DUJTO PISMO DŽI KO KORINKJANJA

1 Me o Pavle, kova so sium apostoli e Hristos Isuseskoro, sprema e Devleskiri volja, a akate mancar tano hem amaro phral o Timotej, pišinava akava pismo dži ko e Devleskoro sobranie soj ko Korint hem dži ko sa o sveta manuša* soj ki celo Ahaja.

2 Neka ovel tumen o šukaripe so na zaslužinaja le hem o mir taro Devel, kova soj amaro Dad, hem taro Gospodari o Isus Hristos.

3 Neka ovel falimo o Devel hem o Dad amare Gospodareskoro e Isus Hristoseskoro, ov tano o Dad kova soj but milostivo hem o Devel sekole utehakoro, 4 kova so dela amen uteha ki sekoja amari nevolja, te šaj amen te utešina okolen soj tane ki bilo savi nevolja, e isto utehaja koja so dobinaja taro Devel. 5 Soske, sar so cidaja but muke bašo Hristos, agjaar preku o Hristos dobinaja but uteha. 6 Ako amen trpinaja nevolje, adava tano baši tumari uteha hem spasenie. Ako amen dobinaja uteha, adava tano baši tumari uteha, koja so pomožinela tumenge te trpinen o ista nevolje kola so trpinaja len amen da. 7 Amen siem cvrsto uverime kaj tumen ka ačhoven verna, soske džanaja kaj, isto sar amende so cidena muke, agjaar ka oven utešime da sar so siem utešime amen.

8 Adaleske phraljalen, amen mangaja te džanen baši nevolja so doživingjem ki Azija. Doborom sine amenge pharo so našti sine te izdržina amare silaja hem mislingjem kaj nane te ačhova dživde. 9 Ustvari, mislingjem kaj ka mera. Ama, taro adava so slučingja pe amenge siklilem te na ovel amen doverba ki amende, nego ko Devel, kova so voskresninela e mulen. 10 Ov spasingja amen tari asavki opasno situacija kolatar so šaj sine te mera. Hem amen isi amen doverba ki leste kaj ov ponadari da ka spasinel amen. 11 A tumen da isto agjaar šaj te pomožinen amenge, adalea so taro vilo ka molinen tumen amenge. Soske, ako but džene molinena e Devle baši amende, ov ka šunel len hem ka pomožinel amenge, hem bašo adava but džene ka blagodarinen e Devleske.

12 Amen dičinaja amen hem isi amen čisto sovest, soske ko sveto, a posebno keda siem sine maškar tumende, živingjem čisto hem iskreno, agjaar sar so sikavela amen o Devel. Hem na sine amen doverba ki manušikani mudrost, nego ko e Devleskoro šukaripe so na zaslužinaja le. 13 Soske, amen pišinaja tumenge samo bašo bukja kola so šaj te čitinen* hem te haljoven. Hem nadinaja amen kaj ponadari da ka haljoven len celosno,* 14 sar so nesave tumendar halile kaj amen siem sebepi tumen te falinen tumen, sar so sien tumen sebepi amen te falina amen ko dive keda ka avel amaro Gospodari o Isus.

15 Adaleske so sium uverimo ko akava, panda angleder planiringjum o dujto da puti te avav ki tumende, te šaj te radujnen tumen panda jekh puti. 16 Sine man namera, keda ka džav ki Makedonija te nakhav ki tumende, a palo adava, keda ka iranav man tari Makedonija, te avav palem ki tumende hem palo adava tumen te ispratinen man dži negde ko drumo keda ka džav ki Judeja. 17 Dali samo agjaar vakergjum bizo te ovel man namera te kerav adava? Ili, dali keda planirinava te kerav nešto, kerava sar so kerena o manuša, vakerava: „Oja“, a mislinava: „Na“? 18 Sar so šaj te ovel amen doverba ko Devel, agjaar šaj te ovel tumen doverba kaj adava so vakeraja tumenge nane „oja“, a mislinaja „na“. 19 Soske, e Devleskoro Čhavo, o Isus Hristos, baši koleste so me, isto agjaar o Silvan* hem o Timotej propovedingjem tumenge, na vakerela „oja“, a mislinela „na“, nego keda ov vakerela „oja“ adava sekogaš ka ovel „oja“. 20 Bizi razlika kobor vetuvanja isi taro Devel, ola ule „oja“ preku leste, adaleske da preku leste vakeraja „amin“ te šaj te slavina e Devle. 21 A o Devel tano adava kova so garantirinela kaj amen zaedno tumencar pripadinaja e Hristoseske hem ov tano adava so biringja* amen. 22 O Devel čhivgja plo pečati upri amende hem dengja amen pli sila* ko amare vile sar garancija bašo adava so valjani te avel.

23 Anglo Devel hava sovli ko mlo životo, kaj dži akana na aljum ko Korint samo adaleske so na mangljum te kerav te osetinen tumen panda pološno. 24 Me na vakerava kaj amen siem gospodarija upri tumari vera, nego kaj amen siem tumare sorabotnikija, te šaj tumen te oven radosna, soske tumen tergjovena cvrsto sebepi tumari vera.

2 Adaleske odlučingjum te na kerav tumen tažna keda palem ka avav ki tumende. 2 Ako me kerava tumen sarinen tažna, tegani koj ka radujnkerel man? Zarem okola so kergjum te oven tažna? 3 Adaleske pišingjum tumenge sa adala bukja, te šaj keda ka avav ki tumende, te na ovav tažno tumaro sebepi, nego te radujnav man. Uverimo sium kaj sa adava so kerela man radosno, kerela tumen da te oven radosna. 4 Adava bute asvencar pišingjum tumenge, soske sium sine but sekirimo hem sine man pharipa ko vilo. Ama na kergjum adava te šaj te kerav tumen tažna, nego te šaj te džanen kobor baro mangipe isi man sprema tumende.

