PISMO DŽI KO RIMJANJA

1 Me o Pavle, kova so sium o robo e Isus Hristoseskoro,* pišinava tumenge akava pismo. Ov vikingja man* te ovav apostoli hem biringja man te propovedinav e Devleskoro šukar haberi. 2 O Devel akava šukar haberi vetingja le but vreme angleder preku ple prorokija ko sveta spisija. 3 O haberi kerela lafi bašo leskoro Čhavo, kova so sine bijamo ki phuv sar potomco e Davideskoro, 4 ama adalea so o Devel preku pli sila* voskresningja le taro mule, sine jasno kaj ov tano e Devleskoro Čhavo, adava tano amaro Gospodari o Isus Hristos. 5 O Devel preku leste sikavgja amenge plo šukaripe so na zaslužinaja le. O Isus biringja man te ovav apostoli te šaj te pomožinav e manušenge taro sa o narodija te sikaven vera, te oven poslušna hem agjaar te sikaven čest leskere anaveske. 6 A maškar lende, tumen da sien vikime te oven e Isus Hristoseskere sledbenikija. 7 Akava pismo tano dži ko sa okola soj ko Rim, kolen so o Devel mangela hem kolen so vikingja te oven sveta:

Neka ovel tumen o šukaripe so na zaslužinaja le hem o mir taro Devel, kova soj amaro Dad, hem taro Gospodari o Isus Hristos.

8 Najangle, preku o Isus Hristos, blagodarinava e Devleske baši sarinenge tumenge, soske baši tumari vera kerela pe lafi ko celo sveto. 9 Služinava e Devleske celo vilea agjaar so propovedinava o šukar haberi bašo leskoro Čhavo, hem o Devel džanela kaj me sekogaš spomninava tumen ko mle molitve. 10 Molinava man e Devleske ako šaj hem ako tani leskiri volja te uspejnav te avav ki tumende. 11 Soske, edvaj adžikerava te dikhav tumen, te šaj te dav tumen nesavo duhovno poklon* so ka kerel tumari vera te ovel pozorali. 12 Ustvari, zaedno te ohrabrina amen, me tumare, a tumen mle veraja.

13 Phraljalen, mangava te džanen kaj but puti mangljum te avav ki tumende, te propovedinav hem te dikhav sar o manuša taro adava than hem o manuša taro javera narodija ovena učenikija, ama našti sine. 14 Dužno sium te propovedinav sa e manušenge, hem e Grkonge hem e manušenge taro javera narodija, hem e učime manušenge hem okolenge so nane učime. 15 Adaleske isi man bari želba te vakerav o šukar haberi tumenge da ko Rim. 16 Me na ladžava taro šukar haberi, soske preku leste o Devel sikavela pli sila, koja so spasinela sekole jekhe so sikavela vera, prvo e Evreen, a palo adava e Grkon. 17 Soske, okola so verujnena, preku adava haberi dikhena e Devleskiri pravednost hem adava kerela lengiri vera te ovel pozorali. Sar soj pišimo ko Spisija: „O pravedniko ka živinel adaleske so isi le vera“.

18 O Devel sikavela pli holi taro nebo upro sa o manuša so kerena lošna hem nepravedna bukja. Adala manuša na mukhena te doznajnel pe o čačipe. 19 O bukja so šaj te džanen pe bašo Devel ola jasno šaj te dikhen len, soske o Devel sikavgja lenge sa. 20 Soske, iako našti te dikha e Devle, sepak preku o bukja so stvoringja len panda taro vreme keda kergja o sveto, o manuša šaj te dikhen leskere osobine, sar soj leskiri večno mokj, a isto agjaar šaj te dikhen kaj ov čače tano Devel. Adaleske, adale manušen so na verujnena ko Devel, nane len nisavo izgovor. 21 Iako ola džanle kaj ov tano o Devel, sepak na sikavgje leske čest hem na zablagodaringje pe leske. Lengere misle ule bezvredna hem lengere vile našti sine te haljoven.* 22 Asavke manuša iako vakerena kaj tane mudra, ola ustvari tane glupava. 23 Soske, namesto te den čest e Devleske kova so našti te merel, ola dena čest e idolenge kola so ličinena sar o manuša kola so merena, sar o ptice, sar e štare prengere životne hem sar o sapa hem o gušterija.

24 Adaleske o Devel mukhlja len ponadari da te postapinen sprema o nečista želbe so isi len ko vilo, hem agjaar ola ladžakerena pumaro telo. 25 Ola meningje o čačipe bašo Devel hovajbaja hem obožavingje o bukja so stvoringja o Devel hem služingje lenge, namesto e Stvoriteleske kova so stvoringja sa. Le valjani te falinel pe zasekogaš. Amin. 26 Adaleske o Devel mukhlja len te oven kontrolirime taro odvratna nemoralna želbe. Lengere džuvlja mukhle o prirodna odnosija e muršencar te šaj te keren adava so nane prirodno. 27 Agjaar o murša da mukhle o prirodna odnosija e džuvlencar hem thabile tari bari želba bašo javera murša, agjaar murš muršea kerena adava soj odvratno. Ola celosno priminena pumari kazna so zaslužinena la bašo pumare rumime postapke.

28 Adaleske so ola mislingje kaj nane važno šukar te pendžaren e Devle, o Devel mukhlja len ponadari da te mislinen ko bezvredna bukja hem te keren adava so na valjani. 29 Asavke manuša tane ko sa nepravedna, lošna, bičale jakhjakere hem rumime. Ola tane pherde zavist, mudarena, akošena pe e javerencar, hovavena, hem mislinena e javerenge lošnipe. Ola ogovorinena, 30 klevetinena,* mrzinena e Devle, drska tane, čalmdžie, ikerena pe ko baripe, mislinena sar te keren lošnipe, na šunena ple roditelen, 31 nane razumna, na ikerena pe ko plo lafi, na mangena ple familija hem nane len milost sprema o javera. 32 Iako ola but šukar džanena e Devleskiri pravedno osuda, kaj o manuša so kerena asavke bukja zaslužinena te meren, sepak na samo so ola kerena akala bukja, nego hem odobrinena e javeren da so kerena asavke bukja.

2 Adaleske, koj bilo te ove, nane tut pravo te sudine e javerenge bašo bukja kola so kerea len korkori tu da. Keda tu sudinea lenge, tu osudinea korkori tut. 2 Ama amen džanaja kaj o Devel ka sudinel sa okolenge so kerena asavke bukja hem leskoro sudibe tano pravedno.*

3 Mislinea kaj šaj te naše taro e Devleskoro sudo keda sudinea e manušenge bašo bukja so kerea len tu da? 4 Na džanea li kaj o Devel sikavela tuke plo baro šukaripe, pli milost hem pli strplivost? Na haljovea li kaj o Devel ljubezno trudinela pe te pomožinel tuke te kaine tut? 5 Ama ako sian tvrdoglavo hem na mangea te kaine tut, o Devel sigurno ka kazninel tut keda ka sikavel pli holi ko dive keda ka sudinel pravedno. 6 O Devel ka del sekaske sprema leskere postapke. 7 Ov ka del večno životo okolenge so nane te čhinaven* te keren šukar bukja. Asavke manuša rodena i slava hem i čest so dela len o Devel hem o životo so trajnela zasekogaš. 8 A tari javer strana, o Devel ka sikavel plo gnev hem pli holi upro kavgadžie hem upro okola so nane poslušna e čačipaske hem kerena adava soj lošno. 9 Sekova manuš, bizi razlika dali Evrei ili Grko, ako kerela lošna bukja, ka cidel muke hem ka oven le nevolje. 10 A sekova jekh so kerela adava soj šukar, o Devel ka del le slava, čest hem ka ovel ko mir lea, prvo o Evrei hem palo adava o Grko. 11 Soske o Devel na delinela e manušen.*

12 Sarine okola so grešingje, bizo te džanen e Mojseeskoro zakoni, ka meren da bizo te džanen o Zakoni. A sa okola so grešingje a džanle o Zakoni, ka ovel lenge sudimo sprema o Zakoni. 13 Anglo Devel nane pravedna samo okola so šunena o Zakoni, nego okola so kerena adava so vakerela o Zakoni, lenge o Devel ka vakerel kaj tane pravedna. 14 Soske, o manuša taro javera narodija nane len o Zakoni, ama keda ola bizo te džanen o Zakoni, korkori pestar kerena adava so pišinela ki leste, ola sikavena kaj andre ki lende isi len zakoni. 15 Agjaar pumare postapkencar dokažinena kaj adava so sikavela o Zakoni tano lenge pišimo ko vilo. A isto agjaar, lengiri sovest da svedočinela bašo adava hem adaleske ko ple misle osetinena pe kaj tane kriva bašo nešto ili na. 16 Sa adava ka dikhjol ko dive keda o Devel preku o Isus Hristos ka sudinel bašo sa o bukja so o manuša garavena len. Sa adava ka ovel sprema o šukar haberi so propovedinava.

17 Tu vakerea kaj sian Evrei hem isi tut doverba ko Zakoni hem dičinea tut so sian delo taro e Devleskoro narodo, 18 tu džanea e Devleskiri volja hem šaj te haljove kola bukja tane najvažna, soske sian sikavdo taro Zakoni, 19 uverimo sian kaj šaj te vodine e korolen hem te de svetlina okolenge soj ki temnica, 20 tu mislinea kaj šaj te isprajne okolen so nane razumna hem te sikave e čhaven, soske haljovea o osnovna bukja hem o čačipa taro Zakoni. 21 Zarem tu, kova so sikavea e javeren, na sikavea korkori tute? Zarem tu, kova so propovedinea: „Ma čor“, čorea? 22 Zarem tu kova so vakerea: „Ma ker preljuba“, kerea preljuba? Zarem tu kova so vakerea kaj mrzinea o idolija, čorea taro hramija? 23 Zarem tu, kova so dičinea tut e Zakonea, ladžakerea e Devle agjaar so phagea o Zakoni? 24 Soske, sar so pišinela ko Spisija: „Tumaro sebepi, o manuša taro javera narodija kerena lafi protiv e Devleskoro anav“.

