PISMO DŽI KO GALATJANJA

1 Me o Pavle, apostoli kova so na sium bičhaldo taro manuša, ni sium čhivdo taro nesavo manuš sar apostoli, nego taro Isus Hristos hem taro Devel, amaro Dad, kova so vazdingja e Isuse taro mule, 2 hem sa o phralja soj mancar, bičhalaja pozdravija dži ko sobranija ki Galatija:

3 Neka ovel tumen o šukaripe so na zaslužinaja le hem o mir taro Devel, kova soj amaro Dad, hem taro Gospodari o Isus Hristos. 4 O Hristos dengja plo životo bašo amare grevija te šaj te oslobodinel amen taro avdisutno lošno sveto.* Ov kergja adava, soske adaja sine i volja amare Devleskiri hem Dadeskiri, 5 kole so valjani te slavina le zasekogaš. Amin.

6 Čudinava man so doborom sigate iranena dumo e Devleske kova so vikingja tumen preku e Hristoseskoro šukaripe so na zaslužinaja le, hem prifatinena javer haberi sar te phene adava tano o šukar haberi. 7 Ama javer šukar haberi na postojnela. Postojnena samo nesave so buninena tumen hem so mangena te meninen o šukar haberi bašo Hristos. 8 Ama, čak amen ili nesavo angeli taro nebo ako vakeraja tumenge nešto pojaver taro šukar haberi so više vakergjem tumenge, te ova dende arman! 9 Sar so više vakergjem, hem akana palem vakerava adava: te ovel dendo arman sekova jekh so ka vakerel tumenge nešto pojaver taro šukar haberi kova so više prifatingjen!

10 Dali trudinava man te ugodinav e manušenge, ili trudinava man te ugodinav e Devleske? Ako trudinava man te ugodinav e manušenge, tegani me na sium e Hristoseskoro robo. 11 Soske, mangava te džanen, phraljalen, kaj o šukar haberi so vakergjum tumenge na avela taro manuša, 12 soske ni na primingjum le taro manuš, ni na sikavgja man nekoj baši leste, nego o Isus Hristos otkringja le mange.

13 Sigurno šungjen sar živinava sine keda sium sine ko judaizam,* kaj but progoninava sine e Devleskoro sobranie, soske mangava sine te uništinav le. 14 Hem napredujnava sine ko judaizam poviše taro but mle vrsnikija ko mlo narodo, soske sium sine but porevnosno taro javera bašo mle parapapongere tradicie. 15 Ama keda o Devel, kova so kergja te bijangjovav* hem kova so sikavgja mange plo šukaripe so na zaslužinaja le agjaar so vikingja man, odlučingja 16 te otkrinel ple Čhave preku mande, agjaar so ka vakerav o šukar haberi baši leste e manušenge taro javera narodija, me na geljum odma te rodav sovet nesave manušestar,* 17 ni na geljum ko Erusalim ko adala so sine apostolija angleder mande, nego geljum ki Arabija, hem palo adava irangjum man ko Damask.

18 Tegani palo trin berš geljum ko Erusalim te dikhav e Kifa,* hem ačhiljum lea 15 dive. 19 Ama na dikhljum nikas taro javera apostolija osven e Jakove, e Gospodareskere phrale. 20 A bašo bukja kolenge so pišinava tumenge, anglo Devel vakerava tumenge kaj na hovavava.

21 Palo adava, geljum ko nesave thana tari Sirija hem tari Kilikija. 22 Ama e Hristoseskere sledbenikija ko sobranija tari Judeja nikogaš na dikhle man. 23 Ola samo šungje taro javera: „O manuš so angleder progoninela amen sine, akana vakerela o šukar haberi baši vera koja so mangela sine te uništinel la“. 24 Bašo adava so slučingja pe mange, ola počmingje te slavinen e Devle.

