‘. 22 A o dad vakergja ple robonge: ’Sigjaren, anen leske o najšuže šeja hem uraven le! Čhiven leske angrustik ko vas hem uraven le sandale ko pre! 23 Hem anen o najthulo telco, čhinen le, pa te ha hem te slavina, 24 soske mo čhavo sine mulo ama akana palem tano dživdo, našavdilo ama irangja pe‘! Hem počmingje te slavinen.

25 A leskoro pobaro čhavo sine ki niva, hem ko iranibe keda alo paše uzo kher, šungja muzika hem sar khelena. 26 Tegani vikingja jekhe taro sluge hem pučlja le so slučinela pe. 27 Ov vakergja leske: ’Alo to phral, hem to dad čhingja o najthulo telco, soske irangja pe ki leste sasto‘. 28 A ov holjangja hem na mangela sine te khuvel. Tegani leskoro dad iklilo hem počmingja te molinel le te khuvel andre. 29 A ov vakergja ple dadeske: ’Ake, kobor berš kerava tuke buti sar robo hem sekogaš sium sine tuke poslušno, a tu ni jekh puti na dengjan man ni jekh tikni buzni te veselinav man mle amalencar. 30 A samo so alo akava tlo čhavo, kova so prostitutkencar* halja tle pare, tu čhingjan leske o najthulo telco‘. 31 Tegani o dad vakergja leske: ’Mo čhavo, tu sekogaš sian sine mancar hem sa soj mlo, tano isto agjaar tlo da. 32 Ama mora sine te slavina hem te radujna amen, soske akava tlo phral sine mulo hem akana palem tano dživdo, našavdilo hem akana irangja pe‘“.

16 Tegani o Isus vakergja ple učenikonge: „Sine jekh barvalo manuš, kaske so sine vakerdo kaj leskoro upraviteli* rasturinela leskoro imot. 2 Adaleske vikingja le hem vakergja leske: ’Soj akava so šunava baši tute? Pišin mange izveštaj bašo adava sar koristingjan mle pare, soske nane više te mukhav tut te vodine mlo kher‘. 3 Tegani o upraviteli mislingja peske: ’So ka kerav? Mlo gospodari nane više te mukhel man te ovav upraviteli. Na sium dovolno zoralo te šaj te džav te randav, a ladžava te džav te mangav mange. 4 Aha! Džanava so ka kerav te šaj o manuša te priminen man ko pumare khera keda nane više te ovav upraviteli‘. 5 Hem vikingja sa redoja okolen kola so dužinena leskere gospodareske, hem pučlja e prvo: ’Kobor dužinea me gospodareske?‘ 6 Ov odgovoringja leske: ’2.200 litrija* maslo taro maslinke‘. A ov vakergja leske: ’Le tli smetka hem sigate pišin 1.100!‘ 7 Palo adava pučlja e dujtone: ’Tu kobor dužinea?‘ Ov odgovoringja leske: ’17.000 kilogramija* giv‘. A ov vakergja leske: ’Le tli smetka hem pišin 14.000!‘ 8 A o gospodari pofalingja e upravitele baši leskiri snaodlivost, iako na postapingja pravedno. Vakerava tumenge akava adaleske so o manuša taro akava sveto* tane posnaodliva taro manuša kola so obožavinena e Devle.*

9 Hem vakerava tumenge: „Keren tumenge amala e barvalipaja taro akava nepravedno sveto,* te šaj keda adava barvalipe više nane te ovel, ola te priminen tumen ko večna thana živibaske. 10 Koj tano verno ki najtikni buti, verno tano hem ki najbari da, a koj tano nepravedno ki najtikni buti, nepravedno tano hem ki najbari da. 11 Adaleske, ako na sian verno e barvalipaja taro akava nepravedno sveto,* tegani nikoj nane te del tut o čačutno barvalipe. 12 Hem ako na sian verno adalea soj tugjo, tegani nikoj nane te del tut adava soj tlo. 13 Nijekh robo našti te služinel duje gospodarenge. Soske, ili ka mrzinel e jekhe, a ka mangel e javere, ili ka ovel paše jekhea, a e javere ka mrzinel. Našti te oven robija hem e Devleske hem e barvalipaske“.

14 Tegani o fariseija* kola so mangena sine but o pare, keda šungje akava počmingje te asan leske. 15 A ov vakergja lenge: „Tumen sien adala so kerena tumen pravedna anglo manuša, ama o Devel džanela so isi ko tumare vile. Soske, adava so o manuša dikhena le sar but vredno, anglo e Devleskere jakhja tano odvratno.

16 O Zakoni hem o Prorokija prorokujngje dži ko Jovan. Ottegani o šukar haberi bašo e Devleskoro Carstvo vakerela pe sarinenge hem različna manuša dena pestar sa te khuven ki leste. 17 Čače, o nebo hem i phuv šaj te našavgjoven, ama taro Zakoni čak nijekh crta tari bukva nane te našavgjovel bizo te ispolninel pe.

18 Sekoj so ka razvedinel pe tari pli romni hem ženinela pe javeraja, kerela preljuba. Hem koj ka lel pe razvedime romnjaja, kerela preljuba.

19 Sine jekh barvalo manuš, kova so uravela sine liljakova hem lenena šeja, hem sekova dive uživinela sine ko plo barvalipe. 20 A anglo leskoro udar stalno anena sine jekhe manuše so mangela peske sine. Leskoro anav sine Lazar hem celo leskoro telo sine pherdo ko čirija 21 hem mangela sine te hal nešto taro adava so ka perel tari e barvaleskiri sofra. Čak o džukela avena sine hem ližinena sine leskere čirija. 22 Palo nesavo vreme, o manuš so mangela peske sine mulo, hem o angelija ingargje le paše uzo Avraam.*

Isto agjaar, o barvalo da manuš mulo hem sine parumo. 23 Džikote mučinela pe sine ko grobo,* vazdingja ple jakhja hem duraldan dikhlja e Avraame hem uzi leste e Lazare.* 24 Tegani vikingja: ’Avraam mo dad, žalin man hem bičhal e Lazare te čhivel o vrvo taro plo naj ko pani hem te kapinkerel ki mli čhib te šaj te osvežinel la, soske but mučinava man ki akaja bari jag‘. 25 A o Avraam vakergja leske: ’Mo čhavo, ma bistre kaj tu uživingjan ko but šukar bukja džikote sian sine dživdo, a o Lazar cidela sine but muke. Adaleske ov akana dobinela uteha akate, a tu mučinea tut. 26 Osven adava, maškar amende isi bari provalija, adaleske adala so mangena akatar te aven ki tumende, našti, a nikoj tumendar da ka našti te avel ki amende‘. 27 Ov vakergja leske: ’Tegani mo dad, molinava tut, bičhal le me dadeske ko kher, 28 soske isi man pandž phralja, pa neka predupredinel len te šaj ola da te na aven ko akava than hem te mučinen pe‘. 29 Ama o Avraam vakergja leske: ’Isi len o lila e Mojseeskere hem e Prorokongere, neka šunen len!‘ 30 A ov vakergja leske: ’Na, mo dad Avraam, nego ako avela ki lende nekoj so uštilo taro mule, tegani ola ka kainen pe‘. 31 A ov odgovoringja leske: ’Ako na šunena e Mojsee hem e Prorokon, ola nane te verujnen ni ako nekoj uštela taro mule‘“.

17 Tegani vakergja ple učenikonge: „Sekogaš ka ovel nešto so ka kerel o manuš te grešinel. Ama teško okole manušeske kova so ka kerel o javer te grešinel! 2 Adale manušeske ka ovel pošukar te phanden le ki men jekh baro bar so vrtinela le o her* hem te frden le ko more, nego te kerel jekh taro akala tikne te perel tari vera. 3 Pazinen tumen! Ako tlo phral grešinela, predupredin le. Ako kainela pe, prostin leske. 4 Čak ako grešinela tuke efta puti ko dive hem efta puti avela ki tute hem vakerela: ’Kainava man‘, mora te prostine leske“.