25 Adava so sian kerdo suneti tano korisno samo ako kerea adava so vakerela o Zakoni, ama ako phagea o Zakoni, tegani sar te phene na sian kerdo suneti. 26 Ako nekoj so nane kerdo suneti, a kerela adava so vakerela o Zakoni, nane li o Devel te dikhel ki leste sar te phene kerdo tano suneti? 27 Keda nekoj so nane kerdo suneti ikerela pe ko adava so vakerela o Zakoni, ov agjaar sikavela kaj tu sian krivo, soske tut isi tut o Zakoni hem sian kerdo suneti, ama na ikerea tut ko Zakoni. 28 Na sian čačutno Evrei, ako samo avrijaldan dikhjola kaj sian Evrei, hem o čačutno suneti na kerela pe samo ko telo. 29 Ama te ovel pe čačutno Evrei, značinela te ovel pe Evrei andral. Ov ovela suneti ko vilo tari e Devleskiri sila,* a na adaleske so ikerela pe ko e Mojseeskoro zakoni bašo suneti. Adale manuše falinela le o Devel, a na o manuša.

3 Tegani, koja tani i prednost te ovel pe Evrei hem te ovel pe suneti? 2 Isi but prednostija. Prvo, o Devel e Evreenge dengja* ple sveta lafija. 3 Tegani, so šaj te vakerav bašo nesave Evreija kolen so nane len vera? Dali adava so nane len vera značinela kaj o Devel nane te ikerel pe ko plo lafi? 4 Sigurno na! Ka sikavel pe kaj o Devel sekogaš vakerela o čačipe, čak ako sa o manuša hovavena. Sar so pišinela ko Spisija: „Tle lafija ka sikaven kaj sian pravedno hem keda ola ka krivinen tut bašo nešto, ka dokažine lenge kaj grešinena“. 5 Nesave manuša vakerena: „Keda amen keraja lošna bukja, tegani o manuša šaj te dikhen kaj o Devel tano pravedno. Ako amaro sebepi o manuša dikhena kaj o Devel tano pravedno, tegani na postapinela li o Devel amencar nepravedno keda kazninela amen?“ 6 Sigurno na! Ako o Devel tano nepravedno, sar ka sudinel e svetoske?

7 Ili jekh javer buti so vakerena o manuša: „Ako mlo hovajbe jasno sikavela kaj o Devel vakerela o čačipe hem adava kerela o manuša te falinen le, tegani soske o Devel osudinela man sar grešniko?“ 8 Hem soske na vakeraja: „Ajde te kera lošna bukja te šaj te aven o šukar bukja“, sar so nesave manuša hovavena kaj amen agjaar sikavaja e javeren? Asavke manuša zaslužinena te oven kaznime.

9 Znači, šaj li te mislina kaj amen o Evreija siem ki pobari prednost taro javera? Na! Soske, sar so dikhlem, hem o Evreija hem o Grkija tane robija e grevoske, 10 sar so pišinela ko Spisija: „Nane pravedno manuš, nane ni jekh. 11 Nane ni jekh soj mudro,* nane ni jekh manuš so rodela e Devle. 12 Sa o manuša cidingje pe taro Devel, sarine ola ule manuša so na vredinena, nane nikoj so kerela šukaripe, nane ni jekh“. 13 „Pumare lafencar mudarena,* ple čhibjaja vakerena hovajba.“ „Adava so ikljola taro lengoro muj tano sar otrov e sapengoro.“ 14 „Lengoro muj tano pherdo armanja hem holi.“ 15 „Lengere pre sigjarena te mudaren.“* 16 „Ola sekogaš kerena bari šteta e manušenge hem kerena o javera te ciden muke, 17 hem ola na džanena sar te oven ko mir e javerencar.“* 18 „Nane len dar taro Devel.“

19 Ama amen džanaja kaj sa adava so pišinela ko Zakoni, tano okolenge so ikerena pe ko Zakoni, te šaj sarine okola so vakerena kaj nane kriva, o Zakoni te phandel o muj lengoro hem te sikavel kaj celo sveto tano krivo anglo Devel hem zaslužinela te ovel kaznimo. 20 Adaleske, nijekhe manušeske našti te vakerel pe kaj tano pravedno anglo Devel adaleske so ikerela o zapovedija taro Zakoni. Ustvari, o Zakoni kerela panda pošukar te haljova o grevo.

21 A akana tano jasno kaj jekh manuš šaj te ovel pravedno anglo Devel bizo te ikerel e Mojseeskoro zakoni. Bašo akava, isto agjaar vakergje o Zakoni hem o Prorokija. 22 Bizi razlika tari koja nacija tano nekoj, ako isi le vera, hem adava vera ko Isus Hristos, šaj te ovel pravedno anglo Devel. 23 Soske, sarine grešingje hem našti sovršeno te sikaven e Devleskere osobine. 24 O Isus Hristos spasingja len adalea so platingja i otkupnina* bašo grevo. Agjaar ola tane pravedna anglo Devel. O Devel dengja len adava poklon adaleske so manglja te sikavel lenge plo šukaripe so na zaslužinaja le. 25 O Devel dengja e Isuse sar žrtva te šaj o manuša te smirinen pe lea agjaar so ka ovel len vera ki e Hristoseskiri žrtva.* O Devel kergja adava te šaj te sikavel pli pravednost. Ov na samo so sikavgja pli strplivost adalea so prostingja o grevija so sine kerde angleder, 26 nego ov isto agjaar sikavela pli pravednost amenge akana, agjaar so vakerela kaj tane pravedna o manuša so sikavena vera ko Isus.

27 Tegani, šaj li te falina amen bašo nešto? Na. Kova zakoni na mukhela amen te falina amen? Dali o zakoni kova so vakerela kaj tano važno adava so keraja? Na, nego o zakoni kova so vakerela kaj valjani te ovel amen vera. 28 Soske, džanaja kaj jekhe manušeske šaj te vakerel pe kaj tano pravedno baši leskiri vera, a na bašo adava so ikerela o zapovedija taro Zakoni. 29 Zarem o Devel tano samo Devel e Evreenge, nane li ov isto agjaar Devel e manušenge taro sa o narodija? Oja, ov tano Devel e manušenge taro sa o narodija. 30 Adaleske so isi samo jekh Devel, angli leste o manuša ka oven pravedna baši pumari vera - hem okola soj kerde suneti hem okola so nane kerde suneti. 31 Tegani, dali amare veraja keraja te na važinel o Zakoni? Na. Namesto adava, amen jasno sikavaja kaj o Zakoni tano važno amenge.

4 So šaj te vakera bašo amaro parapapo o Avraam? 2 Te vakerel pe sine kaj tano pravedno bašo o bukja so kergja len, tegani ka ovel le sine solea te falinel pe, ama na anglo Devel. 3 So pišinela ko jekh than ko Spisija? „E Avraame sine le vera ko Jehova* hem adaleske ov dikhela le sine sar pravedno“. 4 A keda o manuš kerela buti, i plata so dobinela la, na dobinela la sar poklon,* nego o gazda tano dužno te del la leske. 5 Ama, te ovel pe pravedno anglo Devel, na zavisinela taro adava so kerela jekh manuš, nego ako isi le vera ko Devel ov ka ovel pravedno, iako tano grešniko. 6 O David da vakergja kaj jekh manuš tano srekjno adaleske so anglo Devel tano pravedno, a na bašo adava so kerela: 7 „Srekjna tane okola kaskere so lošna postapke tane prostime hem kaskere grevija tane učharde. 8 Srekjno tano o manuš kaskere so grevija o Jehova* na pamtinela“.

9 Dali akaja srekja ka ovel samo okolen soj tane kerde suneti, ili okolen da so nane kerde suneti? Soske, amen vakeraja: „O Devel dikhela sine e Avraame sar pravedno baši leskiri vera“. 10 A, keda počmingja o Devel te dikhel ko Avraam sar pravedno? Keda sine kerdo suneti, ili keda na sine kerdo suneti? Adava sine panda keda na sine kerdo suneti. 11 Palo adava, ov dobingja znako,* o sunetluko, sar garancija kaj o Devel dikhela le sine sar pravedno adaleske so sikavgja vera keda panda na sine kerdo suneti. Adaleske, ov ulo dad sa okolengoro so isi len vera, iako nane kerde suneti. Len o Devel dikhela len sar pravedna. 12 Isto agjaar, ov ulo dad okolengoro soj tane kerde suneti. Ama, ov nane o dad samo okolengoro soj tane kerde suneti, nego isto agjaar okolengoro so ko pumaro životo sikavena kaj isi len isto vera sar so sine amare dade, e Avraame, panda keda na sine kerdo suneti.

13 E Avraameske hem leskere potomconge sine vetimo kaj ka dobinen sar nasledstvo o sveto. O Devel dengja le adava vetuvanje na adaleske so ikerela pe sine ko Zakoni, nego adaleske so o Devel dikhela le sine pravedno baši leskiri vera. 14 Soske, ako akava vetuvanje dela pe samo okolenge so ikerena pe ko Zakoni, tegani i vera na vredinela ništo hem o vetuvanje na važinela više. 15 Ustvari, ako nekoj phagela o Zakoni, o Devel ka kazninel le,* ama kote so nane zakoni, našti ni te phagel pe o zakoni.

16 Znači, amen dobinaja o vetuvanje adaleske so isi amen vera, te šaj agjaar o Devel te sikavel plo šukaripe so na zaslužinaja le. Sa e Avraameskere potomcija šaj te dobinen akava vetuvanje, na samo okola so ikerena pe ko Zakoni, nego okola da so isi len vera sar so sine e Avraame. A o Avraam tano dad sarinenge amenge. 17 Akava vakerena o Spisija da: „Me čhivgjum tut te ove dad bute narodonge“. O Avraam sikavgja pli vera anglo Devel, kova so vazdela e mulen hem vakerela bašo bukja so panda na ule sar te phene više ule. 18 Iako e Avraame na sine le pričina te nadinel pe, sepak ole sine le nadež kaj ka ovel dad bute narodonge hem adaleske sine le vera ko adava so vakergja leske o Devel: „Doborom baro ka ovel tlo potomstvo“. 19 Iako mislinela sine kaj našti više te oven le čhave, soske sine le okolu 100 berš, hem isto agjaar džanela sine kaj e Sara da našti sine te oven la čhave, sepak leskiri vera na slabongja. 20 Ama adaleske so o Devel vetingja leske adava, ov nikogaš na sumningja pe hem na našavgja pli vera. Namesto adava, leskiri vera dengja le sila hem ov falingja e Devle 21 hem sine celosno uverimo kaj o Devel šaj te kerel adava so vetinela. 22 Adaleske so e Avraame sine le vera „ov dikhela le sine sar pravedno“.