2 Tegani palo 14 berš, me palem geljum ko Erusalim zaedno e Varnavaja, hem isto agjaar leljum mancar e Tite da. 2 Geljum soske o Gospodari otkringja mange kaj valjani te džav adari, hem e phralenge kola soj but poštujme ko sobranie vakergjum o šukar haberi so vakerava le e manušenge taro javera narodija. Adava kergjum le keda sium sine korkori adale phralencar, soske mangljum te džanav dali adava so kergjum bašo Devel tano šukar ili na. Soske, ako nane šukar, tegani sa adava so kergjum sine džabe.* 3 Ama čak ni o Tit, so sine mancar, iako tano Grko, na sine čhivdo silaja te kerel pe suneti. 4 Akava problemi iklilo sebepi o hovavne phralja kola so počorane khuvgje ko sobranie hem mangle te ruminen amari sloboda so isi amen sar učenikija e Hristos Isuseskere. Ola mangle te čhiven amen palem te ova robija e Zakoneskere. 5 Ama amen na šungjem len ič, ni najhari, te šaj tumen te ačhoven cvrsta ko čačipe taro šukar haberi.

6 Ama okola, kolende so dikhela pe sine sar važna manuša - iako mange tano sa jekh save sine ola, soske o Devel na dikhela koj tano koj - adala but poštujme manuša na dengje man nisavo nevo upatstvo. 7 Namesto adava, keda ola dikhle kaj sine mange dendo* o šukar haberi te vakerav le e manušenge so nane kerde suneti, isto sar e Petareske so sine dendo* o šukar haberi te vakerel le okolenge soj kerde suneti, 8 (soske o Devel kova so dengja vlast e Petare te ovel apostoli okolenge soj kerde suneti, dengja mange da vlast te ovav apostoli e manušenge taro javera narodija) 9 hem keda halile kaj o Devel sikavgja mange plo šukaripe so na zaslužinaja le, tegani o Jakov, o Kifa* hem o Jovan, kola so sine sar stubija ko sobranie, dengje e Varnavaske hem mange plo desno vas sar znako kaj soglasinena pe amen te dža ko manuša taro javera narodija, a ola te džan ko okola soj kerde suneti. 10 Zamolingje amen samo te na bistra e čorole phralen, hem adava čače but trudingjum man te kerav.

11 Ama keda o Kifa alo ki Antiohija, me angli jakh vakergjum leske kaj kergja nešto so sine pogrešno. 12 Soske, angleder te aven nesave manuša so sine paše e Jakovea, ov hala sine okolencar so sine taro javera narodija, ama keda resle akala manuša, ov cidingja pe hem čhinavgja te družinel pe e manušencar taro javera narodija, soske darala sine taro okola so sine kerde suneti. 13 Hem o javera da Evreija počmingje te oven licemerna sar leste, so čak o Varnava da počmingja sar lende te ovel licemerno. 14 Ama keda dikhljum kaj na postapinena* sprema o čačipe taro šukar haberi, vakergjum e Kifaske angli sarinende: „Ako tu, kova so sian Evrei, živinea sar o manuša taro javera narodija, a na sar Evrei, tegani soske mangea te čhive e manušen taro javera narodija te živinen sprema o evrejska običaija?“

