PRVO PISMO DŽI KO KORINKJANJA

1 Me o Pavle, kova so sium sine vikimo te služinav sar e Hristos Isuseskoro apostoli sprema e Devleskiri volja, a akate mancar tano hem amaro phral o Sostenes, 2 pišinava akava pismo dži ko e Devleskoro sobranie soj ko Korint hem dži sa okolende soj ko razna thana, kola so verujnena ko Gospodari,* o Isus Hristos, kova soj lengoro hem amaro Gospodari. O Devel biringja tumen sar sledbenikija e Hristos Isuseskere hem vikingja tumen te oven sveta:*

3 Neka ovel tumen o šukaripe so na zaslužinaja le hem o mir taro Devel, kova soj amaro Dad, hem taro Gospodari o Isus Hristos.

4 Sekogaš blagodarinava man e Devleske bašo adava so ov sikavgja tumenge plo šukaripe so na zaslužinaja le, sar sledbenikija e Hristos Isuseskere. 5 Adaleske so sien ko jekhipe e Hristosea, tumen dobingjen sa - hem tumari sposobnost šukar te propovedinen e Devleskoro lafi, hem šukar te pendžaren e Devleskoro lafi. 6 Agjaar tumen cvrsto uveringjen tumen ko haberi bašo Hristos. 7 Tumenge na falinela nijekh poklon taro Devel, džikote edvaj adžikerena te avel o vreme keda amaro Gospodari o Isus Hristos ka sikavel pli mokj. 8 O Devel ka pomožinel tumenge te ačhoven cvrsta dži ko krajo, te šaj ko dive keda ka avel amaro Gospodari o Isus Hristos, nikoj te na krivinel tumen kaj kerena nešto pogrešno. 9 O Devel tano verno hem ov tano adava kova so vikingja tumen te oven ko jekhipe leskere Čhavea e Isus Hristosea, amare Gospodarea.

10 Phraljalen, ko anav amare Gospodareskoro e Isus Hristoseskoro, pottikninava tumen sarine te oven složna ko adava so vakerena hem maškar tumende te na oven podelbe, nego te oven celosno ko jekhipe, ista mislencar hem te razmislinen ko isto način. 11 Soske, e Hloeskere kherutne javingje mange, phraljalen, kaj maškar tumende isi raspravie. 12 Akava vakerava, soske sekova jekh tumendar vakerela: „Me sium e Pavleskoro“, „Me sium e Apoloskoro“, „Me sium e Kifaskoro“,* „A me sium e Hristoseskoro“. 13 Dali adava značinela kaj o Hristos tano podelimo? Te na sine o Pavle kovimo ko stubo baši tumende? Ili, e Pavleske li ko anav krstingjen tumen? 14 Blagodarno sium e Devleske so na krstingjum nijekhe tumendar, osven e Krispe hem e Gaje. 15 Adaleske, nijekh tumendar našti te vakerel kaj tano krstimo ko mlo anav. 16 Oja, isto agjaar krstingjum e Stefanase hem leskere kherutnen, ama na džanava dali panda nekas javere krstingjum. 17 Soske, o Hristos na bičhalgja man te krstinav, nego te vakerav o šukar haberi, hem adava na sar so kerena lafi o učime manuša, te šaj te na kerav e Hristoseskoro stubo mučibaske* te na vredinel.

18 O haberi bašo e Hristoseskoro meribe ko stubo mučibaske tano glupavo okolenge so ka oven uništime. A amenge, kola so dobinaja spasenie, adava haberi sikavela e Devleskiri sila. 19 Soske, ko Spisija pišinela: „Ka uništinav i mudrost e mudra manušengiri, hem ka otfrlinav o razmislibe e pametna manušengoro“. 20 Kaj tane akale svetoskere* mudra manuša, učitelija e zakoneskere hem okola so mangena te rasprajnen pe? Na kergja li o Devel e svetoskiri mudrost te ovel glupost? 21 Soske, o manuša taro akava sveto, adaleske so isi len doverba ki pli mudrost, na pendžarena e Devle. Adava so amen propovedinaja e javerenge dikhjola sar nešto glupavo, ama o Devel preku adava haberi odlučingja te spasinel okolen so verujnena. Ko asavko način o Devel sikavgja pli mudrost.

22 Soske, o Evreija rodena čudesna znakija hem o Grkija rodena mudrost, 23 a amen propovedinaja kaj o Hristos sine mudardo ko stubo, hem adava e Evreenge ulo bar sopkibaske, a e javere narodonge, glupost. 24 Ama okolenge soj vikime taro Devel - e Evreenge hem e Grkonge - o Hristos tano e Devleskiri sila hem e Devleskiri mudrost. 25 Soske, e Devleskiri „glupost“ tani pomudro taro manuša hem e Devleskiri „slabost“ tani posilno taro manuša.

26 Phraljalen, tumen dikhena save manušen vikingja o Devel. But lendar anglo manuša nane mudra, nane mokjna hem na avena taro važna familie. 27 Ama adava so o sveto dikhela le sar glupavo, o Devel biringja le te šaj te ladžakerel adalen soj mudra hem adava so o sveto dikhela le sar slabo, o Devel biringja le te šaj te ladžakerel adalen soj zorale. 28 O Devel biringja adava so o sveto dikhela le sar nešto so nane važno - adava so o manuša dikhena le sar potele pestar hem so angli lende nane le nisavi vrednost - te šaj te uništinel adava so o sveto dikhela sar vredno. 29 O Devel kergja adava te šaj nijekh manuš te na falinel pe angli leste. 30 O Devel tano adava so kergja te ova ko jekhipe e Hristos Isusea. O Hristos otkringja amenge e Devleskiri mudrost hem e Devleskiri pravednost. Isto agjaar, preku leste o manuša šaj te oven sveta hem preku i otkupnina* šaj te oven oslobodime, 31 te šaj te ovel baš agjaar sar so pišinela ko Spisija: „Okova so falinela pe, neka falinel pe e Jehovaja“.*

2 Adaleske phraljalen, keda aljum ki tumende te vakerav tumenge e Devleskiri tajna,* na trudingjum man te vooduševinav tumen lafencar ili te sikavav tumenge mli mudrost. 2 Namesto adava, keda sium sine tumencar, odlučingjum te na kerav lafi bašo ništo javer osven bašo Isus Hristos hem bašo adava kaj sine kovimo ko stubo. 3 Keda aljum ki tumende, me osetinava man sine slabo hem tresinava sine tari dar. 4 Keda kerava sine lafi hem keda propovedinava sine, na kerava sine adava uverliva lafencar save so koristinena o mudra manuša, nego mle lafija sikavena sine kobor tani mokjno e Devleskiri sila.* 5 Me kergjum adava te šaj te ovel tumen vera ki e Devleskiri sila, a na ki manušikani mudrost.

6 Amen maškar o duhovno zrela manuša keraja lafi baši mudrost, ama na baši mudrost akale svetoskiri,* ni baši mudrost e vladetelengiri taro akava sveto,* kola so ka džan ki propast. 7 Nego keraja lafi baši e Devleskiri tajna,* koja soj tani leskiri garavdi mudrost. O Devel panda angleder te postojnel akava lošno sveto* odredingja te postapinel sprema adaja mudrost, te šaj amen te dobina lestar slava. 8 Nijekh taro vladetelija akale svetoskere* na pendžargje adaja mudrost, soske te pendžaren la sine, nane sine te mudaren amare bare Gospodare. 9 Nego, sar so pišinela ko Spisija: „I jakh so na dikhlja hem o kan so na šungja, hem adava so na alo e manušeske ko vilo, adava o Devel spremingja okolenge so mangena le“. 10 Ama o Devel otkringja amenge adala bukja preku pli sila,* soske e Devleskiri sila* istražinela sa, čak e Devleskere hor bukja.

11 Kova manuš džanela o misle e javere manušeskere? Sekova manuš džanela samo adava so isi le ko plo vilo.* Agjaar, ni jekh manuš na džanela e Devleskere misle. Samo e Devleskiri sila* džanela len. 12 Amen na primingjem e svetoskoro način sar razmislinela,* nego primingjem e Devleskiri sila,* te šaj te pendžara adava so o Devel mangipaja dengja amen. 13 Amen isto agjaar keraja lafi bašo akala bukja, ama na koristinaja lafija so siklilem tari manušikani mudrost, nego koristinaja lafija kola so siklilem tari e Devleskiri sila,* te šaj asavke lafencar te objasnina o čačipa taro Devel.

14 Ama okova soj vodimo taro manušikano razmislibe, na prifatinela o bukja soj otkrime preku e Devleskiri sila.* Ov mislinela kaj adala bukja tane glupost. Ov našti te haljovel len, soske manuš valjani te ispitinel adala bukja agjaar so ka pomožinel le e Devleskiri sila.* 15 Tari javer strana, okova manuš soj vodimo tari e Devleskiri sila* haljovela sa, ama le našti nikoj te haljovel le. 16 Sar so pišinela ko Spisija: „Koj pendžargja e Jehovaskiri* godi, pa te šaj te sikavel le bašo nešto?“ A amen isi amen e Hristoseskiri godi.