5 Ako nekoj kergja man tažno, ov na kergja tažno samo man, nego dži negde - te na preterinav - sarinen tumen. 6 Poviše džene tumendar više ukoringje asavke manuše so grešingja, hem adava tano dovolno. 7 Akana, spremno prostinen leske hem utešinen le te šaj te na peravel le i but bari žal. 8 Adaleske, molinava tumen, sikaven leske kaj mangena le. 9 Adaleske da pišinava tumenge akava, te šaj te dikhav dali sien poslušna ko sa. 10 Kaske tumen ka prostinen, leske ka prostinav me da. A ako nekaske me nešto prostingjum, adava kergjum le anglo Hristos tumaro sebepi, 11 te šaj te na hovavel amen o Satana, soske amen but šukar džanaja leskere namere.*

12 Keda aljum ki Troada te propovedinav o šukar haberi bašo Hristos, phravdili mange bari prilika* te služinav e Gospodareske. 13 Ama sium sine but sekirimo, soske na arakhljum e Tite, me phrale. Adaleske pozdravingjum man e phralencar hem geljum ki Makedonija.

14 Ama, blagodarna siem e Devleske, kova so zaedno e Hristosea sekogaš vodinela amen sar vojnikija kola so iranena pe sar pobednikija tari vojna. Isto agjaar, ov kerela preku amende o manuša ko sa o thana te pendžaren le hem adava širinela pe sar jekh prijatno miris. 15 Soske, džikote propovedinaja bašo Hristos amen siem e Devleske prijatno miris, kova so osetinena le hem okola so ka oven spasime, hem okola so ka oven uništime. 16 Okolenge so ka oven uništime, akava tano miris e meribaskoro kova so ingarela ko meribe, a okolenge so ka oven spasime, akava tano miris e životoskoro kova so ingarela ko životo. A koj tano sposobno baši asavki služba? 17 Amen siem, soske na siem trgovcija kola so bikinena e Devleskoro lafi, sar so kerena but džene, nego amen keraja lafi taro iskrena motivija, sar manuša kola soj bičhalde taro Devel. Amen keraja adava anglo Devel hem ko jekhipe e Hristosea.

3 Valjani li amen palem te sikava tumenge koj siem? Dali valjani te dobinen pismija ki kolende so pišinela šukar baši amende, sar so dobingjen bašo nesave javera manuša? Ili dali valjanena amenge tumendar asavke pismija? 2 Tumen sien amaro pismo kova soj pišimo ko amare vile. Adava pismo džanena le hem čitinena le sa o manuša. 3 Soske, jasno tano kaj tumen sien o pismo taro Hristos kova so pišingjem le amen amare službaja, a kova so nane pišimo mastiloja, nego e dživde Devleskere silaja.* Hem nane pišimo ko ploče taro bar, nego ko ploče taro mas, ko vile.

4 Preku o Hristos, o Devel uveringja amen ko akava. 5 Na vakeraja kaj amen korkori siem sposobna bašo akava, nego amari sposobnost avela taro Devel, 6 kova so kergja amen sposobna te ova sluge bašo nevo sojuz.* Amen na siem sluge soj vodime taro pišimo zakoni, nego sluge soj vodime tari e Devleskiri sila.* Soske, o pišimo zakoni osudinela e manuše te merel, a e Devleskiri sila* dela le životo.

7 Ako o Zakoni kova so anela meribe hem kova so sine pišimo ko bar, sine dendo bare slavaja, so čak o Izraelcija našti sine te dikhen e Mojseeskoro muj adaleske so svetinela sine tari adaja slava, a adaja slava valjani sine te našavgjovel, 8 tegani na valjani li e Devleskiri sila* te del pe pobare slavaja? 9 Ako o Zakoni kova so anela osuda sine slavno, tegani kobor poslavno ka ovel adava so kerela pe te šaj te pomožinel pe e manušenge te oven pravedna. 10 Adava so nekogaš sine slavno, našavgja pli slava, soske adava so alo pali leste isi le panda pobari slava. 11 Soske, ako adava so valjani sine više te na važinel, alo slavaja, tegani okova so ačhola ka ovel le panda pobari slava.

12 Adaleske so isi amen asavki nadež, keraja slobodno lafi, 13 hem na keraja agjaar sar so kergja o Mojsej kova so učhargja plo muj šamijaja, te šaj o Izraelcija te na dikhen i slava e Zakoneskiri,* kova so valjani sine ki idnina više te na važinel. 14 Ama ola našti sine te haljoven. Hem dži avdive lengiri godi tani sar te phene učhardi šamijaja hem našti te haljoven keda čitinela pe o purano sojuz.* Adaja šamija šaj cidela pe samo preku o Hristos. 15 Isto agjaar, lengere vile tane ponadari da učharde e šamijaja, adaleske našti te haljoven adava so pišingja o Mojsej. 16 Ama keda nekoj počminela te služinel e Jehovaske,* cidela pe lestar i šamija. 17 O Jehova* tano Duho, hem kote tani e Jehovaskiri* sila,* adathe tani i sloboda. 18 Hem džikote tano amaro muj pučardo hem sar ajna sikavaja e Jehovaskiri* slava, sarine amen meninaja amen hem sa poviše hem poviše ličinaja sar leste. Adalea sikavaja sa pobari slava, agjaar sar so meninela amen o Jehova* kova soj tano Duho.

4 Amen isi amen akaja služba soske o Devel sikavgja amenge pli milost, hem adaleske na otkažinaja amen. 2 Namesto adava, amen mukhlem o bukja so kerena pe garavindor, kolendar so valjani te ladža, nikas na prevarinaja, hem ni na dodajnaja, a ni na ikalaja nešto taro e Devleskoro lafi. Nego adalea so vakeraja o čačipe, amen anglo Devel daja šukar primer sekole manušeske.* 3 A ako o šukar haberi so propovedinaja tano učhardo,* ov tano učhardo okolenge so ka oven uništime, 4 okolenge so na verujnena, soske o devel akale svetoskoro* korjargja lengere jakhja* te šaj te na resel dži lende i svetlina taro slavno šukar haberi bašo Hristos, soske o Hristos sikavela amenge savo tano o Devel. 5 Soske, amen na propovedinaja baši amende, nego propovedinaja kaj o Hristos Isus tano Gospodari. A baši amenge vakeraja kaj siem tumare robija sebepi o Isus. 6 Soske, o Devel vakergja: „Tari temnica neka svetinel svetlina“, hem o Devel svetinkergja amare vile ple svetlinaja. Adaja svetlina tani adava so pendžaraja e Devle preku o Hristos.*

7 Ama, adava barvalipe isi amen ko phuvjale čare, te šaj te dikhel pe kaj amari sila, koja so nakhavela i normalno sila, avela taro Devel, a na amendar. 8 O nevolje avena taro sa o strane, ama na siem čhivde ko tesno pa te našti ič te mrdina; na džanaja so te kera, ama na siem bizo nisavo izlez;* 9 progonime siem, ama na siem mukhle korkori; peravde siem tele, ama na siem uništime. 10 Kote hem te dža, amen sekogaš siem ki opasnost te mera sar o Isus. Agjaar sikavaja e manušenge kaj amen da cidaja muke sar so cidingja o Isus. 11 Soske, amen so siem dživde, sekogaš siem ki opasnost te mera adaleske so džaja palo Isus, te šaj te sikava e manušenge kaj amen da cidaja muke sar so cidingja o Isus. 12 Agjaar amen siem ki opasnost te mera, ama adava anela životo tumenge.