15 Amen so siem bijame sar Evreija, a na sar o manuša taro javera narodija kola so grešinena, 16 džanaja kaj o Devel vakerela jekhe manušeske kaj tano pravedno na adaleske so ikerela o zapovedija taro Zakoni, nego samo adaleske so sikavela vera ko Isus Hristos. Amen sikavgjem vera ko Hristos Isus te šaj o Devel amenge te vakerel kaj siem pravedna adaleske so isi amen vera ko Hristos, a na adaleske so ikeraja o zapovedija taro Zakoni. Soske, o Devel nikaske nane te vakerel kaj tano pravedno adaleske so ikerela o zapovedija taro Zakoni. 17 Akana ako amen da, iako trudinaja amen o Devel te vakerel amenge kaj siem pravedna preku o Hristos, sepak ikljovaja sar grešnikija, dali adava značinela kaj o Hristos pottikninela amen te grešina? Sigurno na! 18 Soske, ako gradinava palem adava so rušingjum, sikavava kaj sium manuš so phagela o Zakoni. 19 Adaleske so ikerava man sine ko Zakoni, me sium mulo e Zakoneske, te šaj te živinav e Devleske. 20 Me sium kovimo ko stubo e Hristosea. Na živinava više mange, nego živinava životo soj ko jekhipe e Hristosea.* Adaleske, o životo so živinava le akana ko akava telo, živinava le sprema i vera so isi man ko e Devleskoro Čhavo kova so manglja man hem dengja plo životo mange. 21 Me na otfrlinava e Devleskoro šukaripe so na zaslužinaja le, soske ako jekh manuš ovela pravedno adaleske so ikerela pe ko Zakoni, tegani o Hristos džabe mulo.

3 Ah, tumen sien Galatjanja so na haljovena! Koj tano adava so hovavgja tumen? Tumenge angleder sine šukar objasnimo soske o Isus Hristos sine kovimo ko stubo. 2 Mangava te pučav tumen samo akava: dali primingjen e Devleskiri sila* adaleske so ikergjen o zapovedija taro Zakoni ili adaleske so verujngjen ko šukar haberi so šungjen? 3 Doborom li na haljovena? Ko početok dozvolingjen te vodinel tumen e Devleskiri sila,* ama akana zarem trudinena tumen te ispolninen tumari cel, agjaar so mukhena te vodinel tumen o manušikano razmislibe? 4 Zarem džabe trpingjen doborom but muke? Sigurno sium kaj na sine džabe. 5 Znači, dali okova preku koleste so dobingjen e Devleskiri sila* hem so kerela čudija maškar tumende, kerela adava adaleske so ikerena o zapovedija taro Zakoni ili adaleske so sikavgjen vera ko šukar haberi so šungjen? 6 Agjaar sine e Avraamea da „adaleske so sine le vera ko Jehova,* ov dikhela le sine sar pravedno“.

7 Sigurno džanena kaj okolen so isi len vera tane e Avraameskere čhave. 8 A angleder but vreme o Devel ko Spisija vakergja kaj ov ka vakerel e manušenge taro javera narodija kaj tane pravedna adaleske so isi len vera. Ov angleder vakergja e Avraameske akava šukar haberi: „Preku tute ka oven blagoslovime sa o narodija“. 9 Adaleske, okolen so isi len vera, tane blagoslovime isto sar o Avraam kole so sine le vera.

10 Sarine okola so isi len doverba samo ko zapovedija taro Zakoni, tane dende arman, soske pišimo tano: „Dendo tano arman sekoj so na ikerela pe ko sa o bukja soj tane pišime ko lil* e Zakoneskoro hem na kerela adava“. 11 Osven adava šaj jasno te dikha kaj o Devel nikaske na vakerela kaj tano pravedno adaleske so ikerela pe ko Zakoni, soske „o pravedniko ka živinel adaleske so isi le vera“. 12 A o temeli e Zakoneskoro nane i vera, nego „koj ka ikerel pe ko adava so pišinela ko Zakoni, ka živinel“. 13 O Hristos kingja amen hem agjaar oslobodingja amen tari e Zakoneskiri arman, adalea so ov lelja i arman upri peste amenge ko than, soske pišimo tano: „Dendo tano arman sekova jekh soj kovimo* ko stubo“. 14 Adava slučingja pe te šaj o blagoslov so sine vetimo e Avraameske te avel preku o Hristos Isus e manušenge taro javera narodija, te šaj preku amari vera te dobina i sila* so o Devel vetingja kaj ka del la amenge.