23 O lafija „ov dikhela le sine sar pravedno“, na sine pišime samo baši leste, 24 nego sine pišime hem amenge da. Adaleske so verujnaja ko Devel, kova so voskresningja taro mule e Isuse, amare Gospodare, ov amen da ka dikhel amen sar pravedna. 25 O Devel dozvolingja e manušenge te mudaren e Isuse bašo amare grevija hem voskresningja le te šaj baši amenge o Devel te vakerel kaj siem pravedna.

5 Adaleske so baši amari vera o Devel vakerela kaj siem pravedna, te ačhova ko mir e Devlea preku amaro Gospodari o Isus Hristos. 2 Preku amari vera ko Isus, phravdilo amenge o drumo te šaj o Devel te sikavel amenge plo šukaripe so na zaslužinaja le. Šaj te ova radosna, soske isi amen nadež kaj ka dobina i slava koja so dela la o Devel. 3 Na samo adava, nego amen šaj te ova radosna hem keda siem ko nevolje, soske džanaja kaj o nevolje kerena te ova istrajna. 4 Amari istrajnost, anela dži ko adava o Devel te prifatinel amen, hem adava so o Devel prifatinela amen, dela amen nadež. 5 A i nadež nane te razočarinel amen, soske e Devleskoro mangipe phergja amare vile preku pli sila,* koja soj amenge dendi.

6 Panda džikote siem sine grešna,* o Hristos mulo bašo lošna manuša, ko vreme kova so sine odredimo bašo adava. 7 Retko kaj nekoj ka merel bašo pravedno manuš, ama bašo šukar manuš, šaj nekoj bi ovela spremno te merel. 8 A o Devel sikavgja amenge plo mangipe agjaar so o Hristos mulo amenge, panda džikote siem sine grešnikija. 9 Adaleske akana, keda o Devel vakerela baši amende kaj siem pravedna preku e Isuseskoro rat, šaj te ova panda posigurna kaj ka ova spasime tari e Devleskiri holi. 10 Iako siem sine e Devleske dušmanja, amen ulem leskere amala* adaleske so leskoro Čhavo mulo amenge. Hem akana keda siem e Devleskere amala,* šaj te ova panda posigurna kaj ka ova spasime adaleske so o Isus tano dživdo. 11 Adava so o Devel kergja preku amaro Gospodari, o Isus Hristos, kerela amen radosna, soske preku leste amen akana ulem e Devlea amala.*

12 Adaleske, sar so preku jekh manuš o grevo khuvgja ko sveto hem preku o grevo o meribe, agjaar o meribe širingja pe ko sa o manuša, soske sarine grešingje. 13 O grevo sine ko sveto angleder o Zakoni. Ama ni jekhe manuše našti te krivinel pe kaj kergja grevo keda nane zakoni. 14 Sepak, o meribe vladinela sine sar cari taro e Adameskoro vreme dži ko e Mojseeskoro vreme, čak upro okola kola so na grešingje sar so grešingja o Adam, kova so sine slično okolea so valjani sine te avel.

15 Ama e Devleskoro poklon nane isto sar e Adameskoro grevo. Bašo grevo jekhe manušeskoro, but manuša mule. Ama e Devleskoro šukaripe so na zaslužinaja le hem leskoro poklon, tane but pobare. Soske, preku adava poklon o Devel bute manušenge dela bare blagoslovija. Adava poklon o Devel dengja amen preku jekhe manušeskoro šukaripe so na zaslužinaja le, e Isus Hristoseskoro. 16 O poklon taro Devel hem o grevo jekhe manušeskoro, isto agjaar razlikujnena pe ko akava da: o grevo jekhe manušeskoro angja dži ko adava sa o manuša te oven osudime sar kriva, a o poklon so dengja o Devel, otkeda o manuša but grešingje, angja dži ko adava o Devel butenge te vakerel kaj tane pravedna. 17 Preku o grevo adale jekhe manušeskoro, o meribe vladinela sar cari. Ama e Devleskoro šukaripe so na zaslužinaja le hem leskoro poklon so dela le amenge te šaj te ova pravedna, tane pobare hem pošukar. Okola so dobinena akala bukja taro Devel, ka živinen hem ka vladinen sar carija preku akava jekh manuš, o Isus Hristos.

18 Adaleske, sar so preku jekh grevo, sa o različna manuša tane osudime te meren, agjaar preku jekh pravedno postapka, o Devel vakerela sa e različna manušenge kaj tane pravedna hem adaleske dobinena životo. 19 Soske, sar so preku jekhe manušeskiri neposlušnost, but džene ule grešna, agjaar preku jekhe manušeskiri poslušnost, but džene ka oven pravedna. 20 O Zakoni sine dendo te sikavel kobor o manuša sine grešna. Ama keda o manuša kergje but grevija, tegani o Devel sikavgja lenge panda poviše plo šukaripe so na zaslužinaja le. 21 Isto sar o grevo so vladingja sar cari zaedno e meribaja, agjaar e Devleskoro šukaripe so na zaslužinaja le, akana vladinela sar cari preku i pravednost, te šaj o manuša te dobinen večno životo preku o Isus Hristos, amaro Gospodari.

6 Adaleske akana, dali adava značinela kaj amen valjani ponadari da te grešina te šaj agjaar o Devel panda poviše te sikavel amenge plo šukaripe so na zaslužinaja le? 2 Sigurno kaj na! Adaleske so o grevo nane le više vlast upri amende,* tegani sar šaj ponadari da te živina ko grevo? 3 Ili zarem na haljovena kaj sarine amen so siem sine krstime hem akana siem ko jekhipe e Hristos Isusea, siem sine krstime ko leskoro meribe da? 4 Amen siem sine parume lea preku amaro krstibe ko leskoro meribe. Hem isto sar o Hristos so sine voskresnimo taro mule preku e Dadeskiri bari mokj,* amen da akana živinaja nevo životo. 5 Ako siem ko jekhipe lea ko meribe soj slično sar leskoro, ka ova ko jekhipe lea hem ko voskresenie soj slično sar leskoro. 6 Soske, amen džanaja kaj amari purani ličnost sine kovimi ko stubo zaedno lea, te šaj te cidel i mokj so sine e grevo upro amaro telo, hem agjaar ma te ova više robija e grevoske. 7 Soske, keda nekoj merela ov tano oslobodimo taro ple grevija.

8 Osven adava, ako mulem e Hristosea, amen verujnaja kaj ka živina da lea. 9 Amen džanaja kaj o Hristos otkeda voskresningja taro mule nane te merel palem, soske o meribe više nane le vlast upri leste. 10 Ov mulo te cidel o grevo, hem adava jekh puti zasekogaš. A o životo so živinela le, ov živinela le te šaj te kerel e Devleskiri volja. 11 Agjaar tumen da, oven mule e grevoske,* a živinen te šaj te keren e Devleskiri volja sar sledbenikija e Hristos Isuseskere.

12 Ma mukhen o grevo te vladinel sar cari upro tumaro telo so merela, te šaj te na oven robija e želbenge taro tumaro telo. 13 Ma den ponadari da tumaro telo e grevoske sar alati te keren lea lošnipe.* Nego, den tumen e Devleske sar manuša so uštile taro mule. Den tumaro telo e Devleske sar alati te keren lea šukaripe.* 14 O grevo na smejnela te vladinel upri tumende, soske na sien telo Zakoni, nego o Devel sikavgja tumenge plo šukaripe so na zaslužinaja le.

15 Dali akava značinela kaj amen šaj te grešina adaleske so o Devel sikavela amenge plo šukaripe so na zaslužinaja le hem na siem telo Zakoni? Sigurno na! 16 Na džanena li kaj ako dena tumen nekaske sar poslušna robija, tumen ovena leskere robija? Adaleske, ako sien robija e grevoskere tumen ka meren, ama ako sien robija e Devleskere hem sien leske poslušna, ka oven pravedna. 17 Amen siem blagodarna e Devleske so iako jekh vreme sien sine robija e grevoskere, akana taro vilo sien poslušna ko adava sikljojbe so dengja tumen o Devel. 18 Otkeda sien sine oslobodime taro grevo, tumen ulen robija e Devleskere hem kerena adava soj tano pravedno. 19 Adaleske so sien nesovršena, koristinava lafija so šaj te haljoven pe. Tumen mukhena sine o želbe tumare teloskere te keren tumen robija te šaj te keren adava soj nečisto hem lošno. Ama akana, den tumaro telo te ovel robo baši pravednost, te šaj agjaar te oven sveta. 20 Soske, keda sien sine robija e grevoskere, tumen na valjani sine te keren adava soj pravedno.

21 So angje tumenge o postapke so kergjen len keda sien sine robija e grevoskere? Tumen kergjen bukja kolendar so akana ladžana, hem adala bukja ingarena ko meribe. 22 Ama akana, keda sien oslobodime taro grevo, keren adava soj sveto, sar robija e Devleskere. Adava ka anel tumenge večno životo. 23 Soske, i plata bašo grevo tano o meribe, a o poklon so dela o Devel tano o večno životo preku o Hristos Isus, amaro Gospodari.

