BUKJA SO KERGJE O APOSTOLIJA

1 Ko mlo prvo lil, Teofile, pišingjum tuke bašo sa adava so taro početok o Isus kergja hem bašo sa adava so sikavgja e manušen, 2 pa sa dži ko dive keda o Devel lelja le upre ko nebo, otkeda preku e Devleskiri sila* dengja zapovedija e apostolenge so biringja len. 3 Otkeda cidingja muke hem mulo, ov pojavingja pe lenge but puti te šaj ola te oven sigurna kaj ov tano čače dživdo. Ov 40 dive pojavinela pe sine hem vakerela sine lenge bašo e Devleskoro Carstvo. 4 Keda ki jekh prilika khedingja pe lencar, zapovedingja lenge: „Ma džan tumenge taro Erusalim, nego adžikeren te ispolninel pe adava so o Dad vetingja hem bašo kova so vakergjum tumenge me da. 5 Soske, o Jovan krstinela sine panjea, a tumen panda hari ka oven krstime e Devleskere silaja“.*

6 A keda palem khedingje pe, pučle le: „Gospodare, dali akana ka obnovine o carstvo ko Izrael?“ 7 A ov odgovoringja lenge: „Samo o Dad soj ko nebo isi le vlast te odredinel o vreme keda ka oven o bukja, hem tumen na valjani te džanen bašo adava vreme. 8 Ama keda e Devleskiri sila* ka avel upri tumende, ka dobinen sila hem ka svedočinen baši mande ko Erusalim, ki celo Judeja, ki Samarija hem dži ko najdur thana ki phuv“.* 9 Otkeda vakergja lenge akava, anglo lengere jakhja o Devel lelja le upre ko nebo, jekh oblako učhargja le hem ola našti sine više te dikhen le. 10 Džikote ola dikhena sine ko nebo sar ov džala peske, taro jekh puti duj manuša uravde ko parne šeja pojavingje pe uzi lende 11 hem vakergje lenge: „Manušalen tari Galileja, soske tergjovena hem dikhena ko nebo? O Isus, kole so o Devel lelja le upre ko nebo, ka avel ko isto način sar so dikhlen le kaj džala ko nebo“.

12 Palo adava irangje pe ko Erusalim tari e Maslinkengiri Gora koja soj tani okolu jekh kilometro dur taro Erusalim.* 13 Keda resle, gele ki upruni soba ko kher kote so bešena sine. Adathe sine o Petar, o Jovan, o Jakov, o Andrej, o Filip, o Toma, o Vartolomej, o Matej, o Jakov o čhavo e Alfeeskoro, o Simon o Revno hem o Juda o čhavo e Jakoveskoro. 14 Ola khedena pe sine sarine zaedno hem na čhinavgje te molinen pe. A lencar sine nesave džuvlja, e Isuseskere phralja hem i daj leskiri i Marija.

15 Ko jekh taro adala dive, keda khedingje pe okolu 120 phralja, o Petar uštilo maškar lende hem vakergja: 16 „Phraljalen, mora sine te ispolninen pe o lafija so sine prorokujme ko Spisija, kola so vakergja len o David, vodimo tari e Devleskiri sila.* Ov vakergja bašo Juda, kova so angja e manušen te astaren e Isuse. 17 O Juda sine jekh amendar hem služinela sine zaedno amencar. 18 (Ov kingja peske jekh niva e parencar so dobingja baši nepravda so kergja, ama šereskoro pelo natele, leskoro telo phravdilo hem sa o pojra leskere čhordile avrijal.* 19 Bašo akava doznajngje sa o manuša taro Erusalim, hem adaleske ki pumari čhib vikinena sine adaja niva Akeldama, so značinela Ratvali niva.) 20 Soske, ko lil taro Psalmija pišinela: ’Leskoro kher neka ovel pusto, hem nikoj ma te živinel ki leste‘ hem ’Leskiri služba sar nadgledniko neka lel la nekoj javer‘. 21 Adaleske valjani te birina jekhe manuše so sine amencar celo vreme džikote o Gospodari o Isus sine amencar, 22 počmindor taro dive keda o Jovan krstingja le, pa sa dži ko dive keda o Devel lelja le upre ko nebo. E manuše so ka birina ka valjani zaedno amencar te svedočinel kaj o Isus voskresningja“.

23 Tegani predložingje dujen. Jekh sine o Josif kole so vikinena sine Varsava, pendžardo hem sar Just, a o dujto sine o Matij. 24 Palo adava molingje pe hem vakergje: „Jehova,* tu kova so pendžarea o vile sa e manušengere, sikav kas biringjan taro akala duj 25 te dobinel akaja služba hem te ovel apostoli, soske o Juda mukhlja akaja služba te šaj te džal ple drumoja“. 26 Tegani frdingje ždrepka* baši lende hem i ždrepka peli ko Matij. Agjaar ov sine dodajmo ko 11 apostolija.

2 Ko dive keda sine o prazniko Pedesetnica,* sarine sine zaedno ko isto than. 2 Hem taro jekh puti šundilo jekh zvuko taro nebo, sar keda phudela silno bavlal, adava zvuko šundilo ko celo kher kote so sine ola. 3 Tegani dikhle nešto so ličinena sine sar tikne jaga* kola so odvojngje pe hem upro sekova jekh lendar hulingja po jekh jag. 4 Hem sarine pherdile e Devleskere silaja* hem počmingje te keren lafi ko razna čhibja, agjaar sar so dela len sine te keren e Devleskiri sila.*

5 Ko adava vreme ko Erusalim ale Evreija tari sekoja phuv ko sveto kola so hor poštujnena sine e Devle. 6 Keda šundilo adava zvuko, but manuša khedingje pe hem sine bunime, soske sekova jekh lendar šungja sar o učenikija kerena lafi ki leskiri čhib. 7 Sarine sine iznenadime, čudingje pe, hem vakergje: „Nane li Galilejcija sa akala so kerena lafi? 8 Tegani sar šaj sekova jekh amendar ki pli čhib te šunel len sar kerena lafi? 9 Maškar amende isi manuša taro Parti, tari Medija, taro Elam, tari Mesopotamija, tari Judeja, tari Kapadokija, taro Pont hem tari azisko provincija,* 10 tari Frigija, tari Pamfilija, taro Egipet, taro thana ki Libija soj paše ki Kirinija, manuša so ale taro Rim, Evreija hem okola so prifatingje i evrejsko vera, 11 manuša taro Krit hem tari Arabija - sarine amen šunaja len sar kerena lafi ko amare čhibja bašo sa o bare bukja so kergja o Devel!“ 12 Sarine čudingje pe, sine bunime hem pučena pe sine jekh jekhea: „Soj akava so slučinela pe?“ 13 A nesave, asana sine lenge hem vakerena sine: „Ola matile tari mol“.

14 Ama o Petar zaedno e 11 apostolencar iklilo anglal hem ko celo glaso vakergja e manušenge: „Manušalen tari Judeja hem sarine tumen so živinena ko Erusalim, šunen šukar akava so ka vakerav tumenge! 15 Akala manuša nane mate sar so vakerena tumen, soske akana tano okolu enja o saati* sabajle. 16 Nego adava so dikhena akana, prorokujngja le o Joil, ov vakergja: 17 ’„A ko posledna dive“, vakerela o Devel, „ka dav tari mli sila* različna manušenge, hem tumare čhave hem tumare čhaja ka prorokujnen, tumare terne ka dikhen vizie,* a tumare phure ka dikhen sune. 18 Ko adala dive ka dav tari mli sila* čak mle robonge hem mle robinkenge, hem ola ka prorokujnen. 19 Ka kerav te pojavinen pe čudija ko nebo hem znakija ki phuv, rat, jag hem oblakija taro čuro. 20 Angleder te avel o baro hem o posebno dive e Jehovaskoro,* o kham ka ovel temno hem i mesečina ka ovel loli sar o rat. 21 Hem sekoj so ka vikinel e Jehovaskoro* anav, ka ovel spasimo‘“.

22 Manušalen taro Izrael, šunen akala lafija: o Isus o Nazarekjanco sine manuš so bičhalgja le o Devel, adava sine jasno taro mokjna delija, čudija hem znakija kola so o Devel maškar tumende kergja len preku leste, tumen adava korkori džanena. 23 Adava manuš sine predajmo tumenge ko vasta te šaj te ispolninel pe adava so o Devel odlučingja hem angleder džanlja. Tumen kovingjen le ko stubo agjaar so predajngjen le ko vasta e manušenge so phagena o Zakoni hem mudargjen le. 24 Ama o Devel voskresningja le hem oslobodingja le taro sindžirija e meribaskere, soske o meribe na sine le sila te ikerel le phanlo. 25 Soske, o David baši leste vakerela: ’O Jehova* tano sekogaš anglo mle jakhja, ov tano tari mli desno strana, adaleske nikogaš nane te ovav voznemirimo. 26 Adaleske mlo vilo radujngja pe hem mli čhib but radosno kergja lafi. Hem ka živinav agjaar so ka nadinav man ko Devel, 27 soske tu nane te mukhe man ko grobo, nane ni te dozvoline o telo tle verno slugaskoro te kirnjol. 28 Tu sikavgjan mange o drumo so ingarela ko životo, ka kere man radosno keda ka tergjovav angli tute‘.

29 Phraljalen, dozvolinen mange otvoreno te vakerav tumenge bašo amaro parapapo o David. Sar so džanena o David mulo hem sine parumo, hem leskoro grobo tano ki amari diz dži avdive. 30 Adaleske so sine proroko hem soske džanlja kaj o Devel dengja sovli kaj jekh taro leskere potomcija ka bešel ko leskoro prestol, 31 ov angleder dikhlja hem vakergja kaj o Hristos* ka voskresninel, kaj nane te ovel mukhlo ko grobo, hem kaj leskoro telo nane te kirnjol. 32 O Devel voskresningja e Isuse hem sarine amen siem svedokija bašo adava. 33 Adaleske so o Isus gelo upre ko nebo hem bešlja tari e Devleskiri desno strana, o Dad dengja le pli sila* sar so vetingja, a ov adaja sila dengja la amenge, sar so dikhena hem šunena. 34 Soske, o David na gelo ko nebo, nego korkori vakerela: ’O Jehova* vakerela mle Gospodareske: „Beš tari mli desno strana, 35 sa džikote na čhivava tle dušmanen telo tle pre!“‘ 36 Adaleske, sa o manuša ko Izrael neka džanen hem neka oven sigurna kaj o Devel kergja le hem Gospodari hem Hristos, e Isuse kole so tumen kovingjen ko stubo“.

37 A akala lafija so šungje pogodingje len ko vilo, pa vakergje e Petareske hem e javere apostolenge: „Phraljalen, so valjani te kera?“ 38 O Petar vakergja lenge: „Kainen tumen hem sekova jekh tumendar neka krstinel pe ko anav e Isus Hristoseskoro te šaj te oven leske prostime o grevija, hem ka dobinen e Devleskiri sila* sar poklon. 39 Soske, akava vetuvanje kaj ka priminen e Devleskiri sila,* tano dendo sa okolenge kas so o Jehova,* amaro Devel, ka vikinel ki peste: tumen, tumare čhaven hem sa okolen soj dur“. 40 Ov ponadari da kerela sine lencar lafi hem temelno svedočinela lenge sine hem pottikninela len sine: „Spasinen tumen tari akaja rumimi generacija!“ 41 Tegani okola so prifatingje celo vilea adava so vakergja o Petar, krstingje pe hem ko adava dive okolu 3.000 manuša ule učenikija. 42 Hem ola ponadari da sikljona sine taro apostolija, khedena pe sine zaedno, hana sine zaedno* hem molinena pe sine.

43 O apostolija kerena sine but čudija hem znakija. Sa o manuša dikhle adava hem počmingje te daran taro Devel. 44 A sa o neve učenikija khedena pe sine zaedno hem delinena sine maškar peste sa adava so sine len. 45 Ola bikinena sine pumaro imot hem o bukja so sine len, hem o pare delinena sine po doborom kobor so valjanela sekaske. 46 Sekova dive khedena pe sine zaedno ko hrami, džana sine jekh jekheste ko hajbe, radosno delinena sine o hajbe maškar peste hem adava kerena le sine iskreno vilea. 47 Ola falinena sine e Devle hem sa o manuša ceninena len sine. A o Jehova* ponadari da sekova dive spasinela sine sa poviše manušen hem ola da ovena sine učenikija.

3 Jekh dive o Petar hem o Jovan džana sine ko hrami te molinen pe, keda sine o vreme baši molitva, ko okolu trin o saati* diveskoro. 2 A baš tegani o manuša angje jekhe manuše kova so bijandilo sakati. Ole sekova dive anena le sine hem mukhena le paše uzi hramsko porta, koja so vikinela pe sine Šuži porta, te šaj te mangel peske taro okola so khuvena ko hrami. 3 Keda dikhlja e Petare hem e Jovane sar khuvena ko hrami, ov molingja len te den le nešto. 4 Ama o Petar hem o Jovan dikhle le hem vakergje leske: „Dikh amen“. 5 O manuš džikote dikhela len sine očekujnela sine te den le nešto. 6 A o Petar vakergja: „Nane man srebro hem zlato, ama adava so isi man, adava dava tut. Ko anav e Isus Hristoseske o Nazarekjanco, vakerava tuke, phir!“ 7 Tegani astargja le taro desno vas hem vazdingja le. Odma leskere pre sastile. 8 Keda terdilo ko pre, o manuš počmingja te phirel hem khuvgja lencar ko hrami, ov phirela sine, rupinela sine hem falinela sine e Devle. 9 Sa o manuša dikhle le sar phirela hem sar falinela e Devle. 10 Hem sarine pendžargje le kaj ov tano adava kova so bešela sine hem mangela peske sine uzi hramsko porta koja so vikinela pe Šuži porta. Ola čudingje pe hem sine vooduševime bašo adava so slučingja pe leske.

11 Džikote o manuš na mukhela sine e Petare hem e Jovane taro ple vasta, sa o manuša iznenadingje pe bašo adava so slučingja pe hem sigate ale ki lende ko than kova so vikinela pe e Solomoneskiri učhardi terasa. 12 Keda dikhlja adava o Petar vakergja e manušenge: „Manušalen taro Izrael, soske čudinena tumen bašo akava hem soske dikhena ki amende sar te phene amen kergjem akava manuš te phirel amare silaja ili adaleske so služinaja e Devleske celo vilea? 13 O Devel e Avraameskoro, e Isakoskoro hem e Jakoveskoro, o Devel amare parapapongoro, dengja slava ple Sluga, e Isuse, kole so tumen predajngjen le te ovel mudardo. Tumen otkažingjen tumen lestar anglo Pilat, iako ov sine rešimo te oslobodinel le. 14 Oja, tumen otkažingjen tumen taro adava sveto hem pravedno manuš, a rodingjen te ovel oslobodimo o manuš kova so mudargja, 15 a tumen mudargjen e Vodače kova so sine birimo te del životo. Ama o Devel vazdingja le taro mule, hem bašo adava amen siem svedokija. 16 Hem preku e Isuseskoro anav hem adaleske so verujnaja ko leskoro anav, o pre akale manušeskere, kole so dikhena hem pendžarena, sastile. Oja, adaleske so verujnaja ko Isus, akava manuš celosno sastilo angli tumende. 17 Ama akana, phraljalen, džanava kaj adava kergjen adaleske so na džanena sine so kerena, isto sar tumare poglavarija. 18 Agjaar o Devel ispolningja adava so angleder vakergja preku sa ple prorokija, kaj o Hristos* ka cidel muke.

19 Adaleske, kainen tumen hem iranen tumen ko Devel te šaj te kosen pe tumare grevija, hem o Jehova* te iranel tumari sila 20 hem te šaj ov te bičhalel tumenge e Hristose* kole so odredingja le tumenge, a adava tano o Isus. 21 Ov mora te ačhol ko nebo sa dži ko vreme keda o Devel ka iranel sa o bukja sar so sine angleder, sar so vetingja preku ple sveta prorokija taro purano vreme. 22 O Mojsej vakergja: ’O Jehova* tumaro Devel ka vazdel tumenge proroko taro tumare phralja, proroko sar so sium me. Tumen mora leste te šunen ko sa so vakerela tumenge! 23 Hem sekoj so nane te šunel akale Proroko ov ka ovel uništimo, hem agjaar ka ovel cidimo taro e Devleskoro narodo‘. 24 Znači, sa o prorokija so prorokujngje, počmindor taro Samoil pa naakari, jasno vakergje kaj ka aven adala dive. 25 Tumen sien o čhave e prorokongere hem naslednikija taro sojuz* so o Devel kergja tumare parapaponcar keda vakergja e Avraameske: ’Preku tlo potomstvo* sa o narodija ki phuv ka oven blagoslovime‘. 26 Otkeda o Devel vazdingja ple Sluga, prvo bičhalgja le ki tumende te blagoslovinel tumen sarinen, agjaar so ka pomožinel tumen te ciden tumen taro tumare lošna postapke“.

4 Džikote o Petar hem o Jovan panda kerena sine lafi anglo narodo, ale ki lende o sveštenikija, o hramsko zapovedniko hem o sadukeija.* 2 Ola sine holjame bašo adava so o apostolija sikavena sine e narodo hem adaleske so otvoreno vakerena sine e manušenge kaj o Isus voskresningja taro mule.* 3 Adaleske astargje len hem čhivgje len ko zatvor dži ko tajsutno dive, soske više sine akšami. 4 Ama but taro manuša so šungje len verujngje, hem o broj e muršengoro so ule vernikija barilo hem ulo okolu 5.000.

5 O tajsutno dive khedingje pe ko Erusalim o evrejska poglavarija, o starešine hem o učitelija e zakoneskere. 6 Isto agjaar, adathe sine o glavno svešteniko o Ana, o Kajafa, o Jovan, o Aleksandar hem sa okola so sine tari familija e glavno sveštenikoskiri. 7 Tegani angje e Petare hem e Jovane hem počmingje te pučen len: „Kotar tumenge adaja sila hem kaske ko anav kergjen adava?“ 8 Tegani o Petar pherdo e Devleskere silaja* vakergja lenge:

„Tumen o poglavarija e narodoskere hem o starešine, 9 ako avdive mangena te doznajnen amendar bašo šukaripe so sine kerdo akale manušeske, kova so sine sakati, hem kaske ko anav sastilo, 10 tegani sarine tumen hem sa o manuša ko Izrael neka džanen kaj akava ulo ko anav e Isus Hristoseske o Nazarekjanco, kole so tumen kovingjen ko stubo, a o Devel vazdingja le taro mule, preku leste akava manuš tergjola sasto akate angli tumende. 11 Ov tano ’o bar kova so tumen o graditelija frdingjen le, a ulo o glavno bar ki kjuša‘.* 12 Nane javer spasiteli osven leste, soske nane javer anav ki phuv so o Devel biringja maškar o manuša te šaj te spasinel amen“.

13 Keda o poglavarija e narodoskere hem o starešine dikhle i hrabrost e Petareskiri hem e Jovaneskiri, hem keda halile kaj akala tane obična manuša hem kaj nane len bari škola, but čudingje pe. Hem tegani sine lenge jasno kaj ola sine e Isusea. 14 Ama adaleske so dikhle e manuše so sine sasljardo sar tergjola adathe lencar, na sine len so te vakeren. 15 Adaleske naredingja e sotrinenge te ikljoven tari sala kote so sine o Sudsko sovet,* pa počmingje te dogovorinen pe hem vakergje: 16 „So te kera akale manušencar? Soske, točno tano kaj ola kergje baro čudo, bašo kova so džanena sa o manuša ko Erusalim. Našti te vakera kaj adava nane agjaar. 17 Ama te šaj adava te na širinel pe ponadari maškar o narodo, te darava len hem te vakera lenge više ma te keren lafi ko anav adale manušeske“.

18 Tegani palem vikingje len andre hem zapovedingje lenge više ma te keren lafi hem te na sikaven e narodo e Isuseske ko anav. 19 Tegani o Petar hem o Jovan vakergje lenge: „Sudinen korkori dali tano ispravno anglo Devel te šuna tumen, a na e Devle! 20 A amen našti te na kera lafi bašo adava so dikhlem hem šungjem“. 21 A ola otkeda panda jekh puti probingje te daraven len, oslobodingje len, soske na arakhle ništo te šaj te kazninen len hem darana sine taro narodo, soske sarine falinena sine e Devle bašo adava so slučingja pe. 22 Soske, e manuše so sasljargje le preku adava čudo sine le poviše taro 40 berš.

23 Keda oslobodingje len, o Petar hem o Jovan gele ko učenikija hem raskažingje lenge sa adava so vakergje lenge o glavna sveštenikija hem o starešine. 24 Keda ola šungje adava, sarine zaedno molingje pe e Devleske hem vakergje:

„Tu sian o Najbaro Gospodari, tu stvoringjan o nebo, i phuv, o more hem sa so isi ki lende! 25 Tu vodingjan tle silaja* amare parapapo e Davide, tle sluga, te vakerel: ’Soske o narodija tane voznemirime hem o manuša razmislinena bašo bukja so na vredinena? 26 O carija tari phuv spremingje pe te ušten protiv o Jehova* hem protiv okova kas so ov biringja te ovel o Hristos* hem o vladetelija khedingje pe zaedno protiv lende‘. 27 Akava čače slučingja pe keda o Irod* hem o Pontij Pilat zaedno e manušencar taro javera nacie hem e Izraelconcar khedingje pe ki akaja diz protiv tlo sveto sluga o Isus, kole so tu biringjan te ovel o Hristos.* 28 Ola khedingje pe te keren adava so tu angleder vakergjan kaj ka ovel. Adala bukja ule, soske tut isi tut i sila hem soske tu mangljan agjaar te ovel. 29 A akana, Jehova,* molinaja tut šun lengere lafija kolencar so mangena te daraven amen hem pomožin tle slugenge ponadari da hrabro te vakeren tlo lafi. 30 Ponadari da sikav tli sila agjaar so ka sasljare e nasvalen hem ka kere te oven znakija hem čudija preku o anav tle sveto slugaskoro e Isuseskoro“.

31 Keda molingje pe celo vilea, o than kote so sine khedime tresingja, hem sarine pherdile e Devleskere silaja* hem počmingje hrabro te vakeren e Devleskoro lafi.

