O ŠUKAR HABERI SPREMA O JOVAN

1 Ko početok sine o Lafi, hem o Lafi sine e Devlea, hem o Lafi sine sar devel.* 2 Ov sine e Devlea taro početok. 3 Sa ulo preku leste hem ništo na ulo bizo leste.

Preku leste ulo 4 o životo hem o životo sine svetlina e manušenge. 5 Hem i svetlina svetinela ki temnica, ama i temnica na učhargja e svetlina.

6 Pojavingja pe jekh manuš kova so sine bičhaldo taro Devel, a leskoro anav sine Jovan. 7 Ov alo sar svedoko te svedočinel baši svetlina te šaj različna manuša te verujnen preku leste. 8 O Jovan na sine adaja svetlina, ama ov valjani sine te svedočinel baši adaja svetlina.

9 I čačutni svetlina, so svetinela upro sa o manuša, panda hari valjani sine te avel ko sveto. 10 Ov sine ko sveto hem o sveto ulo preku leste, ama o sveto na pendžargja le. 11 Ov alo ko plo kher, ama leskere manuša na prifatingje le. 12 A sa okola so prifatingje le, dengja len pravo te oven e Devleskere čhave soske ola sikavgje vera ki leste. 13 Ola sine bijame, ama na taro manuša, ni adaleske so lengere roditelija mangle, ni adaleske so nesavo manuš manglja, nego adaleske so o Devel manglja.

14 Agjaar o Lafi ulo manuš hem sine maškar amende, hem amen dikhlem leskiri bari čest, čest savi so o dad dela ple edinstveno bijame čhaveske. Ov sekogaš sikavela sine o šukaripe so na zaslužinela pe hem sekogaš vakerela sine o čačipe kova so dobingja le taro plo Dad. 15 O Jovan svedočinela sine baši leste hem celo glasoja vakerela sine: „Akava tano adava kaske so vakerava sine: ’Okova so alo pali mande akana tano angli mande, soske ov angleder mande postojnela sine‘“. 16 Adava so sine le, dobingjem amen da, o baro šukaripe kova so na zaslužinela pe. 17 Soske, o Zakoni sine dendo preku o Mojsej, a e Devleskoro šukaripe kova so na zaslužinaja le hem o čačipe ale preku o Isus Hristos. 18 Nijekh manuš nikogaš na dikhlja e Devle, ama o edinstveno bijamo Čhavo soj sar devel kova soj najpaše e Dadea,* ov tano adava so vakergja amenge savo tano o Devel.

19 Keda o Evreija bičhalgje e sveštenikon hem e leviten taro Erusalim te pučen le: „Koj sian tu?“, 20 o Jovan odma odgovoringja hem vakergja lenge: „Me na sium o Hristos“. 21 A ola pučle le: „Tegani koj sian? Te na sian o Ilija?“ Ov odgovoringja: „Na, na sium“. „Dali sian o Proroko so valjani te avel?“ Ov odgovoringja lenge: „Na!“ 22 A ola pučle le: „Koj sian tu? Vaker amenge te šaj te odgovorina okolenge so bičhalgje amen. Vaker amenge baši tute“. 23 Ov odgovoringja lenge: „Me sium adava so vikinela glasno ki pustina: ’Spreminen e Jehovaske* o drumo‘, baš sar so vakergja o proroko o Isaija“. 24 A adala manuša sine bičhalde taro fariseija. 25 Ola pučle le: „Soske tegani krstinea ako na sian ni o Hristos, ni o Ilija, ni o Proroko so valjani te avel?“ 26 O Jovan odgovoringja: „Me krstinava ko pani, a maškar tumende isi nekoj kole so tumen na pendžarena le. 27 Ov ka avel pali mande, a me na zaslužinava ni leskere sandale te phravav“. 28 Sa akava slučingja pe ki Vitanija, okoja strana taro Jordan kote so o Jovan krstinela sine.

29 Tajsutno dive dikhlja sar o Isus avela ki leste hem vakergja: „Ake tano e Devleskoro Bakhro* kova so cidela o grevo taro sveto. 30 Ov tano adava baši kaste so vakerava sine: ’Pali mande ka avel manuš kova soj angli mande, soske ov angleder mande postojnela sine‘. 31 Čak ni me na pendžarava le sine, ama adaleske aljum te krstinav panjea te šaj o Izrael te pendžarel koj tano ov“. 32 O Jovan isto agjaar svedočingja hem vakergja: „Dikhljum sar e Devleskiri sila* hulela taro nebo sar gulubi hem e Devleskiri sila ačhili upri leste. 33 Ni me na džanljum kaj ov tano adava, ama okova so bičhalgja man te krstinav ko pani vakergja mange: ’Upri kaste so ka dikhe sar hulela e Devleskiri sila* hem ačhola upri leste, ov tano adava so krstinela e Devleskere silaja‘. 34 Hem me dikhljum adava hem svedočingjum kaj ov tano e Devleskoro Čhavo“.

35 O tajsutno dive o Jovan palem tergjola sine ple duje učenikoncar, 36 hem keda dikhlja e Isuse sar nakhela, vakergja: „Ake tano o Bakhro* e Devleskoro“. 37 Hem keda o duj učenikija e Jovaneskere šungje sar vakerela adava, ola gele palo Isus. 38 Tegani o Isus irangja pe hem dikhlja kaj džana pali leste, hem pučlja len: „So mangena?“ A ola odgovoringje leske: „Rabi (so značinela „Učitele“), kote bešea?“ 39 Ov vakergja lenge: „Aven hem ka dikhen“. Agjaar ola gele lea hem dikhle kote bešela hem adava dive ačhile lea celo dive. A adava sine okolu štar o saati* paloručko. 40 Hem jekh taro adala duj kola so šungje so vakergja o Jovan hem počmingje te džan palo Isus, sine o Andrej o phral e Simon Petareskoro. 41 Palo adava ov odma gelo ko plo phral, ko Simon, hem vakergja leske: „Arakhlem e Mesija!“ (Ki grčko čhib tano „Hristos“.) 42 Hem ingargja le ko Isus, a o Isus dikhlja le hem vakergja leske: „Tu sian o Simon, o čhavo e Jovaneskoro. Tu ka vikine tut Kifa“. (Ki grčko čhib tano „Petar“.)

43 O tajsutno dive o Isus manglja te džal ki Galileja. Tegani arakhlja e Filipe hem vakergja leske: „Ov mlo učeniko“. 44 A o Filip sine tari Vitsaida, i diz kotar so avena sine o Andrej hem o Petar. 45 O Filip arakhlja e Natanaele hem vakergja leske: „Arakhlem okole kaske so pišingje o Mojsej ko Zakoni hem o Prorokija: o Isus e Josifeskoro čhavo taro Nazaret“. 46 Ama o Natanael vakergja leske: „Šaj li nešto šukar te ikljol taro Nazaret?“ O Filip vakergja leske: „Ava hem dikh“. 47 O Isus dikhlja sar o Natanael avela ki leste hem vakergja baši leste: „Ake pravo Izraelco kaste so nane hovajbe“. 48 A o Natanael pučlja le: „Kotar džanea man?“ O Isus odgovoringja leske: „Angleder o Filip te vikinel tut, me dikhljum tut keda sian sine teli smokva“. 49 A o Natanael vakergja leske: „Rabi,* tu sian e Devleskoro Čhavo, o Cari taro Izrael“. 50 Tegani o Isus vakergja leske: „Verujnea adaleske so vakergjum tuke kaj dikhljum tut teli smokva? Ka dikhe hem pobare bukja taro akala“. 51 Palo adava vakergja leske: „Čače vakerava tumenge, ka dikhen o nebo phravdo hem sar e Devleskere angelija hulena tele ko manušikano Čhavo hem džana upre ko nebo“.

2 A ko trito dive sine bijav ki Kana tari Galileja, hem e Isuseskiri daj sine adathe. 2 Isto agjaar ko bijav sine kanime o Isus hem leskere učenikija.

3 Keda ačhilo len but hari mol, e Isuseskiri daj vakergja leske: „Nane len više mol“. 4 A o Isus vakergja ple dajake: „Soske me hem tu te grižina amen bašo adava? Mlo vreme panda na alo“. 5 Tegani i daj leskiri vakergja okolenge so služinena sine: „Keren sa so ka vakerel tumenge“. 6 A adathe sine šov kjupija panjeske taro bar, te šaj te thoven pumare vasta angleder te han maro, sar so sine e Evreengoro običaj. Sekova kjupi šaj sine te khedel okolu 44 dži ko 66 litre. 7 O Isus vakergja lenge: „Pheren o kjupija panjea“. Hem ola phergje len dži upre. 8 Palo adava vakergja lenge: „Len hari adathar hem ingaren okoleske soj odgovorno bašo bijav“. Hem ola ingargje leske. 9 A keda okova so sine odgovorno bašo bijav probingja i mol koja so sine kerdi taro pani, bizo te džanel kotar tani i mol (a o sluge so angje leske te probinel, džanle), ov vikingja e džamutre 10 hem vakergja leske: „Sekova manuš ikalela prvo i šuži mol, a keda o manuša ka makjoven ikalela i mol so nane doborom šuži. A tu garavgjan i šuži mol sa dži akana“. 11 Agjaar o Isus kergja plo prvo čudo ki Kana tari Galileja hem adalea sikavgja pli mokj hem leskere učenikija verujngje ki leste.

12 Palo adava ov ple dajaja, ple phralencar hem ple učenikoncar gelo ko Kapernaum, ama ačhile adathe samo nekobor dive.

13 Keda alo paše o vreme te slavinel pe i Pasha* e Evreengiri, o Isus gelo ko Erusalim. 14 Keda alo ko hrami dikhlja okolen so bikinena sine guruven, bakhren hem guluben, hem okolen so meninena sine pare sar bešena adathe. 15 Tegani kergja kamšiko taro šele hem lea paldingja len zaedno e bakhrencar hem e guruvencar. Hem rasturingja o pare okolengere so meninena sine pare hem prevrtingja lengere astalija. 16 Hem vakergja okolenge so bikinena sine gulubija: „Ciden akala bukja akatar! Čhinaven te keren mle Dadeskoro kher pazari!“ 17 Keda o učenikija dikhle sa adava, setingje pe ko adava soj pišimo: „O mangipe bašo tlo kher ka ovel sar jag so thabljola ko mlo vilo“.

18 Adaleske o Evreija vakergje leske: „Sikav amenge znako so ka dokažinel kaj isi tut pravo te kere akala bukja“. 19 A o Isus vakergja lenge: „Rušinen akava hrami hem me trine divenge palem ka gradinav le“. 20 Tegani o Evreija vakergje: „Akava hrami sine gradimo 46 berša, a tu ka gradine le trine divenge?“ 21 Ama keda vakergja bašo hrami ov mislingja bašo plo telo. 22 Keda voskresningja, leskere učenikija setingje pe ko akala lafija hem verujngje ko adava so pišinela ko sveta spisija hem ko adava so vakergja o Isus.

23 A keda sine ko Erusalim bašo prazniko i Pasha,* but džene verujngje ki leste keda dikhle o čudija so kerela len sine. 24 Ama e Isuse na sine le doverba ki lende, soske džanela len sine save tane 25 hem nikoj na valjani sine te vakerel leske nešto bašo manuš, soske ov džanela sine so isi e manuše ko vilo.

3 Sine jekh manuš kova so vikinela pe sine Nikodim, ov sine farisei* hem jekh taro e evreengere poglavarija. 2 Ov alo ko Isus rakjate hem vakergja leske: „Rabi,* džanaja kaj sian učiteli kova soj bičhaldo taro Devel, soske nikoj našti te kerel asavke čudija sar so kerea tu ako nane lea o Devel“. 3 A o Isus vakergja leske: „Čače, čače vakerava tuke, ako nekoj na bijangjovela palem* našti te dikhel e Devleskoro Carstvo“. 4 A o Nikodim pučlja le: „Sar šaj jekh phuro manuš te bijangjovel palem? Nikoj našti te iranel pe ple dajake ko vogi hem te bijangjovel, neli?“ 5 O Isus odgovoringja leske: „Čače, čače vakerava tuke, ako nekoj na bijangjovela taro pani hem tari e Devleskiri sila,* našti te khuvel ko e Devleskoro Carstvo. 6 Okova soj bijamo taro telo, ov tano manušikano čhavo, a okova soj bijamo tari e Devleskiri sila, ov tano e Devleskoro čhavo. 7 Ma te čudinel tut adava so vakergjum tuke: ’Mora te bijangjoven palem‘. 8 I bavlal phudela kote so mangela, tu šunea lakoro zvuko ama na džanea kotar avela hem kote džala. Agjaar ovela sekasaja kova so bijangjovela tari e Devleskiri sila“.

9 Tegani o Nikodim pučlja le: „Sar šaj adava te ovel?“ 10 A o Isus vakergja leske: „Tu sian učiteli ko Izrael, a na džanea bašo akala bukja? 11 Čače, čače vakerava tuke, vakeraja adava so džanaja, hem svedočinaja bašo adava so dikhaja, ama tumen na primingjen o svedoštvo so dengjem amen. 12 Ako na verujnena keda vakerava tumenge bašo bukja soj tane ki phuv, tegani sar ka verujnen ako vakerava tumenge bašo bukja soj tane ko nebo? 13 Nijekh manuš na uklilo upre ko nebo, osven o manušikano Čhavo kova so hulilo taro nebo. 14 Isto sar ki pustina o Mojsej so vazdingja ko kaš e sape, agjaar mora te ovel vazdimo o manušikano Čhavo, 15 te šaj sekoj so verujnela ki leste te dobinel večno životo.

16 Soske, o Devel doborom but manglja e sveto so dengja ple edinstveno bijame Čhave, te šaj sekoj so ka verujnel ki leste te na ovel uništimo, nego večno te živinel. 17 Soske, o Devel na bičhalgja ple Čhave te šaj ov te sudinel e svetoske, nego o sveto te ovel spasimo preku leste. 18 Koj verujnela ki leste nane te ovel osudimo, a koj na verujnela, više tano osudimo, soske ov na verujngja ko e Devleskoro edinstveno bijamo Čhavo. 19 A i osuda anela pe sprema akava: i svetlina ali ko sveto, ama o manuša poviše mangle i temnica nego i svetlina, soske lengere postapke sine lošna. 20 Soske, okova so kerela lošnipe mrzinela i svetlina hem ov na avela ki svetlina, te šaj o postapke leskere te na oven otkrime. 21 Ama okova so kerela adava soj ispravno, ov avela ki svetlina, te šaj te dikhjol kaj adava so kerela tano sprema e Devleskiri volja“.

22 Palo adava, o Isus hem leskere učenikija gele ko gava tari Judeja, adathe ačhilo ple učenikoncar nekobor vreme hem krstinela sine e manušen. 23 Ama o Jovan da isto agjaar krstinela sine ko Enon paše uzo Salim, soske adathe sine but pani hem o manuša avena sine te krstinen pe. 24 Ko adava vreme o Jovan panda na sine čhivdo ko zatvor.

25 Tegani e Jovaneskere učenikija počmingje te rasprajnen pe jekhe Evreeja bašo adava sar šaj te ovel pe čisto anglo Devel. 26 Palo adava ale ko Jovan hem vakergje leske: „Rabi,* okova so sine tuja tari okoja strana taro Jordan, baši kaste so svedočinea sine, ake ov krstinela hem sarine džana ki leste“. 27 A o Jovan vakergja: „O manuš našti ništo te dobinel osven ako nane leske dendo taro nebo. 28 Tumen sien mange svedokija kaj vakergjum: ’Me na sium o Hristos,* nego sium bičhaldo angleder leste‘. 29 Kaskiri tani i bori ov tano o džamutro. A o amal e džamutreskoro, keda tergjovela hem šunela le, but tano radosno so šunela o glaso e džamutreskoro. Agjaar me da sium but radosno. 30 Leskere delija valjani te bajron, a mle delija valjani te oven sa potikne“.

31 Okova so avela upraldan ov tano upro sa o javera. Okova so avela tari phuv, ov tano tari phuv hem kerela lafi bašo bukja soj tane ki phuv. Okova so avela taro nebo, ov tano upro sa o javera. 32 Ov svedočingja bašo adava so dikhlja hem šungja, ama nijekh manuš na prifatinela leskoro svedoštvo. 33 A koj prifatinela leskoro svedoštvo, ov potvrdinela kaj o Devel vakerela o čačipe. 34 Okole kaste so o Devel bičhalgja ov vakerela leskere lafija, soske o Devel nane cecija keda dela pli sila.* 35 O Dad mangela e Čhave hem sa dengja leske ko vasta. 36 Koj sikavela vera ko Čhavo, isi le večno životo, a koj na šunela e Čhave, nane te dikhel životo, nego e Devleskiri holi ačhola upri leste.

