PISMO DŽI KO FILIPJANJA

1 Me o Pavle hem o Timotej, kola so siem robija e Hristos Isuseskere, pišinaja akava pismo dži ko sa o sveta manuša* soj tane učenikija e Hristos Isuseskere* so živinena ko Filipi, hem dži ko starešine hem o sluga-pomošnikija:

2 Neka ovel tumen o šukaripe so na zaslužinaja le hem o mir taro Devel, kova soj amaro Dad, hem taro Gospodari o Isus Hristos.

3 Sekogaš keda setinava man ki tumende, blagodarinava mle Devleske 4 hem sekova puti keda taro vilo molinava man e Devleske sekole jekheske tumendar, kerava le adava radosno, 5 bašo sa adava so kergjen te šaj te širinen o šukar haberi, panda taro prvo dive keda prifatingjen o šukar haberi, pa sa dži akana. 6 Uverimo sium kaj o Devel ka završinel i šukar buti so počmingja la ki tumende, džikote na avela o dive e Hristos Isuseskoro. 7 Isi man pravo te mislinav agjaar tumenge, soske mangava tumen celo vilea hem o Devel tumenge da sikavgja plo šukaripe so na zaslužinaja le isto sar so sikavgja mange. Tumen sarine poddržinena man akana, džikote sium phanlo ko sindžirija, ama isto keda braninava sine o šukar haberi hem keda trudinava man sine te dobina zakonsko pravo te propovedina o šukar haberi.

8 Soske, o Devel tano mange svedoko kobor but mangava te dikhav tumen sarinen. Mangava tumen isto sar so mangela tumen o Hristos Isus. 9 Hem ponadari molinava man tumaro mangipe sa poviše hem poviše te bajrol, pošukar te pendžaren hem šukar te haljoven e Devleskiri volja. 10 Molinava man te proceninen soj tano najvažno, te šaj te oven bizi maana hem te na sopkinen e javeren sa džikote na avela e Hristoseskoro dive. 11 Isto agjaar molinava man, adalea so ka pomožinel tumen o Isus Hristos, te keren sa poviše pravedna bukja,* te šaj te slavinen hem te falinen e Devle.

12 Phraljalen, mangava te džanen kaj adava so slučinela pe mange, ustvari pomožingja panda poviše te širinel pe o šukar haberi, 13 agjaar, celo straža e careskiri hem sa o javera šukar džanena kaj sium phanlo adaleske so služinava e Hristoseske. 14 Adava so sium phanlo dengja sila bute phralenge kola so služinena e Gospodareske hem akana ola da hrabro hem bizi dar vakerena e Devleskoro lafi.

15 Točno tano adava kaj nesave propovedinena bašo Hristos adaleske soj tane zavidliva hem mangena te natprevarinen pe, a javera kerena adava taro šukar motivija. 16 Okolen so isi len šukar motivija taro mangipe propovedinena o haberi bašo Hristos. Ola kerena adava soske džanena kaj me sium birimo te braninav o šukar haberi, 17 ama adala so na propovedinena taro ispravna motivija, nego adaleske so mangena te keren akošiba, ola mangena te keren mange problemija džikote sium phanlo. 18 Hem so postigninena adalea? Pa ništo javer, samo so palem ko bilo savo način propovedinela pe bašo Hristos, bizi razlika dali taro ispravna motivija ili na. Me radujnava man bašo adava hem ponadari da ka radujnav man, 19 soske džanava kaj ko krajo ka ovav spasimo bašo tumare molitve vakerde taro vilo hem adaleske so pomožinela man e Devleskiri sila* koja so sine dendi e Isus Hristoseske. 20 Uverimo sium hem nadinava man kaj nane te ovel ništo so ka kerel te ladžav, nego kaj ponadari da ka propovedinav bizi dar, te šaj akana te falinav* e Hristose sar so kerava sine adava sekogaš, bilo te živinav bilo te merav.

21 Soske, ako ačhovava dživdo, me živinava bašo Hristos, ama ako merava, adava ka ovel panda pošukar mange. 22 A ako ačhovava dživdo ko akava telo, tegani ka šaj te kerav poviše bašo Hristos. Ama sepak našti te vakerav so bi birinava. 23 Soske, na džanava koja taro akala duj bukja te birinav, soske mangava te ovav oslobodimo te šaj te ovav e Hristosea hem adava tano but pošukar. 24 Ama tumenge ka ovel pošukar me te ačhovav dživdo ko akava telo. 25 Adaleske so sium uverimo ko akava, džanava kaj ka ačhovav dživdo hem ka ovav sarinencar tumencar te šaj te napredujnen ki tumari služba bašo Devel hem te osetinen i radost so avela tari vera. 26 Keda ka iranav man ki tumende, tumari doverba ko Hristos Isus ka bajrol panda poviše mlo sebepi.