5 A o apostolija vakergje e Gospodareske: „Pomožin amen te ovel amen pozorali vera!“ 6 Tegani o Gospodari vakergja: „Te ovel sine bari tumari vera samo kobor jekh zrno taro sinap,* ka vakeren sine akale kašteske:* ’Otkornin tut hem sadin tut ko more!‘, hem ov ka šunel tumen sine.

7 Koj tumendar ple roboske, kova so orinela i niva ili arakhela e bakhren, keda ov ka iranel pe taro pole, ka vakerel leske: ’Ava odma hem beš ki sofra‘? 8 Nane li namesto adava te vakerel leske: ’Spremin mange večera, čhiv tuke kecela hem služin mange džikote hava hem pijava, a palo adava tu ka šaj te ha hem te pie‘? 9 Valjani li o gospodari te ovel blagodarno e roboske adaleske so o robo kergja o bukja so valjani te kerel? 10 Agjaar tumen da, keda ka keren sa o bukja so valjani te keren, vakeren: ’Amen siem robija so na zaslužinaja te falinen amen. Kergjem adava so valjani sine te kera‘“.

11 Džikote džala sine ko Erusalim, nakhela sine maškar i Samarija hem i Galileja. 12 Keda khuvgja ko jekh gav, 10 manuša so sine len lepra dikhe le, ama ačhile podur lestar. 13 Hem glasno vikingje: „Isus, Učitele, žalin amen!“ 14 Keda dikhlja len, ov vakergja lenge: „Džan neka dikhen tumen o sveštenikija“. Džikote džana sine, sastile. 15 A jekh lendar keda dikhlja kaj sastilo, irangja pe hem celo glasoja slavinela sine e Devle. 16 Hem pelo tele ple mujea dži ki phuv anglo Isus hem zablagodaringja pe leske. A ov sine Samarjani. 17 A o Isus vakergja: „Zarem na sastile deš džene? Kaj tane tegani o javera enja? 18 Zarem na irangja pe nijekh lendar te slavinel e Devle, osven akava manuš soj tano taro javer narodo?“ 19 Hem vakergja leske: „Ušti hem dža! Tli vera sasljargja tut“.

20 Keda o fariseija* pučle le keda ka avel e Devleskoro Carstvo, ov odgovoringja lenge: „E Devleskoro Carstvo na avela ko način kova so sarine jasno ka dikhen le. 21 O manuša nane te vakeren: ’Ake, akate tano!‘ ili: ’Okote tano!‘ Soske, o Carstvo e Devleskoro tano maškar tumende“.

22 Tegani vakergja ple učenikonge: „Ka avel vreme keda ka mangen te dikhen jekh taro dive keda o manušikano Čhavo* ka ovel tumencar, ama nane te dikhen le. 23 Hem o manuša ka vakeren tumenge: ’Ake, okote tano!‘ ili: ’Ake, akate tano!‘ Ama tumen ma ikljoven hem ma prastan pali lende. 24 Soske sar i svetlina taro gromi so svetinela tari jekh strana taro nebo dži ki javer strana taro nebo, agjaar ka ovel e manušikane Čhavea da ko leskoro dive. 25 Ama, ov prvo mora but te ovel mučimo hem te ovel otfrlimo tari akaja generacija. 26 Hem sar so sine ko dive e Noeskere, agjaar ka oven o dive e manušikane Čhaveskere: 27 o manuša hana sine hem piena sine, o murša hem o džuvlja ženinena pe sine, sa dži ko dive keda o Noe khuvgja ki arka. Hem alo o potop hem sarinen uništingja. 28 Isto sine ko dive e Loteskere: o manuša hana sine, piena, kinena, bikinena, sadinena hem gradinena sine. 29 A ko adava dive keda o Lot iklilo taro Sodom, taro nebo peli jag hem sulfur, hem uništingja sarinen. 30 Agjaar ka ovel ko dive keda o manušikano Čhavo ka pojavinel pe.

31 Ko adava dive, koj ka ovel ko krovi, ma te hulel ko kher hem te lel ple bukja! Hem okova so ka ovel ki niva, ma te iranel pe palal! 32 Setinen tumen ki e Loteskiri romni. 33 Koj mangela te spasinel plo životo, ka našavel le, a koj ka našavel plo životo, ka spasinel le. 34 Vakerava tumenge, ki adaja rat duj džene ka oven ko kreveti: jekh ka ovel lendo, a jekh ka ovel mukhlo. 35 Duj džuvlja ka melinen giv ko isto than: jekh ka ovel lendi, a jekh na“. 36* -- 37 Tegani ola pučle le: „Kote ka ovel adava Gospodare?“ A ov vakergja lenge: „Kote so isi mrša,* adathe ka kheden pe o orlija“.

18 Tegani vakergja lenge jekh sporedba bašo adava kobor tano važno sekogaš te molinen pe hem te na otkažinen pe: 2 „Ki jekh diz sine jekh sudija kova so na darala sine taro Devel hem na poštujnela sine e manušen. 3 A ki adaja diz isto agjaar sine jekh udovica, koja so stalno džala sine ki leste hem molinela le sine: ’Sudin pravedno maškar mande hem okoleste kasaja so tužinava man‘. 4 Nesavo vreme ov na mangela sine te pomožinel lake, ama ko krajo vakergja peske: ’Na darava taro Devel hem na poštujnava nijekhe manuše, 5 ama akaja udovica adaleske so dosadinela man, ka pomožinav lake te dobinel i pravda, te šaj te na avel više hem te na mučinel man ple molbencar‘“. 6 Tegani o Gospodari vakergja: „Dali šungjen so vakergja o sudija, iako tano nepravedno? 7 Nane li o Devel te kerel te dobinen pravda okola soj birime lestar, kola so rodena le dive hem rat? A osven adava ov tano strplivo lencar. 8 Vakerava tumenge, ov ka kerel ola sigate te dobinen i pravda. Ama o manušikano Čhavo* keda ka avel, ka arakhel li asavki vera ki phuv?“

9 A okolenge kola so ki peste dikhena sine sar but pravedna, a ko javera dikhena sine sar potele pestar, vakergja akaja sporedba: 10 „Duj manuša gele ko hrami te molinen pe. Jekh lendar sine farisei,* a o javer sine danočniko. 11 O farisei terdilo hem agjaar molingja pe ki peste: ’Devla, blagodarinava man tuke so na sium sar o javera manuša: čora, nepravedna, nemoralna ili sar akava danočniko. 12 Postinava duj puti ko kurko, hem taro sa so zarabotinava dava desetok‘. 13 A o danočniko tergjola sine ki strana hem na mangela sine ni te vazdel ple jakhja te dikhel ko nebo, nego khuvela pe sine ko kolin hem vakerela sine: ’Devla, ov milostivo mancar, soske sium grešniko!‘ 14 Vakerava tumenge, o danočniko gelo peske khere popravedno taro farisei. Soske, sekoj so vazdela pe, ka ovel ponižimo, a koj tano ponizno, ka ovel vazdimo“.

15 A o manuša anena sine ki leste pumare tikne čhaven te šaj te blagoslovinel len. Keda o učenikija dikhle adava, holjangje hem vakergje lenge te ciden pe. 16 Ama o Isus vikingja e tikne čhaven ki peste hem vakergja: „Mukhen e tikne čhaven te aven ki mande hem ma čhinaven len! Soske, asavkenge tano dendo e Devleskoro Carstvo. 17 Čače vakerava tumenge, koj nane te prifatinel o Carstvo e Devleskoro sar jekh tikno čhavo, nane te khuvel ki leste“.

18 A jekh poglavari pučlja le: „Učitele, tu kova sian šukar, so mora te kerav te šaj te dobinav večno životo?“ 19 O Isus vakergja leske: „Soske vakerea mange kaj sium šukar? Nikoj nane šukar, osven jekh Devel. 20 Tu džanea o zapovedija: ’Ma ker preljuba, ma mudar, ma čor, ma de hovavni izjava sar svedoko, poštujn tle dade hem tle daja‘“. 21 A ov vakergja leske: „Me sa akava kerava taro mlo ternipe“. 22 Keda šungja adava, o Isus vakergja leske: „Panda jekh buti falinela tuke: bikin sa so isi tut hem o pare ingar len e čorolenge, pa ka ovel tut barvalipe ko nebo. Tegani ava hem ov mlo sledbeniko!“ 23 A ov keda šungja akava, but razočaringja pe, soske sine but barvalo.