13 Adaleske so isi amen i isto vera sar okoleskiri baši kaske so pišinela ko Spisija: „Verujngjum, hem adaleske kergjum lafi“, amen da verujnaja hem adaleske keraja lafi, 14 soske džanaja kaj okova so voskresningja e Isuse ka voskresninel amen da sar so voskresningja e Isuse hem zaedno tumencar ka anel amen angli leste. 15 A sa akala bukja ovena bašo tumaro šukaripe, te šaj sa poviše manušenge o Devel te sikavel plo šukaripe so na zaslužinaja le, agjaar but poviše manuša ka blagodarinen e Devleske, a adava ka anel leske slava.

16 Adaleske na otkažinaja amen. Namesto adava, čak ako avrijaldan amaro telo raspadinela pe, andraldan amaro vilo obnovinela pe taro dive ko dive. 17 Soske, amari nevolja koja soj tani momentalno hem lokhi, anela amenge sa pobari slava so trajnela večno. 18 Soske, amen na dikhaja adava so dikhela pe, nego dikhaja adava so na dikhela pe. Soske, adava so dikhela pe tano privremeno, a adava so na dikhela pe tano večno.

5 Soske, džanaja kaj amaro kher ki phuv, akava šatori, ka raspadinel pe hem ka ovel amen gradba so avela taro Devel, jekh kher kova so nane kerdo taro manušikane vasta, kova so ka ačhol večno ko nebo. 2 Soske, ko akava kher, kova soj amaro telo, amen ofkinaja hem edvaj adžikeraja te khuva ko okova soj tano spremimo amenge ko nebo, 3 te šaj keda ka avel o vreme te khuva ko adava kher,* amen nane te ova bizo kher.* 4 Ustvari, amen so siem ko akava šatori ofkinaja taro pharipa, ama na adaleske so mangaja te mukha akava, nego adaleske so mangaja te khuva ko okova šatori, te šaj o životo so ka trajnel večno te gltinel akale telo so merela. 5 A bašo akava spremingja amen o Devel, kova so dengja amen pli sila* sar garancija bašo adava so ka avel.

6 Adaleske siem sekogaš celosno uverime hem džanaja kaj sa džikote amaro kher tano akava telo, amen siem dur taro Gospodari, 7 soske živinaja sprema i vera, a na sprema adava so dikhaja. 8 Ama celosno siem uverime hem poviše bi mangaja sine te na ova ko akava telo nego te živina kote so živinela o Gospodari. 9 Adaleske, bizi razlika dali živinaja kote so živinela ov ili siem dur lestar, amen trudinaja amen ov te prifatinel amen. 10 Soske, sarine amen mora te tergjova angli e Hristoseskiri sudsko stolica, te šaj sekoj te dobinel pli plata bašo adava so kergja ko manušikano telo, bizi razlika dali adava so kergja sine šukar ili lošno.

11 Znači, adaleske so džanaja kaj valjani te dara taro Gospodari, trudinaja amen te uverina e manušen te verujnen ko adava so vakeraja. O Devel džanela save siem, a nadinava man kaj tumen* da džanena save siem. 12 Amen na mangaja palem te sikava tumenge koj siem, nego mangaja te da tumen pričina te falinen tumen amencar, te šaj te ovel tumen so te vakeren okolenge so falinena pe adalea sar dikhjona avrijaldan, a na adalea so isi len ko vilo. 13 Soske, ako iklilem tari godi, adava sine sebepi o Devel, a ako siem ki godi, adava tano tumaro sebepi. 14 O mangipe e Hristoseskoro terinela amen, soske halilem akava: adaleske so više sarine sine mule, jekh manuš mulo sarinenge. 15 Ov mulo sarinenge, te šaj okola so živinena te na živinen više peske, nego leske, kova so mulo lenge hem sine voskresnimo.

16 Adaleske, otakana amen ko nisavo manuš na dikhaja sprema adava so dikhela pe jakhencar. Hem ako e Hristose da dikhaja sine ko asavko način angleder, akana više na dikhaja le agjaar. 17 Znači, ako nekoj tano ko jekhipe e Hristosea, ov tano nešto nevo so stvorinela o Devel. Adava soj purano nakhlja hem ake ulo nešto nevo. 18 Ama sa akava avela taro Devel, kova so kergja te smirina amen lea preku o Hristos hem dengja amen i služba te pomožina e javerenge ola da te smirinen pe lea. 19 Adava značinela kaj o Devel koristinela e Hristose te šaj te smirinel pe e svetoja hem više na dikhela ko lengere grevija. Hem ov dengja* amen o haberi te vakera e manušenge kaj šaj te smirinen pe e Devlea.

20 Znači, amen siem pretstavnikija kola so alem e Hristoseske ko than, hem agjaar sar ka phene o Devel preku amende molinela e manušen. Sar manuša so siem bičhalde e Hristoseske ko than, amen molinaja len: „Smirinen tumen e Devlea“. 21 O Hristos nikogaš na grešingja hem o Devel dengja le sar žrtva bašo amare grevija, te šaj preku leste te ova pravedna anglo e Devleskere jakhja.

6 Amen, sar e Devleskere sorabotnikija, isto agjaar, molinaja tumen te prifatinen e Devleskoro šukaripe so na zaslužinaja le hem te na bistren te ispolninen leskiri cel. 2 Soske, o Devel vakerela: „Keda alo o vreme te blagoslovinav tut, me šungjum tut hem keda alo o dive e spasibaske, me pomožingjum tut“. Ake, akana tano o vreme blagoslovibaske. Ake, akana tano o dive e spasibaske.