7 A akana vakerava tumenge phraljalen, kola so pendžarena o Zakoni, na džanena li kaj o Zakoni isi le mokj upro manuš sa džikote o manuš tano dživdo? 2 Sar na primer, sprema o Zakoni, jekh romni tani ko brako ple romea sa džikote ov tano dživdo. Ama keda lakoro rom ka merel, oj tani oslobodimi taro ple romeskoro zakoni.* 3 Ako oj ženinela pe javere muršea, džikote lakoro rom tano dživdo, oj kerela preljuba. Ama ako lakoro rom merela, oj tani oslobodimi taro leskoro zakoni. Tegani, ako oj ženinela pe javere muršea, na kerela preljuba.

4 Agjaar tumen da phraljalen, preku e Hristoseskoro telo so dengja le sar žrtva, oslobodime sien taro Zakoni, te šaj te oven e Hristoseskere, kova so voskresningja taro mule, hem agjaar amen šaj te služina e Devleske.* 5 Keda amen živinaja sine sprema o želbe amare teloskere, tegani o Zakoni kerela sine te ovel amenge jasno kaj o lošna želbe amare teloskere kerena amaro telo te grešinel hem adava grevo ingarela ko meribe.* 6 Amen akana siem oslobodime taro Zakoni, soske ov na ikerela amen više phanle,* te šaj te služina e Devleske* ko jekh nevo način, vodime tari leskiri sila,* a na ko purano način, vodime taro pišimo Zakoni.

7 Tegani, dali šaj te vakera kaj ko Zakoni isi greška?* Sigurno na! Te na ovel sine o Zakoni, me nikogaš nane sine te džanav so čače tano o grevo. Sar na primer, me nikogaš nane sine te džanav kaj tano pogrešno te mangav o bukja so pripadinena e javerenge, ako na pišinela sine ko Zakoni: „Ma mang adava so pripadinela e javerenge!“ 8 Ama akaja zapoved kergja te ovav svesno bašo adava so čače tano o grevo, kaj čače ki mande isi man najrazlična sebična želbe soj tane pogrešna, soske bizo Zakoni o grevo sine mulo. 9 Ustvari, me sium sine dživdo džikote na alo o Zakoni. Ama keda ali i zapoved,* o grevo počmingja te živinel, a me muljum. 10 Hem i zapoved koja so valjangja te ingarel ko životo, dikhljum kaj ingarela ko meribe. 11 Akaja zapoved kergja te ovav svesno bašo adava soj tano o grevo, kaj ov čhivela man* te grešinav, te šaj te mudarel man. 12 Ama, o Zakoni tano sveto hem i zapoved tani sveto, pravedno hem šukar.

13 Tegani, dali adava značinela kaj nešto soj šukar mudarela man? Sigurno na! O grevo tano adava so mudarela man. O Zakoni tano šukar, ama ov jasno sikavela kaj o grevo mudarela. Znači i zapoved sikavgja kobor čače tano lošno o grevo. 14 Džanaja kaj o Zakoni avela taro Devel,* ama me sium grešno manuš,* bikimo sar robo e grevoske. 15 Soske, na haljovava so kerava. Namesto te kerav adava so mangava, me kerava adava so mrzinava. 16 Me soglasinava man kaj o Zakoni tano šukar, ama palem kerava o bukja so na mangava te kerav. 17 Adaleske, adala lošna bukja so kerava len, na kerava len me, nego o grevo soj ki mande. 18 Džanava kaj ki mande, ustvari ko mlo grešno telo, nane ništo šukar. Soske, isi man želba te kerav adava soj tano šukar, ama na sium sposobno te kerav adava. 19 Na kerava o šukar bukja kola so mangava te kerav, namesto adava, o lošna bukja so na mangava te kerav, adava kerava. 20 Adaleske, ako me kerava o bukja so na mangava te kerav, tegani me na kerava adala bukja, nego o grevo so živinela ki mande.

21 Znači, dikhava ki mande akava zakoni: keda mangava te kerav adava soj šukar, o lošnipe tano ki mande. 22 Andre ko mlo vilo, me čače uživinava ko e Devleskoro zakoni, 23 ama ko mlo telo dikhava javer da zakoni kova so borinela pe protiv o zakoni soj ko mle misle, hem akava zakoni e grevoskoro soj ko mlo telo ikerela man sar robo. 24 Žalibaske sium me! Koj ka spasinel man taro telo kova so ingarela man ko asavko meribe? 25 Blagodarno sium e Devleske so spasingja man preku o Isus Hristos, amaro Gospodari! Adaleske mle mislencar sium robo e Devleskere zakoneske, ama mle teloja sium robo e grevoskere zakoneske.

8 Adaleske okola soj tane ko jekhipe e Hristos Isusea, nane osudime kaj tane kriva. 2 Soske, o zakoni e Devleskere silakoro,* kova so dela životo okolenge kola soj ko jekhipe e Hristos Isusea, oslobodinela tumen taro e grevoskoro hem e meribaskoro zakoni. 3 O zakoni e Mojseeskoro na sine le mokj te oslobodinel tumen, adaleske so o manuša tane slaba hem grešna. Ama o Devel šaj sine te oslobodinel tumen, adaleske so bičhalgja ple Čhave ko manušikano telo te cidel o grevo. Adalea o Devel osudingja o grevo ko telo, 4 te šaj te kera o pravedna bukja kola so rodela o Zakoni, agjaar so nane te dozvolina te kontrolirinel amen amaro grešno telo, nego ka mukha te vodinel amen e Devleskiri sila.* 5 Soske, okola so živinena sprema o telo, razmislinena bašo telesna bukja, a okola so živinena sprema e Devleskiri sila,* razmislinena bašo bukja kola so e Devleskiri sila* vodinela len te keren. 6 Keda razmislinela pe bašo želbe e teloskere, adava anela meribe. Ama, keda razmislinela pe baši e Devleskiri sila,* adava anela životo hem mir. 7 Keda mukhaja amaro grešno telo te kontrolirinel amare misle, tegani ovaja e Devleskere dušmanja. Soske, o grešno telo na ikerela pe ko e Devleskoro zakoni, a ni našti te ikerel pe ki leste. 8 Adaleske, okola so živinena sprema o grešno telo, našti te ugodinen e Devleske.

9 Ama tumen, phraljalen, na živinena sprema o grešno telo. Ako e Devleskiri sila* čače živinela ki tumende, tegani tumen živinena agjaar sar so vodinela tumen e Devleskiri sila.* Hem ako nekoj na razmislinela sar o Hristos, tegani ov nane e Hristoseskoro. 10 Ama ako sien ko jekhipe e Hristosea, čak ako tumaro telo tano mulo taro grevo, e Devleskiri sila* dela tumen životo, adaleske so o Devel dikhela tumen sar pravedna. 11 E Devleskiri sila* vazdingja e Isuse taro mule. Ako e Devleskiri sila* živinela ki tumende, tegani o Devel, kova so vazdingja e Hristos Isuse taro mule, isto agjaar ka vazdel tumaro mulo telo preku pli sila soj ki tumende.

12 Znači phraljalen, amen ne mora te živina sprema amaro grešno telo. 13 Ako živinena sprema o telo, tegani sigurno ka meren. Ama, ako mukhena e Devleskiri sila* te pomožinel tumen te mudaren o pogrešna postapke e teloskere, tumen ka živinen. 14 Soske, okola soj tane vodime tari e Devleskiri sila,* ola tane čače leskere čhave. 15 E Devleskiri sila* so dobingjen, na kerela tumen robija te šaj palem te daran, nego kerela tumen te oven e Devleskere posvojme čhave hem pottikninela tumen te vikinen: „Abba,* mo Dad!“ 16 E Devleskiri sila uverinela amen* kaj siem e Devleskere čhave. 17 Ako siem e Devleskere čhave, tegani amen ka dobina o nasledstvo kova so ka del o Devel. Amen ka dobina adava nasledstvo zaedno e Hristosea, a ako cidaja muke lea, ka dobina i slava da zaedno lea.

18 Adaleske, verujnava kaj o muke so cidaja akana, tane ništo ki sporedba amare slavaja so o Devel ka sikavel la ki idnina. 19 Adava soj stvorimo* edvaj adžikerela o vreme keda i slava e Devleskere čhavengiri ka ovel otkrimi. 20 Soske, adava soj stvorimo na manglja te ovel osudimo te živinel životo bizi nadež baši idnina. Ama, o Devel dozvolingja adava te slučinel pe. Sepak, keda o Devel dengja i osuda, ov dengja amen nadež. 21 Ov džanlja kaj adava soj stvorimo, više nane te ovel robo e grevoske hem e meribaske, hem ka živinel slobodno životo sar so živinena e Devleskere čhave. 22 Soske, džanaja kaj sa adava soj stvorimo, zaedno ofkinela hem tano ki dukh, sa dži akana. 23 Ama akana amen da, so isi amen o prvo delo* taro amaro nasledstvo, a adava tano e Devleskiri sila,* ofkinaja ki amende džikote edvaj adžikeraja te ova celosno posvojme sar e Devleskere čhave. Hem tegani, ka ova oslobodime taro amaro telo preku i otkupnina.* 24 Keda o Devel spasingja amen taro grevo, amen dobingjem akaja nadež. Ama i nadež koja so dikhjola, nane nadež. Sar šaj o manuš te nadinel pe ko nešto, keda više dikhela adava? 25 Ama keda nadinaja amen bašo nešto so na dikhaja le, tegani siem istrajna, hem edvaj adžikeraja adava te ovel.

26 Isto agjaar, e Devleskiri sila* šaj te pomožinel amenge keda siem slaba. Amen šaj džanaja kaj valjani te molina amen, ama na džanaja bašo so te molina amen. E Devleskiri sila* šaj te kerel adava amenge ko than, keda ofkinaja ama lafencar našti te phena adava so osetinaja. 27 O Devel kova so ispitinela amare vile, ov džanela so rodela leskiri sila amenge ko than, soske adava so rodela e Devleskiri sila* tano sprema leskiri volja, te šaj te pomožinel e sveta manušenge.*

28 Amen džanaja kaj sa adava so o Devel kerela, koristinela bašo šukaripe okolengoro kola so mangena le hem kola soj tane birime sprema leskiri volja. 29 Ov prvo biringja len hem panda angleder odlučingja kaj ola valjani te oven sar leskoro Čhavo, hem agjaar leskoro Čhavo te ovel o prvobijamo maškar o but phralja. 30 Tegani ov vikingja adalen kas so ov angleder biringja. A okolen kas so vikingja, baši lende vakergja kaj tane pravedna. Palo adava, okolenge so vakergja kaj tane pravedna, dengja len i slava.

