PISMO DŽI KO EFEŠANJA

1 Me o Pavle, so sium apostoli e Hristos Isuseskoro sprema e Devleskiri volja, pišinava akava pismo dži ko sveta manuša* soj ko Efes, kola soj verna hem tane učenikija e Hristos Isuseskere:

2 O Devel, amaro Dad, hem o Gospodari o Isus Hristos neka den tumen pumaro šukaripe so na zaslužinaja le hem mir.

3 Neka ovel falimo o Devel, o Dad amare Gospodareskoro e Isus Hristoseskoro, soske ko nebo dengja amen sekova blagoslov so avela tari leskiri sila* adaleske so siem e Hristoseskere učenikija. 4 Angleder te ovel o sveto ov biringja amen te ova ko jekhipe e Hristosea, te šaj te ova sveta hem bizi fleka angli leste adaleske so mangaja le. 5 Soske, ov angleder odlučingja te posvojnel amen sar ple čhave preku o Isus Hristos, adaleske so ov adava manglja hem adava tano sprema leskiri volja, 6 te šaj o manuša te falinen le adaleske so preku plo manglo Čhavo sikavgja amenge plo baro šukaripe so na zaslužinaja le. 7 Preku leskoro Čhavo siem oslobodime e otkupninaja* koja so platingja la ple ratea. Prostime tane amare grevija adaleske so o Devel sikavgja amenge plo baro šukaripe so na zaslužinaja le.

8 Ov but sikavgja amenge adava šukaripe so na zaslužinaja le hem dengja amen bari mudrost hem sposobnost šukar te haljova o bukja, 9 agjaar so otkringja amenge pli tajna* baši leskiri volja. Adaja tajna tani sprema adava so ov mangela hem sprema leskiri namera, 10 te sredinen pe sa o bukja keda ka avel o vreme bašo adava, ustvari palem sa te spojnel pe preku o Hristos, hem adava soj ko nebo hem adava soj ki phuv. Oja, preku leste ka oven spojme sa o bukja. 11 Amen siem ko jekhipe lea hem o Devel biringja amen te dobina o nasledstvo. Amen siem angleder birime sprema i namera okoleskiri kova so kerela sa sprema pli volja hem agjaar sar so odlučingja. 12 Amen siem o prva kola so nadingjem amen ko Hristos, hem o Devel biringja amen angleder te šaj te falina le hem te slavina le. 13 Ama tumen da isto agjaar nadingjen tumen ko Hristos otkeda šungjen o čačipe, ustvari o šukar haberi kaj o Devel spasinela tumen. Isto agjaar, preku o Hristos, otkeda verujngjen, sien sine zapečatime e Devleskere silaja* koja so sine tumenge vetimi. 14 E Devleskiri sila* tani garancija kaj ka dobina adava so o Devel vetingja amenge, te šaj okola so pripadinena e Devleske te oven oslobodime preku i otkupnina hem agjaar te ovel slavimo hem falimo o Devel.

15 Adaleske me da, otkeda šungjum baši tumari vera ko Gospodari o Isus hem o mangipe so sikavena okolenge soj sveta,* 16 na čhinavgjum te blagodarinav man e Devleske baši tumende. Me stalno spomninava tumen ko mle molitve, 17 te šaj o Devel amare Gospodareskoro e Isus Hristoseskoro, o Dad kova so isi le bari slava, te del tumen sila te šaj te oven mudra hem te haljoven o bukja so otkrinela len, hem agjaar šukar te pendžaren le. 18 Ov phravgja tumare jakhja* te šaj jasno te dikhen savi nadež sine tumenge dendi keda vikingja tumen hem savo baro* barvalipe ov ka del sar nasledstvo okolenge soj sveta, 19 hem te šaj te džanen e Devleskiri bari sila koja so ov dela la amenge, e vernikonge. Kobor bari tani adaja sila šaj jasno te dikhel pe taro bukja so o Devel kergja preku late. 20 Adale silaja o Devel voskresningja e Hristose taro mule hem čhivgja le te bešel tari pli desno strana ko nebo. 21 Ov tano upreder sekoja vlada, sekova avtoriteti, sekoja sila, sekova vladeteli hem upro sekova anav, hem adava na samo ko akava sveto,* nego hem ko okova so valjani te avel. 22 O Devel čhivgja sa te ovel telo leskere pre hem kergja le poglavari upro sa soj ko sobranie. 23 O sobranie tano leskoro telo soj pherdo leskere osobinencar hem o Hristos ko sekova način ispolninela sa.