32 Sine but učenikija hem sarine ola sine ko jekhipe ko misle hem ko vile, hem nijekh na vakerela sine kaj adava so isi le tano leskoro, nego delinena sine maškar peste sa adava so sine len. 33 A o apostolija but uspešno svedočinena sine bašo adava kaj o Gospodari, o Isus, voskresningja. Hem o Devel sarinen olen but blagoslovingja. 34 Ustvari nikaske lendar ništo na falinela sine, soske sarinen so sine len nive ili khera, bikinena len sine hem o pare so dobinena, anena len sine 35 hem dena len e apostolenge. Palo adava, sarinenge delinena sine doborom kobor so valjani sine lenge. 36 Agjaar kergja hem o Josif. Ov sine leviti kova so sine bijamo ko Kipar. O apostolija vikinena le sine Varnava (so značinela „o čhavo e utehakoro“). 37 Ov bikingja i phuv so sine le hem o pare angja len hem dengja len e apostolenge.

5 A jekh manuš kova so vikinela pe sine Ananija, zaedno ple romnjaja e Sapfiraja bikingje jekh delo tari phuv so sine len. 2 Hem bizo te džanen o javera, ov garavgja jekh delo taro pare, a bašo adava džanela sine leskiri romni da, a okova delo taro pare so ačhile angja hem dengja len e apostolenge. 3 A o Petar vakergja: „Ananija soske dozvolingjan o Satana te čhivel tut te hovave e Devleskere sila* hem te garave delo taro pare kola so dobingjan len keda bikingjan tli niva? 4 Na sine li i niva tli angleder te bikine la? A keda bikingjan la, šaj sine te kere e parencar so mangea. Tegani, soske mislingjan te kere asavki lošno buti? Tu na hovavgjan e manušen, nego e Devle“. 5 A keda o Ananija šungja adala lafija, pelo tele hem mulo. Hem sarine so šungje bašo akava, but darandile. 6 Tegani, nesave terne so sine adathe pakjargje le čaršafea, ikalgje le adathar hem parungje le.

7 Otkeda nakhle okolu trin saatija, ali leskiri romni, a na džanlja so ulo 8 hem o Petar pučlja la: „Vaker mange, dali doborom parenge bikingjen i niva?“ A oj vakergja: „Oja, doborom parenge“. 9 Tegani o Petar vakergja lake: „Soske dogovoringjen tumen te čhiven ko ispit i sila e Jehovaskiri?* Ake, anglo udara tane okola so parungje tle rome, a ka ingaren tute da“. 10 Hem oj odma peli anglo Petar hem muli. Keda o terne khuvgje andre, arakhle la muli, pa ikalgje la hem parungje la uzo lakoro rom. 11 Hem celo sobranie hem sarine so šungje bašo adava so ulo, but darandile.

12 A o apostolija kerena sine but znakija hem čudija maškar o manuša. Hem sarine ola zaedno khedena pe sine ki e Solomoneskiri učhardi terasa. 13 A e javeren na sine len hrabrost te kheden pe lencar. Ama o narodo falinena len sine. 14 Hem sa poviše murša hem džuvlja verujnena sine ko Gospodari hem ovena sine učenikija. 15 O manuša čak anena sine e nasvalen ko glavna ulice hem mukhena len sine adathe ko nosilke, te šaj keda ka nakhel o Petar barem tari leskiri senka te sasljon. 16 Isto agjaar, avena sine but manuša taro dizja so sine paše uzo Erusalim hem anena sine e nasvalen hem okolen so sine mučime taro demonija, hem sarine ola sasljona sine.

17 Ama o prvosvešteniko hem sa okola so sine lea, kola so sine tari sadukejsko sekta,* holjangje hem tari ljubomora 18 astargje e apostolen hem čhivgje len ko zatvor. 19 Ama rakjate e Jehovaskoro* angeli phravgja o udara taro zatvor, ikalgja len avrijal hem vakergja: 20 „Džan ko hrami hem ponadari da vakeren e manušenge bašo životo so ka avel“. 21 Otkeda šungje akala lafija, ola rano sabajle, keda počmingja te dikhjol, khuvgje ko hrami hem počmingje te sikaven e manušen.

A o prvosvešteniko hem okola so sine lea, khedingje celo Sudsko sovet* hem sa e starešinen taro izraelsko narodo, hem bičhalgje e stražaren ko zatvor te anen e apostolen ki lende. 22 Ama keda o stražarija resle ko zatvor, na arakhle len adathe. Adaleske irangje pe hem vakergje: 23 „O zatvor tano phanlo hem šukar obezbedimo, a o stražarija tergjona anglo udara. Ama keda phravgjem o udara, andre na sine nikoj“. 24 Keda o hramsko zapovedniko hem o glavna sveštenikija šungje akala lafija, sine bunime hem pučena pe sine so ka ovel akana. 25 Tegani nekoj alo hem javingja lenge: „Ake, ko hrami tane o manuša kolen so čhivgjen ko zatvor hem adathe ola sikavena e manušen“. 26 Tegani o zapovedniko zaedno ple stražarencar gelo hem angja e apostolen, ama na angje len silaja, soske darana sine kaj o manuša ka mudaren len barencar.

27 Agjaar angje len hem čhivgje len anglo Sudsko sovet.* A o prvosvešteniko počmingja te ispitinel len 28 hem vakergja lenge: „Amen strogo naredingjem tumenge te na sikaven e manušen ko adava anav, a tumen, ake, phergjen o Erusalim tumare sikajbaja hem mangena amen te krivinen bašo meribe adale manušeskoro“. 29 Tegani o Petar hem o javera apostolija vakergje: „Amen mora te šuna e Devle sar amaro vladeteli, a na e manušen. 30 O Devel amare parapapongoro voskresningja e Isuse, kole so tumen mudargjen agjaar so kovingjen* le ko stubo.* 31 Ole o Devel lelja le upre ko nebo hem čhivgja le te bešel tari leskiri desno strana sar Vodači hem sar Spasiteli, te šaj o Izraelcija te kainen pe hem te oven prostime lengere grevija. 32 Hem amen siem svedokija bašo adava. Isto agjaar i sila e Devleskiri* koja so o Devel dengja la okolenge so šunena le sar plo vladeteli, pomožingja amenge te svedočina bašo akava“.

33 Keda šungje akava, ola but holjangje hem mangle te mudaren len. 34 Ama tegani ko Sudsko sovet* uštilo jekh farisei, kova so vikinela pe sine Gamaliel, učiteli e zakoneskoro, so sine but poštujmo taro celo narodo, hem ov zapovedingja kratko te ikalen e apostolen avrijal. 35 Tegani vakergja lenge: „Manušalen taro Izrael, šukar razmislinen so ka keren akale manušencar. 36 Soske, angleder nesavo vreme pojavingja pe o Tevda kova so vakerela sine baši peste kaj tano važno manuš hem pridružingje pe leske okolu 400 manuša. Ama nesave manuša mudargje le hem leskere sledbenikija našle hem našavdile. 37 Pali leste, keda sine o popis, pojavingja pe o Juda, o Galilejco, hem but manuša gele pali leste. Ama ov da mulo, a leskere sledbenikija našle. 38 Adaleske akana vakerava tumenge: ma zadinen akale manušen, nego mukhen len. Soske, ako akava sikajbe ili akaja buti tani taro manuš, ka propadinel. 39 Ama ako tani taro Devel, ka našti te čhinaven len. Inače, ka ikljol kaj borinena tumen protiv o Devel“. 40 Ola šungje le hem vikingje e apostolen, margje len hem naredingje lenge te na keren više lafi ko e Isuseskoro anav. Palo adava mukhle len te džan peske.

41 O apostolija gele peske taro Sudsko sovet* hem sine radosna so sine len i čest te oven ladžakerde bašo e Isuseskoro anav. 42 Hem sekova dive ko hrami hem taro kher ko kher ola ponadari da, bizo te ačhon, sikavena sine hem vakerena sine o šukar haberi bašo Hristos* Isus.

6 Ko adala dive, keda o broj e učenikongoro bajrola sine, o Evreija kola so kerena sine lafi ki grčko čhib počmingje te žalinen pe taro Evreija kola so kerena sine lafi ki hebrejsko čhib, soske lengere udovice na dobinena sine o hajbe so delinela pe sine sekova dive. 2 Adaleske o 12 apostolija vikingje sa e učenikon ki peste hem vakergje lenge: „Nane šukar* amen te čhinava te sikava e manušen bašo e Devleskoro lafi te šaj te delina o hajbe. 3 Adaleske phraljalen, birinen maškar tumende efta manušen kola soj tane ko šukar glaso, soj pherde e Devleskere silaja* hem pherde mudrost. Lenge ka da akaja zadača. 4 A amen ka koristina amaro vreme hem amari sila te molina amen hem te sikava bašo e Devleskoro lafi“. 5 Sa e učenikonge svidžingja pe adaja odluka. Tegani ola biringje e Stefane, kole so sine le bari vera hem kova so sine pherdo e Devleskere silaja.* Maškar adala so sine birime isto agjaar sine o Filip, o Prohor, o Nikanor, o Timon, o Parmen hem o Nikola tari Antiohija so prifatingja i evrejsko vera. 6 Olen angje len anglo apostolija. Hem otkeda o apostolija molingje pe e Devleske, čhivgje pumare vasta upri lende.

7 Agjaar e Devleskoro lafi sa poviše širinela pe sine hem o broj e učenikongoro ko Erusalim sa poviše bajrola sine. Maškar lende sine hem but sveštenikija kola so ule vernikija.

8 A o Devel sikavgja pli milost e Stefaneske, dengja le bari sila hem ov kerela sine bare čudija hem znakija maškar o narodo. 9 Ama nesave manuša tari jekh grupa so vikinela pe sine Sinagoga e oslobodimengiri, zaedno nesave manušencar tari Kirinija, tari Aleksandrija, tari Kilikija hem tari Azija, ale te protivinen pe e Stefaneske. 10 Sepak, ola našti sine te vakeren ništo protiv adava so vakerela sine o Stefan, soske ov kerela sine but mudro lafi hem sine vodimo tari e Devleskiri sila.* 11 Adaleske ola tajno čhivgje manušen te vakeren: „Šungjem le sar kerela lafi protiv o Mojsej hem o Devel“. 12 Keda šungje adala lafija o narodo, o starešine hem o učitelija e zakoneskere but holjangje, pa astargje e Stefane hem silaja ingargje le anglo Sudsko sovet.* 13 Palo adava angje e hovavne svedokon kola so vakergje: „Akava manuš na čhinavela te kerel lafi protiv e Devleskoro hrami hem protiv o Zakoni. 14 Na primer, šungjem le sar vakerela kaj adava Isus o Nazarekjanco ka rušinel akava than hem kaj ka meninel o običaija so dengja len amenge o Mojsej“.

15 Hem sa okola so bešena sine ko Sudsko sovet* dikhena sine ko Stefan hem dikhle kaj leskoro muj sine sar jekhe angeleskoro.

7 Tegani o prvosvešteniko pučlja: „Čače li akava?“ 2 A o Stefan vakergja: „Phraljalen hem tumen so sien mange sar dada, šunen man! O baro Devel pojavingja pe amare parapaposke e Avraameske džikote ov sine ki Mesopotamija, angleder te selinel pe ko Haran, 3 hem vakergja leske: ’Mukh tli phuv hem tle pašutnen hem dža ki phuv koja so ka sikavav tuke me‘. 4 Tegani ov gelo peske tari phuv e Haldejcongiri hem selingja pe ko Haran. A adathar, otkeda mulo o dad leskoro, o Devel vakergja leske te selinel pe ki akaja phuv, kote so akana tumen živinena. 5 Ama o Devel na dengja le nasledstvo ki akaja phuv, a ni jekh tikno than kote so ka šaj samo te čhivel ple pre. Ama vetingja kaj akaja phuv ka del la leske hem leskere potomconge, iako e Avraame na sine le panda čhave keda o Devel vakergja leske akala lafija. 6 O Devel isto agjaar vakergja leske kaj leskere potomcija ka oven strancija ki tugjo phuv hem ka oven robija ki adaja phuv hem 400 berša ka oven mučime. 7 ’Ama, me ka sudinav adale manušenge kaske so ola ka oven robija‘, vakergja o Devel, ’a palo adava ola ka ikljoven tari adaja phuv hem ka služinen mange ko akava than.‘

8 O Devel isto agjaar kergja lea sojuz* bašo suneti hem keda e Avraameske bijandilo o Isak, ov kergja le suneti ko oftoto dive. Hem e Isakoske bijandilo o Jakov,* a e Jakoveske, amare 12 parapapija. 9 Ama amare parapapija ule ljubomorna ple phraleske e Josifeske hem bikingje le ko Egipet. Ama o Devel sine lea, 10 hem oslobodingja le taro sa o nevolje so sine le. O Devel dengja e Josife mudrost hem pomožingja leske te dikhel ki leste šukar čak o faraoni, o cari taro Egipet. Hem o faraoni čhivgja le te upravinel upro Egipet hem upro leskoro kher. 11 Tegani upro celo Egipet hem Hanaan ali bari nevolja, sine baro bokhalipe hem amare parapapija našti sine te arakhen ništo hajbaske. 12 Ama o Jakov šungja kaj isi hajbaske ko Egipet hem adari bičhalgja amare parapapon o prvo puti. 13 Keda gele o dujto puti, o Josif vakergja ple phralenge koj tano hem o faraoni doznajngja baši e Josifeskiri familija. 14 Tegani o Josif vikingja adathar ple dade hem celo ple familija, sa vkupno 75 džene. 15 Agjaar o Jakov gelo ko Egipet hem mulo adathe. A adathe mule hem amare parapapija. 16 Hem lengere kokala sine ingarde ko Sihem hem čhivde ko grobo kova so o Avraam srebroja kingja taro e Emoreskere čhave ko Sihem.

17 Ama sar so avela sine o vreme te ispolninel pe adava so o Devel vetingja e Avraameske, e Jakoveskoro potomstvo bajrovela sine sa poviše hem poviše ko Egipet. 18 Sa džikote na počmingja te vladinel javer cari ko Egipet, kova so na džanela sine ništo bašo Josif. 19 Akava cari kergja jekh zlobno plani protiv amare parapapija hem teringja len te mukhen pumare beben te oven mudarde. 20 Baš ko adava vreme bijandilo o Mojsej, ov sine but šužo.* Trin masek grižingje pe leske leskere roditelija ko pumaro kher. 21 Ama keda leskere roditelija mora sine te mukhen le, lelja le e faraoneskiri čhaj hem bajrargja le sar plo čhavo. 22 Agjaar o Mojsej sine sikavdo baši celo egipetsko mudrost. Leskere lafija hem o bukja so kerela len sine sikavgje kaj ov sine mokjno manuš.

23 A keda sine le 40 berš, ov odlučingja te džal te dikhel ple phralen, e Izraelcon. 24 Jekh dive keda dikhlja sar jekh Egipkjani postapinela nepravedno jekhe Izraelcoja, ov braningja ple phrale hem odmazdingja pe e Egipkjaneske agjaar so mudargja le. 25 Ov mislingja peske kaj leskere phralja ka haljon kaj o Devel ka spasinel len preku leste, ama ola na halile adava. 26 O tajsutno dive keda alo ki lende, dikhlja sar duj Izraelcija marena pe. Probingja te smirinel len hem vakergja lenge: ’Manušalen, tumen sien phralja! Soske marena tumen maškar tumende?‘ 27 Ama o manuš so marela sine ple phrale, guringja e Mojsee hem vakergja leske: ’Koj čhivgja tut te vladine upro amende hem te sudine amenge? 28 Te na mangea te mudare mande da, sar so mudargjan e Egipkjane erati?‘ 29 Keda šungja adala lafija, o Mojsej našlja hem živingja sar stranco ki madijamsko phuv, kote so bijandile leske duj murša.

30 Palo 40 berš, pojavingja pe leske jekh angeli ki pustina paše uzi i planina Sinaj, ki jag tari jekh grmuška so thabljola sine. 31 O Mojsej čudingja pe keda dikhlja adava. Džikote avela sine popaše te šaj te dikhel pošukar, šungja e Jehovaskoro* glaso sar vakerela: 32 ’Me sium o Devel tle parapapongoro, o Devel e Avraameskoro, e Isakoskoro hem e Jakoveskoro‘. Tegani o Mojsej počmingja te tresinel hem tari dar na gelo popaše. 33 Tegani o Jehova* vakergja leske: ’Huljav o sandale taro te pre, soske o than kote so tergjovea tano sveto. 34 Dikhljum kaj mlo narodo ko Egipet tano maltretirimo hem šungjum lengoro ofkibe, hem huliljum tele te spasinav len. Adaleske akana bičhalava tut ko Egipet!‘ 35 Adava Mojsej, kole so ola otfrlingje agjaar so vakergje: ’Koj čhivgja tut te vladine upri amende hem te sudine amenge?‘, ole o Devel bičhalgja le hem sar vladeteli hem sar spasiteli preku o angeli kova so pojavingja pe leske ki grmuška. 36 Adava manuš ikalgja len avrijal taro Egipet agjaar so kergja znakija hem čudija ki adaja phuv, ko Crveno More hem ki pustina 40 berš.

37 Akava tano adava Mojsej kova so vakergja e Izraelconge: ’O Devel ka vazdel tumenge proroko taro tumare phralja, proroko sar so sium me‘. 38 Ov sine ki pustina zaedno e narodoja. O angeli lea kergja lafi ki planina Sinaj hem amare parapaponcar. Ov šungja e Devleskere lafija so isi len mokj te šaj te del len amenge. 39 A amare parapapija na mangle te oven leske poslušna, nego otfrlingje le hem ko pumare vile irangje pe ko Egipet, 40 hem vakergje e Aroneske: ’Ker amenge devela so ka vodinen amen. Soske na džanaja so slučingja pe adale Mojseea, so ikalgja amen taro Egipet‘. 41 Tegani kergje peske telco, dengje žrtva adale idoleske hem veselingje pe anglo adava so kergje pumare vastencar. 42 Adaleske o Devel cidingja pe lendar hem mukhlja len te obožavinen o bukja soj ko nebo, sar soj pišimo ko lil taro Prorokija: ’Manušalen taro Izrael, zarem mange dengjen razna žrtve 40 berš ki pustina? 43 Na, nego phiravgjen o šatori e Moloheskoro hem i zvezda e devleskiri Romfa, o kipija so kergjen te šaj te obožavinen len. Adaleske ka kerav te ingaren tumen sar zarobenikija podur taro Vavilon‘.

44 Amare parapapon ki pustina sine len o sveto šatori.* O Devel zapovedingja e Mojseeske te keren le hem ola kergje le sprema o plani so sikavgja leske o Devel. 45 Amare parapapija dobingje adava šatori taro pumare dada hem zaedno e Isus Navinea angje le ki phuv e javere narodongiri, kolen so o Devel brkingja len anglo amare parapapija. O šatori ačhilo adathe dži ko e Davideskoro vreme. 46 O David sine manglo taro Devel hem ov vakergja kaj mangela te kerel kher* e Jakoveskere Devleske. 47 Ama ov na kergja adava kher, nego o Solomon. 48 A o Najbaro na živinela ko khera soj kerde taro manuša, sar so vakerela o proroko: 49 ’O nebo tano mlo prestol, a i phuv tani telo mle pre. Savo kher ka keren mange?‘, vakerela o Jehova.* ’Kote tano o than kote so ka šaj te živinav? 50 Na kergjum li sa adava mle vastencar?‘

51 Tumen sien tvrdoglava manuša so phandena tumaro vilo hem tumare kana.* Tumen sekogaš protivinena tumen e Devleskere silake,* sar so kerena sine tumare parapapija, agjaar kerena tumen da. 52 Tumare parapapija progoninena sine sa e prorokon. Čak mudargje okolen kola so vakergje kaj ka avel okova soj pravedno, kole so tumen akana predajngjen hem mudargjen. 53 Tumen primingjen o Zakoni preku o angelija, ama na ikergjen tumen ki leste“.

54 Keda šungje adava, holjangje leske but hem počmingje te krcinen pumare dandencar. 55 A o Stefan, pherdo e Devleskere silaja,* dikhela sine upre ko nebo hem dikhlja e Devleskiri slava hem e Isuse sar tergjola tari e Devleskiri desno strana. 56 Hem vakergja: „Ake, dikhava o nebo phravdo hem o manušikano Čhavo* sar tergjola tari e Devleskiri desno strana“. 57 Tegani ola počmingje te vikinen ko celo glaso hem te phanden vastencar pumare kana, hem sarine zaedno napadingje le. 58 Otkeda ikalgje le avrijal tari diz, počmingje te frden barencar upri leste. A o svedokija kola so kergje protiv leste lafi, mukhle pumare nametke anglo jekh terno manuš so vikinela pe Savle. 59 Džikote frdena sine barencar upri leste, o Stefan molingja pe: „Gospodare Isus, dava mlo životo ko tle vasta“. 60 Palo adava, pelo ko kočaka hem glasno vikingja: „Jehova,* ma kaznin len bašo akava grevo“. Otkeda vakergja adava, mulo.*

8 A o Savle da odobringja te mudaren e Stefane.

Adava dive počmingja baro progonstvo protiv o phralja hem o phenja taro sobranie so sine ko Erusalim. Adaleske sarine, osven o apostolija, našle ki Judeja hem ki Samarija. 2 A o manuša so sine verna e Devleske lele e Stefane hem parungje le hem but rungje baši leste. 3 Ko adava vreme o Savle počmingja but te progoninel e phralen hem e phenjen taro sobranie. Ov khuvela sine ko khera hem silaja ikalela sine e džuvlen hem e muršen hem ingarela len sine te čhiven len ko zatvor.

4 Ama o učenikija so našle ko javera thana, vakergje o haberi taro e Devleskoro lafi segde kotar so nakhle. 5 Agjaar o Filip gelo ki diz Samarija* hem počmingja e manušenge adari te propovedinel bašo Hristos.* 6 A o manuša zaedno šunena sine vnimatelno adava so vakerela o Filip hem dikhena sine o čudija so kerela len sine. 7 Soske, adathe sine but manuša kolen so sine len demonija. Adala demonija glasno vikinena sine hem ikljona sine taro manuša. Hem but manuša so sine paralizirime hem sakatija sine sasljarde. 8 Adaleske o manuša tari adaja diz but radujngje pe.