4 Keda o Gospodari o Isus doznajngja kaj o fariseija šungje kaj ov kerela poviše učenikija hem krstinela nego o Jovan - 2 iako o Isus lično na krstinela len sine nego leskere učenikija - 3 ov gelo peske tari Judeja hem palem gelo ki Galileja. 4 Ama mora sine te nakhel tari Samarija. 5 Hem alo ki diz tari Samarija koja so vikinela pe Sihar, paše uzi niva koja so o Jakov dengja la ple čhaveske e Josifeske. 6 Adathe sine e Jakoveskoro bunari. Adaleske so sine umorno taro drumo, o Isus bešlja uzo bunari. Sine okolu 12 o saati* diveskoro.

7 Tegani jekh Samarjanka ali te pherel pani. O Isus vakergja lake: „De man te pijav“. 8 A leskere učenikija gele ki diz te kinen hajbaske. 9 I Samarjanka pučlja e Isuse: „Sar šaj tu kova so sian Evrei, te rode pani tari džuvli Samarjanka?“ Soske, o Evreija na kerena sine lafi e Samarjanencar. 10 O Isus odgovoringja lake: „Keda bi džanea kova tano o poklon so dela le o Devel hem koj tano adava so vakerela tuke: ’De man te pijav‘, tu ka rode lestar hem ov ka del tut o pani so dela životo“. 11 A oj vakergja leske: „Gospodine, tut nane tut ni solea te phere pani, a o bunari tano hor. Tegani kotar tuke adava pani so dela životo? 12 Te na sian tu pobaro taro amaro parapapo o Jakov, kova so dengja amen akava bunari, kolestar so zaedno ple čhavencar hem ple stokaja piela sine?“ 13 O Isus odgovoringja lake: „Sekoj so piela taro akava pani palem ka ovel žedno. 14 Ama koj piela taro pani so ka dav le me, nikogaš nane te ovel žedno, nego o pani so ka dav le me ka ovel ki leste sar izvor panjea kova so ka anel leske večno životo“. 15 A i Samarjanka vakergja leske: „Gospodine, de man taro adava pani te šaj te na ovav više žedno hem te na avav ko akava than te pherav pani“.

16 O Isus vakergja lake: „Dža, vikin tle rome hem ava akate“. 17 I Samarjanka vakergja leske: „Nane man rom“. Tegani o Isus vakergja lake: „Točno vakerea kaj nane tut rom. 18 Soske tut sine tut pandž roma. A o manuš kolea so živinea akana, nane to rom. Tu vakergjan adava soj čače“. 19 I Samarjanka vakergja leske: „Gospodine, dikhava kaj tu sian proroko. 20 Amare parapapija obožavinena sine e Devle ki akaja planina, ama tumen vakerena kaj o Erusalim tano o than kote so o manuša valjani te obožavinen e Devle“. 21 A o Isus vakergja lake: „Čače vakerava tuke, ka avel vreme keda ni ki akaja planina, a ni ko Erusalim nane te obožavinen e Devle. 22 Tumen obožavinena adava so na džanena, a amen obožavinaja adava so džanaja, soske o spasenie avela taro Evreija. 23 Ama ka avel vreme, hem više alo, keda okola so čače obožavinena e Devle* ka obožavinen le vodime tari e Devleskiri sila* hem čačipaja, soske o Devel* rodela asavke manuša te obožavinen le. 24 O Devel tano Duho, hem okola so obožavinena le mora te obožavinen le vodime tari e Devleskiri sila* hem čačipaja“. 25 Tegani i Samarjanka vakergja leske: „Džanava kaj o Mesija avela, kole so vikinena le Hristos.* Keda ka avel ov, ka objasninel amenge sa o bukja“. 26 A o Isus vakergja lake: „Me sium adava, kasaja so kerea lafi“.

27 Tegani resle leskere učenikija hem sine iznenadime keda dikhle kaj ov kerela lafi jekhe džuvljaja. Ama nikoj na pučlja le: „So rodea latar?“ ili „Soske kerea laja lafi?“ 28 Agjaar i Samarjanka mukhlja o khoro panjea, geli ki diz, hem vakergja e manušenge: 29 „Aven hem dikhen e manuše kova so vakergja mange sa so kergjum. Te nane ov o Hristos?“ 30 O manuša iklile tari diz hem gele ki leste.

31 Angleder te aven o manuša, o učenikija vakerena sine leske: „Rabi,* ha maro“. 32 Ama ov vakergja lenge: „Man isi man hajbe koleske so tumen na džanena“. 33 Adaleske o učenikija počmingje te pučen pe jekh jekhea: „Nekoj te na angja leske nešto te hal?“ 34 O Isus vakergja lenge: „Mlo hajbe tano te kerav i volja okoleskiri so bičhalgja man hem te završinav i buti so dengja la mange. 35 Na vakerena li kaj panda štar masek pa ka avel o vreme te khedel pe i žetva? Ake, vakerava tumenge: vazden tumare jakhja hem dikhen o nive, ola tane resle hem spremna baši žetva. 36 Okova so khedela i žetva više primingja i plata hem khedingja o plodi bašo večno životo, te šaj hem okova so sejngja hem okova so khedingja zaedno te radujnen pe. 37 Adaleske čače tano adava so vakerena: ’Jekh sejnela, a o javer khedela‘. 38 Me bičhalgjum tumen te kheden adava bašo kova so na trudingjen tumen. Javera trudingje pe, a tumen isi tumen korist taro lengoro trudo“.

39 But Samarjanja tari adaja diz verujngje ki leste adaleske so i Samarjanka svedočingja, hem vakergja: „Ov vakergja mange sa so kergjum“. 40 Adaleske keda o Samarjanja ale ki leste, molingje le te ačhol adathe, hem ov ačhilo lencar duj dive. 41 Hem agjaar, but javera verujngje keda šungje adava so vakerela sine, 42 hem ola vakergje e Samarjankake: „Akana na verujnaja samo bašo adava so tu vakergjan, nego amen korkori šungjem le, hem džanaja kaj akava manuš tano čače o spasiteli e svetoskoro“.

43 Palo duj dive, adathar gelo ki Galileja. 44 O Isus korkori vakergja kaj o proroko nane te ovel poštujmo ki pli diz. 45 Keda reslja ki Galileja, o Galilejcija dodžakergje le šukar, soske dikhle sa o bukja so kergja len ko Erusalim praznikoske, soske ola da sine adathe.

46 Hem palem alo ki Kana ki Galileja, kote so taro pani kergja mol. Adathe sine jekh službeniko e careskoro hem leskoro čhavo sine but nasvalo ko Kapernaum. 47 Keda ov šungja kaj o Isus alo tari Judeja ki Galileja, gelo ki leste hem rodingja lestar te avel ko Kapernaum hem te sasljarel leskere čhave, kova so sine meribaja jekh. 48 Ama o Isus vakergja leske: „Džikote na dikhena znakija hem čudija tumen nikogaš nane te verujnen“. 49 O službeniko e careskoro vakergja leske: „Gospodare, ava angleder te merel mo čhavo“. 50 A o Isus vakergja leske: „Dža tuke, tlo čhavo sastilo“. O manuš verujngja ko adava so vakergja leske o Isus, hem gelo peske. 51 Panda džikote sine ko drumo, leskere robija ale ki leste hem vakergje leske kaj leskoro čhavo sastilo. 52 Tegani ov pučlja len ko kobor o saati sastilo. Ola vakergje: „Erati okolu jekh o saati* diveskoro čhinavgja lestar i bari temperatura“.* 53 Tegani o dad džanlja kaj adava sine baš ko adava saati keda o Isus vakergja leske: „Tlo čhavo sastilo“. Hem agjaar ov hem leskoro celo kher verujngje ko Isus. 54 Akava sine o dujto čudo so kergja o Isus keda alo tari Judeja ki Galileja.

5 Palo adava sine evrejsko prazniko hem o Isus gelo ko Erusalim. 2 A ko Erusalim kaj e Bakhrengiri Porta isi jekh bazenti kova so ki hebrejsko čhib vikinela pe Vitezda. Okolu o bazenti isi pandž učharde terase. 3 Ki lende pašljovena sine but nasvale, korole, sakatija hem okola so sine paralizirime.* 4* -- 5 Ama adathe sine jekh manuš kova so sine nasvalo 38 berša. 6 Keda o Isus dikhlja adale manuše sar pašljola adathe, a džanela sine kobor but vreme sine nasvalo, pučlja le: „Mangea li te sasljove?“ 7 O nasvalo manuš vakergja leske: „Gospodine, nane koj te čhivel man andre keda o pani mrdinela, džikote me te khuvav javer khuvela angli mande“. 8 A o Isus vakergja leske: „Ušti, le tli nosilka hem phir!“ 9 Hem o manuš odma sastilo, lelja pli nosilka hem počmingja te phirel.

A adava dive sine sabat.* 10 Adaleske o Evreija vakerena sine e manušeske so sastilo: „Avdive tano sabat hem nane dozvolimo te phirave i nosilka“. 11 Ama ov odgovoringja lenge: „O manuš so sasljargja man vakergja mange: ’Le tli nosilka hem phir‘“. 12 A ola pučle le: „Koj tano adava manuš so vakergja tuke te le tli nosilka hem te phire?“ 13 Ama o manuš na džanela sine koj tano adava so sasljargja le, soske o Isus cidingja pe adathar adaleske so sine gužva.

14 Palo adava, o Isus arakhlja e manuše ko hrami hem vakergja leske: „Ake sastiljan. Ma grešin više te šaj te na slučinel pe tuke nešto pološno“. 15 Tegani o manuš gelo peske hem vakergja e Evreenge kaj o Isus sine adava so sasljargja le. 16 Adaleske so o Isus kerela sine asavke bukja ko sabat, o Evreija počmingje te protivinen pe leske. 17 A o Isus odgovoringja lenge: „Mo Dad kerela buti sa dži akana hem me da kerava buti“. 18 Adaleske o Evreija panda poviše rodena sine prilika te mudaren le, soske na samo so phagela sine o sabat, nego hem vakerela sine kaj o Devel tano leskoro Dad, hem agjaar kerela pe jekh e Devlea.

19 Adaleske o Isus vakergja lenge: „Čače, čače vakerava tumenge, o Čhavo našti ništo te kerel korkori pestar, nego kerela samo adava so dikhela kaj o Dad kerela. Soske, bilo so te kerel o Dad, adava kerela o Čhavo da ko isto način. 20 Soske, o Dad mangela e Čhave hem sa so kerela ov sikavela e Čhaveske. Ka sikavel leske panda pobare bukja taro akala, te šaj tumen te oven vooduševime. 21 Isto sar o Dad so vazdela e mulen hem dela len životo, agjaar o Čhavo da dela životo kaske so mangela. 22 Soske, o Dad na sudinela nikaske, nego bašo sa dengja o Čhavo te sudinel. 23 Te šaj sarine te poštujnen e Čhave sar so poštujnena e Dade. Koj na poštujnela e Čhave, na poštujnela ni e Dade kova so bičhalgja e Čhave. 24 Čače, čače vakerava tumenge, koj šunela mlo lafi hem verujnela okoleske so bičhalgja man, isi le večno životo hem leske nane te sudinel pe, nego ov alo taro meribe ko životo.

25 Čače, čače vakerava tumenge, ka avel o vreme, hem više alo, keda o mule ka šunen o glaso e Devleskere Čhaveskoro, hem okola so ka oven leske poslušna, ka živinen. 26 Soske, sar e Dade so isi le mokj te del životo, agjaar dengja e Čhaveske da mokj te del životo. 27 Hem dengja le avtoriteti te sudinel, soske ov tano o manušikano Čhavo. 28 Ma čudinen tumen bašo akava, soske avela vreme keda sarine okola soj tane ko grobo ka šunen e Devleskere Čhaveskoro glaso 29 hem ka ikljon, okola so kergje šukaripe, bašo voskresenie živibaske, a okola so kergje lošnipe, bašo voskresenie sudibaske. 30 Me našti te kerav ni jekh buti korkori mandar. Sudinava agjaar sar so šunava, hem me pravedno sudinava, soske na mangava te kerav mli volja, nego i volja okoleskiri kova so bičhalgja man.

31 Ako me korkori vakerava e manušenge baši mande, ola nane te verujnen ko adava so vakerava. 32 Isi nekoj javer kova so vakerela e manušenge baši mande, hem džanava kaj adava so vakerela baši mande tano o čačipe. 33 Tumen bičhalgjen manušen ko Jovan hem ov vakergja o čačipe baši mande. 34 Iako nane man potreba nekoj javer te vakerel e manušenge baši mande, ama me vakerava akala bukja te šaj tumen te dobinen životo. 35 O Jovan sine sar lampa koja so thabljola hem svetinela, a tumen manglen samo hari vreme te radujnen tumen ki leskiri svetlina. 36 O Jovan vakergja e manušenge kaj o Dad bičhalgja man. Ama man isi man pobaro dokaz kaj o Dad bičhalgja man. Adava dokaz tano so kerava sa adava so o Dad dengja man te kerav. 37 Isto agjaar, o Dad da vakergja kaj ov bičhalgja man. Tumen nikogaš ni šungjen leskoro glaso, ni dikhlen leskoro liko 38 hem leskoro lafi na ačhilo tumenge ko vile, soske na verujnena ko okova kaste so ov bičhalgja.

39 Tumen istražinena o sveta spisija, soske mislinena kaj preku lende ka dobinen večno životo, a baš ola svedočinena baši mande. 40 Ama tumen na mangena te aven ki mande te šaj te dobinen životo. 41 Me na mangava o manuša te falinen man,* 42 nego šukar džanava kaj tumen nane tumen mangipe sprema o Devel. 43 Me aljum mle Dadeske ko anav, ama tumen na primingjen man. A ako nekoj avela ko plo anav, le ka priminen le. 44 Sar šaj te verujnen keda tumen prifatinena falba* taro javera manuša, a na rodena te oven prifatime* taro edinstveno Devel? 45 Ma mislinen kaj me ka vakerav anglo mlo Dad kaj sien kriva. Isi koj te vakerel kaj sien kriva, o Mojsej, kaste so isi tumen doverba. 46 Soske ako verujngjen ko Mojsej, ka verujnen ki mande da, soske ov pišingja baši mange. 47 Ama ako na verujnena ko adava so ov pišingja, tegani sar ka verujnen ko adava so me vakerava?“

6 Palo adava o Isus gelo tari okoja strana taro Galilejsko, ili o Tiverijadsko More. 2 Pali leste džana sine but manuša, soske dikhle o čudija so kergja keda sasljargja e nasvalen. 3 Adaleske o Isus uklilo ki planina hem adathe bešlja ple učenikoncar. 4 A paše sine i Pasha,* o prazniko e Evreengoro. 5 Keda o Isus dikhlja kaj but manuša avena ki leste, pučlja e Filipe: „Kote te kina maro te šaj te han akala manuša?“ 6 Iako o Isus džanlja so ka kerel, ov pučlja adava te šaj te dikhel so mislinela o Filip. 7 A o Filip vakergja leske: „Čak hem te kina maro bašo 200 denarija,* palem nane te ovel dovolno te šaj sarine te han barem hari“. 8 Jekh taro leskere učenikija o Andrej, o phral e Simon Petareskoro, vakergja leske: 9 „Ake akate isi jekh tikno čhavo, le isi le pandž mare taro jačmen hem duj tikne mačhe. Ama sar šaj adava te ovel dovolno doborom bute manušenge?“

10 Tegani o Isus vakergja: „Vakeren e manušenge te bešen!“ A ko adava than sine but čar. Hem o manuša bešle, a maškar lende sine okolu 5.000 murša. 11 Palo adava o Isus lelja o mare, zablagodaringja pe e Devleske hem dengja sa okolenge so bešena sine adathe. Isto agjaar kergja e mačhencar da, hem sine len te han kobor so mangle. 12 Keda čalile, ov vakergja ple učenikonge: „Kheden adava so ačhilo, te šaj ništo ma te džal zijani“. 13 Keda khedingje adava so ačhilo taro pandž mare taro jačmen so hale o manuša, phergje 12 korpe.