15 Phraljalen, ka vakerav tumenge jekh primer: keda kerela pe jekh sojuz,* čak ako tano kerdo samo taro manuša, nikoj našti te vakerel kaj adava sojuz na važinela, ni našti te dodajnel leske nešto. 16 A o vetuvanja sine dende e Avraameske hem leskere potomstvoske.* Na pišinela: „Hem tle potomconge“, sar te phene tane poviše džene. Namesto adava, pišinela: „Hem tle potomstvoske“,* soske mislinela pe samo jekhe potomcoske, a adava tano o Hristos. 17 Hem vakerava akava da: o Devel prvo kergja o sojuz, hem palo 430 berš ov dengja o Zakoni. Ama adalea ov na čhinavgja o sojuz hem o vetuvanje so dengja le. 18 Soske, ako o nasledstvo dobinela pe preku o Zakoni, tegani ov na dobinela pe više preku o vetuvanje. Ama o Devel celo vilea dengja e Avraameske o nasledstvo preku o vetuvanje.

19 Tegani, soske sine dendo o Zakoni? Ov sine pokasno dendo te šaj te dikhjon o greške, džikote na avela o potomstvo* kaske so sine dendo o vetuvanje. O Devel dengja e angelenge te objavinen o Zakoni preku jekh posredniko.* 20 Ama na valjani posredniko keda isi samo jekh strana, a adaja strana sine o Devel keda dengja o vetuvanje. 21 Dali tegani o Zakoni tano protiv e Devleskere vetuvanja? Sigurno na! Soske, ako o manuša dobinena sine zakoni kova so šaj te del životo, tegani ola ka šaj sine te oven pravedna preku o zakoni. 22 Ama o Spisija sikavgje kaj o manuša sine čhivde teli vlast e grevoske, te šaj o vetuvanje so dobinela pe tari vera ko Isus Hristos, te ovel dendo okolenge so sikavena kaj verujnena ki leste.

23 Ama angleder te ovel amen vera ko Hristos, o Zakoni arakhela amen sine, siem sine čhivde teli leskiri vlast hem adžikeraja sine keda o Devel ka otkrinel amenge kaj valjani te verujna ko Hristos. 24 Agjaar, o Zakoni sine amenge vospituvači* kova so ingargja amen dži ko Hristos, te šaj o Devel te vakerel kaj siem pravedna adaleske so isi amen vera. 25 Hem akana keda isi amen vera ko Hristos, na valjani amenge više vospituvači.

26 Čače, tumen sarine sien e Devleskere čhave adaleske so verujnena ko Hristos Isus. 27 Soske, sarine tumen so krstingjen tumen hem akana sien ko jekhipe e Hristosea, gelen palo primer e Hristoseskoro.* 28 Više nane ni Evrei ni Grko, više nane ni robo ni slobodno manuš, više nane ni murš ni džuvli, soske sarine sien jekh ko jekhipe e Hristos Isusea. 29 Ako sien e Hristoseskere, tegani tumen sien e Avraameskoro potomstvo* hem tumen ka dobinen o nasledstvo so sine vetimo e Avraameske.

4 Mangava te vakerav kaj jekh nasledniko, sa džikote tano tikno čhavo, ov na razlikujnela pe taro jekh robo, iako sa pripadinela leske. 2 Soske, sa džikote na avela o dive kova so odredingja leskoro dad, javera manuša tane odgovorna leske hem javera upravinena e kherea. 3 Agjaar amen da, džikote siem sine čhave, siem sine robija, soske džaja sine palo način sar so razmislinela akava sveto. 4 Ama keda nakhlja o vreme kova so sine odredimo, o Devel bičhalgja ple Čhave, kova so sine bijamo tari jekh džuvli hem kova so sine telo Zakoni, 5 te šaj te oslobodinel hem te kinel okolen so sine telo Zakoni, te šaj amen te ova posvojme sar čhave.

6 Hem akana, adaleske so tumen sien čhave, o Devel bičhalela ko amare vile pli sila* koja so sine dendi leskere Čhaveske. Akaja sila terinela amen te vikina: „Abba,* mo Dad!“ 7 Adaleske, tu više na sian robo, nego čhavo e Devleske. Hem ako tu sian čhavo e Devleske, ov isto agjaar ka del tut nasledstvo.