3 Ko nisavo način na daja nisavi pričina o javera te sopkinen pe, te šaj te na keren lošno lafi baši amari služba so keraja e Devleske, 4 nego ko sa sikavaja kaj siem e Devleskere sluge, agjaar so istrajnaja ko but iskušenija, ko nevolje, ko čorolipe, ko pharipa, 5 keda siem marde, keda siem phanle ko zatvor, keda grupa holjame manuša protivinena pe amenge, keda keraja naporno buti, keda našti te sova rakjate, keda siem bokhale. 6 Amen sikavaja kaj siem e Devleskere sluge, agjaar so živinaja ko čisto način, agjaar so postapinaja sprema adava so džanaja bašo Devel, agjaar so siem strpliva, agjaar so sikavaja šukaripe, agjaar so mukhaja e Devleskiri sila* te vodinel amen ko životo, agjaar so sikavaja iskreno mangipe, 7 agjaar so vakeraja o čačipe, agjaar so potprinaja amen ki e Devleskiri sila, agjaar so ko amaro desno hem ko amaro levo vas ikeraja o oružje kova so pomožinela amenge te kera adava soj ispravno.* 8 Amen sikavaja kaj siem e Devleskere sluge keda sikavena amenge čest hem keda ladžakerena amen, keda kritikujnena amen hem keda falinena amen. O javera dikhena amen sar manuša so prevarinena, ama amen vakeraja o čačipe, 9 dikhena amen sar nepoznata, ama o Devel pendžarela amen, dikhena amen sar manuša kola so zaslužinena te meren, ama ake amen živinaja, dikhena amen sar manuša soj kaznime, ama na siem mudarde. 10 O manuša mislinena kaj amen siem tažna, ama amen siem sekogaš radosna, mislinena kaj siem čorole, ama amen buten keraja te oven barvale, mislinena kaj nane amen ništo, ama isi amen sa.

11 Vakergjem tumenge sa otvoreno, phraljalen taro Korint, hem amen širingjem amaro vilo tumenge. 12 Ko amaro vilo isi than tumenge, ama amenge nane than ko tumaro vilo. 13 Vakerava tumenge sar te phene sien mle čhave: tumen da keren o isto amenge, širinen tumare vile.

14 Ma čhiven tumen ko jarem* kova so nane ednakvo okolencar so nane vernikija. Soske, so isi len zaedničko i pravednost hem o lošnipe? Ili so isi len zaedničko i svetlina hem i temnica? 15 Šaj li te soglasinen pe o Hristos hem o Beng?* Ili, so isi len zaedničko o verniko hem okova so nane verniko? 16 Hem so rodena o idolija e Devleske ko hrami? Soske, amen siem o hrami e dživde Devleskoro, sar so vakergja o Devel: „Ka živinav maškar lende hem ka ovav maškar lende, hem me ka ovav lengoro Devel, a ola ka oven mlo narodo“. 17 „’Adaleske, ikljoven lendar hem odvojnen tumen‘, vakerela o Jehova,* ’hem više ma pipinen ništo so nane čisto, hem me ka priminav tumen‘“. 18 „’Hem me ka ovav tumaro dad, a tumen ka oven mle čhave hem mle čhaja’, vakerela o Jehova,* o Semokjno.“

7 Znači, mle mangle, adaleske so isi amen akala vetuvanja, te čistina sekova melalipe taro amaro telo hem tari amari godi,* te šaj te ova panda poviše sveta džikote isi amen dar taro Devel.

2 Keren amenge than ko tumare vile. Amen nikaske na kergjem ništo lošno, nikaske na kergjem šteta, nikas na iskoristingjem. 3 Na vakerava akava te šaj te osudinav tumen. Soske, sar so više vakergjum, tumen sien amenge ko vilo, bizi razlika dali amen živinaja ili meraja. 4 Tumencar šaj but otvoreno te kerav lafi. But dičinava man tumencar. But sium utešimo, hem iako isi amen nevolje, previše sium radosno.

5 Čače, keda alem ki Makedonija ni hari na sine amenge polokho,* nego ponadari da taro sa o strane doživingjem nevolje - avrijaldan sine amen baro protivibe, a andraldan daraja sine. 6 Ama o Devel kova so utešinela okolen soj phage vileskere, utešingja amen adalea so o Tit alo ki amende. 7 Hem na utešingja amen samo adava so o Tit sine amencar, nego adava da so ov sine ohrabrimo tumendar. Soske, vakergja amenge kaj isi tumen bari želba te dikhen man, kaj but sien tažna, kaj iskreno sekirinena tumen mange, hem adava kergja te ovav panda poradosno.

8 Adaleske, ako kergjum tumen te oven tažna mle pismoja, nane mange žal. Ako ko početok sine mange da žal (keda dikhljum kaj mlo pismo kergja tumen te oven tažna, ama samo kratko vreme), 9 akana radujnava man, na adaleske so sien sine tažna, nego adaleske so tumari žal čhivgja tumen te kainen tumen. Soske, tumenge sine žal ko asavko način sar so mangela o Devel. Adaleske, adava so vakergjem tumenge na kergja tumenge nisavi šteta. 10 Amen sekogaš isi amen korist ako žalinaja ko asavko način sar so mangela o Devel. Asavko žalibe kerela te kaina amen hem agjaar te ova spasime. Ama ako žalinaja sar o manuša taro sveto, adava ka ingarel amen ko meribe. 11 Jasno tano kaj tumenge sine žal ko asavko način sar so mangela o Devel hem adaleske but trudingjen tumen te keren adava soj ispravno. Kergjen tumaro anav te ovel čisto, sine tumenge pharo bašo adava so grešingjen, darandilen taro Devel, sine tumen bari želba te kainen tumen, sikavgjen revnost hem isprajngjen adava soj pogrešno. Sa kergjen sar so valjani te šaj te rešinel pe akava problemi. 12 Keda pišingjum tumenge, na kergjum adava bašo okova so postapingja pogrešno, ni bašo okova koleske so sine kerdo lošnipe, nego pišingjum tumenge te šaj te dikhav dali čače ka sikaven anglo Devel kaj mangena te šunen amen. 13 Hem adava utešingja amen.