14 Keda o manuša dikhle o čudo so kergja, vakergje: „Akava sigurno tano o Proroko kova so valjani sine te avel ko sveto“. 15 Tegani o Isus, adaleske so džanlja kaj mangena te aven, te astaren le hem te keren le cari, palem cidingja pe ki planina te ovel korkori.

16 Keda rakjilo, leskere učenikija hulile dži ko more, 17 uklile ko čamco hem cidingje te džan ko Kapernaum. Više sine temnica, a o Isus panda na alo ki lende. 18 Ko more počmingje te oven bare branija, soske počmingja te phudel bari bavlal. 19 Otkeda e čamcoja gele okolu pandž ili šov kilometrija,* dikhle e Isuse sar phirela upro more hem avela sine uzo čamco hem but darandile. 20 Ama o Isus vakergja lenge: „Ma daran, me sium!“ 21 Ola radujngje pe hem lele le pea ko čamco, hem odma e čamcoja resle ko than kote so mangle te džan.

22 O tajsutno dive, o narodo kova so tergjola sine tari javer strana taro more, dikhlja kaj adathe isi samo jekh tikno čamco hem kaj o Isus na khuvgja ko čamco ple učenikoncar, nego o učenikija gele peske korkori. 23 A o čamcija tari Tiverijada, resle paše dži ko than kote so hale maro otkeda o Gospodari zablagodaringja pe e Devleske. 24 Keda o manuša dikhle kaj adathe na sine ni o Isus ni leskere učenikija, ola khuvgje ko čamcija hem gele ko Kapernaum te roden e Isuse.

25 Keda arakhle le tari okoja strana taro more, ola pučle le: „Rabi,* keda aljan akate?“ 26 O Isus odgovoringja lenge: „Čače, čače vakerava tumenge, tumen na rodena man adaleske so dikhlen o čudija, nego rodena man adaleske so halen taro mare hem čalilen. 27 Ma keren buti bašo hajbe kova so rumingjovela, nego bašo hajbe so na rumingjovela, hem anela večno životo, kova so ka del tumen o manušikano Čhavo, soske leskoro Dad, o Devel, dengja le vlast te kerel adava“.

28 Tegani pučle le: „So rodela o Devel amendar te kera?“ 29 O Isus odgovoringja lenge: „O Devel rodela tumendar te verujnen ko okova kaste so ov bičhalgja“. 30 Tegani ola pučle le: „Savo čudo kerea te šaj amen te dikha hem te verujna ki tute? Soj adava so ka kere? 31 Amare parapapija hana sine mana ki pustina, sar soj pišimo: ’Dengja len maro taro nebo te han‘“. 32 O Isus vakergja lenge: „Čače, čače vakerava tumenge, o Mojsej na dengja tumen o maro taro nebo, nego mo Dad dela tumen o čačutno maro taro nebo. 33 Soske, e Devleskoro maro tano okova kova so hulela taro nebo hem dela životo e manušenge“.* 34 Tegani ola vakergje leske: „Gospodare, de amen sekogaš adava maro“.

35 O Isus vakergja: „Me sium o maro so dela životo. Okova so ka avel ki mande nane nikogaš te ovel bokhalo, hem okova so ka sikavel vera ki mande nane nikogaš te ovel žedno. 36 Ama vakergjum tumenge, tumen dikhlen man, ama sepak na verujngjen. 37 Sa okolen so o Devel dela len mange, ka aven ki mande hem nikogaš nane te paldav okolen so ka aven ki mande, 38 soske me na huliljum taro nebo te kerav mli volja, nego te kerav i volja adaleskiri so bičhalgja man. 39 A i volja okoleskiri so bičhalgja man, tani te na našavav nijekhe taro okola so dengja len mange, nego te voskresninav len ko posledno dive. 40 Soske, i volja mle Dadeskiri tani akaja: sekoj so prifatinela e Čhave hem sikavela vera ki leste, te ovel le večno životo, hem me ka voskresninav le ko posledno dive“.

41 Tegani o Evreija počmingje te keren lafi protiv leste soske vakergja: „Me sium o maro so hulilo taro nebo“. 42 Hem vakerena sine: „Nane li akava o Isus, o čhavo e Josifeskoro? Amen džanaja leskere dade hem daja. Sar akana vakerela: ’Huliljum taro nebo‘?“ 43 A o Isus vakergja: „Čhinaven maškar tumende te keren lafi protiv mande! 44 Nikoj našti te avel ki mande, osven ako na anela le mlo Dad, kova so bičhalgja man. Hem me ka voskresninav le ko posledno dive. 45 O Prorokija pišingje: ’Sarine ka oven sikavde taro Jehova‘.* Sekoj so šunela e Dade hem sikljola lestar, avela ki mande. 46 Adava na značinela kaj nekoj dikhlja e Dade, osven okova so avela taro Devel, ov dikhlja e Dade. 47 Čače, čače vakerava tumenge, okova so verujnela ka ovel le večno životo.

48 Me sium o maro so dela životo. 49 Tumare parapapija hale mana ki pustina ama palem mule. 50 Akava tano o maro so hulela taro nebo te šaj sekova jekh so ka hal lestar te na merel. 51 Me sium o maro so dela životo kova so hulilo taro nebo. Ako nekoj hala taro akava maro, ka živinel večno. Ustvari o maro so ka dav le me tano mlo telo, kova so ka dav le te šaj o manuša te živinen“.

52 Tegani o Evreija počmingje te rasprajnen pe maškar peste: „Sar šaj akava manuš te del amen te ha leskoro telo?“ 53 Adaleske o Isus vakergja lenge: „Čače vakerava tumenge, ako na hana o telo e manušikane Čhaveskoro hem na piena leskoro rat, nane te dobinen životo.* 54 Koj hraninela pe mle teloja hem koj piela mlo rat, ka dobinel večno životo hem me ka voskresninav le ko posledno dive, 55 soske mlo telo tano čačutni hrana hem mlo rat tano čačutno pijaloko. 56 Koj hraninela pe mle teloja hem piela mlo rat, ačhola ko jekhipe mancar hem me ačhovava ko jekhipe lea. 57 Sar so o dživdo Dad bičhalgja man hem me živinava sebepi e Dadeskoro, agjaar okova so hraninela pe mle teloja ka živinel mlo sebepi. 58 Akava tano o maro so hulilo taro nebo. Ov nane sar o maro so hale tumare parapapija, hem palem mule. Koj ka hal akava maro ka živinel večno“. 59 Akava vakergja džikote sikavela sine e manušen ki sinagoga* ko Kapernaum.

60 Keda šungje akava, but taro leskere učenikija vakergje: „Akala lafija tane phare! Koj šaj te šunel len?“ 61 A o Isus džanlja kaj leskere učenikija počmingje te buninen pe bašo adava so vakergja, hem vakergja lenge: „Zarem akava kerela te peren tari vera? 62 A so ako dikhena sar o manušikano Čhavo uklela upre adari kote so sine angleder? 63 E Devleskiri sila* tani adaja so dela životo, o telo nane korisno bašo ništo. O lafija so vakergjum tumenge tane tari e Devleskiri sila hem dena životo. 64 Ama isi nesave tumendar so na verujnena“. Soske, o Isus džanlja taro početok koj tane adala so na verujnena hem koj tano adava so ka izdajnel le. 65 Hem vakergja lenge: „Adaleske vakergjum tumenge: ’Nikoj našti te avel ki mande ako o Dad na mangela te anel le‘“.

66 Sebepi akava, but taro leskere učenikija irangje pe ko bukja so mukhle len, hem čhinavgje te džan pali leste. 67 Adaleske o Isus pučlja ple dešuduje apostolen: „Te na mangena tumen da te džan?“ 68 A o Simon Petar odgovoringja leske: „Gospodare, kaste te dža? Ki tute tane o lafija bašo večno životo! 69 Amen verujngjem hem džanaja kaj tu sian o Sveto sluga e Devleskoro“. 70 Tegani o Isus vakergja lenge: „Me biringjum tumen e dešudujen, neli? Sepak, jekh tumendar tano klevetniko“.* 71 O Isus kerela sine lafi bašo Juda Iskariot, o čhavo e Simoneskoro, kova so sine le namera te predajnel le, iako sine jekh taro 12 apostolija.

7 Palo adava o Isus patujnela sine ki Galileja. Ov na mangela sine te džal ki Judeja, soske o Evreija rodena sine prilika te mudaren le. 2 Ama, paše sine o evrejsko Prazniko e senicengoro.* 3 Tegani leskere phralja vakergje leske: „Dža ki Judeja, te šaj tle učenikija soj adari isto agjaar te dikhen o bukja so kerea. 4 Soske, koj mangela o manuša te pendžaren le, na kerela ništo tajno. Ako kerea akala bukja, ker len te šaj sarine te dikhen“.* 5 Ustvari, leskere phralja na verujnena sine ki leste. 6 Adaleske o Isus vakergja lenge: „Mlo vreme panda na alo, a tumen šaj te džan ko prazniko keda mangena. 7 E sveto nane le pričina te mrzinel tumen, ama man mrzinela man, soske me vakerava bašo leskere lošna postapke. 8 Tumen džan ko prazniko, a me akana nane te džav, soske mlo vreme panda na alo“. 9 Hem otkeda vakergja lenge akala bukja, ačhilo ki Galileja.

10 Ama keda leskere phralja gele ko prazniko, ov da gelo, ama nikoj na džanlja bašo adava. 11 A o Evreija počmingje te roden le ko prazniko hem vakerena sine: „Kaj tano adava manuš?“ 12 A but manuša garavindor kerena sine lafi baši leste. Nesave vakerena sine: „Ov tano šukar manuš“. A javera vakerena sine: „Na nane, ov hovavela e manušen“. 13 Ama nikoj na mangela sine te kerel javno lafi baši leste soske darana sine taro Evreija.

14 Keda nakhle okolu štar dive sar počmingja o prazniko, o Isus gelo ko hrami hem počmingja te sikavel e manušen. 15 A o Evreija čudinena pe sine hem vakerena sine: „Sar šaj akava manuš te pendžarel doborom šukar o spisija keda na učingja ko škole?“ 16 A o Isus odgovoringja lenge: „Adava so sikavava nane mandar, nego avela taro okova so bičhalgja man. 17 Ako nekoj mangela te kerel leskiri volja, ka džanel dali adava so sikavava tano taro Devel ili me kerava korkori mandar lafi. 18 Koj kerela lafi korkori pestar rodela ov te ovel falimo, a koj rodela te ovel falimo okova so bičhalgja le, ov vakerela o čačipe hem sa so kerela tano ispravno. 19 O Mojsej dengja tumen o Zakoni, ama nikoj tumendar na ikerela pe ko Zakoni. Soske mangena te mudaren man?“ 20 O narodo vakergja leske: „Tut isi tut demoni. Koj mangela te mudarel tut?“ 21 Tegani o Isus vakergja lenge: „Samo jekh čudo kergjum hem sarine iznenadingjen tumen. 22 Adaleske razmislinen bašo akava: o Mojsej dengja tumen o zakoni bašo suneti - ama, adava nane taro e Mojseeskoro vreme, nego taro vreme tumare parapapongoro - a tumen kerena e čhaven suneti čak ko sabat. 23 Ako tumen kerena suneti ko sabat hem adalea na phagena e Mojseeskoro zakoni, soske tegani sien mange but holjame adaleske so sasljargjum manuše ko sabat?* 24 Ma sudinen sprema adava so dikhjola pe avrijaldan, nego sudinen pravedno!“

25 Tegani nesave taro adala so živinena sine ko Erusalim vakergje: „Nane li akava o manuš so mangena te mudaren le? 26 Hem ake, ov slobodno kerela lafi, hem nikoj na vakerela leske ništo. Te na halile amare vodačija kaj ov čače tano o Hristos?* 27 Ama bašo akava manuš, amen džanaja kotar tano, a keda ka avel o Hristos, nikoj nane te džanel kotar tano“. 28 Tegani džikote sikavela sine e manušen ko hrami, o Isus glasno vakergja: „Tumen džanena man hem džanena kotar avava. Ama me na aljum korkori mandar, nego čače postojnela okova kova so bičhalgja man, hem tumen na pendžarena le. 29 Ama me pendžarava le, soske aljum leske ko anav, hem ov bičhalgja man“. 30 Ottegani ola rodena sine prilika te astaren le, ama nikoj na vazdela sine vas upri leste, soske leskoro vreme panda na alo. 31 A but manuša verujngje ki leste, hem vakerena sine: „Keda ka avel o Hristos, zarem ka kerel poviše čudija taro adava so kergja akava manuš?“

32 A o fariseija* šungje kaj o narodo garavindor kerela lafi baši leste, adaleske o glavna sveštenikija hem o fariseija bičhalgje stražarija te astaren e Isuse. 33 Tegani o Isus vakergja: „Panda hari ka ovav tumencar, džikote na džava ko okova kova so bičhalgja man. 34 Ka roden man, ama nane te arakhen man, hem kaj so sium me, tumen našti te aven“. 35 Tegani o Evreija vakergje maškar peste: „Kote mangela te džal akava manuš, so amen našti te arakha le? Te na mangela te džal ko Evreija kola so živinena maškar o Grkija, pa te sikavel e Grkon? 36 So značinela adava so vakergja: ’Ka roden man, ama nane te arakhen man, hem kaj so sium me, tumen našti te aven‘?“

37 A ko posledno hem najbaro dive taro prazniko, o Isus uštilo hem glasno vakergja: „Koj tano žedno, neka avel ki mande hem me ka dav le te piel pani! 38 Koj verujnela ki mande ka ovel sar so vakerena o sveta spisija: ’Hor taro leskoro vilo ka thavdel reka panjea so dela životo‘“. 39 A o Isus vakergja akava baši e Devleskiri sila* koja so valjani sine te dobinen la okola so verujngje ki leste. Ama tegani, ola panda na dobingje adaja sila, soske o Isus panda na gelo upre ko nebo. 40 Nesave taro narodo keda šungje akala lafija vakergje: „Akava čače tano o Proroko so valjani te avel“. 41 Nesave vakergje: „Akava tano o Hristos“. A javera vakergje: „Zarem o Hristos ka avel tari Galileja? 42 Na vakerena li o sveta spisija kaj o Hristos valjani te avel taro David, hem adava taro Vitleem, o gav kotar so sine o David?“ 43 Agjaar o narodo delingja pe soske sine len različno mislenje baši leste. 44 Nesave lendar čak mangle te astaren le, ama nikoj na vazdingja vas upri leste.

45 Tegani o stražarija irangje pe ko glavna sveštenikija hem ko fariseija, a ola pučle len: „Soske na astargjen le hem na angjen le?“ 46 A o stražarija odgovoringje: „Nikoj nikogaš na kergja lafi agjaar“. 47 Tegani o fariseija vakergje: „Te na hovavgja o Isus tumen da? 48 Dali nekoj taro amare vodačija ili fariseija verujngja ki leste? 49 Ama akava narodo kova so na pendžarela o Zakoni tano dendo arman“. 50 A o Nikodim kova so sine jekh taro fariseija hem kova so angleder alo ko Isus, vakergja lenge: 51 „Na rodela li amaro Zakoni prvo te šuna e manuše hem te doznajna so kerela, a palo adava te sudina leske?“ 52 Tegani ola vakergje leske: „Te na sian tu da tari Galileja? Istražin, pa ka dikhe kaj nijekh proroko nane te avel tari Galileja“.*

8 12 Tegani o Isus palem vakergja lenge: „Me sium i svetlina e svetoskiri. Koj džala pali mande, nane te phirel ki temnica nego ka ovel le i svetlina so dela životo“. 13 A o fariseija* vakergje leske: „Tu korkori svedočinea baši tuke, adaleske amen našti te verujna ko adava so vakerea“. 14 O Isus odgovoringja lenge: „Čak me korkori te svedočinav baši mange, adava so vakerava tano čačipe, soske džanava kotar aljum hem kote džava. Ama tumen na džanena kotar aljum hem kote džava. 15 Tumen sudinena agjaar sar so sudinena o manuša, a me nikas na sudinava. 16 Čak hem te sudinav, mlo sudo tano pravedno soske me na sium korkori, o Dad kova so bičhalgja man tano mancar. 17 Isto agjaar ko tumaro zakoni pišinela: ’Ako duj džene svedočinena bašo nešto, tegani adava tano čače‘. 18 Me sium adava so svedočinava baši mange hem o Dad kova so bičhalgja man, ov da svedočinela baši mange“. 19 Tegani ola pučle le: „Kaj tano tlo Dad?“ O Isus odgovoringja lenge: „Tumen na pendžarena ni man ni me Dade. Te pendžaren sine man, ka pendžaren sine me Dade da“. 20 O Isus vakergja akala lafija džikote sine ko delo taro hrami kote so khedena pe sine o prilogija. Ama nikoj na astargja le soske leskoro vreme panda na alo.