9 Ki adaja diz sine jekh manuš so vikinela pe Simon, ov kerela sine magie hem vakerela sine baši peste kaj tano baro manuš, a o narodo tari Samarija sine vooduševimo lestar. 10 Taro najtikno dži ko najbaro, vnimatelno šunena le sine, hem vakerena sine: „Upro akava manuš tani e Devleskiri bari sila“. 11 O manuša šunena le sine, soske ov više but vreme vooduševinela len sine ple magiencar. 12 Ama keda o Filip vakergja lenge o šukar haberi bašo e Devleskoro Carstvo hem bašo anav e Isus Hristoseskoro, but murša hem džuvlja verujngje le hem krstingje pe. 13 O Simon da ulo verniko, hem otkeda krstingja pe celo vreme sine uzo Filip. Ov sine vooduševimo keda dikhela sine o znakija hem o bare čudija so kerela len sine o Filip.

14 Keda o apostolija ko Erusalim šungje kaj o manuša tari Samarija prifatingje e Devleskoro lafi, ola adari bičhalgje e Petare hem e Jovane. 15 Ola ale, hem molingje pe te šaj okola so verujngje te dobinen e Devleskiri sila.* 16 Soske, panda nikoj lendar na dobingja e Devleskiri sila,* nego samo sine krstime ko anav e Gospodareske e Isuseske. 17 Adaleske, o Petar hem o Jovan čhivgje pumare vasta upri lende hem ola dobingje e Devleskiri sila.*

18 Keda o Simon dikhlja kaj o manuša dobingje e Devleskiri sila* otkeda o apostolija čhivgje pumare vasta upri lende, ov nudingja e apostolenge pare 19 hem vakergja: „Den mange da adaja mokj, te šaj sekoj upri kaste so ka čhivav mle vasta, te priminel e Devleskiri sila“.* 20 Ama o Petar vakergja leske: „Tlo srebro neka ovel uništimo zaedno tuja, adaleske so mislingjan kaj e parencar šaj te kine adava so o Devel dela le sar poklon. 21 Tut nane tut ništo akale bukjaja, soske o Devel dikhela kaj tlo vilo nane iskreno. 22 Adaleske, kain tut baši tle lošna misle hem molin tut taro vilo e Jehovaske* te prostinel tuke bašo akala lošna misle so isi tut, 23 soske, dikhava kaj sian pherdo ljubomoraja hem kaj sekogaš mangljan te kere adava soj pogrešno!“ 24 A o Simon vakergja lenge: „Tumen molinen tumen taro vilo e Jehovaske* baši mande, te šaj te na slučinel pe mange ništo taro adava so vakergjen“.

25 Otkeda segde svedočingje hem vakergje bašo e Jehovaskoro* lafi, džikote iranena pe sine ko Erusalim ola vakerena sine o šukar haberi ko but gava tari Samarija.

26 A e Jehovaskoro* angeli vakergja e Filipeske: „Dža ko jug, ko drumo kova so ingarela taro Erusalim dži ki Gaza!“ (Adava drumo tano pusto.) 27 Tegani ov gelo hem arakhlja jekhe Etiopjane kova so sine carsko službeniko.* Ole sine le baro avtoriteti hem služinela sine e caricake tari Etiopija* hem sine odgovorno bašo celo lakoro barvalipe. Ov alo ko Erusalim te pokloninel pe e Devleske, 28 hem akana iranela pe sine khere. Ov bešela sine ki pli kočija hem ko glaso čitinela sine o lafija taro proroko o Isaija. 29 Hem o Devel preku pli sila* vakergja e Filipeske: „Dža dži ki adaja kočija“. 30 Tegani o Filip prastandilo dži ki kočija hem šungja le sar čitinela ko glaso taro proroko o Isaija, hem pučlja le: „Haljovea li adava so čitinea?“ 31 A ov odgovoringja: „Sar ka haljovav ako nekoj na objasninela mange?“ Hem zamolingja e Filipe te uklel ki kočija hem te bešel uzi leste. 32 A ov čitinela sine akala lafija taro proroštvo: „Sar bakhro ingargje le čhinibaske, hem sar tikno bakhro so čutinela anglo okova so muravela le, agjaar ov da na phravgja plo muj. 33 Džikote sine ponižimo, nepravedno postapingje lea. Koj ka vakerel bašo leskoro poteklo? Soske, leskoro životo tano lendo tari phuv“.

34 Tegani o carsko službeniko* vakergja e Filipeske: „Molinava tut vaker mange ki kaste mislinela akate o proroko? Ki peste ili javereste?“ 35 Tegani o Filip počmindor taro akava proroštvo, vakergja leske o šukar haberi bašo Isus. 36 Džikote sine ko drumo, resle dži ko jekh than kote so sine pani, a o carsko službeniko* vakergja: „Dikh, ake pani! So čhinavela man te krstinav man?“ 37* -- 38 Tegani ov zapovedingja te ačhol i kočija, zaedno khuvgje ko pani hem o Filip krstingja le. 39 A keda iklile taro pani, e Jehovaskiri* sila vodingja e Filipe te džal ko javer than hem o carsko službeniko* na dikhlja le više, ama radosno prodolžingja ko plo drumo. 40 A o Filip reslja ko Azot, hem vakerela sine bašo šukar haberi ko sa o thana kotar so nakhela sine sa džikote na reslja ki Cezareja.

9 O Savle kova so panda zakaninela pe sine e učenikonge hem mangela sine te mudarel len, gelo ko prvosvešteniko 2 hem rodingja lestar te pišinel pismija dži ko sinagoge* ko Damask. Akala pismija dengje le dozvola te rodel, te astarel hem phanle vastencar te anel ko Erusalim e muršen hem e džuvlen so pripadinena sine ko Drumo.*

3 Džikote sine paše uzo Damask, taro jekh puti jekh svetlo taro nebo svetingja upri leste. 4 Tegani ov pelo ki phuv hem šungja glaso so vakergja leske: „Savle, Savle, soske progoninea man?“ 5 A ov pučlja: „Koj sian tu Gospodare?“ Ov vakergja leske: „Me sium o Isus, kole so tu progoninea. 6 Ama akana ušti hem khuv ki diz, hem adari nekoj ka vakerel tuke so te kere“. 7 A o manuša so patujnena sine lea ačhile bizo lafija, soske šunena sine kaj nekoj kerela lafi, ama na dikhena sine nikas. 8 Tegani o Savle uštilo, hem iako leskere jakhja sine phravde, našti sine te dikhel ništo. Adala so sine lea, astargje le taro vas hem ingargje le ko Damask. 9 Hem trin dive na dikhlja ništo hem ni na halja, ni na pilja.

10 A ko Damask sine jekh učeniko so vikinela pe sine Ananija. Leske o Gospodari ki jekh vizija* vakergja: „Ananija!“ A ov odgovoringja leske: „Ake sium, Gospodare!“ 11 A o Gospodari vakergja leske: „Ušti, dža ki ulica so vikinela pe Pravo, hem ko kher e Judaskoro rode jekhe manuše taro Tars, so vikinela pe Savle. Ov baš ko akava momenti molinela pe, 12 hem ki vizija* dikhlja tut Ananija, sar khuvea hem čhivea tle vasta upri leste te šaj palem te dikhel“. 13 A o Ananija vakergja: „Gospodare, butendar šungjum bašo akava manuš, kobor lošnipe kergja tle učenikonge* ko Erusalim 14 hem ov sine bičhaldo akate taro glavna sveštenikija te astarel* sa tle sledbenikon“.* 15 A o Gospodari vakergja leske: „Dža, soske me biringjum akale manuše te svedočinel baši mande e manušenge taro javera nacie, e carenge hem e Izraelconge. 16 Me ka sikavav leske kobor mora te cidel muke bašo mlo anav“.

17 Agjaar o Ananija gelo hem khuvgja ko kher, čhivgja ple vasta upri leste hem vakergja: „Savle, phrala! O Gospodari o Isus, kova so pojavingja pe tuke ko drumo kolestar so avea sine naakari, ov bičhalgja man ki tute te šaj palem te dikhe hem te phergjove e Devleskere silaja“.* 18 Hem nešto so sine sar lušpe odma pele taro leskere jakhja, hem počmingja palem te dikhel. Tegani uštilo hem krstingja pe, 19 pa lelja nešto te hal hem agjaar dobingja sila.

Ov nekobor dive ačhilo e učenikoncar ko Damask, 20 hem odma počmingja te propovedinel ko sinagoge* kaj o Isus tano o Čhavo e Devleskoro. 21 A sarine okola so šunena le sine, sine iznenadime hem vakerena sine: „Nane li akava o manuš so ko Erusalim but progoninela sine e Isuseskere sledbenikon?* Na alo li akate te astarel len hem te ingarel len* anglo glavna sveštenikija?“ 22 A o Savle sa pouverlivo propovedinela sine, hem o Evreija so živinena sine ko Damask na sine len so te vakeren, soske ov sikavela sine lenge jasna dokazija kaj o Isus tano o Hristos.*

23 Palo nesavo vreme o Evreija dogovoringje pe te mudaren le. 24 Ama o Savle doznajngja bašo lengoro plani. Te šaj te mudaren le, ola dive hem rat pazinena sine e dizjakere porte. 25 Adaleske leskere učenikija jekh rat lele le hem čhivgje le ki jekh korpa, hem laja mukhle le natele tari jekh pendžerka so sine ko zido.

26 Keda reslja ko Erusalim, ov probingja te ovel zaedno e učenikoncar, ama sarine darana sine lestar, soske na verujnena sine kaj ov ulo e Isuseskoro učeniko. 27 Tegani, o Varnava pomožingja le hem ingargja le ko apostolija, hem vakergja lenge sa bašo adava sar o Savle ko drumo dikhlja e Gospodare hem kergja lea lafi, hem isto agjaar sar ko Damask hrabro kerela sine lafi e Isuseske ko anav. 28 Adaleske o Savle ačhilo lencar hem slobodno phirela sine ko Erusalim* hem hrabro kerela sine lafi e Gospodareske ko anav. 29 Ov kerela sine lafi e Evreencar kola so kerena sine lafi ki grčko čhib hem braninela sine adava koleste so verujnela sine, a ola probinena sine te mudaren le. 30 Keda o phralja doznajngje bašo adava, ingargje le ki Cezareja hem bičhalgje le ko Tars.

31 Ko adava vreme o sobranija* ki celo Judeja, Galileja hem Samarija sine len mir adaleske so na sine progonime, hem ovena sine pozorale. Adaleske so sikavena sine kaj darana taro Jehova* hem adaleske so dobinena sine i uteha tari e Devleskiri sila,* o broj e učenikongoro bajrola sine.

32 A o Petar, otkeda nakhlja celo adava podračje, alo ko učenikija* so živinena sine ki Lida. 33 Ko adava than arakhlja jekhe manuše so vikinela pe sine Enej. Ov pašljola sine ki postela ofto berš, soske sine paralizirimo. 34 O Petar vakergja leske: „Enej, o Isus Hristos sasljarela tut. Ušti hem namestin tli postela“. Hem ov odma uštilo. 35 Keda dikhle akava sa adala so živinena sine ki Lida hem ko Saron, počmingje te verujnen ko Gospodari.

36 A ki Jopa sine jekh džuvli koja so sine jekh taro e Isuseskere učenikija. Lakoro anav sine Tavita, ili ki grčko čhib Dorka.* Oj stalno kerela sine šukaripa hem pomožinela sine e čorolenge. 37 Ama džikote o Petar sine ki Lida, i Tavita nasvalili hem muli. Tegani nangjargje la hem čhivgje la ki soba ko upruno sprati. 38 Adaleske so i Lida sine paše uzi Jopa, keda šungje o učenikija kaj o Petar tano ki adaja diz, bičhalgje duje manušen ki leste te molinen le: „Molinaja tut, ava ki amende so šaj posigate!“ 39 Tegani o Petar uštilo hem gelo lencar. Keda reslja, ingargje le ki soba so sine ko upruno sprati. Hem sa o udovice ale ki leste hem rovindor sikavgje leske sa o šeja hem o nametke so kergja lenge i Dorka džikote sine dživdi. 40 Tegani o Petar ikalgja sarinen avrijal, pelo ko kočaka hem molingja pe, a palo adava irangja pe ki late hem vakergja: „Tavita ušti!“ A oj keda phravgja ple jakhja dikhlja e Petare hem bešlja. 41 O Petar dengja la plo vas hem vazdingja la. Tegani vikingja e učenikon* hem e udovicen hem sikavgja lenge kaj i Tavita tani dživdi. 42 Adava šundilo ki celo Jopa hem but manuša počmingje te verujnen ko Gospodari. 43 A o Petar ačhilo poviše vreme ki Jopa ko jekh kožari* so vikinela pe sine Simon.

10 A ki Cezareja sine jekh manuš so vikinela pe sine Kornelij. Ov sine komandiri* ki jekh četa so vikinela pe sine Italijansko.* 2 O Kornelij darala sine taro Devel hem obožavinela le sine celo ple familijaja. Ov kerela sine but šukar bukja e čorole manušenge hem stalno taro vilo molinela pe sine e Devleske. 3 Jekh dive, okolu trin o saati* diveskoro, ov jasno dikhlja ki vizija* jekhe Devleskere angele sar avela ki leste hem vakerela leske: „Kornelij!“ 4 Ama ov but darandilo hem džikote dikhela sine pravo ko angeli, pučlja le: „So mangea te kerav Gospodare?“ Ov odgovoringja leske: „O Devel šungja tle molitve, dikhlja o šukar bukja so kerea e čorolenge hem na bistergja adava. 5 Adaleske akana bičhal manušen ki Jopa hem vikin e Simone, kole so o manuša vikinena le Petar. 6 Ov tano gosto ko jekh manuš so vikinela pe Simon, o kožari,* so isi le kher uzo more“. 7 Samo so gelo peske o angeli so kergja lea lafi, ov vikingja duje slugen hem jekhe vojniko so darala sine taro Devel, kova so stalno sine lea. 8 Ov raskažingja lenge sa hem bičhalgja len te džan ki Jopa.

9 O tajsutno dive, džikote ola sine ko drumo hem sine paše uzi diz, o Petar gelo ko e khereskoro krovi okolu 12 o saati* diveskoro te šaj te molinel pe. 10 Ama but bokhalilo hem mangela sine nešto te hal. Džikote kerena sine leske hajbaske, ov dikhlja jekh vizija.* 11 Dikhlja o nebo phravdo hem nešto so ličinela sine sar baro leneno čaršafi, ikerdo taro leskere štar kraija, sar mukhela pe tele ki phuv. 12 Ki leste sine životne taro sa o vrste: e štare prengere, o sapa, o gušterija hem o ptice. 13 Tegani jekh glaso vakergja leske: „Petar, ušti! Čhin hem ha!“ 14 Ama o Petar vakergja leske: „Na Gospodare, soske me nikogaš na haljum nešto soj zabranimo hem so nane čisto!“ 15 A o glaso palem, o dujto puti da, vakergja leske: „Ma vaker kaj nane čisto adava so o Devel kergja te ovel čisto!“ 16 Ov šungja akava glaso o trito puti da, hem taro jekh puti adava so dikhlja sine lendo ko nebo.

17 Džikote o Petar sine panda bunimo hem pučela pe sine so značinela i vizija so dikhlja, o manuša kolen so bičhalgja len o Kornelij, arakhle e Simoneskoro kher hem više resle anglo udar. 18 Ola vikingje e kherutnen hem pučle len dali tano lende gosto o Simon, kole so vikinena le sine Petar. 19 Džikote o Petar razmislinela sine baši vizija so dikhlja, o Devel preku pli sila* vakergja leske: „Ake, rodena tut trin murša. 20 Adaleske ušti, huli tele hem dža lencar bizo te misline tut, soske me bičhalgjum len!“ 21 Tegani o Petar hulilo tele ko manuša hem vakergja lenge: „Ake, me sium adava kaste so rodena. Soske alen?“ 22 A ola vakergje leske: „Bičhalgja amen o Kornelij, o komandiri,* pravedno manuš kova so darala taro Devel hem baši kaste so sa o Evreija kerena šukar lafi. Leske o Devel preku plo angeli vakergja te vikinel tut ko plo kher hem te šunel adava so isi tut te vakere“. 23 Tegani o Petar vikingja len te khuven andre hem te ačhoven sar leskere gostija.

O tajsutno dive gelo lencar, a nesave phralja tari Jopa isto agjaar gele lea. 24 Palo jekh dive ola resle ki Cezareja. O Kornelij adžikerela len sine te aven hem vikingja ple familija hem ple paše amalen. 25 Keda o Petar reslja ko kher, o Kornelij iklilo angli leste, pelo anglo leskere pre hem pokloningja pe leske. 26 Ama o Petar vazdingja le hem vakergja leske: „Ušti! Me da sium manuš sar tute“. 27 Džikote kerela sine lea lafi, khuvgja andre leste ko kher hem dikhlja kaj sine khedime but manuša. 28 Hem vakergja lenge: „Tumen šukar džanena kaj o Zakoni na dozvolinela jekhe Evreeske te družinel pe jekhe manušea taro javer narodo ili te avel ki leste, ama o Devel mange sikavgja kaj na valjani nijekhe manušeske te vakerav kaj nane čisto. 29 Adaleske keda bičhalgjen e manušen te vikinen man, aljum bizo te mislinav man. A akana pučava tumen, soske vikingjen man?“

30 Tegani o Kornelij vakergja leske: „Angleder štar dive, baš ko akava vreme, okolu trin o saati* diveskoro, molinava man sine ko mlo kher. Tegani taro jekh puti angli mande pojavingja pe jekh manuš kaskere šeja svetinena sine, 31 hem vakergja: ’Kornelij, o Devel šungja tli molitva hem na bistergja o šukar bukja so kergjan e čorole manušenge. 32 Adaleske bičhal nekas ki Jopa hem vikin e Simone, kole so vikinena le Petar. Ov tano gosto ko kher e Simoneskoro, o kožari,* so živinela uzo more‘. 33 Adaleske odma bičhalgjum manušen pali tute, a tu šukar kergjan so aljan. Hem akana sarine amen khedingjem amen akate anglo Devel te šuna adava so o Jehova* zapovedingja tuke te vakere“.

34 Tegani o Petar vakergja: „Akana čače haljovava kaj o Devel na delinela e manušen, 35 nego ov tari sekoja nacija prifatinela okole so darala lestar hem kerela adava soj pravedno. 36 Ov e Izraelconge bičhalgja o haberi, o šukar haberi bašo mir, so šaj te ovel len preku o Isus Hristos kova soj Gospodari sarinenge. 37 Tumen džanena bašo so kerela pe sine lafi ki celo Judeja, a angleder adava hem ki Galileja, otkeda o Jovan propovedingja bašo krstibe. 38 Kerela pe sine lafi bašo Isus taro Nazaret, kaj o Devel koristingja pli sila* te birinel* le hem te del le mokj. A ov phirela sine ki celo akaja phuv hem kerela sine šukaripe hem sasljarela sine sa okolen kas so mučinela sine o Beng, adaleske so o Devel sine lea. 39 Amen siem svedokija baši sa adava so kergja ko thana kote so živinena o Evreija hem ko Erusalim, a ola mudargje le agjaar so kovingje* le ko stubo.* 40 Ama o Devel voskresningja le ko trito dive hem mukhlja o manuša te dikhen le. 41 Ama na celo narodo, nego amen so halem hem pilem lea, otkeda uštilo taro mule. Amen siem sine birime angleder taro Devel te dikha adava hem te vakera baši leste. 42 Hem zapovedingja amenge te propovedina e manušenge hem temelno te svedočina kaj ov tano adava kas so o Devel čhivgja te ovel sudija e dživdenge hem e mulenge. 43 Sa o prorokija vakergje baši leste. Ola vakergje kaj preku leskoro anav o Devel ka prostinel o grevija sarinengere so verujnena ki leste“.

44 Džikote o Petar panda kerela sine lafi bašo adava, e Devleskiri sila* hulili upro sa adala so šungje akala lafija. 45 O vernikija so sine Evreija* hem so ale e Petarea sine vooduševime, soske o manuša da taro javera nacie isto agjaar dobingje e Devleskiri sila* sar poklon. 46 Hem šungje len sar kerena lafi ko razna čhibja hem sar falinena e Devle. Tegani o Petar vakergja: 47 „Šaj li nekoj te zabraninel te oven krstime ko pani akala manuša so primingje e Devleskiri sila* isto sar amende?“ 48 Tegani zapovedingja lenge te krstinen pe ko anav e Isus Hristoseskoro. Palo adava ola molingje le te ačhovel lencar nekobor dive.

11 A o apostolija hem o phralja so sine ki Judeja šungje kaj o manuša da taro javera nacie isto agjaar prifatingje e Devleskoro lafi. 2 Adaleske, keda o Petar alo ko Erusalim, okola so mangena sine o manuša taro javera narodija te oven suneti, počmingje te rasprajnen pe lea,* 3 hem vakergje: „Tu geljan ko kher e manušenge so nane kerde suneti hem haljan lencar“. 4 Tegani o Petar počmingja te raskažinel lenge detalno sa so slučingja pe, hem vakergja:

5 „Džikote sium sine ki diz Jopa hem molinava man sine, dikhljum jekh vizija.* Dikhljum nešto so sine sar jekh baro leneno čaršafi, ikerdo taro leskere soštar kraja, sar hulela sine upral taro nebo hem alo angli mande. 6 Keda dikhljum šukar, dikhljum kaj ki leste isi sa o vrste životne: e štare prengere, o diva životne, o sapa, o gušterija hem o ptice taro nebo. 7 Hem šungjum jekh glaso so vakergja: ’Petar, ušti! Čhin hem ha!‘ 8 Ama me vakergjum: ’Na Gospodare, soske me nikogaš na čhivgjum ko muj nešto soj zabranimo ili so nane čisto!‘ 9 Ama o glaso taro nebo o dujto puti da vakergja mange: ’Ma vaker kaj nane čisto adava so o Devel kergja te ovel čisto‘. 10 O glaso taro nebo šundilo o trito puti da, hem palo adava sa sine palem lendo ko nebo. 11 Hem ko adava momenti, trin manuša kola so sine bičhalde tari Cezareja ki mande, resle anglo kher koleste so sium sine. 12 Tegani o Devel preku pli sila* vakergja mange te džav lencar bizo te mislinav man. Akala šov phralja da ale mancar hem khuvgjem e Kornelijaske ko kher.