8 Ustvari, džikote na pendžarena sine e Devle, tumen služinena sine sar robija e hovavne devlenge. 9 A akana keda pendžarena e Devle, ustvari, akana keda o Devel pendžargja tumen, sar šaj palem te iranen tumen ko bukja taro akava sveto so nane len nisavi korist hem mangena palem te oven lenge robija? 10 Tumen mislinena kaj nesave dive, masekija, periodija hem berša tane posebna, hem slavinena len. 11 Sekirimo sium tumenge, soske darava kaj adava so trudingjum man te pomožinav tumenge, šaj sine džabe.

12 Phraljalen, molinava tumen, oven sar so sium me, soske jekh vreme me da sium sine sar so sien tumen. Angleder tumen na ponašingjen tumen mancar lošno. 13 Setinena tumen kaj ačhiljum ki tumende adaleske so sium sine nasvalo hem tegani sine man prvo puti prilika te propovedinav tumenge o šukar haberi. 14 Iako mlo nasvalipe sine tumenge iskušenie, ama sepak tumen na otfrlingjen man hem na gadongjen tumen mandar, nego primingjen man sar Devleskoro angeli, sar o Hristos Isus. 15 Kaj tani adaja radost so sine tumen tegani? Soske, sigurno sium kaj sien sine spremna, čak ako šaj sine, te ikalen tumare jakhja hem te den len mange. 16 Dali akana, adaleske so vakerava tumenge adava soj čače, uljum tumaro dušmani? 17 Adala manuša kerena sa te šaj tumen te oven tari lengiri strana, ama na adaleske so isi len šukar namere, nego soske mangena te ciden tumen mandar te šaj celo vilea te džan pali lende. 18 A sekogaš tano šukar, ako nekoj kerela sa so šaj te pridobinel tumen adaleske so isi le šukar namere, hem adava na valjani te kerel samo keda me sium tumencar, 19 mle tikne čhave. Baši tumende palem isi man dukha save so isi jekhe džuvlja keda bijanela. Adala dukha ka trajnen sa džikote na oblikujnena tumari ličnost te ovel sar e Hristoseskiri. 20 Bi mangava sine akana te ovav tumencar hem te kerav tumencar lafi ko pošukar način, soske na džanava so te kerav tumencar.

21 Vakeren mange, tumen so mangena te ikeren tumen ko Zakoni, na džanena li so vakerela o Zakoni? 22 Na primer, pišimo tano kaj e Avraame sine le duj čhave, jekh tari sluginka, a jekh tari leskiri romni koja so na sine robinka. 23 Ama o čhavo tari sluginka sine bijamo sar so bijangjovena sa o javera čhave, a o čhavo tari leskiri romni sine bijamo preku e Devleskoro vetuvanje. 24 Sa akava isi le simbolično značenje. Soske, adala duj džuvlja pretstavinena duj sojuzija.* Jekh lendar sine kerdo ki planina Sinaj hem sa okola soj tane telo akava sojuz tane robija. Akava sojuz tano sar i Agara. 25 I Agara tani o Sinaj, i planina ki Arabija hem pretstavinela o avdisutno Erusalim, soske tani ko ropstvo ple čhavencar. 26 A o Erusalim kova soj ko nebo tano slobodno. Ov tano amari daj.