27 Živinen agjaar sar so valjani te živinen okola so širinena o šukar haberi bašo Hristos. Hem agjaar, bizi razlika dali ka avav ki tumende ili na, tumen ka ačhoven cvrsta, ka oven tumen ista misle hem ka oven ko jekhipe džikote zaedno borinena tumen te ikeren tumari vera ko šukar haberi. 28 Nikogaš ma daran taro okola so protivinena pe tumenge. Sa adava ka ovel dokaz kaj ola ka oven uništime, a tumen ka oven spasime. Adava dokaz avela taro Devel. 29 Tumenge sine dendi i čest, na samo te sikaven vera ko Hristos, nego isto agjaar hem te ciden muke baši leste. 30 Soske, tumen da borinena tumen e ista nevoljencar, kolencar so dikhena kaj me da borinava man hem šunena kaj me panda borinava man lencar.

2 Adaleske, ako maškar tumende ohrabrinena tumen sar hristijanja, ako utešinena tumen mangipaja, ako sikavena jekh jekheske griža, mangipe hem sočuvstvo, 2 keren te ovav but radosno agjaar so složno ka razmislinen hem ka ovel tumen o isto mangipe, ko sa ka oven ko jekhipe hem ka oven tumen o ista misle. 3 Ma keren ništo adaleske so mangena te akošen tumen ili tari gordost, nego ponizno dikhen e javeren sar pobare tumendar. 4 Hem ma dikhen samo tumenge te ovel šukar, nego isto agjaar e javerenge da.

5 Razmislinen agjaar sar so razmislinela sine o Hristos Isus, 6 kova so, iako sine slično sar o Devel, ov nikogaš na mislingja te lel e Devleskoro than hem te ovel jekh lea. 7 Namesto adava, ov otkažingja pe taro sa so sine le, prifatingja te ovel sar robo hem ulo manuš. 8 Na samo adava, keda alo sar manuš, sikavgja bari poniznost hem ulo poslušno dži ko meribe, hem adava meribe ko stubo mučibaske.* 9 Baš adaleske o Devel čhivgja le ki pobari položba tari adaja so sine le angleder hem celo vilea dengja le anav* soj tano upreder sekova javer anav, 10 te šaj e Isuseske ko anav te peren ko kočaka sa okola soj tane ko nebo, ki phuv hem teli phuv. 11 Hem sekova jekh* valjani javno te priznajnel kaj o Isus Hristos tano amaro Gospodari, te šaj agjaar te slavinel pe o Devel, amaro Dad.

12 Adaleske, mle mangle, sar so sien sine sekogaš poslušna, na samo džikote sium sine tumencar, nego panda poviše akana keda na sium tumencar, ponadari da den tumendar sa te oven spasime agjaar so ka daran hem hor ka poštujnen e Devle. 13 Soske, o Devel mangela te del tumen hem i želba hem i sila te postapinen sprema leskiri volja. 14 Keren sa bizo te žalinen tumen hem bizo te rasprajnen tumen, 15 te šaj te oven e Devleskere čhave so nane kriva bašo ništo hem soj tane čista vilengere. Agjaar so nane te oven kriva bašo ništo, tumen ka svetinen sar silno svetlina, iako živinena maškar akaja rumimi hem lošno generacija. 16 Cvrsto ikeren tumen ko e Devleskoro lafi so dela životo. Tegani ka ovel man pričina te radujnav man ko e Hristoseskoro dive, soske ka džanav kaj na prastandiljum hem na trudingjum man džabe. 17 Ama čak te dav man sar žrtva so čhorela pe* upri tumari žrtva hem upri služba so kerena la e Devleske, adaleske so isi tumen vera ki leste, me but radujnava man zaedno tumencar. 18 A isto agjaar tumen da valjani but te radujnen tumen zaedno mancar.

19 Nadinava man kaj o Gospodari o Isus ka mukhel sigende te bičhalav ki tumende e Timotee, te šaj keda ka dobinav haberi tumendar te ovav ohrabrimo. 20 Soske, nane man nikoj sar leste, kova so čače ka grižinel pe bašo adava so valjani tumenge. 21 Soske, sa o javera grižinena pe samo peske, a na bašo adava so mangela o Isus Hristos. 22 Ama tumen džanena kaj o Timotej sikavgja kaj nane asavko, nego kaj ov sar jekh čhavo ple dadea revno služingja mancar te širina o šukar haberi. 23 Adaleske, nadinava man kaj samo so ka doznajnav so ka ovel mancar, ka šaj te bičhalav le ki tumende. 24 Hem uverimo sium kaj, ako tani e Gospodareskiri volja, panda hari me da ka šaj te avav ki tumende.