24 Tegani o Isus dikhlja le hem vakergja: „Kobor ka ovel pharo e barvalenge te khuven ko e Devleskoro Carstvo! 25 Polokho ka ovel te nakhavel pe kamila tari suv, nego o barvalo manuš te khuvel ko e Devleskoro Carstvo“. 26 Okola so šungje adava, pučle: „Tegani koj šaj te spasinel pe?“ 27 A ov vakergja: „Adava so našti te keren o manuša, o Devel šaj te kerel“. 28 Tegani o Petar vakergja: „Ake, amen mukhlem sa amare bukja hem džaja pali tute“. 29 A o Isus vakergja lenge: „Čače vakerava tumenge, nijekh na mukhlja kher, ili romnja, ili phralen, ili roditelen, ili čhaven baši e Devleskoro Carstvo, 30 a te na dobinel but poviše ko akava vreme, a ko vreme so avela* hem večno životo“.

31 Tegani cidingja ki strana e 12 apostolen hem vakergja lenge: „Ake, džaja ko Erusalim hem sa so pišingje o prorokija bašo manušikano Čhavo* ka ispolninel pe. 32 Ka predajnen le e manušenge taro javera nacie, ka asan leske, ka vredžinen le hem ka čhungaren le. 33 Otkeda ka maren le kamšikoja, ka mudaren le, a ko trito dive ka voskresninel“. 34 A o apostolija na džanena sine so značinena adala lafija, hem na halile bašo so kerela lafi.

35 Džikote o Isus avela sine paše ko Erihon, jekh korolo manuš bešela sine uzo drumo hem mangela peske sine. 36 Keda šungja kaj but manuša nakhena, počmingja te pučel e javeren so ulo. 37 Ola vakergje leske: „Nakhela o Isus o Nazarekjanco!“ 38 Tegani glasno vikingja: „Isus, tu o Čhavo e Davideskoro, žalin man!“ 39 Okola so sine anglal vakergje leske te čutinel, ama ov vikinela sine panda poglasno: „Tu o Čhavo e Davideskoro, žalin man!“ 40 Tegani o Isus ačhilo hem zapovedingja te anen leske adale manuše. Keda o manuš alo paše, o Isus pučlja le: 41 „So mangea te kerav tuke?“ Ov vakergja: „Gospodare, ker palem te dikhav!“ 42 A o Isus vakergja leske: „Palem dikh! Tli vera sasljargja tut“. 43 O manuš odma počmingja te dikhel hem počmingja te džal pali leste hem te falinel e Devle. Hem celo narodo so dikhlja adava, počmingja te falinel e Devle.

19 Palo adava, o Isus khuvgja ko Erihon hem nakhela sine tari adaja diz. 2 A adathe sine jekh manuš so vikinela pe sine Zakhej. Ov sine jekh taro glavna danočnikija hem sine barvalo. 3 Mangela sine te dikhel koj tano o Isus, ama našti sine taro narodo soske sine harno. 4 Adaleske prastandilo anglal dži ko than kotar so valjani sine te nakhel o Isus hem uklilo ko jekh kaš tari divo smokva te šaj te dikhel le. 5 Keda o Isus reslja ko adava than, dikhlja upre hem vakergja leske: „Zakhej, sigate huli tele, soske avdive ka ovav gosto ko tlo kher“. 6 Tegani ov sigate hulilo hem radosno primingja e Isuse sar gosto ko plo kher. 7 Sarine so dikhle adava, počmingje te keren lafi protiv o Isus hem te vakeren: „Ov gelo gosto ko kher akale grešnikoske“. 8 A o Zakhej uštilo hem vakergja e Gospodareske: „Ake, Gospodare, ekvaš taro bukja so isi man ka dav len e čorolenge, hem sa so leljum silaja nekastar, ka iranav leske štar puti poviše“. 9 Keda šungja akava o Isus vakergja leske: „Akava dive o Devel spasingja akale manuše hem leskere kherutnen, soske ov da tano e Avraameskoro čhavo. 10 Soske, o manušikano Čhavo* alo te rodel hem te spasinel okolen so našavdile“.

11 Džikote leskere učenikija šunena le sine, vakergja lenge panda jekh sporedba, soske sine paše uzo Erusalim, a ola mislinena sine kaj keda ka resen ko Erusalim e Devleskoro Carstvo odma ka pojavinel pe. 12 Adaleske vakergja: „Jekh manuš so sine čhavo e careske, gelo ki dur phuv te šaj te dobinel i vlast te ovel cari, a palo adava te iranel pe. 13 Angleder te džal, vikingja 10 taro ple robija, dengja len 10 mine* hem vakergja lenge: ’Keren buti lencar džikote na avava!‘ 14 A o manuša tari leskiri diz mrzinena le sine hem bičhalgje manušen te vakeren leske: ’Na mangaja tu te ove amaro cari‘.

15 Keda ulo cari hem irangja pe, ov vikingja ple robon kaske so dengja o pare,* te šaj te dikhel kobor zarabotingje. 16 Tegani o prvo alo hem vakergja: ’Gospodare, tle jekhe minaja zarabotingjum panda 10‘. 17 A ov vakergja leske: ’Šukar kergjan, mlo šukar robo! Adaleske so sian sine verno ki najtikni buti, ka čhivav tut te vladine upro 10 dizja!‘ 18 Palo adava alo o dujto hem vakergja: ’Tle jekhe minaja, Gospodare, zarabotingjum panda pandž‘. 19 Akaleske da vakergja: ’Ka čhivav tut te vladine upro pandž dizja!‘ 20 A o trito alo hem vakergja: ’Gospodare, ake tani tli jekh mina! Garavgjum la ko mendili. 21 Darandiljum tutar, soske sian strogo manuš, lea pare kolenge so na vložingjan hem khedea adava so na sejngjan‘. 22 A ov odgovoringja leske: ’Korkori tle lafija osudinena tut, lošno robo. Džanljan kaj sium strogo manuš hem kaj lava pare kolenge so na vložingjum hem khedava adava so na sadingjum. 23 Tegani soske na čhivgjan mle pare* ki banka, keda ka avav sine ka šaj sine te lav len kamataja‘.

24 Hem vakergja okolenge so tergjona sine adathe: ’Len lestar i mina hem den la okoleske so isi le 10 mine!‘ 25 A ola vakergje leske: ’Gospodare, ole više isi le 10 mine!‘ 26 Ov vakergja lenge: ’Vakerava tumenge, kas so isi, ka del pe leske panda, a okole so nane, ka lel pe lestar adava da so isi le. 27 A okola me dušmanja, so na mangle te ovav lengoro cari, anen len akate hem mudaren len angli mande!‘“

28 Otkeda vakergja adava, prodolžingja ko plo drumo dži ko Erusalim. 29 Keda alo paše ki Vitfaga hem ki Vitanija, kola so arakhljona ki e Maslinkengiri Gora, bičhalgja dujen taro ple učenikija 30 hem vakergja lenge: „Džan ko gav soj angli amende! Hem keda ka khuven, ka arakhen phanlo her koleste so nikoj panda na bešlja. Phraven le hem anen le! 31 Ako nekoj pučela tumen: ’Soske phravena e here?‘ Vakeren leske: ’Valjanela e Gospodareske‘“. 32 Hem adala, so sine bičhalde, arakhle sa agjaar sar so vakergja lenge. 33 Džikote phravena sine e here, ale o manuša kaskoro so sine o her hem pučle len: „Soske phravena e here?“ 34 Ola odgovoringje lenge: „Valjanela e Gospodareske“. 35 Hem angje e here ko Isus, tegani čhivgje pumare šeja upro her hem o Isus bešlja ki leste.