2 Sebepi tumare greške hem grevija tumen sien sine mule, ama o Devel dengja tumen životo. 2 Tumen da angleder živinena sine sar so živinela akava sveto* hem sien sine poslušna e vladeteleske so isi le vlast upro vozduh kova so akana vlijajnela upro neposlušna manuša. Adava vozduh tano o način sar akala manuša razmislinena. 3 Čače, maškar lende sarine amen živinaja sine sprema o želbe amare teloskere, keraja sine adava so mangela amaro telo hem postapinaja sine sprema amare misle. Hem panda taro bijanibe zaslužinaja sine e Devleskiri holi, sar sa o javera. 4 Ama o Devel kova so isi le bari milost sikavgja amenge plo baro mangipe, 5 agjaar so dengja amen životo hem kergja te ova ko jekhipe e Hristosea panda džikote siem sine mule sebepi amare greške (preku o šukaripe so na zaslužinaja le, sien sine spasime). 6 Isto agjaar, voskresningja amen hem dengja amen thana ko nebo e Hristos Isusea, soske siem ko jekhipe lea. 7 O Devel kerela akava te šaj ko nevo sveto* so ka avel te sikavel amenge plo baro šukaripe so na zaslužinaja le, agjaar so ka kerel šukar bukja amenge kola so siem ko jekhipe e Hristos Isusea.

8 Preku plo šukaripe so na zaslužinaja le o Devel spasingja tumen baši tumari vera. Hem o Devel na dela tumen adava adaleske so zaslužingjen, nego dela tumen sar poklon. 9 Oja, adava na dobinela pe bašo šukar bukja so kerena pe, soske agjaar ka našti nikoj te falinel pe adalea. 10 Soske, o Devel kergja amen ple vastencar hem adaleske so siem ko jekhipe e Hristos Isusea ov stvoringja amen te kera šukar bukja, bukja kola so angleder odlučingja te kera len.

11 Adaleske, tumen kola so na sien Evreija, ma bistren kaj okola so sine kerde suneti taro manuša, vikinena tumen sine „bisunetlime“. 12 Ko adava vreme tumen na pendžarena sine e Hristose, sien sine dur taro izraelsko narodo hem sien sine jabandžie kolenge so na važinena sine o sojuzija* kola so ale taro e Devleskoro vetuvanje. Živinena sine ko sveto bizi nadež hem bizo te pendžaren e Devle. 13 Ama, tumen so angleder sien sine dur taro Devel, akana sar učenikija e Hristos Isuseskere alen paše uzo Devel preku e Hristoseskoro rat. 14 Soske, ov angja amenge mir hem ov tano adava kova so kergja o duj grupe te oven jekh hem rušingja o zido maškar lende kova so odvojnela len sine. 15 Ov ple teloja čhinavgja o dušmanluko, ustvari čhinavgja o Zakoni kova so sine le zapovedija hem pravilija, te šaj taro solduj grupe, kola soj leskere učenikija, te kerel jekh nevo manuš hem te anel mir, 16 hem preku plo meribe ko stubo mučibaske* kergja o solduj grupe te oven smirime e Devlea, te šaj adala duj grupe te oven jekh telo, soske ov ple meribaja mudargja o dušmanluko. 17 Isto agjaar, alo te vakerel o šukar haberi bašo mir tumenge so sien sine dur taro Devel hem okolenge so sine paše uzo Devel, 18 soske e Hristoseskiri žrtva kergja sarine amen, so siem taro solduj grupe, te molina amen e Dadeske soj ko nebo, soske sarine dobingjem i isto sila* taro Devel.

19 Adaleske, tumen na sien više jabandžie hem manuša so avena taro javera phuvja, nego isi tumen o isto državjanstvo sar so isi e sveta manušen hem sien delo tari e Devleskiri familija. 20 Tumen sien sar bara kolen so o Devel zidingja upro o temeli. Adava temeli tane o apostolija hem o prorokija, a o Hristos Isus tano o glavno bar ki kjuša ko temeli. 21 O delija tari adaja gradba tane šukar spojme maškar peste hem, adaleske soj tani ko jekhipe e Hristosea, adaja gradba bajrola sa džikote na ovela sveto hrami e Jehovaske.* 22 Adaleske so sien ko jekhipe e Hristosea, o Devel kergja tumen da, zaedno e javerencar, te oven jekh gradba kolate so živinela ov, soske adathe tani leskiri sila.*