25 Ama akana mislinava kaj valjani te bičhalav ki tumende e Epafrodite, mlo phral kova so služinela zaedno mancar hem kova so isto sar mande tano vojniko e Hristoseskoro, kole so tumen bičhalgjen te pomožinel mange, 26 soske edvaj adžikerela te dikhel tumen hem tano but tažno so šungjen kaj nasvalilo. 27 Oja, ov sine doborom nasvalo so ka merel sine, ama o Devel žalingja le hem žalingja mande da, te šaj te na ovel mange panda popharo. 28 Bičhalava le ki tumende so šaj posigate, te šaj keda palem ka dikhen le te radujnen tumen, tegani me da nane te sekirinav man doborom tumenge. 29 Adaleske, dodžakeren le phravde vastencar sar so dodžakerena e Gospodareskere sledbenikon. Hem sikaven kaj ceninena but asavke phralen, 30 soske ov haričkaske ka merel sine džikote služinela sine e Hristoseske* hem čhivgja ki opasnost plo životo baši mande, soske tumen našti sine te oven akate te pomožinen mange.

3 Ko krajo phraljalen, ponadari da radujnen tumen adaleske so sien sledbenikija e Gospodareskere. Mange nane pharo te pišinav tumenge palem bašo ista bukja, soske adava tano bašo tumaro šukaripe.

2 Pazinen tumen taro manuša so nane čista,* pazinen tumen taro okola so kerena lošnipe e javerenge, pazinen tumen taro okola kola so rodena tumendar te oven kerde suneti. 3 Soske, amen isi amen o čačutno sunetluko, amen kola so služinaja e Devleske vodime tari leskiri sila,* dičinaja amen e Hristos Isusea hem nane amen doverba ko telo. 4 Ama man, poviše taro javera manuša, isi man soske te ovel man doverba ko telo.

Hem ako nekoj mislinela kaj isi le pričine te ovel le doverba ko telo, tegani man isi man panda poviše: 5 sium sine kerdo suneti ko oftoto dive, Izraelco sium taro e Benjamineskoro pleme, bijamo sium sar Evrei tari daj hem taro dad so sine Evreija. Sar farisei strogo ikerava man sine ko Zakoni, 6 tari revnost progoninava sine o sobranie hem strogo ikerava man sine ko adava so vakerela o Zakoni kaj tano ispravno. 7 Sa adala bukja so angle sine mange vredna, akana sebepi o Hristos dikhava kaj nane len nisavi vrednost. 8 Hem na samo adava, nijekh buti nane vredno keda sporedinava la e najskapoceno bukjaja, adava tano so pendžarava e Hristos Isuse mle Gospodare. Leskoro sebepi otkažingjum man taro sa, hem ko sa adava dikhava sar gjubre, samo te šaj te dobinav e Hristose 9 hem te ovav ko jekhipe lea. Ama na vakerava kaj sium pravedno adaleske so ikerava man ko Zakoni, nego adaleske so verujnava ko Hristos, soske o Devel dikhela amen sar pravedna adaleske so isi amen vera. 10 Mli cel tani te džanav e Hristose hem i sila leskere voskresnibaskiri, te cidav muke sar leste, pa čak te merav sar leste. 11 Soske, nadinava man ako šaj nesar te ovav maškar okola so prva ka voskresninen.

12 Me na vakerava kaj više dobingjum akaja nagrada, a ni palem kaj više uljum sovršeno. Ama dava mandar sa, te šaj te dobinav i nagrada. Soske, džanava kaj o Hristos Isus biringja man bašo akava. 13 Phraljalen, me na mislinava kaj više dobingjum i nagrada. Ama jekh tano sigurno: bistrava adava soj tano pali mande hem trudinava man te resav adava soj tano angli mande. 14 Prastava te resav dži ki mli cel te dobinav i nagrada ko nebo, koja so o Devel dela la amenge, kolen so vikingja amen preku o Hristos Isus. 15 Adaleske, sarine amen so siem zrela valjani agjaar te razmislina. Ama ako nekoj razmislinela pojaver, tegani o Devel neka pomožinel leske te razmislinel ispravno. 16 Bizi razlika kobor napredujngjem dži akana, valjani ponadari da te napredujna, džikote džaja ko akava isto drumo.