31 So tegani šaj te vakera bašo akava? Ako o Devel tano amencar, koj ka ovel protiv amende? 32 Ako ov na štedingja ni ple Čhave, nego dengja le te merel amenge, nane li tegani te del amen sa adava so valjani amenge? 33 Koj šaj te vakerel kaj tane kriva okola kaste so o Devel biringja? O Devel tano adava so vakerela kaj ola tane pravedna. 34 Koj šaj te osudinel len? Nikoj. Soske, o Hristos Isus tano adava kova so mulo baši lende. Hem ov tano adava kova so voskresningja taro mule. Akana ov tano tari e Devleskiri desno strana hem molinela e Devle baši amenge.

35 Koj ka cidel amen taro e Hristoseskoro mangipe? Dali i nevolja, ili i muka, ili o progonstvo, ili o bokhalipe, ili o čorolipe,* ili i opasnost, ili o nasilstvo? 36 Sar so pišinela ko Spisija: „Baši tuke, ola stalno mangena te mudaren amen hem dikhena amen sar bakhre čhinibaske“. 37 Ama adaleske so pomožinela amen okova so mangela amen, amen pobedinaja ko sa akala bukja. 38 Soske, uverimo sium kaj ni o meribe, ni o životo, ni o angelija, ni o vlastija, ni adava soj tano akana, ni adava so ka avel, ni bilo koja sila, 39 ni adava soj tano učo, ni adava soj tano hor, ni bilo so javer soj stvorimo, našti te odvojnel amen taro e Devleskoro mangipe kova so sikavgja le amenge preku o Hristos Isus, amaro Gospodari.

9 Sar sledbeniko e Hristoseskoro, me vakerava o čačipe hem na hovavava. Mli sovest koja soj vodimi tari e Devleskiri sila* svedočinela bašo adava, 2 kaj isi man bari žal hem dukh ko vilo so na nakhela. 3 Spremno sium me te ovav kaznimo ko than mle phralenge e Evreenge, kola so na džana palo Hristos, ako adava pomožinela lenge. 4 Ola tane Izraelcija hem o Devel biringja len te oven leskere posvojme čhave. O Devel lenge dengja i slava, kergja lencar sojuzija,* dengja len o Zakoni, dengja len i prednost te služinen leske hem lenge dengja plo lafi kaj ka blagoslovinel len. 5 Ola tane o potomcija amare parapapongere, kotar so o Hristos da avela sar manuš. Neka ovel falimo zasekogaš o Devel kova so vladinela upro sa! Amin.

6 Ama, adava na značinela kaj e Devleskoro lafi na ispolningja pe. Soske, nane čačutne Izraelcija sa okola so avena taro Izrael. 7 Hem nane sarine e Avraameskere čhave samo adaleske soj tane leskoro potomstvo. Nego o Devel vakergja e Avraameske: „Okola so ka aven taro Isak, lenge ka vakerel pe kaj tane tlo potomstvo“. 8 Adava značinela kaj na sa o čhave so bijandile e Avraameske tane čače e Devleskere čhave. Nego o čhave e Devleskere tane okola so sine vetime hem anglo Devel ola tane e Avraameskoro potomstvo. 9 Soske, o Devel vetingja leske akava: „Dži berše akava vreme ka avav, hem e Sara ka ovel la čhavo“. 10 Ama o Devel na dengja samo tegani akava vetuvanje. Nego hem keda i Rebeka ačhili khamni, hem valjani sine te oven la bliznakija taro amaro parapapo o Isak. 11 Panda angleder te bijangjoven adala čhave hem te keren nešto šukar ili lošno, o Devel angleder vakergja kas ka birinel. Soske, o Devel birinela kas so ov mangela, a na sprema adava so kerela jekh manuš. 12 Adaleske o Devel vakergja lake: „O pobaro ka ovel robo e potikneske“. 13 Sar so sine pišimo ko Spisija: „Mangljum e Jakove, a mrzingjum e Isave“.

14 Tegani, dali šaj te vakera kaj o Devel nane pravedno? Sigurno na! 15 Soske, o Devel vakergja e Mojseeske: „Ka sikavav milost okoleske kas so ka birinav, hem ka sikavav sočuvstvo okoleske kaske so ka mangav“. 16 Adaleske adava na zavisinela tari e manušeskiri želba ili taro leskoro trudo, nego taro Devel, kova so sikavela milost. 17 Soske, o Devel ko Spisija bašo faraoni vakergja: „Mukhljum tut dživdo te šaj upri tute te sikavav mli sila hem te šaj o manuša tari celo phuv te džanen bašo mlo anav“. 18 Znači, o Devel sikavela milost kaske so mangela ov, ama nesaven mukhela te oven tvrdoglava, soske agjaar mangela.

19 Tegani, nekoj šaj ka pučel man: „Ako našti nikoj te džal protiv e Devleskiri volja, tegani soske o Devel ponadari da krivinela e manušen?“ 20 Ama tu kova so sian obično manuš, savo pravo isi tut te kere protiv lafi e Devlea? Šaj li adava so sine kerdo te vakerel okoleske so kergja le: „Soske kergjan man agjaar?“ 21 Nane li pravo e grnčare tari isto glina te kerel jekh čaro so koristinela pe bašo bukja kolenge so dela pe čest* hem jekh čaro so koristinela pe bašo bukja kolenge so na dela pe čest?* 22 Agjaar tano e Devlea da. Iako ov manglja te sikavel pli holi hem pli mokj upro lošna manuša, sepak ov sine strplivo okolencar so holjankergje le* hem so zaslužingje te oven uništime. 23 Ov kergja agjaar te šaj te sikavel pli bari slava upri okolende kolenge so ka sikavel pli milost.* Ov len spremingja len te šaj te del len slava. 24 Ustvari adala siem amen, so o Devel vikingja amen, na samo taro Evreija, nego hem taro javera narodija. 25 Agjaar pišinela hem ko lil taro proroko o Osija: „Okola so nane mlo narodo, ka vikinav len ’mlo narodo‘ hem okolen kas so na mangava, ka vikinav len ’me mangle‘.* 26 Hem ko than kote so sine lenge vakerdo: ’Tumen na sien mlo narodo‘, adathe ka oven vikime ’čhave e dživde Devleskere‘“.

27 O Isaija da bašo Izrael vakergja akava: „Te oven da o Izraelcija doborom but kobor so isi pošik ko more, samo hari džene* lendar ka oven spasime. 28 Soske, o Jehova* ka sudinel e manušenge soj ki phuv hem sigate ka izvršinel i kazna upri lende“. 29 Hem isto sar so prorokujngja o Isaija: „Te na mukhel sine o Jehova,* o zapovedniko e vojskengoro, te ovel amen potomstvo, ka ova sine isto sar o dizja Sodom hem Gomor“.

30 Tegani, so šaj te vakera? E manušen taro javera narodija kola so sikavgje vera, o Devel dikhlja len sar pravedna, iako ola na rodingje i pravednost. 31 Ama o Izraelcija, iako trudingje pe te ikeren pe ko zakoni e pravdakoro, sepak na uspejngje te živinen sprema adava zakoni. 32 Soske? Adaleske so ola mislingje kaj ka oven pravedna bašo ple postapke, a na baši pli vera. Ola sopkingje pe ko „bar sopkibaske“, 33 sar so vakerena o Spisija: „Ake, me čhivava ko Sion bar kova so ka kerel o manuša te sopkinen pe hem karpa so ka kerel te peren, ama sekoj so ka verujnel ki leste nane te razočarinel pe“.

10 Phraljalen, taro vilo mangava hem iskreno molinava e Devle te spasinel e Izraelcon. 2 Soske, me sium svedoko kaj ola revno trudinena pe te keren e Devleskiri volja, ama na džanena koja tani točno leskiri volja. 3 Adaleske so ola na džanena so o Devel rodela te šaj jekh manuš te ovel pravedno anglo leskere jakhja, ola kerena adava so ola mislinena kaj tano pravedno. Ama agjaar ola na kerena adava so o Devel rodela e manušendar te šaj te oven pravedna. 4 O Zakoni čhinavgja te važinel otkeda o Hristos ispolningja le. Akana sekoj so sikavela vera ko Hristos, le o Devel dikhela le sar pravedno.

5 O Mojsej pišingja sar šaj jekh manuš te ovel pravedno sprema o Zakoni: „Koj ka ikerel pe ko adava so pišinela ko Zakoni, ka živinel“. 6 Ama o sveta spisija isto agjaar vakerena kaj jekh manuš šaj te ovel pravedno preku i vera. Adathe pišinela: „Ma vaker ko tlo vilo: ’Koj ka džal upre ko nebo?‘, javere lafencar, koj ka džal upre ko nebo te šaj te huljarel tele e Hristose? 7 Ili: ’Koj ka hulel tele ki bezdna?‘,* javere lafencar, koj ka hulel tele ki bezdna te vazdel e Hristose taro mule?“ 8 Nego o Spisija vakerena: „O lafi tano paše uzi tute, ko tlo muj hem ko tlo vilo“. Adava „lafi“ tano o haberi baši vera so propovedinaja. 9 Ako javno tle mujea vakerea kaj o Isus tano Gospodari hem ako isi tut vera ko vilo kaj o Devel vazdingja le taro mule, tu ka ove spasimo. 10 Soske, te šaj jekh manuš te ovel pravedno, mora taro vilo te sikavel vera. Hem te šaj te ovel spasimo, mora ple mujea javno te vakerel akava haberi.