3 Adaleske, me o Pavle, sium phanlo bašo Hristos Isus hem baši tumenge, e manušenge taro javera narodija.* 2 Sigurno šungjen kaj sine mange dendi i odgovornost te pomožinav tumenge te šaj te ovel tumen korist taro e Devleskoro šukaripe so na zaslužinaja le. 3 Oja, o Devel otkringja mange pli tajna,* sar so angleder kratko pišingjum tumenge bašo adava. 4 Znači, keda ka čitinen akava pismo, tumen ka dikhen kaj me haljovava e Devleskiri tajna* bašo Hristos. 5 Adaja tajna na sine otkrimi e manušenge taro generacie kola so sine angleder, sar soj otkrimi akana preku e Devleskiri sila* e apostolenge hem e prorokonge kola soj sveta. 6 I tajna tani akaja: okola so nane Evreija hem soj ko jekhipe e Hristos Isusea ka oven naslednikija zaedno lea hem ka oven delo taro isto telo. Hem adaleske so prifatingje o šukar haberi, ola ka dobinen o ista bukja kola so o Devel vetingja amenge. 7 Adaleske so o Devel sikavgja mange plo šukaripe so na zaslužinaja le, me uljum sluga adale tajnake. O Devel dengja man adava poklon keda dengja man pli sila.

8 A mange, kova so sium o najtikno taro sa okola soj sveta, o Devel sikavgja plo šukaripe so na zaslužinaja le, te šaj te propovedinav e manušenge taro javera narodija o šukar haberi bašo blagoslovija taro Hristos kola so našti te gejnen pe. 9 Hem te pomožinav e manušenge te dikhen sar o Devel, kova so stvoringja sa o bukja, vodinela te otkrinel pe leskiri tajna* koja so garavgja la vekoncar. 10 O Devel kergja adava te šaj akana preku o sobranie, o vladitelija hem o vlastija* ko nebo te dikhen e Devleskiri mudrost koja so ov sikavgja la ko razna načinija. 11 Adava tano sprema e Devleskiri večno namera e Hristos Isusea, amare Gospodarea, 12 hem adaleske so isi amen vera ko Hristos, isi amen sloboda te kera lafi hem šaj doverbaja, bizi nisavi prečka, te molina amen e Devleske. 13 Molinava tumen, ma oven obeshrabrime bašo mle nevolje so trpinava len tumaro sebepi, soske mle nevolje anena čest tumenge.

14 Adaleske perava ko kočaka anglo Dad, 15 soske ov kergja te postojnel sekoja familija ko nebo hem ki phuv. 16 Molinava man e Devleske, kole so isi le bari slava, te kerel tumen zorale* preku pli sila.* 17 Hem adaleske so isi tumen vera, o Hristos neka živinel ko tumare vile kola soj pherde mangipaja. Isto agjaar, molinava man te ačhoven cvrsta sar jekh baro kaš so isi le hor korenja. 18 Te šaj tumen, zaedno sa e sveta manušencar,* celosno te haljoven kobor tano buvlo, dugačko, učo hem hor o čačipe, 19 te pendžaren e Hristoseskoro mangipe kova soj tano pobaro taro sa adava so o manuša džanena hem agjaar taro Devel te dobinen sekoja leskiri osobina.

20 A ov ple silaja koja so vlijajnela upri amende, šaj te kerel but poviše taro sa o bukja so rodaja lestar ili so zamislinaja amenge. 21 Neka ovel slavimo o Devel preku o sobranie hem preku o Hristos Isus tari generacija ki generacija, zasekogaš. Amin.

4 Adaleske me, kova so sium phanlo bašo Gospodari, molinava tumen te živinen agjaar so ka sikaven kaj sien dostojna bašo adava so sien sine vikime. 2 Sekogaš oven ponizna, krotka, strpliva hem mangipaja trpinen tumen jekh jekhea. 3 Oven ko mir jekh jekhea hem iskreno trudinen tumen te ikeren o jekhipe kova so dobinela pe preku e Devleskiri sila.* 4 Jekh tano o telo hem jekh tani e Devleskiri sila,* sar soj tani jekh hem i nadež ki koja so sien vikime, 5 jekh Gospodari, jekh vera, jekh krstibe, 6 jekh tano o Devel hem Dad sarinenge. Ov tano najbaro taro sekova jekh, dejstvujnela preku sarinende hem upro sarinende.