3 Adaleske, phraljalen, me našti sine te kerav tumencar lafi sar manušencar soj tane vodime tari e Devleskiri sila.* Me valjani sine te kerav tumencar lafi sar manušencar soj tane vodime taro manušikano razmislibe, sar tikne čhavencar so džana ko e Hristoseskoro drumo. 2 Dengjum tumen thud, a na zorali hrana, soske panda na sien sine spremna te han zorali hrana. Hem akana da na sien spremna. 3 Tumen panda isi tumen o manušikano razmislibe. Adava so isi ljubomora hem akošibe maškar tumende, sikavela kaj ponašinena tumen sar o manuša taro akava sveto. 4 Soske, keda jekh vakerela: „Me sium e Pavleskoro“, a o javer: „Me sium e Apoloskoro“, zarem na ponašinena tumen sar o manuša taro akava sveto?

5 A koj tano o Apolo? Hem koj tano o Pavle? Amen siem samo sluge so pomožingje tumenge te oven vernikija. Amen samo kergjem adava so o Gospodari vakergja amenge te kera. 6 Me sadingjum, o Apolo čhivgja pani, ama o Devel kergja te bajrol. 7 Adaleske, nane važno okova so sadinela, a ni okova so čhivela pani, nego o Devel, kova so kerela te bajrol. 8 A okova so sadinela hem okova so čhivela pani, kerena zaedno buti,* ama sekoj ka dobinel nagrada sprema plo trudo. 9 Soske, amen siem e Devleskere sorabotnikija, a tumen sien e Devleskiri niva, jekh gradba soj kerdi taro Devel.

10 Adaleske so o Devel sikavgja mange plo šukaripe so na zaslužinaja le, me sium sar jekh šukar glavno graditeli. Me čhivgjum o temeli, ama nekoj javer gradinela upri leste. Ama sekoj valjani te pazinel sar gradinela upro adava temeli. 11 O Devel čhivgja e Isus Hristose sar temeli. Adaleske nikoj našti te čhivel javer temeli. 12 Nekoj šaj ka gradinel upro temeli hem ka koristinel zlato, srebro, skapocena bara, a nekoj javer šaj ka koristinel kaš ili pus. 13 Ama keda ka avel o dive te oven ispitime, sekole manušeskiri buti ka dikhel pe savi tani. Adava ka ovel otkrimo e jagaja, soske i jag ka sikavel sar sekova jekh gradingja. 14 Ako ačhovela adava so sine gradimo upro adava temeli, tegani okova so gradingja ka dobinel nagrada. 15 Ama ako thabljola adava so o manuš gradingja, adava manuš ka našavel but. Ov ka spasinel pe, ama ka ovel sar manuš so edvaj našlja tari jag.

16 Na džanena li kaj tumen sien e Devleskoro hrami hem kaj e Devleskiri sila* tani ki tumende? 17 Ako nekoj uništinela e Devleskoro hrami, o Devel ka uništinel le, soske e Devleskoro hrami tano sveto, hem tumen sien adava hrami.

18 Nikoj ma te hovavel korkori pes: koj mislinela kaj tano mudro ko akava sveto,* neka ovel glupavo, soske agjaar ka ovel mudro. 19 Soske, i mudrost akale svetoskiri tani glupost anglo Devel. Sar soj pišimo ko Spisija: „O Devel dozvolinela o mudra manuša korkori te peren ko pumare lukava stapice“. 20 Hem akava da pišinela: „O Jehova* džanela kaj o misle e mudra manušengere na vredinena“. 21 Adaleske nikoj na valjani te falinel pe manušencar, soske sa tano tumaro: 22 o Pavle, o Apolo, o Kifa,* o sveto, o životo, o meribe, adava soj akana, ili adava so ka avel - sa tano tumaro. 23 A tumen sien e Hristoseskere, hem o Hristos tano e Devleskoro.

4 O manuša valjani te dikhen amen sar sluge e Hristoseskere, sar upravitelija* kola soj odgovorna bašo e Devleskere tajne.* 2 Hem o gospodarija taro upravitelija očekujnena te oven verna. 3 A mange ni hari nane važno sar bi sudinena mange tumen ili nesavo manušikano sudo. 4 Ustvari, ni me na sudinava korkori mange, soske mli sovest vakerela mange kaj na sium krivo bašo ništo. Ama adava na sikavela kaj sium pravedno. O Jehova* tano adava so sudinela mange. 5 Adaleske, nikaske ma sudinen angleder te avel o vreme bašo adava, ustvari džikote na avela o Gospodari. Ov ka kerel te dikhjon o tajne soj garavde ki temnica hem ka sikavel so isi e manušen ko vilo. Hem tegani sekova manuš ka ovel falimo taro Devel bašo bukja so kergja.

6 Phraljalen, me vakergjum tumenge akala bukja agjaar so koristingjum mlo primer hem e Apoloskoro, te šaj te pomožinav tumenge te sikljoven akava pravilo: „Ma keren ništo javer, osven adava soj pišimo“. Ako ikerena tumen ko akava, nane te vazden tumen hem nane te dikhen jekhe manuše sar pošukar taro javer. 7 Soske, so kerela tut pošukar taro javera, hem soj adava so isi tut, a na dobingjan le? A ako dobingjan le, soske falinea tut sar te phene na dobingjan le?

8 Dali isi tumen više sa so valjani tumenge? Dali sien više barvale? Dali bizo amende počmingjen te vladinen sar carija? Ka ovel sine mange milo tumen te počminen sine te vladinen sar carija, soske tegani amen da ka vladina sine zaedno tumencar. 9 Soske, mange dikhjola kaj ulem sar pretstava ko teatar e svetoske, hem o manuša hem o angelija dikhena amen. O Devel čhivgja man hem e javere apostolen te ikljova posledna ki scena sar manuša soj osudime te meren. 10 Amen dikhena amen sar deline e Hristoseskoro sebepi, a tumen mislinena kaj sien mudra e Hristoseskoro sebepi.* Amen dikhjovaja sar slaba, a tumen dikhjovena sar silna. Tumenge o manuša sikavena čest, a amen dikhena amen sar potele pestar. 11 Amen dži akana, a hem ponadari da, siem bokhale, žedna, na siem dovolno uravde,* siem marde hem nane amen kher. 12 Amen mučno keraja buti amare vastencar. Keda o manuša vredžinena amen, amen blagoslovinaja len.* Keda progoninena amen, amen strplivo trpinaja. 13 Keda o manuša kaljarena amaro anav, amen ko krotko način keraja lencar lafi. Sa dži akana, o manuša taro sveto dikhena amen sar gjubre, sar nešto so frdela pe.

14 Na pišinava akala bukja te šaj te ladžakerav tumen, nego te šaj te dav tumen sovet sar mle mangle čhave. 15 Te oven da tumen 10.000 vospituvačija* so ka sikaven tumen sar te džan palo Hristos, nane tumen but dada. Soske, preku o Hristos Isus, me uljum tumenge dad agjaar so sikavgjum tumen o šukar haberi. 16 Adaleske molinava tumen, džan palo mlo primer. 17 Adava sebepi bičhalava e Timotee ki tumende. Ov tano mlo manglo hem verno čhavo ko služibe e Gospodareske. Ov ka setinkerel tumen ko načinija sar me kerava mi služba e Hristos Isuseske hem ka setinkerel tumen ko bukja so sikavava segde, ko sekova sobranie.

18 Nesave tumendar mislinena kaj me nane te avav ki tumende, hem adaleske vazdena pe. 19 Ama, ako tani e Jehovaskiri* volja, panda hari ka avav ki tumende hem mangava te dikhav okolen so vazdena pe, ama na mangava te džanav bašo so ola kerena lafi, nego mangava te dikhav dali isi len e Devleskiri sila, ili na. 20 Soske, amare lafija na sikavena dali siem podložna e Devleskere Carstvoske, nego amare postapke kola soj tane dokaz kaj isi amen e Devleskiri sila. 21 So mangena poviše, te avav ki tumende kaštea, ili mangipaja hem te ovav tumencar krotko?

5 Šungjum kaj maškar tumende isi jekh manuš so živinela ple dadeskere romnjaja. Asavko nemoral* tano but pološno taro adava so kerena o manuša kola so nane vernikija. 2 Zarem dičinena tumen adalea? Namesto adava, na valjani li te oven tažna hem te ciden asavke manuše tumendar? 3 Iako na sium lično prisutno tumencar, me sium tumencar ko mle misle.* Me više osudingjum e manuše so kergja akava, sar te phene sium adathe tumencar. 4 Keda khedena tumen zaedno ko anav amare Gospodareskoro e Isuseskoro, džanen kaj me ko mle misle sium tumencar. Hem isto agjaar tumencar tani i sila amare Gospodareskiri e Isuseskiri. 5 Tumen mora te predajnen akale manuše e Satanaske, te šaj te cidel pe adava lošno vlijanie,* hem o sobranie ponadari da te ovel le ispravno stavi sprema o grevo ko dive e Gospodareskoro.

6 Nane šukar so dičinena tumen akale bukjaja. Na džanena li kaj hari kvasaco ušljarela celo humer? 7 Ciden o purano kvasaco te šaj te oven nevo humer, adaleske so valjani te oven bizo kvasaco. Soske, o Hristos dengja plo životo sar žrtva hem agjaar ulo amaro bakhro* baši Pasha.* 8 Adaleske valjani te slavina o prazniko, na e marea so isi le o purano kvasaco hem na e kvasacoja so pretstavinela o grevo hem o lošnipe, nego e marea bizo kvasaco so pretstavinela adava soj iskreno hem čače.