36 Džikote nakhela sine, o manuša čhivena sine pumare nametke ko drumo. 37 Hem samo so alo paše uzo drumo kolestar so hulela pe tari e Maslinkengiri Gora, but manuša so sine leskere učenikija počmingje te radujnen pe hem ko celo glaso te falinen e Devle bašo sa o čudija* so dikhle hem vakerena sine: 38 „Blagoslovimo tano okova so avela sar cari e Jehovaske* ko anav! Neka ovel mir ko nebo hem slava e Devleske soj tano ko najučo than ko nebo!“ 39 Ama nesave taro fariseija* kola so sine maškar ko narodo vakergje leske: „Učitele, vaker tle učenikonge te čutinen!“ 40 Tegani ov vakergja lenge: „Vakerava tumenge, ako ola čutinena, o bara ka vikinen“.

41 Keda alo paše hem dikhlja i diz, o Isus počmingja te rovel bašo Erusalim, 42 hem vakergja: „Barem avdive te haljove sine kola bukja ka anen tuke mir! Ama akana tu našti te dikhe adala bukja. 43 Soske, ka aven dive keda tle dušmanja ka keren okolu tute ograda taro kašta so isi len oštra vrvija, ka opkolinen tut hem ka napadinen tut taro sa o strane. 44 Ola ka uništinen tut zaedno sa tle čhavencar* hem nane te mukhen te ačhol nijekh bar upro bar ki tute. Soske, o Devel alo te sudinel tuke, ama tu na haliljan adava“.

45 Palo adava, khuvgja ko hrami hem počmingja te brkinel okolen so bikinena sine adathe, 46 hem vakergja lenge: „Pišimo tano: ’Mlo kher ka vikinel pe kher molitvake‘, a tumen kergjen le kher e čorengoro!“

47 Ov ponadari da sikavela sine sekova dive e manušen ko hrami, a o sveštenikija, o učitelija e zakoneskere hem o vodačija e narodoskere rodena sine prilika te mudaren le, 48 ama našti sine ništo te keren, soske celo narodo sine stalno uzi leste hem šunela le sine.

20 Jekh dive, džikote sikavela sine e manušen ko hrami hem vakerela sine bašo šukar haberi, ale ki leste o glavna sveštenikija, o učitelija e zakoneskere hem o starešine 2 hem pučle le: „Vaker amenge koj dengja tut pravo te kere akala bukja? Hem koj vakergja tuke te kere akava?“ 3 A ov vakergja lenge: „Me da ka pučav tumen nešto, hem tumen odgovorinen mange. 4 Koj dengja e Jovaneske pravo te krstinel, o Devel soj ko nebo, ili o manuš?“ 5 Tegani ola počmingje te keren lafi maškar peste: „Ako vakeraja: ’O Devel soj ko nebo‘, ka vakerel amenge: ’Soske na verujngjen ki leste?‘ 6 A ako vakeraja: ’O manuš‘, tegani o manuša ka mudaren amen barencar, soske ola verujnena kaj o Jovan sine proroko“. 7 Adaleske ola odgovoringje leske kaj na džanena koj dengja e Jovaneske pravo te kerel adava. 8 O Isus vakergja lenge: „Ni me na vakerava tumenge koj dengja man pravo te kerav akava“.

9 Palo adava, vakergja e manušenge akaja sporedba: „Jekh manuš sadingja drakha ki niva. Hem dengja la nesave manušenge te keren buti ki late, a ov gelo ko dur than hem adathe ačhilo poviše vreme. 10 Keda alo o vreme te kheden pe o drakha, ov bičhalgja jekhe robo ko manuša so kerena sine buti ki niva te den le delo taro drakha. A ola margje le hem bičhalgje le te iranel pe čuče vastencar. 11 A ov bičhalgja lenge e javere da robo. Ama ola le da margje le, ponižingje le hem bičhalgje le te iranel pe čuče vastencar. 12 Bičhalgja e trito robo da. Le da margje hem brkingje le. 13 Tegani o gazda e nivakoro vakergja: ’So te kerav? Ka bičhalav me mangle čhave. Šaj ole ka poštujnen le‘. 14 Ama keda dikhle le, o manuša so kerena sine buti ki niva vakergje peske: ’Ov tano o nasledniko! Ajde te mudara le hem i niva ka ovel amari!‘* 15 Tegani frdingje le avrijal tari niva hem mudargje le. A so ka kerel lenge o gazda e nivakoro? 16 Ka avel, ka mudarel akale manušen, a i niva ka del la javerenge“.

Keda šungje adava o manuša vakergje: „Asavko nešto našti te ovel!“ 17 Ama o Isus dikhlja len hem vakergja lenge: „So značinela tegani adava soj pišimo: ’O bar so frdingje le o graditelija, ulo o glavno bar* ki kjuša‘? 18 Sekoj so ka perel ko akava bar, ov ka ovel but povredimo, a upro kaste ka perel akava bar, ov ka ovel zdrobimo“.

19 Ko adava momenti, o učitelija e zakoneskere hem o glavna sveštenikija mangle te astaren le, soske halile kaj i sporedba so vakergja la sine, vakergja la lenge, ama darana sine taro narodo. 20 Adaleske so rodena sine prilika te prevarinen le, ola tajno platingje nesave manušen te keren pe kaj tane pravedna, te šaj te keren o Isus te vakerel nešto pogrešno hem agjaar te predajnen le ko vlastija hem ko vladeteli. 21 Hem pučena le sine: „Učitele, džanaja kaj tu vakerea hem sikavea o čačipe hem na delinea e manušen, hem adava so sikavea bašo Devel tano čače. 22 Dali tano ispravno te platina danok e cezareske ili na?“ 23 Ama ov džanela sine kaj ola mangena te prevarinen le hem vakergja lenge: 24 „Sikaven mange jekh denarij!* Kaskoro liko hem anav isi akate?“ Ola odgovoringje leske: „E cezareskoro“. 25 A ov vakergja lenge: „Adaleske, iranen e cezareskoro e cezareske, a e Devleskoro e Devleske!“ 26 Hem našti kergje o Isus anglo narodo te vakerel nešto pogrešno, ama sine vooduševime taro leskoro odgovor hem adaleske čutingje.

27 Ama nesave taro sadukeija,* kola so vakerena kaj nane voskresenie, ale ki leste hem pučle le: 28 „Učitele, o Mojsej pišingja: ’Ako jekh manuš merela hem mukhela ple romnja bizo čhave, leskoro phral mora te lel leskere romnja te šaj te del potomstvo ple phraleske‘. 29 Sine peske efta phralja. O prvo ženingja pe, ama mulo bizo te oven le čhave. 30 Palo adava lelja la o dujto. 31 Isto kergja o trito da. Agjaar ulo e soeftancar, mule bizo te ovel len čhave laja. 32 Ko krajo muli i romni da. 33 Sprema adava, keda ka voskresninen, kaskiri romni ka ovel? Soske, oj sine romni e soeftangiri“.

34 O Isus vakergja lenge: „O manuša taro akava sveto* ženinena pe, 35 ama okola, kolen so o Devel ka voskresninel hem ka mukhel te živinen ko nevo sveto* so ka avel, nane te ženinen pe. 36 Ustvari, ka našti ni te meren da više, soske ka oven sar angelija hem adaleske so ka voskresninen* ka oven e Devleskere čhave. 37 A bašo adava kaj o mule ka voskresninen, sikavgja o Mojsej da ko plo lil, keda pišingja baši grmuška, kote so bašo Jehova* vakergja kaj tano o Devel e Avraameskoro, o Devel e Isakoskoro hem o Devel e Jakoveskoro. 38 Ov nane o Devel e mulengoro, nego e dživdengoro, soske leske sarine ola tane dživde“. 39 Tegani nesave taro učitelija e zakoneskere vakergje: „Učitele, šukar vakergjan“. 40 Palo adava na sine len više hrabrost te pučen le nešto javer.