7 Sekova jekh amendar dobingja taro Devel leskoro šukaripe so na zaslužinaja le hem o Hristos sine adava kova so sekaske amendar dengja akava poklon. 8 Soske, o Spisija vakerena: „Keda uklilo ko nebo, angja manušen kola so sine phanle hem adale manušen dengja sar poklon“. 9 A adava so vakerela kaj „uklilo“, značinela kaj angleder ov hulilo tele ki phuv. 10 Okova so hulilo tele ki phuv, ov isto hem uklilo poupre taro nebo te šaj te ispolninel sa.

11 Hem dengja nesave te oven apostolija, nesave te oven prorokija, nesave te propovedinen o šukar haberi, a nesave te oven pastirija hem učitelija, 12 te šaj te pomožinen okolenge soj sveta te džan ko ispravno drumo, te šaj te služinen e javerenge hem te šaj te zajakninen o sobranie kova soj tano e Hristoseskoro telo. 13 Ola ka keren adava sa džikote sarine amen na ovaja ko jekhipe ko sa so verujnaja hem sa džikote šukar na pendžaraja e Devleskere Čhave, te šaj agjaar te ova zrela manuša sar soj o Hristos. 14 Adaleske, ma te ova više sar tikne čhave so šunena razna hovavne sikljojba taro manuša so prevarinena e javeren, soske ola tane sar o čamco ko more kole so i bavlal hem o branija ingarena akari-okori. 15 Namesto adava, amen mora te vakera o čačipe, hem o mangipe neka pomožinel amen te bajrova ko sa o bukja te šaj te ova sar o Hristos, kova soj o šero e teloskoro. 16 Preku leste celo telo tano šukar povrzimo hem sa leskere delija složno sorabotinena, soske sekova zglobo so povrzinela len ispolninela adava bašo soj kerdo. Keda sekova jekh delo kerela pli uloga, adava pomožinela o telo te bajrol hem adaleske so isi mangipe celo telo ovela pozoralo.

17 Adaleske, anglo Gospodari vakerava tumenge akava hem ohrabrinava tumen te na živinen više sar so živinena o manuša kola so nane vernikija, soske ola razmislinena samo bašo bukja so na vredinena. 18 Ola* tane ki temnica hem dur tari nadež koja so dela o Devel adaleske so na mangena te pendžaren le hem lengere vile tane zorale sar bar. 19 Adaleske so nane len više nisavo čuvstvo bašo adava soj šukar a soj lošno, ola mukhle pe ko bezobrazno ponašibe,* te šaj te keren sekova melalipe bizo te čaljon.

20 Ama tumen siklilen hem džanena kaj o Hristos nane asavko. 21 Ov sikavgja soj tano o čačipe hem ako tumen šungjen hem sien sine sikavde lestar, tegani tumen šukar džanena akala bukja. 22 Tumen džanena kaj valjani te huljaven i purani ličnost, koja soj oblikujmi sprema tumaro purano način sar živinena sine hem kola so ruminena la sine o lošna želbe so hovavena tumen. 23 Adaleske, valjani ponadari da te meninen tumaro način sar razmislinena, 24 hem te uraven i nevi ličnost sprema e Devleskiri volja hem agjaar ka keren adava soj čače pravedno hem ka ačhoven verna e Devleske.

25 Adaleske, akana otkeda frdingjen tumendar o hovajbe, vakeren o čačipe jekh jekheske. Soske, sarine amen siem delija taro jekh isto telo hem zavisinaja jekh jekhestar. 26 Ako holjanena, ma grešinen. Ma mukhen te nakhel o dive, a tumen panda te oven holjame. 27 Ma mukhen than e Bengeske. 28 Koj čorgja, te na čorel više, nego neka kerel vredno hem česno buti ple vastencar, te šaj te del nešto okoleske so nane le. 29 Nijekh lošno lafi te na ikljol taro tumaro muj, nego samo adava soj šukar, te šaj te izgradinel e javeren keda valjani hem te ovel korisno okolenge so šunena le. 30 Ma razočarinen e Devle adalea so ka protivinen tumen leskere silake,* kolaja so zapečatingja tumen bašo dive keda ka oslobodinel tumen preku i otkupnina.*

31 Ciden tumendar sekoja omraza, holi, gnev, vikibe, lafija so vredžinena hem sa o javera lošna bukja. 32 Oven šukar jekh jekhea, sočuvstvitelna, hem spremno prostinen jekh jekheske sar o Devel so preku o Hristos spremno prostinela tumenge.