21 Hem ov palem vakergja lenge: „Me džava mange hem tumen ka roden man, ama sepak ka meren sar grešnikija. Kote so džava me tumen našti te aven“. 22 Adaleske o Evreija vakergje: „Te na mudarel pe, soske vakerela: ’Adari kaj so džava me tumen našti te aven?‘“. 23 A ov vakergja lenge: „Tumen sien akatar tari phuv, a me sium upraldan. Tumen sien taro akava sveto, a me na sium taro akava sveto. 24 Adaleske vakergjum tumenge kaj ka meren sar grešnikija, soske ako na verujnena kaj me sium adava so valjani te avel, tumen ka meren sar grešnikija“. 25 Tegani ola pučle le: „Koj sian tu?“ O Isus odgovoringja lenge: „Soske mučinava man te kerav tumencar lafi keda tumen na haljovena? 26 Isi man but bukja so te vakerav baši tumenge hem but bukja te sudinav. Ustvari me vakerava e svetoske sa adava so šungjum taro okova so bičhalgja man, a ov vakerela o čačipe“. 27 Ama ola na halile kaj ov kerela lafi bašo plo Dad soj ko nebo. 28 Tegani o Isus vakergja: „Otkeda ka čhiven e manušikane Čhave ko stubo, tegani ka džanen kaj me sium adava so vakerava kaj sium, hem kaj na kerava ništo korkori mandar, nego vakerava o bukja so sikavgja man mo Dad. 29 Hem okova so bičhalgja man tano mancar. Na mukhlja man korkori, soske me sekogaš kerava adava soj sprema leskiri volja“. 30 Džikote vakerela sine akala bukja, but manuša verujngje ki leste.

31 Tegani o Isus vakergja e Evreenge so verujngje ki leste: „Ako ponadari da ikerena tumen ko adava so sikavava, čače sien mle učenikija, 32 hem ka džanen o čačipe hem o čačipe ka oslobodinel tumen“. 33 A ola vakergje leske: „Amen siem e Avraameskoro potomstvo hem nikogaš na siem sine robija nikaske. Tegani sar šaj vakerea: ’Ka oven oslobodime?‘“ 34 O Isus odgovoringja lenge: „Čače, čače vakerava tumenge, sekoj so kerela grevo, robo tano e grevoske. 35 O robo na ačhola ko kher zasekogaš, a o čhavo ačhola zasekogaš. 36 Znači, ako o Čhavo oslobodinela tumen, čače ka oven slobodna. 37 Džanava kaj sien e Avraameskoro potomstvo. Ama tumen mangena te mudaren man, soske na prifatinena adava so sikavava. 38 Me vakerava adava so dikhljum džikote sium sine me Dadea, a tumen kerena o bukja so šungjen len taro tumaro dad“. 39 Ola vakergje leske: „Amaro dad tano o Avraam“. A o Isus vakergja lenge: „Ako sien e Avraameskere čhave, tegani bi džana sine palo e Avraameskoro primer. 40 Ama akana tumen mangena te mudaren man, me o manuš kova so vakergjum tumenge o čačipe so šungjum le taro Devel. O Avraam na kerela sine agjaar. 41 Tumen postapinena sar tumaro dad“. A ola vakergje leske: „Amen na siem čhave bijame taro nemoral,* amaro Dad tano jekh, o Devel“.

42 Tegani o Isus vakergja lenge: „O Devel te ovel sine tumaro Dad ka mangen man sine, soske me aljum taro Devel hem akana sium akate. Na aljum korkori mandar, nego ov bičhalgja man. 43 Tumen na mangena te prifatinen adava so sikavava hem adaleske našti te haljoven mle lafija. 44 Tumaro dad tano o Beng hem mangena te postapinen sar so mangela tumaro dad. Ov panda taro početok, keda hovavgja bašo Devel, mudarela e manušen hem na ačhilo ko čačipe, soske ov na mangela o čačipe. Ov hovavela soske asavko tano ko vilo. Ov tano hovavno hem dad e hovajbaskoro. 45 A me vakerava tumenge o čačipe, hem adaleske na verujnena man. 46 Koj tumendar šaj te dokažinel kaj kerava grevo? Ako vakerava o čačipe, soske na verujnena man? 47 Okova soj tano taro Devel, šunela adava so vakerela o Devel. Adaleske tumen na šunena, soske na sien taro Devel“.

48 A o Evreija vakergje leske: „Na siem li ko pravo keda vakeraja kaj tu sian Samarjani hem kaj isi tut demoni?“ 49 A o Isus odgovoringja lenge: „Nane man demoni, nego me poštujnava me Dade, a tumen ponižinena man. 50 Ama me na rodava čest korkori mange, nego o Devel mangela te del pe mange čest hem ov tano adava so sudinela. 51 Čače, čače vakerava tumenge, ako nekoj ikerela pe ko adava so sikavava, nikogaš nane te dikhel o meribe“. 52 A o Evreija vakergje leske: „Akana džanaja kaj isi tut demoni. O Avraam mulo, hem isto agjaar o prorokija, a tu vakerea: ’Ako nekoj ikerela pe ko adava so sikavava nikogaš nane te merel‘. 53 Te na mislinea kaj sian pobaro taro amaro dad o Avraam, so mulo? O prorokija isto agjaar mule. So mislinea, koj sian tu?“ 54 O Isus odgovoringja lenge: „Ako korkori mange dava čest, mli čest nane te značinel ništo. Mo Dad, okova so tumen vakerena kaj tano tumaro Devel, ov dela man čest. 55 Ama tumen na pendžarena le. Me pendžarava le. Ako vakerava kaj na pendžarava le, tegani ka hovavav sar tumen so hovavena. Ama me pendžarava le hem šunava leskoro lafi. 56 Tumaro dad o Avraam sine but radosno baši nadež kaj ka dikhel o dive keda ka avav, hem dikhlja le hem radujngja pe“. 57 Tegani o Evreija vakergje leske: „Tut nane tut ni 50 berša, sar šaj te vakere kaj dikhljan e Avraame?“ 58 O Isus vakergja lenge: „Čače, čače vakerava tumenge, angleder o Avraam te bijangjovel, me postojnava sine“. 59 Tegani ola lele bara te frden upri leste, ama o Isus garavgja pe hem iklilo taro hrami.

9 Džikote phirela sine, o Isus dikhlja jekhe manuše kova so sine bijamo korolo. 2 Hem leskere učenikija pučle le: „Rabi,* koj grešingja pa so akava manuš bijandilo korolo, ov ili leskere roditelija?“ 3 A o Isus odgovoringja lenge: „Na grešingja ni ov, a ni leskere roditelija, ama akaja tani prilika preku leste o manuša te dikhen so šaj o Devel te kerel. 4 Džikote tano panda dive, mora te kera i volja* okoleskiri so bičhalgja man. Soske, avela i rat hem nikoj ka našti te kerel buti. 5 Džikote me sium ko sveto, me sium i svetlina e svetoskiri“. 6 Otkeda vakergja akava, čhungargja ki phuv hem e čhungarea kergja čik. Adale čikaja makhlja e manušeskere jakhja 7 hem vakergja leske: „Dža thov tle jakhja ko bazenti Siloam“. (Siloam značinela „bičhaldo“.) Ov gelo, thovgja ple jakhja, počmingja te dikhel hem irangja pe.

8 Tegani o komšie hem okola so angleder dikhena le sine kaj mangela peske, počmingje te pučen pe: „Nane li akava o manuš so bešela sine hem so mangela peske?“ 9 Nesave vakerena sine: „Ov tano“. A javera vakerena sine: „Na, nego ličinela lea“. A o manuš vakerela lenge sine: „Me sium adava“. 10 Tegani ola pučle le: „Sar počmingjan te dikhe?“ 11 Ov odgovoringja lenge: „O manuš so vikinela pe Isus kergja čik hem laja makhlja mle jakhja, hem vakergja mange: ’Dža ko Siloam hem thov tle jakhja‘. Tegani me geljum, thovgjum mle jakha hem počmingjum te dikhav“. 12 A ola pučle le: „Kaj tano adava manuš?“ Ov odgovoringja: „Na džanava“.

13 Palo adava, e manuše kova so angleder sine korolo, ingargje le ko fariseija. 14 A o dive keda o Isus kergja čik hem sasljargja e manuše,* sine sabat.* 15 Tegani, o fariseija isto agjaar pučle le sar počmingja te dikhel. A ov odgovoringja lenge: „Čhivgja čik ko mle jakhja, me thovgjum len hem počmingjum te dikhav“. 16 Adaleske nesave taro fariseija vakergje: „Adava manuš nane bičhaldo taro Devel soske na ikerela o sabat“. A javera vakerena sine: „Sar šaj jekh grešniko te kerel asavke čudija?“ Agjaar sine podelbe maškar lende. 17 Hem tegani palem pučle e manuše: „So mislinea bašo manuš so kergja te dikhe?“ A o manuš odgovoringja: „Ov tano proroko“.

18 Ama o Evreija na verujnena sine kaj o manuš sine korolo hem počmingja te dikhel, sa džikote na vikingje leskere roditelen. 19 Hem pučle len: „Dali akava tano tumaro čhavo kaske so tumen vakerena kaj bijandilo korolo? Sar akana dikhela?“ 20 Leskere roditelija odgovoringje: „Oja, ov tano amaro čhavo hem ov bijandilo korolo. 21 Ama sar počmingja te dikhel, adava na džanaja hem koj sasljargja le,* isto na džanaja. Pučen le, ov tano baro. Ov šaj korkori te kerel lafi“. 22 Leskere roditelija vakergje adava soske darana sine taro Evreija. Soske o Evreija dogovoringje pe te palden* tari sinagoga* sekas so ka vakerel kaj o Isus tano o Hristos. 23 Adaleske leskere roditelija vakergje: „Ov tano baro. Pučen le“.

24 Tegani dujto puti vikingje e manuše kova so sine korolo, hem vakergje leske: „Vaker o čačipe anglo Devel, amen džanaja kaj adava manuš tano grešniko“. 25 A ov odgovoringja: „Dali tano grešniko, na džanava. Ama jekh džanava, sium sine korolo, a akana dikhava“. 26 Tegani ola pučle le: „So kergja tuke? Sar kergja te dikhe?“ 27 A ov odgovoringja lenge: „Više vakergjum tumenge, ama tumen na šungjen man. Soske mangena palem te šunen? Te na mangena tumen da te oven leskere učenikija?“ 28 Tegani počmingje te vredžinen le hem te vakeren leske: „Tu sian učeniko adale manušeskoro, ama amen siem učenikija e Mojseeskere. 29 Džanaja kaj o Devel kergja lafi e Mojseea, ama adava manuš na džanaja kotar avela“. 30 A o manuš odgovoringja lenge: „Akava tano čudno, soske tumen vakerena kaj na džanena kotar avela, a ov kergja te dikhav. 31 Džanaja kaj o Devel na šunela e grešnikon, ama sekoj so darala lestar hem kerela leskiri volja, ov šunela le. 32 Nikogaš angleder na šundilo nekoj te kerel jekh manuš so sine bijamo korolo, te dikhel. 33 Ako adava manuš nane bičhaldo taro Devel tegani ov našti te kerel ništo“. 34 Tegani vakergje leske: „Tu sian pherdo grevija panda taro bijanibe, tu li amen ka sikave amen?“ Hem frdingje le avrijal.*

35 O Isus šungja kaj brkingje le hem keda arakhlja le pučlja le: „Verujnea li ko manušikano Čhavo?“* 36 A o manuš odgovoringja leske: „Molinava tut vaker mange koj tano te šaj te verujnav ki leste“. 37 O Isus vakergja leske: „Tu dikhljan le, ustvari kerea lea lafi“. 38 A o manuš vakergja: „Verujnava ki leste Gospodare“. Hem pokloningja pe leske. 39 Tegani o Isus vakergja: „Me aljum ko sveto te šaj te sudinel pe leske, te šaj okola so na dikhena, te dikhen, a okola so dikhena, te oven korole“. 40 A adava šungje nesave fariseija so sine adathe hem pučle le: „Te na mangea te vakere kaj amen da siem korole?“ 41 A o Isus vakergja lenge: „Te oven sine korole, nane sine te oven kriva bašo grevo. Ama adaleske so vakerena: ’Amen dikhaja‘, tumen ponadari da sien kriva bašo grevo“.

10 „Čače, čače vakerava tumenge, okova so na khuvela taro udara ko trlo* e bakhrengoro, nego rupinela i ograda, ov tano čor. 2 A okova so khuvela taro udara, ov tano o pastiri e bakhrengoro. 3 O čuvari leske phravela o udar hem o bakhre šunena leskoro glaso. Ov vikinela ple bakhren ko anav hem ikalela len avri taro trlo. 4 Keda ikalela sa ple bakhren avrijal, ov džala angli lende, hem o bakhre džana pali leste, soske pendžarena leskoro glaso. 5 Palo jabandžija nane te džan, nego ka našen lestar, soske ola na pendžarena o glaso e jabandžiengoro“. 6 O Isus vakergja lenge akaja sporedba, ama ola na halile so mangela sine te vakerel lenge.

7 Adaleske o Isus palem vakergja lenge: „Čače, čače vakerava tumenge, me sium o udar kotar so khuvena o bakhre. 8 Sa okola so angleder ale hem vakergje kaj ola tane o čačutne pastirija, tane čora, ama o bakhre na šungje len. 9 Me sium o udar. Hem koj ka khuvel preku mande ko trlo, ov ka ovel spasimo. Ka khuvel hem ka ikljol hem ka arakhel pole čarjaja. 10 O čor avela samo te čorel, te mudarel hem te uništinel. A me aljum te dav len životo hem adava večno životo. 11 Me sium o šukar pastiri, hem o šukar pastiri dela plo životo e bakhrenge. 12 Okova soj tano platimo samo te arakhel e bakhren, a nane lengoro pastiri hem o bakhre nane leskere, keda dikhela kaj avela o ruv, ov mukhela e bakhren hem našela. Tegani o ruv nesave bakhren astarela, a o javera bakhre našena. 13 Adaleske so kerela buti samo baši plata ov našela hem nane le gajle e bakhrenge. 14 Me sium o šukar pastiri hem pendžarava mle bakhren hem mle bakhre pendžarena man, 15 isto sar o Dad so pendžarela man hem sar me so pendžarava e Dade. Hem dava mlo životo e bakhrenge.

16 Isi man javera da bakhre, kola so nane taro akava trlo.* Len da mora te anav, hem ola ka šunen mlo glaso, pa sarine ka oven jekh stado, jekhe pastirea. 17 Adaleske o Dad mangela man, soske dava mlo životo te šaj te dobinav le palem. 18 Nikoj na lela mlo životo, nego me korkori dava le. Isi man pravo te dav le hem isi man pravo palem te dobinav le. Akaja zapoved dobingjum la taro mo Dad“.