41 Tegani ov pučlja len: „Sar šaj o manuša te vakeren kaj o Hristos* tano e Davideskoro čhavo? 42 Soske, korkori o David ko lil taro Psalmija vakerela: ’O Jehova* vakergja mle Gospodareske: „Beš tari mli desno strana 43 sa džikote na čhivava tle dušmanen telo tle pre“‘. 44 Ako o David vikinela le Gospodari, sar tegani tano leske čhavo?“

45 Džikote celo narodo šunela sine, ov vakergja ple učenikonge: 46 „Pazinen tumen taro učitelija e zakoneskere, kola so mangena te phiren dugačka šeencar, o manuša te pozdravinen len ko ploštadija hem te bešen ko prva thana ko sinagoge* hem ko najšukar thana ko proslave, 47 kola so lena adava so isi e udovicen* hem vakerena but dugačka molitve te šaj o javera te dikhen len. Ola ka dobinen pobari kazna“.

21 Džikote o Isus dikhela sine sar o barvale mukhena pumare dobrovolna prilogija ko kase, 2 dikhlja jekhe čorole udovica da sar mukhela duj tikne paričke* so vredinena sine but hari, 3 hem vakergja: „Čače vakerava tumenge, akaja čoroli udovica mukhlja but poviše taro sa o javera. 4 Soske, sa o javera mukhle prilogija taro pumaro višako, a oj taro plo čorolipe mukhlja sa adava so sine la živibaske“.

5 Palo adava, džikote nesave kerena sine lafi bašo adava kobor o hrami sine ukrasimo šuže barencar hem e bukjencar so sine dende sar poklon e Devleske, 6 ov vakergja: „Ka aven dive keda taro sa akava so dikhena nane te ačhovel ni jekh bar upro bar, sa ka ovel rušimo“. 7 Tegani pučle le: „Učitele, keda ka oven akala bukja hem kova ka ovel o znako kaj alo vreme te ovel sa adava?“ 8 A ov vakergja: „Pazinen ma te hovaven tumen. Soske, but džene ka aven ko mlo anav hem ka vakeren: ’Me sium o Hristos‘ hem ’Paše tano adava vreme‘. Ma džan pali lende! 9 Isto agjaar keda ka šunen bašo vojne hem nemirija, ma daran! Soske, prvo adava mora te slučinel pe, ama o krajo nane te avel odma“.

10 Tegani vakergja lenge: „Ka borinel pe narodo protiv narodo, hem carstvo protiv carstvo. 11 Ka oven bare zemjotresija, a ko razna thana ka ovel bokhalipa hem zarazna nasvalipa. O manuša ka dikhen bukja so ka daraven len hem ka oven bare znakija taro nebo.

12 Ama angleder sa akava te ovel, o manuša ka astaren tumen, ka progoninen tumen hem ka predajnen tumen ko sinagoge* hem ko zatvorija. Ka ikalen tumen anglo carija hem upravitelija bašo mlo anav. 13 Adava ka del tumen prilika te svedočinen. 14 Ma razmislinen angleder bašo adava so ka vakeren te šaj te braninen tumen, 15 soske me ka dav tumen mudrost hem ka pomožinav tumenge te džanen so te vakeren, hem tumare dušmanja ka našti te vakeren ništo protiv adava. 16 A ka predajnen tumen čak tumare roditelija, tumare phralja, tumari familija hem tumare amala, hem nesave tumendar ka oven mudarde. 17 Sarine ka mrzinen tumen bašo mlo anav. 18 A tumendar nijekh bal taro šero nane te perel. 19 Ako istrajnena dži ko krajo ka spasinen tumaro životo.

20 A keda ka dikhen o Erusalim opkolimo taro vojnikija, džanen kaj paše tano o vreme te ovel uništimo. 21 Tegani okola so ka oven ki Judeja neka našen ko planine, okola so ka oven andre ko Erusalim neka ikljon lestar, a okola so ka oven ko gava okolu o Erusalim te na khuven ki leste! 22 Soske, ko adala dive o Devel ka kazninel e manušen te šaj te ispolninel pe sa adava so sine pišimo. 23 Ko adala dive, teško e khamne džuvlenge hem e dajenge so dena thud pumare bebenge! Soske, bare nevolje ka oven ki akaja phuv hem o manuša soj ki late ka oven kaznime. 24 Nesave ka meren taro mači, a nesave ka oven ingarde sar zarobenikija ko sa o javera narodija. O Erusalim ka ovel gazimo taro narodija kola so na služinena e Devleske, sa džikote na završinela o vreme soj odredimo e narodonge so na služinena e Devleske.

25 Isto agjaar ka oven znakija ko kham, ki mesečina hem ko zvezde, hem o narodija ki phuv but ka daran hem nane te džanen so te keren tari galama so ka keren o branija ko more. 26 O manuša ka peren ko nesvest tari dar hem so ka oven sekirime bašo adava so ka ovel e svetoja, soske o bukja soj ko nebo ka tresinen. 27 Hem tegani ka dikhen e manušikane Čhave* sar avela ko oblako silaja hem bare slavaja. 28 A keda ka počminel te slučinel pe sa adava, ušten ko pre hem vazden tumare šere, soske paše tano o vreme keda o Devel ka oslobodinel tumen“.

29 Tegani vakergja lenge jekh sporedba: „Dikhen i smokva hem sa o javera kašta. 30 Keda dikhena kaj ola mukhena listija, džanena kaj o nilaj tano paše. 31 Agjaar tumen da, keda ka dikhen kaj sa akala bukja ovena, džanen kaj e Devleskoro Carstvo tano paše. 32 Čače vakerava tumenge, akaja generacija nane te nakhel sa džikote na ovena sa akala bukja. 33 O nebo hem i phuv ka našavgjoven, ama mle lafija ka ačhoven zasekogaš.

34 Ama pazinen tumen tumare vile nikogaš te na oven optovarime bute hajbaja, pijbaja hem e sekiraciencar taro životo, hem adava dive te astarel tumen iznenadeno 35 sar jekh stapica. Soske, nijekh so živinela ki phuv ka našti te našel taro adava dive. 36 Adaleske, ačhoven džangavde, celo vreme molinen tumen taro vilo, te šaj te oven spasime taro sa adala bukja so valjani te oven hem te tergjoven anglo manušikano Čhavo“.

37 Diveskoro o Isus sikavela sine e manušen ko hrami, a akšameskoro ikljola sine hem i rat nakhavela la sine ki e Maslinkengiri Gora. 38 A celo narodo avela sine rano sabajle ko hrami te šaj te šunel le.

22 Sine paše o Prazniko bašo mare bizo kvasaco so vikinela pe Pasha.* 2 A o glavna sveštenikija hem o učitelija e zakoneskere mangena sine te mudaren e Isuse, ama darana sine taro narodo, adaleske rodena sine šukar prilika te mudaren le. 3 Tegani o Satana khuvgja ko Juda Iskariot, kova so sine jekh taro 12 apostolija. 4 Ov gelo hem kergja lafi e glavna sveštenikoncar hem e hramska zapovednikoncar* bašo adava sar te predajnel lenge e Isuse. 5 Ola but radujngje pe bašo adava hem dogovoringje pe lea te den le srebrena pare. 6 Ov prifatingja hem počmingja te rodel šukar momenti te šaj te predajnel lenge e Isuse, keda o narodo nane te ovel uzi leste.

7 Alo o prvo dive taro Prazniko bašo mare bizo kvasaco, keda mora sine te del pe i pashalno žrtva. 8 Adaleske o Isus bičhalgja e Petare hem e Jovane hem vakergja lenge: „Džan hem spreminen amenge i pashalno večera“. 9 Ola pučle le: „Kote mangea te spremina la?“ 10 Ov vakergja lenge: „Keda ka khuven ki diz ka arakhen jekhe manuše kova so ka phiravel khoro* panjea. Džan pali leste hem khuven ko kher koleste so ka khuvel ov. 11 Hem vakeren e domakjineske taro adava kher: ’O Učiteli pučela tut: „Kote tani i gostinsko soba kote so ka šaj te slavinav i Pasha mle učenikoncar?“‘ 12 Ov ka sikavel tumenge ko upruno sprati jekh bari hem namestimi soba. Spreminen adathe“. 13 O učenikija gele hem arakhle sa agjaar sar so vakergja lenge ov, hem spremingje baši Pasha.