9 Ko mlo pismo pišingjum tumenge te čhinaven te družinen tumen e nemoralna* manušencar, 10 ama na mislinava sine ko adava celosno te ciden tumen e manušendar taro akava sveto soj tane nemoralna, alčna, čora ili so obožavinena idolen. Inače ka valjani te ikljoven taro sveto. 11 Ama akana pišinava tumenge te čhinaven te družinen tumen jekhe phralea ako tano nemoralno,* alčno, obožavinela idolen, vredžinela e javeren, tano pijanica ili čor. Na valjani čak ni te han asavke manušea. 12 Me na sium odgovorno te sudinav e manušenge soj tane avrijal taro sobranie. Tumen mora te sudinen okolenge soj ko sobranie, 13 a o Devel ka sudinel okolenge soj avrijal taro sobranie. „Ciden e lošno manuše soj maškar tumende!“

6 Ako nekoj tumendar akošlja pe jekhe javere phralea, valjani li te džal ko sudo anglo nepravedna manuša, ili valjani te ikljol anglo sveta manuša* ko sobranie? 2 Na džanena li kaj o sveta manuša ka sudinen e svetoske? Ako tumen sien adala so ka valjani te sudinen e svetoske, na sien li sposobna te rešinen potikne problemija? 3 Na džanena li kaj amen ka sudina e angelenge? Tegani, soske našti te rešina o sekojdnevna problemija so pojavinena pe akana? 4 Znači, ako valjani te rešina asavke problemija so pojavinena pe akana, tegani soske džana te sudinen tumenge o manuša so nane delo taro sobranie? 5 Akava vakerava le tumenge te šaj te ladžan. Nane li maškar tumende ni jekh mudro manuš kova so šaj te sudinel maškar ple phralja? 6 Namesto adava, phral phrale ikalela anglo sudo, hem adava anglo manuša so nane vernikija!

7 Ako tužinena tumen jekh jekhea, tumen više našavgjen. Soske na trpinena keda tumare phralja kerena tumenge nešto lošno ili kerena tumenge šteta? 8 Namesto adava, tumen kerena tumare phralenge lošnipe hem šteta.

9 Na džanena li kaj o nepravedna manuša nane te nasledinen e Devleskoro Carstvo? Ma hovavgjoven! Ni o nemoralna* manuša, ni okola so obožavinena idolija, ni okola so kerena preljuba, ni o murša so isi len odnosija e muršencar,* 10 ni o čora, ni o alčna, ni o pijanice, ni okola so vredžinena e javeren, ni okola so silaja lena javerengere bukja, nane te nasledinen e Devleskoro Carstvo. 11 A nesave tumendar sine asavke, ama akana o Devel ple silaja* thovgja tumen, kergja te oven sveta hem ko anav amare Gospodareskoro e Isus Hristoseskoro vakergja kaj sien pravedna.

12 Sa tano mange dozvolimo, ama sa o bukja nane korisna. Sa tano mange dozvolimo, ama nane te mukhav ništo te kontrolirinel man. 13 I hrana tani e vogjeske hem o vogi tano e hranake, ama o Devel ka uništinel solduj bukja. A o telo nane bašo nemoral,* nego bašo Gospodari hem o Gospodari tano bašo telo. 14 Ama o Devel ple silaja voskresningja e Gospodare hem ka voskresninel amen da.

15 Na džanena li kaj tumaro telo pripadinela e Hristoseske? Tegani, ispravno li tano te lav adava so pripadinela e Hristoseske* hem te spojnav le nemoralno džuvljaja?* Me nikogaš nane te kerav adava! 16 Na džanena li kaj okova so spojnela pe e nemoralno džuvljaja* tano jekh telo laja? Soske, o Devel vakerela: „Ola o duj ka oven jekh telo“. 17 A koj tano spojmo e Gospodarea, isto razmislinela sar leste.* 18 Našen taro nemoral!* Sekova grevo so kerela le o manuš tano avri taro leskoro telo, ama koj kerela nemoral grešinela protiv plo telo. 19 Na džanena li kaj tumaro telo tano hrami kote so živinela e Devleskiri sila?* Hem adaja sila* dobingjen la taro Devel te šaj te ovel ki tumende. Isto agjaar, tumaro telo na pripadinela tumenge, nego pripadinela e Devleske, 20 soske ov platingja bari cena tumenge. Adaleske keren sa te šaj tumare teloja te slavinen e Devle!

7 Akana odgovorinava tumenge bašo pučiba so pišingjen mange. Pošukar ka ovel jekhe muršeske te na ženinel pe hem te na sovel džuvljaja. 2 Ama adaleske so o nemoral* but širingja pe, sekole murše neka ovel le pli romni hem sekole džuvlja neka ovel la plo rom. 3 O rom valjani te zadovolinel o potrebe ple romnjakere, a i romni da valjani te kerel o isto ple romeske. 4 E romnja nane la celosno pravo upro plo telo, nego lakere rome isi le. Isto agjaar, e rome da nane le celosno pravo upro plo telo, nego leskere romnja isi la. 5 Ma čhinaven jekh jekhestar akava pravo, osven ako dogovoringjen tumen te ovel agjaar nesavo vreme, te šaj te posvetinen adava vreme baši molitva. Ama palo adava palem oven zaedno, soske ako na kerena agjaar šaj ka našti te kontrolirinen tumen, hem o Satana šaj te iskušinel tumen. 6 Me vakerava tumenge akava te šaj te džanen kaj tano dozvolimo te keren agjaar, ama adava nane zapoved. 7 A bi mangava sa o manuša te oven biženime sar mande. Ama sekas isi le plo poklon taro Devel, jekh služinela leske ko akava način, a javer ko okova način.

8 A okolenge so nane ko brako hem e udovicenge vakerava kaj tano pošukar te ačhoven biženime sar so sium me. 9 Ama ako našti te kontrolirinen pe, neka ženinen pe, soske pošukar tano te ženinen pe nego te thabljoven tari silno želba.

10 Okolenge soj ko brako vakerava akaja zapoved koja so na avela mandar, nego taro Gospodari: i romni ma te odvojnel pe taro plo rom. 11 Ama ako odvojnela pe, neka ačhovel biženimi ili neka smirinel pe palem ple romea. Hem o rom ma te mukhel ple romnja.

12 Ama e javerenge vakerava me, a na o Gospodari: ako nesave phrale isi le romni so nane verniko, hem oj soglasinela pe te ačhovel lea, ma te mukhel la, 13 a isto agjaar, ako jekhe romnja isi la rom so nane verniko, hem ov soglasinela pe te ačhovel laja, ma te mukhel ple rome. 14 Soske, o brako e romeskoro so nane verniko tano sveto sebepi leskiri romni koja soj verniko, hem o brako e romnjakoro so nane verniko tano sveto sebepi lakoro rom kova soj verniko. Te na ovel sine akava agjaar, tumare čhave nane te oven sine čista, ama akana ola tane sveta. 15 Ama, ako o rom ili i romni so nane verniko mangela te džal peske,* neka džal peske. Ki asavki situacija o phral ili i phen na valjani te ačhovel ple bračno partnerea, soske o Devel vikingja tumen te živinen ko mir. 16 Soske, kotar tu sar romni džanea kaj nane te spasine tle rome? Ili, kotar tu sar rom džanea kaj nane te spasine tle romnja?

17 Bilo sar te ovel, sekova jekh tumendar ponadari da neka živinel agjaar sar so dengja le o Jehova,* sprema o okolnostija so sine le keda o Devel vikingja le. Akava upatstvo vakerava ko sa o sobranija. 18 Ako nekoj sine više kerdo suneti keda sine vikimo, neka ačhol agjaar. A ako nekoj na sine kerdo suneti keda sine vikimo, ma te kerel pe suneti. 19 Nane važno dali jekh manuš tano kerdo suneti, ili na. Važno tano ov te ikerel e Devleskere zapovedija. 20 Sekoj neka ačhol agjaar sar so sine keda sine vikimo. 21 Ako sian sine robo keda sian sine vikimo, ma sekirin tut. Ama ako šaj te ove slobodno, koristin i prilika. 22 Soske, sekoj so sine robo keda o Gospodari vikingja le, ovela oslobodimo manuš kova so pripadinela e Gospodareske. A isto agjaar, sekoj so sine slobodno manuš keda o Gospodari vikingja le, ovela e Hristoseskoro robo. 23 Tumen sien skupo kinde. Ma oven više robija e manušenge. 24 Phraljalen, ačhoven agjaar sar so sien sine keda o Devel vikingja tumen.

25 A okolenge so nikogaš na sine ko brako,* nane man te vakerav lenge nesavi zapoved taro Gospodari, nego vakerava adava so me mislinava, sar verno manuš koleske so o Gospodari sikavgja milost. 26 Ko akava pharo vreme, najšukar tano e manušeske te ačhovel sar soj. 27 Ako isi tut romni, ma rode način te odvojne tut latar. A ako sian bizi romni, ma rode romni. 28 Ama, ako ženinea tut, na kerea grevo. Hem ako nekoj so nikogaš na sine ko brako odlučinela te ženinel pe, na kerela grevo. Ama asavken ka oven len neve problemija ko životo.* Me mangava te pomožinav tumenge te na oven tumen asavke problemija.