27 Soske, ko Spisija pišinela: „Radujn tut, tu so našti te ačhove khamni hem so na bijanea! Radosno vikin, tu so nane tut bijanibaskere dukha! Soske, i romni koja soj mukhli isi la poviše čhave tari okoja so isi la rom“. 28 A tumen phraljalen, sien čhave bijame preku e Devleskoro vetuvanje, isto sar so sine bijamo o Isak. 29 Ama isto sar tegani, okova so sine bijamo sar so bijangjovena sa o javera čhave, progoninela sine okole so sine bijamo preku e Devleskiri sila,* agjaar tano akana da. 30 Ama so vakerena o Spisija? Ki lende pišinela: „Brkin e sluginka hem lakere čhave, soske o čhavo e sluginkakoro nikogaš nane te ovel nasledniko zaedno e čhavea so isi tut tle romnjaja, koja so nane robinka“. 31 Znači, phraljalen, amen na siem čhave e sluginkakere, nego čhave e romnjakere, koja so nane robinka.

5 O Hristos oslobodingja amen te šaj te ovel amen asavki sloboda. Adaleske, ačhoven zorale hem ma mukhen palem te oven robija soj phanle ko jarem.*

2 Ake, me, o Pavle, vakerava tumenge kaj ako kerena tumen suneti, tegani nane te ovel tumen korist taro adava so kergja o Hristos. 3 Hem sekole manušeske so kerela pe suneti, palem vakerava kaj tano dužno te ikerel pe ko celo Zakoni. 4 Ako trudinena tumen o Devel te vakerel tumenge kaj sien pravedna preku o Zakoni, tegani tumen odvojnena tumen taro Hristos hem korkori tumen cidena tumen taro leskoro šukaripe so na zaslužinaja le. 5 A amen, nadinaja amen hem edvaj adžikeraja te ova pravedna anglo e Devleskere jakhja preku leskiri sila,* adaleske so isi amen vera. 6 Soske, adava dali tane kerde suneti ili na, e Hristos Isuseskere sledbenikonge nane le nisavi vrednost, nego važno tani samo i vera koja soj tani vodimi taro mangipe.

7 Tumen šukar prastana sine. Koj čhinavgja tumen taro adava ponadari da te ikeren tumen ko čačipe? 8 O sikajbe okolengoro so čhinavgje tumen na avela taro Devel kova so vikinela tumen. 9 Hari kvasaco kerela te ušljol celo humer. 10 Uverimo sium kaj tumen so sien ko jekhipe e Gospodarea ka soglasinen tumen mancar. A okova so buninela tumen, bilo koj te ovel, ka dobinel i kazna so zaslužinela la. 11 A ako me, phraljalen, ponadari da vakerava kaj valjani te ovel pe suneti, tegani na bi ovava sine panda progonimo. Hem tegani o stubo mučibaske više na bi ovela sine bar sopkibaske. 12 Keški te keren pe evnuhija* okola so trudinena pe te buninen tumen!

13 A tumen phraljalen sien sine birime te oven slobodna. Samo ma koristinen adaja sloboda sar prilika te zadovolinen tumare grešna želbe, nego o mangipe neka pottikninel tumen te služinen sar robija jekh jekheske. 14 Soske, celo Zakoni tano khedimo hem čhivdo ki akaja jekh zapoved: „Mang tle pašutne sar korkori tut“. 15 Ama, ako tumen ponadari da kicinena tumen hem hana tumen maškar tumende, pazinen ma te uništinen tumen jekh jekhea.

16 Adaleske vakerava tumenge: ponadari da živinen agjaar so ka mukhen te vodinel tumen e Devleskiri sila* hem agjaar nane te džan palo tumare želbe e teloskere. 17 Soske o telo, sebepi ple želbe tano protiv e Devleskiri sila,* a e Devleskiri sila tani protiv o telo. Akala bukja protivinena pe jekh jekheske hem agjaar tumen na kerena adava so mangena te keren. 18 Osven adava, ako vodinela tumen e Devleskiri sila,* tegani na sien telo Zakoni.

19 A o postapke e grešno teloskere jasno dikhena pe. Ola tane: nemoral,* melalipe, bezobrazno ponašibe,* 20 idolopoklonstvo, spiritizam,* dušmanluko, akošiba, ljubomora, te izbuvninel pe tari holi, seriozna nesoglasuvanja, podelbe, sekte,* 21 zavist, preterano pijbe, raspuštena zabave hem javera slična bukja. Me panda angleder predupredinava tumen sar so više predupredingjum tumen, kaj okola so kerena asavko nešto nane te nasledinen e Devleskoro Carstvo.