A osven adava, amen panda poviše radujngjem amen keda dikhlem kaj o Tit tano radosno, soske tumen ohrabringjen le.* 14 Me falingjum man tumendar e Titeske hem adalea na ladžakergjum man. Nego, sar soj čače sa adava so vakergjem tumenge, agjaar tano čače sa adava kolea so falingjem amen tumendar e Titeske. 15 Hem leskoro mangipe sprema tumende panda poviše bajrola keda setinela pe kobor sien sine poslušna sarine tumen hem sar sikavgjen leske hor poštovanje keda primingjen le. 16 Radujnava man, soske isi man celosno doverba ki tumende.*

8 Akana phraljalen, mangava te vakerav tumenge bašo adava so kergje o sobranija tari Makedonija adaleske so o Devel sikavgja lenge plo šukaripe so na zaslužinaja le. 2 Iako sine len but nevolje adaleske so doživingje bare iskušenija, ola sine but radosna hem adaleske, iako sine but čorole ola sikavgje bari darežlivost. 3 Ola dengje sa so šaj te den, čak poviše taro adava, me korkori sium svedoko bašo adava. 4 Soske, ola korkori uporno molingje amen te da len i prednost ola da te den plo darežlivo prilog hem ola da te učestvujnen ko khedibe pomoš bašo sveta manuša.* 5 Ola kergje poviše taro adava so amen nadingjem amen kaj ka keren, ama najangle ola celo vilea služingje e Gospodareske hem pomožingje amenge sprema e Devleskiri volja. 6 Adaleske zamolingjem e Tite te završinel e khedibaja taro tumaro darežlivo prilog kova so angleder počmingja te khedel le. 7 Tumen ko sa sien but šukar: tumari vera tani silno, sien sposobna te keren lafi, džanena but bukja, sien revna ko sa so kerena, tumen čače mangena e javeren sar amen so mangaja tumen. Adaleske, ponadari da oven spremna te den.

8 Na vakerava tumenge akava sar zapoved, nego mangava te oven svesna baši e javerengiri revnost hem isto agjaar te dikhav dali tumaro mangipe tano iskreno. 9 Soske, tumen pendžarena o šukaripe so na zaslužinaja le amare Gospodareskoro e Isus Hristoseskoro kova so iako sine barvalo, ulo čorolo tumaro sebepi, te šaj tumen te barvaljoven preku leskoro čorolipe.

10 A me mislinava kaj bašo tumaro šukaripe ka ovel te završinen akaja buti, koja so na samo so počmingjen la angleder jekh berš, nego hem sikavgjen kaj čače mangena te keren adava. 11 Adaleske akana, završinen adava so počmingjen. Sar so sien sine spremna te keren adava ko početok, agjaar akana završinen adalea so ka den adava so isi tumen. 12 Soske, ako nekoj dela taro vilo, adava tano prifatlivo e Devleske, soske ov sekastar očekujnela te del adava so isi le, a na adava so nane le. 13 Ama na mangava te kerav e javerenge te ovel lokho, a tumenge pharo. 14 Nego mangava adava so akana tumen isi tumen poviše, te učharel adava so olen nane len, te šaj keda olen ka ovel len poviše, te učharel adava so tumen nane te ovel tumen hem agjaar sarinen te ovel len ednakvo. 15 Sar so pišinela ko Spisija: „Kas sine but na sine le epten but, kas sine hari na sine le epten hari“.

16 Blagodarinaja e Devleske so o Tit da isto sekirinela pe tumenge sar amen so sekirinaja amen. 17 Soske, ov spremno prifatingja te kerel adava so zamolingjem le, ama adaleske soj but revno ov korkori pestar cidingja te avel ki tumende. 18 A zaedno lea bičhalaja e phrale kole so falinena le sa o sobranija bašo adava so kerela bašo šukar haberi. 19 Na samo adava, ov sine birimo taro sa o sobranija te avel amencar hem te pomožinel amenge te ingara o prilogija so sine khedime. Kerindor adava amen anaja slava e Gospodareske hem dokažinaja kaj siem spremna te pomožina e javerenge. 20 Agjaar nane te mukha than nekoj te kritikujnel amen bašo adava sar delinaja akava darežlivo prilog. 21 Soske, ’trudinaja amen te ova česna ko sa, na samo anglo Jehova* nego anglo manuša da‘.

22 Isto agjaar, lencar bičhalaja amare phrale koleskiri so revnost sine but puti ispitimi, ama akana ov tano panda porevnosno adaleske so isi le bari doverba ki tumende. 23 Ako nekoj pučela koj tano o Tit, šaj te vakeren kaj ov tano mlo amal hem sorabotniko kova so služinela bašo tumaro šukaripe. A ako nekoj pučela bašo amare phralja soj tane lea, vakeren kaj ola tane bičhalde* taro sobranija hem anena slava e Hristoseske. 24 Adaleske, sikaven akale phralenge kaj mangena len hem o sobranija neka dikhen kaj sine amen pravo so falingjem amen tumendar.

9 Me na valjani te pišinav tumenge te šaj te džanen kaj mora te pomožinen e sveta manušenge,* 2 soske džanava kaj sien spremna te pomožinen. Adaleske da falinava man tumencar anglo hristijanja tari Makedonija hem vakerava kaj o phralja ki Ahaja više celo berš tane spremna te pomožinen. Tumari revnost pottikningja buten lendar te keren o isto. 3 Sepak me bičhalava e phralen te šaj adava so falingjem amen tumencar bašo akava ma te ikljol kaj tano džabe, hem te šaj tumen čače te oven spremna, sar so me više vakergjum kaj ka oven. 4 Inače, ako o Makedoncija avena mancar hem arakhena tumen kaj na sien spremna, ka ova ladžake amen, a panda poviše tumen, adaleske so sine amen doverba ki tumende. 5 Adaleske, mislingjum kaj ka valjani te zamolinav e phralen te aven ki tumende angleder, te šaj te spreminen o darežlivo prilog so tumen više angleder dengjen lafi kaj ka den. Tegani keda amen ka resa, akava prilog ka ovel spremno hem ka sikavel kaj na dena le adaleske so amen teringjem tumen te keren agjaar, nego adaleske so sien darežliva.