13 Ov raskažingja amenge kaj ko plo kher dikhlja jekhe angele kova so vakergja leske: ’Bičhal manušen ki Jopa hem vikin e Simone, kas so vikinena Petar. 14 Ov ka vakerel tuke sar šaj tu hem tli familija te oven spasime‘. 15 Ama keda počmingjum te kerav lafi, ola dobingje e Devleskiri sila,* isto sar amen so dobingjem ko početok. 16 Tegani setingjum man ko lafija so vakergja o Gospodari: ’O Jovan krstinela sine panjea, a tumen ka oven krstime e Devleskere silaja‘.* 17 Znači, ako o Devel dengja o isto poklon lenge da, sar so dengja amenge kola so verujngjem ko Gospodari o Isus Hristos, tegani koj sium me te čhinavav e Devle?“*

18 Keda šungje adava, ola čhinavgje te rasprajnen pe lea* hem počmingje te falinen e Devle e lafencar: „Znači, o Devel isto agjaar mangela o manuša da taro javera narodija te kainen pe te šaj te dobinen životo“.

19 A okola so našle taro progonstvo,* kova so počmingja keda o Stefan sine mudardo, resle dži ki Fenikija, ko Kipar hem ki Antiohija. Ama ola propovedinena sine samo e Evreenge. 20 Sepak, maškar lende sine nesave manuša taro Kipar hem tari Kirinija, kola so ale ki Antiohija, hem počmingje te vakeren o šukar haberi bašo Gospodari o Isus e manušenge so kerena sine lafi ki grčko čhib. 21 A e Jehovaskoro* vas sine upri lende, hem but manuša počmingje te verujnen hem te džan palo Gospodari.

22 Bašo adava šungje čak o phralja taro sobranie so sine ko Erusalim, pa ki Antiohija bičhalgje e Varnava. 23 Keda ov reslja ki Antiohija hem dikhlja e Devleskoro šukaripe so na zaslužinaja le, but radujngja pe hem sarinen ohrabrinela sine te ačhoven verna e Gospodareske celo vilea, 24 soske o Varnava sine šukar manuš kova so sine le silno vera hem sine pherdo e Devleskere silaja.* Adaleske baro broj manuša počmingje te verujnen ko Gospodari. 25 Palo adava, ov gelo ko Tars te rodel e Savle. 26 Keda arakhlja le, angja le ki Antiohija. Agjaar celo berš khedena pe sine e phralencar hem e phenjencar ko sobranie hem sikavena sine bute manušen. Baš ki Antiohija o Devel sikavgja e učenikonge kaj valjani te vikinen pe hristijanja.

27 Ko adava vreme ki Antiohija ale nesave prorokija taro Erusalim. 28 Jekh lendar, so vikinela pe sine Agav, preku e Devleskiri sila* vakergja kaj ki celo phuv ka ovel baro bokhalipe. Adava čače slučingja pe keda vladinela sine o Klavdij. 29 Adaleske o učenikija, sekoj sprema adava kobor so šaj te del, rešingje te bičhalen pomoš e phralenge so živinena sine ki Judeja. 30 Sa adava ola bičhalgje e starešinenge preku o Varnava hem o Savle.

12 Ko adava vreme o cari o Irod* počmingja te progoninel nesaven taro sobranie. 2 Ov mačea mudargja e Jakove, e Jovaneskere phrale. 3 Keda dikhlja kaj adava so kergja svidžingja pe e Evreenge, ov vakergja ple vojnikonge te džan te astaren e Petare da. (Baš ko adava vreme sine o Prazniko bašo mare bizo kvasaco.) 4 Keda astargja le, čhivgja le ko zatvor hem naredingja te arakhen le ko štar smene hem ki sekoja smena te oven po štar vojnikija, soske sine le namera te sudinel leske anglo narodo pali Pasha.* 5 Agjaar o Petar ačhilo ko zatvor, a o phralja hem o phenja taro sobranie stalno hem celo vilea molinena pe sine e Devleske baši leste.

6 I rat angleder o Irod te sudinel leske anglo narodo, o Petar sovela sine maškar duj vojnikija hem sine phanlo duje sindžirencar, a javera duj vojnikija pazinena sine anglo udar taro zatvor. 7 Taro jekh puti pojavingja pe e Jehovaskoro* angeli, hem ki kjelija svetingja jekh svetlina. Ov pipingja e Petare ki strana ko rebro, vazdingja le taro sojbe hem vakergja leske: „Ušti sigate!“ Hem o sindžirija pele taro leskere vasta. 8 Tegani o angeli vakergja leske: „Spremin tut hem urav tle sandale!“ Hem ov kergja adava. Ko krajo vakergja leske: „Urav tli upruni nametka hem ava pali mande!“ 9 O Petar iklilo tari kjelija hem džala sine pali leste, ama na džanela sine kaj adava so kerela o angeli tano čače, nego mislinela sine kaj dikhela vizija.* 10 A keda nakhle e prva hem e dujta stražaren, ale ki sastrnali porta kolatar so šaj te džal pe ki diz. Adaja porta phravdili korkori pestar, tegani ola iklile hem phirgje zaedno tari ulica, a palo adava o angeli taro jekh puti gelo peske lestar. 11 Keda o Petar halilo so slučingja pe, vakergja: „Akana čače džanava kaj o Jehova* bičhalgja ple angele hem spasingja man taro e Irodeskere vasta hem taro sa adava so o Evreija očekujnena sine te ovel mange“.

12 Otkeda razmislingja bašo adava so slučingja pe, gelo e Marijake ko kher, i daj e Jovaneskiri kole so vikinena sine Marko. Adari sine khedime poviše učenikija hem molinena pe sine. 13 Keda khuvgja ki porta, ali jekh sluginka so vikinela pe sine Roda, te dikhel koj adava. 14 Keda pendžargja e Petareskoro glaso, tari radost oj na phravgja i porta, nego prastandili andre hem vakergja okolenge so sine ko kher kaj o Petar tergjola angli porta. 15 A ola vakergje lake: „Tu delindiljan!“ A oj uporno vakerela sine kaj o Petar čače alo. Tegani ola vakergje: „Adava tano jekh angeli“.* 16 A o Petar ponadari da khuvela sine ki porta. Keda phravgje leske, dikhle le hem čudingje pe. 17 Ama ov dengja len znako e vastea te čutinen hem detalno raskažingja lenge bašo adava sar o Jehova* ikalgja le taro zatvor, a palo adava vakergja: „Vakeren akava e Jakoveske hem e phralenge!“ Tegani iklilo hem gelo ko javer than.

18 A keda phravdilo o dive, o vojnikija sine voznemirime hem pučena pe sine so ulo e Petarea. 19 O Irod bičhalgja ple manušen segde te roden le, a keda na arakhle le, ov ispitingja e stražaren hem zapovedingja te ingaren len hem te kazninen len. Palo adava, o Irod gelo tari Judeja ki Cezareja hem ačhilo adari nesavo vreme.

20 A ov sine but holjamo e manušencar taro Tir hem Sidon. Adaleske ola dogovoringje pe, hem zaedno ale ki leste, hem otkeda ubedingje e Vlaste, kova so sine odgovorno bašo kher e careskoro, e Irodeskoro,* ola počmingje te molinen te oven ko mir e carea, soske lena sine hrana tari e careskiri phuv. 21 A ko jekh posebno dive o Irod uravgja ple carska šeja, bešlja ki sudsko stolica hem počmingja te ikerel lenge jekh govor. 22 A o narodo so khedingja pe počmingja te vikinel: „Akala lafija tane devleskere, a na e manušeskere!“ 23 Ama odma e Jehovaskoro* angeli kergja o Irod te nasvaljovel, soske na dengja slava e Devleske, hem hale le o kirme hem mulo.

24 A e Jehovaskoro* lafi sa poviše širinela pe sine hem sa poviše manuša verujnena sine.

25 Otkeda o Varnava hem o Savle dengje i pomoš ko Erusalim so khedingje la o phralja, ola lele pea e Jovane, kole so vikinena sine Marko hem irangje pe ki Antiohija.

13 A ko sobranie ki Antiohija sine prorokija hem učitelija: o Varnava, o Simeon, kas so vikinena sine Niger, o Lucij tari Kirinija, o Manain, kova so školujngja pe zaedno e vladetelea* o Irod,* hem o Savle. 2 Džikote ola služinena sine* e Jehovaske* hem postinena sine, o Devel preku pli sila* vakergja: „Odvojnen mange e Varnava hem e Savle, soske len biringjum len baši jekh posebno buti.“ 3 Otkeda postingje hem molingje pe, čhivgje pumare vasta upri lende hem mukhle len te džan.

4 Agjaar o Varnava hem o Savle, kolen so o Devel bičhalgja preku pli sila,* gele ki Seleukija, a adathar brodea gele ko Kipar. 5 Keda ale ko Salamis, počmingje te vakeren bašo e Devleskoro lafi ko evrejska sinagoge. A lencar, sar pomošniko, sine o Jovan.*

6 Keda nakhle celo ostrov, ale dži ko Pafos hem adathe arakhle jekhe Evree kova so vikinela pe sine Varisus. Ov kerela sine magie hem sine hovavno proroko. 7 Ov kerela sine buti e upraviteleske tari adaja pokraina, o Sergij Pavle, kova so sine inteligentno manuš. Akava upraviteli vikingja e Varnava hem e Savle ki peste, soske but mangela sine te šunel e Devleskoro lafi. 8 Akava manuš so kerela sine magie, kova so isto agjaar vikinela pe sine Elim (o anav Elim ko prevod značinela magioničari), počmingja te protivinel pe lenge hem probinela sine te čhinavel e upravitele te verujnel ko Gospodari. 9 Tegani o Savle, kova so vikinela pe sine hem Pavle, pherdo e Devleskere silaja,* dikhlja pravo ki leste 10 hem vakergja: „Tu sian čhavo e Bengeskoro, pherdo sian hovajbe hem lošnipe hem dušmani sian bašo sa adava soj pravedno. Soske ponadari da trudinea tut te sikave e Jehovaskere* prava drumija sar hovavne? 11 Adaleske, akana o Jehova* ka kazninel tut: ka koroljove hem nesavo vreme nane te dikhe o kham“. Hem odma nešto sar gusto magla pojavingja pe leske ko jakhja hem počmingja te dikhel sa kalo hem phirela sine okolu te arakhel nekas so ka astarel le taro vas hem ka vodinel le. 12 Tegani o upraviteli, otkeda dikhlja so slučingja pe, počmingja te verujnel ko Gospodari, soske sine vooduševimo taro bukja so siklilo bašo Jehova.*

13 Palo adava o Pavle hem okola so sine lea, brodea gele taro Pafos hem resle ki Perga, ki Pamfilija. Ama o Jovan* mukhlja len hem irangja pe ko Erusalim. 14 A ola nakhle tari Perga hem ale ki Antiohija, ki Pisidija, hem ko sabat* khuvgje ki sinagoga* hem bešle. 15 Otkeda angli sarinende čitingja pe o Zakoni hem o lila taro Prorokija, o glavna manuša so sine ki sinagoga vakergje e Pavleske hem e Varnavaske: „Phraljalen, ako isi tumen nešto te vakeren te šaj te ohrabrinen e narodo, vakeren!“ 16 Tegani o Pavle uštilo, dengja znako ple vastea te ovel tišina hem vakergja:

„Manušalen taro Izrael hem tumen o javera so darana taro Devel, šunen! 17 O Devel akale narodoskoro, e Izraelcongoro, biringja amare parapapon. Ov pomožingja lenge džikote živinena sine sar strancija ko Egipet, hem ple mokjno vastea ikalgja len tari adaja phuv. 18 Palo adava okolu 40 berš trpingja len ki pustina. 19 Otkeda uništingja efta narodija tari hanaansko phuv, ov dengja adaja phuv amare parapaponge sar nasledstvo. 20 Sa adava ulo ko periodi taro okolu 450 berša.

Palo adava o Devel dengja len sudie dži ko proroko o Samoil. 21 Ama tegani ola rodingje cari, hem o Devel dengja len e Saule, o čhavo e Kiseskoro, taro e Benjamineskoro pleme. Ov vladingja 40 berš. 22 Otkeda cidingja le, sar cari čhivgja e Davide, kaske so vakergja: ’O David, e Jeseeskoro čhavo, tano manuš sprema mlo vilo, kova so ka kerel sa so mangava‘. 23 O Devel vetingja kaj taro leskoro potomstvo* ka anel e Izraelconge spasiteli, e Isuse. 24 Angleder ov te avel, o Jovan propovedingja sa e Izraelconge kaj valjani te krstinen pe hem agjaar te sikaven kaj kainena pe. 25 A keda o Jovan panda hari valjani sine te završinel pli služba, vakergja: ’So mislinena, koj sium me? Me na sium okova kas so tumen adžikerena. Ov avela pali mande hem me na zaslužinava ni te phravav o sandale taro leskere pre‘.

26 Phraljalen, tumen o čhave e Avraameskere hem tumen o javera so darana taro Devel, akava haberi bašo amaro spasenie sine bičhaldo amenge. 27 Soske, okola so živinena ko Erusalim hem lengere poglavarija na prifatingje le, nego osudingje le hem agjaar ispolningje adava so vakergje o Prorokija, a bašo adava ko glaso čitinela pe sekova sabat.* 28 Iako na arakhle nisavi pričina te šaj te mudaren le, sepak ola rodingje taro Pilat te mudarel le. 29 A keda ispolningje sa adava so sine pišimo baši leste, huljargje le taro stubo* hem čhivgje le ko grobo. 30 Ama o Devel vazdingja le taro mule, 31 hem ov but dive pojavinela pe sine okolenge so gele lea tari Galileja ko Erusalim, hem ola akana svedočinena baši leste anglo narodo.

32 Adaleske amen vakeraja o šukar haberi bašo vetuvanje so dengja o Devel amare parapaponge, 33 kaj o Devel celosno ispolningja adava vetuvanje baši amari korist, so siem lengere čhave, adalea so voskresningja e Isuse, sar soj pišimo ko dujto psalm: ’Tu sian mlo čhavo, avdive me uljum tlo dad‘. 34 O Devel voskresningja le taro mule hem ov nikogaš palem nane te ovel manuš so ka merel hem leskoro telo te kirnjol. O Devel potvrdingja kaj čače ka kerel adava keda vakergja: ’Ka sikavav tumenge verno mangipe sar so vetingjum e Davideske. Ko adava vetuvanje šaj te ovel tumen doverba‘. 35 Adaleske ko jekh javer da psalm vakerela: ’Nane te dozvoline o telo tle verno slugaskoro te kirnjol‘. 36 A o David ko plo vreme kerela sine e Devleskiri volja, ama mulo* hem sine parumo ple parapaponcar hem leskoro telo kirnilo. 37 A o telo okoleskoro kas so o Devel voskresningja, na kirnilo.

38 Adaleske phraljalen, vakerava tumenge kaj o Devel ka prostinel tumare grevija preku leste. 39 E Mojseeskoro zakoni našti te kerel tumen te na oven kriva. Ama preku leste, sekoj so verujnela, šaj anglo Devel te na ovel krivo bašo ništo. 40 Adaleske, pazinen ma te ovel tumenge adava soj pišimo ko lil taro Prorokija, kote so vakerela: 41 ’Tumen so asana bašo adava so vakerela o Devel, ka čudinen tumen hem ka meren, soske ko tumaro vreme kerava nešto ko so tumen na verujnena, čak ako nekoj raskažinela tumenge sa bašo adava‘“.

42 A keda ola ikljovena sine tari sinagoga, o narodo molinela len sine te keren lafi bašo adava o javer da sabat. 43 Otkeda sa adala so sine khedime ki sinagoga gele peske, but Evreija hem but taro javera narodija kola so obožavinena sine e Devle hem prifatingje i evrejsko vera,* gele palo Pavle hem palo Varnava. Hem džikote kerena sine lafi e manušencar so ale pali lende, pottikninena len sine te den pestar sa te šaj o Devel ponadari da te sikavel lenge plo šukaripe so na zaslužinaja le.

44 O javer sabat, skoro celi diz khedingja pe te šunel e Jehovaskoro* lafi. 45 A keda o Evreija dikhle kobor but manuša khedingje pe, ule but ljubomorna hem počmingje te keren lafi protiv o Pavle hem protiv adava so vakerela sine. 46 Tegani o Pavle hem o Varnava hrabro vakergje lenge: „E Devleskoro lafi valjani sine prvo te vakerel pe tumenge. Ama adaleske so tumen na mangena te šunen, hem agjaar sikavena kaj na sien dostojna te priminen o večno životo, amen akana džaja ko manuša taro javera narodija. 47 Soske, o Jehova* dengja amen akaja zapoved: ’Čhivgjum tut te ove svetlina e narodonge hem te vakere bašo spasenie dži ko najdur thana tari phuv‘“.

48 Keda šungje adava o manuša taro javera narodija, but radujngje pe hem počmingje te slavinen e Jehovaskoro* lafi. Hem sarine so sine len ispravno stavi sprema o večno životo, ule vernikija. 49 A e Jehovaskoro* lafi sa poviše širinela pe sine ki celo adaja phuv. 50 Ama o Evreija čhivgje e ugledna džuvlen, kola so obožavinena sine e Devle, hem e ugledna muršen tari adaja diz, te oven protiv o Pavle hem o Varnava. Ola počmingje te progoninen len hem brkingje len taro adava than. 51 A o Pavle hem o Varnava tresingje o pravo taro pumare pre hem agjaar sikavgje lenge kaj predupredingje len, a palo adava gele ki Ikonija. 52 A o učenikija sine ponadari da but radosna hem sine pherde e Devleskere silaja.*

14 Ki Ikonija o Pavle hem o Varnava khuvgje zaedno ki jekh evrejsko sinagoga,* hem kergje doborom šukar lafi so but Evreija hem Grkija ule vernikija. 2 Ama o Evreija so na verujngje, kergje o manuša taro javera narodija te holjanen e phralenge hem te protivinen pe lenge. 3 Adaleske o Pavle hem o Varnava ačhile ki Ikonija poviše vreme hem bizi dar kerena sine lafi e Jehovaske* ko anav. A o Devel sikavgja kaj poddržinela o haberi bašo leskoro šukaripe so na zaslužinaja le, agjaar so dengja len sila te keren znakija hem čudija. 4 Agjaar o manuša tari adaja diz odvojngje pe: nesave poddržinena sine e Evreen, a o javera poddržinena sine e apostolen. 5 Tegani o manuša taro javera nacie hem o Evreija, zaedno pumare poglavarencar, dogovoringje pe te napadinen len hem mangle te mudaren len barencar. 6 Keda o apostolija doznajngje bašo adava, našle adathar hem gele ki Listra hem ki Derva, dizja kola so sine ki Likaonija, hem ko thana okolu adala dizja. 7 Ko adala thana ola propovedinena sine o šukar haberi.

8 A ki Listra sine jekh manuš kova so nikogaš na phirgja, soske leskere pre sine paralizirime panda taro bijanibe. 9 Adava manuš bešela sine hem šunela sine e Pavle sar kerela lafi. O Pavle dikhlja pravo ki leste hem dikhlja kaj le sine le vera ko adava so šunela sine hem isto agjaar sine le vera kaj šaj te sasljol. 10 Tegani o Pavle glasno vakergja: „Ušti, tergjov ko pre!“ Hem o manuš rupingja ko pre hem počmingja te phirel. 11 Keda dikhle so kergja o Pavle, o manuša počmingje te vikinen ki likaonsko čhib: „O devela ule manuša hem hulile ki amende!“ 12 Hem počmingje te vikinen e Varnava Zevs, a e Pavle Hermes, adaleske so ov poviše kerela sine lafi. 13 Paše uzi diz sine o hrami bašo devel Zevs. O svešteniko adale devleskoro angja guruva hem krune taro listija anglo e dizjakere porte hem manglja e narodoja te del žrtve hem agjaar te obožavinen e Pavle hem e Varnava.

14 A keda o apostolija o Varnava hem o Pavle šungje bašo adava, pharavgje pumare šeja, prastandile maškar o narodo hem vikingje: 15 „Manušalen, soske kerena akava? Amen da siem manuša isto sar tumende kola so cidena muke. Vakeraja tumenge o šukar haberi te šaj te mukhen adala bukja so na vredinena hem te počminen te služinen e dživde Devleske kova so kergja o nebo, i phuv, o more hem sa so isi ki lende. 16 Angleder ov mukhlja o manuša taro sa o narodija te keren adava so ola mangena, 17 iako na mukhlja tumen bizo te svedočinel baši peste agjaar so kergja šukaripe, dengja tumen bršim taro nebo hem vremija keda i phuv dela but plodija, agjaar dengja tumen hajbaske džikote na čaljona hem kergja tumare vile te oven but radosna“. 18 Iako vakergje akala bukja, ola edvaj uspejngje te čhinaven e manušen te den lenge žrtve.

19 Ama tari Antiohija hem tari Ikonija resle nesave Evreija hem ubedingje e manušen te oven protiv o Pavle. Tegani ola počmingje te frden leske barencar hem palo adava ikalgje le avri tari diz, soske mislingje kaj mulo. 20 A keda o učenikija khedingje pe okolu leste, ov uštilo hem palem irangja pe ki diz. O tajsutno dive gelo e Varnavaja ki Derva. 21 Otkeda propovedingje o šukar haberi ki adaja diz hem kergje but učenikija, ola irangje pe ki Listra, ki Ikonija hem ki Antiohija. 22 Adathe ola zajakningje e učenikon, agjaar so ohrabringje len te ačhoven zorale ki vera hem vakerena sine lenge: „Mora te nakha taro but pharipa angleder te khuva ko e Devleskoro Carstvo“. 23 Isto agjaar, čhivgje starešine ko sekova sobranie, molingje pe, postingje hem mukhle len e Jehovaske* ov te grižinel pe lenge, soske adala starešine verujngje ki leste.

24 Palo adava ola nakhle tari Pisidija hem resle ki Pamfilija, 25 hem otkeda propovedingje e Devleskoro lafi ki Perga, ola gele ki Atalija. 26 Adathar ola brodea irangje pe ki Antiohija, kote so o phralja angleder molingje pe e Devleske te sikavel e Pavleske hem e Varnavaske plo šukaripe so na zaslužinaja le, te šaj te keren i zadača koja so akana završingje la.

27 Keda resle adari, khedingje sa e phralen hem e phenjen taro adava sobranie hem vakergje lenge sa adava so o Devel kergja preku lende hem sar e manušenge taro javera nacie o Devel phravgja o udar te šaj te verujnen ki leste. 28 Adathe o Pavle hem o Varnava ačhile poviše vreme e učenikoncar.