29 Phraljalen, mangava te vakerav tumenge akava: ačhilo panda hari vreme. Otakana okola so isi len romnja, neka oven sar okola so nane len. 30 Okola so rovena, neka oven sar okola so na rovena. Okola so radujnena pe, neka oven sar okola so na radujnena pe. Okola so kinena, neka oven sar okola so nane len ništo. 31 Hem okola so koristinena o sveto, neka oven sar okola so na koristinena le celosno. Soske, i scena akale svetoskiri meninela pe. 32 Me mangava te na sekirinen tumen bašo ništo. Okova so nane ženimo grižinela pe bašo adava soj e Gospodareskoro hem sar te ugodinel e Gospodareske. 33 Ama okova soj ženimo grižinela pe bašo bukja e svetoskere hem sar te ugodinel ple romnjake, 34 adaleske leskoro vilo tano podelimo. Isto agjaar, i džuvli so nane ženimi ili okoja so nikogaš na sine ženimi, grižinela pe bašo adava soj e Gospodareskoro, te šaj lakoro telo hem lakere misle* te oven sveta. A i džuvli soj ženimi grižinela pe bašo bukja e svetoskere hem sar te ugodinel ple romeske. 35 Me vakerava tumenge akava bašo tumaro šukaripe. Na mangava te ograničinav tumen,* nego mangava te pottikninav tumen te ponašinen tumen sar so valjani, te šaj te služinen e Gospodareske celo vilea bizo nešto te lel tumaro vnimanie.

36 Ama, ako nekoj soj tano biženimo mislinela kaj našti te kontrolirinel pe hem kaj pošukar ka ovel te ženinel pe, posebno ako više tano zrelo ko telo hem ki godi,* tegani neka kerel adava so mangela, na grešinela. Asavke neka ženinen pe. 37 Ama ako nekoj tano sigurno kaj nane le potreba te ženinel pe hem kaj šaj te kontrolirinel ple želbe, hem ko plo vilo odlučingja te ačhol agjaar, tegani šukar kerela. 38 Znači, okova so khuvela ko brako kerela šukar, ama okova so na khuvela ko brako kerela panda pošukar.

39 I romni valjani te ačhol ko brako* ple romea sa džikote ov tano dživdo. Ama, ako lakoro rom merela,* tegani oj tani slobodno te ženinel pe kasaja mangela, samo ako ov tano sledbeniko e Gospodareskoro. 40 Ama, me mislinava kaj oj ka ovel posrekjno ako ačhovela agjaar sar soj. A uverimo sium kaj mande da isi man e Devleskiri sila.*

8 A akana pišinava tumenge baši hrana koja so dela pe sar žrtva e idolenge. Sarine amen džanaja akaja buti. Ama, adava so o manuš džanela kerela le gordo, a o mangipe izgradinela e javeren. 2 Ako nekoj mislinela kaj džanela nešto, ov panda na haljola adaja buti sar so valjani. 3 Ama ako nekoj mangela e Devle, tegani o Devel džanela le.

4 A keda keraja lafi bašo adava te hal pe adava soj dendo sar žrtva e idolenge, amen džanaja kaj jekh idoli nane čače devel hem džanaja kaj isi samo jekh Devel. 5 Ustvari, o manuša bute bukjenge vakerena kaj tane devela, bizi razlika dali upre ko nebo ili tele ki phuv. Hem čače isi but „devela“ hem but „gospodarija“. 6 Ama, amenge postojnela samo jekh Devel, o Dad. Sa o bukja avena lestar hem amen živinaja leske, hem amenge postojnela samo jekh Gospodari, o Isus Hristos. Sa o bukja ale preku leste hem amen živinaja preku leste.

7 Ama, sa o manuša na haljovena akava. Nesave angleder obožavinena sine idolija, adaleske keda ola hana nešto so angleder sine dendo sar žrtva jekhe idoleske, ola dikhena ko adava sar nešto soj povrzimo e idolea. Tegani lengiri sovest mučinela len, soske tani slabo. 8 A i hrana nane te anel amen popaše e Devlea - ni našavaja nešto ako na haja, ni palem dobinaja nešto ako haja. 9 Ama pazinen o pravo so isi tumen te birinen, te na ovel bar sopkibaske so ka kerel okola soj slaba te grešinen. 10 Soske, iako tu džanea kaj o idolija na vredinena ništo, okova so isi le slabo sovest šaj te dikhel tut sar haja ko hrami jekhe idoleskoro. Adava šaj te ohrabrinel le ov da te hal adava soj dendo sar žrtva e idolenge hem agjaar te džal protiv pli sovest. 11 Čak ako džanea kaj šaj te ha asavko hajbe, tu uništinea i vera akale slabo manušeskiri. Ma bistre, ov tano tlo phral kaske so o Hristos mulo. 12 Keda tu grešinea protiv tlo phral ko asavko način hem povredinea leskiri slabo sovest, tu grešinea protiv o Hristos. 13 Adaleske, ako adava so hava kerela mle phraleskiri vera te slabonel, me nikogaš nane te hav mas. Nane te kerav ništo so ka slabonkerel i vera mle phraleskiri.

9 Zarem me na sium slobodno te kerav adava so mangava? Zarem me na sium apostoli? Zarem me na dikhljum e Isuse, amare Gospodare? Zarem tumen na sien dokaz kaj me sium apostoli? 2 Iako o javera na dikhena ki mande sar apostoli, tumenge me sigurno sium apostoli. Tumen sien o pečati kova so dokažinela kaj me sium apostoli e Gospodareskoro.

3 A okolenge so kritikujnena man, te šaj te braninav man, isi man te vakerav lenge akava: 4 nane li amen pravo te ha hem te pija? 5 Nane li amen pravo te ovel amen romni koja so isto agjaar tani verniko hem oj da te avel amencar, sar so kerena adava o javera apostolija, e Gospodareskere phralja hem o Kifa?* 6 Samo me hem o Varnava li valjani te kera buti te šaj te izdržina amen? 7 Kova vojniko služinela ko plo trošako? Kova manuš so sadinela drakha ki pli niva, na hala taro adala drakha? Ili, kova manuš so arakhela jekh stado, na piela taro thud so dela o stado?

8 Na vakerava akava soske obično o manuša kerena agjaar, nego soske o Zakoni da kerela lafi bašo akala bukja. 9 Soske, e Mojseeske ko zakoni pišinela: „Ma phan o muj e guruveskoro džikote lea odvojnea o giv taro steblo“. Zarem o Devel grižinela pe samo e guruvenge? 10 Ili ov vakergja adava amaro sebepi? Čače, adava sine pišimo amaro sebepi, soske hem okova so orinela i niva hem okova so odvojnela o giv taro steblo valjani te keren pumari buti agjaar so ka nadinen pe kaj ka dobinen plo delo tari žetva.

11 Ako amen delingjem tumencar* o bukja so avena taro Devel, pogrešno li tano te dobina* tumendar materijalno poddrška? 12 Ako e javere manušen isi len pravo te dobinen adava tumendar, nane li amen panda pobaro pravo te dobina adava tumendar? Ama, amen na koristingjem adava pravo, nego trpingjem ki sekoja phari situacija te šaj te na čhinava nikas taro adava te verujnel ko šukar haberi bašo Hristos. 13 Na džanena li kaj okova so kerela buti ko hrami, hala taro bukja so o manuša anena ko hrami hem okova so služinela ko žrtveniko, dobinela delo tari žrtva so dela pe ko žrtveniko? 14 Agjaar o Gospodari da zapovedingja, okola so propovedinena o šukar haberi, te živinen taro šukar haberi.

15 Ama me na iskoristingjum ništo taro akava. Hem na pišingjum tumenge akava adaleske so rodava tumendar nešto akana. Pošukar ka merav nego te kerav adava. Nikaske nane te dozvolinav te lel mandar adava kolea so šaj te falinav man! 16 A ako vakerava o šukar haberi, adalea na valjani te falinav man, soske adava sium dužno te kerav. Čače, teško mange ako na vakerava o šukar haberi! 17 Ako kerava adava dobrovolno, ka dobinav nagrada, ama čak ako kerava adava bizo te mangav, sepak adaja tani zadača so dengja* man o Devel. 18 Tegani koja tani mli nagrada? Mli nagrada tani te propovedinav o šukar haberi bizo te platinel pe mange bašo adava, agjaar na zloupotrebinava mlo pravo so isi man sar propovedniko e šukar habereskoro.

19 Iako me sium slobodno manuš, me korkori kergjum man robo sa e manušenge, te šaj te anav ko e Hristoseskoro drumo kobor so šaj poviše manušen. 20 E Evreenge sium sine sar Evrei, te šaj te anav e Evreen ko e Hristoseskoro drumo. Okolenge soj telo Zakoni sium sine sar nekoj soj telo Zakoni, iako me na sium telo Zakoni, te šaj te anav ko e Hristoseskoro drumo okolen soj telo Zakoni. 21 Okolenge soj bizo Zakoni sium sine sar nekoj soj bizo Zakoni - iako na sium bizo e Devleskoro zakoni, nego sium telo e Hristoseskoro zakoni - te šaj te anav ko e Hristoseskoro drumo okolen soj bizo Zakoni. 22 Okolenge soj slaba sium sine slabo, te šaj te anav ko e Hristoseskoro drumo okolen soj slaba. Sarinenge sium sine sa, te šaj ko sekova način te spasinav nekas. 23 Kerava sa bašo šukar haberi, te šaj te propovedinav le e javerenge.