6 Mangava te vakerav tumenge kaj, koj tano cecija džikote sejnela, hari ka khedel, a koj tano darežlivo džikote sejnela, but ka khedel. 7 Sekoj neka kerel sar so odlučingja ko plo vilo, na bizi volja, ni silaja, soske o Devel mangela adale so radosno dela.

8 Osven adava, o Devel šaj te sikavel tumenge panda poviše plo šukaripe so na zaslužinaja le te šaj nikogaš ma te falinel tumenge nešto hem čak te ovel tumen panda poviše taro adava so valjani tumenge te šaj te keren sekoja buti soj šukar. 9 (Sar so pišinela ko Spisija: „Ov darežlivo delinela, dela e čorolenge, leskiri pravednost ačhola zasekogaš“. 10 A o Devel, kova so dela but seme okoleske so sejnela hem maro e manušenge te han, ka del tumen seme te sejnen hem adava but, hem ka pomožinel tumenge te kheden but šukar plodija tari tumari pravednost.) 11 O Devel dela tumen blagoslovija ko sa te šaj darežlivo te den e javerenge ko razna načinija, agjaar o javera tari amari darežlivost ka oven pottiknime te blagodarinen e Devleske. 12 Soske, adaja služba kolaja so khedela pe pomoš e javerenge na valjani te pomožinel samo e sveta manušenge,* nego valjani isto agjaar te pottikninel bute manušen te falinen e Devle. 13 Adalea so dena akava prilog, tumen ka sikaven save manuša sien hem ola ka falinen e Devle adaleske so tumen postapinena sprema o šukar haberi so propovedinena le bašo Hristos hem adaleske so sien darežliva lencar hem sa e manušencar. 14 Ola taro vilo molinena pe tumenge hem mangena tumen adaleske so o Devel but sikavgja tumenge plo šukaripe so na zaslužinaja le.

15 Blagodarinaja e Devleske bašo leskoro poklon kova so našti lafencar te opišina le.

10 Me, o Pavle, molinava tumen te ikeren tumen ko bukja so vakerava tumenge. Keda kerava tumencar lafi me džava palo primer e Hristoseskoro kova soj tano krotko hem ljubezno. Ama nesave maškar tumende vakerena kaj keda sium tumencar me sium slabo, a keda pišinava tumenge me sium strogo. 2 Keda ka avav, nadinava man kaj meningje pe adala so mislinena kaj amen živinaja sar o manuša taro akava sveto, hem agjaar na ka valjani strogo te ukorinav len. 3 Soske, iako amen živinaja ko akava sveto, amen na vodinaja vojna agjaar sar so vodinena o manuša taro akava sveto. 4 Soske, o oružje baši amari vojna nane kerdo taro manuša, nego tano mokjno oružje so dengja amen o Devel te šaj te rušina o bukja soj tane cvrsta sar jekh kula. 5 Soske, rušinaja o razmisliba soj tane pogrešna hem sekoja prečka so čhinavela e manušen te pendžaren e Devle, zarobinaja sekoja misla te šaj te kera te ovel poslušno e Hristoseske; 6 hem spremna siem te kaznina sekole manuše so ko bilo savo način sikavela kaj nane poslušno, sa džikote na sikavena kaj sien poslušna e Hristoseske ko sa.

7 Tumen sudinena sprema adava so dikhjola. Ako nekoj tano uverimo kaj tano e Hristoseskoro učeniko, palem neka razmislinel bašo akava: sar ov soj tano e Hristoseskoro učeniko, agjaar siem amen da. 8 O Devel dengja amen avtoriteti te izgradina tumari vera, a na te rušina la. Hem čak ako me hari poviše falinava man bašo adava, nane te ladžav. 9 Vakerava tumenge akava, soske na mangava te mislinen kaj mle pismoncar mangava te daravav tumen. 10 Soske, nesave vakerena: „Leskere pismija isi len težina hem silna tane, ama keda tano akate amencar nane ništo posebno hem leskere lafija na vredinena ništo“. 11 Okola so vakerena akava, neka džanen kaj sar so pišingjem ko amare pismija, agjaar ka kera keda ka ava. 12 Amen ni na osudinaja amen te vakera kaj siem sar okola so falinena korkori pes, a ni na sporedinaja amen lencar. Ola proceninena korkori pes sprema adava so ola vakerena kaj tano šukar, agjaar sikavena kaj na haljovena ništo.

13 A amen, nane te falina amen e bukjencar so nane delo tari zadača so dobingjem. Namesto adava, ka falina amen e bukjencar so šaj sine te kera ki amari zadača so dengja amen o Devel. Hem tumen sien isto agjaar delo tari adaja zadača. 14 Čače, keda alem ki tumende, amen na kergjem ništo soj avrijal tari amari zadača. Soske, amen siem okola so prva resle ki tumende, te šaj te vakeren tumenge o šukar haberi bašo Hristos. 15 Amen na falinaja amen bašo bukja soj tane avrijal tari amari zadača. Ustvari, amen na falinaja amen e bukjencar so o javera trudingje pe te keren, nego nadinaja amen kaj sar so bajrovela tumari vera, i buti da so kergjem la ki amari zadača ponadari da ka bajrovel. Tegani amen ka šaj te kera panda poviše, 16 soske amen mangaja te propovedina o šukar haberi ko thana soj tane podur tumendar, te šaj ma te falina amen e bukjencar so više o javera kergje ki pumari zadača. 17 „A okova so falinela pe, neka falinel pe e Jehovaja.“* 18 Soske, koj falinela korkori pes, le o Devel na prifatinela, ama kas o Jehova* falinela, le prifatinela.

11 Bi mangava te trpinen man čak keda hari izgledinava nerazumno. Ustvari, tumen više trpinena man. 2 Soske, iskreno grižinava man tumenge sar so grižinela pe o Devel,* soske me lično vetingjum tumen te oven ko brako jekhe romea, e Hristosea, te šaj te anav tumen angli leste sar jekh čhaj. 3 Ama darava, agjaar sar o sap so lukavo prevaringja e Eva, nekoj te na ruminel tumare misle hem te cidel tumen taro adava te oven iskrena hem čista. A tumen sien dužna te oven asavke anglo Hristos. 4 Soske, keda nekoj avela ki tumende hem propovedinela pojavera bukja bašo Isus taro adava so amen propovedingjem tumenge, ili keda nekoj vlijajnela upri tumende te šaj te razmislinen ko pojaver način taro adava sar e Devleskiri sila* vlijajnela upri tumende, ili propovedinela pojaver šukar haberi taro adava so prifatingjen, tumen asavke lokheste trpinena. 5 Me mislinava kaj nane ništo so dokažinela kaj me sium potele taro tumare apostolija so kerena pe kaj tane but šukar. 6 Čak ako na kerava šukar lafi, me but šukar džanava bašo Devel. Ustvari, adava sikavgjem tumenge ko sekova način hem ko sa.