19 Bašo akava so vakergja o Isus palem uli podelba maškar o Evreija. 20 But lendar vakerena sine: „Isi le demoni hem delindilo. Soske šunena le?“ 21 A o javera vakerena sine: „Akala lafija našti te vakerel manuš kova so isi le demoni. Šaj li o demoni te kerel o korole te dikhen?“

22 Ko adava vreme ko Erusalim sine o Prazniko e posvetibaske.* Sine even, 23 hem o Isus phirela sine ko hrami ko than so vikinela pe sine e Solomoneskiri učhardi terasa. 24 Tegani o Evreija opkolingje le hem počmingje te pučen le: „Soske na vakerea amenge koj sian tu? Ako sian o Hristos, vaker amenge otvoreno!“ 25 O Isus odgovoringja lenge: „Me vakergjum tumenge, ama tumen na verujnena. O bukja so kerava mle Dadeske ko anav, ola svedočinena baši mange. 26 Ama tumen na verujnena, soske tumen na sien mle bakhre. 27 Mle bakhre šunena mlo glaso, me pendžarava len hem ola džana pali mande. 28 Me dava len večno životo hem ola nikogaš nane te oven uništime, hem nikoj nane te lel len taro mle vasta. 29 Adava so dela man o Dad tano najvažno taro sa o javera bukja, hem nikoj našti te lel len taro e Dadeskere vasta. 30 Me hem o Dad siem jekh“.*

31 Akava da puti o Evreija lele bara te frden upri leste. 32 O Isus vakergja lenge: „Me sikavgjum tumenge but šukar delija taro mo Dad. Bašo kola taro adala delija frdena barencar upri mande?“ 33 O Evreija vakergje leske: „Amen na frdaja barencar upri tute bašo šukar delo, nego bašo adava so kerea lafi protiv o Devel, soske iako sian manuš, kerea tut devel“. 34 O Isus vakergja lenge: „Ko tumaro Zakoni o Devel vakergja: ’Me vakergjum: „Tumen sien devela“‘. 35 Ako o Devel vakergja tumen sien ’devela‘ okolenge kas so leskoro lafi osudingja - a nijekh manuš našti te ikalel adava soj pišimo ko sveta spisija - 36 o Dad odvojngja man te šaj te služinav leske hem bičhalgja man ko sveto, sar šaj tegani te vakeren mange kaj kerava lafi protiv o Devel adaleske so vakergjum: ’Me sium e Devleskoro Čhavo‘? 37 Ako na kerava adava so mangela mo Dad, tegani ma verujnen man. 38 Ama ako kerava, iako na verujnena man, verujnen ko delija so kerava len, te šaj te haljoven hem te verujnen kaj o Dad tano ko jekhipe mancar hem me sium ko jekhipe e Dadea“. 39 Tegani ola palem probingje te astaren le, ama ov našlja lendar.

40 Palo adava, ov gelo tari javer strana taro Jordan ko than kote so o Jovan ko početok krstinela sine, hem ačhilo adathe. 41 Hem but manuša ale ki leste hem vakergje: „O Jovan na kergja nijekh čudo, ama sa so vakergja bašo akava manuš sine čače“. 42 Hem but manuša taro adava than verujngje ki leste.

11 Jekh manuš so vikinela pe sine Lazar sine nasvalo. Ov sine tari Vitanija, o gav kotar so sine i Marija hem lakiri phen i Marta. 2 I Marija sine adaja koja so pokasno čhorgja upro Gospodari mirislivo maslo hem koslja leskere pre ple balencar. Lakoro phral o Lazar sine nasvalo. 3 Adaleske o phenja e Lazareskere bičhalgje haberi dži ko Isus: „Gospodare tlo manglo amal tano nasvalo“. 4 Keda o Isus šungja adava, vakergja: „Akava nasvalipe nane te anel meribe, nego ka anel slava e Devleske hem čest e Devleskere Čhaveske“.

5 O Isus mangela sine e Marta, lakere phenja hem e Lazare. 6 Ama, keda šungja kaj o Lazar tano nasvalo, ov ačhilo panda duj dive ko than kote so sine. 7 Palo adava vakergja ple učenikonge: „Ajde palem te dža ki Judeja“. 8 A o učenikija vakergje leske: „Rabi,* samo so mangle o Judejcija te mudaren tut barencar. Zarem palem ka dža adari?“ 9 O Isus odgovoringja lenge: „Nane li ko dive 12 saatija svetlina? Ako nekoj phirela diveskoro, nane te sopkinel pe soske dikhela i svetlina akale svetoskiri. 10 Ama ako nekoj phirela rakjate, ka sopkinel pe soske nane svetlina ki leste“.

11 Palo adava ov vakergja: „Amaro amal o Lazar zasukja, ama me džava adari te vazdav le taro sojbe“. 12 A o učenikija vakergje leske: „Gospodare, ako sovela tegani ka ovel leske pošukar“. 13 Ama o Isus kerela sine lafi bašo e Lazareskoro meribe, a ola mislinena sine kaj ov kerela lafi bašo obično sojbe. 14 Tegani o Isus otvoreno vakergja lenge: „O Lazar mulo. 15 Radujnava man so na sium sine adathe, soske adava so ka kerav, ka kerel tumari vera pozorali. Ajde te dža ki leste“. 16 Tegani o Toma, so vikinena le sine Bliznako, vakergja e javere učenikonge: „Te dža amen da hem te mera lea“.

17 Keda o Isus reslja, vakergje leske kaj o Lazar tano više štar dive ko grobo. 18 A i Vitanija sine okolu trin kilometre* paše uzo Erusalim. 19 A but Evreija više ale ki Marta hem ki Marija te utešinen len adaleske so mulo lengoro phral. 20 Keda i Marta šungja kaj avela o Isus, iklili hem geli ki leste, a i Marija ačhili khere. 21 Tegani i Marta vakergja e Isuseske: „Gospodare, te ove sine tu akate, mo phral nane te merel sine. 22 Ama akana da džanava kaj o Devel ka del tut sa so ka rode lestar“. 23 O Isus vakergja lake: „Tlo phral ka uštel“. 24 A i Marta vakergja leske: „Džanava kaj ka uštel keda ka ovel o voskresenie ko posledno dive“. 25 Tegani o Isus vakergja lake: „Me sium o voskresenie hem o životo. Koj sikavela vera ki mande, te merel da, palem ka živinel. 26 Hem sekoj so živinela hem sikavela vera ki mande, nikogaš nane te merel. Verujnea li ko akava?“ 27 Oj odgovoringja leske: „Oja Gospodare, me verujnava kaj tu sian o Hristos, o Čhavo e Devleskoro, okova kaske so sine prorokujmo kaj ka avel ko sveto“. 28 Keda vakergja adava, geli hem vikingja ple phenja e Marija, hem vakergja lake bizo o javera te šunen: „O Učiteli tano akate hem vikinela tut“. 29 Keda šungja adava, i Marija sigate uštili hem geli ko Isus.

30 O Isus panda na alo ko gav, nego ačhilo ko than kote so arakhlja pe e Martaja. 31 Keda o Evreija so ale ko kher te utešinen e Marija, dikhle kaj oj sigate uštili hem iklili, gele pali late soske mislingje kaj oj džala ko grobo te rovel adari. 32 Keda i Marija reslja ko Isus, peli anglo leskere pre hem vakergja: „Gospodare, te ove sine tu akate mo phral nane te merel sine“. 33 Keda o Isus dikhlja sar rovela oj hem sar rovena o Evreija so ale laja, sine leske but pharo hem sine tažno. 34 Tegani ov pučlja len: „Kote parungjen le?“ Ola odgovoringje leske: „Gospodare, ava hem dikh“. 35 O Isus počmingja te rovel. 36 Keda dikhle adava o Evreija, vakergje: „Dikhen kobor mangela le sine!“ 37 A nesave vakergje: „Akava manuš so kergja o korolo te dikhel, našti li sine te kerel o Lazar te na merel?“

38 E Isuseske palem sine but pharo hem gelo dži ko grobo. Adava sine jekh peštera, a angli late sine jekh baro bar. 39 O Isus vakergja: „Ciden o bar!“ A i Marta, i phen e muleskiri, vakergja leske: „Gospodare, dži akana ov sigurno khandela, soske nakhle štar dive sar mulo“. 40 O Isus vakergja lake: „Na vakergjum li tuke kaj ako verujnea, ka dikhe kobor baro tano o Devel?“* 41 Tegani cidingje o bar. A o Isus dikhlja ko nebo hem vakergja: „Mo Dad, blagodarinava tuke so šungjan man. 42 Me džanljum kaj tu sekogaš šunea man, ama akava vakergjum bašo narodo so tergjola akate, te verujnel kaj tu bičhalgjan man.“ 43 Otkeda vakergja adava, glasno vikingja: „Lazar, ikljov!“ 44 Hem o mulo iklilo. Leskere vasta hem leskere pre sine pakjarde zavoja, a leskoro muj sine pakjardo platnoja. O Isus vakergja lenge: „Phraven le hem mukhen le te phirel!“

45 Agjaar, but Evreija kola so ale ki Marija, keda dikhle so kergja o Isus, verujngje ki leste. 46 A nesave lendar gele ko fariseija hem vakergje lenge so kergja o Isus. 47 Adaleske o glavna sveštenikija hem o fariseija, rodingje te khedel pe o Sudsko sovet* hem vakergje: „So te kera? Akava manuš kerela but čudija! 48 Ako mukhaja le agjaar, sarine ka verujnen ki leste. Tegani ka aven o Rimjanja hem ka len amendar amaro hrami hem amare narodo“. 49 Ama jekh lendar, o Kajafa, kova so adava berš sine prvosvešteniko, vakergja lenge: „Tumen na džanena ništo 50 hem na haljona kaj pošukar ka ovel tumenge, jekh manuš te merel bašo narodo, nego celo nacija te ovel uništimi“. 51 Ama adava na vakergja le korkori pestar, nego adaleske so adava berš sine prvosvešteniko, ov prorokujngja kaj o Isus ka merel bašo narodo, 52 hem na samo bašo narodo, nego hem te khedel e Devleskere čhaven soj tane rasturime. 53 Agjaar, taro adava dive počmingje te dogovorinen pe sar te mudaren le.

54 Adaleske o Isus na phirela sine više javno maškar o Evreija, nego adathar gelo paše uzi pustina, ki diz koja so vikinela pe Efrem hem adathe ačhilo ple učenikoncar. 55 A avela sine o vreme te slavinel pe o evrejsko prazniko Pasha* hem but džene taro adava than gele ko Erusalim te šaj angleder i Pasha te očistinen pe sar so rodela e Mojseeskoro zakoni. 56 O manuša rodena sine e Isuse, hem džikote sine ko hrami ola pučena pe sine jekh jekhea: „So mislinea, ka avel li praznikoske ili na?“ 57 A o glavna fariseija hem o sveštenikija zapovedingje kaj sekoj so ka džanel kote tano o Isus, mora te javinel lenge te šaj te astaren le.

12 Šov dive angleder i Pasha,* o Isus alo ki Vitanija kote so živinela sine o Lazar, kole so vazdingja taro mule. 2 Adathe spremingje leske večera hem i Marta služinela len sine, a o Lazar sine jekh taro okola so bešle lea te han. 3 Tegani i Marija lelja jekh šiši* so sine le mirislivo maslo, čačutno nard, kova so sine but skupo. E masloja makhlja e Isuseskere pre hem ple balencar koslja len. O miris taro mirislivo maslo sine ko celo kher. 4 Ama o Juda Iskariot, jekh taro e Isuseskere učenikija, kole so sine le namera te predajnel le, vakergja: 5 „Soske akava mirislivo maslo na bikinela pe bašo 300 denarija* hem adala pare te den pe e čorolenge?“ 6 Ov na vakergja adava adaleske so grižinela pe sine e čorolenge, nego soske sine čor. Ki leste sine i kutija kote so khedena sine o pare hem ov čorela sine latar. 7 Tegani o Isus vakergja: „Ma zadinen la. Neka kerel akava, soske agjaar spreminela man bašo dive parujbaske. 8 Soske, o čorole sekogaš ka oven uzi tumende, ama me nane te ovav sekogaš tumencar“.

9 But manuša taro Evreija doznajngje kaj tano adathe hem ale, na samo bašo Isus, nego isto agjaar te dikhen e Lazare, kole so o Isus vazdingja taro mule. 10 A o glavna sveštenikija dogovoringje pe isto agjaar te mudaren e Lazare da, 11 soske baši leste but Evreija džana sine adari hem verujnena sine ko Isus.

12 O tajsutno dive but manuša so ale bašo prazniko šungje kaj o Isus avela ko Erusalim. 13 Tegani ola lele granke taro palme, iklile angli leste hem počmingje te vikinen: „Devla, molinaja tut, spasin le! Blagoslovimo tano okova so avela e Jehovaske* ko anav, o Cari taro Izrael!“ 14 O Isus arakhlja jekh her hem bešlja upri leste, sar so sine pišimo: 15 „Sionsko čhaje, ma dara. Ake tlo cari avela hem bešela upro tikno her“. 16 Leskere učenikija ko početok na halile akava, ama keda o Isus irangja pe ko nebo ola setingje pe kaj adava so kergje o manuša sine pišimo angleder.

17 A o manuša so sine adathe hem so dikhle sar o Isus vikingja e Lazare te ikljol taro grobo hem vazdingja le taro mule, ola ponadari da vakerena sine e javerenge bašo adava so slučingja pe. 18 Adaleske but manuša avena sine ko Isus, soske šungje bašo čudo so kergja. 19 Tegani o fariseija* vakergje maškar pumende: „Ništo na uspejngjem te kera. Ake, celo narodo džala pali leste“.

20 A maškar adala so ale bašo prazniko te obožavinen e Devle sine hem nesave Grkija. 21 Tegani ola ale ko Filip, kova so sine tari Vitsaida ki Galileja, hem vakergje leske: „Gospodine, bi mangaja te dikha e Isuse“. 22 O Filip alo hem vakergja e Andreeske. O Andrej hem o Filip gele hem vakergje e Isuseske.

23 A o Isus vakergja lenge: „Alo o vreme o manušikano Čhavo* te dobinel čest. 24 Čače, čače vakerava tumenge, džikote jekh zrno seme na perela ki phuv hem na merela, ov ačhola samo zrno. Ama ako merela, tegani ov anela baro plodi. 25 Koj mangela plo životo, ka našavel le.* A koj mrzinela plo životo ko akava sveto, ka dobinel le hem ka živinel večno. 26 Ako nekoj mangela te služinel mange, neka džal pali mande, hem kote sium me adathe ka ovel mlo sluga da. Ako nekoj mangela te služinel mange, o Dad ka sikavel leske čest. 27 Akana sium but voznemirimo. So te vakerav? Mo Dad, spasin man taro adava so adžikerela man.* Ama me bašo adava aljum. 28 Mo Dad ker tlo anav te ovel falimo“. Tegani taro nebo šundilo glaso sar vakerela: „Me falingjum mo anav hem ka kerav palem mo anav te ovel falimo“.

29 O manuša so sine adathe šungje adava hem vakergje kaj grmingja. A javera vakergje: „Angeli kergja lea lafi“. 30 A o Isus vakergja lenge: „Akava glaso na šundilo baši mange, nego baši tumenge. 31 Akana o Devel sudinela akale svetoske hem ov ka paldel akale svetoskere vladetele. 32 A me, keda ka ovav kovimo ko stubo, ka anav ki mande manušen taro sa o nacie“. 33 Akava vakergja te šaj te sikavel ko savo način ka merel. 34 Tegani o manuša vakergje leske: „O Zakoni vakerela kaj o Hristos* večno ka živinel. Sar šaj te vakere kaj o manušikano Čhavo mora te ovel kovimo ko stubo? Koj tano adava manušikano Čhavo?“ 35 A o Isus vakergja lenge: „I svetlina ka ovel tumencar panda hari. Phiren džikote panda isi tumen i svetlina, te šaj i temnica te na učharel tumen. Sekoj so phirela ki temnica na džanela kote džala. 36 Džikote isi tumen i svetlina, verujnen ki svetlina te šaj te oven čhave e svetlinakere“.

Otkeda o Isus vakergja akava, cidingja pe adathar hem garavgja pe lendar. 37 Iako kergja but čudija angli lende, ola na verujngje ki leste, 38 te šaj te ispolninen pe o lafija so vakergja o proroko o Isaija: „Jehova,* koj verujngja ko adava so amen vakergjem? Hem kaske o Jehova sikavgja pli sila?“* 39 Ola našti sine te verujnen, soske sar so vakergja o Isaija: 40 „Ov korjargja lengere jakhja hem phanlja lengere vile, te šaj te na dikhen ple jakhencar hem te na haljoven pumare vilencar hem te na iranen pe ki mande te šaj te sasljarav len“. 41 O Isaija vakergja akala bukja bašo Hristos adaleske so dikhlja sar sine leske dendi bari čest. 42 Iako but poglavarija verujngje ki leste, ama na priznajnena sine adava, soske darana sine taro fariseija te na palden* len tari sinagoga. 43 Soske, ola poviše mangena sine te oven poštujme taro manuša nego taro Devel.