24 Na džanena li kaj ki jekh trka sa o trkačija prastana, ama samo jekh dobinela i nagrada? Adaleske, prastan ko asavko način te šaj te dobinen i nagrada. 25 A sekova natprevaruvači sikavela samokontrola ko sa. Ola kerena adava te šaj te dobinen kruna taro listija koja so raspadinela pe, a amen keraja adava te šaj te dobina nagrada koja so na raspadinela pe. 26 Me na prastava bizi cel hem na khuvava me vastea ko čučo, 27 nego marava* mlo telo hem kerava le sar mlo robo, te šaj otkeda propovedingjum e javerenge, te na ovav me otfrlimo.

10 Phraljalen, mangava te džanen kaj sa amare parapapija sine telo oblako hem sarine ola nakhle taro more. 2 Hem sarine ola krstingje pe agjaar so sine ko jekhipe e Mojseea keda sine telo oblako hem keda nakhle taro more. 3 Sarine ola hale i isto duhovno hrana 4 hem sarine ola pile taro isto duhovno pani. Ola pile tari duhovno karpa koja so džala sine lencar. Adaja karpa pretstavinela sine e Hristose. 5 Ama pobaro delo lendar na ugodingje e Devleske, adaleske sine mudarde ki pustina.

6 Adava so ulo lencar tano amenge primer ma te manga te kera adava soj lošno, sar so kergje ola. 7 Ma te obožavina idolija, sar so kergje nesave lendar, sar so pišinela ko Spisija: „O narodo bešlja te hal hem te piel, pa uštilo te veselinel pe“. 8 Ma te kera nemoral,* sar so kergje nesave lendar hem ko jekh dive mule 23.000 džene. 9 Ma te iskušina e Jehova,* sar so kergje nesave lendar hem adaleske mule taro sapa. 10 Ma te žalina amen, sar so kergje nesave lendar hem adaleske sine mudarde taro e Devleskoro angeli. 11 Sa adala bukja so slučingje pe lenge tane primer amenge hem pišime tane sar predupreduvanje amenge so živinaja ko krajo akale svetoskoro.*

12 Znači, koj mislinela kaj tergjola, neka pazinel te na perel. 13 Sekova iskušenie so isi tumen, sine e javeren da. Ama o Devel tano verno hem nane te mukhel te oven iskušime poviše taro adava so šaj te izdržinen, nego ka pomožinel tumenge keda isi tumen iskušenie te šaj te izdržinen le.

14 Adaleske, mangle phraljalen, našen taro idolopoklonstvo. 15 Kerava tumencar lafi sar manušencar kola so šukar haljovena o bukja. Adaleske, korkori odlučinen dali adava so vakerava tano ispravno. 16 Keda pijaja tari čaša baši blagodarnost kolake so blagodarinaja e Devleske, nane li amen korist taro e Hristoseskoro rat? Keda haja taro maro kova so phagaja, nane li amen korist taro e Hristoseskoro telo? 17 Adaleske so isi jekh maro, sarine amen siem jekh telo, iako siem but džene, soske sarine haja adava jekh maro.

18 Razmislinen bašo Izraelcija. Zarem okola so hana taro žrtve kola so dena pe ko hrami, na delinena li adala žrtve e žrtvenikoja? 19 Dali akalea mangava te vakerav kaj jekh idoli, ili adava so dela pe sar žrtva leske značinela nešto? 20 Na. Nego vakerava kaj keda o manuša taro javera narodija dena žrtve, ola dena žrtve e demonenge, a na e Devleske. A me na mangava te ovel tumen nešto e demonencar. 21 Našti te pien tari čaša e Jehovaskiri* hem tari čaša e demonengiri. Našti te han tari e Jehovaskiri* sofra hem tari e demonengiri sofra. 22 Ili, mangaja te kera e Jehova* ljubomorno? Zarem siem posilna lestar?

23 Sa tano dozvolimo, ama nane sa korisno. Sa tano dozvolimo, ama sa na izgradinela. 24 Nikoj te na rodel pli korist, nego i korist e javereskiri.

25 Han taro bilo savo mas so bikinela pe ko pazari bizo te mučinel tumen tumari sovest hem ma ispitinen ništo. 26 Soske, ko Spisija pišinela: „E Jehovaskiri* tani i phuv hem sa so isi ki late“. 27 Ako nekoj so nane verniko kaninela tumen ko hajbe, hem tumen odlučinena te džan, tegani han sa so ka ikalel pe angli tumende bizo te mučinel tumen tumari sovest hem ma ispitinen ništo. 28 Ama ako nekoj vakerela tumenge: „Akava sine dendo sar žrtva e idolenge“, tegani ma han sebepi adaleskoro so vakergja tumenge, te šaj te na mučinel nikas leskiri sovest. 29 Na mislinava ki tli sovest, nego ki sovest e javereskiri. Iako isi man sloboda, na mangava mli sloboda te ovel sudimi tari e javerengiri sovest. 30 Čak ako blagodarinava e Devleske bašo adava so hava, hem isi man pravo te hav adava, tegani soske te hav ako bašo adava o javera ka keren lošno lafi mandar?

31 Znači, bilo te han ili bilo te pien ili bilo so javer te keren, keren sa baši e Devleskiri slava. 32 Ma oven tumen sebepi te sopkinen pe ni o Evreija, ni o Grkija, ni e Devleskoro sobranie, 33 sar me so trudinava man te ugodinav sarinenge ko sa hem na rodava mli korist, nego i korist bute manušengiri, te šaj te oven spasime.

11 Džan palo mlo primer, sar me so džava palo e Hristoseskoro primer.

2 Pofalinava tumen adaleske so sekogaš setinena tumen ki mande hem so ikerena tumen ko sa adava so sikavgjum tumen. 3 Ama, mangava te džanen kaj poglavari sekole romeske tano o Hristos, poglavari e romnjake tano o rom, a poglavari e Hristoseske tano o Devel. 4 Keda jekh murš so molinela pe ili so prorokujnela učharela plo šero, ov ladžakerela plo šero. 5 A keda jekh džuvli molinela pe ili prorokujnela hem lakoro šero nane učhardo, oj ladžakerela plo šero, soske adava tano isto sar te phene lakoro šero tano muravdo. 6 Soske, ako jekh džuvli na učharela plo šero, neka čhinel ple bala. Ama ako e džuvljake tano ladžavo te čhinel ple bala ili te muravel plo šero, tegani neka učharel plo šero.

7 A o murš na valjani te učharel plo šero, soske ov tano slično sar o Devel hem ov anela slava e Devleske, a i džuvli anela slava e muršeske. 8 Soske, o Devel na kergja e murše taro e džuvljakoro telo, nego ov kergja e džuvlja taro e muršeskoro telo. 9 Hem o murš na sine kerdo baši džuvli, nego i džuvli sine kerdi bašo murš. 10 Adava sebepi hem e angelengoro sebepi, i džuvli valjani te učharel plo šero te šaj adalea te sikavel kaj poštujnela e muršeskoro avtoriteti.

11 Sepak, ko e Gospodareskoro sobranie, i džuvli našti bizo murš hem o murš da našti bizi džuvli. 12 Soske, sar i džuvli so avela taro e muršeskoro telo, agjaar o murš da tano bijamo tari džuvli, ama sa avela taro Devel. 13 Tumen korkori proceninen dali ličinela jekhe džuvljake te molinel pe e Devleske anglo javera bizo te učharel plo šero? 14 Nane prirodno e murše te oven le bare bala, soske adava ladžakerela le, 15 ama e džuvlja te oven la bare bala, adava anela lake čest. Soske, i bal sine lake dendi sar šamija. 16 Ama ako nekoj mangela te rasprajnel pe bašo akava hem mangela tumen te prifatinen jekh javer običaj, vakeren leske kaj amen hem sa e Devleskere sobranija nane amen javer običaj.

17 Tumare sostanokija kerena tumenge poviše šteta nego so pomožinena tumen, adaleske me našti te pofalinav tumen džikote dava tumen akala upatstvija. 18 Sar prvo, šunava kaj keda zaedno khedena tumen ko sobranie isi podelbe maškar tumende, hem me verujnava kaj nešto taro adava tano čače. 19 Soske, maškar tumende sigurno ka oven hem sekte,* te šaj agjaar jasno te dikhjol kas tumendar o Devel prifatinela.

20 Keda khedena tumen zaedno te han e Gospodareskiri večera, tumen na kerena adava sar so valjani. 21 Soske, keda avela o vreme te han e Gospodareskiri večera, tumen prvo hana tumari večera, adaleske nekoj tano bokhalo, a nekoj tano mato. 22 Nane tumen li tumare khera kote so šaj te han hem te pien? Ili na sikavena poštovanje sprema e Devleskoro sobranie hem ponižinena okolen soj čorole? So te vakerav tumenge? Valjani li te pofalinav tumen? Bašo akava našti te pofalinav tumen.

23 Me sikavgjum tumen adava so me sikliljum taro Gospodari: i rat keda valjani sine te ovel predajmo, o Gospodari o Isus lelja maro, 24 blagodaringja pe e Devleske, phaglja o maro hem vakergja: „Akava pretstavinela mlo telo so dela pe sar žrtva tumenge. Keren akava te setinen tumen ki mande“. 25 Isto kergja e čašaja da, hem otkeda halja i večera, vakergja: „Akaja čaša pretstavinela o nevo sojuz* kova so ka važinel preku mlo rat. Keren akava, sekogaš keda piena latar, te setinen tumen ki mande“. 26 Soske, sekogaš keda hana akava maro hem piena tari akaja čaša, tumen vakerena bašo meribe e Gospodareskoro, sa džikote ov na avela.