17 Phraljalen, sarine džan palo mlo primer hem dikhen okolen so džana palo primer so dengjem tumen. 18 Soske, isi but kola so akana ponašinena pe sar dušmanja so mrzinena e Hristoseskoro stubo mučibaske.* Lendar but puti vakerava tumenge sine, ama angle keda kerava sine lendar lafi, adava kerava le sine radosno, ama akana keda kerava lendar lafi, rovava. 19 Ola ka oven uništime, lengere želbe tano lengoro devel,* ola dičinena pe e bukjencar kolendar so valjani te ladžan hem mislinena samo bašo bukja kola soj ki phuv. 20 A amaro kher tano ko nebo* hem amen edvaj adžikeraja e spasitele te avel adathar, amare Gospodare soj tano ko nebo, o Isus Hristos. 21 Ov ka koristinel pli bari mokj so dobingja la, te vladinel upri sa. Hem ka kerel amaro telo, kova soj slabo, te ovel slavno sar leskoro.

4 Phraljalen, but mangava tumen hem edvaj adžikerava te dikhav tumen. Tumen sien mli radost hem sien mange sar kruna. Mangle phraljalen, pottikninava tumen te ačhoven verna* e Gospodareske.

2 Pottikninava e Evodija hem e Sintihija te oven len o ista misle džikote služinena e Gospodareske. 3 Molinava tute da, mlo verno sorabotniko, te pomožine akale phenjenge kola so boringje pe bašo šukar haberi zaedno mancar, e Klementea hem e javere mle sorabotnikoncar, kolengere so anava tane pišime ko lil e životoskoro.

4 Sekogaš radujnen tumen bašo Gospodari. Hem palem vakerava tumenge: radujnen tumen! 5 Sa o manuša neka dikhen kaj sien razumna.* O Gospodari tano paše. 6 Ma sekirinen tumen bašo ništo, nego sa adava so valjani tumenge roden e Devlestar ki molitva. Molinen tumen leske celo vilea hem blagodarinen tumen leske. 7 Ako kerena agjaar o mir taro Devel, kova soj upreder taro adava so šaj o manuš te haljol, ka arakhel tumare vile hem tumare misle preku o Hristos Isus.

8 Ko krajo phraljalen, sa soj čačutno, sa soj važno, sa soj pravedno, sa soj čisto, sa so pottikninela ko mangipe, bašo sa so kerela pe šukar lafi, sa soj šukar, sa so vredinela te falinel pe, bašo adava razmislinen. 9 Keren adava so siklilen, so prifatingjen, so šungjen hem so dikhlen mandar. Tegani o Devel kova so dela mir ka ovel tumencar.

10 Me but radujnava man hem sium blagodarno e Gospodareske so palem počmingjen te mislinen mange. Džanava kaj tumen sekogaš mislinena sine mange, ama na sine tumen prilika te sikaven adava. 11 Na vakerava akava adaleske so falinela mange nešto, soske sikliljum te ovav zadovolno ki bilo koja situacija. 12 Džanava sar tano te ovel tut hari, a džanava hem sar tano te ovel tut but. Sikliljum sar te ovav zadovolno ko sa hem ki sekoja situacija - hem keda sium čalo hem keda sium bokhalo, hem keda isi man but hem keda isi man hari. 13 Sa šaj te kerav, soske pomožinela mange okova so dela man sila.

14 Sepak šukar kergjen so pomožingjen man ko mle nevolje. 15 Ustvari, tumen o Filipjanja but šukar džanena kaj keda me geljum mange tari Makedonija, otkeda tumen prvo puti šungjen bašo šukar haberi, na pomožingja mange ni jekh javer sobranie, osven tumen. 16 Čak keda sium sine ko Solun, tumen bičhalgjen mange nesave bukja so valjangje mange hem adava na jekh puti, nego duj puti. 17 Na vakerava akava adaleske so rodava tumendar nešto. Mangava samo o šukar bukja so kerena te dodajnen pe tumenge ki smetka.* 18 Ama isi man sa so valjani mange, čak poviše taro adava. Ništo na falinela mange otkeda taro Epafrodit dobingjum adava so bičhalgjen mange. Tumaro poklon tano sar prijatno miris hem žrtva prifatlivo e Devleske. 19 A mlo Devel taro plo baro* barvalipe ka del tumen sa adava so valjani tumenge preku o Hristos Isus. 20 Neka slavinel pe amaro Devel hem Dad zasekogaš! Amin.

21 Pozdravinen mandar sekole sveto manuše* soj e Hristos Isuseskoro učeniko. O phralja da soj mancar pozdravinena tumen. 22 Pozdravinena tumen sa o sveta manuša, a posebno okola tari e cezareskiri palata.

23 Amaro Gospodari o Isus Hristos neka sikavel tumenge plo šukaripe so na zaslužinaja le adaleske so isi tumen ispravno stavi.