11 Soske o Spisija vakerena: „Sekoj so ka sikavel vera ki leste nane te razočarinel pe“. 12 Ustvari nane razlika maškar o Evrei hem o Grko, soske o isto Gospodari tano upri sarinende amende. Hem ov tano darežlivo okolencar so vikinena le. 13 Soske, „sekoj so vikinela e Jehovaskoro* anav, ka ovel spasimo“. 14 Ama sar ka vikinen le ako na verujnena ki leste? A sar ka verujnen ako na šungje baši leste? A sar ka šunen ako nikoj na propovedinela? 15 A sar ka propovedinen ako nane bičhalde? Sar so pišinela ko Spisija: „Kobor šuže tane o pre okolengere so vakerena o šukar haberi bašo šukar bukja!”

16 Ama, sarine na prifatingje o šukar haberi. Soske o Isaija vakergja: „Jehova,* koj verujngja ko adava so vakergjem?“* 17 Znači, o manuš verujnela samo otkeda šunela o haberi, a o haberi širinela pe samo keda kerela pe lafi bašo Hristos. 18 A me pučava: na sine li e Izraelcon prilika te šunen? Oja, sine len. Ustvari o Spisija vakerena: „Lengoro glaso šundilo ki celo phuv hem lengere lafija šundile dži ko najdur thana tari phuv“. 19 Me isto pučava: na halile li o Izraelcija? Prvo o Mojsej vakergja: „Preku o manuša so nane delo tari izraelsko nacija, ka kerav tumen te oven ljubomorna, preku jekh glupavo nacija ka kerav tumen te oven holjame“. 20 Palo adava o Isaija hrabro vakergja: „Arakhle man okola so na rodena man sine, sikavgjum man okolenge so na pučena sine baši mange“. 21 A bašo Izraelcija ov vakergja: „Celo dive phravde vastencar vikinava te iranel pe ki mande o narodo so nane poslušno hem soj tvrdoglavo“.*

11 Adaleske pučava: dali o Devel otfrlingja ple narodo? Sigurno na! Soske, me da sium Izraelco, taro potomstvo e Avraameskoro, taro pleme e Benjamineskoro. 2 O Devel na otfrlingja ple narodo, kaste so prvo biringja. Na džanena li so vakerela ko jekh than taro Spisija bašo Ilija hem sar ov žalingja pe e Devleske taro Izraelcija? 3 „Jehova,* ola mudargje tle prorokon, uništingje tle žrtvenikija. Samo me ačhiljum, hem akana mangena te mudaren man da“. 4 Ama so vakergja leske o Devel? „Isi adathe panda 7.000 manuša soj tane mle, so na pokloningje pe e Vaaleske“. 5 Akana da tano agjaar, isi jekh tikni grupa* taro Evreija soj birime taro Devel adaleske so ov sikavela plo šukaripe so na zaslužinaja le. 6 Adava značinela kaj ov biringja len adaleske so ov mangela te sikavel plo šukaripe so na zaslužinaja le, a na bašo lengere postapke. Te šaj sine ola te keren nešto te šaj o Devel te birinel len, tegani o Devel bi birinela len sine bašo lengere postapke, a na bašo leskoro šukaripe so na zaslužinaja le.

7 Tegani so šaj te vakera? Sa o manuša taro Izrael na dobingje adava so but mangle te dobinen, nego samo hari džene so sine birime dobingje adava. A e javerengoro vilo ulo zoralo sar bar, 8 sar so pišinela ko Spisija: „O Devel kergja hor te soven, te šaj lengere jakhja ma te dikhen hem lengere kana ma te šunen, sa dži avdive“. 9 Isto agjaar o David vakerela: „Lengiri sofra* neka ovel lenge stapica hem zamka te šaj te peren hem te oven kaznime. 10 O jakhja lengere neka koroljoven te šaj ma te dikhen hem sekogaš o pikje lengere neka bangjon taro baro pharipe so ka phiraven“.

11 Akana pučava: dali o Izraelcija sopkingje pe hem pele, hem akana našti više te ušten? Sigurno na! Ama adaleske so phagle o Zakoni, o manuša taro javera narodija tane spasime, hem akava kerela e Izraelcon te oven ljubomorna. 12 Adava so ola phagle o Zakoni, angja blagoslov e svetoske hem agjaar len isi len pohari blagoslov, a pobaro blagoslov isi e manušen taro javera narodija. Znači, o blagoslov ka ovel sine panda pobaro ako lengoro broj sine celosno.

13 Akana akava vakerava tumenge so sien taro javera narodija. Adaleske so me sium apostoli soj bičhaldo ko manuša taro javera narodija, mange tani but važno i služba so kerava la e Devleske. 14 Me isto agjaar nadinava man kaj šaj nesar te kerav mlo narodo te ovel ljubomorno bašo bukja so tumen dobingjen te šaj agjaar te spasinav nesaven lendar. 15 Adava so ola sine otfrlime, pomožingja nesavenge taro sveto te oven amala e Devlea. Ako ov akana palem prifatinela nesaven taro Evreija, adava ka ovel sar te phene iranela len ko životo taro meribe. 16 Osven adava, ako o delo taro humer kova so dela pe sar prva plodija* tano sveto, tegani celo humer da tano sveto. Hem ako o koreno tano sveto, o granke da tane sveta.

17 Ama nesave granke taro e maslinkakoro kaš phagile hem tu sian sine spojmo* ko kaš maškar o javera granke, iako sian sine granka taro jekh divo maslinkakoro kaš. Hem akana tute da isi tut korist taro e maslinkakoro koreno. 18 Ama ma mislin kaj sian pošukar taro javera granke. Ako mislinea kaj sian pošukar, ma bistre kaj o koreno dela tut životo, a na dea tu životo e korenoske. 19 Nekoj tumendar ka vakerel: „O granke tari maslinka phagile te šaj me te ovav spojmo* ko kaš“. 20 Adava tano točno! Ola phagile soske na sine len vera. Ama tu ačhovea cvrsto ko tlo than soske isi tut vera. Adaleske ma ov gordo, nego neka ovel tut dar! 21 Soske, ako o Devel čhingja e maslinkakere prirodna granke, tegani tu da šaj te ove čhindo. 22 Tu šaj te dikhe kaj o Devel tano hem ljubezno hem strogo. Ov tano strogo sprema adala so pele adaleske so na sine len vera. Ama o Devel tano ljubezno tuja sa džikote tu kerea adava so ov rodela tutar, te šaj te sikavel tuke pli ljubeznost. Ako na, tu da ka ove čhindo taro kaš. 23 Hem ako o Evreija počminena te sikaven vera, ola ka oven spojme* ko kaš, soske o Devel šaj palem te spojnel len. 24 Soske, ako tu sian sine čhindo taro jekh divo maslinkakoro kaš, hem sian sine spojmo* ko jekh šukar maslinkakoro kaš ko jekh način so nane prirodno, tegani kobor polokhe ka oven spojme ko adava kaš lakere prirodna granke!

25 Mangava phraljalen te džanen baši e Devleskiri tajna,* te šaj ma te mislinen baši tumende kaj sien mudra. Adaja tajna tani: nesave Izraelcongoro vilo ulo zoralo sar bar hem agjaar ka ovel sa džikote na khedela pe celo broj taro manuša taro javera narodija. 26 Hem agjaar ka ovel spasimo celo Izrael. Sar so vakerena o Spisija: „O spasiteli ka avel taro Sion hem ka pomožinel e Jakoveskere potomconge te čhinaven te keren lošna bukja. 27 Hem akava tano o sojuz* so ka kerav lencar keda ka cidav lendar lengere grevija“. 28 Točno tano kaj nesave Evreija tane dušmanja e šukar habereske, hem tumen sine tumen korist taro adava. Ama ola sine birime taro Devel hem ov mangela len sebepi lengere parapapongoro. 29 A o Devel na perela pišmani bašo poklonija so dela, ni na perela pišmani bašo adava so vikinela nekas. 30 Soske, tumen na sien sine poslušna e Devleske, ama akana sikavela pe tumenge milost adaleske so o Evreija na sine poslušna. 31 Akana ola nane poslušna, hem o Devel sikavgja tumenge milost. Ama o Devel lenge da šaj te sikavel milost isto sar so sikavgja tumenge. 32 Soske, o Devel dozvolingja sa e manušenge te oven robija baši neposlušnost, te šaj ov agjaar te sikavel pli milost sarinenge.

33 O, kobor tano baro* e Devleskoro barvalipe, hem kobor tane hor leskiri mudrost hem džandipe! Koj šaj celosno te haljol leskere odluke hem adava so ov kerela? 34 Soske, „koj pendžargja e Jehovaskiri* godi, hem koj šaj te del le sovet“? 35 Ili, „koj prvo dengja nešto e Devleske, pa so o Devel posle mora te iranel leske?“ 36 Soske, sa o bukja tane taro Devel, preku o Devel hem bašo Devel. Ov zaslužinela te ovel slavimo zasekogaš! Amin.

12 Adaleske so o Devel sikavgja tumenge milost, molinava tumen taro vilo phraljalen, den tumaro telo sar dživdi žrtva, sveto hem prifatlivo e Devleske, hem služinen e Devleske agjaar so ka koristinen tumari sposobnost te razmislinen. 2 Ma mukhen ponadari da te oblikujnel tumen akava sveto,* nego meninen tumen agjaar so ka meninen tumaro način sar razmislinena, te šaj te oven uverime so mangela o Devel te keren - adava soj šukar, sovršeno hem prifatlivo leske.

3 Adaleske so o Devel sikavgja mange plo šukaripe so na zaslužinaja le, vakerava sekaske tumendar te na mislinel baši peste poviše taro adava so valjani, nego te mislinel baši peste razumno, sekoj sprema i vera so dengja le o Devel.* 4 Isto sar so ko jekh telo isi amen but delija, ama sa o delija nane len isto uloga, 5 agjaar amen da, iako siem but, siem jekh telo ko jekhipe e Hristosea, a sar poedincija siem delija taro telo kola so zavisinena jekh jekhestar. 6 Znači, o Devel dengja amen različna sposobnostija* sprema plo šukaripe so na zaslužinaja le. Ako adaja sposobnost tani te prorokujnel pe, tegani te prorokujna sprema i vera so sine amenge dendi; 7 ako adaja sposobnost tani te služinel pe e javerenge, tegani te služina; ako nekas isi le sposobnost te sikavel e javeren, neka sikavel len; 8 ako nekas isi le sposobnost te ohrabrinel* e javeren, neka ohrabrinel len; koj dela e javerenge, neka kerel adava darežlivo; koj predvodinela, neka kerel adava revnosno; koj sikavela milost, neka kerel adava radosno.