27 Adaleske, sekova jekh so hala o maro hem piela tari čaša e Gospodareskiri, a nane dostojno, ka grešinel protiv e Gospodareskoro telo hem rat. 28 Adaleske, sekova jekh valjani prvo šukar te ispitinel korkori pes dali tano dostojno, hem palo adava ov šaj te hal taro maro hem te piel tari čaša. 29 Soske, koj hala hem piela, a na haljovela kaj adava so hala hem piela pretstavinela e Gospodareskoro telo, anela osuda korkori peske. 30 Adaleske but maškar tumende tane slaba hem nasvale, a but džene mule* da.* 31 Ama ako šukar ispitinaja korkori amen, nane te ova osudime. 32 A o Jehova* keda sudinela amenge, ov vospitinela amen, te šaj ma te ova osudime zaedno e svetoja. 33 Adaleske, phraljalen, keda ka kheden tumen te han adaja večera, adžikeren džikote na avena sarine. 34 Ako nekoj tano bokhalo, neka hal khere, te šaj ma te oven osudime keda khedena tumen zaedno. A o javera bukja ka rešinav len keda ka avav adari.

12 Phraljalen, mangava šukar te haljoven o poklonija so avena tari e Devleskiri sila.* 2 Tumen džanena, kaj angleder te oven vernikija,* sien sine hovavde te služinen e idolenge kola so našti ni te keren lafi. Tumen kerena sine sa adava so ola mangena. 3 Adaleske mangava te džanen kaj nijekh soj vodimo tari e Devleskiri sila* na vakerela: „O Isus tano dendo arman“, hem nijekh našti te vakerel: „O Isus tano Gospodari“, ako nane vodimo tari e Devleskiri sila.*

4 O poklonija tane različna, ama e Devleskiri sila* tani jekh. 5 Isi različna načinija sar te služinel pe, ama o Gospodari tano jekh. 6 Isi različna načinija sar o Devel vlijajnela upro manuša te šaj ola te keren različna bukja, ama o Devel tano jekh. 7 A jasno dikhjola kaj e Devleskiri sila* pomožinela sekole jekheske te ovel ki korist e javerenge. 8 Znači, e Devleskiri sila* dela jekheske i sposobnost mudro te kerel lafi, hem adaja isto sila dela e javereske i sposobnost te vakerel adava so o javera na džanena. 9 Adaja isto sila* dela jekheske vera, a javereske i sposobnost te sasljarel,* 10 jekheske te kerel čudija, javereske te prorokujnel, a nekaske te haljovel dali nesave porake tane taro Devel ili na, nekaske te kerel lafi ko različna čhibja hem nekaske dela i sposobnost te prevedinel adava so sine vakerdo ko javera čhibja. 11 Sa adala bukja kerela len i jekh isto sila* koja so sekaske dela sposobnost agjaar sar so mangela o Devel.

12 Sar o telo soj tano jekh, ama isi le poviše delija, hem sa o delija taro adava telo, iako tane but, ola tane jekh telo, agjaar tano hem o Hristos. 13 Sarine amen siem sine krstime tari jekh isto sila* te šaj te ova jekh telo, bizi razlika dali siem Evreija ili Grkija, ili dali siem robija ili slobodna manuša, sarine amen dobingjem isto sila.*

14 Soske, o telo nane le samo jekh delo, nego poviše delija. 15 Ako o pro vakerela: „Adaleske so na sium vas, me na sium delo taro telo“, adava na značinela kaj nane delo taro telo. 16 Hem ako o kan vakerela: „Adaleske so na sium jakh, me na sium delo taro telo“, adava na značinela kaj nane delo taro telo. 17 Ako celo telo bi ovela sine jakh, tegani sar ka šaj sine jekh manuš te šunel? Ako celo telo bi ovela sine kan, tegani sar ka šaj sine jekh manuš te osetinel o miris? 18 O Devel čhivgja sekova delo taro telo ko than kote so ov manglja.

19 Ako sarine bi ovaja sine jekh isto delo, tegani adava na bi ovela sine telo. 20 A agjaar isi but delija, ama jekh telo. 21 I jakh našti te vakerel e vasteske: „Na valjanea mange“, ili palem, o šero našti te vakerel e prenge: „Na valjanena mange“. 22 Ustvari, o delija taro telo, kola so izgledinena sar slaba, ola da tane potrebna. 23 Šukar grižinaja amen bašo delija taro telo kolenge so mislinaja kaj nane doborom važna. Agjaar, pobaro vnimanie daja adale delonge taro telo kola so nane doborom šuže. 24 A o delija taro amaro telo kola so izgledinena šukar, lenge na valjani doborom te grižina amen. O Devel agjaar sostavingja o telo, te šaj te dobinen pobari griža okola delija taro telo kolenge so adava valjani. 25 Ov kergja adava te šaj te na oven podelbe ko telo, nego sa o delija te grižinen pe jekh jekheske. 26 Hem ako jekh delo tano povredimo, tegani sa o delija osetinena i dukh lea. A ako jekhe deloske sikavela pe čest, tegani sa o delija radujnena pe lea.

27 Tumen sien e Hristoseskoro telo, hem sekova jekh tumendar tano delo taro adava telo. 28 O Devel sekaske ko sobranie dengja te ovel le plo than: prvo e apostolen, dujto e prorokon, trito e učitelen, palo adava okolen so kerena čudija, okolen so isi len i sposobnost* te sasljaren, okolen so pomožinena e javerenge, okolen so isi len i sposobnost te predvodinen hem okolen so kerena lafi ko razna čhibja. 29 Zarem sarine tane apostolija? Zarem sarine tane prorokija? Zarem sarine tane učitelija? Zarem sarine kerena čudija? 30 Zarem sarinen isi len i sposobnost* te sasljaren? Zarem sarine kerena lafi ko razna čhibja? Zarem sarine prevedinena adava soj vakerdo ki javer čhib? 31 Ama, den tumendar sa te šaj te dobinen pobare poklonija. A me ka sikavav tumenge jekh drumo kova soj upreder sa.

13 Te kerav da lafi ki e manušengiri hem ki e angelengiri čhib, a nane man mangipe, tegani bi ovava sine sar instrumenti kova so kerela but galama hem na dela prijatno zvuko. 2 Te ovel man da o poklon te prorokujnav, te haljovav da sa e Devleskere tajne,* te džanav da sa o bukja hem te ovel man da vera doborom zorali so ka šaj te premestinav planine, a mangipe nane man, ništo na sium. 3 Hem te dav da sa so isi man te šaj te parvarav e javeren, hem te dav da mlo životo te šaj te falinav man, a mangipe nane man, tegani nane man nisavi korist.

4 O mangipe tano strplivo hem ljubezno, o mangipe nane ljubomorno, na falinela pe, na vazdela pe, 5 na ponašinela pe nepristojno,* na rodela pli korist, na holjanela lokheste, na pamtinela o lošnipe. 6 O mangipe na radujnela pe e bukjenge soj pogrešna,* nego radujnela pe e čačipaske. 7 Sa podnesinela, sa verujnela, ko sa nadinela pe, sa trpinela.

8 O mangipe nikogaš na čhinavgjola. A o poklon e prorokujbaske ka našavgjovel, o poklon te kerel pe lafi ko javera čhibja ka čhinavgjovel, o poklon preku čudo te džanen pe o bukja nane više te ovel. 9 Soske, adava so džanaja nane celosno hem amaro prorokujbe nane celosno. 10 A keda ka avel adava soj celosno, adava so nane celosno ka našavgjovel. 11 Keda sium sine čhavo, kerava sine lafi sar čhavo, razmislinava sine sar čhavo, haljovava sine o bukja sar čhavo. Ama keda bariljum, otfrlingjum o čhavorikano. 12 Soske, akana dikhaja ki ajna koja so na sikavela jasno o bukja,* a tegani ka dikha jasno. Akana adava so džanava nane celosno, a tegani adava so džanava ka ovel celosno, sar o Devel so džanela man celosno. 13 A akana ačhile akala trin bukja: i vera, i nadež hem o mangipe. Ama najbaro taro akala tano o mangipe.

14 Ponadari da sikaven mangipe, ama isto agjaar den tumendar sa te dobinen o poklonija so avena tari e Devleskiri sila,* a posebno o poklon te prorokujnen. 2 Soske, e manuše so isi le poklon te kerel lafi ko javera čhibja, kerela lafi e Devlea, a na e manušencar, soske le nikoj našti te haljovel le, iako ov vakerela e Devleskere tajne* preku leskiri sila.* 3 Ama okova so prorokujnela ov izgradinela, ohrabrinela hem utešinela e javeren adalea so vakerela. 4 Okova so kerela lafi ki javer čhib, ov izgradinela korkori pes, a koj prorokujnela, izgradinela o sobranie. 5 Me bi mangava sine sarinen te ovel tumen o poklon te keren lafi ko javera čhibja, ama poviše bi mangava sine te prorokujnen. Soske, ako okova so isi le o poklon te kerel lafi ko javera čhibja na prevedinela adava so vakerela, o sobranie nane te izgradinel pe. Adaleske okova so prorokujnela tano pokorisno. 6 Phraljalen, ka pomožinel li tumenge ako avava ki tumende hem kerava lafi ko javera čhibja so na džanena len? Ka pomožinav tumenge samo ako vakerava tumenge bašo adava so o Devel otkringja mange, ako vakerava tumenge nešto so džanava preku čudo, ako prorokujnava ili ako sikavava tumen.