44 A o Isus glasno vakergja: „Koj verujnela ki mande, na verujnela samo ki mande, nego isto agjaar verujnela ko okova so bičhalgja man. 45 Hem koj dikhela man, dikhela isto agjaar okole da so bičhalgja man. 46 Me aljum ko sveto sar svetlina, te šaj te na ačhoven ki temnica okola so verujnena ki mande. 47 Ama, ako nekoj šunela adava so vakerava ama na ikerela le, me na sudinava le. Soske, me na aljum te sudinav e sveto, nego aljum te spasinav e sveto. 48 Koj otfrlinela man hem na prifatinela adava so vakerava, isi koj te sudinel leske. O lafija so vakergjum len ka sudinen leske ko posledno dive. 49 Soske, me na kergjum lafi korkori mandar, nego o Dad, kova so bičhalgja man, dengja man zapoved so te vakerav hem so te sikavav. 50 Hem džanava kaj leskiri zapoved anela večno životo. Adaleske, sa so vakerava, vakerava agjaar sar so phengja mange o Dad“.

13 Angleder i Pasha,* o Isus džanlja kaj alo leskoro vreme te džal peske tari phuv hem te iranel pe ko plo Dad. Adaleske so mangela sine ple sledbenikon kola so sine ko sveto, ov manglja len dži ko krajo. 2 O Isus hem leskere učenikija hana sine večera, a o Beng više čhivgja ko vilo i namera e Juda Iskarioteske, o čhavo e Simoneskoro, te predajnel le. 3 Adaleske so o Isus džanlja kaj o Dad dengja sa o bukja leske ko vasta hem kaj ov alo taro Devel hem ka iranel pe ko Devel, 4 uštilo tari sofra, mukhlja ki strana pli upruni nametka hem phanlja pe ki polovina jekh peškiri. 5 Palo adava, čhorgja pani ko legjeni hem počmingja te thovel o pre e učenikongere hem e peškirea kosela sine lengere pre. 6 Keda alo dži ko Simon Petar, ov vakergja leske: „Gospodare, tu li ka thove me pre?“ 7 O Isus vakergja leske: „Akana akava me so kerava na haljovea, ama ka haljove le pokasno“. 8 A o Petar vakergja leske: „Nikogaš nane te mukhav tu te thove me pre!“ O Isus vakergja leske: „Ako na thovava te pre našti te ove mancar“. 9 Tegani o Simon Petar, vakergja leske: „Gospodaru, tegani ma thov samo me pre, thov me vasta da hem mo šero da!“ 10 O Isus odgovoringja leske: „Okova so thovgja pe, na valjani te thovel ništo javer osven pe pre, soske celo leskoro telo tano čisto. A tumen sien čista, ama na sarine“. 11 Soske, o Isus džanela sine koj ka predajnel le adaleske vakergja: „Na sien sarine čista“.

12 Otkeda thovgja o pre lengere, uravgja pli upruni nametka, irangja pe ki sofra hem vakergja lenge: „Dali halilen soske thovgjum tumare pre? 13 Tumen vikinena man ’Učitele‘ hem ’Gospodaru‘, hem točno vakerena, soske me sium adava. 14 Adaleske, ako me o Gospodari hem o Učiteli thovgjum tumare pre, tumen da valjani te thoven jekh jekheskere pre. 15 Dengjum tumen primer tumen da te keren agjaar sar so kergjum tumenge me. 16 Čače, čače vakerava tumenge, o robo nane pobaro taro plo gospodari, a ni okova soj bičhaldo nane pobaro taro okova so bičhalgja le. 17 Akana džanena akala bukja, ama ka oven srekjna ako kerena len. 18 Akava so vakerava na važinela sarinenge. Me pendžarava okolen so biringjum len. Ama akava ovela te šaj te ispolninen pe o lafija taro Spisija: ’Okova so hala sine taro mlo maro, ulo protiv mande‘. 19 Me panda akana vakerava tumenge adava so valjani te ovel, te šaj keda ka ovel adava, te verujnen kaj sa adava so sine pišimo baši mande tano čače. 20 Čače, čače vakerava tumenge, koj priminela okole kas so me bičhalava, ov priminela man da. A koj priminela man, priminela okole kova so bičhalgja man“.

21 Otkeda vakergja akava, o Isus voznemiringja pe hem otvoreno vakergja: „Čače, čače vakerava tumenge, jekh tumendar ka predajnel man“. 22 O učenikija počmingje te dikhen pe jekh jekhea hem sine bunime soske na džanena sine baši kaste kerela lafi. 23 Jekh taro učenikija, kaste so o Isus posebno manglja, sine ki sofra uzo Isus.* 24 Adaleske o Simon Petar jakhencar kergja leske hem vakergja leske: „Puč le baši kaske kerela lafi“. 25 Tegani ov čhivgja plo šero popaše uzo Isus hem pučlja le: „Gospodaru, koj tano adava?“ 26 O Isus odgovoringja: „Ov tano adava kaske so ka dav o zalago so ka bolav ko čaro“. Otkeda bolgja e marea ko čaro, dengja o zalago e Judaske, o čhavo e Simon Iskarioteskoro. 27 Otkeda o Juda lelja o zalago, o Satana khuvgja ki leste. Tegani o Isus vakergja leske: „Adava so počmingjan te kere, ker le posigate!“ 28 Hem nikoj lendar kola so sine ki sofra na džanle soske vakerela leske adava. 29 Adaleske so i kutija e parencar sine ko Juda, nekoj lendar mislingje kaj o Isus vakergja leske te kinel nešto bašo prazniko ili te del nešto e čorolenge. 30 Otkeda o Juda lelja o zalago, odma iklilo, a sine rakjate.

31 Keda ov iklilo, o Isus vakergja: „Akana tano o vreme keda e manušikane Čhaveske* ka del pe čest, hem e Devleske da ka del pe čest preku leste. 32 Hem o Devel ka del čest e manušikane Čhaveske, hem adava odma ka kerel le. 33 Mangle čhavalen, panda hari sium tumencar. Ka roden man, ama akana tumenge da vakerava adava so vakergjum e Evreenge: ’Adathe kote so ka džav me, tumen ka našti te aven‘. 34 Dava tumen nevi zapoved: mangen tumen jekh jekhea! Sar me so mangljum tumen, agjaar tumen da mangen tumen jekh jekhea. 35 Agjaar sarine ka džanen kaj sien mle učenikija, ako isi tumen mangipe maškar tumende“.

36 A o Simon Petar pučlja le: „Gospodare, kote džaja?“ A o Isus odgovoringja leske: „Adari kote so džava, tu akana našti te ave, ama ka ave pokasno“. 37 Tegani o Petar vakergja leske: „Gospodare, soske akana našti te avav tuja? Mo životo ka dav tuke!“ 38 Tegani o Isus vakergja leske: „Ka de li to životo baši mange? Čače, čače vakerava tuke, o bašno nane te giljavel sa džikote tu trin puti na vakerea kaj na pendžarea man“.

14 O Isus isto agjaar vakergja: „Ma mukhen tumaro vilo te ovel voznemirimo. Sikaven vera ko Devel hem isto agjaar sikaven vera ki mande! 2 Me Dadeske ko kher isi but thana živibaske. Te na ovel sine agjaar, nane sine te phenav tumenge akava. A akana džava te spreminav tumenge than. 3 A keda ka džav te kerav tumenge than, palem ka avav hem ka lav tumen ki mande, te šaj te oven kote so sium me. 4 Tumen džanena o drumo dži ko than kote so džava me“.

5 A o Toma vakergja leske: „Gospodaru, amen na džanaja tu kote džaja. Sar šaj tegani te džana o drumo?“

6 O Isus vakergja leske: „Me sium o drumo, o čačipe hem o životo. Nikoj našti te avel dži ko Dad, osven preku mande. 7 Ako pendžarena man, pendžarena mle Dade da. Otakana tumen pendžarena le hem dikhlen le“.

8 A o Filip vakergja leske: „Gospodaru, sikav amenge e Dade, hem adava tano dovolno amenge!“

9 Tegani o Isus vakergja leske: „Kobor vreme sium tumencar, a tu Filip panda na pendžargjan man? Koj dikhlja man, dikhlja mle Dade da. Soske tegani vakerea: ’Sikav amenge e Dade‘? 10 Na verujnea li kaj me sium ko jekhipe e Dadea hem kaj o Dad tano ko jekhipe mancar? Adava so vakerava, na vakerava le korkori mandar, nego o Dad, kova so ačhola ko jekhipe mancar, kerela pli volja preku mande. 11 Verujnen kaj me sium ko jekhipe e Dadea hem kaj o Dad tano ko jekhipe mancar. Ako na verujnena ko adava so vakerava, tegani verujnen ko bukja so dikhena kaj kerava soske tane sprema leskiri volja. 12 Čače, čače vakerava tumenge, koj sikavela vera ki mande, ka kerel o bukja so kerava len me. Ka kerel hem pobare bukja taro akala, soske me džava mange ko Dad. 13 Hem, bilo so te roden ko mlo anav, adava ka kerav, te šaj te slavinel pe o Dad preku o Čhavo. 14 Sa adava so ka roden ko mlo anav, me adava ka kerav.

15 Ako mangena man, ka ikeren mle zapovedija. 16 Me ka rodav taro Dad hem ov ka del tumen javer pomošniko* te ovel tumencar zasekogaš, 17 adava tano e Devleskiri sila* koja so sikavela o čačipe, koja so o sveto našti te dobinel la, soske ni na dikhela la, a ni na pendžarela la. A tumen pendžarena la, soske tani ki tumende hem ka ačhol tumencar. 18 Me nane te mukhav tumen korkori.* Ka avav ki tumende. 19 Panda hari o sveto nane više te dikhel man, ama tumen ka dikhen man, adaleske so me živinava, tumen da ka živinen. 20 Ko adava dive tumen ka džanen kaj me sium ko jekhipe me Dadea, hem kaj tumen sien ko jekhipe mancar, hem kaj me sium ko jekhipe tumencar. 21 Kas isi mle zapovedija hem ikerela len, ov mangela man. A koj mangela man, le ka mangel le mo Dad da, hem me ka mangav le hem ka mukhav te pendžarel man šukar“.

22 Tegani o Juda,* na o Iskariot, vakergja: „Gospodaru, soske amen ka pendžara tut šukar, a o sveto na?“

23 O Isus odgovoringja leske: „Ako nekoj mangela man, ka ikerel mlo lafi, hem mo Dad ka mangel le. Me hem mo Dad ka ava ki leste hem ov ka ovel amencar. 24 Koj na mangela man, na ikerela mle lafija, a o lafi kova so šunela le nane mlo, nego e Dadeskoro kova so bičhalgja man.

25 Bašo sa akala bukja vakergjum tumenge džikote sium sine tumencar. 26 Ama o pomošniko,* e Devleskiri sila,* kova so o Dad ka bičhalel le ko mlo anav, ov ka sikavel tumen bašo sa o bukja hem ka setinkerel tumen ko sa adava so vakergjum tumenge. 27 Mukhava tumenge o mir, dava tumen mlo mir. O mir kova so dava tumen me, nane sar o mir kova so dela le o sveto. Ma te voznemirinel pe tumaro vilo hem ma te daral! 28 Šungjen kaj vakergjum tumenge: ’Me ka džav hem ka iranav man ki tumende‘. Ako mangena man, ka oven radosna so džava ko mo Dad, soske o Dad tano pobaro mandar. 29 Akava vakerava tumenge panda angleder te ovel, te šaj keda ka ovel akava, tumen te verujnen. 30 Nane više but te kerav tumencar lafi, soske avela o vladeteli e svetoskoro. Le nane le mokj upri mande. 31 Ama, te šaj o sveto te džanel kaj mangava e Dade, kerava agjaar sar so zapovedingja mange o Dad. Ušten, te dža amenge akatar.

15 Me sium i čačutni drakh, a mo Dad tano okova so sadingja hem so grižinela pe baši drakh. 2 Sekoja granka ki mande so na anela plodi, ov cidela la, a sekoja so anela plodi, čistinela la te šaj te anel poviše plodi. 3 Tumen više sien čista bašo lafija so vakergjum tumenge. 4 Ačhoven ko jekhipe mancar hem me ka ačhovav ko jekhipe tumencar. Isto sar i granka so našti te del plodi korkori pestar ako na ačhola ki drakh, agjaar tumen da našti te den plodi, ako na ačhona ko jekhipe mancar. 5 Me sium i drakh, a tumen sien o granke. Koj ačhola ko jekhipe mancar, me da ačhovava ko jekhipe lea hem ov ka anel but plodija, a ništo našti te keren ako sien odvojme mandar. 6 Ako nekoj na ačhola ko jekhipe mancar, ka ovel frdimo sar jekh granka hem ka šukjol. A asavke granke khedena pe, frdena pe ki jag, pa ola thabljona. 7 Ako ačhona ko jekhipe mancar hem ako mle lafija ačhona ki tumende, roden sa so ka mangen hem ka del pe tumenge. 8 Ako anena but plodija hem ako sikavena kaj sien mle učenikija, tegani mo Dad ka ovel falimo. 9 Sar o Dad so mangela sine man, agjaar me da mangljum tumen. Ačhoven ko mlo mangipe! 10 Ako ikerena mle zapovedija, ka ačhoven ko mlo mangipe, sar me so ikergjum o zapovedija mle Dadeskere hem ačhiljum ko leskoro mangipe.

11 Akala bukja vakergjum tumenge te šaj mli radost te ovel tumende hem tumari radost te ovel celosno. 12 Akaja tani mli zapoved: mangen tumen jekh jekhea sar me so mangljum tumen! 13 Nikas nane pobaro mangipe taro akava: te del plo životo ple amalenge. 14 Tumen sien mle amala, ako kerena adava so zapovedinava tumenge. 15 Više na vikinava tumen robija, soske o robo na džanela so kerela leskoro gospodari. Me vikinava tumen amala, soske vakergjum tumenge sa so šungjum taro mo Dad. 16 Tumen na biringjen man, nego me biringjum tumen, te šaj te anen plodija so ka ačhoven zasekogaš hem tegani bilo so te roden taro Dad ko mlo anav, ov ka del tumen.

17 Akala bukja zapovedinava tumenge: mangen tumen jekh jekhea! 18 Ako o sveto mrzinela tumen, džanen kaj angleder tumende te mrzinel, mrzinela sine man. 19 Te oven sine delo taro sveto, o sveto ka mangel tumen sine, soske ka oven sine leskere. Ama, adaleske so na sien delo taro sveto, nego me biringjum tumen taro sveto, o sveto mrzinela tumen. 20 Ma bistren o lafija so vakergjum tumenge: ’O robo nane pobaro taro leskoro gospodari‘. Ako progoningje man, ka progoninen tumende da, ako ikergje mle lafija, ka ikeren tumare da. 21 Ama ola sa akala bukja ka keren protiv tumende bašo mlo anav, soske na pendžarena okole kova so bičhalgja man. 22 Te na avav sine hem te na vakerav lenge sine, tegani nane te oven sine kriva, ama akana nane len solea te opravdinen pe bašo plo grevo. 23 Koj mrzinela man, mrzinela me Dade da. 24 Te na kerav sine angli lende o bukja so nikoj javer na kergja len, tegani nane sine te oven kriva, ama akana ola dikhle man hem mrzingje man. Ola isto agjaar mrzingje me Dade da. 25 Ama akava ulo te šaj te ispolninen pe o lafija soj pišime lenge ko Zakoni: ’Mrzingje man bizi pričina‘. 26 Keda ka avel o pomošniko* kova so ka bičhalav tumenge taro Dad, e Devleskiri sila* koja so sikavela o čačipe, koja so avela taro Dad, ka svedočinel baši mande, 27 hem tumen da ka svedočinen, soske tumen sien sine mancar taro početok.

16 Vakergjum tumenge akala bukja te šaj te na našaven tumari vera. 2 O manuša ka palden* tumen taro sinagoge.* Ustvari, avela vreme keda sekoj so ka mudarel tumen ka mislinel kaj agjaar služinela e Devleske. 3 Ama ola ka keren adala bukja adaleske so na pendžargje ni e Dade, a ni man. 4 Vakergjum tumenge akava te šaj, keda ka avel o vreme te oven akala bukja, te setinen tumen ko adava so vakergjum tumenge.

Akava na vakergjum tumenge ko početok adaleske so sium sine tumencar. 5 Ama akana džava ko okova so bičhalgja man, a nikoj tumendar na pučela man: ’Kote džaja?‘ 6 Ama adaleske so vakergjum tumenge akala bukja, tumare vile ule tažna. 7 Nego vakerava tumenge o čačipe, me džava mange tumare šukaripaske. Ako na džava, o pomošniko* nane te avel ki tumende, ama ako džava, me ka bičhalav le ki tumende. 8 Hem keda ka avel, ka sikavel e svetoske soj tano o grevo, soj tani i pravednost hem soj tani i osuda. 9 Ov* jasno ka sikavel o grevo e svetoskoro, soske o sveto na sikavela vera ki mande. 10 Ov ka sikavel e svetoske kaj kerava adava soj pravedno, soske me džava ko Dad hem adaleske tumen ka našti više te dikhen man. 11 Ov isto agjaar ka sikavel kaske o Devel sudinela, soske ov više osudingja e vladetele akale svetoskere.