7 Ili kergjum grevo adalea so dobrovolno, bizo te platinel pe mange, propovedingjum tumenge o šukar haberi bašo Devel hem ponižingjum man te šaj tumen te dobinen čest? 8 Me primingjum pomoš taro javera sobranija hem adava tano sar te phene čorgjum lendar te šaj te služinav tumenge. 9 Keda sium sine tumende hem keda na sine man ništo, na uljum nikaske tumendar ko teret, adaleske so o phralja so ale tari Makedonija pomožingje mange te ovel man sa adava so valjangja mange. Čače, but pazingjum te na ovav tumenge ko teret hem ponadari da pazinava ko adava. 10 Sa džikote sium sledbeniko e Hristoseskoro, ništo nane te čhinavel man te falinav man bašo akava ki celo Ahaja. 11 Ama, soske na dozvolingjum te ovav tumenge ko teret? Dali adaleske so na mangava tumen? O Devel džanela kaj mangava tumen.

12 Adaleske me ponadari da ka kerav adava so sekogaš kerava le sine, te šaj te na dav len nisavi pričina te falinen pe okola so vakerena kaj tane apostolija isto sar amende. 13 Soske, asavke manuša tane hovavne apostolija, kola so prevarinena e javeren hem kerena pe kaj tane e Hristoseskere apostolija. 14 A nane ni čudno, soske korkori o Satana da kerela pe kaj tano šukar angeli.* 15 Adaleske na čudinela amen ako leskere sluge isto agjaar kerena pe kaj tane sluge bašo adava soj pravedno. Ama o krajo lengoro ka ovel sprema lengere postapke.

16 Palem vakerava tumenge: nijekh ma te mislinel kaj na sium razumno. Ama čak ako nekoj mislinela kaj na sium razumno, prifatinen man sar asavko, te šaj me da hari te falinav man. 17 Akana kerava lafi, na sar so bi kerela o Gospodari lafi, nego falinava man sar so bi falinela pe jekh nerazumno manuš. 18 Adaleske so but džene falinena pe e bukjencar taro akava sveto, me da ka falinav man. 19 Tumen sien doborom „razumna“ so na smetinela tumen te trpinen e nerazumna manušen. 20 Ustvari, trpinena sekas so kerela tumen robija, sekas so hala adava so isi tumen, sekas so lela adava so isi tumen, sekas so vazdela pes upreder tumende, sekas so khuvela tumen ko muj.

21 Akava so vakerava anela amenge ladž, ama kerava akava soske tumen mislinena kaj amen siem slaba.

Ama ako nekoj na ladžala te falinel pe, tegani me da nane te ladžav te falinav man, čak ako adava dikhjola tumenge sar te phene sium nerazumno. 22 Ola Evreija li tane? Me da sium. Ola Izraelcija li tane? Me da sium. Ola e Avraameskoro potomstvo li tane? Me da sium. 23 E Hristoseskere sluge li tane? Sar delino odgovorinava: me sium panda pobaro sluga. Me kergjum but poviše, poviše puti sium sine phanlo ko zatvor, poviše puti sium sine but mardo, but puti sium sine ki opasnost te merav. 24 Taro Evreija dobingjum pandž puti po 39 udarija, 25 trin puti margje man kaštencar, jekh puti frdingje mange barencar, trin puti o brodija kolencar so patujnava sine phagile, celo rat hem celo dive sium sine maškar o more, 26 but puti patujnava sine, sium sine ki opasnost taro reke, sium sine ki opasnost taro čora, ki opasnost taro mlo narodo, ki opasnost taro javera narodija, ki opasnost ki diz, ki opasnost ki pustina, ki opasnost ko more, ki opasnost maškar o hovavne phralja, 27 kerava sine phari hem naporno buti, but rakja na sukjum, sium sine bokhalo hem žedno, but puti na hava sine, sium sine ko šudro hem na sine man dovolno šeja.*

28 Osven sa akala nevolje, sekova dive sium sekirimo bašo sa o sobranija. 29 Keda nekoj tano slabo, man dukhala man bašo adava. Keda nekoj perela tari vera, me osetinava bari holi.

30 Ako mora te falinav man, ka falinav man e bukjencar so sikavena kaj sium slabo. 31 O Devel hem o Dad amare Gospodareskoro e Isuseskoro, okole so valjani te falina le zasekogaš, džanela kaj na hovavava. 32 Ko Damask o upraviteli, so služinela sine e careske Areta, čhivgja straža ko porte tari diz te šaj te astarel man, 33 ama čhivgje man ki jekh korpa* hem laja mukhle man natele tari jekh pendžerka so sine ko e dizjakoro zido, hem agjaar našljum taro leskere vasta.

12 Me mora te falinav man, iako taro adava nane nisavi korist, ama ka kerav lafi bašo vizie hem bašo bukja so o Gospodari otkringja len mange. 2 Džanava jekhe manuše soj tano učeniko e Hristoseskoro, kova so angleder 14 berš sine ingardo ko trito nebo - dali akava manuš sine ko plo fizičko telo ili na, na džanava, o Devel džanela. 3 Oja, džanava kaj akava manuš - dali ov sine ko plo fizičko telo ili na, na džanava, o Devel džanela - 4 sine ingardo ko raj hem šungja lafija kola so na smejnena te vakeren pe, lafija kola so e manušeske nane dozvolimo te vakerel len. 5 Ka falinav man asavke manušea, a nane te falinav man korkori mancar, osven adalea kobor sium slabo. 6 Čak te mangav da te falinav man, na bi ovava nerazumno, soske bi vakerava o čačipe. Ama, nane te falinav man, te šaj nijekh te na mislinel kaj kergjum nešto poviše taro adava so dikhela man kaj kerava hem šunela man so vakerava, 7 samo adaleske so sine mange otkrime but bare bukja.