5 Adaleske, džan palo e Devleskoro primer, sar leskere mangle čhave, 2 hem ponadari sikaven mangipe, isto sar o Hristos so manglja amen hem dengja pe amenge sar žrtva koja so isi la prijatno miris e Devleske.

3 O nemoral* hem sekova melalipe ili alčnost ni ma te spomninel pe maškar tumende, sar so ličinela e sveta manušenge,* 4 ni bilo so javer so nane pristojno, sar soj: ponašibe so anela ladž, lafija vakerde bizo te mislinel pe hem bezobrazna šale. Namesto adava blagodarinen e Devleske. 5 Soske, tumen džanena hem šukar haljovena kaj nijekh manuš kova soj nemoralno,* nečisto ili alčno - asavko manuš tano isto sar okova so obožavinela idolija - nane te dobinel nasledstvo ko e Devleskoro Carstvo, koleste so vladinela o Hristos.

6 Ma mukhen nikoj te prevarinel tumen hovavne lafencar, soske bašo asavke bukja o Devel ka kazninel okolen soj neposlušna. 7 Adaleske, ma te ovel tumen ništo lencar. 8 Soske, tumen nekogaš sien sine sar temnica, ama akana sien sar svetlina, soske sien ko jekhipe e Gospodarea. Ponadari da živinen sar čhave e svetlinakere, 9 soske te živinel pe ki svetlina značinela te sikavel pe šukaripe ko sa o bukja, te ovel pe pravedno hem te živinel pe sprema o čačipe. 10 Ponadari da ispitinen te šaj te oven sigurna kola bukja tane prifatliva e Gospodareske. 11 Hem čhinaven te keren bukja kola so na vredinena hem kola so pripadinena e temnicake, sar so kerena ola, namesto adava sikaven kaj adala bukja tane lošna. 12 Soske, o bukja so ola kerena len tajno, ladžavo tano čak te spomninen pe. 13 Ama akana, i svetlina svetinela upro bukja soj lošna hem ko asavko način, o bukja soj tane lošna, jasno dikhjona. 14 Adaleske o Spisija vakerena: „Tu kova so sovea, džangavgjov hem ušti taro mule te šaj o Hristos te svetinel upri tute“.

15 Adaleske šukar pazinen sar živinena - na sar okola so nane mudra, nego sar okola soj mudra. 16 Šukar koristinen tumaro vreme,* soske o dive tane lošna. 17 Adaleske, ma oven više nerazumna, nego trudinen tumen te haljoven soj tani e Jehovaskiri* volja. 18 Isto agjaar, ma makjoven džikote piena mol, soske adava ka čhivel tumen te živinen raspušteno životo, nego ponadari da oven pherde e Devleskere silaja.* 19 Ohrabrinen tumen maškar tumende agjaar so ka giljaven psalmija, gilja so falinena e Devle hem gilja kolencar so obožavinaja e Devle. Giljaven taro vilo e Jehovaske* hem gilencar falinen le. 20 Bašo sa, sekogaš blagodarinen e Devleske kova soj amaro Dad, ko anav amare Gospodareskoro e Isus Hristoseskoro.

21 Oven podložna jekh jekheske adaleske so hor poštujnena e Hristose. 22 O romnja te oven podložna pumare romenge sar e Gospodareske, 23 soske o rom tano poglavari ple romnjake sar o Hristos soj tano poglavari e sobranieske, kova soj tano leskoro telo hem o Hristos tano leskoro spasiteli. 24 Ustvari, sar o sobranie soj tano podložno e Hristoseske, agjaar o romnja valjani te oven podložna pumare romenge ko sa. 25 Romalen, ponadari da mangen tumare romnjen, sar o Hristos so manglja e sobranie hem dengja plo životo leske, 26 te šaj te kerel le sveto hem te kerel le čisto e Devleskere lafea, sar te phene nangjargja le panjea. 27 Ov kergja adava te šaj o sobranie te svetinel anglo leskere jakhja. Ov mangela o sobranie te ovel sveto hem bizi maana.

28 Agjaar o roma da valjani te mangen pumare romnjen sar so mangena pumaro telo. O rom kova so mangela ple romnja, mangela korkori pes. 29 Soske, nikoj na mrzinela plo telo, nego arakhela le hem ceninela le, sar o Hristos e sobranie, 30 soske amen siem delija taro leskoro telo. 31 „Adaleske o manuš ka mukhel ple dade hem ple daja hem ka spojnel pe ple romnjaja, hem ola o duj ka oven jekh telo.“ 32 Akaja bari tajna* e Devleskiri baši koja so kerava lafi tani bašo Hristos hem o sobranie. 33 Znači, sekova jekh tumendar mora te mangel ple romnja sar korkori pes, a i romni valjani hor te poštujnel ple rome.