12 Isi man panda but bukja te vakerav tumenge, ama akana panda našti te haljoven len. 13 Keda ka avel o pomošniko, e Devleskiri sila* koja so sikavela o čačipe, ov ka vodinel tumen, ka pomožinel tumenge pošukar te haljoven o čačipe, soske ov nane te kerel lafi korkori pestar, nego ka vakerel adava so šungja hem ka vakerel tumenge o bukja so mora te slučinen pe. 14 Ov ka anel mange slava,* soske ka vakerel tumenge adava so ka šunel mandar. 15 Sa so isi e Dade tano mlo da. Adaleske vakergjum tumenge kaj o pomošniko ka vakerel tumenge sa adava so šunela mandar. 16 Panda hari hem više nane te dikhen man, hem kratko palo adava, ka dikhen man“.

17 Adaleske nesave taro leskere učenikija pučena pe sine maškar peste: „So značinela adava so vakerela: ’Panda hari hem više nane te dikhen man, hem kratko palo adava, ka dikhen man‘, hem so značinela adava so vakergja: ’Soske me džava ko Dad‘?“ 18 Pučena pe sine: „So značinela adava so vakergja: ’Panda hari‘? Na džanaja bašo so kerela lafi“. 19 O Isus džanlja kaj ola mangle te pučen le bašo adava hem adaleske vakergja lenge: „Dali pučena tumen so značinena o lafija so vakergjum: ’Panda hari hem više nane te dikhen man, hem kratko palo adava, ka dikhen man‘? 20 Čače, čače vakerava tumenge, tumen ka roven hem ka žalinen, a o sveto ka radujnel pe. Tumen ka oven tažna, ama palo adava tumari žal ka ovel radost. 21 Keda jekh džuvli bijanela, oj tani tažno soske alo lakoro vreme te oven la dukha, ama keda bijanela e čhave na setinela pe više ki dukh, soske tani radosno so jekh manuš alo ko sveto. 22 Agjaar tumen da akana sien tažna, ama palem ka dikhav tumen hem tumare vile ka radujnen pe hem nikoj nane te lel tumari radost. 23 Ko adava dive nane ništo te pučen man. Čače, čače vakerava tumenge, bilo so te roden taro Dad ov ka del tumen ko mlo anav. 24 Dži akana na rodingjen ni jekh buti ko mlo anav. Roden hem ka dobinen, te šaj tumari radost te ovel celosno.

25 Vakergjum tumenge akala bukja sporedbencar. Ama avela vreme keda nane više te kerav tumencar lafi sporedbencar, nego otvoreno ka vakerav tumenge bašo Dad. 26 Ko adava dive ka molinen tumen e Dadeske ko mlo anav, ama adava na značinela kaj me ka molinav e Dade baši tumenge. 27 Soske, o Dad da mangela tumen, adaleske so tumen manglen man hem verujngjen kaj o Devel bičhalgja man. 28 Mo Dad bičhalgja man hem aljum ko sveto. Akana džava mange taro sveto hem iranava man ko Dad“.

29 Leskere učenikija vakergje: „Ake, akana kerea otvoreno lafi hem na koristinea sporedbe. 30 Akana džanaja kaj tu sa džanea hem kaj nikoj na valjani te pučel tut, soske tu angleder džanea so mislinela adava manuš. Adaleske verujnaja kaj sian bičhaldo taro Devel“. 31 O Isus vakergja lenge: „Čače li verujnena akana? 32 Ake, avela o vreme hem više alo, keda ka našel sekoj ko plo kher hem ka mukhen man korkori. Ama me na sium korkori, soske o Dad tano mancar. 33 Akava vakergjum tumenge te šaj te ovel tumen mir preku mande. Ko sveto ka ovel tumen nevolje, ama oven hrabra! Me pobedingjum o sveto!“

17 Otkeda o Isus vakergja akala bukja, dikhlja ko nebo hem vakergja: „Mo Dad, alo o vreme! De tle Čhaveske slava* te šaj tlo Čhavo te slavinel tut. 2 Tu dengjan le vlast upro sa o manuša* te šaj te del večno životo sa okolenge so tu dengjan len leske. 3 Te šaj te ovel len večno životo valjani šukar te pendžaren tut, e jekhe čačutne Devle hem okole so bičhalgjan le, e Isus Hristose. 4 Slavingjum tut ki phuv agjaar so završingjum i buti so dengjan man te kerav la. 5 Akana tu, mo Dad, de man slava, ker te ovav uzi tute hem te ovel man i slava koja so sine man keda sium sine tuja angleder te ovel o sveto.

6 Kergjum te pendžaren tlo anav o manuša kola so tu dengjan man len taro sveto. Ola sine tle, a tu dengjan len mange, hem ola ikerena sine tlo lafi. 7 Akana ola džanena kaj sa adava so dengjan man avela tutar, 8 ola džanena akava soske me vakergjum lenge o bukja so vakergjan len mange tu hem ola prifatingje len, hem čače uveringje pe kaj me aljum tuke ko anav hem verujngje kaj tu bičhalgjan man. 9 Me molinava man lenge. Na molinava man bašo sveto, nego bašo okola so tu dengjan man len, soske tane tle, 10 hem sa so isi man, tano tlo, a adava soj tlo, tano mlo da hem me lendar dobingjum čest.

11 Me na sium više ko sveto soske avava ki tute, ama ola tane ko sveto. Mo Dad, so sian sveto, arakh len bašo tlo anav kova so dengjan man te šaj te oven jekh* isto sar so siem jekh* amen. 12 Keda sium sine lencar, me arakhljum len bašo tlo anav kova so dengjan man. Me arakhljum len hem nijekh lendar na sine uništimo, osven okova kova so ka ovel uništimo, te šaj te ispolninel pe adava so pišinela ko sveta spisija. 13 Ama akana avava ki tute hem vakerava akala lafija džikote sium panda ko sveto, te šaj ola da čače te osetinen i radost so isi man. 14 Me vakergjum lenge tlo lafi, a o sveto mrzingja len, soske ola nane delo taro sveto sar me so na sium delo taro sveto.

15 Na molinava tut te le len taro sveto, nego te arakhe len taro Beng.* 16 Ola nane delo taro sveto, sar me so na sium delo taro sveto. 17 Tle lafea ker len sveta soske tlo lafi tano čačipe. 18 Sar tu so bičhalgjan man ko sveto, agjaar me da bičhalgjum len ko sveto. 19 Me ponadari da ačhovava sveto baši lende, te šaj ola da te oven sveta preku o čačipe.

20 Na molinava tut samo lenge, nego sarinenge da so ka verujnen ki mande otkeda ka šunen o bukja so ola ka sikaven len, 21 te šaj sarine te oven ko jekhipe, sar so sian tu, mo Dad, ko jekhipe mancar hem me ko jekhipe tuja, ola da te oven ko jekhipe amencar te šaj o sveto te verujnel kaj tu bičhalgjan man. 22 Me dengjum len i slava* koja so tu dengjan man te šaj te oven jekh, sar so siem jekh amen, 23 me ko jekhipe lencar hem tu ko jekhipe mancar, te šaj te oven sovršeno* ko jekhipe, te šaj o sveto te džanel kaj tu bičhalgjan man hem kaj mangea len sar so mangea man. 24 Mo Dad, mangava okola so dengjan len mange te oven mancar kote so sium me, te šaj te dikhen mli slava so tu dengjan man, soske mangljan man angleder te ovel o sveto stvorimo.* 25 Mo Dad, so sian pravedno, o sveto na džanela koj sian tu, ama me džanava koj sian tu, hem okola so tu dengjan len mange džanena kaj tu bičhalgjan man. 26 Me vakergjum lenge tlo anav hem ponadari da ka vakerav le, te šaj te sikaven mangipe savo so tu sikavgjan mange hem te šaj te ovav ko jekhipe lencar“.

18 Otkeda vakergja adava, o Isus ple učenikoncar gelo ki jekh gradina koja so sine tari okoja strana tari dolina Kedron. 2 Bašo adava than džanela sine o Juda da, leskoro predavniko, soske o Isus but puti adathe khedela pe sine ple učenikoncar. 3 Adaleske o Juda lelja pea četa vojnikija hem e glavna sveštenikongere hem e fariseengere stražaren hem ale ko adava than lampencar hem oružjea. 4 O Isus džanlja so ka ovel lea, adaleske iklilo anglal hem pučlja len: „Kas rodena?“ 5 A ola odgovoringje leske: „E Isuse, o Nazarekjanco“. Tegani ov vakergja lenge: „Me sium adava“. A o Juda, leskoro predavniko, tergjola sine adathe lencar.

6 Ama keda vakergja lenge: „Me sium adava“, ola cidingje pe palal hem pele tele ki phuv. 7 Adaleske ov palem pučlja len: „Kas rodena?“ A ola odgovoringje leske: „E Isuse, o Nazarekjanco“. 8 Tegani o Isus vakergja lenge: „Vakergjum tumenge kaj me sium adava. Adaleske ako rodena man, mukhen akale manušen te džan peske“. 9 Agjaar ispolningje pe leskere lafija: „Na našavgjum ni jekhe taro okola so dengjan len mange“.

10 Tegani o Simon Petar ikalgja o mači so sine le pea, pa napadingja e prvosveštenikoskere robo hem čhingja leskoro desno kan. E roboskoro anav sine Malh. 11 Ama o Isus vakergja e Petareske: „Čhiv o mači ki leskiri futrola. Zarem te na pijav i čaša so dengja man o Dad?“

12 Tegani i četa vojnikija ple komandantea* hem o evrejska stražarija, astargje e Isuse hem phanle leskere vasta. 13 Hem prvo ingargje le ko Ana, soske ov sine o sastro e Kajafaskoro kova so adava berš sine prvosvešteniko. 14 O Kajafa sine adava kova so sovetingja e Evreen kaj pošukar tano lenge te merel jekh manuš bašo narodo.

15 A o Simon Petar hem jekh javer učeniko, sledingje e Isuse. Akava učeniko pendžarela pe sine e prvosveštenikoja, adaleske khuvgja e Isusea ko e prvosveštenikoskoro dvoro. 16 A o Petar ačhilo avrijal kaj i porta. Adaleske o javer učeniko, kova so pendžarela pe sine e prvosveštenikoja, iklilo hem kergja lafi e sluginkaja koja so tergjola sine ko udar hem lelja e Petare da pea andre. 17 Tegani i sluginka koja so tergjola sine ko udar vakergja e Petareske: „Te na sian tu da učeniko akale manušeskoro?“ Ov odgovoringja lake: „Na sium!“ 18 A o robija hem o stražarija tergjona sine okolu i jag so thargje hem agjaar takjona sine soske sine šudro. Lencar tergjola sine o Petar da hem takjola sine.

19 A o glavno svešteniko pučela sine e Isuse bašo leskere učenikija hem bašo bukja so ov sikavela sine e manušen. 20 O Isus odgovoringja lenge: „Me sikavava sine e manušen javno. Sekogaš sikavava len sine ko sinagoge* hem ko hrami kote so khedena pe sine sa o Evreija, ništo na vakergjum tajno. 21 Soske pučena ma man? Pučen okolen so šungje adava so vakerava lenge sine. Ola džanena so vakergjum lenge“. 22 Otkeda o Isus vakergja akala lafija, jekh taro stražarija so tergjola sine uzi leste khuvgja le šamarka hem vakergja: „Agjaar li odgovorinea e glavno sveštenikoske?“ 23 O Isus odgovoringja leske: „Ako vakergjum nešto pogrešno, dokažin kaj adava tano pogrešno, ama ako adava so vakergjum tano točno, soske khuvea man?“ 24 Tegani o Ana vakergja te ingaren le ko Kajafa, o prvosvešteniko. A e Isuseskere vasta sine panda phanle.

25 Adava vreme, o Simon Petar panda tergjola sine adathe uzi jag, te šaj te takjol. Tegani pučle le: „Te na sian tu da leskoro učeniko?“ A ov na priznajngja hem vakergja: „Na sium“. 26 Tegani jekh taro robija e prvosveštenikoskere, so sine familija e manušea kaskoro so kan čhingja o Petar, vakergja: „Na dikhljum tut li tute da lea ki gradina?“ 27 A o Petar palem na priznajngja, hem odma o bašno giljavgja.

28 Rano sabajle ingargje e Isuse taro Kajafa ki e upraviteleskiri palata. A ola na mangle te khuven ki palata te šaj te ačhoven čista hem te šaj te han i pashalno žrtva. 29 Adaleske o Pilat iklilo avri angli lende hem pučlja: „Savo lošnipe kergja akava manuš?“ 30 Ola odgovoringje leske: „Ako akava manuš na kergja nisavo lošnipe, tegani nane sine te ana le ki tute“. 31 Tegani o Pilat vakergja lenge: „Len le tumen hem sudinen leske sprema tumaro zakoni!“ A o Evreija vakergje leske: „Amenge nane dozvolimo te mudara nikas“. 32 Akalea ispolningja pe adava so vakergja o Isus bašo adava sar ka merel.

33 Tegani o Pilat khuvgja ki palata, vikingja e Isuse hem pučlja le: „Tu li sian o cari e Evreengoro?“ 34 O Isus odgovoringja leske: „Pučea man akava korkori tutar, ili akava o javera vakergje tuke baši mande?“ 35 O Pilat odgovoringja: „Zarem sium me Evrei? Tlo narodo hem o glavna sveštenikija predajngje tut mange. So kergjan?“ 36 A o Isus odgovoringja: „Mlo Carstvo nane delo taro akava sveto. Te ovel sine mlo Carstvo delo taro akava sveto, mle sluge ka borinen pe sine te na ovav predajmo e Evreenge. Ama mlo Carstvo nane akatar“. 37 Tegani o Pilat pučlja le: „Znači, tu sian cari?“ O Isus odgovoringja leske: „Tu korkori vakerea kaj sium cari. Me adaleske bijandiljum hem adaleske aljum ko sveto, te šaj te svedočinav bašo čačipe. Sekoj soj tano tari strana e čačipaskiri šunela mlo glaso“. 38 A o Pilat vakergja leske: „Soj tano o čačipe?“

Otkeda vakergja akava, iklilo anglo Evreija hem vakergja lenge: „Me na dikhava kaj akava manuš tano krivo bašo nešto. 39 Ama, tumen isi tumen običaj ki Pasha te oslobodinav nekas. Adaleske, mangena li te oslobodinav tumenge e care e Evreengoro?“ 40 A ola palem počmingje te vikinen: „Ma oslobodin le, nego e Varava!“ A o Varava sine kriminalco.

19 Tegani o Pilat vakergja e vojnikonge te len e Isuse hem te kamšikujnen le. 2 A o vojnikija pletingje leske kruna taro kare, čhivgje la leske ko šero hem uravgje le jekh liljakovo nametka. 3 Avena sine ki leste hem vakerena sine: „Ov pozdravimo, cari e Evreengoro!“ Hem khuvena le sine šamarke. 4 O Pilat palem iklilo avri hem vakergja lenge: „Ake, angjum le angli tumende te šaj te džanen kaj na arakhljum nisavi greška ki leste“. 5 Tegani o Isus iklilo avri, phiravela sine i kruna taro kare hem i liljakovo nametka. A o Pilat vakergja lenge: „Ake, akava tano o manuš!“ 6 A o glavna sveštenikija hem o stražarija dikhle le hem počmingje glasno te vikinen: „Neka ovel kovimo ko stubo! Neka ovel kovimo ko stubo!“ A o Pilat vakergja lenge: „Len le tumen hem kovinen le ko stubo, soske me na arakhljum nisavi greška ki leste!“ 7 Tegani o Evreija odgovoringje leske: „Amen isi amen zakoni, hem sprema o zakoni, ov mora te merel soske baši peste vakergja kaj tano e Devleskoro čhavo“.