Adaleske, te šaj te na vazdav man, dendo mange karo ko telo, jekh angeli e Satanaskoro, te khuvel man te šaj te na ovav gordo. 8 Trin puti molingjum e Gospodare te cidel mandar adava karo. 9 Ama ov vakergja mange: „Dovolno tano so sikavava tuke mlo šukaripe so na zaslužinea le, soske mli sila sikavela pe celosno keda sian slabo“. Adaleske, radosno ka falinav man e bukjencar kola so sikavena kaj sium slabo, te šaj e Hristoseskiri sila te ačhol upri mande sar šatori. 10 Adaleske uživinava ko slabostija, ko vredžiba, ko čorolipa, ko progonstvija hem ko pharipa bašo Hristos. Soske, keda sium slabo, tegani sium silno.

11 Tumaro sebepi me kerava lafi sar manuš so nane razumno. Ama, ako tumen kerena sine šukar lafi baši mande, me nane sine te kerav lafi ko asavko način. Iako sium ništo anglo tumende, me ko ništo na sium potele taro tumare but šukar apostolija. 12 Ustvari, me sium sine but istrajno džikote sikavgjum tumenge o dokazija kaj sium apostoli hem kergjum znakija, čudija hem bare bukja. 13 Me na sium sine tumenge ko teret hem samo ko adava tumen sien sine pojaver taro javera sobranija. Ako adalea grešingjum, tegani prostinen mange.

14 Ake, akava tano o trito puti sar sium spremno te avav ki tumende, hem akava da puti nane te ovav tumenge ko teret. Soske, na mangava te lav tumendar adava so isi tumen, nego mangava te dikhav tumen. Adaleske so na očekujnela pe taro čhave te kheden imot e roditelenge, nego o roditelija e čhavenge. 15 A me ka ovav radosno te dav tumenge sa so isi man, isto agjaar mlo životo da. Ako me doborom mangava tumen, zarem zaslužinava tumen te mangen man pohari taro adava? 16 Hem iako me na sium sine tumenge ko teret, sepak tumen vakerena kaj sium sine „lukavo“ hem kaj „prevaringjum tumen“. 17 Zarem iskoristingjum tumen preku okola so bičhalgjum len tumenge? 18 Zamolingjum e Tite te avel ki tumende hem bičhalgjum jekhe phrale lea. Zarem o Tit ko nesavo način iskoristingja tumen? Zarem amen na razmislingjem ko isto način? Zarem na postapingjem ko isto način?

19 Tumen šaj celo akava vreme mislinena tumenge kaj amen braninaja amen angli tumende. Ama adava nane agjaar, namesto adava amen sar sledbenikija e Hristoseskere vakeraja o čačipe anglo Devel. Mangle phraljalen hem phenjalen, sa adava so keraja tano te šaj te izgradina tumen. 20 Soske, darava kaj keda ka avav ki tumende šaj tumen nane te oven agjaar sar me so bi mangava sine te oven. Hem kaj me da nane te ovav tumencar agjaar sar so bi mangena sine te ovav. Nego šaj maškar tumende ka akošen tumen, ka oven ljubomorna, ka izbuvninen tari holi, ka rasprajnen tumen, ka keren lošno lafi e javerendar, ka ogovorinen, ka oven čalmdžie hem nane te ovel tumen nisavo redo. 21 Šaj keda palem ka avav ki tumende, mlo Devel ka ladžakerel man angli tumende hem šaj ka tugujnav palo but džene kola so grešingje, ama na kaingje pe bašo melalipe hem o nemoral* so kergje hem bašo bezobrazno ponašibe.*

13 Akava tano o trito puti sar avava ki tumende. „Sekoja buti mora te ovel potvrdimi duje ili trine svedokoncar.“ 2 Akana na sium tumencar, ama adava so vakerava tumenge prifatinen le sar te phene dujto puti sium tumencar, hem palem predupredinava okolen so angleder grešingje hem sa e javeren, kaj ako palem avava, nane te sikavav milost okolenge so kerena adava soj pogrešno. 3 Agjaar ka dokažinav tumenge kaj o Hristos kerela lafi preku mande. Hem o Hristos nane slabo sprema tumende, nego ov sikavela pli bari mokj. 4 Čače, ov sine kovimo ko stubo sar jekh slabo manuš, ama dživdo tano sebepi e Devleskiri sila. Agjaar, amen da siem slaba sar so sine slabo ov, ama ka živina zaedno lea sebepi e Devleskiri sila koja so vlijajnela upri tumende.

5 Ponadari da ispitinen tumen te šaj te dikhen dali cvrsto ikerena tumen ki vera, ponadari da proverinen save manuša sien. Zarem na haljovena kaj o Isus Hristos tano ko jekhipe tumencar? Bi valjani sine te haljoven akava, osven ako o Devel više na prifatinela tumen. 6 Čače nadinava man kaj tumen ka haljoven kaj o Devel prifatinela amen.

7 Molinaja e Devle te na keren nisavo lošnipe. Na keraja akava te šaj o javera te dikhen kaj o Devel prifatinela amen, nego te šaj te keren adava soj šukar, čak ako o javera mislinena kaj o Devel na prifatinela amen. 8 Soske, našti te kera ništo protiv o čačipe, nego šaj samo te poddržina o čačipe. 9 Amen radujnaja amen keda amen siem slaba, a tumen jaka. Hem adaleske da molinaja amen, tumen te keren o potrebna promene. 10 Adaleske pišinava tumenge akala bukja džikote na sium tumencar, te šaj keda ka ovav tumencar ma te ovav strogo, soske o Gospodari dengja man vlast te gradinav, a na te rušinav.

11 Ko krajo phraljalen, ponadari da oven radosna, keren o potrebna promene, prifatinen uteha e javerendar, oven složna ko misle, živinen ko mir hem o Devel e mangipaskoro kova so dela mir ka ovel tumencar. 12 Mangipaja resen tumen jekh jekhea.* 13 Sa o sveta manuša* pozdravinena tumen.

14 O šukaripe so na zaslužinaja le e Gospodareskoro e Isus Hristoseskoro, e Devleskoro mangipe hem e Devleskiri sila* so sine dendi sarinenge amenge, neka oven sarinencar tumencar.