14 Keda alo o vreme te han i večera, o Isus bešlja ko astali ple apostolencar. 15 Hem vakergja lenge: „Edvaj adžikergjum te hav tumencar akaja pashalno večera angleder te ovav mučimo. 16 Soske, vakerava tumenge, nane te hav palem i Pasha sa džikote adava so oj pretstavinela nane te ispolninel pe ko e Devleskoro Carstvo“. 17 Tegani lelja jekh čaša so dengje le, zablagodaringja pe e Devleske hem vakergja: „Len i čaša hem den la jekh jekheske. 18 Soske, vakerava tumenge, taro akana nane više te pijav mol sa džikote na avela e Devleskoro Carstvo“.

19 Isto agjaar, lelja maro, zablagodaringja pe e Devleske, phaglja le, dengja ple učenikonge hem vakergja: „Akava pretstavinela mlo telo so ka del pe sar žrtva tumenge. Keren akava te setinen tumen ki mande“. 20 Isto kergja e čašaja da, hem otkeda hale i večera, vakergja: „Akaja čaša pretstavinela o nevo sojuz kova so ka počminel te važinel preku mlo rat so ka čhorgjol butenge.

21 Ama ake, okova so ka predajnel man tano mancar ko astali. 22 Soske, sa adava soj pišimo bašo manušikano Čhavo* ka slučinel pe leske, ama teško okole manušeske so ka predajnel le!“ 23 Keda šungje adava, o učenikija počmingje te pučen pe maškar peste koj šaj te ovel adava so ka kerel agjaar.

24 Hem isto agjaar, počmingje te rasprajnen pe maškar peste bašo adava koj lendar tano najbaro. 25 Tegani o Isus vakergja lenge: „O carija vladinena upro narodo, a okola so isi len avtoriteti upro manuša tane pendžarde sar okola so kerena šukaripe e javerenge. 26 A tumen ma oven asavke, nego o najbaro maškar tumende neka ovel sar najtikno, a okova so predvodinela neka ovel sar okova so služinela. 27 Soske, koj tano pobaro, okova so bešela ko astali ili okova so služinela? Nane li okova so bešela ko astali? A me sium maškar tumende sar okova so služinela.

28 Ama, tumen ačhilen mancar ko mle iskušenija. 29 Sar mo Dad so kergja sojuz* mancar, agjaar me da kerava sojuz tumencar bašo carstvo, 30 te šaj ko mlo Carstvo te han hem te pien ko mlo astali hem te bešen ko prestolija te šaj te sudinen e 12 plemenge taro Izrael.

31 Simon, Simon, ake, o Satana rodingja te kerel tumencar adava so kerela jekh manuš keda odvojnela o giv tari leskiri lušpa. 32 Ama me taro vilo molingjum man tuke, te na našave tli vera. A tu, keda ka irane tut, ker zorali i vera tle phralengiri“. 33 Tegani o Petar vakergja leske: „Gospodare, spremno sium te džav tuja ko zatvor hem te merav tuja!“ 34 Ama o Isus vakergja leske: „Vakerava tuke Petar, o bašno nane te giljavel avdive sa džikote tu trin puti na vakerea kaj na pendžarea man“.

35 Isto agjaar vakergja lenge: „Dali falingja tumenge nešto keda bičhalgjum tumen te propovedinen bizo pare,* bizo torba hem bizo sandale?“ Ola vakergje leske: „Na!“ 36 Tegani vakergja lenge: „Ama akana ako nekas isi pare,* neka lel len pea. Isto agjaar neka lel pea torba. Hem ako nekas nane mači, neka bikinel pli upruni nametka hem neka kinel peske. 37 Hem vakerava tumenge kaj upri mande mora te ispolninel pe adava soj pišimo: ’O manuša dikhena le sine sar jekh taro grešnikija‘. Soske, adava soj pišimo baši mande, ispolninela pe“. 38 Tegani ola vakergje: „Gospodare, ake akate isi duj mačija“. A ov vakergja lenge: „Adava tano dovolno“.

39 Palo adava iklilo, hem sar so sine le navika, gelo ki e Maslinkengiri Gora, a o učenikija da gele lea. 40 Keda resle adathe, o Isus vakergja lenge: „Ponadari da molinen tumen te šaj te na peren ko iskušenie!“ 41 Tegani o Isus gelo lendar hari podur,* pa pelo ko kočaka hem počmingja te molinel pe: 42 „Mo Dad, ako mangea cide akaja čaša mandar. Ama, ma te ovel sar me so mangava, nego sar tu so mangea“. 43 Tegani pojavingja pe leske jekh angeli taro nebo hem zajakningja le. 44 Sine leske but pharo hem adaleske ponadari da molinela pe sine celo vilea, a leskoro teri ulo sar kapke rat so perena sine ki phuv. 45 Otkeda molingja pe, uštilo, gelo ko učenikija hem arakhlja len sar sovena, soske na sine len više sila taro žalibe. 46 Vakergja lenge: „Soske sovena? Ušten hem ponadari molinen tumen te šaj te na peren ko iskušenie“.

47 Džikote panda kerela sine lafi, ale but manuša ko adava than, a jekh taro 12 apostolija so vikinela pe sine Juda, vodinela len sine. Ov alo ko Isus hem čumingja le. 48 A o Isus vakergja leske: „Juda, čumibaja li predajnea e manušikane Čhave?“ 49 Tegani okola so sine okolu leste, keda dikhle so slučinela pe, vakergje: „Gospodare, te napadina len li mačea?“ 50 Jekh lendar čak napadingja e prvosveštenikoskere robo hem čhingja leskoro desno kan. 51 A o Isus vakergja: „Dosta sine! Čhinaven!“ Tegani pipingja e manušeskoro kan hem sasljargja le. 52 A e glavna sveštenikonge, e hramska zapovednikonge hem e starešinenge, kola so ale te astaren le, o Isus vakergja: „Zarem sium čor* hem adaleske alen mačencar hem kaštencar te astaren man? 53 Sekova dive sium sine tumencar ko hrami, a tumen na astargjen man. Ama akana tano tumaro vreme hem o vreme okolengoro soj ki temnica te sikaven pumari mokj“.

54 Tegani astargje le hem ingargje le ko kher e prvosveštenikoskoro. A o Petar sledinela len sine duraldan. 55 Maškar ko dvoro o manuša thargje jag hem bešle okolu late, a o Petar da bešlja adathe maškar lende. 56 Džikote o Petar bešela sine uzi jag, jekh sluginka dikhlja le hem vakergja: „Akava da manuš sine lea!“ 57 Ama ov na priznajngja hem vakergja: „Na pendžarava le!“ 58 Kratko palo adava jekh javer manuš dikhlja le hem vakergja: „Tu da sian jekh lendar!“ A o Petar odgovoringja: „Na, na sium!“ 59 Okolu jekh saati palo adava, jekh javer da manuš počmingja uporno te vakerel: „Sigurno akava da manuš sine lea, soske ov da tano Galilejco!“ 60 A o Petar vakergja: „Na džanava bašo so kerea lafi“. Hem odma, panda džikote kerela sine lafi, o bašno giljavgja. 61 Ko adava momenti o Gospodari irangja pe hem dikhlja e Petare, a o Petar setingja pe ko lafija so vakergja leske o Gospodari: „O bašno nane te giljavel avdive, sa džikote tu trin puti na vakerea kaj na pendžarea man“. 62 Tegani ov iklilo avrijal hem but rungja.

63 A o manuša so arakhena sine e Isuse počmingje te asan leske hem te khuven le. 64 Učharena sine o muj leskoro hem vakerena sine: „Ako sian proroko, vaker amenge koj khuvgja tut!“ 65 Hem vakerena sine but lošna lafija protiv o Isus kolencar so vredžinena sine e Devle.

66 Keda phravdilo o sabaj, o glavna sveštenikija hem o učitelija e zakoneskere, kola so sine starešine e narodoske, khedingje pe hem angje e Isuse ki sala taro Sudsko sovet* hem vakergje: 67 „Ako tu sian o Hristos,* vaker amenge!“ A o Isus vakergja lenge: „Čak te vakerav tumenge, tumen nane te verujnen man. 68 Hem te pučav tumen da, nane te odgovorinen mange. 69 Ama taro akana o manušikano Čhavo ka bešel tari desno strana e mokjno Devleskiri“. 70 Tegani sarine ola vakergje: „Znači, tu li sian e Devleskoro Čhavo?“ A ov odgovoringja lenge: „Korkori tumen vakerena kaj sium“. 71 A ola vakergje: „Zarem valjanena amenge javera svedokija? Soske, amen lično šungjem leskere lafija“.