8 Keda o Pilat šungja adava so vakergje, darandilo panda poviše, 9 tegani irangja pe ki palata hem pučlja e Isuse: „Kotar sian tu?“ A o Isus na odgovoringja leske. 10 O Pilat vakergja leske: „Na mangea te odgovorine mange? Na džanea li kaj isi man vlast te mukhav tut hem isi man vlast te kovinav tut ko stubo?“ 11 A o Isus odgovoringja leske: „Na bi ovela tut sine nisavi vlast upri mande te na ovel tuke sine dendi taro Devel. Adaleske o manuš so predajngja man tuke isi le pobaro grevo“.

12 Adaleske o Pilat rodela sine način sar te oslobodinel le. Ama o Evreija glasno vikinena sine: „Ako oslobodinea akale manuše, tu na sian amal e cezareskoro! Sekoj so korkori pes kerela cari, tano protiv o cezar“. 13 Keda šungja akala lafija, o Pilat ikalgja e Isuse avrijal hem bešlja ki sudsko stolica ko than kote so sine pločke taro bara, a ko hebrejski vikinela pe sine Gavata. 14 A tegani sine o dive keda spreminena pe sine baši Pasha,* hem okolu 12 o saati* o Pilat vakergja e Evreenge: „Ake tano tumaro cari!“ 15 Ama ola glasno vikinena sine: „Mudar le! Mudar le! Kovin le ko stubo!“ A o Pilat vakergja lenge: „Zarem te mudarav tumare care?“ Tegani o glavna sveštenikija vakergje: „Amen nane amen javer cari osven o cezar!“ 16 Tegani ov predajngja le lenge te ovel kovimo ko stubo.

Hem ola lele e Isuse. 17 A o Isus korkori phiravela sine o stubo* kote so valjani sine te ovel kovimo hem reslja ko than kova so ko hebrejski vikinela pe Golgota, kova so značinela „Than kote so isi kokala taro šero“.* 18 O Isus sine kovimo maškar ko duj manuša, jekh sine tari leskiri desno, a o javer sine tari leskiri levo strana. 19 A o Pilat isto agjaar naredingja te pišinen upro stubo: „O Isus o Nazarekjanco, o cari e Evreengoro“. 20 But taro Evreija čitingje adava so pišinela sine, adaleske so o than kote so o Isus sine kovimo ko stubo sine paše uzi diz. Hem adava sine pišimo ki hebrejsko, ki latinsko hem ki grčko čhib. 21 Ama o glavna sveštenikija e evreengere vakergje e Pilateske: „Ma pišin: ’O cari e Evreengoro‘, nego kaj ov vakergja: ’Me sium o cari e Evreengoro‘“. 22 A o Pilat vakergja lenge: „Nane te meninav adava so pišingjum“.

23 A keda o vojnikija kovingje e Isuse ko stubo, lele leskiri upruni nametka hem delingje la ko štar delija, sekole vojnikoske po jekh delo. Hem lele leskiri teluni nametka da koja so na sine sivdi nego sine celosno pletimi. 24 Adaleske vakergje jekh jekheske: „Te na pharava la, nego ždrepkaja* te odlučina kaskiri ka ovel“. Akava ulo te šaj te ispolninel pe adava so pišinela ko Spisija: „Delingje mli nametka maškar peste hem frdingje ždrepka bašo mle šeja“. Hem o vojnikija kergje baš adava.

25 Uzo stubo mučibaske kote so sine kovimo o Isus, tergjona sine leskiri daj hem i phen leskere dajakiri, a isto agjaar e Klopaskiri romni i Marija hem i Marija Magdalena. 26 Keda o Isus dikhlja ple daja hem ple učeniko kole so posebno mangela le sine sar tergjola uzi late, ov vakergja pe dajake: „Otakana, ov tano to čhavo!“ 27 Palo adava, ov vakergja ple učenikoske: „Otakana, oj tani ti daj!“ Hem taro adava momenti o učeniko lelja la ko plo kher.

28 Palo adava, o Isus džanlja kaj kergja sa adava so rodingja lestar o Dad, hem te šaj te ispolninel pe adava so pišinela ko Spisija ov vakergja: „Žedno sium“. 29 A adathe sine khoro pherdo šutale moljaja, tegani ola lele sungjeri, čhivgje le ki šutali mol, zakačingje le ki jekh pračka taro isop* hem lea topingje leskere vošta. 30 Keda probingja tari šutali mol o Isus vakergja: „Završimo tano!“ Palo adava, teljargja plo šero hem mulo.*

31 Adaleske so sine o dive keda spreminena pe sine bašo sabat,* o Evreija na mangle o mule te ačhon kovime ko stubija ko dive keda sine o sabat (soske adava sine baro sabat), adaleske rodingje taro Pilat te phagen o čanga e manušengere so sine kovime hem te huljaven len taro stubija. 32 Tegani ale o vojnikija hem phagle o čanga e duje manušengere so sine kovime uzo Isus. 33 Ama keda ale dži ko Isus dikhle kaj više sine mulo hem na phagle leskere čanga. 34 Ama jekh taro vojnikija lelja kopje hem posavgja le teleder o rebre, hem odma thavdingja lestar rat hem pani. 35 Bašo akava svedočinela okova so dikhlja akava hem leskoro svedoštvo tano čače. Hem ov džanela kaj adava so vakerela tano čače, te šaj tumen da te verujnen. 36 A akala bukja ule te šaj te ispolninel pe adava so pišinela ko Spisija: „Ni jekh kokalo nane te ovel lestar phago“. 37 A ko javer than ko Spisija pišinela: „Ola ka dikhen ko okova kaste so posavgje“.

38 Palo akava, alo o Josif tari Arimateja kova so sine učeniko e Isuseske, ama garavela sine adava soske darala sine taro Evreija. Ov zamolingja e Pilate te dozvolinel leske te lel e Isuseskoro telo, hem o Pilat dozvolingja leske. Tegani ov alo hem lelja e Isuseskoro telo. 39 Alo o Nikodim da, o manuš kova so prvo puti alo ko Isus rakjate hem angja mešavina tari smirna hem aloe so sine phari okolu 30 kile.* 40 Hem spored o Evrejsko običaj bašo parujbe, lele e Isuseskoro telo, pakjargje le ko leneno platno kova so sine le mirisliva bilke. 41 Hem ko than kote so sine kovimo o Isus sine jekh gradina hem ki adaja gradina sine jekh nevo grobo koleste so panda nikoj na sine čhivdo. 42 Adaleske so sine o dive keda o Evreija spreminena pe bašo sabat hem o grobo sine paše, ola čhivgje e Isuse adathe.

20 Ko prvo dive taro kurko, rano sabajle džikote panda sine temnica, i Marija Magdalena ali ko grobo hem dikhlja kaj o bar više sine cidimo taro grobo. 2 Adaleske prastandor geli ko Simon Petar hem ko javer učeniko, kaste so o Isus posebno mangela le sine hem vakergja lenge: „Lele e Gospodare taro grobo hem na džanaja kote čhivgje le!“

3 Tegani o Petar hem o javer učeniko iklile te džan ko grobo. 4 O solduj džene prastana sine, ama o javer učeniko prastala sine posigate taro Petar hem ov prvo reslja ko grobo. 5 Ama na khuvgja andre, nego samo telilo hem avrijaldan dikhlja o zavoja so ačhile adathe. 6 Pali leste reslja o Simon Petar, ov khuvgja andre ko grobo hem dikhlja o zavoja so ačhile adathe. 7 O platno so sine e Isuseske ko šero na sine zaedno e javere zavoencar, nego sine pakjardo hem odvojmo ko javer than. 8 Tegani khuvgja andre hem o učeniko kova so prvo reslja ko grobo, keda dikhlja verujngja ko adava so sine lenge vakerdo. 9 Soske, ola panda na halile o stiho taro Spisija kote so vakerela kaj ov mora te ovel vazdimo taro mule. 10 Palo adava, o učenikija gele peske khere.

11 Ama i Marija ačhili anglo grobo hem rovela sine. Džikote rovela sine, dikhlja ko grobo, 12 hem andre dikhlja duje angelen uravde ko parno sar bešena sine ko than kote so sine čhivdo e Isuseskoro telo, jekh kaj o šero, a o javer kaj o pre. 13 Ola pučle la: „Soske rovea?“ Oj vakergja lenge: „Lele me Gospodare hem na džanava kote čhivgje le“. 14 Otkeda vakergja akava, irangja pe hem dikhlja kaj nekoj tergjola pali late. Adava sine o Isus, ama oj na pendžargja le. 15 O Isus pučlja la: „Soske rovea? Kas rodea?“ I Marija mislingja kaj ov tano o gradinari hem vakergja leske: „Molinava tut, ako tu leljan leskoro telo, vaker mange kote čhivgjan le hem me ka lav le!“ 16 Tegani o Isus vakergja lake: „Marija!“ A oj irangja pe hem ko hebrejski vakergja: „Rabuni!“ (so značinela „Učitele“). 17 A o Isus vakergja lake: „Ma iker man, soske panda na geljum upre ko Dad. Nego dža ko mle phralja hem vaker lenge: ’Džava ko mo Dad hem ko tumaro Dad, ko mo Devel hem ko tumaro Devel‘“. 18 Tegani i Marija Magdalena geli hem vakergja e javere učenikonge: „Dikhljum e Gospodare!“ Hem vakergja lenge adava so vakergja lake o Isus.

19 A adava dive rakjate, ko prvo dive taro kurko, o učenikija khedingje pe ko jekh kher hem phanle o udara, soske darana sine taro Evreija. Adathe alo o Isus maškar lende hem vakergja: „O mir neka ovel tumencar“. 20 Otkeda vakergja akava, sikavgja lenge ple vasta hem o than kote so sine posavdo kopjea. Tegani o učenikija radujngje pe so dikhle e Gospodare. 21 Adaleske o Isus vakergja lenge palem: „O mir neka ovel tumencar. Sar so o Dad bičhalgja man, agjaar me bičhalava tumen“. 22 Keda vakergja lenge akava, phudingja ki lende hem vakergja: „Priminen e Devleskiri sila“.* 23 Ako tumen prostinena nekaskere grevija, tegani ka ovel lenge prostimo, a ako tumen na prostinena, nane te ovel lenge prostimo“.

24 A o Toma, jekh taro 12 apostolija, kole so vikinena sine Bliznako, na sine lencar keda alo o Isus. 25 Adaleske o javera učenikija vakergje leske: „Dikhlem e Gospodare!“ Ama ov vakergja lenge: „Sa džikote na dikhava o rane taro šajke leske ko vasta, džikote na čhivava mo naj ko adala rane hem na pipinava o than kote so sine posavdo, nane te verujnav!“

26 Palo ofto dive leskere učenikija palem sine khedime ko kher, akava puti o Toma da sine lencar. Iako o udara sine phanle, o Isus alo maškar lende hem vakergja: „O mir neka ovel tumencar!“ 27 Palo adava, vakergja e Tomaske: „Čhiv tlo naj akate hem dikh me vasta, čhiv tlo vas ko than kote so sium sine posavdo. Hem ma sumnin tut, nego verujn!“ 28 Tegani o Toma odgovoringja leske hem vakergja: „Mo Gospodari hem mo Devel!“ 29 A o Isus vakergja leske: „Dali verujngjan adaleske so dikhljan man? Srekjna tane okola kola so verujnena iako na dikhena“.

30 O Isus anglo ko učenikija kergja hem but javera da čudija kola so nane pišime ko akava lil.* 31 A akala bukja sine pišime te šaj te verujnen kaj o Isus tano čače o Hristos, o Čhavo e Devleskoro, hem adaleske so verujnena, te dobinen večno životo leske ko anav.

21 Palo adava, o Isus palem pojavingja pe ple učenikonge ko Tiverijadsko More. Ake sar slučingja pe adava: 2 Sine zaedno o Simon Petar, o Toma kas so vikinena le sine Bliznako, o Natanael so avela sine tari diz Kana so sine ki Galileja, o čhave e Zevedeeskere hem panda duj učenikija e Isuseskere. 3 O Simon Petar vakergja lenge: „Me ka džav te astarav mačhe“. A ola vakergje leske: „Amen da ka ava tuja“. Ola gele hem uklile ko čamco, ama adaja rat na astargje ništo.

4 Keda phravdilo o sabaj, o Isus tergjola sine ko brego, ama o učenikija na pendžargje le kaj tano ov. 5 Tegani o Isus pučlja len: „Čhavalen, isi li tumen nešto hajbaske?“ A ola odgovoringje leske: „Na!“ 6 Ov vakergja lenge: „Frden i mreža tari desno strana taro čamco hem ka astaren nešto“. Hem ola frdingje i mreža, ama adaleske so astargje but mačhe, našti sine te ikalen la. 7 Tegani o učeniko kole so o Isus posebno mangela sine, vakergja e Petareske: „Akava tano o Gospodari!“ Keda o Simon Petar šungja kaj adava tano o Gospodari, uravgja pli upruni nametka, adaleske so sine ekvaš nango hem frdingja pe ko more. 8 A o javera učenikija ale jekhe tikne čamcoja hem vlečinena sine pea i mreža so sine pherdi mačhencar, soske na sine dur taro brego, nego samo okolu 100 metre.*

9 Keda ale ko brego, ola dikhle maro hem mačho sar pekjona ko žarija. 10 Tegani o Isus vakergja lenge: „Anen hari taro mačhe so astargjen len akana“. 11 Hem o Simon Petar khuvgja ko čamco hem vlečingja i mreža ko kopno koja so sine pherdi bare mačhencar. Sine 153 mačhe. Iako sine but pherdi, sepak i mreža na pharavdili. 12 Tegani o Isus vakergja lenge: „Aven te han sabaluko“. A nikas taro učenikija na sine le hrabrost te pučel le: „Koj sian tu?“, adaleske so džanena sine kaj ov tano o Gospodari. 13 O Isus lelja o maro hem dengja len, a isto agjaar o mačhe da. 14 Akava više sine o trito puti sar o Isus pojavingja pe ple učenikonge otkeda sine voskresnimo.

15 Otkeda hale o Isus pučlja e Simon Petare: „Simon, tu o čhavo e Jovaneskoro, mangea man li poviše taro akala?“ A ov odgovoringja leske: „Oja, Gospodare, tu džanea kaj mangava tut“. Tegani o Isus vakergja leske: „Parvar me tikne bakhren“. 16 Hem palem pučlja le o dujto puti: „Simon, tu o čhavo e Jovaneskoro, mangea man li?“ Ov odgovoringja leske: „Oja, Gospodare, tu džanea kaj mangava tut“. Tegani o Isus vakergja leske: „Grižin tut me tikne bakhrenge“. 17 Hem pučlja le o trito puti da: „Simon, tu o čhavo e Jovaneskoro, mangea man li?“ A e Petareske pelo pharo so o Isus o trito puti da pučlja le: „Mangea man li?“ Adaleske odgovoringja leske: „Gospodare tu džanea sa, džanea kaj mangava tut“. Tegani o Isus vakergja leske: „Parvar me tikne bakhren. 18 Čače, čače vakerava tuke, keda sian sine poterno tu korkori uravea tut sine hem džaja sine kote mangea. Ama keda ka phujrove, ka pružine tle vasta hem o javera ka uraven tut hem ka ingaren tut kote so na mangea“. 19 Ov vakergja akava te sikavel save meribaja o Petar ka anel slava e Devleske. Palo adava vakergja leske: „Ponadari da dža pali mande“.

20 O Petar irangja pe hem dikhlja kaj pali lende phirela o učeniko, kaste so o Isus posebno mangela sine hem kova so večerake bešela sine uzo Isus, hem kova so pučlja le sine: „Gospodare, koj tano adava so ka predajnel tut?“ 21 Keda dikhlja le, o Petar pučlja e Isuse: „Gospodare, so ka ovel lea?“ 22 O Isus odgovoringja leske: „Ako me mangava ov te ačhol džikote na avava, soske tu sekirinea tut bašo adava? Tu ponadari da dža pali mande“. 23 Adaleske šundilo maškar o phralja kaj akava učeniko nane te merel. Ama o Isus na vakergja kaj ov nane te merel, nego vakergja: „Ako me mangava ov te ačhol džikote na avava, soske tu sekirinea tut bašo adava?“

24 Akava tano o učeniko kova so svedočingja bašo sa akala bukja hem pišingja len, a džanaja kaj leskere lafija tane čače.

25 Isi but javera da bukja so kergja o Isus, hem keda bi pišinena pe sine sa adala bukja ko sekova detali, mislinava kaj celo sveto ka našti te khedel o lila* so ka oven pišime.