9 Tumaro mangipe neka ovel iskreno.* Mrzinen o lošnipe, ikeren tumen ko adava soj šukar. 10 Taro vilo mangen jekh jekhe sar phralja. Oven prva ko adava te sikaven kaj poštujnena jekh jekhe. 11 Oven bukjarne, a na mrzale. E Devleskiri sila* neka pottikninel tumen te oven revna. Služinen sar robija e Jehovaske.* 12 Oven radosna baši tumari nadež. Istrajnen keda isi tumen nevolje. Nikogaš ma čhinaven te molinen tumen. 13 Delinen e sveta manušencar* adava so isi tumen sprema lengere potrebe. Roden načinija te sikaven gostoprimstvo. 14 Blagoslovinen okolen* so progoninena tumen, blagoslovinen len hem ma den len armanja. 15 Radujnen tumen okolencar so radujnena pe, roven okolencar so rovena. 16 Sar tumen so dikhena ki tumende, agjaar dikhen ko javera da. Ma te ovel tumen but baro mislenje korkori tumenge, nego oven ponizna. Ma mislinen kaj tumen sien pomudra taro javera.

17 Nikaske so kergja tumenge lošnipe, ma iranen lošnipaja. Keren adava so sa o manuša mislinena kaj tano šukar. 18 Ako šaj, kobor so zavisinela tumendar, oven ko mir sa e manušencar. 19 Ma odmazdinen tumen, mle mangle, nego mukhen o Devel te sikavel pli holi, soske pišimo tano ko Spisija: „I odmazda tani mli, me ka iranav lenge, vakerela o Jehova“.* 20 Namesto adava, „ako tlo dušmani tano bokhalo, parvar le, ako tano žedno, de le te piel, soske kerindor agjaar, čhivea leske tate žarija upro šero“.* 21 Ma mukh te pobedinel tut o lošnipe, nego sekogaš pobedin o lošnipe e šukaripaja!

13 Sekova manuš neka ovel podložno e vlastenge so isi len avtoriteti, soske nijekh vlast na postojnela ako o Devel na dozvolinela lake te postojnel. Sekoja vlast so postojnela, o Devel čhivgja la ki lakiri položba.* 2 Soske, okova so protivinela pe e vlastenge tano protiv adava sar o Devel postavingja o bukja, a okola soj tane protiv adava, ka oven sudime.* 3 Taro vlastija na darana okola so kerena šukar bukja, nego okola so kerena lošna bukja. Tu na valjani te dara taro vlastija. Ako kerea šukar bukja, ola ka falinen tut. 4 O Devel koristinela len sar plo sluga, bašo tlo šukaripe. Ama ako kerea lošna bukja, valjani te dara, soske olen isi len pravo hem mokj te kazninen okolen so kerena lošnipe. O Devel e vlasten koristinela sar plo sluga, te kazninel okolen so kerena adava soj lošno.

5 Adaleske mora te oven podložna e vlastenge, na samo bašo adava te na oven kaznime, nego hem soske agjaar ka ovel tumen čisto sovest. 6 Hem adaleske tumen platinena danok, soske o Devel len koristinela te služinen e narodoske. 7 Sekaske den adava so pripadinela lenge. Ako nekoj rodela tumendar te platinen danok - platinen danok, ako nekoj rodela tumendar te platinen davačka - platinen davačka, ako nekoj rodela tumendar te sikaven poštovanje - sikaven poštovanje, ako nekoj rodela tumendar te sikaven čest - sikaven čest.

8 Ma oven dužna nikaske ništo, osven te mangen tumen jekh jekhea. Okova so mangela ple pašutne, ispolningja o Zakoni. 9 Soske, o zapovedija taro Zakoni, sar soj: „Ma ker preljuba“, „Ma mudar“, „Ma čor“, „Ma mang adava so pripadinela e javerenge“, hem bilo save javera zapovedija, tane khedime hem čhivde ki akaja jekh zapoved: „Mang tle pašutne sar korkori tut“. 10 O mangipe na kerela lošnipe nikaske. Adava značinela kaj okova so mangela e javeren, ov ispolninela o Zakoni.

11 Tumen valjani te keren akava, soske džanena kaj alo o vreme te ušten taro sojbe. Amaro spasenie akana tano popaše nego keda počmingjem te verujna ko Isus. 12 I rat nakhlja hem samo so na phravdilo o dive. Adaleske, te frda amendar o bukja e temnicakere hem te urava o oružje e svetlinakoro. 13 Te živina sar so valjani, sar manuša kola so kerena o bukja diveskoro, bizo raspuštena zabave hem makjojbe, bizo nemoral hem bezobrazno ponašibe,* bizo akošibe hem bizi ljubomora. 14 Namesto adava, džan palo primer e Gospodareskoro e Isus Hristoseskoro* hem ma razmislinen bašo adava sar te zadovolinen o želbe tumare teloskere.

14 Priminen okole so isi le slabo vera, hem ma osudinen le bašo adava sar ov dikhela ko bukja. 2 Okova so isi le silno vera, hala bilo savo hajbe, ama okova so isi le slabo vera, hala samo zelenčuk. 3 Okova so hala bilo savo hajbe na valjani te dikhel sar potele pestar okole so na hala, a okova so na hala bilo savo hajbe na valjani te osudinel okole so hala sa, soske o Devel le da primingja. 4 Koj sian tu te osudine e javereskere sluga? Leskoro gospodari ka odlučinel dali adava so ov kerela tano ispravno ili pogrešno.* A o Jehova* ka pomožinel leske te postapinel ispravno.*

5 Nesave manuša mislinena kaj nesave dive tane považna taro javera dive, a javera mislinena kaj sa o dive tane ista. Sekova manuš valjani te ovel celosno uverimo ko adava so ov mislinela. 6 Okova so mislinela kaj nesavo dive tano považno taro javera, kerela adava te šaj te falinel e Jehova.* Isto agjaar, okova so hala bilo savo hajbe, kerela adava te šaj te falinel e Jehova* hem ov blagodarinela leske, a okova da so na hala bilo savo hajbe, kerela adava te šaj te falinel e Jehova,* hem ov da isto agjaar blagodarinela leske. 7 Nijekh amendar na živinela samo peske, hem nijekh amendar na merela samo peske. 8 Soske, ako živinaja, živinaja e Jehovaske,* hem ako meraja, meraja e Jehovaske.* Sprema adava, bilo te živina, bilo te mera, e Jehovaske* pripadinaja. 9 Ustvari, adaleske da o Hristos mulo hem voskresningja, te šaj te ovel Gospodari hem e mulengoro hem e dživdengoro.

10 Ama, soske tu osudinea tle phrale? Ili soske dikhea tle phrale sar potele tutar? Sarine amen ka tergjova anglo Devel hem ov ka sudinel sarinenge amenge.* 11 Soske, ko Spisija pišinela: „’Hava sovli ki mande‘, vakerela o Jehova,* ’kaj sekova jekh ka pokloninel pe angli mande* hem sekova jekh* ka priznajnel kaj me sium o Devel‘“. 12 Znači, sekova jekh amendar mora peske te odgovorinel anglo Devel.

13 Adaleske, više ma te osudina jekh jekhe. Namesto adava, oven odlučna te na keren ništo kolea so ka slabonkeren i vera tumare phraleskiri ili kolea so ka keren ov te grešinel.* 14 Sar sledbeniko e Gospodareskoro e Isuseskoro, džanava hem uverimo sium kaj nijekh hajbe nane nečisto korkori pestar. Ama ako nekoj mislinela kaj nesavo hajbe tano nečisto, tegani leske adava tano nečisto. 15 Ako adalea so haja povredinea tle phrale, tu više na sikavea mangipe. Ma ker tle hajbaja te uništine i vera okoleskiri kaske so mulo o Hristos. 16 Adaleske, ma keren adava so tumen mislinena kaj tano šukar, ako adava kerela o javera te keren lošno lafi baši tumende. 17 Soske, te šaj jekh manuš te khuvel ko e Devleskoro Carstvo na zavisinela taro adava so hala ili so piela. Nego važno tano ov te ovel pravedno, te ovel ko mir e javerencar* hem te ovel radosno preku e Devleskiri sila.* 18 Okova kova so ko asavko način služinela sar robo e Hristoseske, o Devel prifatinela le hem o manuša ceninena le.

19 Adaleske, te da amendar sa te kera te ovel mir hem te izgradina jekh jekhe. 20 Čhinaven bašo hajbe te rušinen adava so kergja o Devel. Točno tano adava kaj sekova hajbe tano čisto, ama pogrešno tano te hal pe nešto so kerela e javereskiri vera te slabonel. 21 Najšukar tano te na hal pe mas hem te na piel pe mol ili te na kerel pe bilo so javer so ka slabonkerel i vera tle phraleskiri. 22 Adava ko so sian uverimo iker le tuke* hem adava neka ačhol maškar tute hem o Devel. Srekjno tano o manuš kova so na osetinela pe krivo bašo bukja so odlučingja te kerel. 23 Ako nekoj sumninela pe ko nesavo hajbe, a sepak hala, ov tano krivo, soske kerela nešto bizo te ovel uverimo kaj adava tano prifatlivo.* Ako nekoj kerela nešto bizo te ovel uverimo kaj adava tano prifatlivo,* ov kerela grevo.