23 Palo adava sa adala manuša uštile hem ingargje e Isuse ko Pilat. 2 Počmingje te obvininen le hem te vakeren: „Akava manuš hovavela amare narodo, zabraninela te platinel pe o danok e cezareske hem baši peste vakerela kaj tano o Hristos,* o cari“. 3 A o Pilat pučlja le: „Tu li sian o cari e Evreengoro? Ov odgovoringja leske: „Tu korkori vakerea adava“. 4 Tegani o Pilat vakergja e glavna sveštenikonge hem e narodoske: „Na arakhava nisavi pričina te osudinav akale manuše“. 5 Ama ola sine uporna hem vakerena sine: „Ple sikajbaja ov čhivela e narodo te buninel pe ki celo Judeja. Počmingja ki Galileja hem reslja čak dži akate“. 6 Keda šungja adava, o Pilat pučlja dali o Isus tano Galilejco. 7 Keda doznajngja kaj ov avela taro than kote so o Irod* vladinela, bičhalgja le ki leste, soske o Irod ko adala dive isto agjaar sine ko Erusalim.

8 Keda o Irod dikhlja e Isuse, but radujngja pe. Adaleske so šungja but bašo Isus, ov više odamna mangela sine te dikhel le hem nadinela pe sine kaj o Isus ka kerel nesavo čudo angli leste. 9 Hem počmingja te pučel le but pučiba, ama o Isus ništo na odgovoringja leske. 10 A o glavna sveštenikija hem o učitelija e zakoneskere uštena sine hem holjaja obvininena le sine. 11 Tegani o Irod hem leskere vojnikija počmingje te ponižinen le hem te asan leske agjaar so uravgje le šuže šeja. Palo adava čhivgja te iranen le palal ko Pilat. 12 Ko adava dive o Irod hem o Pilat ule amala, a angleder adava ola sine dušmanja.

13 Tegani o Pilat vikingja e glavna sveštenikon, e narodoskere poglavaren hem e narodo 14 hem vakergja lenge: „Angjen mange akale manuše hem obvininena le kaj čhivela e narodo protiv i vlada. Ake, me ispitingjum le angli tumende ama na arakhljum kaj akava manuš tano krivo bašo bukja kolenge so tumen obvininena le. 15 A o Irod da na arakhlja nisavi krivica ki leste, adaleske bičhalgja le palal ki amende. Ov na kergja ništo lošno te šaj te ovel mudardo. 16 Adaleske ka kazninav le hem posle ka mukhav le“. 17* -- 18 Ama celo narodo vikinela sine: „Mudar akale manuše, a oslobodin amenge e Varava!“ 19 (O Varava sine phanlo ko zatvor adaleske so pomožingja e manušen so buningje pe protiv i vlada hem adaleske so mudargja.) 20 A o Pilat palem kergja lencar lafi, soske mangela sine te oslobodinel e Isuse. 21 Ama ola počmingje te vikinen: „Neka ovel kovimo ko stubo! Neka ovel kovimo ko stubo!“ 22 Pučlja len o trito puti da: „Soske? Savo lošnipe kergja akava manuš? Na arakhava ništo ki leste koleske so zaslužinela te merel. Adaleske, ka kazninav le hem palo adava ka mukhav le“. 23 A ola počmingje te oven uporna hem glasno rodena sine te ovel kovimo ko stubo. Doborom vikinena sine so ko krajo o Pilat otkažingja pe. 24 Tegani o Pilat odlučingja te kerel adava so rodena sine ola 25 hem oslobodingja e manuše so sine phanlo ko zatvor bašo bunt protiv i vlada hem bašo mudaribe, a e Isuse predajngja le lenge te keren lea so mangena.

26 Džikote ingarena le sine, o vojnikija ačhavkergje jekhe manuše so vikinela pe sine Simon tari Kirinija, kova so iranela pe sine taro pole, hem zapovedingje leske te džal palo Isus hem te phiravel leskoro stubo mučibaske.* 27 Palo Isus džana sine but manuša hem džuvlja so khuvena pe sine ko kolin tari žal hem rovena sine leske. 28 A o Isus irangja pe ko džuvlja hem vakergja lenge: „Tumen e Erusalimeskere čhaja, čhinaven te roven mange! Namesto adava roven tumenge hem tumare čhavenge. 29 Soske, ake avena dive keda o manuša ka vakeren: ’Srekjna tane o džuvlja so našti sine te ačhoven khamne, o džuvlja so na bijangje hem okola so na dengje thud!‘ 30 Tegani ka počminen te vakeren e planinenge: ’Peren upri amende!‘, hem e bregonge: ’Učharen amen!‘ 31 Ako kerena akala bukja keda o kaš tano zeleno, so ka ovel keda o kaš ka ovel šuko?“

32 A ingarena sine hem duje kriminalcon te oven mudarde zaedno lea. 33 Keda resle ko than so vikinela pe Čerepi,* kovingje ko stubo le hem e kriminalcon, jekhe tari leskiri desno, a e javere tari leskiri levo strana. 34 A o Isus vakergja: „Mo Dad, prostin lenge, soske ola na džanena so kerena!“ Isto agjaar frdingje ždrepka* te delinen leskere šeja. 35 O manuša tergjona sine hem dikhena sine. A o poglavarija e narodoskere asana sine leske hem vakerena sine: „E javeren spasingja. Adaleske, ako ov tano o Hristos, kole so biringja le o Devel, neka spasinel korkori pes!“ 36 Čak o vojnikija asana sine leske, avena sine uzi leste hem mangena sine te den le šutali mol, 37 hem vakerena sine leske: „Ako sian o cari e Evreengoro, spasin korkori tut!“ 38 A upreder leskoro šero pišinela sine: „Akava tano o cari e Evreengoro“.

39 Tegani jekh taro kriminalcija so sine kovimo uzi leste, počmingja te vredžinel le hem vakerela sine: „Na sian li tu o Hristos? Spasin tu tut hem amen!“ 40 Tegani o javer kriminalco ukoringja le hem vakergja leske: „Na daraja li taro Devel? Tu da dobingjan i isto kazna. 41 Amen dobingjem adava so zaslužingjem bašo bukja so kergjem, adaleske ispravno tano adava so dobingjem akaja kazna. Ama akava manuš na kergja ništo lošno“. 42 Palo adava vakergja: „Isus, setin tut ki mande keda ka ove Cari!* 43 A o Isus vakergja leske: „Čače vakerava tuke avdive, tu ka ove mancar ko raj“.

44 Sine okolu 12 o saati* diveskoro keda ki celo adaja phuv uli bari temnica hem sine agjaar dži ko okolu trin o saati* diveskoro, 45 soske i svetlina taro kham našavdili. A i zavesa taro hrami pharavdili ko maškar dži tele. 46 A o Isus glasno vikingja hem vakergja: „Mo Dad ko tle vasta mukhava mlo životo!“ Otkeda vakergja akava, ov mulo.* 47 Keda dikhlja so ulo, o komandiri* počmingja te falinel e Devle hem te vakerel: „Čače akava manuš sine pravedno!“ 48 A sa o manuša so khedingje pe adathe te dikhen e Isuseskoro meribe, keda dikhle so slučingja pe, irangje pe ko pumare khera hem khuvena pe sine ko kolin tari žal. 49 A sa o manuša so pendžarena pe sine lea, zaedno e džuvlencar so ale lea tari Galileja, tergjona sine podur hem dikhena sine sa adava.