15 A nesave manuša ale tari Judeja ki Antiohija hem počmingje te sikaven e phralen agjaar so vakergje lenge: „Ako na kerena tumen suneti, sprema e Mojseeskoro zakoni, našti te oven spasime“. 2 A o Pavle hem o Varnava na soglasingje pe lencar hem uli bari diskusija. Adaleske o phralja odlučingje o Pavle, o Varnava hem nesave lendar te džan ko apostolija hem ko starešine ko Erusalim bašo akava problemi.

3 Otkeda o phralja hem o phenja taro adava sobranie ispratingje len dži negde, ola prodolžingje hem nakhle tari Fenikija hem tari Samarija, hem e phralenge adari detalno objasningje sar o manuša taro javera narodija počmingje te obožavinen e Devle. Keda šungje adava, sa o phralja but radujngje pe. 4 Keda resle ko Erusalim, o phralja hem o phenja taro sobranie, o apostolija hem o starešine but šukar dodžakergje len. A ola raskažingje lenge bašo sa so kergja o Devel preku lende. 5 A nesave so počmingje te verujnen ko Isus, a angleder sine ki farisejsko sekta,* uštile taro pumare thana hem vakergje: „O manuša taro javera narodija mora te keren pe suneti, hem amen mora te zapovedina lenge te ikeren pe e Mojseeske ko zakoni“.

6 Tegani o apostolija hem o starešine khedingje pe te keren lafi baši adaja buti. 7 Otkeda but vreme kergje lafi bašo adava, o Petar uštilo hem vakergja lenge: „Phraljalen, tumen šukar džanena kaj o Devel odamna biringja man maškar tumende te šaj preku mande o manuša taro javera narodija te šunen o šukar haberi hem te verujnen. 8 Hem o Devel, kova so džanela so isi e manušeske ko vilo, sikavgja kaj prifatinela len, adalea so dengja len pli sila* sar so dengja amenge da. 9 Ov na kergja nisavi razlika maškar lende hem amende, nego kergja čista lengere vile preku i vera. 10 Soske akana iskušinena e Devle agjaar so čhivena jarem* e učenikonge ki men, kova so našti phiravgje le ni amare parapapija, a ni amen našti te phirava le? 11 A amen verujnaja kaj ka ova spasime preku e Gospodareskoro e Isuseskoro šukaripe so na zaslužinaja le, isto sar ola da“.

12 Tegani sa adala so sine adathe čutingje hem šunena sine sar o Varnava hem o Pavle raskažinena bašo but znakija hem čudija, kola so o Devel kergja preku lende maškar o manuša taro javera narodija. 13 Keda ola završingje, o Jakov vakergja: „Phraljalen, šunen man. 14 O Simeon* detalno objasningja sar o Devel akana prifatingja e manušen taro javera narodija, te šaj lendar te kerel narodo so ka phiravel leskoro anav. 15 Akava tano sprema adava so vakergje o Prorokija, sar soj pišimo: 16 ’Palo adava ka iranav man hem palem ka gradinav e Davideskoro kher* kova so pelo. Ka popravinav adava so sine rušimo hem ka kerav adava kher palem, 17 te šaj o manuša so ka ačhon, iskreno te roden e Jehova,* zaedno e manušencar taro sa o narodija, okolencar so phiravena mlo anav, vakerela o Jehova,* kova so kerela sa adava 18 so odlučingja panda odamna‘. 19 Adaleske mislinava kaj na valjani e manušenge taro javera narodija so mangena te služinen e Devleske, te kera te ovel lenge pharo. 20 Nego te pišina lenge te ikeren pe podur taro adava soj dendo sar žrtva e idolenge,* taro nemoral,* taro mas e životnengoro so sine tasavde hem taro rat. 21 Soske, panda taro purano vreme ki sekoja diz isi asavke kola so propovedinena e Mojseeskere lafija hem sekova sabat* ko glaso čitinena leskere lila ko sinagoge“.*

22 Tegani o apostolija hem o starešine odlučingje te birinen nesave phralen maškar lende te džan ki Antiohija zaedno e Pavlea hem e Varnavaja, a celo sobranie poddržingja adaja odluka. Sine birime o Juda, kole so vikinena sine Varsava, hem o Sila, duj murša kola so sine odgovorna ko sobranie. 23 Pali lende bičhalgje akava pismo:

„O apostolija hem o starešine, tumare phralja, pozdravinena e phralen taro javera narodija kola soj tane ki Antiohija, ki Sirija hem ki Kilikija. 24 Šungjem kaj nesave amendar pumare lafencar voznemiringje tumen hem agjaar mangle te peraven tumen tari vera, iako amen na vakergjem lenge te keren adava. 25 Adaleske amen sarine odlučingjem te birina phralen kolen so ka bičhala len ki tumende zaedno amare mangle phralencar, e Varnavaja hem e Pavlea. 26 Ola solduj rizikujngje pumaro životo bašo anav amare Gospodareskoro e Isus Hristoseskoro. 27 Adaleske akana bičhalaja e Sila hem e Juda, te šaj ola da te vakeren tumenge o ista bukja soj pišime ko akava pismo. 28 Soske, preku e Devleskiri sila* amen odlučingjem te na čhiva nisavo javer pharipe upri tumende, osven akava so valjani: 29 te ciden tumen podur taro adava so sine dendo sar žrtva e idolenge,* taro rat, taro mas e životnengoro so sine tasavde hem taro nemoral.* Ako cidena tumen taro sa akala bukja, ka ovel tumenge šukar. Ačhoven sastipaja!“

30 Otkeda pozdravingje pe, akala murša gele ki Antiohija, pa adari khedingje pe e učenikoncar hem dengje lenge o pismo. 31 Otkeda čitingje o pismo, ola radujngje pe bašo ohrabruvanje so dobingje. 32 O Juda hem o Sila, kola so isto agjaar sine prorokija, ohrabringje e phralen bute lafencar hem zajakningje len. 33 O Juda hem o Sila ačhile adathe nesavo vreme, a keda cidingje te džan peske, o phralja pozdravingje pe lencar hem vakergje lenge te iranen pe ko mir palal ko Erusalim. 34* -- 35 A o Pavle hem o Varnava ačhile ki Antiohija te sikaven e manušen hem zaedno bute javerencar vakerena sine o šukar haberi bašo e Jehovaskoro* lafi.

36 Palo nesavo vreme, o Pavle vakergja e Varnavaske: „Ajde te irana amen hem te posetina e phralen tari sekoja diz kote so propovedingjem e Jehovaskoro* lafi, te šaj te dikha sar tane“. 37 O Varnava sine uporno te len pea e Jovane da, kas so vikinena sine Marko. 38 Ama o Pavle na manglja te len le pea, soske ov mukhlja len ki Pamfilija hem na gelo lencar te pomožinel len ko propovedibe. 39 Tegani ola but rasprajngje pe hem odvojngje pe. O Varnava lelja pea e Marko hem gelo brodea ko Kipar, 40 a o Pavle biringja e Sila, hem otkeda o phralja molingje pe e Jehovaske* te sikavel e Pavleske plo šukaripe so na zaslužinaja le, ov cidingja ko drumo. 41 Ov nakhela sine tari Sirija hem tari Kilikija, hem zajakninela sine e phralen hem e phenjen taro adala sobranija.

16 Agjaar o Pavle reslja ki Derva, a palo adava gelo ki Listra. Adathe živinela sine jekh učeniko so vikinela pe sine Timotej. Leskiri daj sine Evrejka hem sine jekh taro učenikija, a leskoro dad sine Grko. 2 Bašo Timotej kerena sine šukar lafi o phralja tari Listra hem tari Ikonija. 3 O Pavle manglja o Timotej te džal lea, adaleske lelja le pea hem kergja le suneti, soske sa o Evreija taro adava than džanena sine kaj leskoro dad tano Grko. 4 Džikote džana sine tari diz ki diz, vakerena sine e phralenge hem e phenjenge taro adala thana o odluke so angje o apostolija hem o starešine ko Erusalim, te šaj ola da te ikeren pe ki lende. 5 Agjaar o sobranija ponadari da ovena sine zorale ki vera hem o broj e učenikongoro bajrola sine sa poviše taro dive ko dive.

6 Palo adava nakhle tari Frigija hem tari Galatija, soske o Devel preku pli sila* zabraningja lenge te propovedinen bašo e Devleskoro lafi ki azisko provincija.* 7 A keda resle ki Mizija, mangle te džan ki Vitinija, ama o Isus preku e Devleskiri sila* na dozvolingja lenge. 8 Adaleske nakhle tari Mizija hem gele ki Troada. 9 A rakjate o Pavle dikhlja ki vizija* sar jekh Makedonco tergjola sine angli leste hem molinela le sine: „Ava ki Makedonija hem pomožin amen!“ 10 Samo so dikhlja o Pavle i vizija, amen odma cidingjem te dža ki Makedonija, soske halilem kaj o Devel vikingja amen te vakera adari o šukar haberi.

11 Adaleske brodea gelem tari Troada pravo ko Samotraki, a tajsutno dive ko Neapol, 12 adathar gelem ko Filipi, diz koja so sine teli rimsko vlast hem sine i najvažno diz ko adava delo tari Makedonija. Ki adaja diz ačhilem nekobor dive. 13 A ko sabat* iklilem tari diz hem gelem uzi jekh reka, soske mislingjem kaj ko adava than o manuša khedena pe te molinen pe. Bešlem hem počmingjem te kera lafi e džuvlencar so sine khedime adathe. 14 Adathe sine i Lidija da, jekh džuvli so obožavinela sine e Devle. Oj sine tari diz Tijatira hem bikinela sine liljakova materijalija.* O Jehova* phravgja lakoro vilo te prifatinel adava so vakerela sine o Pavle. 15 A keda krstingja pe oj hem lakere kherutne, oj molingja amen hem vakerela sine: „Ako mislinena kaj sium verno e Jehovaske,* aven ko mlo kher hem ačhoven!“ Hem teringja amen te dža ki late.

16 Džikote džaja sine ko than kote so o manuša khedena pe sine te molinen pe, iklili angli amende jekh terni sluginka kola so sine la demoni. Lakere gospodarija zarabotinena sine but pare adaleske so akava demoni pomožinela sine lake te vakerel adava so ka ovel ki idnina. 17 Oj džala sine palo Pavle hem pali amende hem vikinela sine: „Akala manuša tane robija e Najbare Devleskere! Ola vakerena tumenge sar šaj te oven spasime!“ 18 Akava kerela le sine divencar. Ko krajo o Pavle našti sine više te šunel la, adaleske irangja pe hem vakergja adale demoneske: „Zapovedinava tuke ko anav e Isus Hristoseskoro te ikljove latar!“ Hem o demoni odma iklilo latar.

19 Keda lakere gospodarija dikhle kaj našti sine više te zarabotinen latar, astargje e Pavle hem e Sila hem vlečingje len ko ploštad anglo poglavarija. 20 Keda angje len anglo dizjakere upravitelija, vakergje: „Akala manuša kerena te na ovel mir ki amari diz. Ola tane Evreija 21 hem sikavena običaija so amen na smejnaja ni te prifatina len, a ni na smejnaja te kera len, soske siem Rimjanja“. 22 Tegani o manuša ule protiv lende, a e dizjakere upravitelija zapovedingje te ikalen lendar o šeja hem te maren len kaštencar. 23 Otkeda but margje len, frdingje len ko zatvor hem naredingje e čuvareske taro zatvor šukar te arakhel len te šaj ma te našen. 24 Adaleske so zapovedingje leske akava, ov frdingja len ki najandruni kjelija taro zatvor hem čhivgja lengere pre ki klada.*

25 Okolu ki ekvaš i rat, o Pavle hem o Sila molinena pe sine hem falinena sine e Devle gilencar, a o zatvorenikija šunena len sine. 26 Ama taro jekh puti, ulo doborom baro zemjotres, so o temelija e zatvoreskere tresingje hem odma phravdile sa o udara hem taro sa o zatvorenikija pele o sindžirija. 27 A o čuvari taro zatvor uštilo taro sojbe hem keda dikhlja kaj o udara taro zatvor phravdile, ikalgja o mači te mudarel pe, soske mislingja kaj o zatvorenikija našle. 28 Ama o Pavle glasno vikingja: „Ma mudar tut, soske sarine siem akate!“ 29 Tegani o čuvari rodingja te anen lampe te šaj te ovel svetlo, odma prastandilo andre kote so sine o Pavle hem o Sila hem džikote ov celo tresinela sine, pelo ko kočaka angli lende. 30 Palo adava, ikalgja len avri hem pučlja: „So valjani te kerav te šaj te ovav spasimo?“ 31 A ola vakergje leske: „Verujn ko Gospodari o Isus hem ka ove spasimo, tu hem tle kherutne“. 32 Tegani ola vakergje bašo e Jehovaskoro* lafi leske hem leskere kherutnenge. 33 Ov ki adaja rat ingargja len te phandel lengere rane hem odma krstingja pe ov hem sa leskere kherutne. 34 Palo adava, ingargja len ko plo kher hem čhivgja lenge hajbaske ko astali. Ov hem leskere kherutne but radujngje pe so počmingje te verujnen ko Devel.

35 Keda phravdilo o dive, o upravitelija e dizjakere bičhalgje e stražaren te vakeren e čuvareske taro zatvor: „Oslobodin adale manušen“. 36 Tegani o čuvari taro zatvor vakergja e Pavleske: „O upravitelija e dizjakere bičhalgje manušen te vakeren te oslobodinav tumen e dujen. Adaleske akana ikljoven hem džan ko mir“. 37 Ama o Pavle vakergja lenge: „Iako siem rimska državjanja, ola margje amen anglo sarinende bizo te sudinen amenge hem frdingje amen ko zatvor. A akana, bizo nikoj te džanel mangena te frden amen akatar. Adava našti te ovel, ola korkori neka aven hem neka ikalen amen akatar“. 38 Tegani o stražarija vakergje akava e dizjakere upravitelenge hem ola but darandile keda šungje kaj ola tane rimska državjanja. 39 Adaleske ale te izvininen pe lenge, ikalgje len taro zatvor hem molingje len te džan peske tari adaja diz. 40 A keda iklile taro zatvor ola gele e Lidijake ko kher hem keda dikhle e phralen, ohrabringje len hem palo adava gele peske adathar.

17 Otkeda nakhle taro Amfipol hem Apolonija, ola resle ko Solun, kote so sine evrejsko sinagoga.* 2 Hem sar so kerela sine stalno, o Pavle khuvgja ki sinagoga hem trin kurke ko sekova sabat* kerela sine lencar lafi taro Spisija. 3 Objasninela sine lenge hem dokažinela sine kaj o Hristos* valjani sine te cidel muke hem te ovel voskresnimo, hem vakerela sine: „Me vakerava tumenge bašo Isus, kaj ov tano o Hristos“. 4 Adaleske nesave lendar ule vernikija hem počmingje te oven zaedno e Pavlea hem e Silaja, a isto agjaar hem but Grkija kola so mangena sine te ugodinen e Devleske, hem but džuvlja kolen so sine len baro vlijanie ki adaja diz.

5 Ama nesave Evreija ule ljubomorna, hem adaleske lele pea taro pazari nesave lošna manušen kola so sine uličarija. Ola khedingje bute manušen hem kergje celo diz te ovel protiv o Pavle hem o Sila. Khuvgje e Jasoneske ko kher silaja hem rodingje te ikalen e Pavle hem e Sila anglo manuša kola so sine khedime. 6 Keda na arakhle len, ola vlečingje e Jasone hem nesave phralen anglo e dizjakere poglavarija hem glasno vikingje: „Akala manuša, kola so segde kergje problemija, akana ale akate da, 7 a o Jason primingja len ko plo kher sar gostija. Sarine ola tane protiv e cezareskere zapovedija adalea so vakerena kaj isi javer cari, o Isus!“ 8 Keda o manuša hem o poglavarija tari diz šungje akava, voznemiringje pe. 9 A e dizjakere poglavarija na mangle te mukhen e Jasone hem e javere phralen sa džikote na dengje pare sar garancija* te šaj te oslobodinen len.

10 Odma adaja rat o phralja bičhalgje e Pavle hem e Sila ki Verija. Keda resle adathe, ola gele ki evrejsko sinagoga. 11 Akala Evreija sine pospremna te sikljon nego okola taro Solun, soske celo vilea prifatingje o lafi hem sekova dive istražinena sine o Spisija te dikhen dali tano adava agjaar. 12 But lendar ule vernikija, a isto agjaar hem but džuvlja hem murša kola so sine Grkija hem kola so sine but poštujme maškar o narodo. 13 A keda o Evreija taro Solun šungje kaj o Pavle propovedinela sine e Devleskoro lafi ki Verija, ola gele adari te čhiven e manušen te oven protiv lende. 14 Tegani o phralja odma bičhalgje e Pavle te džal uzo more, a o Sila hem o Timotej ačhile adathe. 15 A okola so gele te ispratinen e Pavle, gele lea dži ki Atina, palo adava irangje pe hem vakergje e Silaske hem e Timoteeske kaj o Pavle vakergja te džan ki leste so šaj posigate.

16 Džikote adžikerela len sine ki Atina, o Pavle voznemiringja pe keda dikhlja kaj i diz sine pherdi idolencar. 17 Ov počmingja te kerel lafi ki sinagoga e Evreencar hem e javere manušencar kola so darana sine taro Devel, isto agjaar ko ploštad kerela sine lafi okolencar so arakhljovena sine adathe. 18 A nesave taro epikurejska* hem stoička* filozofija počmingje te protivinen pe leske. Nesave lendar vakerena sine: „So brborinela akava manuš?“, a javera vakerena sine: „Izgleda vakerela amenge bašo javera devela“. Adava vakerena sine, soske ov vakerela lenge sine o šukar haberi bašo Isus hem bašo voskresenie. 19 Tegani astargje le hem ingargje le ko Areopag,* hem vakerena sine: „Šaj li te džana savo tano adava nevo sikajbe bašo kova so kerea lafi? 20 Soske, tu vakerea amenge bukja kola soj amenge čudna. Mangaja te džana so značinena adala bukja“. 21 Ustvari, o manuša so sine tari Atina hem o strancija so živinena sine adathe,* na trošinena sine pumaro slobodno vreme bašo ništo javer, osven te vakeren ili te šunen nešto nevo. 22 Tegani o Pavle terdilo maškar o Areopag hem vakergja:

„Manušalen tari Atina, dikhava kaj tumen ko sa darana taro devela but poviše taro javera manuša. 23 Džikote phirava sine ki diz hem šukar dikhava sine o bukja kola so tumen obožavinena, dikhljum jekh žrtveniko koleste so sine pišimo: ’E Devleske kole so na pendžaraja le‘. Ake, me aljum te vakerav tumenge bašo adava Devel kole so obožavinena, ama na pendžarena. 24 O Devel kova so stvoringja o sveto hem sa so isi ki leste, ov na živinela ko hramija soj kerde taro manušikane vasta, soske leskere tane o nebo hem i phuv. 25 Ov ni na rodela te služinen leske o manušikane vasta, sar te phene valjani leske nešto, soske ov tano adava so dela sarinenge o životo, o dišibe hem sa. 26 Hem ov taro jekh manuš stvoringja sa e narodon te šaj te živinen ki celo phuv, isto agjaar odredingja vreme bašo but bukja hem odredingja kote o manuša te živinen. 27 Ov adava kergja te šaj ola te roden e Devle, hem ako but trudinena pe te arakhen le, ola ka arakhen le, iako ov nane dur nikastar amendar. 28 Soske, preku leste isi amen životo, dvižinaja amen hem postojnaja, hem sar so vakergje nesave taro tumare poetija: ’Sarine amen siem leskere čhave‘.

29 Znači, adaleske so siem čhave e Devleskere, na valjani te mislina kaj o Devel tano sar zlato, srebro ili bar. Ov nane sar o bukja kola so o manuš zamislinela len hem palo adava kerela len ple vastencar. 30 Točno tano kaj nesavo vreme o manuša kergje akala bukja bizo te džanen, hem o Devel trpingja adava, ama akana o Devel vakerela e manušenge taro celo sveto kaj valjani te kainen pe. 31 Soske, ov odredingja dive koleste so pravedno ka sudinel celo svetoske preku o manuš kaste so ov biringja le te kerel adava. Ov voskresningja akale manuše hem agjaar dengja dokaz sa e manušenge kaj adava dive sigurno ka avel“.

32 Keda ola šungje bašo voskresenie e mulengoro, nesave lendar počmingje te asan, a o javera vakergje: „Bašo akava ka šuna tut javer da puti“. 33 Palo adava o Pavle gelo peske adathar. 34 Ama nesave manuša gele lea hem ule vernikija. Maškar lende sine o Dionisij, kova so sine sudija taro sudo ko Areopag, jekh džuvli koja so vikinela pe sine Damara hem javera da.

18 Palo adava, o Pavle gelo peske tari Atina hem alo ko Korint. 2 Adathe arakhlja jekhe Evree so sine bijamo ko Pont so vikinela pe sine Akila. Ov ple romnjaja e Priskilaja samo so alo adathe tari Italija, soske o Klavdij naredingja sa o Evreija te džan peske taro Rim. O Pavle gelo ki lende 3 hem adaleske so sine len o isto zanati, te keren šatorija, ov ačhilo ki lende hem kerela sine lencar buti. 4 A sekova sabat* ov ikerela sine govor* ki sinagoga* hem uverinela sine e Evreen hem e Grkon te šaj te verujnen ko Isus.

5 Keda o Sila hem o Timotej ale tari Makedonija, o Pavle posvetingja celo plo vreme te propovedinel e Devleskoro lafi, agjaar so dokažinela sine e Evreenge kaj o Isus tano o Hristos.* 6 Ama adaleske so ola protivinena pe sine leske hem vredžinena le sine, ov tresingja o pravo taro ple šeja hem vakergja: „Tumen korkori sien kriva bašo adava so ka slučinel pe tumenge! Me sium čisto taro tumaro rat! Taro akana ka džav ko manuša taro javera narodija“. 7 Tegani o Pavle gelo peske tari sinagoga hem khuvgja ko kher jekhe manušeskoro so vikinela pe sine Ticij Just. Ov sine manuš so darala sine taro Devel hem leskoro kher sine odma uzi sinagoga. 8 A o Krisp, jekh taro glavna manuša ki sinagoga, zaedno ple kherutnencar počmingja te verujnel ko Gospodari. Isto agjaar hem but Korinkjanja kola so šungje o šukar haberi, verujngje hem krstingje pe. 9 A jekh rat o Gospodari ki vizija* vakergja e Pavleske: „Ma dara, nego ponadari da propovedin hem ma čhinav! 10 Me sium tuja hem nikoj nane te povredinel tut, soske ki akaja diz isi panda but manuša so ka verujnen ki mande“. 11 Agjaar o Pavle ačhilo adathe jekh berš hem šov masek hem sikavgja e manušen bašo e Devleskoro lafi.