15 A amen so siem silna ki vera mora te phirava o slabostija okolengere so nane silna ki vera, hem te na dikha samo amenge te ovel šukar. 2 Sekoj amendar neka kerel adava soj tano šukar ple pašutneske te šaj te izgradinel le. 3 Soske, ni o Hristos na dikhlja te ovel šukar samo leske, nego sar soj pišimo ko Spisija: „O lafija so vakerena o manuša te vredžinen tut, adale lafencar vredžinena man da“. 4 A sa so sine pišimo angleder, sine pišimo te šaj amen te sikljova, te šaj preku amari istrajnost hem preku i uteha taro Spisija te ovel amen nadež. 5 A o Devel, kova so dela istrajnost hem uteha, neka pomožinel sarinenge tumenge te razmislinen isto sar o Hristos Isus, 6 te šaj sarine zaedno ko jekh glaso* te slavina e Devle kova soj o Dad amare Gospodareskoro e Isus Hristoseskoro.

7 Adaleske, prifatinen tumen jekh jekhea, sar o Hristos so prifatingja amen, te šaj agjaar te slavinen e Devle. 8 Vakerava tumenge kaj o Hristos ulo sluga e Evreenge* te šaj te potvrdinel kaj o Devel sekogaš vakerela o čačipe hem kaj važinena o vetuvanja so o Devel dengja lengere parapaponge, 9 te šaj o javera narodija te slavinen e Devle adaleske soj tano milostivo. Sar so pišinela ko Spisija: „Adaleske ka falinav tut maškar o narodija hem giljaja ka falinav tlo anav“. 10 Isto agjaar pišinela: „Radujnen tumen e Devleskere narodoja, tumen so sien taro javera narodija!“ 11 Hem palem pišinela: „Falinen e Jehova* sa o narodija, hem o manuša taro sekova pleme neka falinen le!“ 12 Isto agjaar, o Isaija vakerela: „Ka pojavinel pe o koreno e Jeseeskoro, ov ka uštel te vladinel e narodoncar, hem o narodija ka nadinen pe ki leste“. 13 O Devel, kova so dela nadež, neka del tumen bari radost hem mir soske verujnena ki leste, hem e Devleskiri sila* neka bajrarel tumari nadež.

14 Me sium uverimo, phraljalen, kaj tumen da isto agjaar sien spremna te keren šukar bukja* e javerenge, kaj džanena sa hem kaj sien sposobna te isprajnen jekh jekhe. 15 Sepak, bašo nesave bukja pišinava tumenge podirektno te šaj te setinkerav tumen ki lende. Kerava adava soske o Devel sikavgja mange plo šukaripe so na zaslužinaja le, 16 te šaj sar sluga e Hristos Isuseskoro te propovedinav o šukar haberi e javere narodonge. Me kerava akaja sveto buti te šaj o Devel te prifatinel len sar žrtva dendi leske, koja so e Devleskiri sila* kerela adaja žrtva te ovel sveto.

17 Sar sledbeniko e Hristos Isuseskoro but sium radosno so kerava mli služba e Devleske. 18 Nane te vakerav tumenge ništo bašo adava so kergjum me, nego samo bašo adava so kergja hem so vakergja o Hristos preku mande, te šaj te pomožinel e manušenge taro javera narodija te oven leske poslušna. 19 Ola ule leske poslušna sebepi o mokjna znakija hem o čudija so sine kerde preku e Devleskiri sila.* Ko asavko način me temelno propovedingjum o šukar haberi bašo Hristos, taro Erusalim pa sa dži ko Ilirik. 20 Mli cel sine te na vakerav o šukar haberi ko thana kote so više šungje bašo Hristos,* soske na mangljum te gradinav upro temeli so čhivgja nekoj javer, 21 nego sar so pišinela ko Spisija: „Okola kolenge so na sine vakerdo baši leste, ka dikhen le, hem okola so na šungje baši leste, ka haljoven“.

22 Adaleske, but puti našti aljum ki tumende. 23 Ama akana, ko akava podračje, više nane than kote so na propovedingjum, a but* berša više edvaj adžikerava te avav ki tumende. 24 Adaleske, keda ka cidav te džav ki Španija, nadinava man kaj ka nakhav tumendar te dikhav tumen. Hem otkeda ka uživinav so ka ovav tumencar nesavo vreme, nadinava man kaj ka aven mancar dži negde te ispratinen man keda adathar ka cidav te džav ki Španija. 25 Ama akana džava ko Erusalim te šaj te pomožinav e phralen* soj adari. 26 Soske, o phralja tari Makedonija hem tari Ahaja radujngje pe so šaj te den adava so isi len te šaj te pomožinen e čorole phralenge* ko Erusalim. 27 Čače, ola radosno dengje akala bukja, ama isto agjaar ola sine dužna te pomožinen e phralenge. Soske, o phralja taro Erusalim delingje lencar adava so dobingje taro Devel,* adaleske akala phralja sine dužna te delinen lencar pumare materijalna bukja. 28 Otkeda ka dav lenge adava so khedingje o phralja sar pomoš hem ka završinav adaja buti, me ka nakhav tumendar te dikhav tumen keda ka cidav ko drumo te džav ki Španija. 29 Džanava kaj keda ka avav ki tumende ka anav tumenge o bare blagoslovija so dobingjum taro Hristos.

30 Phraljalen, adaleske so isi amen vera ko Gospodari o Isus Hristos hem adaleske so e Devleskiri sila* kergja te manga amen maškar amende, pottikninava tumen zaedno mancar celo vilea te molinen tumen e Devleske baši mande. 31 Molinen tumen te spasinel man ki Judeja taro okola so na verujnena ko Isus hem te šaj o phralja* ko Erusalim radosno te prifatinen i pomoš taro javera phralja so ingarava lenge. 32 Palo adava, ako tani e Devleskiri volja, ka ovav but radosno te avav ki tumende hem te ohrabrina amen jekh jekhea. 33 O Devel, kova so dela mir, neka ovel tumencar! Amin.

16 Mangava te vakerav tumenge baši amari phen i Fiva, koja so služinela ko sobranie ki Kenhreja. 2 Molinava tumen priminen la sar phen ko anav e Gospodareskoro, sar so ličinela e sveta manušenge,* soske oj pomožingja butenge, pa čak hem mange da.

3 Pozdravinen e Priska hem lakere rome e Akila, kola so zaedno mancar kerena i buti bašo Hristos Isus. 4 Ola čhivgje pumaro životo ki opasnost baši mande. Na sium lenge blagodarno samo me, nego hem sa o sobranija taro javera narodija. 5 Isto agjaar, pozdravinen e sobranie* so khedela pe ko lengoro kher. Pozdravinen mle mangle phrale e Epenete, kova so ulo e Hristoseskoro sledbeniko maškar o prva manuša ki Azija. 6 Pozdravinen e Marija koja so but trudingja pe tumenge. 7 Pozdravinen mle familija, o Andronik hem o Junij, kolencar so sium sine zaedno ko zatvor. E apostolen isi len šukar mislenje baši lende hem ola tane e Hristoseskere sledbenikija poviše vreme mandar.

8 Pozdravinen e Amplijate, mlo manglo phral kova so isto agjaar tano sledbeniko e Gospodareskoro. 9 Pozdravinen e Urbane, kova zaedno amencar kerela buti bašo Hristos, hem mle mangle phrale e Stahije. 10 Pozdravinen e phrale e Apele, kova so dokažingja kaj tano verno e Hristoseske. Pozdravinen e Aristovuleskere kherutnen. 11 Pozdravinen mle familija, e Irodione. Pozdravinen e Narciseskere kherutnen, kola soj tane sledbenikija e Gospodareskere. 12 Pozdravinen e Trifena hem e Trifosa, kola so trudinena pe te keren but bašo Gospodari. Pozdravinen e Persida, amari mangli phen koja so kergja but bašo Gospodari. 13 Pozdrav dži ko Ruf, kole so o Gospodari biringja, hem dži ki leskiri daj, kola so me da dikhava la sar mli daj. 14 Pozdrav dži ko Asinkrit, Flegont, Hermes, Patrov, Erma hem dži ko phralja soj tane lencar. 15 Pozdravinen e Filologe hem e Julija, e Niree hem leskere phenja, e Olimpe hem sa e phralen* soj tane lencar. 16 Mangipaja resen tumen jekh jekhea.* Sa o sobranija so verujnena ko Hristos pozdravinena tumen.

17 Akana molinava tumen phraljalen te pazinen tumen taro okola so kerena podelbe hem so kerena o javera te peren tari vera, soske adava tano protiv o sikljojbe so siklilen le. Lendar ciden tumen! 18 Soske, asavke manuša nane robija amare Gospodareske e Hristoseske, nego ola tane robija pumare želbenge. Ola pumare gudle lafencar hem e pofalbencar hovavena e naivna manušen. 19 Ama baši tumende sarine džanena kaj sien poslušna hem me sium but radosno bašo adava. Mangava te oven mudra te šaj te džanen soj tano šukar, a bašo adava soj lošno, ma te džanen ništo. 20 Panda hari, o Devel so dela mir, ka čhivel e Satana telo tumare pre hem ka smačkonel le. Amaro Gospodari o Isus neka sikavel tumenge plo šukaripe so na zaslužinaja le.

21 Pozdravinela tumen o Timotej, kova so zaedno mancar kerela buti bašo Devel, hem isto agjaar pozdravinela tumen mli familija o Lucij, o Jason hem o Sosipater.

22 Me o Tercij, kova so pišingjum akava pismo e Pavleskoro, pozdravinava tumen ko anav e Gospodareskoro.

23 Pozdravinela tumen o Gaj, koleste so me sium sar gosto hem leste ko kher khedela pe celo sobranie. Pozdravinela tumen o Erast, e dizjakoro blagajniko, hem leskoro phral o Kvart. 24* --

25 O Devel šaj te kerel tumen zorale preku o šukar haberi so me vakerava hem preku o propovedibe bašo Isus Hristos. Akava haberi sine otkrimo preku e Devleskiri tajna* so sine garavdi beršencar. 26 Ama akana sa o narodija doznajngje baši akaja tajna, soske oj sine otkrimi preku o proroštvija soj ko Spisija. Akava tano ko sklad adalea so zapovedingja o Devel so živinela večno. Leskiri volja tani sa o narodija te verujnen ki leste hem te oven leske poslušna. 27 O Devel kova so samo ov tano mudro, neka ovel večno slavimo preku o Isus Hristos! Amin.