7 Agjaar tano isto e instrumentencar, sar soj i flejta ili i harfa. Ako o zvuko nane jasno, sar ka haljol pe so bašalela pe ki flejta ili ki harfa? 8 Soske, ako i truba na dela jasno zvuko, koj ka spreminel pe baši borba? 9 Agjaar tumen da, ako tumare čhibjaja na vakerena lafija so šaj lokheste te haljoven pe, sar o javera ka haljoven tumen? Tegani džabe kerena lafi. 10 Ko sveto isi but različna čhibja, ama sekoja čhib šaj te haljovel pe. 11 Soske, ako me na haljovava o lafija so vakerela len mange o manuš so kerela mancar lafi ki javer čhib, me leske ka ovav stranco hem ov ka ovel stranco mange. 12 Agjaar tumen da, adaleske so edvaj adžikerena te dobinen o poklonija so avena tari e Devleskiri sila,* roden te oven tumen poviše poklonija so ka izgradinen o sobranie.

13 Adaleske, okova so kerela lafi ki javer čhib neka molinel pe te šaj te prevedinel da adava so vakerela. 14 Soske, ako molinava man ki javer čhib adava kerava adaleske so dobingjum o poklon tari e Devleskiri sila,* ama mi godi na haljovela adava so vakerava. 15 Znači so valjani te kerav? Ka molinav man e poklonea so dobingjum le tari e Devleskiri sila,* ama isto agjaar ka molinav man te šaj te haljovav adava so vakerava. Ka giljavav gilja so falinena e Devle e poklonea so dobingjum le tari e Devleskiri sila,* ama isto agjaar ka giljavav gilja so falinena e Devle agjaar so ka koristinav lafija so haljovava. 16 Soske, ako falinea e Devle e poklonea so dobingjan le tari leskiri sila,* sar ka šaj okova soj tuja te vakerel „amin“ ki tli molitva so blagodarinea e Devleske, ako ov na džanela adava so vakerea? 17 Točno tano kaj tu ko šukar način blagodarinea e Devleske, ama e obično manuše nane le nisavi korist. 18 Blagodarinava e Devleske so isi man o poklon te kerav lafi ko poviše čhibja nego sarine tumen. 19 Ama ko sobranie pošukar ka vakerav pandž lafija so haljovena pe te šaj te sikavav e javeren, nego 10.000 lafija so na haljovena pe ki javer čhib.

20 Phraljalen, ma razmislinen sar tikne čhave, nego keda kerela pe lafi bašo lošnipe oven tikne čhave, a razmislinen sar zrela manuša. 21 Ko Zakoni pišinela: „’Ka kerav lafi akale narodoja ki e strancongiri čhib hem ka koristinav o lafija e jabandžiengere, ama ni tegani nane te mangen te šunen man‘, vakerela o Jehova“.* 22 O poklon te kerel pe lafi ko različna čhibja tano znako okolenge so nane vernikija, a na e vernikonge. A te prorokujnel pe tano znako e vernikonge, a na okolenge so nane vernikija. 23 Adaleske, ako celo sobranie khedela pe hem sarine počminena te keren lafi ko različna čhibja, a avena o obična manuša ili o manuša so nane vernikija, nane li te vakeren kaj tumen iklilen tari godi? 24 Ama, ako sarine tumen prorokujnena, hem avela jekh manuš so nane verniko ili jekh obično manuš, tumare lafija so šunela ka oven leske sar ukor hem ka čhiven le šukar te ispitinel korkori pes. 25 Tegani ov ka džanel adava soj garavdo ko leskoro vilo, pa ka perel ple mujea tele dži ki phuv hem ka obožavinel e Devle e lafencar: „Čače, o Devel tano maškar tumende“.

26 Znači phraljalen, so valjani te keren keda khedena tumen? Nekoj tumendar ka giljavel falba e Devleske, javer ka sikavel, a o javer ka vakerel adava so otkringja leske o Devel, nekoj ka kerel lafi ki javer čhib, a nekoj ka prevedinel adava soj vakerdo. Keren sa akava te šaj te izgradinen tumen jekh jekhea. 27 Ako nesave kerena lafi ko javera čhibja, adava neka oven najviše duj ili trin džene, hem ola valjani te keren lafi jekh palo jekh, a nekoj valjani te prevedinel adava so sine vakerdo. 28 Ama ako nane nekoj so prevedinela, tegani okola so kerena lafi ko javera čhibja neka čutinen ko sobranie hem neka keren lafi samo ki peste hem e Devlea. 29 Neka keren lafi duj ili trin prorokija, a o javera valjani te trudinen pe te haljoven so značinela adava so vakergje. 30 Keda sien khedime zaedno, ako o Devel otkrinela nešto nekaske so bešela adathe, neka kerel lafi ov. A okova so kerela sine lafi ko adava momenti neka čutinel. 31 Sarine tumen šaj te prorokujnen jekh palo jekh te šaj sarine te sikljoven hem te oven ohrabrime. 32 Okola so prorokujnena valjani te koristinen o poklon so dobingje tari e Devleskiri sila* ko ispravno način. 33 Soske, o Devel tano Devel so kerela mir, hem kerela o bukja ko način soj šukar organizirimo.

Sar so kerela pe ko sa o sobranija e sveta manušengere,* 34 o džuvlja neka čutinen ko sobranie, soske nane lenge dozvolimo te keren lafi. Neka oven podložna sar so vakerela o Zakoni da. 35 Ako mangena te sikljoven nešto, valjani te pučen pumare romen khere, soske ladžavo tano i džuvli te kerel lafi ko sobranie.

36 Zarem e Devleskoro lafi iklilo tumendar? Zarem samo tumen primingjen e Devleskoro lafi?

37 Ako nekoj mislinela kaj tano proroko ili kaj isi le o poklon so avela tari e Devleskiri sila,* ov mora te prifatinel kaj akava so pišinava tumenge tani zapoved taro Gospodari. 38 Ama ako nekoj na mangela te prifatinel akava, tegani ni o Devel nane te prifatinel le. 39 Adaleske phraljalen, trudinen tumen te prorokujnen, ama ma čhinaven nikas taro adava te kerel lafi ko javera čhibja. 40 A sa neka ovel pristojno hem sar soj o redo.

15 Phraljalen, mangava te setinkerav tumen ko šukar haberi so vakergjum tumenge. Tumen prifatingjen adava haberi hem cvrsto ikerena tumen ki leste. 2 Ako ponadari da cvrsto ikerena tumen ko šukar haberi, sien spasime. Ako na ikerena tumen, tegani džabe ulen vernikija.

3 Jekh taro najvažna bukja so sikliljum me hem so vakergjum tumenge tani akaja: o Hristos mulo bašo amare grevija, sar so pišinela ko Spisija; 4 sine parumo hem voskresningja ko trito dive, sar so pišinela ko Spisija; 5 hem pojavingja pe e Kifaske,* a palo adava e dešuduje apostolenge. 6 Palo adava pojavingja pe poviše taro 500 phralenge kola so sine khedime ko jekh than. Poviše džene lendar tane panda dživde, a nesave mule.* 7 Palo adava pojavingja pe e Jakoveske, pa posle sa e apostolenge. 8 A sar posledno pojavingja pe mange da, adaleske sium sar čhavo kova so predvreme bijandilo.

9 Soske, me sium najtikno taro apostolija hem na zaslužinava te ovav vikimo apostoli, soske progoninava sine e Devleskere sobranie. 10 Ama adaleske so o Devel sikavgja mange plo šukaripe so na zaslužinaja le, me sium apostoli. Hem na sine džabe adava so sikavgja mange plo šukaripe so na zaslužinaja le, soske me trudingjum man poviše taro sa o javera apostolija. Ama adava na kergjum le mle silaja, nego preku e Devleskoro šukaripe so na zaslužinaja le. 11 Adaleske, bizi razlika dali me ili o javera apostolija, sarine amen propovedinaja jekh haberi, hem tumen verujngjen ko adava haberi.

12 Ako o haberi so propovedinaja tano kaj o Hristos voskresningja taro mule, sar šaj tegani nesave tumendar te vakeren kaj nane voskresenie? 13 Soske, ako nane voskresenie, tegani ni o Hristos na voskresningja taro mule. 14 Ama, ako o Hristos na voskresningja, tegani amaro propovedibe tano džabe hem tumari vera tani džabe. 15 Osven adava, ako o mule čače nane te voskresninen, tegani bi ovaja sine svedokija kola so vakerena hovajba bašo Devel, soske vakeraja kaj o Devel voskresningja e Hristose, a ustvari na voskresningja le. 16 Soske, ako o mule nane te voskresninen, tegani ni o Hristos na voskresningja. 17 A ako o Hristos na voskresningja, tegani tumari vera tani džabe hem panda na sien oslobodime taro tumare grevija. 18 Tegani okola da so više mule* sar sledbenikija e Hristoseskere našavdile zasekogaš. 19 Ako amari nadež ko Hristos tani samo bašo akava životo, tegani taro sa o manuša amen siem najviše žalibaske.