12 A džikote o Galion sine upraviteli ki pokraina Ahaja, o Evreija khedingje pe protiv o Pavle hem ingargje le ko than kote so sudinela sine o upraviteli, 13 hem vakergje: „Akava manuš ubedinela e manušen te obožavinen e Devle ko način soj protiv o zakoni“. 14 Samo so manglja o Pavle te vakerel nešto, o Galion vakergja e Evreenge: „Ako akava manuš kergja nešto pogrešno ili nesavo baro lošnipe, tegani ka ovel man pričina te šunav tumen. 15 Ama ako rasprajnena tumen bašo nesave lafija, bašo nesave manuša hem bašo tumaro zakoni, tegani rešinen adava korkori. Soske, me na mangava te sudinav bašo asavke bukja“. 16 Tegani brkingja len taro adava than kote so sudinela sine. 17 Tegani sarine ola astargje e Sostenese, kova so sine jekh taro glavna manuša ki sinagoga, hem počmingje te maren le ko adava than kote so o upraviteli sudinela sine. Ama o Galion ič na manglja te mešinel pe ko adava.

18 O Pavle ačhilo adathe panda nesavo vreme, palo adava pozdravingja pe e phralencar hem zaedno e Priskilaja hem e Akilaja brodea gelo ki Sirija. Ov angleder ki Kenhreja šišingja pe bala kratko, soske dengja zavet e Devleske. 19 Palo adava resle ko Efes. O javera ačhile adathe ki diz, a o Pavle gelo ki sinagoga hem počmingja te sikavel e Evreen, agjaar so pomožinela lenge sine te haljoven o Spisija. 20 Iako ola molingje le te ačhol adathe poviše vreme, ov na prifatingja, 21 nego pozdravingja pe lencar hem vakergja lenge: „Ako tani e Jehovaskiri* volja, ka iranav man ki tumende palem“. Palo adava brodea gelo taro Efes 22 hem alo ki Cezareja. Palo adava gelo ko Erusalim hem pozdravingja pe e phralencar hem e phenjencar taro sobranie hem adathar gelo ki Antiohija.

23 Adathe ačhilo nesavo vreme, a palo adava nakhlja taro sa o thana ki Galatija hem ki Frigija hem zajakninela sine sa e učenikon.

24 A ko Efes reslja jekh Evrei kova so sine bijamo ki Aleksandrija so vikinela pe sine Apolo. Ov sine manuš so džanela sine šukar te kerel lafi hem šukar pendžarela sine o Spisija. 25 Akava manuš sine sikavdo bašo e Jehovaskere sikljojba,* hem adaleske so sine le e Devleskiri sila* ov sine but revno, kerela sine lafi taro Isus hem sikavela sine o točna bukja baši leste, ama pendžarela sine samo o krstibe bašo kova so propovedinela sine o Jovan. 26 O Apolo počmingja hrabro te kerel lafi ki sinagoga. Ama keda i Priskila hem o Akila šungje le, ola lele le pea hem potočno objasningje leske e Devleskere sikljojba.* 27 Palo adava, adaleske so ov manglja te džal ki Ahaja, o phralja taro Efes pišingje e učenikonge adari hem pottikningje len te priminen le šukar. Keda reslja adari, ov but pomožingja okolenge so ule vernikija preku e Devleskoro šukaripe so na zaslužinaja le, 28 soske ov angli sarinende revno dokažinela sine e Evreenge kaj ola nane ko pravo, agjaar so sikavela sine lenge taro Spisija kaj o Isus čače tano o Hristos.

19 Džikote o Apolo sine ko Korint, o Pavle nakhlja taro sa o thana so sine dur taro more hem alo ko Efes. Adathe arakhlja nesave učenikon 2 hem pučlja len: „Dali primingjen e Devleskiri sila* keda ulen vernikija?“ Ola vakergje leske: „Amen nikogaš na šungjem baši e Devleskiri sila“.* 3 Tegani ov pučlja len: „Savo krstibe sine tumen?“ Ola vakergje leske: „E Jovaneskoro krstibe“. 4 O Pavle vakergja lenge: „O Jovan krstinela sine e manušen hem adava sine dokaz kaj kainena pe, hem vakerela lenge sine te verujnen ko okova so avela pali leste, a adava sine o Isus“. 5 Keda šungje adava, krstingje pe ko anav e Gospodareskoro o Isus. 6 A keda o Pavle čhivgja ple vasta upri lende, ola primingje e Devleskiri sila* hem počmingje te keren lafi ko razna čhibja hem te prorokujnen. 7 Ola sine vkupno 12 murša.

8 Palo adava, o Pavle trin masek džala sine ki sinagoga,* hrabro propovedinela sine, ikerela sine govorija hem sikavela sine uverliva dokazija bašo e Devleskoro Carstvo. 9 Ama nesave sine inačie hem na mangle te verujnen. Ola lošno kerena sine lafi anglo manuša bašo Drumo.* Adaleske o Pavle cidingja pe lendar hem lelja e učenikon pea, hem sekova dive ikerela sine govorija ki e Tiraneskiri škola. 10 Ov kergja adava duj berš hem agjaar sa adala so živinena sine ki azisko provincija,* o Evreija hem o Grkija, šungje bašo e Gospodareskoro lafi.

11 A o Devel kerela sine bare čudija preku o Pavle, 12 so čak leskere mendilja hem o kecele ingarena len sine e nasvalenge. Agjaar ola sasljona sine hem o demonija ikljona sine lendar. 13 A nesave taro Evreija kola so patujnena sine taro than ko than hem so paldena sine demonen, probingje te keren adava ko anav e Gospodareske e Isuseske hem vakerena sine okolenge so sine len demonija: „Ko anav e Isuseskoro, koleske so o Pavle propovedinela, zapovedinava tumenge te ikljoven!“ 14 A adava kerena le sine o efta čhave e Skevaskere, kova so sine o evrejsko glavno svešteniko. 15 A o demoni vakergja lenge: „Pendžarava e Isuse hem e Pavle, ama koj sien tumen?“ 16 Tegani o manuš kas so sine le demoni, rupingja upri lende hem jekh palo jekh uspejngja sarinen te marel len. Agjaar ola nangje hem povredime našle taro adava kher. 17 Bašo adava doznajngje sa o Evreija hem o Grkija so živinena sine ko Efes, hem sarine darandile, hem o anav e Gospodareskoro e Isuseskoro panda poviše falinela pe sine. 18 Hem but taro adala so ule vernikija avena sine hem anglo sarinende priznajnena sine pumare grevija hem adava so kergje. 19 But džene so kerena sine magie, khedingje pumare lila hem thargje len anglo sarinende. Hem računingje kaj vredinena sine 50.000 srebrenikija. 20 Agjaar, o Jehova* ple silaja kerela sine leskoro lafi te bajrol hem te ovel sa posilno.

21 A otkeda ule akala bukja, o Pavle odlučingja te džal ko Erusalim preku i Makedonija hem i Ahaja, hem vakergja: „Otkeda ka džav ko Erusalim, mora te džav ko Rim da“. 22 Agjaar ov bičhalgja ki Makedonija dujen taro ple pomošnikija, e Timotee hem e Eraste, a ov ačhilo panda nesavo vreme ki azisko provincija.*

23 Baš ko adava vreme ulo baro nemir sebepi okolengoro so pripadinena sine ko Drumo.* 24 Soske, jekh manuš, so vikinela pe sine Dimitrij, kerela sine tikne hramija taro srebro so sine sar o hrami e Artemidakoro, hem agjaar kerela sine o zanaetčie but te zarabotinen. 25 Ov khedingja e zanaetčien so kerena sine leske buti hem e javeren so kerena sine i isto buti hem vakergja lenge: „Amalalen, tumen šukar džanena kobor tari akaja buti amen zarabotinaja. 26 Ama akana tumen dikhena hem šunena kaj adava Pavle, na samo ko Efes nego hem skoro ki celo azisko provincija, uveringja bute manušen te verujnen kaj o devela soj kerde taro manušikane vasta, nane devela. 27 Hem na samo so o manuša ka počminen te keren lošno lafi baši amari buti, nego hem o hrami amare bare božicakoro e Artemidakoro nane te vredinel lenge ništo. Isto agjaar sarine ki azisko provincija hem ko sveto obožavinena e Artemida, ama bašo e Pavleskere lafija oj ka našavel pli slava“. 28 Keda šungje adava, but holjangje hem počmingje te vikinen: „Bari tani i Artemida e Efešjanengiri!“

29 Tegani ki celo diz uli bari buna, hem sarine zaedno prastandile andre ko teatar hem silaja vlečingje pea e Makedoncon, o Gaj hem o Aristarh, kola so patujnena sine zaedno e Pavlea. 30 O Pavle mangela sine te khuvel andre hem te kerel e manušencar lafi, ama o učenikija na mukhle le. 31 Čak nesave važna službenikija* so sine lea amala, bičhalgje manušen te predupredinen le ma te khuvel ko teatar te šaj ma te čhivel ki opasnost plo životo. 32 A o manuša sine bunime. Nesave glasno vakerena sine jekh buti, a o javera javer buti hem pobaro delo lendar ni na džanena sine soske khedingje pe adathe. 33 Nesave taro manuša so sine adathe vakergje e Aleksandareske te kerel lafi, soske o Evreija guringje le te ikljol anglal. Tegani o Aleksandar dengja znako ple vastea te ovel tišina te šaj te objasninel so ulo. 34 Keda halile kaj tano Evrei, sarine počmingje glasno te vikinen: „Bari tani i Artemida e Efešjanengiri!“ Hem agjaar vikingje okolu duj saatija.

35 Ko krajo o glavno manuš tari adaja diz smiringja e manušen hem vakergja: „Koj taro manuša na džanela kaj i diz Efes arakhela o hrami e bare Artemidakoro hem lakoro kipi so pelo taro nebo? 36 Znači, adaleske so sarine džanena akava, valjani te smirinen tumen hem te na keren ništo ki sig, bizo te razmislinen. 37 Soske, tumen angjen akale manušen iako na čorgje ništo taro hrami hem ni na vredžingje amare božica. 38 A ako o Dimitrij hem o zanaetčie soj tane lea mangena te tužinen nekas, isi dive keda khedela pe o sudo, a akate tane hem o upravitelija tari akaja pokraina, pa neka tužinen pe jekh jekhea. 39 A ako rodena nešto poviše taro adava, bašo adava ka mora te odlučinel pe keda o rimska upravitelija ka kheden sa e manušen tari diz. 40 Soske, adava so ulo avdive šaj te čhivel amen ki bari opasnost. Šaj te ova tužime kaj kergjem o narodo te buninel pe protiv i vlada, iako nane amen opravdano pričina soske uli akaja buna“. 41 Hem otkeda vakergja akala bukja, phengja e manušenge te džan peske.

20 Palo adava keda i situacija smiringja pe, o Pavle bičhalgja nekas te vikinen e učenikon, hem otkeda ohrabringja len hem pozdravingja pe lencar, ov cidingja ko drumo te džal ki Makedonija. 2 Otkeda nakhlja tari diz ki diz ki Makedonija hem but ohrabringja e phralen adari, ov reslja ki Grcija. 3 Ačhilo adathe trin masek, a palo adava manglja brodea te džal ki Sirija. Ama adaleske so doznajngja kaj o Evreija dogovoringje pe te mudaren le, ov rešingja te iranel pe preku i Makedonija. 4 Lea patujnena sine o Sopater, o čhavo e Pireskoro tari Verija, o Aristarh hem o Sekund taro Solun, o Gaj tari Derva, o Timotej, hem isto agjaar o Tihik hem o Trofim tari azisko provincija.* 5 Akala manuša gele angleder amende hem adžikerena amen sine ki Troada, 6 a amen, palo Prazniko bašo mare bizo kvasaco, brodea cidingjem taro Filipi hem palo pandž dive reslem ki Troada kote so sine ola. Adathe ačhilem efta dive.

7 Ko prvo dive taro kurko, keda khedingjem amen zaedno te ha maro, o Pavle počmingja te ikerel govor sarinenge so sine adathe, soske sine le namera o tajsutno dive te džal peske, hem prodolžingja plo govor dži ki ekvaš i rat. 8 Adaleske ki soba, ko upruno sprati kote so siem sine khedime, sine but lampe. 9 A jekh terno čhavo, so vikinela pe sine Eftih, bešela sine ki pendžerka. Ov hor zasukja adaleske so o Pavle kergja but vreme lafi hem pelo taro dujto sprati. Keda gele te vazden le, dikhle kaj mulo. 10 A o Pavle hulilo, pašlilo upri leste, gušingja le hem vakergja: „Ma vikinen, soske tano dživdo!“ 11 Palo adava o Pavle uklilo upre, phaglja o maro hem počmingja te hal, hem prodolžingja te kerel lencar lafi sa džikote na phravdilo o sabaj, a palo adava gelo peske. 12 A e terne čhave ingargje le khere hem sine but radosna so sine dživdo.

13 Amen uklilem ko brodi hem gelem ko Asos, a o Pavle manglja te džal adathe peški. Vakergja amenge kaj ki adaja diz ov da ka uklel amencar ko brodi. 14 Keda arakhlem amen lea ko Asos, lelem le ko brodi hem gelem ki Mitilena. 15 O tajsutno dive cidingjem e brodea hem reslem paše uzo Hios, o dujto dive ačhilem kratko ko Samos hem o trito dive reslem ko Milet. 16 A o Pavle, odlučingja te na ačhol ko Efes te šaj te na zadržinel pe ki azisko provincija,* soske sigjarela sine te šaj te resel ko Erusalim bašo prazniko Pedesetnica.*

17 A taro Milet bičhalgja haberi dži ko starešine taro sobranie ko Efes te aven ki leste. 18 Keda resle ki leste, ov vakergja lenge: „Tumen šukar džanena sar živingjum džikote sium sine tumencar, panda taro prvo dive keda resljum ki azisko provincija.* 19 Sar robo služinava sine e Gospodareske celosno ponizno, hem adava asvencar hem mukencar, soske o Evreija kerena sine planija te mudaren man. 20 Šukar džanena kaj na garavgjum tumendar ništo taro adava soj bašo tumaro šukaripe.* Sikavava tumen sine anglo sarinende hem taro kher ko kher. 21 Temelno svedočingjum e Evreenge hem e Grkonge kaj valjani te kainen pe, te služinen e Devleske hem te ovel len vera ko amaro Gospodari o Isus. 22 A akana, adaleske so agjaar vodinela man e Devleskiri sila,* ka džav ko Erusalim, iako na džanava so ka ovel mancar adari. 23 Samo džanava kaj o Devel preku pli sila* ki sekoja diz vakerela mange kaj adžikerena man sindžirija hem nevolje. 24 Ama mange ni najhari nane važno mlo životo, nego važno mange samo te završinav mli trka hem i zadača so dobingjum taro Gospodari o Isus: temelno te svedočinav o šukar haberi bašo e Devleskoro šukaripe so na zaslužinaja le.

25 Hem akana džanava kaj sarine tumen, kaske so propovedingjum bašo e Devleskoro Carstvo, više nane te dikhen man. 26 Adaleske vikinava tumen ko avdisutno dive te svedočinen kaj čisto sium taro rat sa e manušengoro, 27 soske bizo nešto te garavav, vakergjum tumenge sa adava so mangela o Devel. 28 Arakhen tumen hem e celo stado, upri koleste so o Devel preku pli sila* čhivgja tumen te oven nadglednikija, te šaj te grižinen tumen sar pastirija sarinenge taro e Devleskoro sobranie, kole so o Devel kingja ple Čhaveskere ratea. 29 Džanava kaj otkeda me ka džav mange, maškar tumende ka khuven manuša kola so ka oven sar opasna ruva so ka ponašinen pe grubo e stadoja. 30 Hem čak maškar tumende ka oven manuša so ka prevrtinen o čačipe te šaj pali peste te ciden e učenikon.

31 Adaleske, ačhoven džangavde hem ma bistren kaj trin berš, dive hem rat, na čhinavgjum te dav sovetija asvencar sekole jekheske tumendar. 32 A akana mukhava tumen ko vasta e Devleske hem leskere lafeske, kova so vakerela leskoro šukaripe so na zaslužinaja le. Adava lafi ka del tumen sila hem ka del tumen nasledstvo zaedno sa okolencar soj birime te oven sveta. 33 Na mangljum nikaskoro srebro, ni zlato, ni šeja. 34 Tumen korkori džanena kaj kergjum buti mle vastencar te šaj te grižinav man bašo mle potrebe hem bašo potrebe okolengere so sine mancar. 35 Mle postapkencar ko sa sikavgjum tumenge sar mora te pomožinen okolenge soj slaba, hem te ikeren ki godi o lafija taro o Gospodari o Isus, kova so vakergja: ’Poviše radost isi keda dela pe, nego keda lela pe‘“.

36 Otkeda vakergja adava, zaedno lencar pelo ko kočaka hem molingja pe. 37 Tegani sarine but rungje, pa gušingje e Pavle hem čumingje le, 38 soske alo lenge but pharo adava so vakergja kaj više nane te dikhen le. Palo adava ispratingje le dži ko brodi.

21 Sine amenge but pharo keda odvojngjem amen lendar. Palo adava uklilem ko brodi hem gelem pravo ko Kos, a o tajsutno dive ko Rodos, hem adathar gelem ki Patara. 2 Otkeda arakhlem brodi so džala sine ki Fenikija, uklilem ki leste hem cidingjem te dža. 3 Dikhlem o ostrov Kipar tari levo strana, ama samo nakhlem lestar hem prodolžingjem e brodea te dža sprema i Sirija. Ačhilem ko Tir, soske adathe valjani sine te rastovarinel pe o brodi. 4 Rodingjem e učenikon hem otkeda arakhlem len ačhilem adathe efta dive. A o učenikija poviše puti vakerena sine e Pavleske ma te džal ko Erusalim, soske e Devleskiri sila* otkringja lenge so ka slučinel pe leske adari. 5 A keda alo vreme te dža amenge, amen cidingjem adathar hem sarine ola, zaedno pumare romnjencar hem pumare čhavencar, ispratingje amen sa džikote na iklilem tari diz. Keda reslem ko brego kote so sine o brodi, pelem ko kočaka, molingjem amen 6 hem pozdravingjem amen lencar. Tegani amen uklilem ko brodi, a ola irangje pe ko pumare khera.

7 Palo adava amen brodea gelem amenge taro Tir hem reslem ki Ptolemaida. Adathe pozdravingjem e phralen hem ačhilem lencar jekh dive. 8 O tajsutno dive cidingjem adathar hem reslem ki Cezareja. Adathe gelem e Filipeske ko kher, o propovedniko e šukar habereskoro, kova so sine jekh taro efta murša kolen so o apostolija biringje ko Erusalim, hem ačhilem ki leste. 9 Le sine le štar čhaja so na sine ženime* hem ola prorokujnena sine. 10 Adathe ačhilem poviše dive. Džikote siem sine adathe, tari Judeja alo jekh proroko so vikinela pe sine Agav. 11 Keda alo ki amende, lelja e Pavleskoro pojas, phanlja lea ple vasta hem ple pre hem vakergja: „Agjaar vakerela o Devel preku pli sila:* ’Agjaar o Evreija ko Erusalim ka phanden e manuše kaskoro soj akava pojas hem ka predajnen le ko vasta e manušengere taro javera narodija‘“. 12 Keda šungjem adava, amen hem o javera so sine adathe, počmingjem te molina e Pavle te na džal ko Erusalim. 13 Ama o Pavle vakergja: „Soske rovena hem mangena te keren te perav pišmani? Verujnen man, spremno sium na samo te phanden man, nego hem te merav ko Erusalim bašo anav e Gospodareskoro e Isuseskoro“. 14 Keda halilem kaj nane te meninel pli odluka, amen smiringjem amen hem vakergjem: „Neka ovel e Jehovaskiri* volja“.

15 Otkeda ulo akava, amen spremingjem amen drumoske hem cidingjem te dža ko Erusalim. 16 Nesave učenikija tari Cezareja ale amencar hem ingargje amen ko kher e Mnasoneskoro taro Kipar, kova so sine jekh taro prva učenikija, soske valjani sine leste te ova gostija. 17 Keda reslem ko Erusalim, o phralja radosno dodžakergje amen. 18 O tajsutno dive gelem e Pavlea ko Jakov. Adathe sine sa o starešine. 19 O Pavle pozdravingja len hem palo adava detalno vakergja lenge so kergja o Devel maškar o manuša taro javera nacie preku leskoro propovedibe.

20 Keda šungje adava, počmingje te slavinen e Devle, a leske vakergje: „Phrala, tu dikhea kobor milje Evreija ule vernikija hem kobor sarine ola verno ikerena pe ko Zakoni. 21 Ama šundilo kaj tu sikavea e Evreen, so živinena maškar o manuša taro javera narodija, te otfrlinen* e Mojseeskoro zakoni. Vakergjan lenge ma te keren pumare čhaven suneti hem ma te ikeren o evrejska običaija. 22 A so te kera akana? Ola sigurno ka šunen kaj tu aljan. 23 Adaleske, ker adava so vakeraja tuke: maškar amende isi štar murša kola so dengje zavet e Devleske. 24 Le akale manušen tuja, hem ker sa so valjani sprema o Zakoni te šaj tu hem ola te oven čista hem platin baši lende te šaj kratko te šišinen pe. Agjaar sarine ka džanen kaj adava so šundilo baši tute nane čače, nego kaj tu živinea sprema o Zakoni. 25 A e manušenge taro javera narodija, so ule vernikija, bičhalgjem jekh pismo kote so pišingjem amari odluka, kaj valjani te ciden pe podur taro adava so sine dendo sar žrtva e idolenge, taro rat, taro mas e životnengoro so sine tasavde hem taro nemoral“.*

26 Agjaar o Pavle o tajsutno dive lelja akale manušen pea hem kergja sa te šaj ov hem ola te oven čista sprema o Zakoni. Tegani ov khuvgja ko hrami te šaj te vakerel keda ka završinen o dive te šaj te oven čista sprema o Zakoni hem keda ka valjani te den pe žrtve sekole jekheske lendar.