6 Čhavalen, šunen tumare roditelen sar so mangela o Gospodari, soske adava tano pravedno. 2 „Poštujn tle dade hem tle daja“, soske adaja tani i prvo zapoved kolaja soj dendo hem akava vetuvanje: 3 „Te šaj te ovel tuke šukar hem te živine but vreme ki phuv“. 4 A tumen o dada, ma holjankeren tumare čhaven, nego grižinen tumen lenge agjaar so ka vospitinen len hem ka isprajnen len sar so vakerela o Jehova* hem ka pomožinen lenge te razmislinen sar leste.

5 A tumen o robija, šunen e manušen soj tumare gospodarija, agjaar so iskreno taro vilo ka sikaven lenge hor poštovanje, sar so šunena e Hristose. 6 Ma oven lenge poslušna samo keda dikhena tumen o javera, te šaj te ugodinen e manušenge, namesto adava oven lenge poslušna sar e Hristoseskere robija kola so kerena e Devleskiri volja celo vilea. 7 Dobrovolno služinen tumare gospodarenge, sar e Jehovaske,* a na sar e manušenge. 8 Soske, tumen džanena kaj sekole manuše, bizi razlika dali tano robo ili slobodno, o Jehova* ka nagradinel le bašo sekova šukaripe so kerela. 9 A tumen o gospodarija, ponašinen tumen tumare roboncar ko isto način hem ma zakaninen tumen lenge, soske džanena kaj hem tumaro hem lengoro Gospodari tano ko nebo hem ov na delinela e manušen.*

10 Ko krajo, o Gospodari ponadari da neka del tumen pli sila, soske leskiri sila tani bari. 11 Uraven i celosno voeno oprema taro Devel te šaj te ačhoven zorale protiv e Bengeskere stapice. 12 Soske, amen na borinaja amen protiv o manuša,* nego protiv o demonija kola soj ko nebo. Ola tane o vlastija hem o vladetelija kola so vladinena e svetoja soj ki temnica. 13 Adaleske, len i celosno voeno oprema taro Devel te šaj te sprotivstavinen tumen akale dušmaneske ko lošna dive, hem otkeda ka keren sa so valjani, te ačhoven zorale.

14 Adaleske, ačhoven zorale. Phanden tumen ki polovina o pojas e čačipaskoro, čhiven ko kolin i pravednost sar oklop, 15 hem uraven ko pre i spremnost te propovedinen o šukar haberi bašo mir. 16 Osven sa adava, len o baro štiti e verakoro kolea so ka šaj te ačhaven sa o jagale strele e Bengeskere.* 17 Isto agjaar, čhiven tumenge ko šero o spasenie sar šlemi hem len ko vas o mači so avela tari e Devleskiri sila,* a adava mači tano e Devleskoro lafi, 18 džikote ponadari da molinena tumen preku e Devleskiri sila* ki sekoja prilika, agjaar so koristinena sekoja vrsta molitva hem celo vilea rodena taro Devel te pomožinel tumenge. Adaleske, oven džangavde hem sekogaš molinen tumen taro vilo bašo sa o sveta manuša.* 19 Isto agjaar, molinen e Devle te pomožinel mange te arakhav o ispravna lafija keda ka phravav mo muj, te šaj hrabro te propovedinav e Devleskiri tajna* bašo šukar haberi. 20 O Devel tano adava kova so bičhalgja man te propovedinav o šukar haberi. Adaleske sium phanlo ko sindžirija. Molinen e Devle baši mande te šaj te kerav lafi bašo šukar haberi bizi dar, sar so valjani te kerav lafi.

21 A akana, te šaj te džanen so ovela mancar hem sar sium, bašo sa adava ka vakerel tumenge o Tihik, mlo manglo phral hem verno sluga e Gospodareskoro. 22 Baš adaleske bičhalava le ki tumende, te šaj te džanen sar siem hem te utešinel tumen.

23 O Devel, kova soj amaro Dad, hem o Gospodari o Isus Hristos neka keren amare phralja hem phenja te ovel len mir, te mangen e javeren hem te ovel len vera. 24 O Devel neka sikavel plo šukaripe so na zaslužinaja le sa okolenge kola so nikogaš nane te čhinaven te mangen e Gospodare e Isus Hristose.