20 Ama amen džanaja kaj o Hristos voskresningja taro mule. Ov tano o prvo so voskresningja* taro okola so mule.* 21 Adaleske so o meribe alo preku jekh manuš, o voskresenie da avela preku jekh manuš. 22 Soske, sar so preku o Adam sarine merena, agjaar preku o Hristos sarine ka dobinen životo. 23 Ama sekoj ko plo redo: prvo o Hristos,* a palo adava, džikote trajnela e Hristoseskiri prisutnost,* okola so pripadinena leske. 24 Palo adava, ko krajo, keda ka uništinel sekoja vlada, hem sekoja vlast hem sila, ov ka del o Carstvo ple Devleske hem Dadeske. 25 Soske, ov mora te vladinel sar cari sa džikote o Devel na čhivela sa leskere dušmanen telo leskere pre. 26 A sar posledno dušmani, o meribe ka ovel uništimo. 27 O Spisija vakerena kaj o Devel „čhivgja sa te ovel telo leskere pre“. Ama keda vakerela kaj ’sa tano čhivdo telo leskere pre‘, jasno tano kaj o Devel nane podložno leske, soske ov tano adava kova so čhivgja sa telo leskere pre. 28 A keda o Devel ka čhivel sa telo leskere pre, tegani o Čhavo da ka podložinel pe e Devleske, kova so čhivgja sa telo leskere pre, te šaj o Devel te ovel sarinenge sa.

29 A ako o mule čače nane te voskresninen, tegani so ka ovel okolencar so krstinena pe te šaj te meren? Soske ola krstinena pe te šaj te meren? 30 Hem soske amen stalno čhivaja amaro životo ki opasnost? 31 Čače vakerava tumenge, phraljalen, kaj sium sekova dive ki opasnost te merav, isto sar soj čače kaj dičinava man tumencar kola so sien učenikija e Hristos Isuseskere, amaro Gospodari. 32 Ako boringjum man zveroncar ko Efes, taro ista pričine sar so kerena o javera manuša, savi korist isi man taro adava? Ako o mule nane te voskresninen, tegani „te ha hem te pija, soske tajsa ka mera“. 33 Ma hovavgjoven! O lošno društvo ruminela o šukar navike. 34 Osvestinen tumen hem keren adava soj ispravno. Ma grešinen, soske nesave maškar tumende na pendžarena e Devle. Vakerava tumenge akava te šaj te ladžan.

35 Ama nekoj ka pučel: „Sar ka voskresninen o mule? Savo telo ka ovel len?“ 36 Glupavo manušea! Adava so sadinea valjani prvo te merel pa te šaj te bajrol.* 37 Hem keda sadinea, na sadinea rastenie* kova soj tano više baro, nego samo jekh tikno zrno, sar na primer, giv ili nesavo javer zrno. 38 A o Devel kerela sekova jekh te bajrol agjaar sar ov so mangela, hem sekova seme tano različno keda bajrola. 39 Nane sekova telo isto: javer tano o telo e manušeskoro, javer tano o telo e stokakoro, javer tano o telo e čiriklengoro hem javer tano o telo e mačhengoro. 40 Hem okolen soj ko nebo isi len telo, hem okolen soj ki phuv isi len telo. O šužipe okolengoro soj ko nebo tano pojaver taro šužipe okolengoro soj ki phuv. 41 O šužipe e khameskoro tano pojaver taro šužipe e mesečinakoro ili taro šužipe e zvezdengoro. Ustvari, o šužipe sekole zvezdakoro da tano pojaver.

42 Agjaar ka ovel okolencar so voskresninena taro mule. O telo so parunela pe* kirnjola, a o telo so voskresninela našti te kirnjol. 43 Parunela pe ki ladž, voskresninela ki čest. Parunela pe* sar slabo, voskresninela sar silno. 44 Parunela pe* telesno telo, a voskresninela duhovno telo. Ako isi telesno telo, tegani isi duhovno da. 45 Sar so pišinela ko Spisija: „O prvo manuš o Adam ulo dživdi duša“.* A o posledno Adam ulo duho* kova so dela životo. 46 Ama o duhovno telo na avela prvo. Prvo avela o telesno telo, a palo adava o duhovno. 47 O prvo manuš alo tari phuv hem sine kerdo taro pravo e phuvjakoro, a o dujto manuš alo taro nebo. 48 Okola soj tane kerde taro pravo e phuvjakoro, tane sar o prvo manuš kova so sine kerdo taro pravo e phuvjakoro. A okola soj ko nebo, tane sar okova so alo taro nebo. 49 Sar akana so siem slična okolea soj tano kerdo taro pravo e phuvjakoro, agjaar ka ova slična okolea soj ko nebo.

50 Ama, akava vakerava tumenge, phraljalen: o telo hem o rat našti te nasledinen e Devleskoro Carstvo, ni okova so kirnjola našti te nasledinel adava so našti kirnjola. 51 Akana ka vakerav tumenge jekh tajna e Devleskiri:* sarine nane te mera,* ama sarine ka menina amen, 52 ko jekh momenti, sar keda trepkinela pe jakhencar, džikote šunela pe i posledno truba. I truba ka šungjol hem o mule ka ušten e teloja kova so našti te kirnjol hem amen ka menina amen. 53 Akava telo so kirnjola ka meninel pe ko telo kova so našti te kirnjol, hem akava telo so merela ka meninel pe ko telo kova so našti nikogaš te merel. 54 Ama keda o telo so kirnjola ovela telo kova so našti te kirnjol hem keda o telo so merela ovela telo so našti nikogaš te merel, tegani ka ispolninel pe adava so pišinela ko Spisija: „O meribe tano uništimo zasekogaš“. 55 „Meribe, kaj tani tli pobeda? Meribe, kaj tano tlo otrov?“ 56 O otrov so mejrarela tano o grevo, a o grevo dobinela pli sila taro Zakoni. 57 Ama amen blagodarinaja e Devleske so dela amen i pobeda preku amaro Gospodari o Isus Hristos!

58 Adaleske, mangle phraljalen, oven cvrsta, stabilna hem sekogaš oven zafatime ki buti e Gospodareske, soske džanena kaj sa adava so kerena ki tumari služba e Gospodareske nane džabe.

16 A keda kerela pe lafi bašo khedibe o prilogija e phralenge,* tumen da valjani te keren agjaar sar so vakergjum e sobranienge ki Galatija. 2 Sekova prvo dive taro kurko, sekoj tumendar neka cidel nešto ki strana hem neka khedel kobor so šaj, te šaj ma te kheden pe o prilogija keda me ka avav. 3 A keda ka avav, ka bičhalav okolen, kolenge so tumen pišingjen ko tumare pismija kaj tane doverliva, te ingaren ko Erusalim adava so tumen dobrovolno khedingjen. 4 Ako bi ovela šukar me da te džav adari, tegani ola ka aven mancar.

5 A me ka avav ki tumende keda ka nakhav tari Makedonija, soske me sigurno ka nakhav tari Makedonija. 6 Hem šaj ka ačhovav ki tumende poviše vreme, šaj celo even. Palo adava, tumen šaj te aven mancar dži negde ko drumo, te šaj te ispratinen man adari kote so valjani te džav. 7 Soske, na mangava akava puti te dikhav tumen samo ko nakhibe, nego nadinava man kaj ka ačhovav nesavo vreme tumencar, ako o Jehova* dozvolinela. 8 A ko Efes ka ačhovav dži ko prazniko Pedesetnica,* 9 soske dengja pe mange bari prilika* službake, ama isi but protivnikija.

10 A ako avela o Timotej tumende, dodžakeren le šukar hem sorabotinen lea, te šaj te na ovel sekirimo bašo ništo džikote tano tumencar. Soske, ov da kerela pli zadača taro Jehova* sar me so kerava. 11 Adaleske, nikoj te na dikhel ki leste sar potele pestar. Keda ka avel ki mande ispratinen le te resel bezbedno, soske adžikerava le zaedno e phralencar.

12 A keda kerela pe lafi bašo amaro phral o Apolo, me but molingjum le te avel ki tumende e phralencar. Ov na planirinela sine te avel ki tumende akana, ama ka avel keda ka ovel le prilika.

13 Ačhoven džangavde, ačhoven cvrsta ki vera, ponadari da oven hrabra hem oven zorale. 14 Sa keren mangipaja.

15 Phraljalen, tumen džanena kaj o kherutne e Stefanaseskere sine o prva so ule vernikija ki Ahaja* hem kaj posvetingje pe te služinen okolenge soj sveta.* 16 Pottikninava tumen phraljalen, ponadari da te sorabotinen asavke manušencar hem sa okolencar kola so but trudinena pe hem služinena zaedno lencar. 17 But radujnava man so o Stefanas, o Fortunat hem o Ahaik tane akate mancar. Iako tumen na sien akate mancar, ola but pomožingje mange tumenge ko than. 18 Ola but ohrabringje man, ama hem tumende da. Adaleske, sikaven kaj ceninena asavke manušen.

19 Pozdravinena tumen o sobranija tari Azija. Sar učenikija e Gospodareskere, o Akila hem i Priska, zaedno e sobraniea so khedela pe ko lengoro kher, but pozdravinena tumen. 20 Pozdravinena tumen sa o phralja. Mangipaja resen tumen jekh jekhea.*

21 Me o Pavle, pišinava tumenge akava pozdrav mle vastea.

22 Ako nekoj na mangela e Gospodare, neka ovel dendo arman. Gospodare, molinaja tut, ava! 23 O šukaripe so na zaslužinaja le e Gospodareskoro, e Isuseskoro, neka ovel tumencar. 24 Mangava tumen sarinen so sien ko jekhipe e Hristos Isusea.