27 Keda panda hari valjani sine te završinen adala efta dive, o Evreija tari Azija keda dikhle e Pavle ko hrami, kergje celo narodo te ovel protiv leste hem tegani ola astargje le, 28 hem vikinena sine: „Manušalen taro Izrael, pomožinen amenge! Akava tano o manuš so segde sikavela e manušen te oven protiv amaro narodo, protiv o Zakoni hem protiv akava than. Čak e Grkon angja len ko hrami hem agjaar meljargja akava sveto than“. 29 Ola vakergje akava, soske angleder dikhle e Trofime, kova so sine Efešjani, sar phirela e Pavlea ki diz hem ola mislingje kaj o Pavle angja le ko hrami. 30 Ki celo diz uli bari buna hem o narodo prastandilo ko hrami. Tegani ola astargje e Pavle, vlečingje le avrijal taro hrami, hem odma phanle o porte taro hrami. 31 Ola mangle te mudaren le hem adaleske počmingje te maren le. Ama tegani e vojskakere komandanteske* javingje kaj ko celo Erusalim uli bari buna. 32 Ov odma lelja pea vojnikon hem e komandire* hem prastandilo ki lende. Keda o manuša dikhle e vojskakere komandante* hem e vojnikon, čhinavgje te maren e Pavle.

33 Tegani o komandanti e vojskakoro alo paše uzi leste, astargja le hem zapovedingja te phanden le duje sindžirencar. Palo adava počmingja te pučel e manušen koj tano ov hem so kergja. 34 A o manuša but vikinena sine hem nesave vakerena sine jekh buti, a o javera, javer buti. Tari bari galama ov na halilo so točno ulo, adaleske zapovedingja te ingaren e Pavle ki kasarna.* 35 Ama keda o Pavle reslja dži ko basamakija, o vojnikija mora sine te vazden le hem te ingaren le te šaj te zaštitinen le taro nasilna manuša so mangena sine te povredinen le, 36 soske o manuša džana sine pali leste hem vikinena sine: „Mudar le!“

37 Angleder te khuven ki kasarna, o Pavle vakergja e vojskakere komandanteske: „Smejnava li te vakerav tuke nešto?“ Ov vakergja leske: „Znači džanea te kere lafi ki grčko čhib? 38 Na sian li tu adava Egipkjanco so angleder nesavo vreme kergja o manuša te buninen pe protiv i vlada hem lelja pea ki pustina 4.000 manušen so sine len oružje?“ 39 Tegani o Pavle vakergja leske: „Me sium Evrei, državjani taro Tars, pendžardi diz tari Kilikija. Molinava tut, dozvolin mange te kerav lafi e narodoja“. 40 Keda o komandanti e vojskakoro dozvolingja e Pavleske te kerel adava, o Pavle dengja znako ple vastea te ovel tišina. Keda o narodo čutingja, ov počmingja te kerel lencar lafi ki hebrejsko čhib hem vakergja:

22 „Phraljalen hem tumen so sien mange sar dada, šunen man džikote objasninava tumenge so ulo“. 2 Keda šungje kaj kerela lencar lafi ki hebrejsko čhib, panda poviše čutingje, a ov vakergja: 3 „Me sium Evrei, bijamo ko Tars ki Kilikija, ama sium sine školujmo ki akaja diz taro Gamaliel hem sium sine sikavdo strogo te ikerav man ko e Mojseeskoro zakoni hem revno služinava sine e Devleske sar sarine tumen avdive. 4 But progoninava sine okolen so džana sine ko akava Drumo* hem predajnava len sine te oven mudarde. E muršen hem e džuvlen phanle vastencar ingarava len sine ko zatvor. 5 Bašo akava tane svedokija o prvosvešteniko hem sa o starešine e narodoskere. Lendar isto agjaar dobingjum pismija te sikavav e evrejska vodačenge ko Damask kaj sine mange dozvolimo te kerav adava. Tegani cidingjum ko drumo te astarav adalen so sine adathe hem phanle vastencar te anav len ko Erusalim te šaj te oven kaznime.

6 Ama džikote sium sine ko drumo hem sium sine paše uzo Damask, okolu ko ekvaš o dive, taro jekh puti taro nebo svetingja jekh baro svetlo upri mande. 7 Tegani peljum ki phuv hem šungjum glaso sar vakerela mange: ’Savle, Savle, soske progoninea man?‘ 8 Me odgovoringjum leske: ’Koj sian tu Gospodare?‘ Ov vakergja mange: ’Me sium o Isus o Nazarekjanco, kole so tu progoninea‘. 9 A o manuša so sine mancar dikhle i svetlina, ama na halile o lafija okoleskere so kerela sine mancar lafi. 10 Tegani pučljum le: ’So te kerav Gospodare?‘ O Gospodari vakergja mange: ’Ušti, dža ko Damask hem adathe ka vakerel pe tuke sa adava so valjani te kere!‘ 11 Ama adaleske so i svetlina sine but silno, me koroliljum hem adala so sine mancar, astargje man taro vas hem ingargje man ko Damask.

12 Tegani jekh manuš so vikinela pe sine Ananija, manuš so darala sine taro Devel hem ikerela pe sine ko Zakoni, koleske so kerena sine šukar lafi sa o Evreija so živinena sine adathe, 13 alo ki mande, terdilo hem vakergja mange: ’Savle, phrala, palem dikh!‘ Baš ko adava momenti počmingjum palem te dikhav hem dikhljum le. 14 Ov vakergja: ’O Devel amare parapapongoro biringja tut te pendžare leskiri volja, te dikhe okole soj pravedno hem te šune leskoro glaso. 15 Soske, sa e manušenge ka svedočine baši leste hem bašo adava so dikhljan hem so šungjan. 16 Hem akana, soske mislinea tut? Ušti, krstin tut te šaj o Devel te prostinel tle grevija agjaar so ka verujne ko e Isuseskoro anav‘.

17 A keda irangjum man ko Erusalim, džikote molinava man sine ko hrami, dikhljum jekh vizija.* 18 Hem dikhljum e Gospodare sar vakerela mange: ’Sigate ikljov taro Erusalim, soske o manuša akate nane te prifatinen adava so tu svedočinea baši mange!‘ 19 Me vakergjum leske: ’Gospodare, ola šukar džanena kaj frdava len sine ko zatvor hem kaj marava sine ko sinagoge* okolen so verujnena sine ki tute. 20 Hem džikote mudarena sine e Stefane, tle svedoko, me sium sine adathe, poddržinava sine adava hem arakhava sine o nametke okolengere so mudarena le sine‘. 21 Ama ov vakergja mange: ’Dža, soske bičhalava tut ko manuša taro javera narodija kola soj tane dur‘“.

22 Ola šungje sa džikote ov na vakergja akala lafija. Tegani počmingje te vikinen: „Mudaren akale manuše, soske na zaslužinela te živinel!“ 23 Adaleske so ola vikinena sine, frdena sine pumare uprune nametke hem frdena sine o pravo tari phuv ko vozduh, 24 o komandanti* zapovedingja te ingaren e Pavle ki kasarna* hem te kamšikujnen le te šaj te doznajnen soske o Evreija vikinena sine kaj valjani te mudaren le. 25 Ama keda phanle le te šaj te kamšikujnen le, o Pavle vakergja e komandireske* so tergjola sine adathe: „Zarem smejnena te kamšikujnen jekhe rimsko državjane, hem adava bizo te sudinen leske?“ 26 Keda šungja adava o komandiri* gelo ko komandanti* hem vakergja leske: „Akava manuš tano rimsko državjani. So ka kere akana?“ 27 Tegani o komandanti gelo ko Pavle hem pučlja le: „Vaker mange, dali sian rimsko državjani?“ Ov odgovoringja leske: „Oja“. 28 O komandanti vakergja leske: „Me dengjum but pare te šaj te dobinav adava državjanstvo“. A o Pavle odgovoringja leske: „Ama me bijandiljum sar rimsko državjani“.

29 Tegani o vojnikija kola so spremingje pe te kamšikujnen le hem te ispitinen le, odma cidingje pe lestar. A o komandanti keda doznajngja kaj o Pavle tano rimsko državjani, darandilo soske ov phanlja le ko sindžirija.

30 O tajsutno dive, adaleske so mangela sine te džanel i pričina soske o Evreija krivinena sine e Pavle, o komandanti phravgja lestar o sindžirija hem zapovedingja o glavna sveštenikija hem celo Sudsko sovet* te kheden pe. Tegani angja e Pavle hem čhivgja le maškar lende.

23 A o Pavle dikhlja ko Sudsko sovet* hem vakergja: „Phraljalen, šaj te phenav anglo Devel kaj mi sovest vakerela mange kaj dži akana na kergjum ništo pogrešno“. 2 Tegani o prvosvešteniko o Ananija zapovedingja okolenge so tergjona sine uzi leste te khuven le ko muj. 3 A o Pavle vakergja leske: „O Devel ka khuvel tu tut, licemerno manušea.* Sar šaj te beše akate hem te sudine mange sprema o Zakoni, a ko isto vreme phagea o Zakoni adalea so zapovedinea te khuven man?“ 4 Okola so tergjona sine adathe vakergje: „Zarem vredžinea e Devleskere prvosvešteniko?“ 5 O Pavle odgovoringja: „Phraljalen, na džanljum kaj ov tano prvosvešteniko, soske pišimo tano: ’Ma ker lošno lafi protiv o poglavari tle narodoskoro‘“.

6 Adaleske so o Pavle džanlja kaj nesave lendar sine sadukeija,* a nesave fariseija,* ov glasno vikingja anglo Sudsko sovet:* „Phraljalen, me sium farisei hem mle parapapija sine fariseija. Sudinela pe mange adaleske so verujnava ko voskresenie e mulengoro“. 7 Keda vakergja adava, o fariseija hem o sadukeija počmingje te rasprajnen pe hem maškar lende uli podelba. 8 Soske, o sadukeija vakerena kaj nane voskresenie, nane ni angelija, ni nevidliva suštestvija, a o fariseija verujnena ko sa adava. 9 Adaleske sarine počmingje te vikinen. Hem nesave učitelija e zakoneskere, kola so sine fariseija, but holjangje, uštile hem vakergje e sadukeenge: „Amen na arakhaja ništo lošno ko akava manuš. A so ako čače kergja lea lafi jekh nevidlivo suštestvo ili angeli?“ 10 Tegani, keda počmingje panda poviše te rasprajnen pe, o komandanti* darandilo kaj ka mudaren e Pavle. Adaleske naredingja e vojnikonge te džan hem te ciden le lendar, te šaj te ingaren le ki kasarna.*

11 A adaja rat o Gospodari pojavingja pe anglo Pavle hem vakergja leske: „Ov hrabro! Soske, sar ko Erusalim so temelno svedočingjan baši mande, agjaar ka svedočine hem ko Rim“.

12 Keda phravdilo o dive, o Evreija kergje plani hem hale sovli kaj nane ni te han ni te pien sa džikote na mudarena e Pavle. 13 A sine poviše taro 40 murša so hale sovli. 14 Ola gele ko glavna sveštenikija hem ko starešine hem vakergje lenge: „Halem sovli kaj nane te ha ništo sa džikote na mudaraja e Pavle“. 15 Adaleske akana tumen hem o Sudsko sovet molinen e komandante* te anel le ki tumende. Vakeren leske kaj mangena detalno te ispitinen leskoro slučaj. Amen ka ova spremna te mudara le angleder ov te resel akate“.

16 Keda o čhavo e Pavleskere phenjakoro šungja bašo lengoro plani te mudaren le, ov alo, khuvgja ki kasarna hem vakergja adava e Pavleske. 17 Tegani o Pavle vikingja ki peste jekhe komandire* hem vakergja leske: „Ingar akale terne čhave ko komandanti,* soske isi le nešto te vakerel leske“. 18 Ov lelja le, ingargja le ko komandanti hem vakergja leske: „O zatvoreniko o Pavle vikingja man hem zamolingja man te anav akale čhave ki tute, soske isi le nešto te vakerel tuke“. 19 O komandanti lelja le taro vas, cidingja le ki strana hem pučlja le: „So isi tut te vakere mange?“ 20 Ov vakergja leske: „O Evreija dogovoringje pe te zamolinen tut tajsa te ane e Pavle ko Sudsko sovet, hem ka vakeren tuke kaj mangena te doznajnen nešto poviše bašo leskoro slučaj. 21 Ama ma ker adava so ka roden tutar, soske poviše taro 40 manuša adžikerena te astaren le hem hale sovli kaj nane te han hem te pien sa džikote na mudarena le. Ola više tane spremna, samo adžikerena tu te soglasine tut“. 22 Tegani o komandanti* mukhlja e terne čhave te džal peske hem zapovedingja leske: „Nikaske ma vaker kaj vakergjan mange bašo akava!“

23 Ov vikingja ki peste duje komandiren* hem vakergja lenge: „Len tumencar 200 vojnikija, 70 vojnikija grastencar hem 200 vojnikija so isi len kopje hem okolu enja o saati* rakjate ciden te džan pravo ki Cezareja. 24 Isto agjaar, spreminen grasta e Pavleske, te šaj bezbedno te ingaren le ko upraviteli o Feliks“. 25 Hem pišingja jekh pismo kote so vakergja:

26 „Me o Klavdij Lisij, pozdravinava e bare upravitele e Felikse! 27 O Evreija astargje akale manuše hem ka mudaren le sine, ama me aljum sigate mle vojnikoncar hem spasingjum le, soske doznajngjum kaj tano rimsko državjani. 28 Mangljum te doznajnav soske krivinena le sine hem adaleske ingargjum le ko lengoro Sudsko sovet. 29 Dikhljum kaj krivinena le bašo nesave bukja soj povrzime lengere Zakonea, ama na dikhljum kaj kergja nešto koleske so zaslužinela te ovel mudardo ili phanlo ko sindžirija. 30 Adaleske so doznajngjum kaj kergje plani te mudaren le, odma bičhalgjum le ki tute, a okolenge so krivinena le zapovedingjum angli tute te vakeren so isi len protiv leste“.

31 O vojnikija kergje agjaar sar so sine lenge zapovedimo hem adaja rat ingargje e Pavle ki Antipatrida. 32 O tajsutno dive o vojnikija e grastencar prodolžingje lea ko drumo, a o javera vojnikija irangje pe ki kasarna. 33 Keda o vojnikija e grastencar khuvgje ki Cezareja, dengje o pismo e upraviteleske hem angje e Pavle angli leste. 34 O upraviteli čitingja o pismo hem pučlja e Pavle tari koja pokraina tano. Ov vakergja leske kaj tano tari Kilikija. 35 Tegani o upraviteli vakergja leske: „Ka šunav sa bašo tlo slučaj keda ka resen okola so krivinena tut“. Hem zapovedingja te phanden le sar zatvoreniko ki e Irodeskiri carsko palata.

24 Palo pandž dive, alo o prvosvešteniko o Ananija zaedno nesave starešinencar hem jekhe manušea so vikinela pe sine Tertul,* te kerel lafi anglo sudo lenge ko anav. Ola ale te vakeren e upraviteleske bašo so krivinena e Pavle. 2 Keda vikingje e Tertule, ov počmingja te krivinel e Pavle, hem vakergja e Felikseske:

„Tlo vladibe hem o promene so kergjan angja amenge baro mir, hem adava so šukar razmislinea angleder bašo bukja, angja šukaripe akale narodoske. 3 Amen sekogaš hem segde priznajnaja adava, barea Feliks, hem siem tuke but blagodarna. 4 Ama, na mangava but te zadržinav tut, adaleske molinava tut ov milostivo hem šun amen kratko. 5 Otkringjem kaj akava manuš kerela bare problemija,* kaj pottikninela sa e Evreen ki celo phuv te buninen pe protiv i vlada hem kaj ov tano glavno ki nazarekjansko sekta.* 6 Ov isto agjaar, probingja te kerel o hrami te na ovel sveto, adaleske astargjem le. 7* -- 8 Keda ka puče le, tu korkori ka otkrine kaj sa adava so vakeraja tano čače“.

9 Tegani o Evreija da počmingje te krivinen e Pavle hem te vakeren kaj adava tano čače. 10 Keda o upraviteli dengja znako e Pavleske te kerel lafi, ov vakergja:

„Adaleske so džanava kaj tu beršencar sudinea akale narodoske, milo mange so šaj te braninav man angli tute. 11 Na nakhle poviše taro 12 dive sar sium sine ko Erusalim te obožavinav e Devle. Ako mangea te uverine tut ko adava šaj te puče. 12 Hem na dikhle man ni sar rasprajnava man nekasaja ko hrami, ni sar pottikninava e manušen te buninen pe protiv i vlada. Na kergjum adava ni ko sinagoge,* ni bilo kaj javerthe ki diz. 13 A ola našti te dokažinen tuke adava bašo so krivinena man akana. 14 Ama me priznajnava tuke kaj živinava sprema o Drumo* koleske so ola vakerena kaj tano ’sekta‘* hem sprema adava sikljojbe služinava e Devleske koleske so služinena sine mle parapapija hem verujnava ko sa adava so pišinela ko Zakoni hem ko Prorokija. 15 Hem isi man nadež, sar so isi akale manušen da, kaj o Devel ka voskresninel okolen soj pravedna hem okolen so nane pravedna. 16 Adaleske trudinava man sekogaš te ovel man čisto sovest* anglo Devel hem anglo manuša. 17 Hem akana palo but berša, aljum ko Erusalim te anav pare e čorolenge taro mlo narodo hem te dav žrtva e Devleske. 18 Džikote kerava sine adava ko hrami, ola arakhle man adathe, a me sium sine čisto sprema o Zakoni. Ama tegani ni na khedingjum but manušen pali mande, a ni na kergjum o narodo te buninel pe. Ama adathe sine nesave Evreija tari azisko provincija,* 19 hem ako sine len nešto protiv mande ola bi valjani sine te aven angli tute hem te krivinen man. 20 Ili akala manuša soj akate korkori neka vakeren bašo so arakhle kaj sium krivo džikote tergjovava sine anglo Sudsko sovet,* 21 osven ako krivinena man bašo adava so vakergjum džikote tergjovava sine maškar lende: ’Bašo voskresenie e mulengoro, avdive sudinela pe mange angli tumende!‘“

22 Ama o Feliks, kova so šukar džanela sine bašo Drumo,* odložingja o sudibe hem vakergja: „Keda ka avel o komandanti* o Lisij, ka rešinav tumaro slučaj“. 23 Hem naredingja e komandireske* te čhivel e Pavle ko zatvor, ama te dozvolinel leske te kerel nesave bukja hem te dozvolinel leskere amalenge te aven te grižinen pe bašo leskere potrebe.

24 Palo nesave dive, o Feliks alo ple romnjaja e Druzilaja koja so sine Evrejka. Ov naredingja te anen e Pavle hem šungja le džikote objasninela leske sine so značinela te verujnel pe ko Hristos Isus. 25 A džikote o Pavle kerela sine lafi baši pravednost, baši samokontrola hem bašo vreme keda o Devel ka sudinel e manušenge, o Feliks darandilo hem vakergja: „Akana dža, a ki javer prilika keda ka ovel man vreme, ka vikinav tut palem“. 26 Ama isto agjaar, nadinela pe sine kaj o Pavle ka del le pare. Adaleske vikinela le sine počesto hem kerela sine lea lafi. 27 Keda nakhle duj berš, o Porcij Fest alo ko than e Felikseske sar upraviteli. Ama adaleske so o Feliks mangela sine te ugodinel e Evreenge, ov mukhlja e Pavle te ačhol ko zatvor.

25 Palo trin dive, otkeda alo ki Judeja* hem ulo upraviteli, o Fest tari Cezareja gelo ko Erusalim. 2 Adathe o glavna sveštenikija hem o najvažna manuša maškar o Evreija vakergje leske bašo so krivinena e Pavle. Počmingje te molinen le 3 hem rodingje lestar te kerel lenge usluga, te bičhalel e Pavle ko Erusalim. Ola rodingje lestar adava, soske planirinena sine te astaren e Pavle hem te mudaren le ko drumo. 4 Ama o Fest odgovoringja lenge kaj o Pavle valjani te ačhol ko zatvor ki Cezareja hem kaj panda hari ov da ka iranel pe adari. 5 Hem vakergja lenge: „O vodačija soj maškar tumende neka aven mancar hem neka tužinen le, ako adava manuš čače tano krivo bašo nešto“.

6 Otkeda ačhilo lencar okolu ofto dži ko deš dive, ov irangja pe ki Cezareja. O tajsutno dive, bešlja ki sudsko stolica hem zapovedingja te anen e Pavle. 7 Keda alo o Pavle, o Evreija so ale taro Erusalim opkolingje le hem počmingje te vakeren kaj tano krivo bašo but seriozna bukja. Ama našti sine te dokažinen adava.

8 A o Pavle počmingja te braninel pe hem vakergja: „Na grešingjum ni protiv o evrejsko Zakoni, ni protiv o hrami, a ni palem protiv o cezar“. 9 A o Fest adaleske so manglja te ugodinel e Evreenge, vakergja e Pavleske: „Mangea li te dža ko Erusalim hem adari te sudinel pe tuke angli mande bašo akala bukja?“ 10 O Pavle odgovoringja: „Tergjovava angli sudsko stolica e cezareskiri, akate valjani te sudinel pe mange. Me na grešingjum ništo e Evreenge, sar so tu korkori šukar dikhea adava. 11 Ako čače kergjum nešto lošno hem ako bašo adava so kergjum zaslužinava te merav, tegani me na našava taro meribe. Ama, ako sa akala bukja, kolenge so vakerena kaj sium krivo, nane točna, tegani nijekhe manuše nane le pravo te predajnel man lenge, samo te šaj te ugodinel lenge. Ka žalinav man anglo cezar!“ 12 Tegani o Fest otkeda kergja lafi ple sovetnikoncar, vakergja: „Ako mangea te žaline tut anglo cezar, ka dža anglo cezar!“

13 Palo nekobor dive, o cari o Agripa* hem i Vernika ale ki Cezareja te posetinen e Feste. 14 Adaleske so ola ačhile adathe poviše dive, o Fest raskažingja e careske bašo e Pavleskoro slučaj, hem vakergja:

„Isi jekh manuš kole so o Feliks mukhlja le te ačhol ko zatvor. 15 Hem keda sium sine ko Erusalim, o glavna sveštenikija hem o evrejska starešine vakergje mange bašo so krivinena le, hem rodingje mandar te osudinav le. 16 A me vakergjum lenge kaj ko Rimjanja nane običaj te osudinel pe jekh manuš samo te šaj te ugodinel pe nekaske, nego adava manuš prvo mora te soočinel pe okolencar so krivinena le, te šaj te ovel le prilika te braninel pe. 17 Adaleske, keda ola khedingje pe akate, na adžikergjum te nakhel but vreme, nego odma o tajsutno dive bešljum ki sudsko stolica hem zapovedingjum te anen adale manuše. 18 Keda ola uštile hem počmingje te keren lafi, na vakergje kaj tano krivo bašo nesavo lošnipe savo so me očekujngjum, 19 nego ola krivinena le samo bašo nesave pumare veruvanja hem bašo nesavo Isus kova so mulo, a bašo kova so o Pavle uporno vakerela kaj tano dživdo. 20 Adaleske so na sium sine sigurno sar te rešinav akava, pučljum le dali mangela te džal ko Erusalim hem adari te sudinel pe leske bašo akala bukja. 21 Ama adaleske so o Pavle rodingja te žalinel pe anglo cezar* hem ko zatvor te adžikerel leskiri odluka, zapovedingjum te ikeren le ko zatvor sa džikote na bičhalava le anglo cezar“.