22 A o osobine* so avena tari e Devleskiri sila* tane: mangipe, radost, mir, strplivost, ljubeznost, šukaripe, vera, 23 krotkost, samokontrola. Protiv adava nane zakoni. 24 A okola soj tane e Hristos Isuseskere učenikija kovingje ko stubo pumaro telo hem pumare silna hem lošna želbe.

25 Ako živinaja sprema o vodstvo tari e Devleskiri sila,* tegani ponadari da te živina sprema o vodstvo so dobinaja le tari adaja sila. 26 Te na ova čalmdžie, ma te natprevarina amen jekh jekhea, te na zavidina jekh jekheske.

6 Phraljalen, čak ako nesavo manuš počminela te džal ko pogrešno drumo bizo te ovel svesno bašo adava, tumen so sien duhovna, ko jekh krotko način isprajnen le. Ama pazinen tumen, soske darava kaj šaj tumen da te oven iskušime. 2 Ponadari da phiraven o pharipa jekh jekheskere, hem agjaar ka ispolninen e Hristoseskoro zakoni. 3 Soske, ako nekoj mislinela kaj tano nešto, a nane ništo, korkori peste hovavela. 4 Ama, sekova manuš neka ispitinel ple postapke hem tegani ka ovel le pričina te radujnel pe bašo bukja so kerela len ov, a na adaleske so sporedinela pe e javerencar. 5 Soske, sekoj ka phiravel plo tovar.*

6 Isto agjaar, okova so sikljola bašo e Devleskoro lafi, neka delinel sa o šukar bukja so isi le okolea so sikavela le.

7 Ma hovavgjoven: e Devlea nane khelibe. Soske, so ka sejnel o manuš, adava ka khedel. 8 Okova so sejnela vodimo taro ple telesna želbe, taro telo ka khedel propast, a koj sejnela vodimo tari e Devleskiri sila,* tari e Devleskiri sila ka khedel večno životo. 9 Adaleske, ma te otkažina amen te kera šukaripe, soske ako na umorinaja amen, ka kheda o plodi keda ka avel vreme. 10 Adaleske, džikote isi amen prilika, te kera šukaripe sarinenge, a posebno amare phralenge hem phenjenge ki vera.

11 Dikhen kobor bare bukvencar pišinava tumenge akava pismo mle vastea.

12 Sa okola so mangena te ugodinen e javerenge, terinena tumen te oven suneti. Ola kerena adava samo te na oven progonime adaleske soj tane sledbenikija e Hristoseskere, kova so mulo ko stubo mučibaske.* 13 Soske, čak okola so kerena pe suneti na ikerena pe ko Zakoni, nego ola mangena tumen te keren tumen suneti te šaj ola te falinen pe adalea so tumen kergjen tumare teloske. 14 A me na mangava te falinav man nisave javere bukjaja, osven amare Gospodarea e Isus Hristosea, kova so mulo ko stubo mučibaske. Mange, o sveto tano osudimo te merel preku leste, a e svetoske, me sium osudimo te merav preku leste. 15 Soske, nane važno dali ka ovel pe suneti ili na, nego važno tano te ovel pe nešto nevo so stvorinela o Devel. 16 Sa okola so živinena sprema akava pravilo neka ovel len mir hem o Devel neka sikavel lenge milost. Ola tane e Devleskoro Izrael.

17 Otakana više nikoj ma te kerel mange problemija, soske me ko mlo telo phiravava o belegija kola so sikavena kaj sium e Isuseskoro robo.

18 Amaro Gospodari o Isus Hristos, phraljalen, neka sikavel tumenge plo šukaripe so na zaslužinaja le džikote sikavena ispravno stavi. Amin.