50 Adathe sine hem jekh členi taro Sovet, ov sine jekh šukar hem pravedno manuš so vikinela pe sine Josif. 51 (Ov na soglasingja pe lencar hem na pomožingja len ko lengoro plani te mudaren e Isuse. Ov sine tari Arimateja, jekh diz ki Judeja, hem adžikerela sine e Devleskoro Carstvo.) 52 Akava manuš gelo ko Pilat hem rodingja dozvola te parunel e Isuse. 53 Ov huljargja leskoro telo, pakjargja le ko leneno čaršafi hem čhivgja le ko grobo kova so sine kerdo ki karpa. A ko adava grobo panda nikoj na sine parumo. 54 A adava dive spreminena pe sine bašo sabat* hem panda hari valjani sine o sabat te počminel. 55 A o džuvlja, so ale lea tari Galileja, isto agjaar gele ko grobo hem dikhle sar čhivgje leskoro telo ko grobo. 56 Palo adava irangje pe te šaj te spreminen mirisliva bilke hem mirislivo maslo. Ama keda počmingja o sabat, sprema o Zakoni, na kergje ništo.

24 Ko prvo dive taro kurko, o džuvlja ale rano sabajle ko grobo, hem angje o mirisliva bilke so spremingje. 2 Keda resle, dikhle kaj nekoj cidingja o baro bar so sine anglal ko grobo, 3 ama keda khuvgje andre, na arakhle o telo e Gospodareskoro e Isuseskoro. 4 Džikote tergjona sine adathe bunime, dikhle duje manušen sar tergjona uzi lende, a lengere šeja svetinena sine. 5 O džuvlja but darandile hem tari dar teljargje pumaro šero tele, a o manuša vakergje lenge: „Soske rodena okole soj dživdo maškar o mule? 6 Ov nane akate, nego voskresningja. Setinen tumen so vakergja tumenge džikote panda sine ki Galileja, 7 kaj o manušikano Čhavo* mora te ovel predajmo ko vasta e grešnikonge, te ovel kovimo ko stubo hem ko trito dive te voskresninel“. 8 Tegani o džuvlja setingje pe ko leskere lafija. 9 Irangje pe taro grobo hem vakergje e dešujekhe apostolenge hem sa e javerenge adava so ulo. 10 Adala džuvlja sine i Marija Magdalena, i Joana hem i Marija, i daj e Jakoveskiri. Hem o javera da džuvlja so sine lencar, vakergje e apostolenge sa so ulo. 11 Ama o apostolija na verujngje akale džuvlenge, ola mislingje kaj sa adava so vakerena, izmislingje le.

12 A o Petar uštilo hem prastandilo dži ko grobo, keda reslja, telilo hem avrijaldan dikhlja samo o leneno platno. Palo adava gelo peske hem celo vreme pučela pe sine so slučingja pe.

13 Ko adava dive, duj taro učenikija patujnena sine dži ko jekh gav so vikinela pe Emaus, kova so sine okolu 11 kilometre* podur taro Erusalim. 14 Hem kerena sine lafi maškar peste bašo sa adava so slučingja pe.

15 Džikote ola kerena sine lafi, o Isus alo uzi lende hem počmingja te phirel lencar. 16 A ola našti pendžargje le. 17 Tegani o Isus pučlja len: „Bašo so kerena sine lafi džikote phirena ko drumo?“ Ola ačhile, a taro lengoro muj dikhjola pe sine kaj tane tažna. 18 Jekh lendar so vikinela pe sine Kleopa, vakergja: „Te na sian stranco kova so živinela korkori ko Erusalim, pa adaleske na džanea so slučingja pe ki leste akala dive?“ 19 A o Isus pučlja len: „So slučingja pe?“ Ola odgovoringje leske: „Pa adava so slučingja pe e Isusea o Nazarekjanco, o čudija so kergja hem o lafija so vakergja, sikavgje anglo Devel hem anglo manuša kaj sine mokjno proroko. 20 A amare glavna sveštenikija hem o poglavarija e narodoskere predajngje le te ovel mudardo hem kovingje le ko stubo. 21 A amen nadingjem amen kaj ov tano adava so ka spasinel o Izrael. Ake, akava tano više o trito dive sar slučingje pe akala bukja. 22 Isto agjaar, siem sine bunime keda nesave džuvlja, kola so zaedno amencar džana sine pali leste, gele rano sabajle ko grobo, 23 hem adathe na arakhle leskoro telo, adaleske ale ki amende hem vakergje amenge kaj dikhle angelija kola so vakergje lenge kaj ov tano dživdo. 24 Tegani nesave amendar gele ko grobo hem arakhle sa agjaar sar so vakergje o džuvlja, a le na dikhle le“.

25 Tegani o Isus vakergja lenge: „Tumen sien manuša so na mangena te haljoven hem pharo tumenge te verujnen ko sa adava so vakergje o prorokija! 26 Na valjani li sine o Hristos* te trpinel sa akava hem palo adava te dobinel pli slava?“* 27 Hem počmindor taro Mojsej hem taro sa o Prorokija, ov objasningja lenge adava soj tano pišimo baši leste ko sa o Spisija.

28 Keda resle paše uzo gav koleste so o učenikija džana sine, dikhle kaj o Isus manglja te prodolžinel ponadari e drumoja. 29 Ama ola molinena le sine te ačhol hem vakergje leske: „Ačhov amencar, soske panda hari ka rakjol“. Tegani o Isus khuvgja ko kher hem ačhilo lencar. 30 Džikote sine lencar ki sofra, lelja o maro, zablagodaringja pe e Devleske ki molitva,* phaglja le hem dengja len. 31 Tegani ola halile kaj adava sine o Isus hem pendžargje le, a ov taro jekh puti anglo lengere jakhja našavdilo. 32 A ola vakergje jekh jekheske: „Na pherdile li amare vile džikote ov kerela sine amencar lafi ko drumo, džikote objasninela sine amenge o Spisija?“ 33 Tegani uštile hem irangje pe ko Erusalim. Adathe arakhle e dešujekhe apostolen hem okolen so sine khedime lencar, 34 kola so vakerena sine: „O Gospodari čače voskresningja hem pojavingja pe e Simoneske!“ 35 Tegani ola da raskažingje sa adava so slučingja pe ko drumo hem sar pendžargje le keda phaglja o maro.

36 Džikote panda kerena sine lafi bašo adava, maškar lende pojavingja pe o Isus hem vakergja lenge: „O mir neka ovel tumencar!“ 37 A o učenikija but darandile, soske mislingje kaj dikhena duho. 38 Adaleske o Isus vakergja lenge: „Soske darana? Soske sumninena tumen? 39 Dikhen me vasta hem me pre. Me sium! Pipinen man hem ka dikhen, soske e duho nane le mas hem kokala sar so isi man“. 40 Keda vakergja adava, sikavgja lenge pe vasta hem pe pre. 41 Džikote ola tari radost našti sine te verujnen ko adava so dikhena hem but čudingje pe, o Isus pučlja len: „Isi li tumen akate nešto hajbaske?“ 42 Ola dengje le jekh kotor peko mačho, 43 a ov lelja hem halja angli lende.

44 Palo adava vakergja lenge: „Džikote sium sine panda tumencar, vakerava tumenge sine bašo akava, kaj mora te ispolninel pe sa adava soj pišimo baši mande ko e Mojseeskoro zakoni, ko Prorokija hem ko Psalmija“. 45 Tegani pomožingja lenge celosno te haljon so značinela adava so pišinela ko Spisija 46 hem vakergja lenge: „Pišimo tano kaj o Hristos* ka cidel muke hem kaj ko trito dive ka voskresninel taro mule 47 hem ko leskoro anav ko celo sveto, počmindor taro Erusalim, ka propovedinel pe e manušenge kaj valjani te kainen pe bašo pumare grevija so kergje, te šaj te oven lenge prostime. 48 A tumen ka svedočinen bašo adava.* 49 Me ka bičhalav tumenge adava so vetingja mo Dad. Adaleske ačhoven ko Erusalim džikote na priminena i sila upraldan“.*

50 Tegani ikalgja len avrijal tari diz dži ki Vitanija, pa vazdingja ple vasta hem blagoslovingja len. 51 Otkeda blagoslovingja len, mukhlja len hem o Devel lelja le upre ko nebo. 52 Ola pokloningje pe leske hem radosno irangje pe ko Erusalim. 53 Hem stalno sine ko hrami hem falinena sine e Devle.