22 Tegani o Agripa vakergja e Festeske: „Me da bi mangava te šunav adale manuše“. A ov vakergja leske: „Tajsa ka šune le“. 23 Agjaar o tajsutno dive o Agripa hem i Vernika ale but raskošno hem khuvgje ki sala zaedno e komandantencar hem e ugledna manušencar tari adaja diz. Palo adava, o Fest zapovedingja te anen e Pavle. 24 Tegani o Fest vakergja: „Care Agripa hem sarine tumen so sien akate amencar! Dikhen akale manuše, lestar žalingje pe mange sa o Evreija taro Erusalim hem akatar. Ola glasno vikinena sine kaj na valjani više te živinel. 25 Ama me haliljum kaj ov na kergja ništo baši so valjani te ovel mudardo. Adaleske keda ov rodingja te žalinel pe anglo cezar, me odlučingjum te bičhalav le ki leste. 26 Ama, nane man so konkretno te pišinav mle Gospodareske baši leste. Adaleske angjum le anglo tumende, a posebno anglo tute care Agripa, te šaj te ovel man so te pišinav otkeda ka ispitina le. 27 Soske, nane mange razumno te bičhalav zatvoreniko ko Rim bizo te pišinav bašo so kerena le krivo“.

26 O Agripa vakergja e Pavleske: „Dozvolimo tuke te kere lafi te šaj te branine tut!“ Tegani o Pavle pružingja plo vas hem počmingja te kerel lafi te šaj te braninel pe, hem vakergja:

2 „Care Agripa, srekjno sium so avdive šaj angli tute te braninav man bašo sa o bukja so krivinena man o Evreija, 3 posebno soske tu but šukar pendžarea o evrejska običaija hem bašo kola bukja o Evreija na soglasinena pe maškar peste. Adaleske, molinava tut strplivo te šune man.

4 Sa o Evreija džanena savo životo živinava sine panda taro mlo ternipe maškar mlo narodo hem ko Erusalim. 5 Ola odamna pendžarena man hem ako mangena šaj te vakeren tuke, kaj me živinava sine sar farisei, koja soj i najstrogo sekta* ki amari vera. 6 A akana sudinela pe mange, soske isi man nadež kaj o Devel ka ispolninel o vetuvanje so dengja amare parapaponge. 7 Hem amare 12 plemija taro Izrael isto agjaar nadinena pe kaj ka ispolninel pe akava vetuvanje. Adaleske ola verno služinena e Devleske dive hem rat. Care, baši adaja nadež krivinena man o Evreija.

8 Soske mislinena kaj o Devel našti te voskresninel e mulen? 9 Me da, jekh vreme sium sine uverimo kaj valjani ko sekova način te borinav man protiv o anav e Isuseskoro o Nazarekjanco. 10 Baš adava kerava sine ko Erusalim, frdingjum ko zatvor buten taro sveta manuša,* soske dobingjum dozvola taro glavna sveštenikija, hem keda valjani sine te oven mudarde, me da poddržinava sine adava. 11 Džava sine tari sinagoga ki sinagoga hem kazninava len sine, hem agjaar mangava sine silaja te terinav len te otkažinen pe tari pli vera. Sium sine lenge doborom holjamo so džava sine ko javera da dizja te progoninav len.

12 Džikote bašo adava patujnava sine ko Damask, soske o glavna sveštenikija dengje man dozvola te kerav adava adari da, 13 ko ekvaš o dive ko drumo, care, dikhljum sar upri mande hem okola so patujnena sine mancar svetingja jekh baro svetlo taro nebo, kova so sine pojako taro e khameskoro. 14 Keda sarine pelem ki phuv, šungjum jekh glaso sar vakerela mange ki hebrejsko čhib: ’Savle, Savle, soske progoninea man? Adalea so džaja protiv mande,* korkori ka povredine tut!‘ 15 A me pučljum le: ’Koj sian tu, Gospodare?’ O Gospodari vakergja: ’Me sium o Isus, kole so tu progoninea. 16 Ama akana ušti hem tergjov ko pre! Pojavingjum man tuke te birinav tut te ove mlo sluga hem svedoko, te šaj te vakere adava so dikhljan hem adava so me ponadari ka sikavav tuke baši mande. 17 Ka spasinav tut taro Evreija hem taro javera narodija, kolende so bičhalava tut, 18 te phrave o jakhja lengere, te irane len tari temnica ki svetlina, te oslobodine len tari i vlast e Satanaskiri hem te ane len teli e Devleskiri vlast. Hem adalea so ka verujnen ki mande, te oven lenge prostime o grevija hem te dobinen nasledstvo maškar okolende so o Devel kergja len te oven sveta’.

19 Adaleske, care Agripa, me kergjum adava so o Isus vakergja mange te kerav ki adaja vizija so dobingjum taro nebo. 20 Prvo, vakergjum o haberi okolenge ko Damask, kaj valjani te kainen pe hem te iranen pe ko Devel, agjaar so ka keren bukja kolencar so ka sikaven kaj kainena pe, a palo adava, vakergjum okolenge ko Erusalim, ki celo Judeja hem isto agjaar e manušenge taro javera narodija. 21 Bašo akava o Evreija astargje man ko hrami hem mangle te mudaren man. 22 Ama, adaleske so o Devel pomožingja mange, me avdive da propovedinava hem e obična manušenge hem e važna manušenge. Hem na vakerava ništo javer osven adava so vakergje o Prorokija hem o Mojsej kaj ka slučinel pe. 23 Ola vakergje kaj o Hristos* ka cidel muke hem ka merel, kaj ka ovel o prvo so ka voskresninel taro mule, ka propovedinel hem ka anel svetlina e Evreenge hem e javere narodonge“.

24 Džikote o Pavle vakerela sine akala bukja te braninel pe, o Fest glasno vikingja: „Delindiljan, Pavle! Adava so but učingjan, ikalgja tut tari godi!“ 25 O Pavle vakergja leske: „Na ikliljum tari godi, barea Fest, nego adava so vakerava tano čače hem razumno. 26 Me slobodno kerava lafi anglo cari, soske ov but šukar džanela bašo sa akala bukja, a akala bukja na slučingje pe počorane. 27 Verujnea li ko adava so vakergje o Prorokija, care Agripa? Džanava kaj verujnea!“ 28 A o Agripa odgovoringja e Pavleske: „Panda hari, ka ubedine man te ovav hristijani!“ 29 Tegani o Pavle vakergja: „Molinava e Devle, porano ili pokasno, na samo tu, nego sa okola so šunena man avdive, te oven sar mande, ama bizo akala sindžirija“.

30 Tegani o cari uštilo, a isto agjaar o upraviteli, i Vernika hem okola so bešena sine lencar. 31 Džikote džana peske sine, vakerena sine jekh jekheske: „Akava manuš na kergja ništo bašo so zaslužinela te ovel mudardo ili phanlo ko sindžirija“. 32 A o Agripa vakergja e Festeske: „Akava manuš šaj sine te ovel oslobodimo, te na rodel sine te žalinel pe anglo cezar“.

27 Otkeda odlučingje brodea te bičhalen amen ki Italija, ola predajngje e Pavle hem nesave javere zatvorenikon e komandireske,* kova so vikinela pe sine Julij, tari e Avgusteskiri četa. 2 Uklilem ko jekh brodi kova so sine tari Adramitija. Adava brodi valjani sine te džal ko nesave thana tari azisko provincija* kola so sine paše uzo more, hem cidingjem e brodea. Amencar sine o Aristarh, jekh Makedonco taro Solun. 3 O tajsutno dive, reslem ko Sidon. O Julij postapingja ljubezno e Pavlea hem dozvolingja leske te džal ko ple amala te šaj te grižinen pe leske.

4 Otkeda cidingjem adathar, nakhlem uzo Kipar te šaj te garava amen tari bavlal, soske phudela sine pravo ki amende. 5 Tegani e brodea cidingjem amen taro brego hem gelem kote soj o more pohor hem nakhlem tari Kilikija hem Pamfilija, hem reslem ki diz Mira, ki Likija. 6 Adathe o komandiri arakhlja jekh brodi tari Aleksandrija, kova so džala sine ki Italija hem ukljargja amen ki leste. 7 Patujnaja sine bavno nekobor dive hem edvaj reslem ko Knid. Adaleske so i bavlal na mukhela amen sine te dža angle, nakhlem uzo Krit te garava amen tari bavlal hem reslem dži ki Salmona. 8 Otkeda edvaj nakhlem uzo brego taro Krit, reslem ko jekh than so vikinela pe Šukar Pristaništa,* a kova so sine paše uzi diz Laseja.

9 Adaleske so nakhlja but vreme, o patujbe e brodea počmingja te ovel opasno, soske više nakhlja čak o vreme* keda postinela pe bašo Dive e prostibaske o grevija. Adaleske o Pavle predupredingja len: 10 „Manušalen, dikhava kaj nane te ovel šukar te prodolžina e patujbaja. Ako džaja, o brodi ka batinel, ka našava o bukja soj tovarime ko brodi, hem amen da šaj te mera“. 11 Ama o komandiri, poviše šungja e manuše kova so upravinela sine o brodi hem e manuše kaskoro so sine o brodi, nego e Pavle. 12 A adaleske so ko adava pristanište na sine šukar te ačhovel pe evendaske, poviše džene lendar dengje predlog te ciden brodea adathar hem nesar te resen ko Feniks, ko pristanište so sine ko Krit, koleste so šaj sine te avel pe tari severoistočno strana hem tari jugoistočno strana, hem adathe te nakhen o even.

13 Keda počmingja pohari te phudel bavlal taro jug, ola mislingje peske kaj akana šaj te keren adava so planiringje. Adaleske vazdingje i kotva* hem počmingje brodea te džan uzo brego taro Krit. 14 Ama odma palo adava, počmingja te phudel jekh but silno bavlal, pendžardi sar severoistočno bavlal.* 15 I bavlal sine doborom silno so našti sine te dža e brodea angle. Adaleske so našti sine te kera ništo, mukhlem i bavlal te ingarel o brodi. 16 Džikote nakhaja sine e brodea taro jekh tikno ostrov so vikinela pe Klavda, šaj sine hari te garava amen tari bavlal, sepak edvaj uspejngjem te astara o čamco so vlečinaja sine pali amende e brodea. 17 Otkeda vazdingje o čamco hem čhivgje le ko brodi, ola šelencar telaldan šukar stegingje o brodi te šaj te na phagjol. Palo adava ola phravgje o šele taro edrija* hem mukhle i bavlal te ingarel len, soske darandile e brodea te na zaglavinen ki pošik taro Sirt.* 18 Tari silno bavlal o bare branija počmingje te frden o brodi levo-desno. Adaleske o tajsutno dive ola počmingje te frden o tovari taro brodi. 19 A o trito dive, ola ple vastencar frdingje i oprema e brodeskiri.

20 Adaleske so divencar našti sine te dikha ni o kham ni o zvezde, nego sine samo jekh bari bura, amen na sine amen više nisavi nadež kaj ka spasina amen. 21 Nikoj ko brodi but vreme na halja ništo, adaleske o Pavle terdilo maškar lende hem vakergja: „Manušalen, valjangjen te šunen man keda vakergjum tumenge te na ciden e brodea taro Krit. Agjaar nane sine te cida akala muke hem na ka valjani sine te frda ništo taro brodi. 22 Ama akana molinava tumen oven hrabra, soske nijekh tumendar nane te merel, nego samo o brodi ka ovel uništimo. 23 O Devel kaske so pripadinava hem služinava, akaja rat bičhalgja mange jekhe angele 24 hem vakergja mange: ’Ma dara Pavle! Tu valjani te tergjove anglo cezar, hem ake, o Devel ka spasinel tut hem sa adalen so patujnena tuja‘. 25 Adaleske ma daran, manušalen, soske verujnava kaj o Devel ka kerel baš agjaar sar so vakergja mange. 26 Ama amaro brodi ka phagjol paše uzo nesavo ostrov“.

27 Čak ki 14-to rat, džikote i bavlal ingarela amen sine akari-okori ko Adrijansko More,* o mornarija ki ekvaš i rat osetingje kaj avaja paše ko nesavo kopno. 28 Tegani meringje kobor tano hor o pani hem dikhle kaj tano hor 36 metre.* Keda gele hari ponadari, palem meringje hem dikhle kaj o pani tano hor 27 metre.* 29 Adaleske so darana sine te na khuva ki nesavi karpa, ola mukhle ko pani o štar kotve* taro paluno delo taro brodi hem edvaj adžikergje te phravgjol o dive. 30 O mornarija mangle te našen taro brodi hem adaleske počmingje te mukhen o čamco ko pani, ama vakerena sine kaj demek mangena te mukhen o kotve soj ko angluno delo taro brodi. 31 Adaleske o Pavle vakergja e komandireske hem e vojnikonge: „Ako akala manuša na ačhovena ko brodi, tumen našti ka spasinen tumen“. 32 Tegani o vojnikija čhingje o šele so ikerena sine o čamco hem mukhle o čamco te perel ko pani.

33 A angleder te phravgjol o dive, o Pavle počmingja te molinel sarinen te han nešto hem vakergja: „Avdive tano o 14-to dive sar edvaj adžikerena te dikhen so ka slučinel pe amencar hem panda ništo na halen. 34 Adaleske molinava tumen han nešto. Adava tano bašo tumaro šukaripe. Soske nijekhestar tumendar nane te perel nijekh bal taro šero“. 35 Otkeda vakergja adava, lelja maro, zablagodaringja pe e Devleske ki molitva anglo sarinende, phaglja o maro hem počmingja te hal. 36 Agjaar sarine ohrabringje pe hem počmingje ola da te han. 37 A ko brodi vkupno siem sine 276 džene. 38 Keda hale hem čalile, počmingje te frden ko more o giv so sine tovarimo ko brodi, te šaj te keren o brodi te ovel polokho.

39 Keda phravdilo o dive, ola dikhle kopno, ama na džanle kote tane, hem dikhle brego pošikaja hem mangle ako šaj e brodea te aven dži ko adava than. 40 Adaleske ola čhingje o šele so ikerena sine o kotve hem mukhle len te peren ko pani. Ko isto vreme phravgje o šele so ikerena sine o veslija, kolencar so upravinena o brodi, phravgje o edro so sine anglal ko brodi hem mukhle i bavlal te ingarel len dži ko brego. 41 Keda resle ko jekh than kote so o pani sine but plitko, o angluno delo taro brodi zaglavingja ki pošik hem našti sine te mrdinel pe. A taro silna branija o paluno delo taro brodi počmingja te phagjol ko kotora. 42 Tegani o vojnikija odlučingje te mudaren sa e zatvorenikon te šaj ola te na plivinen hem te našen. 43 Ama o komandiri manglja te spasinel e Pavle, hem adaleske na dozvolingja e vojnikonge te keren adava. Hem okolenge so džanena sine te plivinen, zapovedingja te frden pe ko more, te plivinen hem prva te resen ko kopno, 44 a o javera te džan pali lende agjaar so ka ikeren pe ko nesave phajlja ili predmetija taro brodi. Agjaar sarine ačhile dživde hem resle ko kopno.

28 Keda bezbedno reslem ko brego, doznajngjem kaj siem ko ostrov so vikinela pe Malta. 2 O manuša taro adava ostrov* sine amencar but šukar hem pomožingje amenge. Ola lele amen hem thargje jag, soske dela sine bršim hem sine šudro. 3 A o Pavle khedingja nekobor šuke granke hem čhivgja len ki jag. Taro jekh puti, adaleske so sine tato, taro granke iklilo jekh otrovno sap kova so kicingja e Pavle ko vas hem ačhilo agjaar te visinel. 4 Keda o manuša taro adava ostrov* dikhle sar o sap visinela e Pavleske ko vas, počmingje te vakeren maškar peste: „Akava manuš sigurno mudargja nekas. Šaj spasingja pe taro more, ama i Pravda* na mukhela le te ačhol dživdo“. 5 O Pavle tresingja plo vas hem frdingja e sape ki jag, a leske na ulo ništo. 6 Ola očekujngje o Pavle te šuvljol ili taro jekh puti te perel hem te merel. Adžikergje but vreme, hem keda dikhle kaj na ulo leske ništo, ola meningje plo mislenje hem počmingje te vakeren kaj ov tano jekh taro devela.

7 Paše uzo adava than arakhljona sine o nive e upraviteleskere taro adava ostrov, kova so vikinela pe sine Publij. Ov ljubezno primingja amen ko plo kher hem trin dive grižingja pe amenge. 8 A o dad e Publijeskoro pašljola sine ko kreveti soske sine le temperatura hem bare dukha ko vogi.* O Pavle alo uzi leste, molingja pe, čhivgja ple vasta upri leste hem sasljargja le. 9 Palo adava, ko Pavle avena sine javera da manuša taro adava ostrov kola so sine nasvale hem ov sasljarela len sine. 10 Ola sikavgje kaj but ceninena adava so o Pavle sasljargja len, adalea so angje amenge but poklonija. A keda valjani sine te dža amenge adathar, ola dengje amen sa so valjangja amenge.

11 Palo trin masek gelem amenge taro adava ostrov jekhe brodea kova so sine adathe celo even. Adava brodi sine tari Aleksandrija hem anglal sine le o znako taro e Zevseskere čhave. 12 Reslem ki Sirakuza hem adathe ačhilem trin dive. 13 Adathar cidingjem e brodea hem reslem ki Regija. O tajsutno dive phudingja bavlal taro jug, hem o dive palo adava reslem ko Puteoli. 14 Adathe arakhlem phralen kola so molingje amen te ačhova lencar efta dive. Palo adava cidingjem te dža ko Rim. 15 A o phralja taro Rim keda šungje kaj avaja, ale te adžikeren amen ko Trin gostilnice,* a nesave lendar ale čak dži ko e Apieveskoro ploštad. O Pavle keda dikhlja len zablagodaringja pe e Devleske hem ohrabringja pe. 16 Keda reslem ko Rim, e Pavleske sine dozvolimo te živinel korkori ko jekh kher, ama lea sine jekh vojniko so pazinela le sine.

17 Palo trin dive o Pavle vikingja ki peste e najvažna manušen maškar o Evreija taro adava than. Keda khedingje pe, ov vakergja lenge: „Phraljalen, me na kergjum ništo protiv o narodo, ni protiv o običaija amare parapapongere, a sepak ko Erusalim astargje man hem predajngje man ko vasta e Rimjanenge. 18 Otkeda ispitingje man, o Rimjanja mangle te mukhen man, soske na arakhle ki mande ništo koleske so zaslužinava te ovav mudardo. 19 Ama adaleske so o Evreija sine protiv adava, me mora sine te žalinav man anglo cezar, ama adava na kergjum le adaleske so mangljum te krivinav mle narodo bašo nešto. 20 Baš bašo adava rodingjum te dikhav man tumencar hem te kerav tumencar lafi, soske sium phanlo akale sindžirea bašo okova ki koleste so o Izrael nadinela pe sine“. 21 Ola vakergje leske: „Amen na dobingjem nisave pismija tari Judeja baši tuke, ni palem nekoj taro phralja so ale adathar javingje amenge ili vakergje amenge nešto lošno baši tute. 22 Ama mangaja te šuna tutar so mislinea tu, soske džanaja kaj segde kerela pe lafi protiv akaja sekta“.*

23 Hem dogovoringje pe lea jekh javer dive te kheden pe palem, ama akava puti ale but poviše džene ko kher kote so sine o Pavle. A ov taro sabajle dži rakjate objasninela sine lenge hem temelno svedočinela sine lenge bašo e Devleskoro Carstvo hem koristinela sine e Mojseeskoro zakoni hem adava so pišinela sine ko Prorokija te šaj te uverinel len te prifatinen e Isuse. 24 Hem nesave počmingje te verujnen ko leskere lafija, a nesave na. 25 Adaleske so našti sine te soglasinen pe maškar peste, ola počmingje te džan peske. Tegani o Pavle vakergja lenge akava:

„Šukar vakergja o Devel preku pli sila* tumare parapaponge. Ov e prorokoske e Isaijaske vakergja: 26 ’Dža ko akava narodo hem vaker lenge: „Ka šunen ama nane te haljoven, ka dikhen ama sar te phene na dikhlen. 27 Soske, o vilo akale manušengoro ulo zoralo sar bar hem kergje pe kašuke hem phanle pumare jakhja, te šaj ola nikogaš te na dikhen pumare jakhencar, te na šunen pumare kanencar, te na haljoven pumare vilea hem te na iranen pe ki mande te šaj te sasljarav len“‘. 28 Adaleske, džanen kaj o haberi bašo adava sar o Devel spasinela e manušen, akana vakerela pe e manušenge taro javera narodija, hem ola sigurno ka šunen hem ka prifatinen“. 29* --

30 O Pavle ačhilo ko adava kher duj berš kirijaja, hem ljubezno priminela sine sarinen so avena sine ki leste. 31 Ov hrabro hem bizi nisavi prečka propovedinela sine bašo e Devleskoro Carstvo hem sikavela sine e javeren bašo Gospodari o Isus Hristos.